من الأمور اللي بحلم في مصر تتغير مستقبلاً وهتساعد في بيئة العمل والاقتصاد؛ ان يكون في سرعة تفاعل من المسئولين بخصوص الأخبار وخاصة خاصة الاقتصادية.

*️⃣ مينفعش تلاقي سوق الذهب اتجنن وبقي شغال مع نفسه فوق السعر العالمي ب 15% و 20% وتكون وزارة التموين المسئولة عنهم ساكته خااالص من منطلق انها في إجازة العيد؛ يعني وكيل الوزارة ولا الوزير يقطع اجازة العيد عشان موضوع زي دا؟

*️⃣ الفيدرالي يزود الفايدة واشاعات تغرق البلد ان الدولار طالع لفوق ال 20؛ تقارير ان مصر اشترت ذهب طب ليه ومنين؟ من الاحتياطي ولا من منجم السكري؛ الخ الخ... لا وزير المالية علق ولا البنك المركزي ولا الهوا أصلاً.

*️⃣ هي فلسفة خليهم يتسلوا دي لصاحبها عليه ما عليه الرئيس الأسبق مبارك؛ فلسفة مشهورة في مصر وفكرتها ان المواطن ماله ومال البلد؛ سيبه يهري واحنا نقرر وننفذ... شغالة وزي الفل بس الوضع الحالي مينفعش فيه دا.

*️⃣ دلوقتي انتا في وسط أزمة عالمية وعندنا جزء ضخم من المصريين فقد ثقته في العملة المحلية أصلاً ومفيش فينا حد الا وحوله ناس سألوه رأيك ايه احسن حاجة لفلوسنا بدل الجنية؛ ذهب ولا دولار ولا عقار ولا بتكوين ولا ايه...

*️⃣ تخيل في الوضع دا الناس قلقانه وعماله تقول يا تري ذهب؛ لالا بلاش؛ ففي جزء بيشتري فعلاً وجزء متردد... نروح سايبين تجار الذهب يلعبوا في السوق بتاعه وكذلك سوق الدولار ويسعروا كإن الدولار ب 22 وأكثر كمان... فكده المتردد بقي انتا بتزقه انه يروح يشتري... وكمان خليت اللي بيفكر في الدولار يقول شكل بتوع الذهب فاهمين وشكله هيبقي ب 22 جنية.

*️⃣ غياب المعلومات في وقت الأزمات كارثة؛ دا وقت مهم قوي نطمن الناس؛ حرفيا مفيش مسئول طلع شرح للناس الوضع وايه الخطة بتاعة مصر... ودا بيساعد ان الازمة تزيد والمواطن يقلق اكثر ويدولر ويشتري ذهب واللي معاه اي عملة ميبعش.

نعدي بس الازمة ونرجع تاني ننفض للمواطن؛ بس المرة دي لما ننفض له فممكن دا يخليه يعمل تصرفات عشوائية تسبب كوارث للدولة متقدرش تلمها أصلاً...

⬅️ وعشان هتسأل نفس السؤال اللي بجاوبه معرفش وبتقالي تتوقع ايه برضك؛ فأنا متوقع هبوط الذهب محلي والأرقام الغريبة الماضية دي منشوفهاش تاني لفترة طويلة... والدولار مش متوقع خالص يحصل قفزه فيه لما البنوك تفتح؛ كبيره يتحرك بسيط لكن مفيش قفزات... والفايدة بتاعة المركزي متوقع تتحرك من 9.25% الحاليه ل 10.5% مثلاً... طبعاً دا كله بفرض ان الدولة هتعرف تلم السوق السوداء ؛ لو متلمتش وحصلت دولرة؛ هنزود بقي 2% والدولار يتحرك ووو... أنا لا اتوقع ولا اتمني السيناريو الثاني؛ دا ضرر كارثي لينا ك مصريين قبل ما يكون ضرر عالدولة وعجز موازنتها. لكن في النهاية تبقي اننا بنتوقع بناء علي تخمين لان المعلومات محجوبة.

الأرقام الرسمية للتضخم أعلنت وهي نقلاً عن صفحة EconomyPlus

التضخم السنوي لإجمالي الجمهورية يسجل 14.9% في أبريل مقابل 4.4% في نفس الشهر من العام الماضي،

بعد ارتفاع أسعار الطعام والشراب بنسبة 29.3%، في مقدمتها الخضروات بنسبة 66%، والزيوت والدهون 36.6%.

التضخم السنوي في مدن #مصر بلغ 13.1% في أبريل مقابل 10.3% في مارس

⬅️ طبعاً احنا حاسين بالغلاء قوي وهما قايلين التضخم في الخضار 66% والزيوت 36% والأكل قرب ال 30%... رقم 14.9% دا يشمل كل حاجة يعني ايجارات ومصاريف مدارس وخدمات زي سعر المكالمات ووو... فال 14.9% متوسط


⬅️ كمان ملحوظة : التضخم علي أساس سنوي؛ يعني بيقارن مفروض الاسعار في أبريل 2022 ب أبريل 2021 وليس شهري يعني مش بيقارن سعر أبريل ب سعر مارس.

تقرير التضخم والتفاصيل من موقع الجهاز المركزي للي حابب يشوفه

202251082942_البيان الصحفي 4-2022.pdf

تخيل معايا إنك بتقول هو النهاردة درجة الحرارة 30 هنا في مصر فيا ترى الجو كده كويس ولا وحش وكان قدامك 3 أشخاص.

⬅️ الأول جاي حالاً من شمال أوروبا ودرجة الحرارة العظمى عندهم الأيام دي 15... تلقائي هيقولك ايه الحر الفظيع دا.

⬅️ الثاني مصري عادي فهيقولك قشطة 30 دا جو ظريف مش الحر قوي فعادي يوم جميل.

⬅️ الثالث بقى كان جاي من الخرطوم وعندهم هناك 46 فيقولك فين الحر حضرتك؟ دا احنا في ديسمبر ساعات بتجيب 31 دي... الجو تحفة.

*️⃣ الثلاثة قالوا كلام غير بعض رغم إن الموقف واحد وكمان موقف صريح ودرجة حرارة متقاسه يعني مش موقف رأي... بس بسبب اختلاف الأساس الفكري اللي بيقيسوا بيه فالثلاثة قالوا غير بعض.

*️⃣ خد بقى دا في أي موقف بيحصل وتلاقي خلاف عليه... مش شرط دائماً المختلف يكون بيكذب أو بيضلل؛ هى الفكرة بس إنه بيقيس بمسطرة مختلفة

*️⃣ طبعاً ممكن دا يتفهم إن كل شيء في الحياه نسبي ومفيش صح وغلط وكله سلطة؛ هنا بقى الخدعة؛ كل شيء نسبي بس النقطة هى إن في نواة وأساس مفروض يتفق عليه فأي قياس غيره هيبقى غلط.

*️⃣ يعني مثلاً فوق أنا بقول هنا في مصر؛ يعني أنا بقول بالنسبة لمصر ال 30 دي ايه؟ هات السوداني أو الاسكندنافي دا وخليهم يعيشوا في مصر شهور أو سنين يتطبعوا وبعدين هتلاقيهم هيقولوا على درجة الحرارة 30 زي المصري ما قال؛ ولما يرجعوا بلادهم هيحسوا إن الجو صعب.

*️⃣ فلما تشوف المرة القادمة أي خلاف؛ أي خلاف فكر الأول في الأساس الفكري للآخر؛ يعني خلاف عن الوضع الاقتصادي؛ شوف هو الآخر دا من بتوع إن الأساس هو أرقام الدولة تكون زي الفل ولا المواطن يحس إن الوضع زي الفل؟.... لو الخلاف في نقاط دينية؛ شوف الآخر دا مؤمن بالدين الإسلامي ولا المسيحي ولا ملحد ولا من أتباع الدين الإنساني الجديد... مش منطقي تكون مسلم وخلفيتك الفكرية الكتاب والسنة والآخر دين إنساني وخلفيته الفكرية وثيقة حقوق الإنسان للأمم المتحدة وبعدين تتفاجئ إنكم مختلفون.

هو مفروض الناس تهري في اي موضوع؟ بعيد يعني عن الديمقراطية وان من حق أي حد يقوا اي حاجة والجو دا؟ لكن هل المفروض أصلا ان أي حد يهري في أي حاجة؟

في رأيي الإجابة هي لا؛ مفروض يكون كل واحد مركز في مجال هو بيفهم فيه؛ ولكن ولكن ولكن

⬅️ الفيسبوك والسوشيال ادي الجميع حرية الهري ويمكن اتشهر وابقي معروف.

