🔹کور عرب ماهنی‌سی


سؤز: حسین جاوید
دیکلمه: آیناز رضازاده
اوخویور: عالیم قاسیموو


ایضاح: #حسین_جاوید بو شعری #راجی_تبریزی‌دن اقتباس ائتمیش.



راجی تبریزی:

نه عشق اولایدی نه عاشق، نه حسن دلبر اولایدی،

نه آیینه نه صفا ای کؤنول، نه جوهر اولایدی.

نه ناز و نه عمزه، نه غنج و دلال و نه عشوه،

نه عجز و لابه نه خوناب دیده تر اولایدی.....

راجی‌نین بو اوزون شعرینده، فلسفی بوشلوق و تشکیک و حرمان گؤروْنور،
آما حسین جاوید اؤز اقتباسیندا اجتماعی مساله کیمی بو بوشلوق لا یاناشیر و بئله‌لیک له اؤز اعتراضینی اعلان ائدیر.

حسین جاوید بو شعری «شیخ صنعان» نمایشنامه‌سینه یازمیش.
#فکرت_امیروف دا بونون آهنگینی بسته‌له‌ییبدیر

#کور_عرب_ماهنیسی
#حسین_جاوید
#راجی_تبریزی

https://t.me/Alimohamadbayani

🔹ابوالحسن راجی تبریزی

1247 – 1292 ق
1831 – 1875 م

آذربایجان ادبیاتی‌نین غزل ژانریندا نئچه شاعیر اونودولمامالی‌دیر. «نسیمی» غزلی اجتماعی بیر مسیره سالارکن، «فضولی» اونو هم ادبیات و هم عرفان‌لا باریشدیردی و رسمی محفل‌لره داخل ائتدی. «قوسی» بو غزلی داها دا یئرلی ائتدی و فولکلورا یاخینلاشدیردی و هم ده ائله بیل غزلی رنگارنگ بیر فضالارا آپاردی.

«واقف» شعری و غزلی رئال عالمینه گتیردی. «نباتی» یئرل بیر عرفان‌لا، دیلی موسیقایی بیر دئییم‌له بیر داها باش‌دان سسلندیرمه‌گه چالیشدی.

نوبت گلدی قاجار عصری‌نین بؤیوک شاعیرلرینه. اونلارین بیری تبریزلی راجی‌دیر.

علی اکبر اوغلو «ابوالحسن راجي» 1247.جی قمری ایلینده تبريزده آنادان اولموش. او بو شهرده مکمّل تحصیلات آلیب و تبریز بازاریندا تجارت ایشی له مشغول اولدو:

🔸من ایله سن گئدیب گلمک‌لیگین ترک ائیله ایسترسن،

نه هم صنف اینجیسین من‌دن، نه همکار اینجیسین سن‌دن

گؤرنده ای کؤنول بازار ایچینده یاره چوخ باخما،

او قدری قالماییب کیم اهل بازار اینجیسین سن‌دن

▫️شاعیر بازاردا «ایپ- ساپ» ایشی له مشغول اولدوغونو دا بئله نظمه چکیر:

گئدرسن یوسفین بازارینا بیرجه «کلاف» ایله

اؤزون فکر ائیله گؤر «راجی»، وئریرله، سن کی شاعیرسن!

و باشقا بیت بئله دئییر:

گئجه‌لر فکرِ یار ایلن، گونوزلر بو «کلاف» ایلن،

همی معشوقه ایسترسن، همی «راجی» مداخل سن.

▫️راجی بیر سیرا تبریز تاجرلری له بیرلیکده 1292 ه.ق ایلینده مکّه زیارتینه گئدیب و زیارت‌دن سونرا، قاییت‌باش، اونلارین گمی‌لری قیزیل دنیز (بحر احمر)ده توفانا قارشی سینیب و بوتون مسافرلری له بیرلیکده غرق اولدو. راجی‌ده بو حادثه‌ده جانینی ال‌دن وئردی.

