R M:
#سهیلی

#عبدالله_بن_الحسن_ع


یخیلدی چون یره آتدان شهید راه الاه
اوجالدی گوگلره یردن صدای یا الله

ویروب ظهوره اوزعشقین اوعشق قربانی
ایدوبدی سلسله ی عشقی عشقیدن آگاه

گهی دونردی صاقا کثرت حرارتدن
ویرردی یاره سی زحمت، صولا دونردی گاه

یارالاریندان آخوب چشمه تک قزل قانی
اوخون پاکیله نقش اولدی یرده بسم الله

بدن یارالی هوا ایسیسی اوزی خسته
او ایسّی قوملارین اوسته چکردی دلدن آه

دیردی وار گورسن بیرنفر ولا اهلی
اولا بوبیکس و بی یار وبی پناهه پناه

ویره منه بیر ایچیم سو که لبلریم یاندی
ساراتدی پیکریمی سوزش عطش چون کاه

گوروب که یوخ سسینه سس ویرن اوحالتده
یوزون دوتوب گویه عرض ایتدی اول الهی گواه

پیمبر اوغلونا یوخ بیر نفر کومکلیق ایدن
که اُلدورور منی لب تشنه فرقه ی گمراه

سنون یولوندا رضا ویرمیشم قضایه بوگون
اوزومدن ال گوتوروب اولموشام فنا فی ا...

ویروب او وقتده سعد اوغلی لشگره فرمان
حسینون امری اوزون چکدی ایلیون کوتاه

یریندن اوینادی آتلو پیاده هریاندان
گلوب تلاطمه دریاکیمی اوچولدت سپاه

قویوبلا اوستونه رخ خصم دون پیل افکن
قالوبدی ششدر حیرتده مات شاهنشاه

قلج چکن اوخ آتان داش ویران عصا گوتورن
قاریشدی بیر بیرینه شیره ال تاپوب روباه

ویردیلر که ویرون_اُلدورون_توکون قانین
گرگ بو قانیله زینت تاپا بومیدانگاه

ایشیتدیلر بوسوزی خیمه لرده عورتلر
فغان و شیونیله دولدی خیمه و خرگاه

اولوب او وقتیده بو هایهوییدن آگاه
امام حسن بالاسی شاهزاده عبدالله

دوروب ایاقه یریندن ایتیردی اوز اوزونی
طلوع ایدوب افق خیمه دن اودم چون ماه

عمودیه دیه یوز قویدی قتلگاهه طرف

گوزونده قانلی یاشی دلده ناله ی جانکاه

کسوب قباقینی اول دمده عمّه سی زینب
او طفله ایستدی مانع اولا او علیا جاه

ایاقلارین یره ویردی توکوب گوزوندن یاش
اوزونی زینب الیندن قوتاردی باشلادی راه

مشرّف اولدی حضور امامه سرعتیله
کمال حسرتیله اول شهه ایدردی نگاه

گوروب کمین الیوب ابهر ابن کعب دنی
بودور خیالی ییخا دین ایوین او بخت سیاه

دیدی شل اولسون الون ای خبیثه نون اوغلی
عمومی اولدوروسن یوخدی بو عمومده گناه

ویروب اوخیردا الین هولدن قلج دمینه
قلنجی چون او زنازاده اندیروب ناگاه

قلم اولوب قولی عباس عموسینون قولی تک
تمام عالم او طفلین گوزونده اولدی تباه

نه چکموسن دیدی بولدوم عمو بو حالیمدن
دوشنده قوللارین ای خسرو ملک درگاه

اوزونی سالدی حسینون یارالی سینه سینه
یتیشدی عین مرامه اله گلوب دلخواه

دیردی دور عموجان سمت خیمه گاهه گیداخ
تیکوبدی گوز یولووا بانوان عصمت جاه

گوزتلوری یولووی خیمه ده بیبیم زینب
بیبیمی قویما قالا منتظر سنی الله

ویریبلا حلقینه بیر اوخ او طفل معصومین
علی اصغر شهزادیه اولوب همراه

نفس کسیلدی سسی باتدی گوزلری آخدی
بویوردی اشهد ان لا اله الّا الله

(سهیلی) ایلمه غم مفلس محافلسن
الینده واردی حسین آدی تک آغیر تنخواه.

التماس دعا

مرحوم میرزا احمد سهیلی(ره)

#سهیلی

#عبدالله_بن_حسن_ع

#زبانحال_حضرت_لیلا_بر_سره_نعش_حضرت_علی_اکبر_علیهما_سلام

تایپ و ویرایش کربلایی حسین کریم زاده


علی پیکانِ عشقون دلدَه از بس دل نشین اولدی
آنان لیلا دونوب مجنون صفت صحرا نشین اولدی

سنون عشقین دَه هر رنگه خُمِ غم دَه بویاندیم من
یتوب هر گونه غم سن دَن قبول ایلوب دایاندیم من
سرا پا شمع تک نارِ غمِ عشقین له یاندیم من
اَنیسم اشکِ حسرت مونس آهِ آتشین اولدی

اشیدمشدیم اوُغول اوُلسه آنانون هیچ یوزی گُلمز
گِیدر نوری گُوزیندَن هر قدَر باخسا گُوزی گُورمز
اوُزوم گُوردوم اوُزوم بُولدوم جوانی اُلمین بُلمز
منه بو مَطلبین عینی بو گُون عین الیقین اولدی

نه گُوزدَه نور نه دیزدَه توان و طاقتیم واردی
دوروب گِتماقلقا نه شامِ شُومه قوّتیم واردی
و نه اگلشماقا بر آن یانوندا فرصتیم واردی
آنان لیلا اِیشی بوندان صُورا چوخ چوخ چَتین اولدی

نه یاخشی یاتموسان یات بالشون زلفِ سیاهون دور
بو قانیله بزنمش قتلگه طوی حجله گاهون دور
چراغان اِیلین بو بزمی بُلم، شمعِ آهون دور
بله داماد اوُغول عالم دَه هانسی مَه جَبین اولدی

اولوب دور قانیله رنگین عَجب زلفِ پریشانون
دوشوب آغ یوزدَه خوش بو قاره زلفون قرمزی قانون
اوُلا وای حالینه بوندان صُورا بی چاره لیلانون
ایدَن مَجنون لیلانی بو زلفِ چین به چین اولدی

من آخر خاطرِ محزونیمی سنله اِیدردیم شاد
دلون قربانیم دلّلن دانش بردَه منی قیل یاد
ننوعی توکمیوم قان یاش عُذاره چَکمیوم فریاد
اِیویم یختی یخلدی پایمالِ اهلِ کین اولدی

اگر گِیت سن #سهیلی آیری گُلزاره زیانون دور
اوُزون بر بلبلِ شُوریدَه دفتر گلستانون دور
علی اکبر آدی هر لحظه چون وِده زبانون دور
او دور دلدَن دله دوشدی کلامون دلنشین اولدی

التماس دعای فرج


#شادروان_شهید_سربدار_سهیلی

#مجموعه_کانالهای_ادبیات_آئینی_عاشورایی