➡️ الناس مش لاقيه اللي مسئولين عن الكلام فعلا متصدرين؛ يعني لو كلام في الإقتصاد؛ لو في داتا وشفافية وثقة في المسئول ليكن وزير المالية؛ وهو بسرعة تصدر وتكلم... فنسبة كبيرة من الهري هتختفي... ولو الدين مثلا يلاقوا شيخ ما يثقوا فيه. وهكذا... لكن المشكلة ان الناس بتلاقي اللي متصدرين المشهد مش بيتكلموا وكمان لو تكلموا فثقة الناس فيهم صفررر... فخلاص بقي اتكلم أنا.

*️⃣ لكن فعلا المضحك ان الناس اللي عاوزة تنشر الهبد؛ شغالة بحماس عنيف؛ والناس اللي ضد الهبد تقولك بلاش هري هقعد ساكت؛ فصوت الهري يبقي عالي... وبعدين يطلع فلاحيس وهو جمع الفلحوس 😁 اللي بيحبوا يعيشوا في دور العاقل الرزين؛ يروح منتقد اللي بيردوا عالهري... من منطلق انهم سبب الدوشة؛ لو سبتم الهري يعدي كان الموضوع خلص... حاضر يا فلحوس

وبكده نضمن رسالة معاً لنشر الجهل

كنت اتكلمت في الموضوع دا زمان بس عادي نكرره؛ تفتكروا هي أم كلثوم بقت أم كلثوم عشان هي موهوبة فقط؟ طيب أي ممثل شهير أو حتى لاعب كرة قدم وصل للي هو فيه لإنه عنده موهبة؟

*️⃣ طيب تفتكروا الاعب X وحط أي اسمه تحبه بقي الهداف / المهاري/ حارس المرمي / الخ الخ عشان هو أحسن واحد فعلاً كان عنده موهبة فعلاً؟

*️⃣ في حاجة اسمها صناعة المشاهير وصناعة النجوم... الفكرة هى إن مش كفاية كونك موهوب دا كفيل يخليك أسطوري؛ يعني مثلاً هل أم كلثوم لو كانت معارضة ل 52 كانت بقت أم كلثوم اللي نعرفها؟ ولا كانت أغانيها هتتردم وسيرتها تتنسي وشكراً.

*️⃣ تعالوا أحكي لكم القصة بشكل مبسط إزاي بتتم؛ إزاي شخص بيتحول من شخص موهوب آه بس في زيه مثلا 100 او حتي 500 شخص بنفس الموهبة؛ فبعد 20 سنة يبقي الموهوب دا الأفضل في مجاله أو من الأفضل ويتعد عالأصابع. وطبعاً الكد والاجتهاد والمثابرة والشعف والحماس وكل التنمية البقرية محفوظ حقها... بس تعالوا نتكلم في جانب ثاني..

*️⃣ في البداية بيكون في شخص موهوب؛ هو عنده موهبة بجد يعني مش بطيخة... فهنا ييجي الناس اللي دورها تصنع النجوم؛ عشان نصنعك نجم لازم تبقي إنتا متوافق معانا في كله؛ شكلك؛ طريقة لبسك؛ أراءك وأفكارك وانتماءك وكله... متفق مع أفكارنا اللي هي من الأساس القيم اللي الرأسمالية بتاعتنا ك (أصحاب الريموت) زارعينها في المجتمع.

*️⃣ لما تلاقيك مناسب نبدأ نساعدك ونصرف عليك؛ بالفلوس هنجيب لك مدربين أفضل؛ بتغني؟ بالفلوس هنجيب لك ملحنين أحسن وكتاب وشعراء أعلى من أقرانك الموهوبين؛ بالنفوذ والفلوس نخلي الإعلان يتكلم عنك أكثر؛ فالناس تلفت لك... ممكن تعمل أغنية وفي موهوب آخر منافس عمل أفضل منها؛ لكن انتا معانا ومرضي عنك والآخر لا... فنخلي الإعلام يتكلم عن اغنيتك؛ التليفزيون يستضيفك؛ قنوات الراديو تذيع أغنيتك أكثر... فأغنيتك الأقل جودة تنتشر أكثر وانتا تربح أكثر...

*️⃣ مع الوقت وبمساعدة المدربين اللي علي أعلي مستوي المتوفرين لك؛ وطاقم العمل المحترف؛ مستواك هيتطور أسرع من الموهوب المنافس ليك؛ فأغانيك فعلا هتبقي زيه وبعدين تبقي أفضل منه... فتكسب فلوس أكثر فتجيب ناس أفضل فدا يخليك تتطور أسرع وأحسن من منافسك دا...

*️⃣ مع السنين ومن الاحتكاك مع محترفين؛ مهارتك تضاعفت بسبب الأمور دي اللي متوفرتش للمنافس بتاعك؛ فمن 10 او 20 سنة كنت لو قارناك بالمنافس كان هو يكسب بفارق صغير؛ لكن دلوقتي بقى الفارق لصالحك وفارق كبير وضخم فعلاً... بقيت فعلاً أفضل منه مش مجاملات.

*️⃣ طيب لو انتا في نص طريقك قررت تقلب علينا ولقينا الغرور اخدك؟ هنا القرار بيطلع؛ محدش يشتغل معاك... اه الملحن الفلاني عارف انك مشهور وكده بس مصلحته معانا احنا... قناة التليفزيون عارفه انك محبوب ولو استضافوك هيحققوا مشاهدة؛ بس مصلحتها معانا أكبر منك؛ المنتج الفلاني برضك... لو انتا ممثل يعني فمش هنعمل لك فيلم؛ ولو حتي لقيت منتج م من الشلة بتاعتنا وعملك فيلم؛ فدور العرض بتاعتنا مش هتنزل فيلمك فيها. من الاخر هنشيل الأضواء من عليك.
*

*️⃣ فمهما كنت محبوب؛ انتا مجرد ك ممثل / مغني / لاعب كرة أو رياضة... مجرد شيء ترفيهي؛ لما تختفي من قصاد عيون الناس هتتنسي والناس هتعيش عادي من غيرك... أظن كثير تابعوا نصر محروس لما قرر يقعد بهاء سلطان في بيته 8 سنين عمل دا ؛ والناس نسيت بهاء سلطان عااادي جداً.

*️⃣ فأم كلثوم لو كانت زعلت النخبة الحاكمة بعد 52 كان ببساطة تتشال عالرف؛ محدش هيعمل معاها شغل؛ مش هييجي لها أفضل الملحنين والعازفين؛ مكانتش هتتطور فنيا؛ فكان هيطلع بدالها حد تاني.

*️⃣ لما عملت شير اليوم عالفيسبوك لمقال صديقي علي محمد علي الخاص بمحمد صلاح وإنه عاوز يعمل أي حاجة عشان ياخد الكرة الذهبية؛ في ناس قالت ايه العبط دا اللي كاتبه علي؛ هو ميسي مثلا أخدها عشان مواقفه مع ولاد العم جيراننا ولاد المبقعة؟ ميسي موهوب فعلاً وأخدها باستحقاق... دا حقيقي بس هو وصل للموهبة دي ازاي؟ لو فرضنا ميسي سنة 2005 طلع له موقف يزعل ناس ثقيلة كان ايه هيحصل؟

*️⃣ لسه هو مكانش برشلونة معتمد عليه؛ فلاعب كويس بس مهواش (سيد معزة)؛ برشلونة يطلع وقتها يدين الموقف اللي مش عاجبنا للاعب الصاعد ميسي ويقرر عرضه للبيع... الأندية الكبرى تقرر متتعاقدش معاه لانها معترضه علي موقفه... يروح نادي متوسط... في النادي المتوسط هيحتك ب مدرب متوسط ومدرب لياقة بدنية متوسط وهيقابل فرق عاديه مفيش احتكاك قوي بأندية كبري في دوري ابطال أوروبا... باختصار مهاراته مش هيتم صقلها بالشكل اللي يخليه ميسي اللي نعرفه... فمكانش هيبقي ميسي اللي اخد الجوائز باستحقاق دلوقتي.

*️⃣ فلما تبص في الوسط الفني تستغرب هما إزاي تقريباً كلهم شبه بعض؛ أخلاق ومليطة وتوجه فكري وسياسي وكده... لان ببساطة اللي مش مناسب مش هيكمل وهيطلع بره.. وبالذوق يعني...

*️⃣ الموضوع دا عالمي؛ تفتكروا في ممثل ممكن ياخد الأوسكار او جايزة عالمية وهو عنده تصريحات مثلا معادية لجيرانا؛ أو معادي لفكرة افلام نتفليكس؟ ولو حصل مثلاً قولي كام %... هل دا يعبر على النسبة الحقيقية؟

*️⃣ عشان كده أي ممثل بقي مغني أو لاعب كورة أو حتي سياسي؛ عنده هدف يوصل في المنظومة؛ لازم ياخد باله من أصحاب المنظومة دي عاوزين ايه؛ ومش هقولك يسكت خالص بس؛ لا دا لازم يوضح انه معاهم... لان هييجي يوم نحتار فيه مين يعدي ويكسب؛ هيكون في قصادنا نقاط المهارة زي بعض؛ فهنرجح بقي لاعتبارات تانية غير فنية؛ اعتبارات مين محايد ومين مؤيد.

