بما إني في فترة راحة من الكتابة فقولت لنفسي ليه مطلعش البوستات اللي في ال Draft لسه مخلصتش؛ انشرها زي ما هي لا هكملها ولا هراجعها ولما اجي اكملها ابقي اكتبها بصيغة ثانية؛ ودا بوست قاعد من 28 فبراير في الدرافت مستني يكمل؛ فكفاية عليه كده

-------

من الأمور اللي الغرب بيضمن بيها تفوقه المستمر علي دول العالم الثالث هو ما يعرف باستنزاف العقول أو Brain Drain او بصيغة أخرى هجرة العقول Human capital flight... وتعالوا ندردش شوية ونعرف القصة دي بتحصل ازاي..

*️⃣ في ناس هيطلعوا عباقرة في كل مكان؛ المنظومة التعليمية الجيدة هتخلي فرص ظهور العباقرة أكبر وأفضل؛ لكن هيفضل حتي في المنظومات الضعيفة في فرصة ولو قليلة للعقول المبهرة.

*️⃣ في ميزة في العقول اللي بتكبر في ظروف صعبة وهي إنها طلع عنيها عشان تبقي كويسة؛ الحاجة اللي قاعد في منظومة كويسة بيعملها بسهولة؛ هو بيطلع عينه عشان يعملها؛ فلما ينجح بيكون (عظمة ناشف) فدا لو اتوفر له الإمكانيات بيتحول ل عبقري...

*️⃣ المنظومة الغربية بتسعى إن دول العالم الثالث تبقي مجرد مزرعة ليهم؛ يبيعوا لها منتجاتهم؛ يسرقوا المواد الخام برخص التراب؛ وغيره من الأمور.. مجرد عالم ثالث كده؛ ناس خارج الأسوار بتاعة قصة يوتوبيا للي قرأها... وان شاء الله هيكون في بوست عن تاريخ الغرب مع العالم الثالث ونشوف حصل ايه.

*️⃣ المهم يعني بيكون ضمن منظومة السيطرة ( الفساد) أنظمة عالم ثالث بتصرف علي أي حاجة الا المواطن؛ أو بمعني أدق عقل المواطن وصحته... وبكده نضمن ان الدولة دي هيفضل المواطن عندها متخلف وضعيف فمش هيحصل انه ينافسنا...

*️⃣ الفساد والظلم بيضمنوا بيئة غير صحية للانسان؛ تعينات بقاعدة الولاء وليس الكفاءة؛ بكده تفضل الدولة دي ضعيفة تاخد مننا قروض؛ والفساد يضيع فلوس القروض دي في مشاريع بدون عائد؛ فيرجعوا ياخدوا قروض ثاني وثالث ورابع ويضيعوها... فوضع المواطن يبقي اسوء... واحنا نكسب أكثر..

*️⃣ طيب وسط المنظومة دي طلع شخص مخة نظيف؛ يلاقي المنظومة الفاسدة دي مش بتقدره؛ بل بترقي واحد تاني عشان ابن الدكتور ورئيس الجامعة أو عشان تقرير أمني؛ فهو من جواه يبقي ناقم... يبص يلاقي الغرب بيقوله ما تبعد عن الأوباش دول وتيجي عندي... فلوس كثير ونراعيك ونطورك.

*️⃣ فيبدأ يهرب من دولته ويروح الغرب؛ أو لو مستواه نصف جيد يروح الخليج... مين يفضل في البلد؟ اللي مستواه ضعيف لا يصلح لا أوروبا وأمريكا... يفضل العاهات.. فدا يؤدي الي ان كل صاحب شغل يعاني عشان يلاقي كفاءات عالية؛ فتضعف المشاريع والشركات في الدولة دي... ويبقي مستحيل تنافس الأوروبيين اللي عندهم الكفاءات.

*️⃣ كمل بقي الحلزونة؛ تضعف الدولة أكثر؛ يقل عدد العقول الجيدة؛ والغرب يبقي ثري أكثر؛ فلما يبقي معاه فلوس أكثر يقدر يدفع بيها رواتب أعلي ففرص انه يسحب عقول أكثر من العالم الثالث تزيد؛ فيقل عقول العالم الثالث المبدعة فيتخلف أكثر والغرب يبقي ثري أكثر وهكذا وتتكرر الحلزونة...

*️⃣ فتبص حوليك في البلد؛ فين الناس الشاطرة؟ فعلا بقوا قليلين ويوم بعد يوم بيقلوا أكثر... بالطبع مش هيبقوا صفر ومفهوم دا لكن بيقل نسبتهم.... فلو قولنا الناس اللي عقولها كويسة الطبيعي يبقوا 10% في الدول؛ فتلاقي الغرب عنده ال 10% بتاعته؛ ولامم وسارق 25% من حول العالم... وفي دولنا تلاقيهم بقوا 1%.

*️⃣ تلاقي الغرب يعلن عن ابتكارات ومنتجات مبهرة؛ فيبص المتخلف العربي عندنا ويقول شايفين ابداعات الغرب؛ وشايفين تخلفنا... ميعرفش إن الغرب سرق عقولنا بفلوسه اللي سارقها منتا ودعمه للفساد؛ وعمل ال ابتكارات دي بيها... فهو سرق فلوسنا ب الاستعمار وراكم الثروة؛ ثم سرق فلوسنا بالتصدير الغير متكافئ بعد الاستقلال؛ وسرق عقولنا... وطور حاجات...

*️⃣ فمع الوقت؛ الغرب يزداد ثراء وعالما يزداد فقراً.... وهنا نفكر ونقول ايه السبب.... امممم اكيد الزيادة السكانية 😁... لا الاستعمار ولا سرقة العقول ولا الفساد...


⬅️⬅️ للتذكير هذا البوست مكتوب غير مكتمل بوضعه الحالي من 28 فبراير فبلاش حد يربطه بأي أحداث جاريه؛ هو مكتوب من 4 شهور ولم ينشر لعدم الاكتمال

زي النهاردة 18 يونيو 1956 كان الجلاء... بالمناسبة دي أنا هعيد نشر بوست قديم كتبته في 2017 ثم أعدت نشره في 2020...

⬅️⬅️⬅️ إزاي خرج الانجليز من مصر 🤔🤔؟!!

*️⃣ دا سؤال كان شاغلني من فترة طويلة؛ إيه أجبر الإنجليز على الخروج من مصر؛ محصلش موقعة حربية بينا وبينهم ولا ميليشيات وحرب عصابات ضخمة زي الجزائر 🇩🇿 ولا مقاطعة شعبية مهولة زي الهند 🇮🇳 ولا أي حدث ضخم؛ فإزاي حصل بعد الإطاحة بالملك إن الضباط الاحرار قالوا لهم فجأة سيبوا مصر فمشيوا؛ كده عادي خلاص!!!

*️⃣ القصة بدأت لما الإنجليز دخلوا مصر أيام عرابي 1882 ووقتها الشعب كان مدجن فقبل عادي بوجودهم (نفس الشعب اللي كان رفض دخول الفرنسيين قبلها ب 80 سنة) واستمر الإنجليز تحت مسمى الوصاية على مصر لغاية ما جت سنة 1922 اعترفوا باستقلال مصر لكن تحت وصايتهم برضك.

*️⃣ استمرت محاولات الحكومات المصرية إقناع الإنجليز بالخروج وإعطاء مصر الاستقلال الحقيقي لغاية معاهدة 1936 اللي كل اللي درسناه عنها في المدرسة إنها كانت اتفاقية دفاع مشترك بس؛ لكن كان فيها بنود بتقول الانجليز يخرجوا من مصر كلها عدا قواعد حول قناة السويس لحمايتها لمدة 20 سنة يخلصوا في 1956.

*️⃣ هوب قامت الحرب العالمية ومصر منفذتش بنود مساعدة الانجليز فحصل "تثبيت" الملك فاروق الشهير بمحاصرة القصر الملكي سنة 1942 وتم اجبار مصر عالحرب في صف الحلفاء.

*️⃣ بعد الحرب ما خلصت راحت مصر مباشرة قالت للانجليز نفذوا البنود وانسحبوا من مصر وبالفعل خلال أعوام 46-47-48 انسحب الانجليز من كل القواعد في مصر في كل أرجاء مصر عدا منطقة قناة السويس. وفي خرائط منشورة للانسحاب دا.

