ባንካችን አቢሲንያ በጅማ ከተማ በአብዱልከሪም አባገሮ (ፔሌ) ስም አዲስ ቅርንጫፍ ከፈተ

የባንካችን ጅማ ዲስትሪክት መጋቢት 19 ቀን 2018 ዓ.ም በአቶ አብዱልከሪም አባገሮ (ፔሌ) ስም በጅማ ከተማ በተለምዶ ፈረንጅ አራዳ አካባቢ እጅግ ዘመናዊ ቅርንጫፍ ከፈተ።

ቅርንጫፎቹን በሃገር ባለውለታዎች በመሰየም የሚታወቀው ባንካችን ከዚህ ቀደም የጅማ ከተማ ቆርቋሪ በሆኑት በንጉሥ አባጅፋር ስም ቅርንጫፍ የከፈተ ሲሆን፣ አሁን ደግሞ የሳቸዉ አራተኛ ትውልድ በሆኑት  አብዱልከሪም አባገሮ (ፔሌ) በከተማዋ 10ኛ ቅርንጫፉን ከፍቷል።

በ1952 ዓ.ም በጅማ ከተማ የተወለዱት አብዱልከሪም አባገሮ በኢትዮጵያ ተስፋ ብሔራዊ ቡድን ውስጥ በመጫወት ስማቸው በጉልህ የሚወሳ ሲሆን፣ “ፔሌ” የሚለውን የቅጽል ስም ያገኙትም በወቅቱ በነበራቸው ድንቅ የእግር ኳስ ብቃት ምክንያት ነበር። 

አቶ አብዱልከሪም የአምስቱ ጊቤ ታሪክ አባት በመባል ሲታወቁ፣ በተለይም የሰላም አምባሳደር ከመሆናቸዉ ጋር ተያይዞ ብዙዎች ''የጂማው ማህተመ ጋንዲ'' ሲሉ ይጠሯቸዋል።

አቶ አብዱልከሪም  በልማት፣ በጤና፣ በትምህርት፣ በታሪክና ባህል ዘርፎች በርካታ የበጎ አድራጎት ሥራዎችን በማከናወን ለጅማ ከተማ ብሎም ለሃገራቸው ጉልህ አስተዋጽኦ ያደረጉ ሲሆን በአሁኑ ወቅትም የጅማ ከተማ የሰላም አምባሳደር በመሆን በተለያዩ ተቋማት በማገልገል ላይ ይገኛሉ።

በመርሃ ግብሩ ላይም የጅማ ከተማ ከፍተኛ የመንግስት ሃላፊዎች፣ የባንካችን ከፍተኛ የሥራ ሐላፊዎች፣ የጅማ ከተማ ነዋሪዎች እና ጥሪ የተደረገላቸዉ እንግዶች ተገኝተዋል።

ባንካችንና ቪዛ የዓለም ዋንጫን ለመታደም ዕጣ የወጣላቸዉን የ3ኛ ዙር ዕድለኞች ይፋ አደረጉ።

ባንካችን አቢሲንያ እና ቪዛ ደንበኞችን ለማበረታታት ብሎም ለመሸለም የ2026 ፊፋ ዓለም ዋንጫን በስፍራው በአካል ተገኝተው ለመከታተል የሚያስችል ዕጣ የወጣላቸዉን የሶስተኛ ዙር 4 ዕድለኞች በጋራ ይፋ አደረጉ። መጋቢት 22 ቀን 2018 ዓ.ም በዋናው መ/ቤት የባንካችን የሥራ ሐላፊዎችና የኢትዮጵያ ሎተሪ አገልግሎት ታዛቢዎች በተገኙበት መርሐ ግብር ላይ የባንካችን ማርኬቲንግ ዳይሬክተር አቶ ተስፋዬ አበበ የዕጣ ማውጣቱን ሥነ-ሥርዓት በይፋ አስጀምረዋል። በወጣው ዕጣ መሠረትም 2 የባንካችን የምስራቅ አዲስ ዲስትሪክት ደንበኞች (የዕጣ ቁጥር 500010553 እና 000023676 ) ፣ 1 የምዕራብ አዲስ ደንበኛ (የዕጣ ቁጥር 900030682) እና 1 የሃዋሳ ዲስትሪክት ደንበኛ (የዕጣ ቁጥር 900033744) በድምሩ 4 የባንካችን ደንበኞች ዕድለኞች ሆነዋል። በዚህ የሽያጭ ዘመቻ ጠንካራ የደንበኞች ተሳትፎ የታየ ሲሆን፣ ባለፈው አንድ ሳምንት ብቻ ከ8,600 በላይ ኩፖኖች የአቢሲንያ ባንክ ቪዛ ካርዶችን በመጠቀም ከ1,000 ብር በላይ ግብይቶችን ለፈጸሙ ደንበኞች ተልከዋል። ይህ የሽያጭ ዘመቻ በባንካችን እና በቪዛ መካከል በመላው ኢትዮጵያ የክፍያ ስርዓቶችን ፍጥነት፣ ደህንነት እና ቅልጥፍና ለማሻሻል ያለመ ሰፊ ስትራቴጂካዊ ትብብር አካል ነው። ተጨማሪ ዕጣዎች በቀሪዎቹ ሳምንታት በሚኖሩ ቀጣይ ዙሮችም የሚወጡ ሲሆን፣ ይህም ለደንበኞች በየዕለቱ የቪዛ ካርድ ሲጠቀሙ የዓለም ዋንጫ ታዳሚ የመሆን ዕድል የሚሰጥ ይሆናል።