*️⃣ طلعت وبقيت مخرج مشهور وأخدت اخراج حفل أولمبياد طوكيو 2021 بس اكتشفنا انك في يوم صرحت ضدنا؛ بره يا كلب وابقى قولي هتمسك حتي اخراج مهرجان المزارطية 😁... شخص اعلامي وصلت لانك تبقي وزير في بلد عربية وبعدين نكتشف تصريح ليك ضدنا زمااان قبل ما تبقى وزير... مع السلامة...

*️⃣ فاللي انتا شايفه؛ أي كان هو مين في المنظومة الترفيهية العالمية خاصة يعني؛ موصلش هناك الا لو مرضى عنه... مهاراته موصلتش لكده الا لو كان مرضي عنه.

كذا حد طالب مني أعلق عالبرنامج الاقتصادي /الخطة / التصريحات اللي مصر أعلنتها قبل أيام للسنوات القادمة يعني هنتعامل إزاي مع الأزمة العالمية وأزمة مصر:

1️⃣ أنا مش بحب أعلق بشكل أساسي على قرارات سيادية مصرية وأكيد مفهوم ليه... من خاف سلم.

2️⃣ إتعلمت إن في مصر التصريحات حمادة وأرض الواقع حمادة تاني خالص؛ ياما طلعت قرارات جميلة كنت بصقف وأنا بسمعها من المسئولين وبعدين شوفت أرض الواقع اتصدمت... خلينا نشوف أرض الواقع هيكون في إيه.

3️⃣ مش معنى إن في حاجة هتتباع يبقي كارثة؛ لا مش لازم؛ الحكومة مدير فاشل؛ القطاع الخاص هو الأصلح للإدارة... بس عيب القطاع الخاص انه بيفكر في الفلوس وشكراً واللي ممعهوش ميلزموش ومفروض الحكومات مش بتفكر كده وبيكون أولويتها خدمة المواطن مش تكسب منه... مفروض يعني 😁...

*️⃣ المهم يعني في حالات الخصخصة دي تلقائي سلع وخدمات هتبقي مفروض أفضل لكن بسعر مش مناسب للجميع... فمفروض الدولة بتستخدم عائد البيع لمساعدة المواطن الغير قادر على سعر الخدمة... فالخلاصة؛ البيع نفسه مش مشكلة؛ المشكلة لو ضيعت فلوس وعائدات البيع وموفرتش خدمة للمواطن بيها؛ والمشكلة الأكبر لو بعت بدون رقابة حقيقية صارمة تحمي حقوق المواطن....

*️⃣ عشان تفهم النقطة الأخيرة؛ تخيل دولة باعت مصنع الصابون بتاعها الأساسي؛ المشتري طور المصنع وعمل نوعيات صابون بجودة أعلى لكن السعر أعلى؛ وبعدين صاحب المصنع لقي ان ليه أبيع الصابون لمواطنين الدولة لما ممكن اصدره واكسب اكثر؟ خلاص احرم المواطنين من الصابون أصلاً... فهنا ييجي دور الدولة اللي مفروض في العقد تقوله انتا حر بس مينفعش تحرم المواطنين من الصابون أو تشوف فكرة أي قيود تانية.

مش هطول عشان مش فاضي اليومين دول... نكمل وقت آخر

فينك مش بتكتب ليه؟

*️⃣ سؤال جميل جالي كذا مرة؛ وبيفرحني صراحة ان ناس مهتمة ومتابعة 😍 ... بس أنا مؤخراً مش قادر أكتب لخليط أسباب؛ شوية أمور مركز فيها بالشغل بتاعي ومعاهم إرهاق واستنزاف نفسي وفوقهم عدم استقرار صحي كده.

*️⃣ في كم أخبار مهول الأسبوعين الماضيين؛ من المركزي اللي زود الفايدة وطالع نازل دولار وحتي موديز اللي خلت نظرتها المستقبلية الائتمانية لمصر سلبية من مستقرة؛ وقرض صندوق النقد اللي بيتم حالياً ومفروض خلال شهرين يخلص... وحتى حوارات بعيد عن الاقتصاد زي الخناقات المعتادة في ثوابت دينية زي نقول الله يرحمها ولا لاء؛ طيب التعدد ممنوع ولا مسموح؛ طيب مش عارف ايه... المهم نجيب حاجة دينية نلطها وتبقي win-win خناقة بالنسبة لنا... المتدنين نفضوا للخناقة دي يبقي أفكارنا الوسخة عدت... ولو منفضوش وركزوا فيها يبقي شتتنا المجتمع عن التفكير في أمور أخرى.

*️⃣ دا من الأمور اللي في فترة الخمول الحالية كنت بفكر فيها؛ هو في فايدة بجد؟ هو بكره هيكون ايه.... لما ببص عالجيل اللي جاري تربيته أو بفضل مصطلح جاري تفخيخة؛ لانه لم يتربي بل هو قنبلة جاري تفخيخها لتنفجر في المجتمع.

*️⃣ لما كنت صغير كان في مفاهيم أساسية دون أن ندري مزروعة جوانا؛ حتى لو تحسها بسيطة زي احترام الكبير... دلوقتي في جيل (مبيكبرش لحد) جيل ممكن نقول تربية دارون كده؛ البقاء للأقوي وكل شيء ييجي بالذراع... زمان لو صاحب محل قال لعيال بتلعب في الشارع روح ياض العب عند بيتك؛ غالباً هيبرطموا شوية ومعلش نلعب هنا؛ يزعق لهم فيمشوا... دلوقتي متخيلين ايه يحصل؟ غالبا هيشتموه ان لم يسبوا الدين نفسه؛ ولو خرج لهم عشان يضربهم هيجروا؛ ويرجعوا بعد شوية يحدفوا المحل بالطوب.

*️⃣ عارف ان البعض ممكن يقولي لالا مش للدرجة؛ حضرتك خرج راس النعامة بتاعتك من الأرض وشوف العيال اللي بترمي طوب عالقطارات للتسلية بس؛ او اكياس مايه وبمب عالاتوبيسات برضك للتسلية. ولو شايف دي حالات فردية؛ متقلقش عددهم بيزيد.

*️⃣ أنا مش متخيل جيل اتولد؛ الأب بيروح الشغل وبالليل إما بيشوف شغل تاني أو هربان عالقهوة قاعد يشرب شيشة مع أصحابه أو يحشش... عيال مين معرفهمش؛ دول تربية أمهم...

*️⃣ والأم بقي إما استرونج اندبنت واحدة ست؛ تروح شغلها برضك ونفترض دا لدعم المنزل؛ لان الأطفال مفروض زي البهايم محتاجين علف؛ محتاجين فلوس عشان نعلفهم لكنهم بهايم فمش محتاجين تربية عقول... يلا نشتغل عشان الظروف صعبة والعلف بقي غالي... طيب والعقل بتاع البهيمة دا ايه؟ لا دا مش عقل دا مخ بقري وبيتعمل ساندوتشات لذيذة.... وطبعاً ممكن متبقاش أم بتاعة شغل يعني وكده وتبقي عادي عالتيك توك والمسلسلات الكورية والمكسيكية والعيل دا منعرفوش

*️⃣ فيبقي الأب والأم اتسحلوا في الحياة؛ وسابوا مخ البهيمة فاضي... لكن المخ دا ربنا مخلقوش يقعد فاضي؛ لازم يخش فيه داتا... فيبدأ يدور على أي مصدر داتا.

*️⃣ يفكر في المدرسة؛ اممممم... لا المدارس مش بتربي حاجة ولا حد؛ فخلاص المدرسة بلح مفيش فايدة منها.

*️⃣ يبقي الاعلام والانترنت والأفلام؛ اللي هما مركزين عالعالم البلطجي والقوة وخد حقك بذراعك والفلووووس بأي شكل... انتا تاجر مخدرات /سلاح بس جدع وبتحب أهل منطقتك وبتساعدهم... مثال جميل قوي ومتكرر بأشكال مختلفة... مفهوم مفيش مانع تبقي وسخ بس هنطلع لك جانب إنساني جميل ولطيف... ما ابن منطقتك لما قالك بنتي عيانه في المستشفي اتبرعت وساعدته وبقيت جدع اهو... طيب بالنسبة للي مات في مستشفي تانية بسبب جرعة مخدرات من اللي بتبيعها ولا سلاح 🤔 لا دي مش هنجيبها لك في الفيلم بتاعتنا.

