የገና በዓልን ምክንያት በማድረግ ባንካችን ለሰሊሆም የአዕምሮ ህሙማን መርጃ ማህበር የ500 ሺህ ብር ድጋፍ አደረገ

• ለአዕምሮ ህሙማኑ የምሳ ግብዣም አድርጓል

ባንካችን አቢሲንያ የገና በዓልን ምክንያት በማድረግ ዛሬ ታህሳስ 27፣ 2018 ዓ.ም ለሰሊሆም የአዕምሮ ህሙማን መርጃ ማህበር የ500 ሺህ ብር ድጋፍና በማዕከሉ ተጠልለው ለሚገኙ ህሙማን የምሳ ግብዣ አደረገ።

ባንካችንን በመወከል በስፍራው የተገኙት የመካከለኛው አዲስ አበባ ዲስትሪክት ዳይሬክተር አቶ ብሩክ  አለማየሁ ድጋፉን ለሰሊሆም የአዕምሮ ህሙማን መርጃ ማህበር መስራችና ዋና ስ/አስኪያጅ አቶ ሚኪያስ ለገሰ አስረክበዋል።

አቶ ብሩክ ድጋፉን ካስረከቡ በኋላ እንደተናገሩት አቢሲንያ ባንክ ማህበራዊ ሃላፊነቱን ለመወጣት ያለው ቁርጠኝነት በየጊዜው በሚያደርጋቸው መሰል ድጋፎች የሚገለጽ ሲሆን ዛሬም የተደረገው ድጋፍ የዚሁ አካል ነው ብለዋል። አቶ ብሩክ ‘’ዛሬ ተዘዋውረን ባየነው ነገር ልባችን ተነክቷል፤ እናም ድጋፋችን ተጠናክሮ የሚቀጥል ይሆናል’’ በማለት ጨምረው ገልጸዋል።

የሰሊሆም የአዕምሮ ህሙማን መርጃ ማህበር መስራችና ዋና ስ/አስኪያጅ አቶ ሚኪያስ ለገሰ በበኩላቸው እንደተናገሩት አቢሲንያ ባንክ ድጋፍ ሲያደርግላቸው ይህ የመጀመሪያው እንዳልሆነ ገልጸው፣ ባንኩ በቀጣይም ከጎናቸው እንዲሆንና ድጋፉ እንዳይለያቸው ጠይቀዋል።

በተጨማሪም የባንካችን የስራ ሃላፊዎች እና ሠራተኞች ለአረጋውያኑ የምሳ ግብዣ ያደረጉ ሲሆን የምሳ ግብዣው ወጪ የተሸፈነው የመካከለኛው አዲስ አበባ ዲስትሪክት ሠራተኞች ከደሞዛቸው ካዋጡት ገንዘብ እንደሆነ ተገልጿል።

‘‘ትውልድን በሥነ-ምግባር፣ተቋምን በአሰራር!’’ በሚል መሪ ቃል ለባንካችን ሠራተኞች ሲሰጥ የነበረው ስልጠና ተጠናቀቀ


ባንካችን ለሠራተኞቹ ሲሰጥ የቆየው ‘‘ትውልድን በሥነ-ምግባር፣ተቋምን በአሰራር!’’ በሚል መሪ ቃል ሙስና እና ብልሹ አሰራርን መከላከል ላይ ያተኮረ ስልጠና ተጠናቀቀ።

የባንካችን የሥነ-ምግባርና ፀረ-ሙስና መምሪያ በራሱ ከሚሰጣቸው ስልጠናዎች በተጨማሪ ከፌዴራል ሥነ-ምግባርና ፀረ-ሙስና ኮሚሽን እንዲሁም ከምሁራን ጋር በጋራ ስልጠና የሚሰጥ ሲሆን በያዝነው የ2018 የበጀት ዓመትም በ7 ዙር ለ700 ሰራተኞች ስልጠና ሰጥቷል።

ለሁለት ቀናት በኢንተር ለግዠሪ ሆቴል በተሰጠው ስልጠና ላይ የሙስና ምንነትና አይነቶች ፣የሙስና ወንጀሎች እና ልዩ ባህሪያት፣በባንክ ዘርፍ የሚስተዋሉ የሙስና ተጋላጭነት እና ብልሹ አሰራሮች እንዲሁም የሚያስከትሉት ጉዳት፣ የሙስና መከላከያ ስልቶች …ወዘተ የሚሉ ጉዳዮች ተነስተዋል።

ስልጠናውንም የኢትዮጵያ ፐብሊክ ሰርቪስ ዩኒቨርሲቲ መምህራን የሆኑት ዶ/ር ዮሐንስ ጴጥሮስ፣ዶ/ር ተስፋዬ ሂርጰሳ እና ዶ/ር አወቀ ሰጥተዋል። ስልጠናው በተግባር እና በውይይት ላይ የተመሠረተ ሲሆን፣ በመጨረሻም ሰልጣኞቹ ያገኙትን ዕውቀት የሚፈትሽ ምዘና ተካሂዷል።

በስልጠናው ማጠቃለያም የባንካችን የስልጠና ክፍል ስራ አስኪያጅ የሆኑት ወ/ሮ ማርታ ዘውዴ ሰልጣኞቹን ያገኛችሁትን ዕውቀትና ክህሎት በመጠቀም እራሳችሁን እንዲሁም ባንካችንን ከሙስናና ብልሹ አሰራር መጠበቅ አለባችሁ ሲሉ አሳስበዋል።

በስልጠናው ማጠናቀቂያ ላይ የኢንተር ለግዠሪ ሆቴል ለ7ኛው ዙር ሰልጣኞች ልዩ ባህላዊ የቡና መስተንግዶ አድርጓል ።

ይህ ስልጠና ባለፈው ዓመት ለባንካችን ከፍተኛ አመራሮችና በየደረጃው ላሉ የስራ ሃላፊዎች መሰጠቱ አይዘነጋም።

ምንጭ ፡ ሥነ-ምግባርና ፀረ ሙስና መምሪያ