كلبي جبتة

ملا مصطفى المالكي
علي رضا المحمداوي
ميرزا كرار الجناحي

عزاء هدم قبور ائمة البقيع
لواء صاحب الزمان عجل الله فرجه

اللهم عجل لوليك الفرج
١٤٤٦ هـ

اجيتك والكلب شاجر
شخله بزينب العاشر
بين الخوه يبن امي
كلي شدخل الحافر

ما متعوده خويه اطلع
وحدي وماكو اخو وياي
اعثر بالجثث وانهض
وادور خويه شربة ماي

يجدمي رايح جاي .. ادورلك عن ماي
اشربنك
بخطوتي مو بحجار .. كمت اعثر بخوان
واريدنك
تغير شكلك حيل .. ولا خلتني الخيل
اشوفنك

يابن امي
____
المن ضلتي بخيمه
وانت ساكن الهيمه
راح اكطع ادروب الچول
واجرع مرهن وضيمه

صعدت التل امل عندي
اشوفك من اصعدنه
شفتك بس حجه كلبي
هذا حسين ما جنه

يبعد الروح والعين .. اشو مو انته حسين
شصاير بيك
الدرب كضيته انعاك .. وادور آثار ممشاك
اثر رجليك
يمن ما تدري شصار .. كلت خيماتي النار
عكب ايديك

يابن امي
____
شوف الهيمه بس شاهد
بكل صفحه تصد شارد
سكينه لازمه رقيه
وليغاد الجمر صاعد

الجمر غطه الخيم خويه
ومحد كالي شتردين
ركضت وتدري يبن امي
الركض مو لام عمر خمسين

تعبنه وماضل شوف .. جثث ومسابك خوف
على جروحي
خيم واطفال وحسين .. احيرن امشي الوين
كبر نوحي
يمن عندك أطفال .. ينايم فوك ارمال
خذت روحي

____
اللام اشكثر بيه
ومحتركات ايديه
وامن التعب متغيره
زينب ذيج مو هيه

الجنت اتغار لو تطلع
طلعت هسه يبن امي
اجيتك وارد اكلك خاف
باجر ينوخذ اسمي

اذا جابو هزلات .. نصبح مسبيات
يبعد اختك
بلا والي واخيام .. نطب ديوان الشام
يبعد اختك
يتدري الماله اخوان .. يطب اعله الديوان
يبعد اختك

يابن امي
____
باجر مو حجي وينكال
باجر بيدي خويه احبال
واتكفل ضعن هاشم
وضعن هاشم نسه واطفال

كضت كل الزلم خويه
بس ابنك وهمه جبير
يحير بضيمه يبن امي
لو بينه يخويه يحير

العليل وضيمه شلون .. تشاهد عمته عيون
مشه بحبله
واموتن فوك النوك .. اذا طبينه السوك
الف عله
تضل تتنادس ناس .. اجت اخت العباس
على الهزله

يابن امي

علي رضا المحمداوي

واويلي على المسموم
___
من ضيمه وتعب كلبه
ما وجد بعد دربه
كل ليله عزه ينصبه
عاللي امن الشرب محروم
____
احترك داره وكعد ينحب
وذب اعمامته وحدب
تذكر عمته زينب
من ركضت بنص الحوم
___
الضلم وياهم ليا حد
الصادق كلبه ما يبرد
من داره مشه مكيد
تذكر حيدر المضلوم
____
ما ينفك ابد ضيمه
تذكر ركضة الهيمه
من خيمه لعد خيمه
زينب والجمر ملموم
____
الروح بنار محتاره
ابيته وبالكلب ناره
الكدامه احترك داره
هم يلفي اعله عينه النوم؟
____
مات وسبل ايدينه
بس فجئة فتح عينه
وصرخ ويلي على سكينه
يعمه اتخيلج كل يوم
___
يعماتي انكسر ضهري
عجيبه وما خلص عمري
وأنه سامع نهب خدري
من هذا الحجي مالوم
____
بعد لا ما تجل ونتي
احترك كلبي بركض عمتي
وبس حسين سالفتي
الضل عاري بلايه هدوم
_
اتخيل ركض فاطم
تركض للولد نايم
وتنادي هنا يهل هاشم
اوليدي اعله الترب مدموم
____
الدهر ما ينصف ويانه
الكل ترتاح اله انه
جي عماتي عطشانه
ووليهن ماله طاكه يكوم