*️⃣ في يوم من الأيام حد هيعمل مسلسل عن إبليس وإزاي هو مظلوم والبني آدمين هما السبب... هما بس يركزوا في قصة ابليس انه أب وعنده عيال وكده... هبقي ألف لكم القصة دي واكتبها في بوست لاحق.

*️⃣ المشكلة إن المركز التفكيري للتفكير بقي مشاعرك؛ انتا مبسوط؟ انتا شايف التصرف دا إيه؟ لاننا في عالم دارويني ونسبي فمفيش حاجة مطلقة اسمها صح وغلط.

*️⃣ هتقولي لا في قيم الدين؛ اهاااا؛ هنا سأسكت قليلاً؛ بس عكس المقولة الشهيرة 😁... دين مين يا ابو دين... قولي هو الأطفال والجيل تحت 20 سنة دا سمع عن الدين فين؟ المكان الوحيد اللي سمع عن الدين فيه كان في المدرسة في مادة غير إجبارية؛ غير كده ميعرفش ايه الدين دا... يعني الجيل اللي قبله كان بيعدي قصاده شوية دين؛ شوية كده خفيفة؛ يعني يلاقي يوم الجمعة الشعراوي كده في التليفزيون... يروح الجامعة يلاقي أسر دينية؛ يلاقي زمان قنوات دينية في التليفزيون... بغض النظر عن التوجهات السياسية بس كان بيشوف في حياته كلمة دين حتي لو عالحيطة مكتوبة... دلوقتي ايه 🤔 اظن لو وقفت اي حد تحت 20 سنة وقولت له قولي اسم 10 صحابة؛ أي 10 من الصحابة فمش هيعرف أصلاً... مبقولش بيقتدي بيهم ولا بيقلدهم وهو متدين؛ مجرد بس اسماءهم؛ غالباَ 90% هيفشلوا.

*️⃣ وطبعاً عشان الأجيال متحسش بافتقاد الدين؛ اخترعنا لهم الدين العلماني الإنساني؛ الدين قايم على فكرة انتا شايف ايه؟ مش هنقوله بقي ادرس فقة ولغة عربية وعلم الحديث والجرح والتعديل ووو... لالا بلاش هري وكلام فارغ؛ انتا شايف ايه؟ الحاجة كده انتا شايفها كويسة صح؟ يبقي اكيد هي حلال مهو ربنا مش هيحرم حاجة جميلة كده... الفعل دا مش مرتاح له نفسياً؟ يبقي اكيد حرام مهو ربنا مش هيكون عاوز يجرحك نفسياً... الدين المعاملة يا ابني؛ طيب هو مفروض أعامل على أساس ايه؟ على أساس انتا شايف ايه صح؛ ايه أكثر كيوت فيبقي دا من الدين...

*️⃣ انتم اعلم بشئون دنياكم يا سيدي؛ طيب الموضوع دا مش من الدنيا دا من الدين؛ لا يا سيدي انا شايفه من أمور الدنيا... كل واحد يشوف دين خاص بيه؛ والهك يبقي مخك والهوى الشخصي... ونكرر مقولة (مهو أكيد ربنا مش هيحرم كذا؛ مهو أكيد ربنا مش هيحلل كذا؛ مهو أكيد ربنا مش هيعمل) القاعدة بقت إن الناس هي اللي بتقرر لله عز وجل ايه اللي مفروض في الدين مش العكس... هو ليه ربنا مظبطش الدين بما يناسب الدنيا بتاعتنا؟ مش العكس؛ يعني مش احنا اللي نظبط الدنيا علي ربنا؛ لا العكس...

*️⃣ وعلى فكرة كلنا هنخش الجنة؛ فكرة وانتا مالك مين هيروح النار؛ مفهوم قمة في التدليس... فعلاً هو وأنا مالي ما يولع ك شخص؛ بس اللي يهمني هو ليه رايح النار عشان معملش زيه واروح زيه... مهو لو متعرفش ايه الأفعال اللي تودي النار؛ فممكن تعملها وتلبس... فهمت يا غبي ليه مفروض تفكر في دا... هبقي اكتب لدا بوست مستقل؛ بس فعلاً الموضوع بقي مبهر... تلاقي دينا بيقولنا ان الرسول حذر اننا ك مسلمين هنتفرق ل 73 فريق؛ هيبقي 72 في النار و 1 في الجنة... يعني مسلمين (نظريا) وفي النار وتلاقي المفهوم العام بقي كما قال بلال فضل ان مين الاهبل اللي فاكر ان ربنا خلق مليارات البشر يعيشوا دور كومبارس في حياة هيدخل الجنة فيها المسلمين بس... تخيل انتا تبقي قاعد قلقان انك تبقي في فرقة من ال 72 اللي ضلوا وهيروحوا النار... وتلاقيهم بيقولوا لك (اسكت مش ممكن متبقاش مسلم اصلا وتروح الجنة)... طيب معلش ابقي مسلم ليه؟ طيب ربنا بعت سيدنا محمد ليه؟ مهو مش محتاجينه في شيء لانك ممكن تخش الجنة من غيره ومن غير الإسلام أصلاً... (اتمني تاخدوا المعني ومندخلش نقاش تفسير ال 73 وانها امه الدعوة وليس امة الاجابة وكده؛ خد المعني عن مسلمين نظرياً زي الاحمدية وكده)

*️⃣ استووووب استوووب؛ مش عارف ايه اللي حصل في البوست؛ أنا مسكت الموبايل وقولت هكتب سطرين اقول فيهم إني مرهق نفسياَ وذهنيا وعضوياً فمش قادر اكتب؛ لقيت نفسي بقالي قرب الساعة بكتب أهو والبوست بقى مترين ورغي المعيز.

⬅️ بالمناسبة بالمرة موضوع البودكاست مع صديقي شريف
Sherif Sayed Abdel Gawad مماتش؛ بس المشكلة كل ما نفكر في يوم يطلع في ماتش كورة سواء محلي أو عالمي ؛ يعني فكرنا النهاردة بس طلع في ماتشات... فربنا يسهل نلاقي يوم مناسب لينا وميبقاش فيه كورة 😁دورت عالتصريح عشان مستغربه

في كمية هجوم على توكيل تويوتا مصر في صفحات وجروبات العربيات؛ بس أسمحوا لي اسأل سؤال... ليه توكيل تويوتا ميعملش كده؟

⬅️ في تسجيل صوتي للبوست نهاية المقال وشغال عادي يا شباب مش لازم سبوتيفاي.

*️⃣ قبل ما اللي عارف يتعصب ويخش للتعليقات؛ نشرح الأول للي مش متابع عشان البوست أصلاً مفهوم عام وهنضرب بس المثال بموقف توكيل تويوتا يعني... فتويوتا مثال مش أكثر...

*️⃣ العربيات في مصر ناقصة بشكل كبير بقالنا سنة؛ ففي ظاهرة اسمها أوفر برايس؛ يعني سعر العربية الرسمي في توكيلها ليكن 300 ألف فأصحاب المعارض ياخدوها من الوكيل ويسحبوا كل اللي عنده ويبيعوها ب 350 أو 370 أو 400 أو أو بقى حسب العربية مطلوبة أد ايه.

*️⃣ المهم سكان كوكب الأرض بيحبوا عربيتين من تويوتا وهم كورولا و كامري؛ الدول الثرية بيكون كامري والفقراء أمثالنا كورولا وهى كثير بتكون أكثر سيارة مبيعاً في العالم والسبب مش مزايا خاصة بالعكس كورولا فقيرة في المزايا ولكن قلة الاعطال والاعتمادية يعني عربية مناسبة لأي حد فوق 40 سنة وخلاص لا ناوي يغير عربية ثاني ولا فيه صحة للأعطال ومتابعتها.

*️⃣ فطبعاً بسبب الطبيعة المصرية اللي بتحب الأمان بزيادة وتريح بالها فكورولا هى أكثر سيارة مطلوبة في السوق المصري؛ وطالما مطلوبة فالموزعين يشتغلوا عليها ويسحبوها ويطلبوا أوفر برايس عالي.

*️⃣ المهم في ناس قالت لا مش عاوز أوفر برايس؛ فكانوا بيروحوا للوكيل يحجزوا العربية ويستنوا بقى بالشهور عشان يستلموها بالسعر الرسمي... وكان في اتهامات واسعة إن التوكيل مظبط مع الموزعين وبيورد لهم العربيات وهما يبيعوا بالغالي وينصصوا سوا في الفروقات من تحت الترابيزة والجو دا.

