يحسين انت اول بشر..تكبر شما تتوذر
عطشان ومروي الخدم...خيمتنه يابوالاكبر

حبيبي حُسين


عايش على الله ومجلسك ارزقني احضر فدوه
هي الحياة ابلا لطم چذبه وابد ماتسوه
ايگلولي ما كافي البچي مادرو لجلي اشسوه
امعطش رقيه الخاطري وتعثر لان تتچوه


يلغالي ومرخص الزلم..الماعنده مثلك يخسر
عطشان ومروي الخدم...خيمتنه يابوالاكبر
___
يالراسك امعلي الرمح مو رمح رافع راسك
بس بيك قررت انشغل متأثر ابعباسك
شد حيلي يالحيلك گضه يالمافهمنه احساسك
الحافر انطيته من الصدر امراد لمن داسك

امعلگ اصورك بالگلب..تكبر شما انا اكبر
عطشان ومروي الخدم. خيمتنه يابوالاكبر
___
امنسيني حتى من هلي من كثر مادللني
سويني الك فّي بالشمس تعبان؟ چا تعبني
عشگ الخلك مابيه ربح..بس عشگك ايكبرني
يحسين حيرت العقل. مذبوح ومـعيشني

الماي من گلبك جره ...چا غير امك كوثر
عطشان ومروي الخدم...خيمتنه يابوالاكبر
___
صغيرون بس حلمي كبر امنيتي اشوفك مرتاح
شما اريد ارسمك مبتسم تخرب الصوره بذباح
متعوب حتى ابنومتك راسك بقه فوك إرماح
المن نضم احنه البچي يستاهل احسين اصياح

دين الله عالخنصر وگف..انطيته خيمه ومنحر
عطشان ومروي الخدم..خيمتنه يابوالاكبر
___
بگد ماشبع جسمك سحك منطيني خير ونعمه
اتضيعني دنيانه بفعل ويردني درب الخدمه
لا بالعشيره ولا أهل انت التسوي الزلمه
احرگني محترگه الخيم الحزنك انطيني الهمّه

