ማይክሮ ተነሊንግ፦ የአዲስ አበባ የዘመነ መሰረተ ልማት ግንባታ

አንድ ከተማ ዘመናዊ ስትሆን የሚታዩት ከፍተኛ ህንፃዎች፣ ሰፊ መንገዶችና ዲጂታል አገልግሎቶች ብቻ አይደሉም፤ ከመሬት በታች የሚሰሩ ነገር ግን ለእይታ ግልፅ ያልሆኑ የውሃና ፍሳሽ እና የኤሌክትሪክ መሰረተ ልማቶች የዘመናዊ ከተማ መሠረት ናቸው።

በአዲስ አበባ ከመሬት በላይ ከተገነቡት መሰረተ ልማቶች እኩል ከመሬት በታችም ተገንብተዋል።

ንፁህና ጤናማ አካባቢ፣ የተሻለ የፍሳሽ አገልግሎት፣ የተቀነሰ የትራፊክ መዘጋትና የተሻለ የከተማ ኑሮ ሲገነባ በመሬት ላይ የሚታየው ውጤት ከመሬት በታች በሚሰራው ቴክኖሎጂ ይጀምራል።

አዲስ አበባ ወደ ስማርትና ዘመናዊ ከተማ በምትሸጋገርበት ጉዞ ላይ ማይክሮ ተነሊንግ ከሰው ሕይወት እስከ ከተማዋ የወደፊት ልማት የሚዘልቅ የቴክኖሎጂ አቅም ነው።

ዛሬ አዲስ አበባ በሕዝብ ቁጥርና በከተማ እድገት እየሰፋች በመሆኗ ከተማዋን ንፁህ፣ ጤናማና ለነዋሪዎቿ ምቹ ለማድረግ የፍሳሽ መሠረተ ልማት ማስፋፋት ወሳኝ ሆኗል። በዚህ ሂደት ማይክሮ ተነሊንግ ቴክኖሎጂ ከሰው ሕይወት ጋር በቀጥታ የሚገናኝ ዘመናዊ መፍትሔ እየሆነ ይገኛል።

የዚህ ቴክኖሎጂ ትልቁ ጥቅም የከተማዋን ዕለታዊ እንቅስቃሴ ሳይቋርጥ አስፈላጊውን የፍሳሽ መስመር ከመሬት በታች ማስቀመጥ መቻሉ ነው። በቀድሞ አሠራር የፍሳሽ መስመር ትልቅ መንገድ ለማሻገር ወይም ሌላ መሠረተ ልማት ለማቋረጥ መንገድ መቆፈር/መቁረጥ/ የተለመደ ነበር። መንገድ ሲቆረጥ ደግሞ የትራፊክ መጨናነቅ፣ የንግድ ሥራ መስተጓጎልና የነዋሪዎች ጊዜ መባከን ይፈጠራል።

ማይክሮ ተነሊንግ ይህንን ውስብስብ ችግር የሚፈታ በከተማዋ ላይ ትልቅ ቁፋሮ ሳይደርግ ሥራውን ከመሬት በታች በመፈጸም የነዋሪውን ጊዜ፣ የንግድ እንቅስቃሴና የከተማዋን ትራፊክ ፍሰት እንዲሳለጥ የሚያደርግ ነው ።

ይህንን ዘመናዊ አሠራር በመጠቀም የአዲስ አበባ ውሃና ፍሳሽ ባለስልጣን አሁን በከተማዋ ውስብስብ የሆኑ የፍሳሽ መስመር ዝርጋታ ሥራዎችን እያከናወነ ይገኛል። ከእነዚህ ሥራዎች መካከል የባቡር ሀዲድን ማቋረጥ የሚጠይቁ ከባድ የፍሳሽ መስመር ዝርጋታዎችም ይገኙበታል።
የማይክሮ ተነሊንግ ስራ በከተማዋ እየተሰራ ያለው የምስራቅ ተፋሰስ ፍሳሽ መሰረተ ልማት አካል የሆነው በመገናኛ ደራርቱ ህንጻ ወረድ ብሎ ያለው የ55 ሜትር ርዝመት ያለው የባቡር ሀዲድ እና የአስፓልት መንገድ እንዲሁም ከሲኤም ሲ ቤቶች ወደ አለምዓቀፍ ኮንቬሽን ሴንተር የሚያሻግረው የ92 ሜትር ርዝመት ያለው ውስጥ ለውስጥ በመቦርቦር 600 ሚሊ ሜትር ዲያሜትር ስፋት ያለው የፍሳሽ መስመር ዝርጋታ ስራ ተጀምሮ በመጠናቀቅ ላይ ነው ፡፡

ይህ በከተማዋ የሚታየው ቴክኖሎጂን በመሠረተ ልማት ሥራ ላይ የማዋል አቅም ከፍ እያለ መምጣቱን የሚያሳይ ሲሆን፣ አዲስ አበባም የነገዋን ከተማ በቴክኖሎጂ እየገነባች መሆኗን ያረጋግጣል።

ለረዳን ፈጣሪ አምላክ ታላቅ ክብርና ምስጋና ይሁንለት!