*️⃣ جت حرب 48 مصر والجيش المصري خسر.. اللي ميعرفوش كثير إننا مش بس خسرنا بل تم عمل مطاردة من الجيش الإسرائيلي لينا وإسرائيل دخلت جوا سيناء؛ فالحكومة المصرية راحت للجيش الانجليزي في القناة وقالت له بينا اتفاقية دفاع مشترك 1936 ومصر بتتعرض للهجوم فلازم تساعدونا ولازم تضربوا الإسرائيلين.

*️⃣ لكن وقتها الانجليز محركوش قواتهم للدفاع عن مصر لكنهم بعتوا إنذار للجيش الإسرائيلي إنه ينسحب ويخرج من مصر؛ وبالفعل انسحبوا لكن اخدوا ام الرشراش. وبالمناسبة وقتها الملك فاروق طلع قرار بقفل مضيق تيران أمام البحرية الإسرائيلية. وظل الإغلاق دا شغال لغاية ما الإسرائيلين أجبروا عبد الناصر سنة 1957 على إلغاء قرار فاروق وفتح الملاحة مقابل الخروج من سيناء. وناصر وافق بس دا مش موضوعنا.

*️⃣ بعد حرب 48 الحكومة رجعت تاني للمفاوضات مع الإنجليز والمرة دي طلبوا خروجهم كمان من قواعد قناة السويس وإعطاء مصر الاستقلال التام.

*️⃣ بدأت بالفعل سنة 1950 واستمرت سنة المفاوضات لكن الانجليز تعنتوا ورفضوا طلب الحكومة المصرية وقالوا لها مش هنخرج من القناة؛ فالحكومة رداً على كده حصل الموقف الأخطر تاريخياً.

*️⃣ في اكتوبر 1951 اعلنت الحكومة المصرية الغاء معاهدة 1936 وتجميد أي مفاوضات وإعلان الإنجليز قوة احتلال رسمية لمصر. عارف إنكم هتقولوا إزاي يعني مكانوش قوة احتلال.

*️⃣ قبل الالغاء كان وجود الانجليز في القواعد يعد قانوني باتفاق بينهم وبين حكومة مصر يعني مش احتلال ولا قاعدين غصب عننا رسمياً؛ فمينفعش حد فعلياَ يروح يهاجم مقراتهم ولا يتعرض لهم لإنهم موجودين بدعوة منك؛ لكن بالالغاء بقوا يعتبروا قوة احتلال.

*️⃣ لما بقوا قوة احتلال فهنا بدأ الفدائيين بمهاجمة القواعد الإنجليزية بكثرة ووتم إصدار أوامر سرية من الحكومة وقتها للشرطة المصرية بمساعدة الفدائيين سراً واستمر الوضع دا لمدة 3 شهور.

*️⃣ في يناير 1952 أعلن قائد الجيش الانجليزي في مصر أن الحكومة والشرطة بتساعد المقاومة وحرك قواته ودخل الإسماعيلية وطلب من مدير الأمن والمحافظ الاستسلام وهنا حصلت الموقعه الشهيرة بين الشرطة المصرية والانجليز يوم 25 يناير ومن هنا جاء عيد الشرطة باستشهاد الظباط المصريين.
ت
*️⃣ بعد الاحداث دي غرقت مصر في فوضى 6 شهور وحريق القاهرة واقالات متتالية لحكومات ثم تم الاطاحة بفاروق وجه الظباط الاحرار

*️⃣ مع وصول الظباط الاحرار أعلنوا مواصلة تنفيذ نفس الطريقة للحكومة السابقة لفاروق وهى المفاوضات لكن في نفس الوقت نسيب برضك الفدائيين. والأمر فضل يزيد وبقي شبه يومي الاعتداء (مش شرط قتل لكن اي نوع اعتداء).

*️⃣ هنا هدد قائد الانجليز في مصر للمرة الثانية بتكرار نفس فكرة الهجوم بتاع الاسماعيلية؛ لكن الحكومة المصرية تجاهلته تماماً وتفاوضت مع إنجلترا مباشرة؛ ولسبب ما قائد الانجليز منفذش التهديدات (غالباً الأمريكان السبب لإنه كان جه وقت قصقصة ريش انجلترا خلاص)...

*️⃣ حكومة بريطانيا أعلنت موافقتها على تنفيذ بند معاهدة 1936 وهو الخروج من مصر بعد 20 سنة أي سنة 1956.

*️⃣ وزي النهاردة من 66 سنة خرج آخر جندي إنجليزي من أرض مصر

الانسحاب ومفاوضاته بدأوا من العهد الملكي لكن اتنفذت في عهد الظباط الاحرار.

من كام يوم صادفت مسرحية المتزوجون؛ وهي من أنجح المسرحيات الكوميدية طبعاً وكمان بتحمل نفس البرمجة الفكرية التقليدية بتاعة الفقراء زي الفل والفقراء آه معهمش فلوس بس سعداء ولو اتبدل حالهم وبقوا أغنياء مش هيكونوا سعداء زي أيام الفقر. فإرضى بقى بحالة الفقر يا شعب وخلاص... أكلاشية سينمائي تقليدي متكرر حتى من العصر الملكي زي فيلم لو كنت غني بتاع بشارة وكيم وعبد الفتاح القصري سنة 42.

*️⃣ المهم نرجع للمتزوجون بقي؛ في حته كان المعلم طربقها الجزار (زكريا موافي) بيقول لحنفي (جورج سيدهم) هتتجوز بنتي؛ فجورج قاله دا مرتبي 33 جنية و 34 قرش.

*️⃣ فجالي فضول أعرف هو الفقير المدقع اللي عايش في بدروم ومش بيلاقي ياكل نص الشهر وبيهربوا من دفع الإيجار وووو دا المرتب بتاعه يساوي كام بمعايير عصرنا.

*️⃣ لقيت إن ال 1 جنية مصري وقت المسرحية 78/79 يساوي 100 جنية مصري تقريباً في 2022 ودا التضخم بالأرقام الرسمية؛ يعني فعليا أكثر بشوية حلوين

*️⃣ يعني الفقير المدقع اللي مش لاقي دا؛ بياخد ما يوازي رسمي فوق 3300 جنية وفي عصره كانت الكهرباء والمايه وأنبوبة البوتجاز شبة مجانية؛ وكانت الجمعية بتوفر سلع مدعمة حقيقي... وكده فقير مدقع... طيب المواطن الحالي يحب يقول ايه للمواطن من 40/50 سنة وهو بياخد عشرات أضعاف راتب ابوه وجده؛ عالورق يعني عالورق.

⬅️ للمتابعة بس التضخم الرسمي وبكرر تاني الرسمي

1 جنية سنة 1960 = 240 جنية في 2020
1 جنية سنة 1970 = 183 جنية في 2020
1 جنية سنة 1980 = 87 جنية في 2020
1 جنية سنة 1990 = 18 جنية في 2020
1 جنية سنة 2000 = 6.5 جنية في 2020
1 جنية سنة 2010 = 3.25 جنية في 2020

آدي أخرة اللي يتفرج علي مسرحيات قديمة ويكون بيركز في الداتا والأرقام.

لما مسحت أبلكيشن الفيسبوك من 3 أيام؛ انخفض متابعتي ليه وللأخبار والكوكب بيحصل فيه ايه بنسبة لا تقل عن 75%.. اه أقدر أفتحه من الكومبيوتر زي دلوقتي؛ واه اقدر افتح من براوزر الموبايل

*️⃣ بس الكونسبت نفسه بتاع إن أيقونة الفيسبوك متشوفهاش فمش بييجي على بالك خالص تفتحه

*️⃣ يعني ساعات كنت بفتح الموبايل اشوف ايميل شغل جايلي؛ ايقونة الجيميل تحت أيقونة الفيسبوك؛ أخلص ايميل وعيني تقع عالفيسبوك أروح فاتحه... يعني أنا في الظروف العادية مكانش هييجي في بالي أصلاً أفتحه واتابعه لولا انه وقع قصاد عيني.

*️⃣ دا نفس السبب اللي تلاقي مثلاً شركات أو محلات معينة لما تشتري منها تبيع لك في شنط عالية الجودة... الشنط الغالية تكلفة إضافية أصلاً لكن المحلات دي بتنظر للشنطة بشكل مختلف أكثر من مجرد وعاء للسلعة.. الشنط الرديئة زي بتاعة السوبر ماركت هيكون مكانها الزبالة؛ لكن كلنا لما نصادف شنطة كويسة بنشيلها عشان لما نيجي نازلين وناخد شيء معانا بنحطه في الشنطة الكويسة دي... بس كده احتفظنا بالشنطة بتاعتهم وفي يوم عينك هتقع عليها فتقول ااااه صحيح أنا عاوز اروح اشتري كذا من عندهم... فإنتا دلوقتي افتكرتهم وروحت تشتري منهم عشان عينك وقعت قصادهم.

