قصائد الملا مسلم الوائلي كتابة:
📜 القصيدة: ياهو يشيع زينب
🎤 أداء: مسلم الوائلي
🖋 كلمات: حسن الترابي
~~~~
هلي موتي وگف علباب إلي ومامش
أخو من اخواني يوگفلي ولا طارش
جا ياهو يشيع زينب...محد ينعاها وينحب
هلي يهلي
~~~~
يهلي العمر عده فراگ والطف لهسه آثاره
زينبكم تريد تموت وتريد اخو ومحتاره
يحفر لحدهه بيمناه ويدفن وياها أسراره
تريد الگبر گد الشوگ بگد الگمر والشاره

والتصلي عليه كون أحبابي
حته يحله النوم إلي ويترابي
ينهاب الميت بهله...وكل الوادم توگفله
هلي يهلي
~~~~
موت الغريب بموتين ينعد إذا بالغربه
والمثلي كل يوم تموت ولا يمي أهل لا گربه
يا كربله شبعد الشام عن زود اخوي وحبه
شعطل عليه العباس بس لا سهم بالجربه

بعينه احط عيني گبل لا فارگه
والرماد بجفني يحجي شحارگه
جم مكتوب الزفيته...للمو گد من تانيته
هلي يهلي
~~~~
غصن العمر لاحه الموت وكل ذكرياتي التمن
وذكرت في حسين من جنت انام ويضخن
جانت ليالينه هواي كلهن عشگ لو صلن
گمره وربيع من الشوگ بسم الگمر يتسمن

جان يحرسنه الگمر كل ليله
غالي عباس بغلات الشيله
ويضحك حته يضويلي...وعينه تسد وحشة ليلي
هلي يهلي
~~~~
مهيوبه جنت ويه خوان عن گلبي شالوا همي
حرورة حجيهم وياي تشبه حرورة دمي
لو يمي سولف عباس انسه اعله سالفته إسمي
تعبني عاشور هواي وما خله واحد يمي

غربوني وراحوا ويسرارهم
همه ناموا والتهيت بنارهم
راحوا مني بعصريه...وردت زينب مسبيه
هلي يهلي
~~~~
يعينج علي يخت حسين بين الموت بلونج
وامنيتج اعله التابوت كون اهلج يشيعونج
كلهم غفوا حدر الگاع بس ما غفوا بضنونج
كل ضنج يرد عباس هوه اليغمض عيونج

حته لو رد كافلج بسنينج
منيله جفوف ويغمض عينج
يم عون امحيهه اضنونج...وبجفوفج غمضي عيونج
هلي يهلي
°°°°°°°°°°°°°°°°°°°°°°°°°°°°°°°°°°°°°°
على فراش المنيه وما نخيته
يريت يشوفني العباس ميته
مانختك وريدك...تدفني اعله إيدك .
°°°°°°°°°°°°°°°°°°°°°°°°°°°°°°°°°°°°°°

📜 القصيدة: دللول
🎤 أداء: مسلم الوائلي
🖋 كلمات: حيدر الوائلي
~
دللول .. نامي يزينب نامي
دللول .. يخت الغريب الضامي

كلما تفزين اصيح اسم الله
باجر تره تلولينها العبد الله
نامي يزينب نامي 
نامي يزينب نامي
~~
يالعزيزه الغاليه بالبواجي ابديلج
بالمهد يبنيتي انعم الوليلج
منكتب بعيونج عاشر يهد حيلج
من هلج يا زينب كلشي ميخليلج

واليشلع بدلال الحسين
من الخدر لمن تطلعين

تركضين .. من الزغر متعوبه
تركضين .. قصة حزن مكتوبه

يا قصتج مكتوب بيها الفرگه
وي اخوتج ما حصليتي الملگه
تنعاج كل ايامي  
نامي يزينب نامي
~~
هسه نامي براحتج بعد مامش راحه
حيلج تخلصينه بس بجي ونياحه
وحدج يا زينب والوكت برماحه
شحال گلبج يمه من يجي ذباحه