*️⃣ المهم يعني طوابير الانتظار بتاعة الشراء الرسمي بقت طويله؛ شهر اثنين ثلاثة؛ وهوبا جت ازمة حظر استيراد السيارات الحالية فخلاص بقت العربيات لمن استطاع إليه سبيلا وقائمة الانتظار وصلت دلوقتي لأكثر من 6 و 7 شهور. وطبعاً تحريك الدولار تسبب إن كل شيء زاد سعره.

*️⃣ المهم جهاز حماية المستهلك طلع قال لشركات العربيات ان الناس هتستلم بالأسعار اللي هي حاجزه بيه؛ ولو مش هتعرف توفر العربية تردها للناس فلوسهم بفائدة 18% سنوي.. فهنا توكيل تويوتا راح باعت للناس رسائل تعالوا خدوا فلوسكم بفائدة 18% (طلع بعدها وضح إن دا مش ساري للكل وانه ملتزم بسعر الحجز لكن لو معرفش هيردها بالفائدة).

*️⃣ دلوقتي الناس ليكن شخص X كان عاوز موديل معين ب 400 ألف جنية الرسمي ودافع من شهر نوفمبر 100 ألف جنية دفعة حجز... التوكيل بيقوله سوري مش هتيجي خد ال 100 ألف فوقهم 10 الاف فائدة المدة دي يعني 110 ألف... وبعد شهرين مثلاً هيلاقي العربية اللي كان عاوزها جت وبقى سعرها الرسمي 550 ألف والفعلي في المعارض 650 ألف... فكده التوكيل دفع له 10 الاف جنية فائدة وخلع منه وأخد 150 ألف عالأقل فارق في السعر...

*️⃣ دي القصة كلها وسبب الهجوم العنيف على توكيل تويوتا لكن يبقى السؤال اللي بدأت بيه؛ لييييييييه توكيل تويوتا ميعملش كده؟ يعني نفترض إن كل الاتهامات صحيحة وهو مخطط يخلع من الناس ويبيع العربيات في السوق ووو... السؤال ليييييه ميعملش كده؟

*️⃣ قبل ما نجاوب نرجع بس نفتكر نقطة؛ هى الشركات بتتأسس ليه؟ عشان تكسب.. بس خلاص كلمة واحدة؛ المكسب... الشعارات بتاعة خدمة المجتمع وصالح البشرية ووو كل دا مجرد شعار من أجل تسهيل الوصول للربح؛ مفيش شيء اسمه من أجل جعل حياة الانسان أفضل؛ أيوا هنخليها افضل فتلاقوا منتجاتنا جميله فتشتروها فنكسب... من الآخر الهدف الربح.

*️⃣ طيب الشركات ليه بتهتم بخدمة العملاء؟ عشان العميل يبقى مبسوط ولما يبقى مبسوط هيشتري مننا تاني وهيكلم أصحابه عننا وتبقى سمعتنا كويسة فالناس تتشجع أكثر تشتري من عندنا فنكسب فلوس.. برضك أهو وصلنا في الآخر لإننا عاوزين نكسب فلوس برضك.

*️⃣ طيب ايه اللي بيخلي الشركات متسرقش العميل؟ عشان سببين الأول في جهاز حماية مستهلك قوي وعنيف واسمه حماية المستهلك يعني دوره المستهلك مش الشركة؛ يعني يقف ضد مصلحة الشركات ولصالح المستهلك وليس يقف في النص حيادي فلو سرقت عميل فهنا جهاز حماية المستهلك هيفرض عليا غرامة كبيرة وكده أخسر فلوس... والسبب الثاني هو عشان العميل ميزعلش مننا ويتكلم عننا وحش فالناس تقاطع منتجاتنا فنخسر فلوس. يعني برضك فلوس فلوس في النهاية.

تعالوا بقى نشوف حالة مصر وتويوتا ك مثال...

*️⃣ دلوقتي بالنسبة لجهاز حماية المستهلك فهو قال رجعوا الفلوس ب تعويض واحنا موافقين فخلاص كده زي الفل هربنا منه؛ وفاضل لنا زعل العميل؛ لكن هل زعل العميل ليه قيمة بالنسبة للكيان القوي دا ... أو تحديداً العميل المصري وبكرر المصري مش أي عميل.

*️⃣ المواطن المصري والعميل المصري زي ما تم وصفه من 100 سنة من الامام محمد عبده لما قال "تم كسر بأس الأهالي والمصريين" يعني بالبلدي كده متخافش منه؛ يعني في أي حد متخيل إن مبيعات تويوتا هتنهار في مصر؟ توكيل تويوتا هيقفل؟ هيحصل له مقاطعه؟ ولا الهوا... وعربياتها هتنزل والناس هتقف عليها طوابير وهتدفع الأوفر برايس.

*️⃣ كانوا زمان بيقولوا لنا من أمن العقاب أساء الأدب؛ فرنسا كانت مثال واضح وصريح؛ الدولة الفرنسية نفسها تبنت سباب الرسول... هل المصريين قاطعوا المنتجات الفرنسية وشركاتها وعملوا لهم خسائر مرعبة؟ لقيتوا فروع كارفور فاضية ومنتجات لاكتيل ودانون وشركات الجبنة لافاش كيري وبريزيدون وأبو الولد وباقي شركة بل بتخسر؟ خالص دا أعمالهم ازدهرت بشكل شجع شركات فرنسية جديدة زي سوبر ماركت "جيان" انه ييجي مصر.

*️⃣ بلاش فرنسا عشان هيطلع لك بتوع أصل دي شغال فيها مصريين والمقاطعه تخلف (وأظن شوفنا حرب روسيا أوكرانيا اظهرت يعني أهمية العقاب اقتصادي) سيبك منه... محمد رمضان لما اتصور مع الممثل بتاع دولة جيراننا ولاد المبقعة... هل الناس قاطعوا أعماله؟

*️⃣ أنا اتكلمت في نفس النقطة كثير فمش عاوز الناس اللي بتقرأ كل البوستات تحس بالملل من تكرار الأمثلة؛ لكن الخلاصة بنفس المعنى لكن الخلاصة هل في حد خايف من "غضبة المواطن المصري؟"

*️⃣ المستهلك المصري مفتت ومدمر القوى؛ وصل لمرحلة مدمن المخدرات اللي موافق يحصل فيه اي شيء بس ياخد الجرعة؛ أو على رأي مصطلح كان دكتور راغب السيرجاني بيكرره في قصصه "يريد الحياه؛ أي حياه؛ فقط حياه".

*️⃣ الشركات بتحسبها بالورقة والقلم؛ لو أخدت القرار دا هكسب كام؟ 50 مليون مثلاً... طيب متوقع الناس تقاطعني؟ اه ممكن نسبة 5% هيقاطع و 95% لا... طيب ال 5% دول بكام؟ يساوى 20 مليون... يبقى كده أنا كسبت 30 مليون... نفذ.

*️⃣ بلاش أفكار رومانسية في الحياه؛ الشركات بتحسبها؛ اه ممكن تلغط في تقدير مواقف وتحسبها غلط بس هتفضل بتحسبها... حتى بعيد عن المشاكل؛ انتا فاكر إن ميزة كذا ولا كذا اللي بتقول دي جميلة قوي في الأندرويد ومش في الآي فون؛ هل تفتكر أبل تعجز عن إضافتها وهى أغنى شركة في العالم؟ لا طبعاً عادي تقدر تضيفها بس أبل برضك بتحسبها وبتقول كام عميل هيمشي عشان مش لاقي الميزة دي؟ ولو ضيفتها هتكلف كام وهتجيب لي كام عميل جديد؟ وهكذا... طبعاً مش بتبقى طريقة الحساب بالشكل البسيط دا مهواش محل بقاله؛ لكنهم بيفكروا في كل خطوة هتتكلف كام وتجيب كام.

*️⃣ فلو انتا زعلان من تصرف تويوتا ولا ممثل ما ولا منتج ولا ولا؛ متستغربش يعني لإنهم باختصار مش قلقانين ولا خايفين... لو تويوتا عارفه إن الناس هتقرر تقاطعها وممكن تخرجها من السوق كله كانت خافت والتزمت ولو بخسارة عليها... لكنها عارفه إن كل الناس هتقولك يعني أنا هقاطع تويوتا وغيري هيشتري فهي مش هتتضرر وهتستمر يبقى انا بس اللي خسران... نفس معادلة مقاطعة كارفور ولا ديكاتلون اللي بتوصلك يعني أنا هبطل وهخسر أنا بس العروض وغيري هيستفيد بيها والمحل مش هياخد باله ومش هيتأثر وسياسته مش هتتغير لإنهم ملقوش تأثير... فكده مفيش خسران غيري يبقى لالا مش هقاطع.

