#عذر_أقبح_من_ذنب

إبليس عصى أمر الله برفضه السجود لآدم ..
وآدم عصى ربه بأكله من الشجرة
وكانت عاقبة "إبليس" هي الطرد من رحمة الله ومن جنته إلى يوم الدين ..
لكن آدم كانت عاقبته أن غفر له ربه وتاب عليه

تعرف إيه السبب اللي عمل الفرق ده ؟!🤔

👈الفرق إن ابليس لما سأله الله عن عدم سجوده لآدم ..
قال الله تعالى : "قَالَ مَا مَنَعَكَ أَلا تَسْجُدَ إِذْ أَمَرْتُكَ" ..
وكان رد إبليس "قَالَ أَنَا خَيْرٌ مِنْهُ خَلَقْتَنِي مِنْ نَارٍ وَخَلَقْتَهُ مِنْ طِينٍ "
فكان عقابه "قَالَ فَاخْرُجْ مِنْهَا فَإِنَّكَ رَجِيمٌ * وَإِنَّ عَلَيْكَ لَعْنَتِي إِلَىٰ يَوْمِ الدِّينِ"

- سبب لعنه وطرده هو الإباء والإستكبار ..
وإصراره على المعصيه وتبريره لموقفه ووجهة نظره الفاسدة المبنية على الجهل وحظ نفسه والحسد ..

👈أما آدم لما سأله ربه عن سبب أكله من الشجرة ..
قال الله تعالى "وَنَادَاهُمَا رَبُّهُمَا أَلَمْ أَنْهَكُمَا عَن تِلْكُمَا الشَّجَرَةِ " ..
كان رد آدم وزوجه " قَالَا رَبَّنَا ظَلَمْنَا أَنفُسَنَا وَإِن لَّمْ تَغْفِرْ لَنَا وَتَرْحَمْنَا لَنَكُونَنَّ مِنَ الْخَاسِرِينَ " ..
وكانت النتيجة "فَتَابَ عَلَيْهِ إِنَّهُ هُوَ التَّوَّابُ الرَّحِيمُ"

- سبب توبة ربه عليه ومغفرة ذنبه ..
هو انكسار قلبه أمام عظمة الله وإقراره بذنبه وندمه عليه وطلبه للعفو والرحمة ..

كونك تعمل ذنب .. ده حاجة
وإنك تبررخ وتصر عليه .. ده حاجة تانية !

↩️ يعني اللي بتلبس ضيق وتتبرج .. وتقول أنا حرة !
- واللي بتكلم شباب أو على علاقه محرمة .. وتبرر إنه عادي وكل البنات كده
- واللي بيتفرج ع الأفلام الإباحية وبيعاكس البنات .. وشايف إنه من حقه لأنه راجل !
- واللي بيسمع أغاني .. واللي بتنمص حاجبها .. واللي بياكل الربا
- واللي بيبرر صحوبية الولد والبنت ويقولوا أصل في شيوخ بتقول حلال !
مع انهم متأكدين إنه حرام ..
لازم يراجعوا نفسهم ويعيدوا تفكيرهم 🙄

↩️اللي بيقول على كل ذنب [ عديها أصله صغيرة مش من الكبائر]
قال ابن مسعود رضي الله عنه:
"إياكم ومحقرات الذنوب فإنهن يجتمعن على الرجل حتى يهلكنه"
قال الفضيل بن عياض:
"بقدر ما يصغر الذنب عندك يعظم عند الله، وبقدر ما يعظم عندك يصغر عند الله "

- واللي بيقول [ ياعم ربنا غفور رحيم ]
أيوة ربنا غفور رحيم ..
وعشان تغشانا رحمته وننال مغفرته ..
لابد من انكسار واستغفار وندم
نعترف بالذنب ونقول "رب اغفر وارحم"
نطلب التوبة من الله ليتوب علينا ..
ومننساش أبدًا إن "عذر أقبح من ذنب"🙃

#رسايل

س/ هو لازم وانا بغتسل من الحيض أغسل شعري ؟
يعني لو كاوية شعري أو عاملاه بروتين والمفروض مايجيلوش مياه ..ينفع أمسح عليه بس ؟
********
ج/لا ..ماينفعش
لازم في غسل الحيض تغسلي شعرك كويس اوي وتتأكدي من وصول المياه لفروة الراس عشان الغسل يبقى صح
ولو غسل جنابة بتغسلي بردو بس مش لازم تفكي الضفيرة لو عامله ضفاير يعني
لكن المسح زي مابنعمل في الوضوء كده ماينفعش خالص وهيترتب عليه ان الغسل غلط والصلاة غلط فخدي بالك
وتقدري تستعملي أي حمام كريم أو حاجة ترطب شعرك لو خايفة إن شعرك يتبهدل بسبب غسله
بس المهم ماتأجليش الغسل ولا تعمليه غلط

#سؤال_وجواب
#رسايل

الكف
الخرزة الزرقاء
خمسة وخميسة
.........مالهم ؟؟!!
كل دي حاجات شركية ياجماعة
_ماينفعش تلبسي حاجه فيها خرزة زرقاء عشان تبعد عنك الحسد ❌
_ماينفعش تعلق الكف أو خمسة وخميسة في محلك ولا في عربيتك عشان تحميك من العين ❌
ماينفعش ياجماعة لحديث النبيﷺ((من تعلَّقَ تميمةً فقد أشرك.))

