#زبانحال_حضرت_رقیه_سلام_الله_علیها_در_خرابه_شام

#سوال

عجب عنایت اِیدیبدور منه خدا یارالی
گلوب قوناقیم اولا شاه کربلا،، یارالی

خرابه منزله خوش گَلمیسن دل شَبده
گتیرمیسن بورا عالم بوئیی صفا یارالی

عجب سعادته چاتدوم خدایه حمد اولسون
بو بزمه رَشک آپارار سدر منتها یارالی (۱)

غریبه وقتیده گلدون هرایمه یِتدون
یارالی باشیوه جانلار اولا فدا یارالی

سَنون وجودیویله یوخ داخی اورکده غمیم
قدومین اِیتدی منی غصّه دن رها یارالی

خدا بولور که نه احواله سالمیشیدی فراق
چوخ آز قالیردی که عمروم اولا فنا یارالی

باشیمون اوسته دِدیم کاش آتام اولیدی منیم
دیله دوتیدی منی اول غم آشنا یارالی

گوزوم یاشین اَلدیم عارضه فراقوندا
دِدیم که عمّه منی اِیله بیر دعا،، یارالی

نه گوردوم اَللرینی آچدی درگه حَقه
او دمده اولدی منیم حاجتیم روا یارالی

اورکیم آیینه سین دوتموشیدی بسکه کَدر
دوباره تاپدی بو تشریفیله جلا یارالی

قدومیویله ایشیخلاندی صحن ویرانه
خرابه کُنجی اولوب عرش کبریا یارالی

هزار حیف اولا ای کاش گورمییدیم وار
دوداقلاروندا سنون تازه بیر یارا یارالی

دوباره باغریمی قان اِیلدی بو درد و مُحن
نجّه اولوم بو غمه من بی اعتنا یارالی

چمنده بلبل شیدا مگر دَوام اِیلَر
باخا سولان گولونه اِیتمیه نوا یارالی

او قانلی گوزلرون آچ گور نه حاله قالدیم من
دگور غریبه، سَنی سَسلور آشنا یارالی

سَسیمی آلسان اگر سَس یتور منیم سَسیمه
یتیشموری سنه یا غصّه لی صدا یارالی

نولار دوباره منی دیندیروب دانشدیراسان
دئیَسَن اولدی قولاقون نَدن یارا یارالی

#جواب

نولاردی بیر نچه دم لعل خیزران دیده
بئله بیان اِیلییدی هَزار افسرده

آنام کیمی قولاقوندا وارون یارا یارالی
سنه ده کوفه لیلر اِیلیوب جفا یارالی

او دم که آچدیلا اَل غارته جفا اهلی
باشیمی تاپمشیدی بیر بویوک بلا یارالی

یارالی سینه مه چیخمیشدی شمر شوم و دغا
که یوخسا اولمازیدیم بو غمه رضا یارالی

گوزوم باخاباخا یاندی خیامیلر یکسر
نه ظلم ایدوب بولورم قوم بی حیا یارالی

اَیاخ یالین چوله قاشدون او غملی صحراده
او لحظه شور قیامت اولوب به پا یارالی

گوتورممیشدی گوزون گوزلروندن اهل حرم
دِیوردی عمّون او دم قویمیون یانا یارالی

چَکوبدی زحمتیوی دائماً اودا من تک
نه سِرّی وار بو سوزون قُوی اولا خفّا یارالی

قطار کرب و بلادن اوزاخ دوشنده هَلّه
ربابین اولدی اِیشی دلده آه و وا یارالی

دایاندی نوک جداده منیم یارالی باشیم
دِدیم تاپلماسا گر دوشمرم یولا یارالی

دوشوبدی ناقه عریانیدن بالام یولدا
گلوب فغانه اودور خویش و اقربا یارالی

امور عالم امکانه واقف محضم
قَدر حَقّه اولیدی گرک قضا یارالی

ولیک ایندی داخی غم یئمه که جنتده
یولوی گوزلور آنان خیره النسا یارالی

بهشتیده آناوا میهمانیسن بو گیجه
قوتاردی بحبحه دشت کربلا یارالی

یتیشدی عهد اَلستیم خرابه یرده باشا
وارام سَنیله داخی تا به انتها یارالی

جهان عاریه مامور اِیدوب منی رَبیم
که عهد روز اَلسته اِیدم وفا یارالی

وگر نه جان جهانه جهاندا جانسان سن
تمام درد لره سنده وار دوا یارالی

دخیل اولار سنه دائم #عتیق دلخسته
اوزون بولَر بیزه عالمده بیر گدا یارالی

مریضیدور آناسی دردینه دوا یوخدی
خدادن اِیسته اونا تا ویره شفا یارالی

التماس دعا 🙏

(۱) سِدرَةُ المُنتَهیٰ جایگاه یا درختی در آسمان که در قرآن و حدیث معراج به آن اشاره شده است پیامبر صلوات الله علیه و اله در سفر معراج سدرة المنتهی را مشاهده کرده است