عادي اعيش ابلا اهو بس انت لا ما أكدر
عطشان ومروي الخدم خيمتنه يا بوالاكبر

خادم ام البنين: عباس علاوي البهادلي

حبيبي حُسين

الدنيا من مجلسك تبدي
وتنتهي يـم الضـريـح

https://youtu.be/4A2cWe_JW6E


اداء: |سجاد الكعبي|
كلمات:|عباس علاوي البهادلي|

#برنامج_الليالي_الفاطمية....❤️🙏

دفعها دفعها.. بكل حيله ويعصر كوه
ضلعها ضلعها.. بيه بسمار وتتلوه

زينب اتريدچ حضن
امگابله الباب وتون ....دفعها

_

حيدر ابكبره انهدم ..بضلعچ وگلبي الالم .... باب بيتي كله دم .. نزف ضلعج

فاطمه التفهم علي .. بيها اشوفن كل هلي .. نعمه مادامت الي .. غاب طولچ

بعدچ بيه كلشي ايعيل
الهوه والباب والبسمار

ابنص بيتي ويدفعونچ
طحتي وضل علي محتار

بچيتچ بيچتچ .. دمعه وچف ساند حيدر
اجيتچ اجيتچ .. القالع خيبر يتعثر

شلون انساها ال_ و أن
امگابله الباب وتون .. بچيتچ

___

چانت اتنشف البچن ..الغربتي ديرة وطن ..ما اسميها ام حسن .. ام المحنه

بكلمه چتنفني النبي .. احچايه بس چنها السبي .. ام بيتي شايفها اجنبي ... يا ألمنه

كل جرة نفس ضلعچ
يصعد يخنگ الريه

ملامح وجهج ايگولن
هاي اخر مسيه

عجيبه عجيبه ..چفنچ حضرته بأيدي
مصيبه مصيبه .. وياچ ادفن راح اوليدي

كلشي صايرلي سجن
امگابله الباب وتون

__

ابالي موتچ من خطر .. اتعلمت كضت الظهر .. احس شيعني القدر ..راح كلشي

بعدچ ابعز الشباب .. اشجاب فاطم عالتراب .. وجهي غطّاه النگاب .. گوه امشي

اليتم من هسه رافگني
ودمعتي عاشت بخدي

يالمنسيتني موت اهلي
غيرچ فاطمه اشعندي

عشيره عشيره .. مو بس فاطم فاگدها
چبيره چبيره .. فاركت الماكو بگدها

اندفع بابي بلا أذن
امگابله الباب وتون


_

من الگبر ذابل اجيت ...ابضلمه يالزهره انوليت .. شفت زينب وانحنيت..اتريد امها

ادگلي امنه ماتجي ..مات بلساني الحچي ..گابلتها وبس بچي .. ياهضمها

تگلي بويه تدريني
اغفى من اشمنها

ابحضنها چانت اتلمنه
هسه اتراب حاضنها

اشبديه اشبديه..يم فراشچ من تنحب
عليه عليه .. كلشي ولا دمعة زينب

اتفارگن جفن وجفن
امگابلة الباب وتون

__

ردته هالواقع حلم .. ادموعي ثگلن والجدم ..الحسن بهدومچ يشم .. تحيرر

حسين ايده اعالخصر .. اتخيلت فوگه الشمر ..ضلعه مثلچ ينكسر .. ايتطشر

اتبدو عالگبر دمعات
ولدچ يمه حاجينه

شلت الحسن بس زينب
تگلي بوبه خلينيه

ولدنه ولدنه .. ايرافگهم سم وحافر
بعدنه بعدنه .. محد وي زينب باچر

حزن ملجوم بحزن
مگابله الباب وتون


عباس علاوي البهادلي

محترگ بيتي ودفنت ام بيتي
مو الزهره فارگت عافيتي

البگه بعمرك لحد يحاچيني
شيعتها وراح اشيع اسنيني

__
الدافن الزهره يضل ابلايا حيل
بعينه مايطلع صبح يگضيها ليل
الحاط بيه كل امنياتك من يموت
اهنانه عينك للدمع تفتح سبيل

انا قالع خيبر ويلچمني باب
ابو اتراب وفاطمة جوه التراب

الحزن ملح وازاد بينه وبيني
شيعتها وراح اشيع اسنيني
__

ياوطن ضليت من بعدچ غريب
المرض شدحيله لان مات الطبيب
وجهي جان يغار من عنده الخظار
وهسه موسم حزن بيه وزرع شيب


انا حتى احلامي متغطيه ابدمع
الزهره لو ردت اصيرلها ضلع

لمن راحت كلشي مات ابعيني
شيعتها وراح اشيع اسنيني

____
انا اول مره أحسّن مو علي
چنت بالزهره اشوفن كل هلي
لامُحمد لا الزهره وين اروح
والمدينه مگبره صارت الي

حرت بين ال ها تجي وها ماتجي
علي ضل يافاطمه ابعازة علي

سعفه وبكيفه الهوا ايمشيني
شيعتها وراح اشيع اسنيني

__

اخ اخ الليل يگضي من يمر
من اشوف الباب كلي انعصر
انا مجبور اعلى ضلتي بهالحياة
عيشت ابخور ويخلونه ابگبر

راح وكت الخير ذاك ام الحسن
اضلوعي حنيت منجل اعليچ انحنن

ألزهره التضحكني واتبچيني
شيعتها وراح اشيع اسنيني
____

اهلال صرت وچنت من اتمشى سيف
بيّه كسرة خاطر ايداويها طيف
عشت وي وادم ولاترهم وياي
مثل چلمة لا هلا ابنص المضيف

عيدهم لو مر عليّ موسم حزن
ناس فرحانه على كلمة وأن

اجدامي بس الگبرچ اتوديني
شيعتها وراح اشيع اسنيني

عباس علاوي البهادلي

#ثكيل_لصاحب_الزمان
#_مصطفى_صادق_اللامي

حبك وادي وانه بغير وادي
يمته غيبتك تنفي رقادي

يمته اثبت على حالة وياك
مو ساعه ابجي وساعه وانساك

يا صاحب الزمان..يا صاحب الزمان
.................................................................
شمعه اعلشباج الامل سهرانلك تدري
وريح الخطيئة غيرتّ نار الهوه بصدري
ساعه اشتعل ساعه انطفي امعلعل خلص عمري
ومن الذنب اقبح وامر يا سيدي عُذري

