9) من الحاجات بردو اللي ناخد بالنا منها .. إن كلنا عايزين نعرف عن الدين وعايزين نقرأ كتب .. ونسمع دروس وكذا وكذا.

بنيجي نعمل دا بعيدًا عن الهوى وبعيدًا عن الشيطان .. معندناش المهارات الكافية لدا طب نكتسبها إزاي لو مضغطش نفسك في دراسة وفي مذاكرة!

يعني مثلًا .. شوف أي حد معاك ف أكاديمية شرعية أو معهد شرعي عمومًا وقارن بين اتنين .. حد بيتعلم وحد لأ ..
أكيد اللي بيتعلم هتلاقي عنده نظام في الكتابة أحسن .. بيعرف يذاكر بطريقة أفضل .. فاهم يعني إيه يلخص .. بيعرف يسمع المحاضرات الطويلة عشان هو متعود علي المحاضرات الطويلة في الكلية .. بيقدر يفهم إيه مواضع الأسئلة عشان هو متعود على نظام الأسئلة في امتحانات المدرسة مثلا ..

المهارات بتاعة العلم الشرعي نفسها أو طلب العلم في الدين في الأصل هي مرتكزة علىٰ مهاراتك اللي اكتسبتها من الدراسة الدنيوية .. دا لو ينفع نقول عليها دا أصلا .. لأن إحنا اتفقنا إنها عبادة.

فمن النوايا اللي إنت ممكن تحطها إنك تتعلم يكون عندك صبر .. إنك تقعد علي المكتب وتجيب ورقة وقلم وتكتب وتذاكر وتراجع وتلخص .. عشان لما الله عز وجل يفتح عليك في وقت تاني ويكون وقت طلب العلم الشرعي يكون عندك المهارات الكافية والصبر والحزم مع نفسك إن إنت تعمل دا.
#مشروع_قدسية

10) تذاكر علشان تبقي راضي عن نفسك ..

كان ليا صديقة تقولي « أفضل يوم أصلي فيه قيام بقلب حاضر .. وأصلي فيه الفرائض بخشوع .. هو اليوم عملت فيه كل المهام اللي عليا في المذاكرة » ..

شعور إن إنت تبقي راضي عن نفسك وخلصت مهامك .. دا لوحده كفيل أنه يفتح عليك في الطاعة عشان نفسيتك مرتاحة .. والله زي ما قلت رزق الخشوع والفتح في الطاعة وإن قلبك يبقي حاضر .. ممكن يكون مسلوب منك بسبب تقصيرك في المذاكرة .. وبسبب إن نفسيتك بايظة بسبب تقصيرك في الأمر دا ..

فـ إن إنت تظبط مذاكرتك دا هيساعدك تظبط باقي الجوانب بتاعتك في العبادة .. هيساعدك في إنك تظبط نفسك في كلامك مع أهلك .. مش عشان إنت مضغوط دراسيا .. فـ يبقي ليك الحق انك تزعق مع والدك أو والدتك أو تتعامل بعصبية جامدة مع إخواتك ..

غير إن إنت تظبط نفسك دا كفاية وكفيل .. إن يبقي عندك سعة صدر واستيعاب لـ صحابك .. عن طريق إنك تخيلهم يعرفوا يتكلموا معاك .. وتقدر تقوم بحق الأخوة صح .. عشان إنت نفسيتك بقت سليمة .. وبتؤدي واجبك كويس .. فلما تبقي راضي عن نفسك دا هيفتح عليك في حاجة تانية كمان .. إنك في يوم من الأيام لما النتيجة تظهر ولو لا قدر الله مجبتش النتيجة اللى إنت عايزها متحسش بالندم ..

شعور الندم وحش ومؤذي .. ليا صديقة متخرجة من كلية هندسة وترتيبها الرابع علي الدفعة .. بتقولي « أنا طالعة الرابعة على الدفعة أهو .. ومع ذلك أنا ندمانة أشدّ الندم علي أي لحظة كانت ممكن تساعدني إني لو اجتهدت أكتر وذاكرت فيها كنت أخدت مركز أول » ..

فماتديش لنفسك فرصة إن لما نتيجتك تظهر تندم علي حاجة .. أو لما تظهر نتيجتك وربنا عز وجل لم يرد إنك تجيب التقدير اللى كنت عايزه متندمش .. بس خليك فاكر إنت عليك السعي والله عز وجل عليه النتيجة فـ اجتهد والتعب علشان متديش لنفسك فرصة تندم .
#مشروع_قدسية

11) ذاكر عشان تبقي عنصر فعال في الدعوة إلي الله.

لو إنت مثلًا في ثانوي وحد اتخرج بقا دكتور أو مهندس .. و حد كان محاسب فـ الدكتور والمحاسب جم واتكلموا في الدعوة إلى الله عز وجل .. أو نصحوا حد بشيء معين .. أو أمر بالمعروف ونهي عن المنكر .. هيكون الدكتور دا أكيد كلمته مسموعة أكثر من الشخص اللي أقل منه تعليميًا.

فهنا في الوقت دا الدراسة كانت سبب إن الإنسان دا يُنصت إليه وإن يؤخذ بكلامه أكيد .. مش بهمش موضوع الصدق في الدعوة .. وإن أكيد مش شرط إن الداعية يكون حد دراسيًا وتعليميًا عالي ..

بس بقول إن دي نقطة من النقاط اللي غصب عنك المجتمع بيميل ليها .. لما يشوف إنه ناجح دينيًا ودنيويًا .. بيكون جاذب أكتر وعندهم رغبة وشغف يعرفوا عنه أكتر من الشخص اللي مش ناجح في الدنيا بتاعته ..