‍
#زبانحال_حضرت_رقیه_سلام_الله_علیها


رقیه نون چون اولوب خوابگاهی تیره تُراب
بو دللّریله نوا باشلیوب آناسی رباب

دور ای خرابه نی آباد ایدن صفاسی قیزیم
دور ای آز عمریله چوخ غم لر آشناسی قیزیم

دور ای جمالی منیم چرخِ عمرومون ماهی
غروبه چکدی نه تیز دشمنون جَفاسی قیزیم

سن آغلیاندا گیجه سس ویرم سنون سسوه
مگر قویاردی منی دشمنون هَراسی قیزیم

بیزی یزید ایلیوب ظاهراً خرابه نشین
ولیک بولمدی وار حقون اِعتلاسی قیزیم

غریب شهردَه دَفن اولماقون چتندی ولی
بو خیردا قَبر اولاجاق بیر وفا بناسی قیزیم

بیزه بو شامی دَه شام اهلی خارجی دیدیلر
خطای محضدی بو قومون اِدّعاسی قیزیم

و لیک قلبی میزه بیر اوخ اولدی طعنه لری
نه التیامی او زخمین نه وار شَفاسی قیزیم

بو نسگلون آنا وی جان ویرونجه یاندوراجاق
مریضی دون یوخودی دردوین دواسی قیزیم

اِیاقلارین یارالیدی باخاردیم آغلاردیم
گلردی سوزشه اوز سینه مین یاراسی قیزیم

غمون عجب اَله بیر رشته ویردی ماتم دَن
محبتون بودی عالم دَه اقتضاسی قیزیم

سنی خیاله سالوب آغلارام غریب آقاما
حسین مون هله خوار اوُلماسین عَزاسی قیزیم

من آغلارام خانم عمّن دَه سس وِیرر سسی مه
حرملرون اوجالار عرشه آه و واسی قیزیم

دولار خرابه بوتون داد و آه و شیونیله
بو اهل بیتون اولار شام کربلاسی قیزیم

بو داغ دیده لر آغلاللّار اوز اُلنلری نه
بو شهری دولدورار آل اللّهین نواسی قیزیم

ایدر اَثر خانمیم زینبون نمازِ شبی
اِجابته یتوشر یا سحر دعاسی قیزیم

اِسارتین قیریلار رشته سی عدالتی له
جَفا و ظلمین اولار حدَِّ اِنتهاسی قیزیم

بو قِید دَن بیزی آزاد ایدر سپاهِ یزید
خرابه دَه قُورولار بیر عَزا اَساسی قیزیم

جنایتین آچیلار پرده سی اولار روشن
یزیده تنگ اوُلی بو عالمین فضاسی قیزیم

بیزی مدینیه گُوندرماقا اولار مَجبور
نهایته یتوشر شامین اِبتلاسی قیزیم

شَهیده اوُلماقوا منده راضیم امّا
منیم رضایتمین فوی حق رضاسی قیزیم

دیردیم ای هامی مایوس و نا امیده امید
زهی شَرف که اولوب دینِ حقّ فداسی قیزیم

منه گونوزلری دَه تیره شام اِیدوب گجه تک
زِ بس که پرده لنوب آهی مون لواسی قیزیم

زمانه کاخِ جَفای یزیدی مَحو اِیلر
بو توزلی قَبرین اولار گُنبد طلاسی قیزیم

