ባንካችን አቢሲንያ ከፋስትፔይ ጋር ዲጂታል የሐዋላ አገልግሎት መስጠት የሚያስችለውን የመግባቢያ ስምምነት ተፈራረመ
አቢሲንያ ባንክ ዛሬ ነሐሴ 22 ቀን 2017 ዓ.ም ከፋስትፔይ (Fastpay LLC) ጋር ዓለም ዓቀፍ ዲጂታል የሐዋላ አገልግሎት አሰጣጡን ለማቀላጠፍ የሚረዳውን የሳይበር ሶርስ (Cybersource) የክፍያ አማራጭ ቴክኖሎጂ የስትራቴጂክ አጋርነት ስምምነት በሃያት ሬጀንሲ ሆቴል ተፈራርሟል፡፡ 

ባንካችንን በመወከል የደንበኞች ማኔጅመነት ዋና አፊሰር አቶ ደሳለኝ ይዘንጋውና በፋስትፔይ በኩል ደግሞ  የተቋሙ ዋና ስራ አስፈጻሚ አቶ ፍጹም መርዳሳ የመግባቢያ ስምምነቱን ፈርመዋል፡፡

ይህ ስምምነት በውጪ የሚኖሩ ኢትዮጵያውያንና ትውልደ ኢትዮጵያውያን ወይም ማንኛውም ቪዛ ወይም ማስተር ካርድ ያላቸው ግለሰቦች በኢትዮጵያ ለሚገኙ ወዳጅ ዘመዶቻቸው ገንዘብ በዲጂታል የሐዋላ አገልግሎት መላክ የሚያስችላቸው የክፍያ አማራጭ ነው፡፡ ከዚህ አኳያ ፋስትፔይ (Fastpay LLC) ባበለጸገው “ፋስትፔይ” መተግበሪያ አማካኝት የቪዛ ወይም ማስተር ካርዳቸውን ተጠቅመው ወደሀገር ቤት በሐዋላ ገንዘብ ለሚልኩ ሰዎች ወዳጅ ዘመዶች ባንካችን ክፍያቸውን በማቀላጠፍ ድርሻውን ይወጣል፡፡ 
ይህ ቴክኖሎጂ በዋነኛነት የውጭ ምንዛሪ አቅምን ያሳድጋል፣በውጪ ለሚኖሩ ሰዎች ከሌሎች የሐዋላ መላኪያ ዘዴዎች በተሻለ በቀላሉና ከአገልግሎት ክፍያ ነጻ በሆነ መልኩ ገንዘብ መላክ ያስችላል፣ የዲጂታል ግብይቶችን በማሳደግ የደንበኞችን ልምድና እርካታን ያሻሽላል፤ ከዚህም በላይ መንግስት በኢ-መደበኛ መንገድ የሚደረገውን የሐዋላ ዝውውር ለመቀነስ የሚያደርገውን ጥረት በከፍተኛ ደረጃ ያግዛል፡፡ 
እጅግ ዘመናዊ በሆኑ ቴክኖሎጂዎች የተደገፉ የባንክ አገልግሎቶችን በመጀመር ረገድ ግንባር ቀደም የሆነው ባንካችን በቅርቡም ተግባር ላይ ያዋለው አዲስ ስትራቴጂም ለዲጂታል ስርዓት ከፍተኛ ትኩረት የሰጠ ሲሆን ዛሬም አስፈላጊውን የአደረጃጀትና የቴክኖሎጂ ስርዓት በማቀናጀት ለደንበኞቹ ከመቼውም ጊዜ በላይ ፈጣንና ቀልጣፋ አገልግሎት ለመስጠት ተዘጋጅቷል፡፡

መስማት የተሳናቸው ሴቶች በባንካችን ዋና መ/ቤት ተገኝተው የአዲስ ዓመት ማብሰሪያ አበባ አየሽ ሆይ ጭፈራ አቀረቡ

በዴፍ ኮሚዩኒቲ ዴቨሎፕመንት ኦርጋናይዜሽን የሚደገፉ መስማት የተሳናቸው ሴቶች የ2018 ዓ.ም አዲስ ዓመትን አስመልክተው በባንካችን ዋና መ/ቤት በመገኘት በሃገራችን የአዲስ ዓመት ማብሰሪያ የሆነውን የእንቁጣጣሽ ወይም "አበባ አየሽ ሆይ" ዜማ አቀረቡ።

እነዚህ በቁጥር አስራ ሁለት የሚሆኑ ሴቶች በሃገር ባህል ልብስ አምረውና ደምቀው ያለባቸውን የመስማት ውስንነት ወደጎን ትተው ሲወዛወዙና ሲጨፍሩ የተመልካቾችን ቀልብ በእጅጉ ገዝተውት ነበረ።

እንደሚታወቀው ባንካችን አቢሲንያ ማኅበራዊ ኃላፊነቱን ለመወጣትና የማኅበረሰባችንን ችግሮች ለመቀነስ የበኩሉን አስተዋጽኦ እያደረገ የሚገኝ ሲሆን፣ ለአብነትም ማየት ለተሳናቸው ወገኖች የሚያገለግል ባለማዳመጫ ኤ.ቲ.ኤም ስራ ላይ ካዋለ ቆይቷል፡፡

በተመሳሳይም ባንካችን መስማት የተሳናቸው ወገኖቻችን ምቹ የባንክ አገልግሎት እንዲያገኙና እንዲሁም በእነዚህ ወገኖቻችን ዙሪያ የተለያዩ ስራዎችን እያከናወነ ለሚገኘው ዴፍ ኮሚዩኒቲ ዴቨሎፕመንት ኦርጋናይዜሽን የብር 100,000(አንድ መቶ ሺሕ) ድጋፍ አድጓል፡፡

ትናንት ጷግሜ 3 ቀን 2017 ዓ.ም በባንካችን ዋና መ/ቤት በተካሄደው በዚህ ደማቅ ሥነ-ሥርዓት ላይም የባንካችን ሴት አመራሮችና ሠራተኞች ታድመው ነበር።