ودا برضوا على مستوى الكلية لو إنت حد جايب امتياز أو جيد جدًا .. أو طالع من الأوائل هيكون فيه شغف يسمعوا منك نصائح أكتر من شخص جايب جيد أو مقبول .. فا في الحالة دي إنت مذاكرتك فرقت معاك في الدعوة إلى الله عز وجل .
#مشروع_قدسية

12) كونك بتذاكر دي حاجة تدل على استقامتك وصلاحك .. فـ بالتالي « المرء على دين خليله » .. فـ لما ربنا - عز وجل - يرزقك بصحبة هتكون شبهك أكيد.

وهتلاقيهم برضو كويسين وبتهتمو وواخدين بالهم من كل حاجة دينية ودنيوية .. وقد المسؤلية .. لكن كل ما هتكون في انحدار وفي ضياع كل ما هيكون صحبتك شبهك .. فـ لو أنت عايز فعلا يكون ليك صحبة صالحة دينيًا ودنيويًا .. فـ لازم إنك تصلح من ذاتك.

نفس الكلام لما ولادك في يوم من الأيام ييجو محتاجين قدوة .. أو يبصوا على حد أنه بالنسبة ليهم المثل الأعلى هتكون أنت أول حد بيفكر فيه .. مش الهزار بتاع كل أهالينا الكرام إنه كلهم كانو أوائل وشطار .. لأ إنت هتكون قدوة لولادك بجد وكنت مجتهد بجد.

ليا صديقة كانت طالعة من الأوائل على الدفعة كانت ديما تقولي « في أي وقت بضعف بقول لنفسي أنا مش هسمح لولادي إنهم يبصوا لحد على أنه قدوة غيري .. مش هسمحلهم إنهم يدوروا على مثل أعلى برا بيتنا .. ويتشكلوا بمبادئ وقيم غلط لمجرد إن الشخص دا متفوق دراسيا وممكن يضيعلهم دينهم .. أنا هكون قدوة ومثل أعلى ليهم على قد ما أقدر »
#مشروع_قدسية

13) لما تذاكر هتاخد أجر إغاظة الكفار

هتكون متفوق إن شاء الله لأن الله الشكور هياخد منك العمل القليل ويجازيك عليه بالكثير .. ودا حسن ظنك بالله عز وجل .. ووقتها هتكون على رفعة في المجتمع .. ووقتها اللي باين إنت شخص مسلم والله عز وجل فتح عليك ورفع شأنك وسط الناس ..

دي حاجة في حد ذاتها تغيظ الكفار
قال الله سبحانه وتعالى :

« وَلا يَطَئُونَ مَوْطِئًا يَغِيظُ الْكُفَّارَ وَلا يَنَالُونَ مِنْ عَدُوٍّ نَيْلا إِلا كُتِبَ لَهُمْ بِهِ عَمَلٌ صَالِحٌ إِنَّ اللَّهَ لا يُضِيعُ أَجْرَ الْمُحْسِنِينَ »

هما مش بيحبوا الخير للمسلمين .. ومش عايزينهم يكونوا أعزة بالدين .. ولا عايزينهم يكونوا أقوياء بأسباب العلم ..
فلو ربنا فتح عليك في مجالك .. هتكون سبب رفع شأن الإسلام أمام الكفار والغرب .. وإنك توضح إن المسلمين مش جهلة .. دول أسياد الخلق .. وخصوصًا لو أكرمك الله بإنجاز في مجال دراستك زي براءة اختراع مثلا ..

وطبعًا لو مجال نادر فإنت ساعدت في سد حاجة الأمة الإسلامية في مجال دراستك .. وعدم احتياجها للكفار في المجال دا .. أو بنات يساعدو في سد أقسام الطب كلها بحيث المرأة المسلمة ماتضطرش إنها تكشف علي رجل ..

فالخلاصة إنك تغيظهم دا في حد ذاته طاعة .. وحاجة هتاخد عليها أجر .. عشان كدا لما بيشوفوا حد تقدم وهيبقى عنده براعة اختراع أو خد جايزة نوبل في حاجة .. وهو مسلم أو عربي دي بتكون سبب إنهم يغتالوه .. أو سبب إنهم يتكاتفوا على قتله ..

فـ وإنت بتذاكر حط نية إن إنت تغيظ الكفار .. ودي حاجة ربنا عز وجل بيحبها ويرضى عنك بيها ..
#مشروع_قدسية

14) ذاكر عشان المذاكرة مفيدة😁

متقنعنيش إنك مثلا بتقرأ في كتاب دراسي أو بتذاكر ومفيش ولا معلومة وقفت معاك ولا حاجة علقت معاك واستفدت منها .. متقنعنيش إن انت بتقرأ كلام مفيهوش ريحة الإفادة!

أكيد لأ .. أكيد أيا كانت كليتك بتصب في الآخر علي نفعك إنت .. فـ إنت تحاول تستغل الأمر دا بردو واستمتع بالمذاكرة أحسن ماتذاكر وإنت قرفان ..

النبي صلي الله عليه وسلم كان يحب الشعر وكان يحب الاستماع للشعر .. وكذلك كان عليه الصحابة من بعده سيدنا أبو بكر وعمر .. النبي صلي الله عليه وسلم أمر سيدنا حذيفة بن اليمان رضي الله عنه أن يتعلم اللغة الفارسية علشان يقدر يكلم بيها بلاد فارس .. وكان بيجيب الناس اللى عارفة لغات تانية علشان يقدر يخاطب بيهم الناس اللى مش مسلمة ويدعوهم للإسلام .. إنت ليه متشوفش كليتك ومجالها وتحاول إن إنت من خلالها تنفع بيها الإسلام ؟

هو مش ممكن تكون إنت اصلا في حد ذاتك في حاجة تستفيدها من الكلية .. تعود بالنفع عليك إنت شخصيا قبل ما تعود بالنفع ع الإسلام ؟

يعني لو إنت دكتور العلم اللى عندك إنت .. قادر من خلاله إنك تتعرف علي الله عز وجل عن طريق جسم الإنسان .. تقدر لو إنت مهندس تستفاد من علمك دا جدا ف فقه المواريث .. تقدر إنك تتعرف علي دقة الله عز وجل بفهمك الحسابي.