አዲስ ታሪክ፣ አዲስ ምእራፍ፣ በአዲስ የመከባበር፣ የመመካከርና የመደማመጥ የመግባባት ታሪክ የተደረገ ሽግግር!!

"ከአሸናፊ-ተሸናፊ” ትርክት በመላቀቅ፣ በሀሳብ ልዕልና ወደ በጋራ የማሸነፍ፣ ለጋራ ተጠቃሚነት ሲባል የጋራ መፍትሄ ለማምጣት በጠረጴዛ ዙሪያ ቁጭ ብሎ ወደ መግባባት የተሸጋገርንበት ታላቅ የታሪክ እጥፋት ነው፡፡ በዚህ የምክክር ሂደት የተለየ አሸናፊና ተሸናፊ ፈጽሞ አልተፈጠረም፤ ይልቁንም ኢትዮጵያ አሸንፋለች!

እንዲመከሩባቸው ከቀረቡት 400 ከሚጠጉ አበይት ጉዳዮች (ምክረ ሀሳቦች) ኢትዮጵያውያን ተደማምጠውና አንዱ የሌላውን ህመም ተረድተው ወደ አንድ በመሰብሰብ በ99 % ላይ ሙሉ ሙሉ ስምምነት ላይ መድረስ ተችሏል። አንድ አይነት ድምዳሜ ላይ ባልተደረሰባቸው በአራት 4 (1%) ጉዳዮች ላይ ብቻ በአማራጭ መፍትሄዎች እንዲታለፉ በሙሉ መግባባት ላይ ተደርሷል። ይህም ሂደቱን እስካሁን በዓለም ላይ ከሰማናቸው የምክክር ሂደቶች እጅጉን በምሳሌነት የሚጠቀስና አስደናቂ አድርጎታል።

ያለፉት ትውልዶች በጽኑ ተመኝተውት ያላዩትን ይህንን የሰለጠነ አብሮነት የሰፈነበት ታሪካዊ የምክክር መድረክ በዓይናችን እንድናይ ስለፈቀደልን ቸሩ አምላካችንን ከልብ እናመሰግናለን። የእኛም ትውልድ ይህን ስላሳካን በእውነትም እጅግ የታደልን ትውልዶች ነን።

ለዚህ ሀገራዊ ድል መሳካት ከየአካባቢው የመጡ ውድ ኢትዮጵያውያን ያሳዩት አስደናቂ በሳልነት እና ጥልቅ አስተዋይነት እጅግ የሚመሰገን ነው።

ሀገር የምትገነባውና ኢትዮጵያ የምትጸናው በትክክልም በዚህ የሰለጠነ መንገድ ነው! በመተሳሰብ፣ በአብሮነት፣ አንዱ የሌላውን ሀሳብ ለማዳመጥና ለመቀበል ፈቃደኛ በመሆን፣ እንዲሁም በመከባበር የምንገነባት ኢትዮጵያ የሁላችንም ኩራት ናት። ይህ አስደናቂ የመደማመጥ አዲስ ባህል እና የጋራ ታሪካችን በመሆኑ ላሳኩት ሁሉ ክብር ይገባቸዋል።

በርግጥ ዛሬ ተመካክረን በእነዚህ ጉዳዮች ተግባብተናል ማለት ነገ ምንም አይነት ልዩነቶች አያጋጥሙንም ማለት አይደለም። ነገር ግን ልዩነትን በመመካከርና በሰለጠነ መንገድ መፍታት ተጀምሯል፤ በሩም ተከፍቷል፤ ከእንግዲህ ወደ ኋላ አንመለስም። ከእንግዲህ ልጆቻችን ልዩነቶቻቸውን በጠመንጃ ለመፍታት በመሞከር እና እርስ በእርስ በመገዳደል አይቀጥሉም። ይህ የጦርነት እዳ ወደ እነሱ እንደማይተላለፍ እምነት አለን።

ፈጣሪ ኢትዮጵያን እና ህዝቦቿን ይባርክ!

ከንቲባ አዳነች አቤቤ