አቢሲንያ ባንክ በወለድ ነጻ አገልግሎቱ “አቢሲንያ አሚን” በሶስት ትምህርት ቤቶች በመገኘት ለተማሪዎች እና መምህራን የማበረታቻ ሽልማት አበረከተ!
አቢሲንያ ባንክ በወለድ ነጻ የባንክ አገልግሎቱ (አቢሲንያ አሚን) በኩል ማኅበራዊ ኃላፊነቱን ከመወጣት አንጻር ከሚያከናውናቸው በርካታ ተግባራት አንዱ የሆነውና ውጤታማ ተማሪዎችን የሚሸልምበት መርሐ ግብር ተከናወነ።
ለአገራዊ የትምህርት ዕድገትና ለትውልድ የዕውቀት ሽግግር መሠረት ለመሆን የራሱ ግዙፍ አስተዋጽዖ እንዳለው ታምኖበት የሚከወነው "አሚን ስኩል አዋርድ" ንቁና በሁለንተናዊ ዕውቀቱ ብቁ የሆነ ሃገር ተረካቢ ዜጋ ከማፍራት አንፃር፣ አዎንታዊ አሻራን ከማስቀመጡ ባሻገር፤ በተማሪዎች መካከል የሚፈጥረው ጤናማ የውድድር ስሜትና ውጤታማነት፤ እንደዚሁም የመማር ማስተማር ሥርዓቱን የበለጠ ፍሬያማ ከማድረግ አንጻር ያለው ድርሻ የላቀ ነው።
ባንካችን በትምህርታቸው የላቀ ውጤት ያስመዘገቡ ተማሪዎችን የማበረታታትና የመሸለም ተግባሩን ባለፉት ሁለት ዓመታት ሲያከናውን የቆየ ሲሆን፤ ዘንድሮም ለሶስተኛ ጊዜ በተመሳሳይ ሁኔታ በተመረጡ ትምህርት ቤቶች በድምቀት በመከወን ላይ ይገኛል፡፡
በመዲናችን አዲስ አበባ እና በሌሎች የክልል ከተሞች በሚገኙ ስምንት ትምህርት ቤቶች የትምህርት ዘመኑን መጠናቀቅ አስመልክቶ የሚዘጋጀው የሽልማት መርሐ ግብር፤ እስካሁን ድረስ በሶስት ትምህርት ቤቶች ማለትም በነጃሺ፣ በረዛን እና በነፍራ አካዳሚዎች፤ የባንካችን ከፍተኛ የሥራ ኃላፊዎች በተገኙበት የላቀ ውጤት ላመጡ ተማሪዎችና መምህራን የሽልማት ሥነ ሥርዓቱን ማከናወን ችሏል፡፡
በዝግጅቶቹ ከየሴክሽኑ ከአንደኛ እስከ ሶስተኛ ደረጃ በመውጣት ላጠናቀቁ 73 ተማሪዎች ለእያንዳንዳቸው የገንዘብ ሽልማት ያበረከተ ሲሆን፤ ከሁሉም ሴክሽን አንደኛ በመውጣት ላጠናቀቁ ተማሪዎችም ብር 10,000 እንዲሁም ተማሪዎችን በክህሎትና በስነ ምግባር በማነጽ አስተዋጽኦ ላበረከቱ ከየትምህርት ቤቱ ለተመረጡ መምህራንም ለእያንዳንዳቸው የ9,000 ብር የገንዘብ ሽልማት አበርክቷል፡፡
ይህ ተማሪዎችን የማበረታታትና መምህራንን የማመስገን ተግባር፤ እንደ ከዚህ ቀደሙ ሁሉ በአዲስ አበባ እና በሌሎች የክልል ከተሞችም ተጠናክሮ የሚቀጥል ይሆናል፡፡