*️⃣ لنفس السبب الصراعات بتاعة بيبسي وكوكا كولا... هو في حد في الكوكب ميعرفهمش؟ لا طبعاً بس هما بيسعوا يكونوا قصاد عينك أطول أكثر فهما اللي يبقوا في بالك.

*️⃣ ولما يكون حد عاوز استغفر الله العظيم يعمل رجيم 😂😂 فلازم يعمل بلوك لكل صفحات الأكل ويشيل برامج الأكل أو يحطها في فولدر يخفيها ويوقف النوتفيكيشن ليها... لإنه ممكن يكون زي الأسد قاعد ولا مهتم بالأكل وهوبااا ييجي نوتفيكيشن عرض أكل فيجوع فيقرر يشتري وراااااح رااااح رجيمك يا صابر.

*️⃣ الفيسبوك ومواقع التواصل بقى عندها لوغارتميات وذكاء صناعي دوره يعرف حاجتين؛ انتا بتحب ايه يطلعه لك؛ وايه يستفزك برضك يطلعه لك... انتا داخل الفيس تشوف بوست عادي؛ هوبا تلاقي حد بيشتم في فريقك الكروي؛ تخش في خناقة معاه وتعليقات وتقعد ساعتين ثلاثة.... هل أصلاً كنت هتضيع الوقت دا لولا إنك شوفت البوست الفلاني؟ لا طبعاً.

*️⃣ فأنا مجرد شلت البرنامج بس من قدام عيني؛ انخفض متابعتي للفيسبوك بنسبة لا تقل عن 75%... رغم إني أقدر افتح كروم واشوف الفيسبوك منه على نفس الموبايل؛ بس دا شبه محصلش لإن استخدام فيسبوك من كروم موبايل سخيف...

*️⃣ العيب الوحيد في التجربة دي إني كنت معتمد عالفيسبوك كمصدر أخبار رئيسي؛ بس مش مهم قوي يعني؛ الخبر المهم هيوصلني هيوصلني والحمد لله معنديش عقد نفسيه إني لازم أروح أكتب الحق حصل كذا قبل الناس عشان يتقالي واااو وكده... أدينا قاعدين ونشوف المكسب أكبر من الخسارة أم لا... لإننا كبار وعارفين إن مفيش شيء اسمه مكسب بس أو شيء اسمه خسارة بس؛ لازم تضحي بشيء عشان تكسب شيء تاني قصاده. وأنا حالياً بعمل مقايضة؛ بضحي بإني معرفش أخبار ومعرفتي بالأحداث تبقى أقل وأبطئ بل وممكن معرفش أمور؛ في مقابل صحتي النفسية اللي هي لوحدها متضرره؛ وكمان وقتي... يا مسهل.

بما إننا بدأنا شهري 7 ثم 8 الأكثر حرارة والأكثر استخداماً للتكييف؛ نحب نفكر الناس إن في 3 أرقام تاخد بالك لما تعديهم في استهلاك الكهرباء.. وهم الكيلو 101 ودا بيخصم 28 جنية والكيلو 651 ودا بيخصم 145 جنية والكيلو 1001 ودا بيخصم 185 جنية...

*️⃣ اللي فاهم الشرائح شغالة إزاي خلاص تمام واللي مش فاهم يكمل معايا... الفكرة إن شرائح الكهرباء في مصر فيها إعادة تسعير للاستهلاك السابق بعد تجاوز رقم معين...

*️⃣ يعني بالبلدي كده بتكون الدولة بتحاسبك مثلاً مثلاً الكيلو ب 40 قرش وتفضل تحاسبك كده وبعدين توصل لشريحة معينة فبعدها كإن الدولة بتقولك كده إنتا غني بقى بص هنحاسبك من دلوقتي ب 60 قرش والقديم كله هنعيد حسابه ب 60 قرش يعني تدينا 20 قرش فارق على كل كيلو

*️⃣ وبعد شوية إنتا لسه بتستهلك فيتقالك بص الكيلو هيبقى 100 قرش والقديم أنا كنت حاسبتك عليه ب 40 ثم أخدت بعدها 20 قرش فارق وبقوا 60؛ هات بقى عالقديم 40 قرش كمان. وهكذا

*️⃣ فلو جيت لقيت نفسك يوم 29 في الشهر واستهلاكك 635 كيلو.. بص خليها عليك ومتشغلش التكييف اليومين اللي فاضلين... وإلا هتكسر ال 650 كيلو ويعاد تسعير ال 650 كيلو كلهم تاني وتكع 145 جنية فارق إعادة استهلاك.

طبعاً دا مش بوست من بوستاتي المعتادة؛ لكن مجرد موقف حصل معايا الشهر الماضي ببص في العداد لقيت نفسي قربت من الكيلو 650.. فقولت يا ترى كام شخص بيحصله زيي ويلبس ال 145 جنية عشان يوم... أصل لو لقيت نفسك هتجيب 650 كليو يوم 20 في الشهر؛ خلاص يعني مش هتوقف استهلاك 10 أيام... بس مش ذكاء خالص تكسر ال 650 كيلو أو ال 1000 كيلو يوم 30 في الشهر.... فدا تذكير لعل وعسي يصادف حد زيي.

في حاجة بتسقط من ذهن الكثيرين وهي التطور الطبيعي للزمن؛ مواكبة تطور الزمن لا يعني تطور بل ثبات؛ لكن لإن المفهوم بتاع التطور الطبيعي بتسقط من ذهن الغالبية؛ فبيقدر البعض يشبه مواكبة الزمن بإنه طفرات.

*️⃣ يعني مثلاً لما تيجي تقول موازنة مصر 2022/2023 هي الأكبر في تاريخها؛ أيوا ايه الجديد؟ طيب انا هغمض وهشتغل ساحر أهو وجالا جالا وهقولكم المستقبل؛ موازنة 2023/2024 هتبقي أكبر منها وتاخد اللقب بتاع الأكبر بالتاريخ؛ وموازنة 2025 أكبر ووو... عادي جداً انتا دولة نامية فعااادي جداً

بصوا سيبكم من السياسة عشان مش عاوز وجع دماغ

*️⃣ تخيل معايا حملة بتاع الإنترنت اللامحدود؛ دا مثال واضح على التطور الطبيعي للزمن... كام شخص تعرفه يقولك أنا بتتسرق الباقة بتاعتي؟ أنا كنت مشترك زمان في باقة ال 100 جيجا وكانت بتفيض؛ وبعدين قعدوا يسرقوا حبه حبه؛ تدريجي لقيت الباقة يادوبك بتكفي ودلوقتي بقت بتخلص يوم 20.. وأنا نفس الشخص ونفس استخدامي اليومي الساعتين ثلاثة لما اروح البيت... شوفت السرقة ووو.

*️⃣ لو فرضنا ان كل المعطيات اللي قالها صديقك صح؛ فالاجابة ممكن متبقاش السرقة بل التطور الطبيعي للزمن.

*️⃣ لو رجعت 10 سنين لورا يعني سنة 2012؛ تلاقي سرعات الانترنت كانت ضعيفة؛ أحسن شاشة في تليفون وقتها كانت HD... فهنا مصممي المواقع كانوا ب يحطوا صور جودتها مناسبة مع الشاشات وصغيرة بحيث متقعدش كثير تحمل لان الانترنت مش قوي وقتها... ولما تدخل يوتيوب يعدل الجودة بحيث تناسب شاشتك وتبقي 720p آخرها... فلو باقتك كانت 40 جيجا فكانت تكفي وتفيض.

*️⃣ مع الزمن بقي عادي شاشات 1080p وحتي 1440p عادي... وصانعي المحتوى بقى أي حد موبايله يصور FHD و 4K فيرفعه عاليوتيوب... وخدمات البث زي نتفليكس وغيرهم دعموا 4K واليوتيوب وفر الجودة دي... اصحاب المواقع مبقوش يقدروا يعملوا موقع بالصور قليلة الجودة؛ لان الموبايلات الحديثة شاشاتها عالية فأي صورة ضعيفة (هتبكسل) فبقت الصفحة حجمها ضخم.

*️⃣ فإنتا نفس الشخص بقيت تفتح نفس الموقع وتقعد نفس عدد الساعات؛ بس الموقع دا بقي يستهلك اضعاف الإنترنت... فاللي كان يكفيه 40 جيجا في 2012 مبقاش يكفيه 100 في 2022 لان ببساطة دا التطور الطبيعي للزمن.