تقدر من خلال الكلية اللى إنت فيها لما تتخرج منها تبقي مدرس يربي جيل صالح ممكن يقام عليه الأمة فيما بعد .. تقدر من خلال مليون حاجة لو إنت ركزت وأصلحت النية إنك تلاقي معلومات كتير تفيدك من مجالك بعيدًا عن السلبية ..

أنا شخصيًا ياما عرفت أستفيد كتير جدا بفضل الله من مادة الأحياء في ثانوي والجيولوجيا وغيرهم .. وعرفت أستفيد من علم النفس لما بقرأ في كتب دراسية تخصه في أمور كتير .. ياما عرفت أستفيد من كتب الشعر إني اتعلم ألفاظ معينة تفيدني في القرآن الكريم نفسه .. ياما استفادت من مواد ممكن تبان دنيوية لكن الله عز وجل أبصرني وقدرت أوجهها من خلال الدين وقدر أوجهها في صلاح نفسي ..

فـ لو مش هيفيدك في أي حاجة في الحاجات دي كلها .. هتفيدك في إنك لما تيجي في يوم من الأيام وأولادك يحتاجوا حد يساعدهم .. يلاقوا باباهم أو مامتهم يقدروا يساعدوهم في حاجة زي كدا .. ومايحتاجوش إنهم يلجأوا لحد برا .. ومتكونش إنت الحد اللى مش فاهم هما بيتكلموا في إيه عشان كنت طالب فاشل دراسيًا .. لأ تقدر تفيدهم ساعتها وتكون إنت سبب إنك تكون عون لأولادك وتقوم بحق رعيتك اللى هما هيكونوا مسئولين منك وقتها .
#مشروع_قدسية

15) آخر حاجة وأهم حاجة تذاكر عشانها هي أمتك ..

كان في قصة بتروي إن في فترة من الفترات في بني إسرائيل حُرموا المطر .. فسيدنا موسى عليه السلام أخد القوم وطلع يدعو عشان ربنا يرزقهم المطر .. وفي ظل ما هم بيدعوا الله عزوجل أخبره الله إنهم منعوا الرزق دا اللي هو المطر .. بسبب ذنب واحد مقيم عليه أربعين سنة .. فسيدنا موسى لما قال دا .. الرجل صاحب الذنب دا تاب لربنا عز وجل .. فنزل المطر ..

الشاهد من القصة .. إن ذنب رجل واحد كان سبب في حرمان الرزق من الأمة كلها .. إنت ليه مش شايف إن تقصيرك في مذاكرتك يكون سبب في إنت مضيع عليك عبادات كتير بسبب إن نفسيتك بايظة .. وليه مش شايف إن تقصيرك في مذاكرتك دا ذنب إنت مقيم عليه والله عز وجل يمنع رزق أمتك بسببك ..

لو مش بتذاكر عشان أي حاجة ذاكر عشان الأقصى .. الأقصى محتاج حد يحرره .. مهو مش هيحرره وهو مش مسؤول وميعرفش يكون حازم مع نفسه ويقولها يلا هقوم أذاكر فتقوم تسمع كلامه .. مفيش حد هييجي يقوم في وسط جيش الإسلام قدام أعداء الله عز وجل .. ويجي يمسك السلاح ويقدر إن هو يضربهم .. إلا إذا كان هو عنده ثبات على النفس وثبات علىٰ مبادئه .. ويقدر إن هو من خلالها يحقق أهدافه وإنه يمكث عليها ويطور منها.

متستهونش بأي ذنب زي كدا .. إنت ممكن تكون بتعمله عشان ممكن تكون الأمة في الإستضعاف دا كله بسببك إنت .. وبسبب ذنبك إنت فخليك باصص علىٰ نفسك وملكش دعوة بحد .. عشان الأمة تُقام من تاني.
#مشروع_قدسية

من ضمن وجود القبول بينكم .. إنه يتقبل ملامح وشك وطريقة كلامك .. أعرف أخ رفض أخت عشان ماستريحش لتعابير وشها وهي بتتكلم .. ودا حقه ومش نقص منها بردو .. وأخ كان رايحلها وناوي يرفض أصلا بس كان تحت ضغط والده .. ولما راح ارتاح وشافها ارتاح لملامحها جدًا وكان كل شوية هو اللي عايز يعجل بالعقد عشان كدا ..

نقطة رؤية الوجه دي مهمة لأن دي الإنسانة اللي هتكون قدامه ليل نهار .. ومن حقه يرفض أو يوافق علي أساس حاجة زي كدا .. ودا مش تفكير سطحي ولا ذكوري ولا أي شيئ ..

مش بعارض فكرة إن الرؤية شيئ في غاية الحرج لأي بنت وخاصة المنتقبة .. فكرة إن رجل غريب هتطلعيله بوشك وإنت عمر ماحد شافه من ساعة ما لبستي النقاب تخجل جدا في الحقيقة .. لكن دا الطبيعي عند أي بنت فطرتها سوية إنها تكون مكسوفة ومتوترة ومش عارفة تتعامل بأريحية من كتر خجلها من الموقف .. وماحدش طلب منك تتخلي عن مشاعرك دي عشان هو من حقه يشوفك .. وأكيد أي واحدة نفسها إنها ماتتعرضش لحد بوشها .. بس دا شرع ربنا ..

