#کوچ_از_خرابه_شام


شکسته نِی کیمی وار دلده غم نَواسی قیزیم
دوشوب دی باشیمه کرب و بلا هواسی قیزیم

گِیدوم تدارک ایدوم اوردا محفلِ ماتم
یاخون لاشوب باباوین اَربعین عَزاسی قیزیم

گَلَنده قَبره قویام اوُلمادی منه فرصت
گِیدوم گوروم نجه دور قَبرینون بناسی قیزیم

علاوه قیرخی دی، لازمدی قَبری اوُسته گِیدَه
دویون جا آغلاماقا اکبرین آناسی قیزیم

رباب چوخ داریخوب اصغرین فراقیندَه
گِیدور گوره نجه دور حَلقینون یاراسی قیزیم

عروسینی آپاروم قاسمه وِیروم تَحویل
یولون گوزتله مسین قارداشیم بالاسی قیدیم

گرک گِیدم آپارام قارداشیم عَلمداره
ودیعه دور منه دلدن عمون لواسی قیزیم

سنون یولوندا قالوب دور بابان گُوزی نگران
گِیدوم دیوم که ندور باشیوین بلاسی قیزیم

بو قَبرِ پاکیوه هر کس گَله بصیرتیله
گَلر قولاقینه بیر حقّ طَلَب صداسی قیزیم

دیمه خرابه دَه من اولموشام غریبه مزار
قبیله کوچ ایدوری قالمور آشناسی قیزیم

بو قَبریوی اِیدر آباد شیعهء دیندار
بو بارگاهین اولار گُنبدِ طلاسی قیزیم

خدا بُلور که سنی گُوزدن آتمارام هرگز
آزالمیوب دی سنه قلبیمون وَفاسی قیزیم

ولیک گِیتماقا مجبورم اینجی مه مندَن
مریض اِیدوب دی منی شامیان جَفاسی قیزیم

عَلاجی اوُلمیان اَمراضه وار او یِرده دوا
علاوه اوردادی بو قلبیمون صفاسی قیزیم

یوخوم دی شالِ عَزا سالماقا او قَبر اوُسته
مزاری نه سالارام مندَه بو لباسی قیزیم

اگر چه پاره لَنوب، قانیله اوُلوب اَلوان
خدا بُلور که ندور کُوینگون بهاسی قیزیم

حسین زیارتی دور چون عَلامتِ ایمان
بو فیض اولوب دی منه خالقون عَطاسی قیزیم

نمازِ شب دَه بَراتِ زیارت ایسته میشم
که اِستجابت اولوب عمّه وین دعاسی قیزیم

دوباره سندن اوتور شامه اِیلرم رجعت
اگرنصیب ایده بو حکمت اقتضاسی قیزیم

بو شعر، #عسگریه اوُلدی توشهء عُقبا
منیم الیم دَن آلار آخرت جَزاسی قیزیم

بو قطعه بانیسی #یعقوبیه اوُزون صله وِیر
عزیزِ عالم اوُلا تا بابان گداسی قیزیم

عنایت اِیت اوُلاری قورتولا شماتت دَن
که یوخدی هیچ بیرینون خانه و سراسی قیزیم

التماس دعای فرج


#حاج_محسن_عسگری_رحمت_الله_علیه


#مجموعه_کانالهای_ادبیات_آئینی_عاشورایی