*️⃣ خد بقي مفهوم التطور الطبيعي للزمن وقيسه زي ما تحب؛ طبعاً في امثلة شريرة بتحصل حولينا بيتم التلاعب بيها بعقول البسطاء اللي مش فاهمين مفهوم التطور الطبيعي للزمن وايهامهم بإن اي حاجة هي انجاز مبهر... لكن بلاش

خلينا في الإنترنت ويا رب الباقات تزيد؛ عشان أنا مبقاش يكفيني 250 جيجا شهري فالبيت 😭😭😭

بقيت واحد من اللي قاعدين في المدرج يا والدي

*️⃣ يوم 6 أكتوبر 2003 بدأ تداول ال 10 جنية الحالية الورقية؛ طبعاً 6 أكتوبر إجازة فهي فعلياً نزلت البنوك يوم 7 أكتوبر 2003.

*️⃣ في نفس اليوم دا بالليل بابا روح ووزع علي كل واحد فينا أنا وإخواتي ال 10 جنية الجديدة؛ كان بقالنا شهر ونص بنسمع عنها بس ومحدش شافها؛ لكن لكون والدي وقتها نائب مدير فرع البنك الأهلي والمسئول عن الخزينة فال 10 جنية جت له في يوم صدورها وجابها لنا.

*️⃣ وكأي شاب مراهق؛ ثاني يوم أخدت ال 10 جنية الجديدة دي وروحت الكلية وقعدت أوريها لأصدقائي؛ تقريباً نص مدرج علوم عين شمس كان جايلي عشان يشوف ال 10 جنية دي؛ وكنت مبسوط قوي وجو إحساس بتاع هاهاهاها مش أي أي يا جماعة دي علاقات 😂.

*️⃣ كانت أي عملة تصدر في نفس اليوم يجيب لي منها؛ سنة 1993 جابلي الربع جنية المخروم أول ما بدأ تداوله برضك. ومش العملات المصرية بس؛ يعني يناير 2002 جابلي اليورو مع بداية تداوله العالمي (بعد اسبوعين كده مش نفس اليوم 😁).

افتكرت القصص دي لما شوفت صور ال 10 جنية؛ يااااه يا زمن؛ بقول لنفسي اديك بقيت واحد من اللي قاعدين في المدرج منتظر ييجي حد معاه ال 10 جنية وتشوفها.

رحمة الله عليك يا والدي 😔

أنا مش متخيل شكل المستقبل مع وجود عجز مدرسين واصل ل 25% وبيزيد؛ وعجز أطباء تجاوز ال 50 % و 60% و بيزيد... ودي الإحصائيات الرسمية أصلاً

*️⃣ والدولة متصالحة نفسياً مع عدم وجود مدرسين واطباء طالما عندنا مهندسيين معماريين بيعملوا مباني فمش محتاجين مدرسين ولا أطباء

*️⃣ الأزمات مبتحصلش بين يوم وليلة؛ ببطيء بتلاقي نفسك جوا النفق المظلم

*️⃣ ربنا يستر عالمستقبل اللي بشايره بقت واضحة؛ في جيل مولود بيتربي في كارثة؛ ملوش مكان بالمدرسة وملوش مدرس.

*️⃣ المشكلة إنك أساساً مكنتش مظبوط قبل زيادة هجرة الأطباء؛ يعني مكانش الناس صحتها زي الفل فتأثير الهجرة دي طفيف... بالعكس دا كان الوضع مش تمام خالص... فطبقاَ لوزارة الصحة و لمنظمة الصحة العالمية فنسبة التقزم بالأطفال المصريين تجاوزت 21% (إحصائية 2014) ونسبة الانيميا وفقر الدم بالأطفال 27%... وبالنسبة للأمهات ف 25% منهم عندهم انيميا وضعف فدا تسبب إن نسبة الرضاعة الطبيعية المطلقة أول 4 شهور (يعني نسبة الأطفال اللي معتمدة فقط أول شهور عالرضاعة) كانت 34% سنة 2005 وبقت 13% سنة 2014.

*️⃣ طبعاً الأرقام قديمة من 2014 بس دا عشان مصر دي كانت مما يعرف بالمسح الصحي الطبي لمصر وكانت بتعمله وزارة الصحة من سنة 1980 وعملته كذا مرة؛ يعني في مسح سنة 2000 وفي 2005 وفي 2008 ثم 2014 ومن 2014 ومصر توقفت عن عمل مسح صحي للشعب بحيث تشوف ايه وضعه...

*️⃣ المشكلة إن الوضع الاقتصادي السيء هيخلي الأهالي تلجأ لأسهل وأرخص وسيلة إشباع الطفل وهي الكربوهيدرات؛ والكربوهيدرات مش بتعمل تغذية صحية خالص لكنها رخيصة وتشبع زي العيش والمكرونة والأرز.

*️⃣ ضيف بقي معاهم الجهل؛ مهو مفيش مدارس بتعلم ولا برامج تليفزيونية تشرح للأهالي ازاي يأكلوا عيالهم... فحتي لو انتا قادر شوية مادياً فانتا جاهل معرفياً ومش عارف ايه مفيد لعيالك.

*️⃣ وبما إن الدولة نفضت إيديها من تعليم وصحة المواطن؛ فمفروض هو ياخد باله من صحته... الشيء الكويس إننا في عصر الإنترنت يعني لو عاوز تشوف وتتثقف في اي مجال سهل قوي من النت... لكن في مشكلة وهي إن الناس تم تدريبها انها تبقي جاهلة وتفضل جاهلة وتستمر جاهلة وتبقي معاديه للمعرفة.

*️⃣ فتلاقي إيه اهتمام الأب؟ يروح الشغل؛ عنده وقت فاضي يبقي ماتش كورة ولا يخش يشوف رقاصات في تيك توك

*️⃣ وايه اهتمام الام؟ شغل لو بتشتغل أو احذث الموضة والازياء والتيك توك والمسلسلات والأغاني... وشوية استرونج اندبدنت ولية واتطلقي منه وخدي الشقة والعفش واحبسيه.

*️⃣ وفي النص كائن صغير؛ الحكومة منفضة له ومش عاوزاه أصلاً يتولد وعقاباً ليه عشان أبوه وأمه أشقياء وخلفوه فالدولة مش هتوفر له لا تعليم ولا صحة... وأبوه وأمه مش فاضيين ليه فبرضك لا هيحاولوا يهتموا بصحته وأكله ويعلموه ذاتياً... ففي النهاية قنابل موقوته بتتربي.

*️⃣ قنابل موقوته بتتربي لا في صحة ولا تعليم ولا دين طبعاً... هتكبر القنبلة دي وفي يوم هتنفجر... يوم ما تبدأ الانفجار هيخش الأب والام يكتبوا بوست عالفيسبوك هو ايه اللي حصل في البلد وليه الجيل الجديد كده ويقعدوا يشتموه فيهم... وهتخش الحكومة تتدخل بسرعة وتفتكرهم وتقرر تبني سجون أكبر عشان تسع القنابل الموقوته اللي انتشرت دي.

المستقبل مرعب للأسف 😔😔

بمناسبة عيد الأضحي بيجي في بالي السؤال المتكرر

تفتكروا هييجي اليوم اللي ناكل فيه اللحمة المزروعة في العيد؟ ولا هتفضل اللحمة المذبوحة هي الأساس

ربنا يستر وتبقي إجباري علينا في يوم ما 😭😭😭

اللحوم المزروعة

من يومين حطيت بوست قصير على غير العادة قولت للناس تفتكروا هييجي يوم وناكل في عيد الأضحى لحمة مزروعة... الاغلبية كانت مش عارفه ايه اللحمة المزروعة وكان مفروض أنا مبقاش غلس يعني وأقول ايه هي مش اسأل بس من باب كإني بتنطط عالناس اللي متعرفش 😔

*️⃣ الفكرة إني بقالي فترة عاوز أكتب عنها؛ وهوبا كنت قاعد مع صديق وافتكرتها فمكانش في وقت أكتب بوست كامل؛ فثولت أحط السطرين؛ ومأجلتش البوست عشان قولت لغرض استقصائي كده أشوف مدى انتشار كسل البحث...