*️⃣ طبعاً مش عاوز أقول إن الناس بتتحمل 100% من المسئولية في موضوع عقاب الشركات والمقاطعة؛ لإن أساساً مفروض يكون في منظمات مجتمع مدني هى اللي بتدعوا لمقاطعات وعقاب الشركات اللي بتضر الناس وكده... والحاجات دي ممنوعة في مصر... لكن في النهاية احنا مش هنقدر نغير الوضع الثاني دا فبلاش نكرر نفس الفقرة السابقة ونقول مهو مفيش منظمات تجمعنا عالمقاطعة وكده أنا بس اللي هقاطع فمش هيحسوا بتأثير ووو... ابدأ بنفسك

*️⃣ فإجابة السؤال بتاع البوست؛ توكيل تويوتا غلطان؟ اه أدبياً غلطان... لكن هل هيندم وهيخسر بيزنس يعني دا خطأ بيزنس فادح؟ اه بس مش في مصر... في مصر عاااادي جداً وعربياته هتفضل تتباع والناس هتقف طوابير عاااادي تشتري وتحجز وكله.

*️⃣ خد القاعدة دي وقيسها علي أي حاجة؛ منتج زاد سعره أو منتج وخدمة بجودة وحشة وهكذا.

التسجيل الصوتي وشغال عااادي بدون ما تنزل سبوتيفاي
https://anchor.fm/mohammed-samy4/episodes/ep-e1j7ou7

وأخيراً البنوك وقفت شهادة ال 18% بعد الوصول ل 755 مليار جنية عبارة عن 515 الأهلي و 240 بنك مصر

كده خلاص دور الشهادة خلص وسحبت السيولة ونفذت المطلوب للسياسة النقدية

ياااه عاللي كانوا عمالين يقولوا هينزل شهادة 20% ؛ اهي 18% مشيت وبقت 14% دلوقتي

تفتكروا هييجي يوم ونشوف شهادة 4% 🤔

سيبك من الصفر دي مش في حياتنا خالص؛ بس متخيلين ممكن نشوف 4% يعني نشوف تضخم تحت ال 5% في مصر 🤔

دايماً بعد كل الماتشات المحلية والأوروبية نبدأ نقول هو ليه معندناش كورة في بلادنا أو مصر يعني زي اللي في أوروبا؛ وطبعاً بعيد عن إننا معندناش أصلاً أي حاجة زي أوروبا فمجتش عالكورة؛ وكمان لإن الإجابة معروفة لكثير من الناس بس تعالوا نشوف منظومة الكورة الأساسيات بتاعتها بره إزاي وعندنا ماشيه إزاي.

1️⃣ الأندية للمدن وليس الشركات

*️⃣ الدوري المصري فيه حاليا 18 نادي منهم 10 أندية هي أندية شركات مباشرة؛ ومش مقصود هنا نادي شركات يعني مملوك ل شركة؛ دا الأساس في الغرب الأندية مملوكة لشركات؛ لكن المقصود النادي نفسه رافع اسم شركة... يعني مثلا مصر المقاصة 🤔 دا يعبر عن منطقة ايه في الدولة؟ نادي فيوتشر؟ الشرقية للدخان؟ يعني لو قولنا نادي المصري البورسعيدي فهنا انتا تحس انك لو بورسعيدي مفروض تشجع المصري؛ طيب الشرقية للدخان دي مفروض أشجعها لو أنا ايه؟ مدخن سجاير يعني؟

*️⃣ في كل الدول في نادي أو اثنين ليهم شعبية في كل البلد؛ برشلونة وريال مدريد مثلا؛ بايرن ميونخ في ألمانيا والأهلي والزمالك في مصر... طيب لو ماتش بعيد عن الفرق دي الناس تشجع ايه؟ يعني ماتش سيراميكا كليوباترا مع فاركو للأدوية... فين الجمهور يعني؟

*️⃣ فوجود اسم لمدينة بيخلي الناس تقولك بلدنا ومحافظنا وجو العصبية القومية دا؛ وللتوضيح تاني دا مفيهوش تغيير ملكية النادي... يعني مثلا مصر المقاصة يسمي نفسه نادي الفيوم ونادي إنبي يسمي نفسه نادي أسيوط... فتلاقي جمهور يقولك لاااا مش هنخلي بتوع الفيوم يحطوا علينا ولازم نادي الفيوم يكسب. وطبعا واضح ان النادي يكون مقره فعلا في الفيوم او اسيوط مش مجرد اسم يتحط..

2️⃣ الجمهور

*️⃣ بعد ما النادي بقى ليه جمهور مفهووم طبعاً يكون في حضور جماهيري؛ فالنادي يكسب فلوس يقدر بيها يشتري لاعيبة أفضل وكمان يجيب شركات تسويق لنفسه ولاعيبته.

*️⃣ لما النادي هيلعب ماتش يكون في عملية بيع تي شيرت النادي وشعار النادي والجو دا؛ وكل ما النادي يعرف يجيب لاعيبه أفضل هيجيب تلقائي مبيعات أحسن للهدوم والتي شيرتات وكل ما يخص النادي.

*️⃣ النادي ليها جماهير فياخد حصة أكبر من عقود البث التلفزيوني فيبقي مورد إضافي يحسن دخله؛ ويقدر يكبر الاستاد فيجيب جمهور أكثر وهكذا.

3️⃣ الرعاة والبيزنس والمراهنات

*️⃣ دلوقتي النادي بقي ليه جمهور فييجي رعاة؛ والموضوع أكبر بكثير من مجرد يتحط لوجو باكين ولا المصرية للاتصالات وراعي يدفع شوية فلوس... الموضوع دا بره عالم كبير وبيوصل للمراهنات.

*️⃣ لو متعرفش فالدوريات بره فيها مراهنات؛ ماتش ريال مدريد واتلتيكو؟ هنراهن ان الريال هيفوز وناس تانية تراهن ضد؛ ناس تراهن مين هيكسب الدوري الألماني ومين هداف الدوري الايطالي وهكذا... عالم كبير قوي من المراهنات وفي مراهنات موسمية... والمراهنات دي بتحرك البيزنس بتاع الرعاة أصلا ودا خلي اتحاد الكورة الانجليزي يحظر الرعاة دول.

*️⃣ في قرار اظن هيتنفذ في الدوري الانجليزي يمنع عالأندية يبقي الراعي بتاعهم شركة مراهنات وقمار... طبعاً محدش بيمنع وجود القمار لكن مينفعش تبقي نادي ليكن مثلا ليستر سيتي (مثال تخيلي) وعندك ماتش مهم مع ليفربول والمراهنات ضد ليستر سيتي وأنا الراعي الرئيسي ليه... يعني لو النادي اللي بديله فلوس وراعي ليه كسب فهخسر في الراهنات اللي بديرها... طبعا مش معني ان دي شركة قمار انها بس مراهنات مباريات؛ عادي في القمار التقليدي الورق والروليت وكده؛ وهدفهم الظهور العلني الواسع فدا يشجع الناس تلعب قمار وكده... نفس الحكاية شركات الخمور يعني.

*️⃣ المهم بقي الراعي دا بيكسب ايه غير الدعاية؟ في رعاة بيكونوا بتوع بيزنس صريح؛ يعني زي ما بتدخل محلات الأكل وتلاقي هنا بيبسي بس او هنا كوكاكولا بس... فنفس الحكاية ليكن أنا شركة خمور Budweiser راعي الدوري الانجليزي (الخمرة الرسمية Official Beer) أو شركة Carlsberg راعي ليفربول من 92 ؛ دلوقتي لو في ماتشات فأني خمرة تبقي موجودة للجمهور؟ البراندات بتاعتنا وهكذا؛ هل المنافس بتاعنا هنعرض مشروباته عالجمهور؟ وطبعا ضريت مثال بشركات خمور مش عشان حرام؛ اصلا المنظومة الرياضية العالمية شمال؛ لكن عشان دا بيزنس ضخم بره ودا زي العصير عندهم كده كله بيضرب بيرة اكنها مايه معدنية.

*️⃣ لما تيجي تبص لايراد فريق زي ليفربول موسم 20/21 هتلاقيه 303 مليون يورو من حقوق البث وراها الأنشطة التجارية ب 240 مليون وبعدين الماتشات 8.3 مليون بس دي كانت سنة كورونا؛ اللي قبلها كانت الماتشات 82 مليون يورو. وطبعا ريال مدريد الأغني والعائدات بتتجاوز 700 و 800 مليون يورو سنوي.

4️⃣ الرعاة الشخصيين

*️⃣ دلوقتي انتا بلد غنية زي انجلترا؛ فممكن مجموعة رعاة يروحوا متفقين مع نادي معين لتمويل صفقة لاعب محدد؛ الاعب دا جاي عشان الجمهور بيحبه؛ زي صفقة مانشستر يونايتد مع كريستاينو مثلا؛ لا مان يونايتد هياخد الدوري ولا عنده فرصة 🤔 ...