فـ لُطْفًا منكم بلاش تنشروا المواقف اللي تفقع المرارة دي وتعتبروها حاجة حلوة .. ربنا يرضي عنا وعنكم ..

@Mashro3_kodoseiia

#مشروع_قدسية

« أيها الناس .. اسمعوا مني لَعلي لا ألقاكم بعد عامي هذا »

كل ما أوصل للجزء دا من خطبة النبي ﷺ في حجة الوداع .. مش بييجي قدامي غير « أبو بكر » رضي الله عنه ..

بتخيل شعوره .. وبيمر قدامي شريط من القصص والمواقف اللي حصلت .. داخل أعظم قصة صداقة في التاريخ :

- بفتكره لما خاف أثناء الإقامة في غار ثور ..
- فالنبي طمنه وقال : يا أبا بكر .. لا تحزن إن الله معنا ..

- بفتكر لما النبي ﷺ وقف قدام مجموعة كبيرة من الصحابة .. وقال : ما لأحد عندنا من شيء إلا وقد كافئناه .. إلا أبا بكر، له عندنا شيء يكافئه الله به يوم القيامة ..

- بفتكر لما عمرو بن العاص سأل النبي : من أحب الناس إليك يا رسول الله .. النبي ﷺ قال « من الرجالِ : أبو بكر »

إيه الكلمات اللي ممكن توصف شعور أبو بكر .. وهو بيُعلن موت صاحب عمره ورفيقه : « أيها الناس من كان يعبد محمداً فإن محمداً قد مات! »

رضي الله عن صاحب رسول الله .
#مشروع_قدسية

كان لما حد يقولى إنى مقصرة .. كنت أقوله والله مانسياه في دعائى وكدا .. كانوا بيستخفوا بالأمر جدا .. وبيشوفوا إنه حاجة عادية .. مع إنها مش كدا خالص بالنسبة لى ..

تخيل كدا آمة فقيرة مليئة بالذنوب والعيوب والتقصير .. شديدة الإسراف على نفسها .. محتاجة من التواب سبحانه وتعالى إنه يتوب عليها ويغفرلها ..

وعندها أمانى دينية ودنيوية .. بترجو من الكريم عز وجل إنه يحققهالها .. عندها شوية مشاكل محتاجة من اللطيف جل جلاله يلطف بقلبها ويحلها .. عندها مليون حاجة وحاجة بتتشعبط بالدعاء اللى فيه ملجأها الوحيد اللى عليم بيها وقادر على تفريج همها كله .. وتروح تلجأ للقدوس سبحانه وتتكلم وتشكى وتحكى وذنوبها ومشاكلها وتقصيرها شاغلينها .. وفي وسط دا كله حب فلانة في قلبي يفرض عليا .. إن مرة واحدة كدا ألاقينى بقول

اللهم فلانة وقلبها وما أنت أعلم به يا رحيم .. اللهم طهرها من خطاياها بالماء والثلج والبرد .. اللهم باعد بينها وبين خطاياها كما باعدت بين المشرق والمغرب .. اللهم نقها من خطاياها كما ينقى الثوب الأبيض من الدنس .. وادعيلها بالثبات والهداية والفردوس والقلب السليم وأدعيلها وأدعيلها وأدعيلها وأدعيلها لدرجة إنى أنسي نفسي أصلاً ..

حب إيه أجمل من إنى أشارك حد في وقتى مع الملك .. ملجأى الواحد في العالم اللى بإيده كل ما أريد وأرجو ! ..

الدعاء فعلاً مرتبة راقية وعالية أوى من الحب .. بل هى أعلى المراتب والله.

#مشروع_قدسية.

اسألوا عَ دين بعض من وقت للتانى يا جماعة .. الزمان دا كفيل بتغيير أي قلب مهما كان ثبات صاحبه!

كنت بكلم صديقة ليا في التليفون الصبح .. وهى أخت ليا كنت بغير جدا من صلاحها وعطائها للدين .. فـ لمست في كلامها تهاون وفي دينها كثير من اللين .. وأغلب سقطاتها بدأت في تهاونات الخطبة ..

وزارني أخت ليا أحسبها ع خير كانت لا تتهاون في النوافل تماما .. اللهم بارك سنن رواتب وسنن غير مؤكدة .. وتلاقي كل فرض تصلى سنن قبله وبعده غالبا .. والضحى ٨ ركعات والقيام الثلث الأخير كله حرفيا .. وجاتلى تشتكيلى من نفسها إنها وصل بيها الأمر إنها تجمع الصلوات آخر اليوم ..

وصديقة كانت معايا في ثانوى مختمرة وأحسبها ع خير .. ماشفتهاش من زمن واتقابلنا .. شفت في وجهها انطفاءة لم أعهدها من قبل .. ومجرد ما اتكلمنا سوا قعدت تبكى وتشكيلى إنها فضلت تقع في فيديوهات وبعدها رجعت للأفلام وبعد كدا مسلسلات .. وتهاونات كتير لحد ما حاليا أدمنت الأفلام الإباحية وبتتفرج عليها شبه يوميا ..

وطبعا ناهيك عن كثير من أحبتنا اللى زاد ترخُّصهم في أمور الدين عموما .. والفتن اللى عمالة توقعهم ورا بعض .. لحد ما بقيت مرعوبة وأصبح جل دعائي من كتر اللى بيواجهنى : اللهم ثبتنا وسلم يارب سلم ..