*️⃣ كسل البحث أنا بحسه مرض كده منتشر؛ تبقي بتقول خبر اول معلومة هتطلع في جوجل نتيجة رقم 1 وتلاقي الناس تقولك هات مصدر... تقولهم امبارح وزارة المالية طلعت بيان؛ يقولك هات مصدر؛ طيب هو انتا دخلت صفحة المالية عالفيسبوك أو موقعهم وملقتش؟ المصادر معمولة عشان تحط بس الأمور الصعبة الغريبة أو الغير مألوفة والمغمورة... وهكتب بوست بعد دا للموضوع بتاع كسل البحث بشكل تفصيلي عشان منبعدش عن البوست الأساسي وهو

(((( ايه هي اللحمة المزروعة دي))))

*️⃣ العلماء في الغرب بقالهم سنين عمالين يطوروا في تقنيات طب اسمه الطب التجديدي Regenerative medicine وهتلاقوا صفحة في الويكيبديا عنها بالعربي عشان اللي عاوز المصادر 😂.... فكرتهم وهدفهم ان في حالات الجسم لسبب ما مش بيعرف يعوض الأنسجة والخلايا اللي نقصاه؛ أو في حالات تانية زي الأفلام كده يقولك محتاج زرع كذا بس عاوزين ندور علي متبرع متطابق.

*️⃣ أجسامنا مختلفة عن بعضها فالدكاترة بيدوروا علي اقرب شخص يكون أعضاء جسمه قريبة للمتبرع بحيث الجسم بتاع المريض ميهاجمش الأعضاء الجديدة... والناس بعد نقل أعضاء ليها بتاخد مثبطات مناعة عشان تخلي جهاز المناعة ميقولش في جسم غريب يبقي اكيد ميكروب فيهاجمه ويقتله ذاتيا وحوار طبي كبير.

*️⃣ فالعلماء قالوا طيب ليه منعملش للمريض اللي محتاجه من جسمه؛ طبعاً العلم دا لسه في البداية لكن فكرته باختصار تاخد خلايا من جسم المريض؛ وتوديها للمعمل يحطوا عليها مواد تخليها تتكاثر بهدف تنتج الشيء المطلوب ويتحط بعذ كده في جسم المريض اللي يلاقيه نفس جسمه عادي فخلاص زي الفل... وطبعاً بكرر دا الهدف اللي عاوزين يوصلوا له الجماعة الدكاترة.

*️⃣ طبعاً زي أي علم حديث؛ مش شرط يستفيد منه أصحابه؛ يعني نوبل وهو بيصنع الديناميت كان هدفه المناجم مش الحروب؛ وفايزر وهي بتصنع الفياجرا كان هدفها دواء قلب مش شيء تاني 😂 و جون بيمبرتون كان صيدلي بيعمل تركيبة مشروب أسود لعلاج الصداع ميقصدش يخترع كوكاكولا وهكذا... لكن في النهاية العلماء بيبتكروا شيء فتيجي الرأسمالية تقولك الله جميل قوي؛ نعمل بيه بيزنس.

*️⃣ فالجماعة بتوع البيزنس قالك طيب ما دا حل مثالي للحوم؛ ناخد خليه من بقرة وفي المعامل عالترابيزات كده نحط عليها مركبات أنا مفهمش فيها لاني كنت علوم فيزياء كيميا مش بيولوجي 😂... فننتج لحمة؛ بدون ذبح بقر ودا معناه تخفيض البصمة البيئة... ولمحبي المصادر اكتب في جوجل Meat Foodprint او بصمة اللحمة وانتا هتعرف كل كيلو لحم ينتج بيستهلك اد ايه من الطبيعة...

*️⃣ انتاج كيلو لحمة بيستهلك متوسط 15000 لتر مايه؛ يعني ذبحت بقرة عملت صافي 200 كيلو لحمة؛ تعرف انها استهلكت من الطبيعة حوالي 3 مليون لتر مايه سواء مباشرة زي الشرب او اعشاب وعلف كانوا مزوعين من الماية... عشان كده الخبراء كانوا بيقولوا ان تصريحات مصر عن وجود شح مائي + مشاريع موسعة لتربية الأبقار مش منطقية... هتزرع لهم فتستهلك الماية الخلصانه يعني.

*️⃣ المهم يعني العلماء بقوا بالفعل بينتجوا قطع لحمة؛ وخد بالك انهم المتحكمين دلوقتي في اختيار الخلايا ودا بيديهم كذا ميزة؛ والمشاريع بتاعة اللحوم المزروعة او المستنبته بييجي لهم استثمارات.

1️⃣ عشان أكثر حفاظاً على البيئة ودا الترند العالمي اللي بياخد تمويل وصكوك خضراء ودعم عالمي؛ واديكم شايفين مصر نهاية السنة هتستضيف القمة العالمية للبيئة في شرم الشيخ؛ اه مصر بتشيل الشجر من الشوارع لتوسعتها وتقليل استهلاك الماية هتستضيف قمة البيئة العالمية 😂. المهم يعني يقال ان اللحمة المزروعة اقل 90% في استهلاك المياه واصدار الغازات الدفيئة واستهلاك الأرض. ويقال عشان لسه مفيش بحث محايد يعني.

2️⃣ العلماء يقدروا يتحكموا في الخلايا اللي تم استزراع اللحمة منها؛ وبكده ممكن يقللوا نسبة الدهون او نوعها يعني تخلي نسبة الدهون المفيدة (غير المشبعة) أعلى من العادية زي ابقار الواجيو الياباني اللي الكيلو بتاعها ب 3 و 4 و 5 و 8 الاف جنية (اه بجد دا سعر الكيلو في مصر وتلاقي اللي يقولك دا مش واجيو ياباني اصلي دي السلالات الياباني تربية استرالي 😂؛ ملناش دعوة ملناش دعوة) لكن الخلاصة العلماء يقدروا يتحكموا في تفاصيل اللحمة المنتجة.

3️⃣ ان المجال دا ممكن بشتغل حلو عالمليارديرات المجانين؛ يعني ملياردير عاوز يدوق طعم لحمة الأسود؛ وواحد ثاني عاوز لحمة التماسيح وثالث لحمة الزرافة ورابع الفيلة... بسيطة خلايا منهم ونعمله ليك... وبالفعل في شركة ناشئة شغالة علي لحوم الحيوانات الغريبة اسمها Primeval Foods وابحث باسمهم دا في جوجل هيطلعوا لك للي حابب مصادر 😁.. عارفين المليونيرات بتوع أكل عليه ذهب والجو دا؛ اهما دول هيتعمل عليهم احلي شغل؛ عاوز لحمة الباندا عنينا.... الشركة بتقول في موقعها ك دعابة اننا لو لقينا خليه T-Rex هنعملكم منه ناجيتس.


*️⃣ اه بالنسبة للتكلفة؛ اول قطعة برجر مزروعة ظهرت في لندن 2013 واتكلفت 330 ألف دولار؛ وبالمناسبة كان من الممول ليها سيرجي برين مؤسس جوجل؛ وبالمناسبة مؤسسي جوجل الاثنين مرضى؛ سيرجي عنده طفرات جينه بتهدده بالشلل؛ ولاري بيج عنده مشاكل في الحبال الصوتية؛ وكل واحد فيهم معاه فوق 100 مليار دولار أملاك؛ فبيمولوا المشاريع الطبية بشكل كبير.

*️⃣ توهت مني أنا عارف؛ المهم يعني سنة 2013 كانت التكلفة 330 الف دولار؛ في 2021 التكلفة لنفس القطعة بقت 10 دولار فقط... وفوربس بتقول ان في حوالي 70 شركة حول العالم شغالة في المجال دا؛ وطبعاً ولاد الكلب جيرانا الشمال شرق عندهم شركات متطوره فيه وميفوتش شهرين غير ما تلاقي CNN او BBC او DW وغيرهم عاملين معاهم لقاءات للتلميع كإن مفيش غيرهم.

*️⃣ طبعاً الحياة مش وردية؛ الخبراء قالوا الطعم واللون مختلف عن الحقيقي لكن مع الوقت بيقترب لكن التوابل والتسوية هتشيل الفروقات..

*️⃣ بالمناسبة الجنان مش بيقف؛ في علماء بداوا يعملوا تجارب زراعة لحمة من خلايا مزروعة ودا اللي حصل في شركة ولاد البوبي جيرانا.

*️⃣ نكتفي بهذا لكن هقول نقطتين

1️⃣ تربية الحيوانات مش بس للحوم؛ في جلود وصوف من الاغنام وصناعات شغالة على بواقي الحيوانات... مش موضوع لحمة وخلاص

2️⃣ أنا ك محمد سامي مش متخيل اني اكل لحمة معامل؛ وكمان اظن انها حرام؛ وفي حاخامات يهود نفسهم قالوا ان أكل شيء طالع من حيوان حي حرام في الكوشر عندهم؛ وعندنا في دينا في حديث بيقول (ما قطع من البهيمة وهي حيه فهو ميتة) يعني يعامل معاملة أكل الميته... طبعا اتوقع العلماء مستقبلا مع الشيوخ هيقولوا دي مجرد خليه مهواش قطعة لحم؛ بس نفسياَ مش ممكن اقبلها خالص.


