İranda Pərəstu Əhmədi adlı gənc müğənninin karvansaraların birində hicabsız konsert verməsini əks etdirən görüntülər sosial şəbəkələrdə paylaşıldıqdan 24 saat keçməmiş xanıma və konsertin təşkilatçılarına cinayət işi açılıb.

Axar.az xəbər verir ki, bu barədə Ədliyyə Nazirliyinə bağlı “Mizan” xəbər agentliyi məlumat yayıb.

Agentlik konserti qanunsuz adlandırıb və bildirib ki, ölkənin mədəniyyət qanunları pozulub.

Bəzi istifadəçilər müğənninin bu addımını İran tarixində hicabsız səhnəyə çıxan ilk qadın müğənni Qəmərülmülk Vəzirinin ifası ilə müqayisə edib və “bu dövrdə səhnəyə çıxmaq üçün cəsarət tapdığını” yazıblar.

🇦🇿 Kəlbəcər ağ örpəyə bürünüb.

❗️Türkiyənin Bursa şəhərində məhkəmə binasına silahlı hücum olub.

Hadisə nəticəsində, iki nəfər güllələnərək öldürülüb, iki nəfər yaralanıb.

Burhan Koroğlu Türkiyənin Dəməşqdəki səfirliyin müvəqqəti işlər vəkili təyin edilib.

Axar.az xəbər verir ki, bu barədə “Anadolu” agentliyi Türkiyə Xarici İşlər Nazirliyindəki mənbəyə əsasən məlumat yayıb.

Qeyd edək ki, Türkiyənin Dəməşqdəki səfirliyi Suriyada baş verən hadisələrlə bağlı 26 mart 2012-ci il tarixində fəaliyyətini dayandırmışdı. Səfirlik əməkdaşları və onların ailə üzvləri də bu qərarla Türkiyəyə qayıtmışdılar.

Suriyanın İstanbuldakı Baş Konsulluğu isə fəaliyyətini davam etdirirdi.

Türkiyənin Egey dənizi hövzəsində gün ərzində ikinci zəlzələ baş verib. Budəfəki təkanlar 4.8 bal gücündə olub.

15 yaşı tamam olan Azərbaycan Respublikasının kişi cinsli vətəndaşlarının yaşayış və ya olduğu yer üzrə müvafiq icra hakimiyyəti orqanında ilkin hərbi qeydiyyata alınma müddətləri dəyişir. 

Qeyd edək ki, hazırda qanuna əsasən, həmin şəxslər yanvar-mart ayları ərzində qeydiyyata alınır. 

Dəyişikliyə əsasən, isə qeydiyyat yanvar-may aylarında aparılacaq.

Orta ixtisas təhsili müəssisələrində təhsil alan, bu müəssisələrə daxil olana qədər tam orta təhsil almamış çağırışçılara möhlət veriləcək yaş həddi dəyişir.

Axar.az xəbər verir ki, bu, Milli Məclisin Müdafiə, təhlükəsizlik və korrupsiya ilə mübarizə komitəsinin bu gün keçirilən iclasında müzakirəyə çıxarılan “Hərbi vəzifə və hərbi xidmət haqqında” qanuna təklif edilən dəyişiklikdə əksini tapıb.

Qüvvədə olan qanuna əsasən, orta ixtisas təhsili müəssisələrində təhsil alan, bu müəssisələrə daxil olana qədər tam orta təhsil almamış çağırışçılara 22 yaşınadək bir dəfə möhlət verilir. Layihəyə əsasən, bu yaş həddi 21-ə endirilir. Başqa sözlə, orta ixtisas təhsili müəssisələrində təhsil alan, bu müəssisələrə daxil olana qədər tam orta təhsil almamış çağırışçılara 21 yaşınadək bir dəfə möhlət veriləcək.

Sağlamlıq vəziyyətinə görə çağırışa möhlət verilməsi qaydası dəyişir.

Axar.az xəbər verir ki, bu, Milli Məclisin Müdafiə, təhlükəsizlik və korrupsiya ilə mübarizə komitəsinin bu gün keçirilən iclasında müzakirəyə çıxarılan “Hərbi vəzifə və hərbi xidmət haqqında” qanuna təklif edilən dəyişiklikdə əksini tapıb.

Qüvvədə olan qanuna əsasən, dinc dövr üçün hərbi xidmətə yararsız, müharibə dövrü üçün məhdud yararlı hesab edilərək ehtiyata keçirilən vətəndaşlar 35 yaşına çatana qədər hər 3 ildən bir təkrar tibbi müayinədən keçirilirlər.

Layihəyə əsasən, sağlamlıq vəziyyətinə görə 1 il müddətinədək möhlət verilmiş çağırışçılar möhlət müddəti bitdikdən sonra, dinc dövr üçün hərbi xidmətə yararsız, müharibə dövrü üçün məhdud yararlı hesab edilərək ehtiyata keçirilən vətəndaşlar isə 30 yaşına çatana qədər hər 3 ildən bir təkrar tibbi müayinədən keçiriləcəklər.