جهاندا هیچ کیمی دَفن ایتمیوبله مسجددَه
بو اِمتیاز سنون دور گُوزوم ضیاسی قیزیم

غم اِیتمه آز صورا مَحکوم اولار فَنایه یزید
محال دور که اولا ظالمین بَقاسی قیزیم

بو شعره بیر آقامون نوکری اوُلوب بانی
روای حاجته وار دل دَه التماسی قیزیم

بیری اوخور توکور اشکین بیری یازار آغلار
دوتار سنه ایکی خدمتگزار یاسی قیزیم

او پاک و گرم نفس دَن آلوب دی #خوندل دَم
یازوبدی خامهّ نا چیز و نا رساسی قیزیم

رَسا کلامیله #خوندل خطاب ایدوبدی خانم
که حقّ ووران آغاجون چخمیوب صداسی قیزیم

التماس دعای فرج


#خوندل

#زبانحال_حضرت_رقیه_سلام_الله_علیها


بیر بلبلم خزانه گئدوب گلشن آغلارام
هیچ بلبل آغلاماز بو قدر که من آغلارام

خیمم یانوب اِئلیم داغیلوب قارداشیم اُلوب
زنجیره باغلیوب قولومی دشمن آغلارام

گون ایسّی بوینوما غل آهن ووروب دی شمر
من آغلارام بو حاله یانوب آهن، آغلارام

بیر یوسفِ مدینم اُلوب یوخ نشانه سی
اگنینده قویمیوب دوله پیراهن آغلارام

قارداش قسم او جانیوه شیون ائدنده من
هر ناقه ایلدی منیلن شیون آغلارام

باشون گتوردی شام دَه باشی آچوخ قویوب
بیر گلمدون خرابیه قارداش سن آغلارام

دردون علی خرابه دَه دلدن سالوب منی
بو شام اهلی سالمادیلار دلدن آغلارام

توپراقلار اوسته اُلمگیمون مشقین ایلرم
یوخ دور چراغ تا ایلیم روشن آغلارام

قول باغلو آج سوسوز ویرورم جان خرابه دَه
عمّم قوجاقلیوب آنام آغلار من آغلارام

بُلَّم هامی گئدر وطنه من گئدنمرم
کُنجِ خرابه نی ائدرم مسکن آغلارام

هروقت سو گورنده دوشرسن خیالیمه
چون جان وئرنده ایچمه موسن سوسن آغلارام

#واقف حسینه آغلیان عُقبادَه آغلاماز
ذکر مصیبتون اولی مُستحسن آغلارام

التماس داعی فرج


#واقف

#مجموعه_کانالهای_ادبیات_آئینی_عاشورایی

#زبانحال_حضرت_رقیه_سلام_الله_علیها


بابا سَیاحَته مَردم گِیدر چَمن یِرینه
سُنون خَرابیه باشون گَلوب بَدَن یِرینه

دِیسَم خَرابیه خوش گَلمُوسَن سَزا دَگُلی
رقیّه نُون وَلی خوش گَلمُوسَن اُلن یرینه

اِجازَه وِیر دوشییم زُلفیمی وِیروم زینت
گُلِ بَنفشَه و نَسرین و یاسمن یِرینه

سُویُوندوقومدان اِیتیردیم اُوزومی هیچ دِیمه دیم
فَدا کَسوک باشیوین من گَلوب گِیدَن یِرینه