البوست صوتيا وتقدر تسمعه بدون حساب في سبوتيفاي

https://anchor.fm/mohammed-samy4/episodes/ep-e1l49iq

إمبارح كنت مروح بالليل والعربي مخلصة بنزين؛ مراتي قالت لي خش مون؛ قولت لها فاكس

في مخي قولت انا مش قادر خلاص عاوز اروح انااااام؛ وعارف انهم هيعملوا زيادة بس هما مثبتين حوار الربع جنية دا؛ فمش مستاهله يعني

بس يا سيدي وقصة قصيرة حزينة و 50 جنية زيادة لبستها بالتفويله 😂

ملحوظة؛. لسه قصادنا بتاع 3 جنية كمان؛ ايوان وقولتها قبل كده ان برنت فوق ال 100 = لتر ب 15 جنية
وكنت مستغرب حوار الربع جنية

بس عجز الموازنة ضرب في وش الحكومة من بداية الموازنة فلازم يزودوا 😔

عن اذنكم رايح أمون

أقولكم شيء؛ مفيش شيء اسمه الأسعار ترخص؛ يعني مينفعش ودي تبقى مشكلة كبيرة

*️⃣ ممكن سلعة ترخص أو شوية سلع؛ بس المتوسط العام للسلع والخدمات ترخص فدي مشكلة

*️⃣ دا معناه إنه تضخم سلبي والتضخم السلبي كارثة مش ظريفة خالص

*️⃣ فلما تسمع في الأخبار حاجة زي انخفاض معدل التضخم مثلاً من 13% ليصبح 5% فمتقولش فين دا الأسعار مرخصتش

*️⃣ دا بيقولك انخفاض معدل زيادة الأسعار؛ بدل زيادة قوية عالية هتبقى زيادة صغيرة

*️⃣ أما الحياه ككل ترخص؛ يعني مثلاً كنت بتقبض 5000 جنية ويادوبك بيكفوك.... وهوبا حصلت زيادات أسعار وبقت ال 5000 مستحيل تكفيك... فتقول يا ترى امتي ال 5000 يكفوني تاني

*️⃣ دا مش هيحصل لإن عشان دا يحصل يبقى التضخم سلبي يعني يعلنوا تضخم مثلاً -5% (دا مش موجود وهو مجرد توضيح).

*️⃣ ومش معنى دا إن مفيش شيء بيرخص؛ قولتها أول البوست وبكررها؛ عااادي جداً سلع تزيد وترخص... البامية تبقى ب 100 جنية وتنزل ل 20 جنية؛ الموبايلات تبقى ب 20 ألف وبعدين ترجع 15 الف

*️⃣ لكن مينفعش الموبايلات ترخص والأكل يرخص والإيجارات ترخص والإنترنت يرخص والكهرباء ترخص والبنزين يرخص ووو

⬅️⬅️ مينفعش مينفعش

*️⃣ هتقولي أومال إزاي الدول بتبقى دول محترمة والشعوب وضعها يتحسن

*️⃣ ببساطة كده بيكون عندهم تضخم رينج 1% ل 2%... يعني لو قولنا المواطن يكفيه 10 الاف جنية فبعد سنة نفس مستوي المعيشة يتكلف 10200 جنية

⬅️⬅️ زيادة سعرية صغيرة

*️⃣ في المقابل رواتب الناس اللي من سنة كان بياخد 10000 بقى بياخد 11000 فكده يبقى تكلفة المعيشة زادت 200 جنية بس مرتبه زاد 1000 جنية فهنا مستواه يتحسن...

*️⃣ طبعاً وبيكون في خدمات غير مباشرة زي أسكان حكومة مخفض التكلفة وشوية مساعدات حكومية فتخليه عايش في مستوى أفضل

⬅️⬅️ فمش شرط الأسعار ترخص

*️⃣ ممكن مواطن يبقى عايش في دولة دخله يساوي 500 دولار وعايش برنس ومبسوط وكله زي الفل؛ وواحد تاني في دولة ثانية دخله 1500 دولار ومش لاقي وبيعاني... المهم التضخم كام والقوة الشرائية وهل زيادة الأجور أكبر من التضخم ولا أقل من التضخم

*️⃣ وطبعاً طبعاً يكون عندك أليات دقيقة لحساب التضخم؛ التضخم الحقيقي

والله شوفت التقرير الاخباري اللي الكل نشروه بتاع ان مصر من أكثر البلاد عرضه للتخلف عن سداد الدين...

*️⃣ وهكتب بوست ان شاء الله اوضح (لسه مخلصتوش) لكن الاكيد ان مفيش قلق كارثي؛ في قلق بس مش كارثي... مش هتفلس زي لبنان ولا هتتخلف عن الدين زي سيريلانكا.... مفيش الكلام دا عالأقل عالمدى القريب...

*️⃣ اهدوا وصلوا عالنبي كده؛ مش معنى انك مش موافق عالأداء بتاع بلدنا واهدار العملة الصعبة؛ انك خلاص تخلي مصر دولة صغيرة من الدول اللي خلاص فطست.

*️⃣ وكمان مصر مش الأرجنتين لإن الأرجنتين دولة مفلسة بقالها عشرات السنين؛ هي محترفة افلاس ويمكن منافسها الوحيد هو اليونان... وانتا في مصر مفلستش قبل كده؛ من ساعة الخديوي اسماعيل ولجنة الديون اللي اتعملت علينا وقتها وانتا بتسدد ديونك... أما الارجنتين واليونان فدول أبطال إفلاس؛ ميعرفوش يقعدوا 10 سنين علي بعض بدون ما يفلسوا؛ لو مفلسوش هيهرشوا 😂😂.

*️⃣ وعشان تفهم الفارق؛ الدول بتبقي عندها مشكلة؛ تستلف شوية فلوس؛ وضعها يتحسن؛ تتغر بنفسها وتهدر الفلوس؛ تقع في مشكلة أكبر؛ تستلف مبلغ أكبر؛ وضعها يتحسن؛ تضيع الفلوس؛ تقع في مشكلة أكبر؛ تستلف أكبر؛ تهدر الفلوس؛.... لغاية ما ييجي وقت الدائنين يقولوا لها مفيش جديد... فتتعثر؛ يقعدوا معاها يشوفوا ايه الحل ويعملوا اتفاقية... وتاخد فلوس وتضيعها فتتعثر تاني وتفلس تاني فيقعدوا معاها تاني وهكذا.

*️⃣ احنا لسه في بداية الطريق؛ مرحلة ناخد فلوس ونضيعها... لا تعثرنا ولا جه معاد سداد قسط ومتدفعش.

*️⃣ سبب وضعنا الحالي ان في فلوس كثير بتخرج من مصر؛ تقارير البنك الدولي للديون + المركزي للاحتياطي بتقول ان شهور يناير فبراير مارس كان في استنزاف بالسالب (يعني انخفاض احتياطي او زيادة دي) يساوي متوسط 180 مليون دولار يومياً... يعني كل يوم الصبح تلاقي 180 مليون دولار اتبخروا... للتوضيح الربع الأول زادت ديونك 12.25 مليار دولار ورغم كده الاحتياطي نزل قرب 4 مليار... صافي اجمالي 16.1 مليار دولار ودا اللي اقصده بال 180 مليون دولار يومي.

*️⃣ فنظريا لسه عندك احتياطي بس سرعة الاستنزاف عالية فلو الوضع استمر يبقي في مشكلة؛ عشان كده الحكومة مقدمة علي قروض جديدة تسد النزيف منها + عارضه شركات كثير للبيع وبتتخارج من شركات كثير ويشمل دا محطات كهرباء سيمنز والشركة الوطنية لمحطات الوقود + مخنقة علي الاستيراد بشكل يبكي 😭😭😭.

*️⃣ لو خطة الحكومة نجحت فمفروض ييجي لها فلوس تكفي لتغطية الوضع سنتين ثلاثة... بعدهم بقي يحصل ايه؛ محدش عارف بقي شكل الكوكب هيبقي ايه....

نكتفي بهذا القدر وكانت نيتي كتابة 3 سطور كده عالسريع؛ بس لقيته قلب معايا 😂😂

إجازة العيد الحكومية والبنكية خلصت الحمد لله؛ فأقدر بقى أوريكم مثال يوضح ليه إحنا دولة عالم ثالث ومكملين عالم ثالث برضك...