ولما رجعت لـ نفسي لقيت المشكلة سببها حاجتين .. إما إن الواحد كان سايب نفسه بدون ما يتسند على شيء يمنعه من التمرغ في وحل الفتن .. وما حصنش نفسه بجدار إيمانى كويس زى ارتباطه بدار تحفيظ أو معهد علوم شرعية أو صحبة صالحة ..

أو السبب الثاني انشغال المصلحين عن بعضهم .. لدرجة إن ما بقاش فيه كلمات إخواتنا في الله اللى كانت بتذكرنا بالله عز وجل .. ولا رسائلهم اللى تفوقنا من الغفلة .. مابقيناش نتصل بعت رسائل ونهتم بدين بعض .. فـ تلاقى اللى كان ثابت امبارح وعنده لياقة إيمانية اللهم بارك بقا ضعيف جدا وبيثبت نفسه بالعافية .. ومش قادر يعين حد أصلا ..

السلف رحمهم الله كانوا يسألوا ع إخوانهم كل شوية .. يسأله عن آخرته خوفا عليه من ضياع الإيمان .. ويسأله عن دنيته خوفا عليه إنه يكون محتاج شيئ أو عايز حاجة وهو في وسط الأحباب والإخوان!

ورحم الله عمر بن الخطاب رضي الله عنه .. لما عرف إن صاحب ليه تدنى في إيمانه لحد ما شرب الخمر .. بعتله بدايات سورة غافر وقعد يذكره بالله عز وجل لحد ما رجع ..

اطمئنوا على بعضكم .. وتفقدوا إخواتكم .. هاتوا ورقة وقلم واكتبى أسمائهم كلهم .. وقسميهم خلال الشهر إنك تكلمى كل واحدة مرة ١٥ دقيقة في الشهر حتى .. لو لقيتيها على الطريق اللهم لك الحمد ثبتيها .. ولو لقيتيها بدأت تتزعزع اسنديها لحد ماتقف تانى وتثبت .. وإن لقيتيها وقعت في وحل الذنوب خالص ذكريها برحمة ربنا سبحانه وتعالى ومغفرته ..

لو عملتى يوميا الـ ١٥ دقيقة دى .. اللى يعرفك وكلمتيه هيشوفك سند .. لو في يوم من الأيام لقي نفسه بيقع هتكونى أول واحدة تفكر تلجألها عشان تعينها ع نفسها .. هتكون مكالمتك دعوة إلى الله وتعاون ع البر والتقوى .. ومحبة في الله وإيثار من باب لا يؤمن أحدكم حتى يحب لأخيه ما يحب لنفسه .. ونوايا عظيمة جدا .. ومع ثباتك على المكالمة دى هتلاقي ربنا بيزيدك ثبات بكل كلمة ثبتى بيها واحدة من صاحباتكم .. وكفاية عليكِ أوى أن الجنة لا يطيب نعيمها إلا وإنتم مع بعض .. لأننا بنحشر « زُمُــــرًا » يعنى جماعات وإخوة ..


فما آخاك أخوك لتلاطفه وتؤاكله وتمازحه عند النعماء .. وإنما لتؤازره في أمر دينه ودنياه عند الشدائد والأنواء!

#مشروع_قدسية

بعيدًا عن المسابقة وجوايزها.

السلسلة دي جميلة جدا اللهم بارك .. وأنا شخصيا استفدت منها جدًا جدًا في بداية الطريق إلى الله عز وجل .. ولسة النفع لحد النهاردة منها .. وصدقًا هتنظم مشاعركم تجاه الدين وطاقتكم تجاه العبادة.

ومناسبة جدا جدا لأي حد حابب يبدأ في الطريق إلي الله عز وجل ومش عارف يبدأ منين .. وأي حد في الطريق بفضل الله بس حاسس إنه مش بينجز حاجة ومشتت ومش عارف الأولوية يبدأ بإيه وإيه الأساس وإيه اللي ممكن يستني.

من الآخر لازم كلكم تشتركو في المسابقة إن شاء الله.

#مشروع_قدسية

كلمة دكتور حازم فى حفل توقيع كتاب أسرار شهر الله المحرم..

- زى النهاردة من سنتين كان أول أحضر إيڤينت علي أرض الواقع في حياتى .. كان إيڤينت أسرار شهر الله المحرم .. كان فيه الشيخ عمرو زكى والشيخ حازم شومان ربنا يحفطهم ..

- كنت أول مرة أعرف الشيخ عمرو زكى وفعلا اللهم بارك عليه طلع حد أسلوبه وكلامه وقصصه ممتعة ومؤثرة واتأثرت بـ كلام كتير من كلامه .. وكذلك طبعا كالعادة من شيخنا حازم شومان اللى وضح أمور كتير جدا كانت غايبة عنى .. أتكلم عن أهمية الشهر دا وعن الهجرة .. وعن فترة الشباب وإن لازم تكون فيها أحسن من كدا .. وتوسع واستفاض في أمور كتير جدا اللهم بارك ..
مهم جـدًّا تسمعوه.

#مشروع_قدسية
#الدال_على_الخير_كفاعله

🔥 بشري لكل واحد أجازته خلصت ومالحقش يستثمرها .. وحاسس إنه مابيعملش أي حاجة مفيدة خالص.

🔥بشري لكل واحد بردو عمره ما بدأ كتاب وكمله لآخره .. ونفسه يثبت علي كتاب وينهيه.

🔥 بشري لكل تايه يومه بيضيع علي الفاضي ومش عارف يحط تحدي ويكمل فيه للآخر.