علي رضا المحمداوي

تنعه المشتاكه .. وليل الهجر غيم
يبن امي وحالي.. بس الله بي اعلم
منا حبلي وناس.. وفراك العباس
كلها علي تلتم

بخرابه انام
ونتحسر على الخيام
والله بهالوضع حرام
بخرابه انام

واجاني ليل
وبالدمعه سهر طويل
وللشام بدمعتي اشيل
شيضل دليل؟

تدري زينب من دون اهلها
عالهزيله تعاشر حبلها
امن الهضم يتغير شكلها
وبالخرابه يصبح نزِلها
____
صد ليه وشاهد .. الشام اشعمل بيه
دخلني بسوكه .. وسماني مسبيه
اتمايل وانحب .. وشضل بزينب
ما جني علويه

اريده ماي
عطشانه واريده ماي
وشو محد طلع وراي
يكض كفاي

السبي يريد
اخواني تمدلي ايد
وانه بلا اخو وعضيد
واشوفه عيد

الليله اذا ما تلفي وتجيني
والله اموتن واغمضها عيني
حته اجيك وتلزم يميني
واشكي الك وتهود ونيني
____
شمتانيني اكثر.. من اللي مر مدري
فوك الهزله انعه.. اه ياوكت خدري
فراكك مو كدري .. وكرهني بعمري
وطلعني يا ذخري

يكون اموت
يبن امي يكون اموت
ولا كلك طلعلي صوت
يكون اموت

على النياك
وكلب الحره بيها ضاك
جي عاذل ضعنها ساك
على النياك

حته طفلك بالهضمه شايب
طفل وينه ووين الخرايب
والمصيبه العبرت مصايب
اندفن يم كاع النواصب
_
ابجيلك مدري.. ابجي على حالي
التهضمني ضعني.. من الاهل خالي.
الصاير لا ما صار.. يعز عليه احتار
وابقه بلا والي

يعز علي
يسبوني وحبل بدي
ووينباع حسين اعله ري
يعز علي

علي كلام
واسمعته وجنه سهام
كالوها مالج عمام
جنهن سهام

بالخرابه ماتت رقيه
عشت لوعه وغربه واذيه
مالي احد ويداعي بيه
بلا عشيره بنت الزجيه

علي رضا المحمداوي

هيه هاي..💔

بالشام ولهلها تناطر العين
يبن امي هضم ياكل بروحي
مسيت العافيه يبن امي يحسين
وأنه وسط الخرابه عالي نوحي

الحنين يمسي ويصبح
بوجه خوانه وحنانه
كلها وياها هاي تصير
اه يحسين اله انه

اعوفك وامشي وين
ضعت عكبك حسين
____
اكعد بالغروب ودمعتي غروب
اغبش عالهزل وامسي بخرابه
شيصير بعيونه الفكد محبوب
وأنه العفت الوطن نام بترابه

اسولف ويه عيني هواي
هم يلفي عليج النوم
انتي الشفتي اخوج حسين
نايم ما عليه هدوم

السهر يبقالي دين
ضعت عكبك حسين
____
تنام اطفالك وانده بالعيون
ابجن ياعيوني تسوه اخوتي
ولوما كوه اطلع وانتو تدرون
والله بالخيم جا صار موتي

لو ما كوه ما اطلع
بس كالولي اخيج طاح
هاي الطلعتني اركض
كالو وكع بسمج صاح

ويدير الاخته عين
ضعت عكبك حسين
____
اعيش ايام صعبه وهاي الايام
تريد اخوان تفزعلي وتجيني
هذا مسكني مو مثل الخيام
مثل خيامكم متشوف عيني

مثل امداره خواني
مايرجع بعد كلشي
من كربله عطشانات
ووصلنه الشام نفس الشي

يهد حيلي الونين
ضعت عكبك حسين
____
عشت بس اشفت من هاي السنين
بس ضيم وهضيمه وغربه والهم
كلشي بي مصيبه شافته العين
واخرهن حبيبي منكع بدم

الشاركني حليب امي
عفته بلا غطه وثياب
الباب الدفع ام حسين
فتح بالشام مية باب

اخذ روحي الحنين
ضعت عكبك حسين
____
تعبت وكمت اكتبلك مكاتيب
سنه ونص ومكاتيبي نفسها
تره زينب هضمها يودي ويجيب
وهالساعه يخوي انكطع حسها