*️⃣ دلوقتي إنتا عندك 1 يوليو العام المالي الجديد؛ فتقول هبدأ من العام المالي دا شوية إجراءات زي إن الضرائب مش هتتعامل نقدي أو شيكات ولازم بنكي.

حلو قوي مفيش مشكلة

*️⃣ تروح بقى مقرر إن من 1 يوليو هرجع لأول مرة من ساعة بداية الكورونا رسوم التحويل البنكي.

*️⃣ مفيش مشكلة إنتا ك صاحب شغل عادي يعني مجاتش على شوية رسوم "على فكرة بتجمع مبالغ مش قليلة بس قشطة".

حلو معايا لغاية دلوقتي

*️⃣ تروح بقى مأموريات ضرائب تقرر عمل صيانة لمواقعها

*️⃣ هوبا ييجي العيد بعد أقل من أسبوع فتقرر ايه

*️⃣ تقرر تقفل البنوك لمدة 9 أيام... آخر يوم عمل 7 ويرجعوا للشغل يوم 17

*️⃣ فلما تقفل البنوك وقفت التحويلات البنكية المحلية أصلاً اللي بتحتاج البنك يكون شغال عشان يتم التحويل

*️⃣ كل دا بقى وخد بالك مع بداية شهر؛ وعادة الشركات بتكون لغاية يوم 10 كده عندها طن التزامات وتسديد شيكات لموردين وووو... يعني قفلت الدنيا بداية الشهر.

*️⃣ فإنتا كإنك قررت تعمل Turn Off للاقتصاد عن عمد لمدة 9 أيام عادي كده

*️⃣ خد دا بقى كله وضيفه مع إنك في وضع اقتصادي سيء وركود...

⬅️ صراحة مش فاهم يعني ايه منظومة البنوك تقفل إسبوع؟

*️⃣ انا والدي رحمه الله كان في البنك الأهلي؛ وكنا حافظين النظام؛ العيد يعني 2 يوم إجازة... والعيد الكبير يعني 2 يوم برضك + الوقفة... ومفيش شيء اسمه بدل... يعني العيد جه يوم سبت؛ يبقى الإجازة سبت وأحد وشكراً... تقريباً الحالة الوحيدة لو العيد جه الجمعة فكان اليومين هما جمعة وسبت اللي هما أصلاً إجازة فيدوهم الأحد يلا.

*️⃣ لكن مفيش الميغة بتاعة دلوقتي؛ ومكانش أصلاً زمان (والدي توفى 2006) مكانش وقتها البلد عايشة عالبنوك بالشكل الحالي.

*️⃣ لكن تقول يلا تحول رقمي وكله بنكي؛ ثم يلا اقفل البنوك أسبوع... فدا لمؤاخذة اسمه ايه؟ اسمه شغل عالم ثالث...

*️⃣ انسى الشعارات الرنانه؛ ماما كانت تقولنا ننظف الشقة نروح كانسين الأرض ونلم التراب تحت السجادة (وهي تقفشنا)... فنفس الفكرة... نعمل شو ونقول وضع اقتصادي وتحول رقمي... وبعدين تصرفات صغيرة تبين في الحقيقة إن العقلية الإدارية البنكية في مصر من القرون الوسطى أصلاً.

*️⃣ الله يرحمك يا بابا اللي لما كنت بقوله يعني ليه تاخد العيد يومين بس هو مش من حقك تتفسح؛ فيقولي اللي عاوز الميغة والفسح ميشتغلش الشغلانة دي... وكان ياخدني 2 يوم العيد الصبح "كنا في المطرية" ويروح للبنك "العاشر من رمضان" عشان يحط في الماكينة فلوس لإن زمان الناس سحبتها في العيد.

*️⃣ اه مهو زمان مكانش في شركة متخصصة تملئ فلوس الماكينات بالفروع وكانت مسئولية الفرع نفسه وبابا كان بيصعب عليه ينزل موظف يعمل دا وكان بيروح بنفسه؛ فأنا كنت حافظ 2 يوم العيد الصبح هقضيه في فرع البنك مع بابا. يعني زمان كان شغلهم أكثر من المعتاد.

قال شملول مالي قال ... شملول صحيح شملول

عدم اتفاق الحكومة حتى الآن مع صندوق النقد + تصريحات الرئيس امبارح اللي بيطلب فيها من الأوروبيين انهم يوصلوا لصندوق النقد ان مفهوم تحرير الاسعار الكلي وتوصيل الأسعار العالمية للمواطن شيء مضر بالاستقرار لإن المواطن في مصر مش هيتسحمل الأسعار العالمية الحالية زي الأوروبي

*️⃣ يوحي إن مفاوضاتنا مع الصندوق محطوط لنا شروط عنيف؛ او زي ما بيحبوا يسموها اصلاح اقتصادي عنيف...

*️⃣ صندوق النقد تحسه انه عنده كتالوج واحد وكله يلبسه؛ اقصد يطبقه... حرر السوق كلياً... يعني يعني وما يلي تخيلي للتوضيح وبكرر تخيلي عشان محدش يقول اني بقول دا هيحصل

*️⃣ كإنه بيقولنا يا مصريين بصوا؛ خلوا الدولار ب 25 جنية ولا 30 جنية... البترول طبعاً مقوم بالدولار فالبنزين يزيد؛ يبقي اللتر ب 20 جنية... الكهرباء بيتم توليدها من مشتقات بترولية او غاز بالدولار ؛ فالكهرباء تزيد الضعف.

*️⃣ الاستيراد هيقف خالص؛ الناس هتموت من الجوع حرفيا والبطالة هتضرب؛ قشطة بس كده البلد هتبقي رخيصة للمستثمر الاجنبي اللي هيلاقي بلد فيها 100 مليون وعندهم خدمات كثير ناقصة

*️⃣ يبقي افتح مصانع عندهم بقي... والسياحة نفس الفكرة؛ اه هتزيد الاسعار محليا بالجنية لكن مش هتناسب نفس الزيادة دولارية ووو

*️⃣ فمع الوقت بقي الاستيراذ قل؛ فالطلب عالعملة الاجنبية يقل؛ فسعرها يقل... ومواردك الدولارية تتحسن فتبقي مغري زي ما بنقول والاقتصاد يبقي جميل والدنيا ربيع

*️⃣ دي الفكرة الرومانسي؛ هتقولي طيب كام شخص هيموت علي ما تتنفذ دا لو اتنفذت

*️⃣ هقولك المقولة اللي تنسب ل ستالين

⬅️ ان موت شخص يعتبر مأساة؛ وموت الملايين هو مجرد رقم

*️⃣ احنا مجرد رقم بالنسبة للمؤسسات الدولية؛ وحقها لانك مفروض تبقي بالنسبة للغريب مجرد رقم وتبقي بالنسبة لدولتك كل شيء مش بس رقم

هو واضح ان مقولة ذاكرة العوام 3 أيام حقيقية؛ الناس فعلا نسيت أيام مبارك ففاكرة ان الحياة كانت احسن. فاللي ناسي نفكره بشوية أمور اقتصادية وليس سياسية واجتماعية.

*️⃣ مبارك لما مسك الحكم في مصر سنة 1981 فتح حنفية القروض؛ استلف من الجميع بلا حساب... استلم الحكم بديون خارجية 22 مليار دولار... وطلع قال مصطلحات عنق الزجاجة ووو؛ وفتح حنفية القروض؛ دا قرض عشان نعمل مترو الانفاق ودا قرض عشان نسدد قرض قديم ودا قرض عشان مش هنقولكم بتاع ايه وهكذا... وبحلول عام 1991 كانت وصلت ل 70 مليار دولار والرقم دا مش دقيق وكمل بس.

*️⃣ الدين المصري ال 70 مليار دولار كان كارثي وقتها ؛ مصر كان عندها ازمة كبيرة وهي التخلف عن سداد الديون؛ لكن الحكومة كانت بتسعى ان دا ميحصلش فكانت النتيجة انها بتسحب من كل الموارد وتقلل من توفر السلع المدعمة...

*️⃣ عارف دلوقتي الحكومة بتعلن عن تضخم كام؟ 14-15% واحنا عمالين نعيط من الغلاء... عارف سنة 1991 الحكومة اعلنت عن كام تضخم؟ 20.7%... فتخيل وقتها الغلاء كان ازاي.