بس وجودة هيجيب جمهور وهيبيع تي شيرتات وهيزود نسب مشاهدة الماتشات وووو؛ فصفقة بيزنس صريح مش كرة قدم.

5️⃣ القوانين والتقنيات

*️⃣ زي أي شركة عاوزة تعمل نمو بتعمل ايه؟ R&D أبحاث وتسويق والجو دا... طيب الرياضة؟ نفس الفكرة بس بيكون فب انفاق عالنظام والقوانين والتقنيات... بداية من قوانين البلد اللي بقت شايفه بيزنس بمليارات الدولارات سنوي في المجال دا فتهتم ازاي تطوره عشان يجذب الاندية تكسب اكثر فتجيب لاعيبه أحسن ورعاة اكبر فدول كلهم دخل للدولة وضرايب ليها؛ فالدول تقولك عشان تبقي مدرب لازم تاخد شهادة معينة ومؤهلات؛ بحيث يضمنوا من مش كل بطيخة كان في يوم من الأيام لعيب كورة واعتزل ينفع مدرب... دا علم وليه قواعده.

*️⃣ ونفس الوقت الأندية تشتغل في الاستفادة من التقنية وتحليل الأداء والذكاء الصناعي؛ عاوزين نحقق مكاسب بأقل انفاق؛ لو انتا نادي غني ففي زيك برضك كثير؛ هنفرق في ايه؟ هل الفلوس بس؟ يعني عشان عندي نيمار وميسي وامبابي هعرف اخد دوري ابطال اوروبا ولا حتي اشمها؟ لا طبعاً المهم التوليفة صح. ففي منظومة كاملة بتقيس كل نفس وكل حركة لكل لاعب وتقدم الداتا دي للمدرب اللي متعلم بمستوي عالي فيستفيد من دا كله...

الخلاصة

فلوس وجماهير وبيزنس ورعاة وتقنية وقوانين؛ فيبقي عندك زيهم...

توضيح

البوست دا قعدت كتبته وأنا في مدرسة بنتي 😭 يوم وداع السنة الدراسية فهما بيلعبوا فجه فبالي موضوع اللعب والكورة فقعدت اكتبه 😂 فممكن تعتبروه خواطر يعني سريعة لاني مش متخصص كروي أكيد؛ دا أنا وزن 2 لاعيبه كورة او 3 جمباز.

هو ليه بقي في توجهه كده للحجر علي مشاعر الناس؛ وانها لازم تروح بشكل معين والااااا

*️⃣ في حادثة قتل ابن الوزيرة ل 2 زمايله؛ تعاطف مع الوزيرة وقلبنا معاها ك أم ووو... ايه الهري دا... من امتي المشاعر بتروح للجاني مش المجني عليه؟... لالا قصدنا هي ك أم يعني... حضرتك لو في مشاعر نحو أي أم يبقي أم القتيل مش أم القاتل... ايه الهبل دا والحجر عالمشاعر.

*️⃣ بعد ماتش ريال مدريد وليفربول في ناس هاجمت صلاح؛ عادي يعني علي فكرة واللي بيشجع كورة مفروض متعود وخاصة إن صلاح استفز جمهور الريال... المهم بقي عيب ميصحش تهاجم صلاح كده انتا حاقد عليه وخاين وعميل وجاسوس وعندك غلللل... ليييه يا عم كل دا؟ عشان صلاح يمثل مصر وهو اللي عرف الكوكب ان في دولة اسمها مصر ومن قبله محدش سمع اسمنا؛ ولما تهاجم حد بيلعب باسم مصر تبقي خااااين يا خااااااين.

*️⃣ طيب بالنسبة للنني دا بيمثل مين؟ جنسيته يعني؟ دا احنا بنتريق عليه ومش بنقول لعب وحش؛ لا دا بنقول انه ملوش فيها وبركة وما علاقة النني بكرة القدم وووو... النني عادي وصلاح لا عشان صلاح مشهور أكثر؟ وطبعاً مصطفي محمد عادي أكثر من منطلق إنه أقل شهرة وكمان زملكاوي... مع انهم بره وبإسم مصر لكنهم مش نفس الشهرة ولا ربعها فعادي نتريق عليهم.

*️⃣ طيب بالنسبة للأهلي كان بيلعب نهائي افريقيا ولو صعد لكأس العالم للاندية كان هيعمل رقم قياسي جديد بعدد المشاركات ووو... دا شايل علم مصر ولا علم مزارع دينا؟ لالا الاهلي انتصاره شخصي ليه ومجد شخصي وذاتي للنادي والنني نفس الكلام ومصطفي محمد واي حد انتصاره شخصي ليه لكن صلاح انتصاره هيزود الناتج القومي؛ فنهاجم الكل وهو لا... مهو لاما تخلي الكل مشاع عادي او الكل عنده حصانه عادي... وكل ما تزيد شهرتك تتهاجم اكثر دا اللي اعرفه.... لا احنا حجرنا عليك.

*️⃣ حتى بعد ماتش الأهلي يلا معلش تعاطفنا مع محمد هاني الخ الخ؛ هو من امتي الهري دا؟ هو انتا لما بتتنيل تروح جهة حكومية وموظف حكومة يطلع لك ورقة غلط تطلع عينك بعد كده بتقول بلاش اتخانق معاه عشان مشاعره؟ حد غلط محتاج طبطه؟ طب دا مليونير يقدر يجيب الف طبيب نفسي وشخص يساعده؛ بالنسبة للموظفين والناس العادية ايه؟ ليه في حياتك مش بتقول معلش غلطوا عادي نسامحهم معلش... بتتعاطف مع مليونير غلطان وييجي اللي زيك تلاقي مخزون التعاطف خلص... اصل دا مش من السادة؛ دا شخص عادي والتعاطف عندنا مع السادة بس.

*️⃣ طبعاً مش هنروح للسياسة وتلاقي بالاجبار مبني يتحرق في الغرب مفروض تقعد يصعب عليك؛ ولو معملتش كده تبقي متخلف ومش فاهم أهمية التراث؛ بينما يموت بشر في بلادك عااادي ومتتعاطفش.

*️⃣ وطبعاً حوار روسيا وأوكرانيا كان واضح الموضوع؛ يلا تعاطف مع دا و دا لا... طب ليه؟ عشان السادة عاوزين كده

حاجة بقت مستفزة؛ وعارف ان البوست مهواش معتاد يعني بس انا بقيت مستفز من مفهوم الحجر عالتعاطف وانك تكون مجبور تتعاطف مع فئة معينة والاااا تبقي تيت

تغيير الدولار الجمركي هيأثر علينا بكام

النهاردة أكيد كلنا شوفنا خبر زيادة الدولار الجمركي للسلع الأساسية ومستلزمات الإنتاج ل 18.64 بدلاً من 17 جنية؛ وطبعاً التحاليل بتاعة الفيسبوك اشتغلت وان القرار دا يعني ان الدولار هيبقي 20 جنية قريب أو مش هيقل عن 18.64 خلال يونيو أو أو.

*️⃣ المهم يعني للي ميعرفش ايه القصة؛ الدولار الجمركي هو الدولار اللي بتتحسب بيه الجمارك؛ يعني تخيل معايا سلعة سعرها 100 دولار بسلطاتها وبابا غنوجها يعني؛ توصل مصر تتجمرك ليكن رسوم اجمالي 30% يعني 30 دولار.

*️⃣ كان التاجر يدفع سعر المنتج ال 100 دولار بالسعر بتاع الدولار بقي ليكن 18.5 او 15.7؛ طيب الشحنة بتاخد شهر اثنين ثلاثة مثلا علي ما توصل للجمارك؛ دلوقتي الجمرك هيحسب ازاي.

*️⃣ الجمارك بتحسب بالجنية؛ يعني دلوقتي شحنتك فاتوتك مكتوب فيها 100 دولار؛ وجمارك المنتج دا 10% يعني 10 دولار؛ اخد منك كاااام؟ افرض انتا شاري سلعه عالدولار ب 15.7 ووصلت مصر والدولار 18.5 مفروض تتحاسب بأنهي دولار؟

*️⃣ الحساب بقي بيكون ب دولار جمركي؛ وزارة المالية تقول يا جمارك اعملي حساباتك عالدولار ب 16 مثلاً... تكون انتا بقي شاري ب 15 شاري ب 18؛ هنحسب جماركك كإن سعر الدولار 16.

*️⃣ بعد تغيير سعر الدولار في مارس الدولة قررت تخلي الدولار الجمركي 16 جنية للسلع الاساسية ومستلزمات الانتاج... لييه دا حصل؟ عشان تقلل صدمة الأسعار.