سنه ونص وانه متندمه
جي ماني متت يمه
عشت كل العمر غربه
واموت بغربه يا هضمه

هضم كل السنين
ضعت عكبك حسين

علي رضا المحمداوي

بُعدك حرب .. اقوه واشد من كل حرب
يابو الكلب .. اسرني الك يابو الكلب
خاف انشطب .. من السجل خاف انشطب

ياللي تدري بالبيه
ارزقني للجرح نيه
اسمع بنهب رحلك
وما انوحك اشبيه

هاي .. تسوه حياتي الدمعه الاصبها
هاي .. فدوه الك روحي وكل تعبها
هاي .. بنيران اخيامك روحي ذبها

___
من ابتعد .. وياخذني يحسين البعد
عينك اصد .. وارجع لمن عينك اصد
لا ما ارد .. للي تركته ما ارد

بضهري كلشي جافيته
وكلبي بس الك نيته
اعطش العذب دمعي
وعذبي حبك الكيته

وين .. متريد اخذني راضي بقسمتي
وين .. الكه اللي يسوه نوحي ودمعتي
ووين ... لو ما الك المن يكضي وكتي
___
ضهري انكسر .. من الذنب ضهري انكسر
ومن البشر .. شفت العجب من البشر
كلبي انحدر .. لعينك اجه كلبي انحدر

اكسرني كسرة الخاطر
ياللي ما الك ناصر
اسمع بسبي وهزله
بله روحي شتناطر

كون .. وياريت اموتن وانه بعزائك
كون .. تعمه عيوني الطف كربلائك
كون .. يسلبوني ثوبي السلبة ردائك
___
ضامي الشرب .. ورازقني بيت وعايله
فوك الترب .. الساترني ماصح فيّ اله
ليش ابجي حب .. وانت اعله رمضة كربله

ليش اون على روحي
وضامي باقي مذبوحي
ما ادك على صدري
اله تطهر اجروحي

جيت .. جية رياحي امدنكله هامي
جيت .. كتله حبيبي وكلي خيامي
جيت .. منهوبه خيمه ابلايه محامي

علي رضا المحمداوي

خويه .. ماعندك البارد كلبها
زينب .. مو خوش ذبه الوكت ذبها

رديت بتراب الشام
ماعندي اخو لا كو خيام
الماعدهه اهل وين تنام.. حسين
حك خوتك كلبي انطاك
امن الناكه اطيحن فوكاك
رادوني امشي وانساك.. حسين

بس ما نسيتك .. خويه وحك خوتنه
افتحلي كبرك .. محلفتك بعشرتنه

يالميت بطلعتي .. فوكك تهل دمعتي
____
جينه .. وحادينه كتله استعجللنه
لني .. مشتاكه حيل الفي اهلنه

طول طريقي اعله النوك
ومنهوبه من كثر الشوك
هالحاله ما النه تلوك.. حسين
متعوده من الفي تكوم
مالايك اعليك النوم
امن الفركه متجرعه اسموم.. حسين

حنيت يحسين .. ليامك انته اهوايه
اويه الوعد وياك.. وكل البنات ويايه

ويحسيني ناري بيه .. بس ما جبت رقيه
_
خويه .. احجيلك مضيجات حالي
خويه.. فركاك اشد من ضب حبالي

تذكرت كل لحضه اهناه
من طاح اخوي اعله الواه
ونايم اخيي اعله اكفاه.. حسين
معميه عيني بجفاك
يدلوني ماريد وياك
من ريحة الخوه الكاك .. حسين

مستحيه كلش .. جي ما دفنتك بيدي
وين الكه كلي.. مثلك بعد يعضيدي

ماجيتك اعله حيره.. من لمتك حصيره
____
شلونك .. سولفلي لا تهتم اليه
زينب .. انه تره مو خارجيه

ياريت كلبي مدفون
ولا تنضر اختك لعيون
مذبوحه ياريت ام عون.. حسين
والمفترض يالمذبوح
فوكاك ماتبقه الروح
تطلع واجيلك بالنوح.. حسين

المفروض ميتين .. كل احنه بس مانمشي
عنك نسافر .. ووياك يرحل كلشي

كضنهه هالعلاوي .. فوك الكبر نعاوي

علي رضا المحمداوي