ورغم ذنبي احبك..حبيبي يمهدي
ودرب جاي ادور..لرضاتك يودي
اريد الگه نورك..ودمعتي اعلخدي

ياخذني الوكت بس من اذكرك
بمشاعر صادقه ابجي وادورك

من‌ كل گلبي امن ابدي انعاك
مو ساعه ابجي وساعه انساك
...................................................................
بعز ذنبي تعرض مستحه وابدي ابجي واتعذر
لون البياض امن الذنب بنص روحي ضل يصغر
جا وين اكعدك سيدي ومس گلبي ريح الشر
مضطر و ادور نضرتك يا سامع المضطر

أنه ابلا خدمتك..يمس روحي كل ضر
واخاف امن اذكرك..اغربنك اكثر
لان بس سوادي..بقه بگلبي يكبر

ويغربّك كل سواد ذنوب ادري
الحگ يابوصالح نجّي أمري

گلبي ابيض رجعّه بذكراك
مو ساعه ابجي وساعه انساك
.............................................................................
ليلية اللومن بالگلب يا مهدي و اتلوه
بمروتك يا سيدي وانتو اهل المروة
من شب على شيء وكبر طبعه يضل هوه
وما ريد اشبن مبتعد عن طاعتك فدوة

سفن گلبي غرگت..وبياضك نجاته
اليشيب لمصابك..مشيبه شحلاته
شعضمها التجيله..اعلگبره بمماته

اموت وتحيى الاموات بطلعتك
واضل بگبري ما حصل نصرتك

رايد مولاي اتلگاك
مو ساعه ابجي وساعه انساك
...........................................................................
صح گلت احبنك گبل بس مستحي وصابر
امنيتي احبك تنحجي وانه  بگلب طاهر
مولاي ثبّت خدمتي لا انحسب عابّر
وبدل برودي وحيرتي  بحرورة العاشر

الى يمته احيرن..بذنب مو مصايب
شوكت حيرتي تضل..غربتك يغايب
بعطاشه المخيم..بمنام الخرايب

انه الما يوم سائل روحي مولاي
امامج هم عطش هم شارب الماي

وين الله يعاشرني اضماك
مو ساعه ابجي وساعه انساك
...........................................................................
بسم العٍطش يم النهر والطاحت جفوفه
ادخيل اطب برحمتك جر گلبي من خوفه
يا مهدي ما سامع گبل بدخيلك تعوفه
وبسم الرضا اطلب رضا وحب عامره جروفه

اخذ گلبي بيتك..واخذني اعلنوحي
اريد بندبتك..تخليلي روحي
وجسر بيني بينك..دمعتي وجروحي

مد اوتاد حزنك بيه مولاي
وجرني لوادي حبك امنيه هاي

ويثبت حالي ابجي لمبجاك
مو ساعه ابجي وساعه انساك

ثگيل |صاحب العصر والزمان|

المهدي ألنه يمر
أمنيـة هالـعمر

وي البقيّه...نگعد سويه

أمنية هالعمر

__

هو المضيع امامه مثل المضيع الهوا
الدنيا ماتفرق ابعمره ميت وعايش سوه
علتي ماشايف المهدي وانا منتظره دوه

اليمته بالنُدبه لقائي دليني بيك واجيك
عجّل اللهم بلكت لحظه الزمها أديك

أنطيني منك خبر
ضلمه وأنت الگمر

تنظر عليه...نگعد سويه
أمنية هالعمر
_
تحظر بكل المجالس والمصيبه ما اعرفك
محد اليمسح دمعتك عالحزن محد يصبرك
مامقدمين الك كلشي وانته قدمت النه عمرك