*️⃣ بمعني في مثالنا التخيلي سعر السلعة 100 و 30 جمارك وكنت بتشتري الدولار ب 15.7 يعني 2041 جنية؛ دلوقتي بقى الدولار 18.5... فالدولة قالت بص بدل ما تحسب ال 130 دولار كلهم ب 18.5 سعر الدولار الجديد وتبقي التكلفة 2405 ... انتا هتحسب ال 30 بتوع الجمارك علي 16 جنية فكده بقت التكلفة 2330 جنية.

*️⃣ بداية مايو الحكومة قالت هنعدل الدولار الجمركي من 16 ل 17 جنية ؛ واعتبار من النهاردة الحكومة قالت خلاص سعر الدولار الجمركي هو الدولار العادي.

*️⃣ طيب دا هيأثر في ايه؟ هيزود حصيلة الجمارك بنسبة الزيادة اللي تقارب 10% لكن مش هيأثر عالاسعار بالنسبة دي طبعاً... لانه هيزود الجمارك 10% طيب قيمة الجمارك ورسومها (قيمة مضاقة وباقي الرسوم) كام من اجمالي السعر؟ تختلف من سلعة لأخرى.

*️⃣ فلو فرضنا إن الجمارك تمثل 25% من السعر فالزيادة هتأثر 10% عال 25% يعني 2.5%... ولو فرضنا سلعة جماركها ورسومها تساوي 50% من التكلفة فدي هتزيد 5% كده... يعني مش موضوع مرعب مفروض.

*️⃣ فمعنى دا إن القرار دا يزود التكلفة من 2 ل 5% حسب نسبة الجمارك من السعر للنهائي للمنتج؛ يا تري بقي الزيادة للمستخدم النهائي هتبقي كام الله أعلم...

*️⃣ للتوضيح بقي: مشاكل الأسعار دلوقتي سببها عقبات استيراديه؛ لو الدولار بقي ب 20 جنية والعقبات مش موجودة هيكون أفضل بكثير من دولار برقم ليكن 17 بس في عقبات وعراقيل.

والله في كمية أحداث بتحصل الواحد عاوز يكتب عنها بس في شوية أمور كده مخليه الواحد نفسيا مستنزف وملوش خلق للكتابة وخاصة الخناقات في التعليقات.

*️⃣ بداية من الأمور الترفيهية زي منتخب مصر واللي بيحصل معاه ومفهوم أصل القماشة وحشة؛ والجيل دا الاعيبة فيه كاتعة؛ مع إن دا أكثر جيل فيه محترفين؛ وكمان يعني المنافسين اللي بيعلموا علينا زي أثيوبيا مثلاً المهاجم بتاعهم بيلعب في الجووونة؛ يعني متقوليش قماشتك أوحش من قماشتهم... انتا لو قماشتك فيها خلل فمش هيكون في المهارات لكن في الشعور نفسه؛ الاعيبة نفسها ملهاش طموح لمنتخب بلدها ولا فارق معاها... محققة اكتفاء ذاتي مع انديتها فتلاقيها مع المنتخب كده خرعة... أثيوبيا مثلاً كان عندهم حماس واستقتال انهم يعلموا على مصر ودا معندناش... فالقماشه ناقصها رجولة مش مهارة. للأمانه خط الدفاع في مصر ناقصه مهارة برضك لكن باقي الخطوط لا. ومش هطول أكثر في النقطة دي عشان متقلبش البوست اللي مليش نفس اكتبه.

*️⃣ نسيب الكورة ونروح للبقر؛ أيوا فكرت اكتب عن حوار البقر وانتاج الألبان ومعظم البوست مش هيبقي جديد لكن هعيد احياء بوست تعاونيات الألبان وإزاي هي تقدر تطور الفلاحين؛ وإن تخلف تربية الأبقار في مصر وتطورها في الغرب مش ذنب الفلاح المصري وشطارة الأجنبي؛ لكن عشان في منظومات في الدول الغربية بتطور الفلاح؛ وفي منظومات عندنا بتدمر الفلاح بهدف نقول شوفتم فاشل أهو؛ نعمل شركات عملاقة إمبريالية بقى ما انتم شايفين الفلاحين الصغييرين مضيعين انتاجية مصر... يعني فلسفة احفر الحفرة واستناه لغاية ما يقع ولما يقع تقف تسخر منه وتقول شوفت العبيط وقع في الحفرة... طيب مين اللي حفر الحفرة؟ محدش هيجيب سيرة دا.

*️⃣ ونروح بقى للدولار وصراحة مبسوط من تحريك الدولار بالبنوك بالقروش؛ كده الشغل المنطقي... عاوز الدولار يطلع جنية؛ بلاش غباوة وتنام تصحي تلاقيه طالع جنية؛ اطلع كل يوم قرشين ثلاثة فخلال شهر ونص أو شهرين تطلع الجنية بدون شوشرة جرايد وهلع شعبي. يعني الدولار دلوقتي في أعلى معدلاته وصاعد نص جنية آخر شهر؛ حد أخد باله ولا شاف بوستات؟ طيب تخيلوا كان يوم 1 يونيو نمما صحينا يوم 2 يونيو لقينا زيادة 50 قرش مرة واحدة؟ مصر كلها هتتكلم... بس كده ودا اللي بقوله دايماً؛ ادرسوا عقلية الشعب وبلاش عنترية.

*️⃣ طبعاً النهاردة الفيدرالي الأمريكي هيطلع قرار زيادة 0.5% كمان في سعر الدولار وفي اشاعات انه ممكن يتهور ويطلعه 0.75% ويولع الكوكب؛ أصلاً الدولار اندكس دلوقتي كاسر 105 وحالة مأساوية؛ الين الياباني آخر 3 شهور خسران 17% قصاد الدولار واليورو والاسترليني نفس الحال. فالدولار القوي فاشخ الكوكب (الدولار القوي مصطلح اقتصادي لان في مصطلح تاني الدولار الضعيف؛ ودايماً الجدال بيكون العالم دلوقتي عاوز الدولار القوي ولا الدولار الضعيف).

*️⃣ وطبعاً حالة الهلع في البتكوين والعملات الرقمية كلها اللي راكبة الزحليقة وشكلها مكملة شوية وشكلنا راجعين تاني لمنطقة ال 10 الاف دولار... وعادي دا طبيعي ومتوقع؛ البتكوين وإخواته بيعملوا كده كثير؛ لو فاكرين 2017 لما بدأ السنة ب 1000 دولار وفي ديسمبر 2017 شوفناه فوق 13000 دولار... وديسمبر 2018 شوفناه ب 3700 دولار عادي... تحسه سيناريو Pump and dump تقليدي بس مع الاختلاف عشان الخناقات.... لكن لو سلعة ب 40 الف وطلعت 10 الاف؛ كده انا كسبت 25%... لكنها لو بقت ب 10 ورجعت بعدها 40 كده انا كسبت 300% لمجرد العودة لسعر قديم... عشان كده بقول دايما سوق العملات الرقمية يعتبر سوق مثالي للمضاربة وتقدر تعمل ثروة رهيبة منه متقدرش تعملها من أي بيزنس آخر... لكن لازم تكون صحتك حديد وبرشام الضغط في جيبك دايماً والفلوس اللي انتا شغال بيها مستعد نفسياً تخسرها أو تنيمها سنين... توصيف بيل جيتس المثالي هو إنك تقدر تستثمر بحرية لو عندك ثروة اليون ماسك 😁...

*️⃣ آخر حاجة هقولها هي استعدوا لبداية الازمة الاقتصادية العالمية؛ واللي هيقول اومال احنا في ايه؛ فاحنا كنا في التسخين؛ الكوكب هيبدأ الشغل بقي والمعجنة... فالدولة / المذيعين لما بيقولوا استعدوا فدا مش مبالغة أو تحضير لفشل قادم؛ هو فشل عام عالمي مهواش فشل خاص بينا... فاستعدوا؛ ومحدش يقولي استعد ازاي؛ معرفش الصراحة لإن في مصايب.

*️⃣ محلياً بقي لو انتا صاحب بيزنس استعد للقيمة المضافة؛ يوم 1 يوليو هتبدأ السنة المالية؛ والدولة حاطه تارجت للقيمة المضافة إنهم يزودوا الحصيلة 24% ؛ فهما هينخوروا ورا الجميع وبأثر رجعي من ساعة صدور قانون القيمة المضافة في 2016؛ يعني هييجي يقولك في 2016 انتا مدفعتش يلا كع... لو مش مصدقني اتفلق الصراحة مش هقعد اقنع حد باللي شغال بيحصل.

⬅️ كفاية كده وفي أخبار ثانية تستحق الكتابة لي مينفعش؛ واعود للراحة وشكراً لكل اللي سألوا عني في غيابي الفترة الماضية دي ومعلش شكل الأزمة مكملة شوية معايا وربنا يسهل واخرج منها وارجع اكتب تاني.