*️⃣ حرفياً الناس مكانتش لاقيه؛ والدولة الشفافية فيها عالية فمقالتش حاجة وتفاصيل... والبلد عايشة فترة 1990-1991 اليوم ب يومه زي ما بيقولوا... طبعا الظروف خدمتنا؛ فاكرين ايه حصل في فترة 90-91... صدام حسين دخل الكويت.

*️⃣ واتعملت قمة عربية في مصر في 1990 ثم قمة اخري في 1991؛ ومصر بعتت قوات في تحرير الكويت... لكن دا مكانش مجاناً

*️⃣ تحالف الدائنين (نادي باريس) قرر إعفاء مصر من 50% من ديونها بل وكمان اعادوا جدولة باقي الديون؛ ودول الخليج عملت ودائع دولارية في البنك المركزي المصري... غير معروف الرقم الاجمالي كام لكن الكلام ان المساعدات (منح + تخفيض ديون + ودائع) تراوحت ما بين 35 ل 43 مليار دولار.

*️⃣ عاوز افكر الناس ان 43 مليار دولار سنة 91 = 93 مليار دولار في 2022. كل دي مساعدات وتخفيض ديون.

*️⃣ المهم يقال ديونا بعد التخفيض بقت 33-32 مليار دولار... هنا مبارك اخد القرار بإن الدين المصري لن يتجاوز الحاجز دا تاني... البلد يحصل اللي يحصل فيها... مش هنفتح تاني حنفية القروض تحت اي ظرف؛ وللامانه مبارك مشي بعدها ب 20 سنة يعني سنة 2011 كان الدين الخارجي المصري 35 مليار دولار... يعني فعليا هو قعد 20 سنة في نفس معدل الديون. وبالمناسبة الاحتياطي الدولاري كان 35 مليار... يعني الراجل كان ماشي بسياسة ديون مصر أد اللي معاها... بس دا متعملش بشكل بسيط.

*️⃣ هل دا سحر؟ لا خالص هو قال البلد تمشي زي ما تمشي او متمشيش خالص... ايه دا في طلب عالدولار عشان الاستيراد؛ خلاص زود سعر الدولار.

*️⃣ سنة 1990 الدولار ب 83 قرش؛ سنة 1991 الدولار ب 3 جنية... ايوا حضرتك ياللي بتعيط لما زاد من 9 ل 18 يعني 100% ودلوقتي بتعيط لما زاد من 15.5 ل 19 يعني 22%... الناس سنة 1991 شافوا زيادة 360%.

*️⃣ السياسة بقت كده وقتها واللي معهوش ميلزموش... والحكومة كمان حظها كان حلو لإن فترة ما بعد 1991 كان العالم مستقر والاتحاد السوفيتي انحل؛ والخليج بينمو بشكل كبير والرواتب في الخليج محترمة فكان اللي شغال في الخليج يقدر يعول العائلة بتاعته مش مراته وعياله بس عكس دلوقتي يادوبك يعيش كويس.

*️⃣ ضيف عليهم إن حولك مكانتش دبي عملت النهضة الحالية... تركيا كانت في أزمة اقتصادية ضخمة وانقلابات عسكرية؛ الصناعة المغربية مكانتش صعدت قوي... فكان في شوية ظروف يكده

*️⃣ فقررت الحكومة مع صندوق النقد الدولي والبنك الدولي... اه حضرتك صندوق النقد الدولي ؛ ايه مستغرب كده ليه ما أخدنا قرض في 1991 من النقد.... المهم مع الأختين الحلوين دول بدأت معركة الخصخصة... الحكومة باعت 382 مؤسسة مملوكة للدولة... بدأت بالتدريج يعني براحة لإنها في الأول مش مزنوقة مهما مخفضين الديون وعاملين إعادة جدولة؛ لكنها كانت شغالة بنظام تتزنق تبيع... امشي يا عاطف صدقي وتعالي يا جنزوري... امشي يا جنزوري وتعالي يا عاطف عبيد؛ ايه دا دخلنا الألفينات... نمو اقتصادي حولينا ومزنوقين... افتح يا ابني حنفية الخصخصة.

*️⃣ الألفينات والعقد الأخير؛ الحكومة بقت مزنوقة... هنستلف يا ريس من بره؟ لا مفيش سلف إلا في الحدود اللي انا حاططها من ساعة أزمة 1991... طيب هنعمل ايه؟ عوم الجنية... يلا هوبا الجنية كان إمبارح ب 3.4 هوبا بقى ب 5 هوبا بقى ب 6 ووو...

*️⃣ يعني المواطن اللي سنة 1990 كان الدولار ب 0.83 قرش بعد 13 سنة بس لقاه ب 6.25 وأكثر يعني 750%... يعني كده أكننا في مصر سنة 2016 الدولار ب 8.88 فاكرين... يبقى 2029 ب 66.6 جنية... متخيلين ايه حصل في الأسعار والناس وقتها؟

*️⃣ المشكلة إننا صغيرين في السن... يعني عشان حد منا يعاني في فترة 91 فهو لازم يكون متخرج وشغال وقتها يعني مواليد قبل 1970... وعشان تحس بمعاناه 2003 والتعويم وقتها لازم تكون عالأقل عمرك 20-25 سنة يعني مواليد قبل 1980 ...

انا ومعظم اللي هيشوف البوست مواليد بعد 1980 فكنا عيال في حضانه وابتدائي وقت أزمة 90-91 وكنا لسه في ثانوي أو دخلنا الكلية وقت 2003 ففي الحالتين مكناش احنا اللي بنصرف...

دلوقتي احنا اللي بنصرف فحاسين وبنعاني... دلوقتي في سوشيال ميديا فنعرف منه... زمان كان برضك عدم معرفتك بمدى ثراء الآخرين يساعدك عالتحمل؛ لكن دلوقتي تلاقي ناس في الساحل بتاكل طبق فول ب 70 جنية ومسقعة ب 60 جنية وقرص طعمية ب 10 جنية... دلوقتي تلاقي سوبر ماركت جروميه منزل لحم واجيو سعر الكيلو 2500 جنية فانتا تقعد تتحسر... الحاجات دي بتشكل ضغط أكثر نفسي علينا وتحسسنا اد ايه احنا فقرا

واكتفي بهذا القدر وللحديث بقية ان شاء الله

تصحي من النوم تقول لنفسك صباح الخير يا محمد عيد ميلادك النهاردة؛ يلا أمازون عاملة عروض وخاصة مع ماستر كارد خصم 20% لغاية 300 جنية...

شوفلك هدية لنفسك بقي اشتريها بمناسبة عيد ميلادك

*️⃣ يلا هوب علي موقع أمازون والحمد لله اشتريت من الاكونت بتاعي وبتاع مراتي وبتاع الشغل شوية حاجات زي

1️⃣ كراتين ورق A4 للشغل.
2️⃣ بامبرز للاستاذ أرسلان ابني 😭
3️⃣ وايبس برضك للأخ أرسلان مهو لازم مع البامبرز.
4️⃣ فيري لغسالة الأطباق. وآخر منظف غسالة أطباق.
5️⃣ لعبة للآنسة لولي بنتي.

وشوية حاجات كده للبيت والعيال 😁💪

*️⃣ طبعاً الشباب السناجل والمراهقين هيقولوا ايه دا وإنتا دا عيد ميلادك.

⬅️ هقولهم شوية وهتعرفوا إن من أمتع الحاجات ليكم انكم تشتروا حاجة بخصم علي السعر اللي تعرفوه... مهو لما تكون لابس وهتشتري الحاجات دي كده كده... وهوبا تجيب شوية عروض وخصومات توفر 1000 جنية بجد مش وهمي... يبقي انا كده عملت هدية لمحفظتي الشخصية ألف جنية يفضلوا فيها ميطلعوش.. هدية عيد ميلاد دي ولا مش هدية... قولوا لهم يا أصحابي المتزوجين 😂😂

عامة من مكاني هذا أقول لمراتي كل سنة وهي طيبة عشان النهاردة برضك عيد ميلاد مراتي؛ إحنا الإثنين نفس اليوم من باب التوفير 😍😂😍❤️

⬅️⬅️⬅️ تحديث للرد علي تعليقات العروض

دور عالعروض براحتك عادي عالموقع؛ المهم في خصم اضافي لما تدفع ب ماستر كارد كود برومو mc300 ؛ خصم 20%... فمثلا تشوف كرتونة ورق ب 625 جنية هوبا تبقي ب 500 جنية... بامبرز اللي ب 185 وفي فتح الله ب 175 احسن منهم؛ لكن تحط كود ماستر كارد تلاقيه بقي ب 148 جنية... وهكذا