▫️راجی‌نین غزل‌لری آذربایجان غزل‌لری‌نین ان گؤزل، یوکسک، اعجابلی و محکم اؤرنک‌لریندن‌دیر. نسیمی، فضولی، قوسی، سید عظیم، راجی، صراف و هیدجی‌نی آذربایجان کلاسیک غزل شاعرلری‌نین یئددی ذیروه‌سی آدلاندیرساق یانیلمامیشیق.

▫️ راجی‌ده ائله بیت‌لر وار کی انسانی ائشیتجک تحسینه وادار ائدیر:

حور و ملَک بو حُسن ایله ائیلر حسد سنه،
نه روح‌سن کی جان اؤزو اولموش جسد سنه.

*
اوّل جگرین سیخِ محبّت‌ده کباب ائت
اوندان سورا بو میکده‌ده میلِ شراب ائت
*
خالین قوی اؤپوم تا یئتیشیم حدِّ کماله،
هر کیم حجری اؤپسه اونا حاجی دئیرلر.

تام جناس بو بیت‌لرده نه گؤزل دوشموش:

جانه بو حسن ایلن گئجه آیی گون ائیلیسن،

قربان اولوم جمالیوه، یوخسا «گونئیلی» سن
***
داغیت او اَیری قاشین اوسته زولفِ قاره یئری،

وئر ایندی غیبت کبرادا ذوالفقاره یئری

▫️دوشونجه و فیکیر عرصه‌سینده بو غزلی ائشیدن حیران اولور و نه دئیه‌جه‌گینی بیلمیر:

نه عشق اولایدی نه عاشق، نه حُسنِ دلبر اولایدی،

نه آیینه نه صفا ای کؤنول نه جوهر اولایدی

ازل نه نشئه اولایدی، سورا نه رنجِ خمار
نه عیش وصل، نه اندوهِ هجر دلبر اولایدی ...

▫️بو جدی شاعیر هردن اؤزونه ده بیر سؤز آتیر و تجارت اهلی اولدوغونو مزاحا توتور:

دئسن «راجی»‌یه شعر یاز هی یازار،
پول آدی گتیرسن بیلک‌دن قورور.

و بعضاً زاهده قارشی، عاشق‌دن حمایه ائدیر:

عاشقین کُفرونه قرآن‌دا نه آیه یازیلیب،
کُفردیر، بو سؤزو زاهد، دئمه اؤز یانیندان.

و هردن گون تکنولوژی‌سینی تمثیل ائدن کلمه‌لردن بئله فایدالانیر:

معشوقه عاشقین بیلی رازِ نهانینی،

بو رشتة محبت اونا «تلگراف» اولور.

و البته آنا یوردو تبریزی مدام تکرارلاییر:

سابقاً ذوق وئرردی شعرایه شیراز
ایندی شیرازی گئچیب، آب و هوای تبریز.

#کور_عرب_ماهنیسی
#حسین_جاوید
#راجی_تبریزی

https://t.me/Alimohamadbayani

#راجی

نه عشق اولایدی نه عاشق، نه حسن دلبر اولایدی،

نه آیینه نه صفا اى كؤئول، نه جوهر اولایدی.

نه ناز و غمزه نه غنج و دلال و نه عشوه،

نه عجز و لابه نه خوناب ديده تر اولایدی.

نه زولف اولایدی نه عارض، نه خال اولايدى نه خط،

نه مشک اولایدی نه مجمر، نه عود و عنبر اولایدی.

نه حسن اولایدی نه گؤیلوم، نه دسته - دسته بو زولف،

نه شه نه ملک، نه بو فوج - فوج لشكر اولايدى.

نه ابروی خم اولايدى، نه چشم نه موژگان،

نه تیغ اولايدى نه جلّاد، نه بو خنجر اولايدى.

نه رقص اولایدی نه مطرب، نه چنگ اولایدی نه تار،

نه بزم اولایدی نه ساقى، نه مى نه ساغر اولايدی.