كلمة شلونك بسيطه وننسه نحچيها الك
عندي تقصير ابدعائي حتى من اتوسلك

تسوه كل الاهل
أنته النه أمل

تلزم اديه...نكعد سويه
أمنية هالعمر
___
امن انسأل وينه أمامك روحي ياكلها الخجل
انا وي الاهل عايش وهوه ماضل عنده أهل
شاب بعده وظهره محني وشيبه باللحيه انشتل

ڤي عباتك رحمة الله المامنها يحصل ابد
كلشي من گلبي نزعته واسمك الوحده گعد

گلبي علّگ وشم
المهدي بس المهم

هجرك أذيه...نگعد سويه
أمنية هالعمر
___

شايل الحنًيه كلها المهدي مومالت هجر
حتى لو عوچيتي بيدي الك راح ابقه انتظر
فدوه دليني ابضياعك وياك اريد أگضي العمر

تايهه اللاگيله غيرك يابقية الله الوحيده
الماتصير أنته أمنياته هذا ياخير اليريده


لفضة اسمك هلا
ياعـطـر كربــلا

العافك خطيه...نگعد سويه
أمنية هالعمر
____
الموت اذا ياخذني عنك الگبري أمنيتي تجي
نگعد ونذكر رقيه وعالسبي نشبع بچي
ضلعك ايلچمك ابحافر لو بحايط تنتچي

وابدي اداويلك جِروحك حدما يطيب الجرح
ضلمه كل الدنيا احسها أنت بس وحدك صبح

بُعدك قضيه...نگعد سويه
أمنية هالعمر


خادم أم البنين:
عباس علاوي البهادلي

لطلب اللحن: @A_AM0

#_يا_أم_البنين

يااعباس...ياعباس

شدحيلك وشد الوفه وارفعلي راس حسينك
شيل الارض فوگ السمه لوصاح باچر وينك
لتخلي بس سيفك يطگ طيّح القاده ابعينك

ياچلمة الحگ والبخت
منك زلمهم صوفرت
ماكو مدى الوقت الحرب
لمن تطب يعني انتهت

أنت يمعلم الزلم عالمرجله
يمه منك رايده هل مسأله
كربلا تطبگها اريد بكربلا

__

ريشاتك اتوگف الهوا لو رفرفن وي العلم
حزمتك براية علي كلمن وكف ضدك عدم
ضهظب وشبعهم ركض من الشريعه للخيم

سيفك تتعبه ابيمنتك
فوگ الجثث دك رايتك
بيك افتخر لو صيحوا
ام البنين الجابتك

انت سبع الكنطره وسبع الارض
الخوف منك والصلاه نفس الفرض
كلها تسكت من تهد بس (النبض)

__

يالعزبتلك بالوفه عزبلي روس وعسكر
ياحيل ابوك وهيبته يالطولك ايغطي النهر
من الجندي حد اكبر شخص راس برجل خل تعثر

اگطع نسلهم من تهد
دخن وخلي الطف يشد
مو خالي ترجع للخيم
ابروس قادتم ترد

الميمنه والميسره حط الرعب
يمه من اعيونهم ضيع الدرب
كلها سهله بالحرب وانت الصعب

__

اتمرجل ولاتركب مهر واختار بس اليسوه
بيك اعرف من اتطب حرب الا بمعسكر تروه
استعرض اكبال الخيم وتصيح زينب تگوه

الكل تنحني وانت الجبل
بعيونك اشمحله الزعل
دگهم مثل دگ اكهوه
يمه ابجثثهم سوي تل


مثل حيدر خلي صيدك للثگال
يبني هز الدنيا باشباه الرجال
ابمهدگ وگلبك يرف اعلى النزال
___

شما تستطف جيوش العده تنحل اذا اسمك يمر
السبعين الف لوشافتك يمكن يضل منهم (صفر)
فرّع ولبسهم شيل واعلن على الطف الحظر


صنفك ولا مثله صنف
من رجلك الطف ينخسف
ياجامع الحب والحرب
انت القوي وانت الترف


كلشي بارد يمه بس راسك الحار
هواي أبني الگمر مو مال اختصار
بس خَيالك بيهم ايبين انكسار


خادم ام البنين ع

عباس علاوي البهادلي

ألبسو السواد وأعلنوا الحداد

فأنها أم العباس عليه السلام 💔