عملنا تحدي علي قناة « مَشْرُوعْ قُدُسِيّة » لقراءة كتاب مسلكيات كاملًا لـ د/ إبراهيم السكران في 3 أيام .. واللهم بارك كان فيه إقبال كبير وتنافس قوي جدًا .. لدرجة إن البعض أنهي الكتاب اللي 186 صفحة في جلسة واحدة مابين الساعة والساعتين تبارك الله .. والتحدي خلي كتير من المشاركين معانا يحس بفرحة الإنجاز اللي كتير منا يفقدها في طلب العلم.

عشان كدا قررنا نوسع التحدي ونخليه تحدي شهري إن شاء الله .. وبقت مدة التحدي خمس أسابيع .. والجمعة من كل أسبوع أجازة للإستدراك .. وفي نهاية كل أسبوع هيكون فيه شهادات تقدير للمتميزين إن شاء الله.

نقرأ فيه كتاب كامل يوميا تتراوح عدد صفحاته من 58 صفحة وحتي 473 صفحة .. الكتب مختارة من قبل الشيخ أحمد السيد حفظه الله لأكاديمية الجيل الصاعد .. وإحنا هنمشي عليها بنفس التسلسل والتدريج المقترح من الشيخ.

للإشتراك :

@Mashro3_kodoseiia

#مشروع_قدسية

س/ ع فكرة المسلسلات مش حرام ومفيش آية ولا حديث بيقولوا إنها حرام!

ج/ فعلا المسلسلات مش حرام .. ولا في أية ولا حديث قالوا إن المسلسلات حرام بجد .. ولكن عندنا حاجات اتذكر فيها أحاديث وآيات كتير عَ حرمانيتها .. إن ماكنتش موجودة في المسلسل اللى بتسمعيه .. قوليلى ميعاده وهلم العيلة وأصحابى ونسمعه إن شاء الله ..

1)كل النساء اللى فيه يكون لابسين حجاب شرعى سليم .. بحيث يساعد الشباب اللى هيتفرجوا إنهم يغضوا بصرهم .. وكل الرجال لما ييجوا في مشهد يكون وضع لائق .. يساعدنا كـ بنات إننا نغض بصرنا بردو ..

2) مافيهوش أغانى ولا موسيقي من أى نوع .. ودا يشمل طبعاً أى موسيقي تصويرية ممكن تجى في مشهد درامى .. ماهى موسيقي بردو يعنى حرام ..

3)يكون ليه هدف إسلامى أو اجتماعى أو إنسانى يدور حواليه .. يعود بالنفع عَ الفرد بصورة خاصة وعَ الأمة الإسلامية بصورة عامة .. ولما تسمعه يضيف ليك قيم وخبرات نبيلة تساعدك في الحياة أو الدين ..

4) مافيهاش أى إيحاءات لأى حاجة حرام .. ولا فيها حاجة تحرك المشاعر وتشعل الشهوات وتفتن الشباب أو البنات .. ولا تساعد عمومًا عَ إشغال الغرائز في ما لا يرضى الله .. والمشاهد تكون في إطار دينى .. وكل شخص يبقي عارف حدود دينه إيه .. لا يبقي فيها خضوع بالقول لأى امرأة بتمثل -اللى هى بتمثل وهى بالحجاب الشرعي😌- في المسلسل .. ولا أى نوع من الهمسات واللمسات المحرمة ..

5) لا يكون فيه راجل بيعمل ست ولا ست بتعمل راجل .. لأن لعن الله المتشبهين من الرجال بالنساء ومن النساء بالرجال .. ولا يحتوى عَ كذب إلا في إطار الـ٣ حالات المباحة .. زى الكذب بهدف الصلح بين المتخاصمين أوالكذب عَ العدو وهكذا ..

6) إن وقتها مايكونش بيلهيك عن الصلاة .. أو الفرجة عليها تشغلك عن ذكر الله عز وجل .. وطبعاً بصورة عامة إحنا كلنا عارفين إن المسلسلات في رمضان بتساعد عَ الخشوع في الصلاة .. والتلذذ بالقرآن وهكذا .. فأنا أكيد مش أنبه عَ إن رمضان شهر في السنة والمفروض نستغله وكدا ..

شوية شروط دينية أهو .. لو اتطبقت في أى مسلسل يبقي حلال وعرفينى ميعاده عشان أتابعه ..

#إعادة_نشر
#مشروع_قدسية

في يوم 11 من شهر فبراير السنة اللي فاتت غفلت عن قراءة الأذكار بعد صلاة الفجر زي ما متعودة .. وتذكرت بعدها بحوالي 3 ساعات وقلت خلاص بقا وقتها عدى .. وسبحان الله وأنا خارجة من البيت رايحة الجامعة وقتها واحدة بعتتلي رسالة SMS تذكرني بيها وعرفت بعدها إنها كانت مبعوتة غلطة أصلا .. رجعت وقعدت مخصوص عشان أقولها وبعد كدا خرجت.

خرجت للجامعة يومها .. وحصلي حادثة في المترو .. تفاصيلها موجعة جدًا مأثرة فيا نفسيا لحد النهاردة .. وكان بيني وبين إني أقع تحت المترو وأموت فورًا أقل من ثانية .. وبالفعل كنت غمضت عيني من الخوف واستسلمت لفكرة إني هشوف ملك الموت حالا .. وبدون خوض في تفاصيل لا داعي لها أنجاني الله عز وجل ورزقني وقتًا لأتوب فيه .. ولا أظنني نجوت يومها إلا بسبب الأذكار .. فالحمد لله على نعمة حفظ الأذكار لنا .. الحمد لله.