ازل نه نشته اولایدی، سورا نه رنج خمار،

نه عيش وصل، نه اندوه هجر دلبر اولايدى.

نه اؤلدوره‌یدى خطین گلجک اوزده عشاقی،

مسیح تک نه لب لعل روح پرور اولایدی.

نه یالوارایدى رقيبه بو پایه ده عشاق،

بو مرتبه ده نه معشوق‌لر ستمگر اولایدى.

نه شور اولايدى نه بولبول، نه گول اولایدی نه خار،

نه لطف باد بهار و نه جور صرصر اولایدى‌.

نه ديل اولايدى نه قامت، نه قلب اولایدی نه روح،

نه شمع و شعله نه پروانه نه سمندر اولایدی.

نه گول نه عطر، نه شمشاد اولایدی، نه شانه،

نه زولف اولایدی، نه مشاطه، نـه بـو زیور اولایدی.

نه شرحه - شرحه اولايدى بو سينه تيغین‌له،

نه شرح دفتر درد و بلا، نه مسطر اولایدی.

جفاى يار ايله عشاق اینجیمز ای کاش،

نه سن‌ده ممکن او، من‌ده نه بو میسر اولایدی.

نه هجر اولایدی نه گریه، نه کونج غم نه بو آه،

نه آب و آتش و خاک و هوا مخمر اولایدی.

نه طفل اولایدی نه مكتب، نه درس اولایدی نه علم،

رموز عشق نه دیل‌لرده بئيله ازبر اولایدی.

نه کوى يارى قويوب خلق ائده‌یدی میل بهشت،

نه شیخ اولایدی، نه مسجد، نه وعظ و منبر اولایدی.

نه دیل اولايدی نه ديده، نه اشک خون آلود،

نه كان اولايدى نه دريا، نـه لعل و گوهر اولایدی.

نه اجتناب اولایدی نه توبه، نه ده پرهیز،

شکست توبه نه پیمان‌دن فزونتر اولایدی.

مذاق «راجی» نه شیرین اولایدی نه بئله تلخ،

نه هجر زهر هلاهل، نه وصل شكر اولایدی.

#کور_عرب_ماهنیسی
#حسین_جاوید
#راجی_تبریزی

https://t.me/Alimohamadbayani

کور عرب ماهنیسی گؤرکملی آذربایجان بسته‌کاری #فکرت_امیروفون، آذربایجان شاعیری یازیجی و دراماتورگو #حسین_جاوید شعرینه بسته‌له‌دیگی مشهور ماهنی‌دیر.
حسین جاوید بو ماهنینی #شیخ_صنعان درام اثرینده گتیرمیش.
امیروف شیخ صنعان تاماشاسینا بسته‌له‌دیگی ماهنی چوخ قارشیلاندی و چوخ مغنی‌لر اونو سسلندیردی.

ماهنی‌نین ایلک ایفاچیسی #محمدعلی_علیف اولوب. عصریمیزده #عالم_قاسموفون اوخودوغو کور عرب ماهنیسی دا مشهور اولموش. حسین جاوید بو شعری #راجی_تبریزی‌دن اقتباس ائتمیش ( یوخاری پست‌دا راجی‌نین شعری گلدی). 

حسین جاویدین شعری بئله‌دیر 👇:

نه عشق اولایدی نه عاشیق، نه نازلی آفت اولایدی.

نه خلق اولایدی نه خالق، نه عشقه حسرت اولایدی.

نه درد اولایدی نه درمان، نه سور اولایدی، نه ماتم

نه آشیانة وصلت، نه بار فرقت اولایدی.

کؤنول‌ده نور محبت، گؤزومده پردة ظلمت

نه نور اولایدی نه ظلمت، نه بؤیله خلقت اولایدی.

توکندی طاقت و صبریم، عدالت آخ عدالت،
نه اؤنجه اؤیله سعادت، نه بؤیله ذلّت اولایدی.


#کور_عرب_ماهنیسی
#حسین_جاوید
#راجی_تبریزی


https://t.me/Alimohamadbayani