✋طيب أنا لابسها أو معلقها زينة بس ومش بقول أنها بتحمي من الحسد ولا حاجة ..
_برضو حرام وماينفعش ❌..
ماينفعش تلبس او تعلق حاجه فيها شرك وتقول مش قصدي ....لأنك كدة بتنشر اعتقاد شركي

✋ طب أنا بستعمل الخرزة الزرقاء عشان اللون الازرق بيدي طاقة ايجابية بس ..مش عشان الحسد
_ماهو الطاقة الايجابية دي مصدرها ايه...هل النبيﷺ قال عليها ..دي حاجات غيبية مانعرفهاش غير بوحي
مافيش حاجه اسمها ده بيجيب طاقة سلبية وبيعمل غم في البيت
وده بيجيب طاقة ايجابية وبيعمل فرح في البيت
الكلام ده مش حقيقي ومالوش اي اصل علمي .
ماتستهونوش بالحاجات دي ياجماعة
ماتقولوش مش هدخل النار عشان لابسه خرزة زرقاء ❌
طالما الدين نهانا عن حاجة نقول سمعنا واطعنا ومانفاصلش ونقول دي معصية صغيرة ودي معصية كبيرة✅

#رسايل

س/ ايه حكم زيارة قبر البدوي والدسوقي وأي حاجة زيهم؟؟
*
ج/ مهم جدا التفرقة بين زيارة القبور العادية للاتعاظ بالموت
وبين زيارة القبور أو الاضرحة اللي بتكون معمولة للأولياء

زيارة الأضرحة زي البدوي والدسوقي والحسين والسيدة زينب وغيرهم بيكون
لاعتقاد ان ليهم نفع أو ضر ودي مصيبة
اللي بيروح ويدعي يابدوي اشف ابني
أو يدبح عن الدسوقي عشان أي حاجه
ده كده شرك أكبر لإنه دعا حد غير ربنا

واللي بيروح هناك يدعي ربنا ويطلع صدقات
وفاكر إن الدعاء هناك هيتقبل اكتر بس هو بيدعي ربنا
فده اعتقاد بركة في حاجه ربنا ماقالش عليها وده شرك أصغر
يعني ممكن يكون سبب يوصل لدعاءهم اللي هو شرك اكبر

والشرك ده مصيبة كبيرة على فكرة ربنا قالنا عنها
"إِنَّهُ مَن يُشْرِكْ بِاللَّهِ فَقَدْ حَرَّمَ اللَّهُ عَلَيْهِ الْجَنَّةَ وَمَأْوَاهُ النَّارُ ۖ"
فاوعى تروح الأماكن دي أو تدبح عندها أو تدعي
أوعى تفتكر إن ليهم بركة هم أموات مايقدروش ينفعوا نفسهم عشان ينفعوك
والكلام ده شامل أي قبور لأي حد حتى الحسين والسيدة زينب وغيرهم
🚫خدها قاعدة
زيارة أي حد ميت في المقابر مش في الأضرحة اللي في المساجد ويكون للاتعاظ بالمووووت وبس
لكن مافيش حد ليه بركة بعد ما مات

#س_و_ج
#رسايل

حتى لو وقعت في الزنا.. لسه برضه فرصة التوبة قائمة..

بطل القصة إسمه ماعز.. تقدر تقول عنه إنه بشر عادي مكنش واو ولا أحسن حد..
شهوته غلبته ووقع في فاحشة الزنا..
أه والله زنا..!!
وعلى عكس المتوقع إن نهايته هتكون وحشة وربنا هيعاقبه أو هيفضحه .. لكنه لحق نفسه قبل حافة الهاوية وقلب الموازين..!
البطل قرر يتوب.. ❤
إقباله على التوبة كان غير طبيعي ..
لدرجة إنه رايح يعترف أمام الرسول ﷺ
والرسول ﷺ يحاول يراجعه ويثنيه عن اعترافه ..
لكن البطل كان مصمم إنه يقطع صفحة الزنا من حياته تمامًا.. بأن يُقام عليه الحد عشان يتطهر من الذنب..
وقال عنه رسول الله ﷺ : "لقَدْ تَابَ تَوْبَةً لو قُسِمَتْ بيْنَ أُمَّةٍ لَوَسِعَتْهُمْ"

- انت بقى مش قادر تمسح رقم البنت وتعملها بلوك وتقطع علاقتك بيها؟!
مش مطلوب منك تفضح نفسك ولا تقيم على نفسك الحد..
كل المطلوب توبة تعترف فيها بذنبك بينك وبين ربنا وتندم عليه.. توبة بدون مبررات..
توبة تخلصك من نفايات العلاقة المحرمة .. الصور .. الأرقام .. الشات.. الذكريات .. والهدايا..
اللهم توبة كتوبة ماعز..

#الحب_وسنينه
#رسايل