#مشروع_قدسية

وأنا بقرأ وردى من شوية قابلنى كلمة علقت معايا أوى لما الله عز وجل بيقول في آخر أية الدين في سورة البقرة .. « واتقوا الله ويعلمكم الله » .. الله العليم هو اللى بيعلمنا كل شي .. حتى تلاقي في الشرع بيعلمنا كل حاجة لدرجة إنه بيعرفنا ازاى نعبده وازاى ندعوه وازاى نناجيه .. متخيل كرمه؟

افتكرت وقتها لما د.أحمد عبدالمنعم كان بيقول .. الواحد اللى يبقي ماشى في طريق الله عز وجل وخايف طول الوقت أحسن يقدم على حاجة وتطلع مش صح ولا مش وقتها .. وخايف يبدأ بالفقه ولا العقيدة ولا يسمع دروس ولا يقرأ كتب ولا يبدأ منين .. وقتها د.أحمد ربنا يحفظه قال .. هو إنت متعلق في الهوا .. دا إنتَ متعلق بربنا سبحانه وتعالى العليم .. روح قوله يارب علمنى وهو هيعلمك وامشي في الطريق وماتخافش من الندم .. لأن حتى لو فشلت في اللى عملته دا .. فـ دا بردو تعليم والله .. لأن مافيش فشل في طريق الله عز وجل .. في مجاهدة والمجاهدة لازم يكون فيها وقعات عشان تعرف قيمة الوقوف والسير .. ربنا يعلمنا يا صاحبي.

#مشروع_قدسية

بنات وشباب كتيـر في الجامعة والسناتِر .. بيواجهوا مُشكلة كبيرة وهيَ إنهم مش بيقدروا يتَّبِعوا الضوابِط المشروعة للإختلاط كويس ..

- بيكون فيـه جُزء من المودَّة والأُلفَـة .. بين الأخ المُلتَحِي اللي في آخِـر المدرج .. والأُخت المُنتقِبـة اللي في أوّل المدرج ..
طب ليه الكلام ده؟ ..
لأن يا أخي الكريم إنتَ بتكون عارف .. إن أغلب الفِتَن اللي بتقابِل زميلتك المُنتقِبـة في الجامعة .. زي اللي بتقابلك بالظبط يعني العقبات متشابهة .. وبالتالي بتحس إن في جـو من الأُلفة بينكم كدا ..
« زي ما بيقولوا كدة في الهوا سوا أو دي بلدياتنا 😅 »

وللأسف الشيطان بيستغل النقطة دي كويس جدًا .. ويدخل لك منها يا صديقي !

تلاقيك بعد ما كنت بتستأذِن من المحاضرة .. عشان تصلي العصر حاضِر .. بقيت تستأذِن عشان أُختاه تآخُد بالها من الشيخ اللي معاها في الدفعة!
"ودِي مُصِيبة ريـاء عظيمة! "

-الأخت الفاضلة المُنتقِبـة المُبجلة .. داخلة الجامعة وبتحاوِل تغض بصرها عن زمايلها الشباب .. هوب تدخل المدرج تسمع الأخ الفاضِل المُلتَحِي .. بيقرأ قُرءان أو بيدعو إلى اللَّـه ومستغل تأخير الدكتور كويس .. فـتِنسى البنت إن في حاجة اسمها غَض بصر .. وإن دَا شخص غريب عنها وتقعد مع زميلاتها المنتقاب زيها ويمجِدُوا في سيدنا الشيخ!

"اللهُـمَّ بارِك على صوتُـه زي القمر!"
" ربّنا يحفظك يابني!"
" إيه الجمال ده؟!"
" لأ لأ ده كلامُـه في الجـون بجد!"

وطبعا بيسجله صوته ولا علي كلامه علي اعتبار إنه كلام عن ربنا ولا بيقرأ قرآن وتسمعه بقا كل شوية بس بدون ما ضميرها يأنبها ولا تحس إنها بتعمل حاجة غلط !

يا كِـرام!
الشيطان بيدخل للمُلتزِم من مَدخل المُلتزِمات .. ويدخل للمُلتزِمـات من مَدخل المُلتزِم .. والملتزم مايتفتنش غيز من الملتزمة اللي زيه والله..
مش هيوسوِس لك يقول لك « بُص على البت اللي سايبه شعرها اللي هناك دي ».. لأ هوَ عارف إنك مش هتستجِيب له .. فـ هيقول لك « ما شاء اللّٰـه اللهُـمَّ بارِك بص الأُخت المُنتقِبـة اللي مفيش حاجة منها ظاهرة دي! » .. وإنتَ زي الشطور هتتفِتن طول ما إنتَ عايش في جـوّ إن زمانها بتتفتن زيي وبتتعب زيي وبتعمل زيي!

والبنت اللي بتجاهِد .. عشان تلتزِم بدينها مش هيدخل لها من مدخل « بصي الشاب الرِوِش ده؟ » .. لأ لأ ده هيدخل لك من مدخل صوت زميلك في الأذان .. وتلاوة القُرءان وحملاتُـه الدعـوِيّة في الجامعة!

لذلك يا شباب عاوزين نآخُد حذرنـا شويتين تلاتة عشرة كدة باللَّـه .. زميلك المتديـن ملكيش حق تطلقي بصرك وتبصي له ولا تُثنِي عليـه بمبالغة يا بنت النّـاس .. مش عشان بيقرأ قرآن يبقي خلاص بقا من المحارم !

يا شبح الأشباح .. يا شيخ المشايخ!
زميلتك في الدفعة مش أختك ولَا خطيبتك ولا زوجتك .. عشان تقعد تتأمل في حجابها ولا نقابها .. وتعرف عندها كام شنطة .. وإيه أكتر نقاب بترتاح فيـه!