اَیاقلاروندان اُپَردیم اُولِیدی گَر اَیاقُون
بُو قانلی باشیوین اُولّام فَدا گَلَن یِرینه

ازَلدَه رَسمیدی بُو باش چَکر اِلین بُویُوکی
سَبَب نَدور صُورا گَلدون اِلین دوشَن یِرینه

اِیشیتمیشم چوخ اُپَرمُوش آنان بُوغازوندان
قُویُوم دوداقیمی قُوی بیر آنان اُپَن یِرینه

بُو تُوزلی زُلفیمی تِل تِل وَفالی قیزلار تَک
جَنازن اُوسته تُوکه بُلمدیم کَفَن یِرینه

سَنی نیَه یُولا تَک سالدی اَکبریم هانی بَس
فَدا اُولا باجیسی اَکبرین گَزَن یِرینه

داریخمُوشام بابا قِیتَر مَنی آپار وَطنه
عَلاقه مَند اُولی غُربَت چَکن وَطن یِرینه

نه خوش گَلُور سُویی نه اَهلی نه هَواسی مَنه
بُو یاخشی دور کُوچَه هر طایِفَه سُوَن یِرینه

مَریضه ام بابا شامه گَلوب گَلَن گُوندَن
قُوی عَرض اِیدوم نَدی عَرضیم گَلوب سُخن یِرینه

گُونوزلَر اِیستی اَذیّت وِیرور، سُویُوق گِئجه لَر
گُوگُل آچلمُوری هِی غَم گَلور مُحَن یِرینه

بیری باخور گُولور اَحوالیمَه بیری آغلور
هِی آغلیَن گِیدوری هِی گَلور گُولَن یِرینه

نه یاخشی گُوزلَریوی یومّوسان فَدا گُوزیوَه
گُوزون ساتاش مُوری بُوینوم داکی رَسن یِرینه

دانشمُوسان بابا یُوخسا دوداقلارون یارادی
فَدا او لَبلَریوَه من آقاج دَگَن یِرینه

گِئجه گُونوز اُورگیم تیترور اصغریمدَن اُوتور
او اَصغری که اِیچوب قانینی لَبن یِرینه

مَنه دَه کاش دِگِیدی اُونون کیمی پِیکان
اُولیدیم اَصغَرین اِی کاش کاش من یِرینه

مَدینه یُوسفی اَکبر بُلم بُو شَهره گَلوب
کَلافِ جان گِیدرَم اَلدَه پیره زَن یِرینه

تَمام اُولا بیر اُوزون گُورماق عُمر قیمتی نه
بُو نَقد جانیمی نَقد اِیلرَم ثَمن یِرینه

عَمُوم اِمامِ حَسن یادگاری هاردا قالُوب
بی بیم اُپِیدی یُوزین قارداشی حَسن یِرینه

نیه عَروسینی نُو کَد خدا سالوب گُوزدَن
باجیم قَرا گِیونوب نیلی پیرهَن یِرینه

رقیّه عَهد اِیلیوبدی عَمُو سُو اِیستمه سُون
یُولون دوشندَه اُونون پَرچَمی دوشَن یِرینه

اِیلَه مَلَر حَرم آهولَری گِئجه گُوندوز
خَرابه شام مُبَدّل اُولوب خُتن یِرینه

بی بی مُون آغلاسان اَحوالینه اگر باخسان
نَحیف پِیکرینون قَمچی لَر دَگن یِرینه

اَدیب او دور اُولا آزاد #حافظی یا قُول
نه قَدر بُلسه اُوزین قُویمیه بُلن یِرینه

اُوزی اُوزین بَگَنَن شاعِری بَگنمَز خَلق
سُوزی سُوز اولماسا قویمازلا سُوز دِین یِرینه

التماس دعای فرج


#شادروان_حافظی_تبریزی

#مجموعه_کانالهای_ادبیات_آئینی_عاشورایی