دي غريبـة عنّك .. إنتَ مأمـور بـغَض بصرك عنها وعدم الحديث معها إلَّا في الضرورة القصوى .. ولو لقيت من نفسك ميل تلحق نفسك وتنصرف عن أي حاجة متواجدة فيها .. غير وقت المحاضرة واحضر في وقت تاني لنفس المحاضرة لو متاح .. غير السكشن اللي هي زميلتك فيه .. اتصرف يا إخي دا دينك اللي بيفلت منك دا !

سبب تقصيرك في القيَـام وفي الدعـوَة .. تفكيرك في الأخ إيـاه اللي معاكِ في الدفعة!

سبب انتكاستك وفتـورك في العبادة .. إطلاقك لِـبصرك عن الأخت إياها في الجامعة!

ربّنـا يرزقنا جميعًا العِفّـة والطهارة .. والأزواج الصالِـحين

#مشروع_قدسية

بسم الله الرحمن الرحيم والصلاة والسلام على رسول الله صلى الله عليه وسلم وعلىٰ آله وصحبه أجمعين .. أما بعد :

فإني نظرتُ في حالي وتتبعتُ خطوات الشيطان معي ومع من استنصحوني في أمر الأجازة واستثمارها .. وأبصرني الله عز وجل بنقطة هامة للغاية ألتمس أثرها في ما يتبعها من نتائج.

اتضح لي بعد النظر أن الجميع كان لديه نظرة عامة حقيقية لقدرته ومهاراته بفضل الله دون مغالاة .. ويعرف كل منا ما ينبغي فعله حتىٰ يغتنم تلك الأيام قبل الانشغال مرة أخرىٰ .. وكان الأغلب- إلا من رحم ربي- واضعًا لنفسه خطة علمية وإصلاحية ملائمة جدا له.

ولكن الكثير وقع قبل البدء في أول خطواتها لعدم احتياطه في الفترة ما بين ( فترة الامتحانات والانشغال ) والفترة الخاصة بالفراغ التي أتته فجأة والتي يجب أن تكون خاصة بـ ( استثمار الأجازة والعمل على المشروع الإصلاحي فيها ) .. هذا اليوم أواليومان المندرجان تحت خانة استراحة محارب ثم نبدأ بعدها أقوىٰ .. يفرط المرء فيهم في المباحات المدسوس فيها بعض المحرمات مثل :

متابعة صناع المحتوى التافه .. سماع فيديوهات البرامج الحوارية لضيوف لا قيمة لهم .. النوم المبالغ فيه بشكل يضيع الفرائض ويعجّز عن النوافل .. مكالمات الهاتف الطويلة الذي لا بد وأن توقع في الغيبة والإثم إن زادت عن حدها بلا قيمة .. الإكثار من سماع الكارتون أو الإنمي الذي يحوي مخالفات عقدية أو شرعية .. تصفح أخبار برنامج الفيسبوك ليومين متتاليين أو ثلاثة والمرور على كل ما فات في وقت إغلاق الحساب .. والتعرض فجأة لمجموعة من المشاعر المتضاربة والمختلفة .. وغيرها مما يفسد القلب ويضر بالعزم .. ويحول بين الإنسان ومشروعه الإصلاحي لاغتنام الأجازة كل مرة وهو لا ينتبه لأصل المشكلة.

ولذلك : إن كنت ناصحة أحدهم بشيئ أن يعطيه جُلّ انشغاله في أول أجازته ومن قبل أن يبدأها حتىٰ .. فسأنصحه أن يضع خطة واضحة لاقتراحاته في كيفية قضاء وقت الترفيه دون مخالفات أو مفسدات للقلب .. بشكل منضبط متوازن يجدد العزم فيه .. فهذه نقطة جوهرية أرىٰ أنها مفرق الأمر بين كل ناجح متم لعمله بعون الله وبين من يقع دائمًا قبل أن يتم أي طريق حتى صار ذلك دأبه وما يعرف به .. والله المستعان.

#بوح
#مشروع_قدسية

الواحد دايما بيحس إن سيرة النبي صلي الله عليه وسلم مسيطرة علي تفكيره .. الواحد لما يجوع كدا يقعد يقول أومال النبي صلي الله عليه وسلم كان جعان ازاي في شعب أبي طالب .. لما يبرد يفتكر سيدنا حذيفة بن اليمان رضي الله عنه لما كان سقعان والنبي صلي الله عليه وسلم كان بيصلي جنبه وحس بيه فراح دفاه بعبائته .. فيحس بغبطة أوي .. لما حد يعترفلي إنه بيحبني وهو حد قدره عالي بالنسبة لي وأفرح أوي كدا بقعد أقول أومال سيدنا معاذ رضي الله عنه كان فرحان ازاي لما اتقالتله من النبي .. لما الواحد يحس آن نفسه بتغلبه وشهواته ويتذكر الصحابي اللي قاله « ائذن لي في الزنا » .. وإنه في آخر الحديث وضع يده علي موضع قلبه ودعاله فربنا أذهب عن قلبه حب الزنا تماما .. فأقول ياريته كان دعالي أنا كمان .. ممكن أكون قاعدة بسمع خطبة فلا إراديا أقول ياتري خطبة النبي صلي الله عليه وسلم كانت ازاي! .. لما أشوف هيئة أحد المشايخ ويكون فيها وقار وهيبة كدا بقول طب النبي صلي الله عليه وسلم هيبته كانت ازاي! .. فاللهم ارزقنا رؤيته في المنام ..ورفقته في الفردوس الأعلىٰ إن شاء الله.
_
اقْـرأ البـوسـت دا

#مشروع_قدسية

@Mashro3_kodoseiia