آحا يگلبج شنهو صبره
مطبور نحره اثنعش طبره

تشوفين .. كل اخوتج مذبوحه
تشوفين .. حاير حسين بروحه

يا يمه وحسينج يريدج يمه
محد بقه هناك ينشف دمه
حسينج ذبيح ودامي
نامي يزينب نامي
~~~
راح تبدي احزانج مني تبدي اللوعه
وبابنه تشوفينه عليه تهوه جذوعه
ينكسر ضلع امج والحسين ضلوعه
من يسحگه الحافر صوتهن مسموعه

تشوفين اخيج كاض نحره
وتهوس الخيل اعله صدره

عله الگاع .. ساحگ بگلبه الحافر
عله الگاع .. دمه بقه متناثر

ليل اهدعش تمشين وتشوفينه
موزع وذر عالگاع وتلمينه
مشهد ذبح گدامج
نامي يزينب نامي
~~
باجر بنص ليلج لا اخو لا رايه
والعطش دلاله صعبه يحجي احجايه
لايذه بكتارج والأيتام هوايه
تبجي كلها وتنحب جدامها مجوايه

تلولين يمه الواحد اثنين
يبجون يمج بالثمانين

والأيتام .. كلها تون عطشانه
والأيتام .. من الركض تعبانه

كلهم يصيحون يعمه ادخيلج
وانتي بالدموع يخلص حيلج
تصيرين الهم حامي
نامي يزينب نامي
~
مغربية العاشر ارويحتج مخنوگه
ظال دم حسينج يابس اعله اعروگه
مذبحين اخوانج والخيم محروگه
والشمر يا يمه هزله جايب نوگه

والحيره يمه بصعدت النوگ
والأشد منها طبت السوگ

عله النوگ .. كلفه صعدتج كلفه
عله النوگ .. كفالج بلا جفه

اتصعدين وي دمعج يغرگ عيونج
وغاد اعله ديرة شامت ايودونج
وسهامج من اسهامي
نامي يزينب نامي
°°°°°°°°°°°°°°°°°°°°°°°°°°°

مشاهدة "دللول | الرادود مسلم الوائلي | موكب الصدرين والسيد قاسم شبر | واسط _ قضاء النعمانية 1444 هـ" على YouTube
https://youtu.be/k41SD3m6WFI

📜 القصيدة: هذا يا عيد
🎤 أداء: مسلم الوائلي
🖋 كلمات: علي الأكبر الغرابي
~~
رايح وكل ذكرياتك دورتها
وعيدج امبارك يزينب ما شفتها

هذا يا عيد اليمر
حته زينب تنتظر   
بويه .. بويه
~~~
رايح وخليتني بدمع الملامه
حته ما لحگت اگلك بالسلامه
بويه حيدر .. بويه حيدر

منين اجيب اليفتهم دمعي وكلامه
زغيره مو مال انحسب من اليتامه
بويه حيدر .. بويه حيدر

ما بين الوداع وبين حالي وكسرت الخاطر
الله وياك من اتروح والله وياي للعاشر
رايح يا علي وخليت زينب للدمع باجر
وهيه الكسره من اتشوف غالي وعنك مسافر

أذن أذان المصيبه وهذا حالي
ما يلوگ الزينب افراگك يغالي

ما يلوگلها الهجر
حته زينب تنتظر    
بويه .. بويه
~~~
گمت افز بليل مرعوبه وغلاتك
ونگعد ونتسامر انه وذكرياتك
دمعه .. دمعه

بويه من اشتاگ اشم ريحة عباتك
اركض المحرابك وسبحة صلاتك
دمعه .. دمعه

بويه من البواجي عليك شوف دموعي مفضوحه
وكلمن منذبح بالشوگ تطلع لجمته بروحه
اذكر من جنت وياي كل ايامي مملوحه
هسه وداعتك ظليت حته احلامي مذبوحه

بويه وعيونك بعد هاي المصيبه
باجر يسموني زينب يا غريبه

وبعد للطف اشكثر
حته زينب تنتظر     
بويه .. بويه
~
هذا يا عيد اليمر بالهاشميه
وانه لون افراگك امبين عليه
هذا حالي .. هذا حالي

بنار المتانه انجوي وشصار بيه
بوجه زينب كل سمار المغربيه
هذا حالي .. هذا حالي

شلت ايدي وصحتلك وين رايح يا اعز غالي
من عدها وعرفت الموت من الصوت رد خالي
يالعايفني موش ام عون كلشي اتغير بحالي
صار من الوداع وياك سهم الفرگه جتالي

رايح وخليت زينب للمدامع
وتنعصر كل مغربيه من المواجع

وشبقه بهذا العمر
حته زينب تنتظر     
بويه .. بويه
~~~
بويه لو بس مره وحده تردلي بيها
حته تسمع سالفت روحي وبجيها
من غيابك .. من غيابك

شوفتك يا حيدر بروحي اشتريها
حته لو بعيوني طيف اتمر عليها
من غيابك .. من غيابك

بويه افراگ وجهك كون ما مرن لياليه
عيد الله من اشوفك جاي مو هذا اليمر بيه
يمته الگاك يم العين طيف امسير عليه
وتمر عالخنگها الشوگ مرت هوه اعله الريه

يالعفتني وللهجر بانت علامه
روحي مكسوره مثل جنح الحمامه

وشيفيد التنكسر
حته زينب تنتظر     
بويه .. بويه
~~~
كون ميته بيوم طولك بان كسره
ولا شفت مصباح الاگشر طار فجره
البي عفتني .. البي عفتني

دورت بوجوه اخوتي نظره نظره
بس لگيت الليل ذابح شكو ذكره
البي عفتني .. البي عفتني

رايح والحسن وياك راح ومنخطف لونه
وذاك حسين بويه عليك عميه من البجي عيونه
بصفنت مغربيه عليك نسكت من ينشدونه
والدافن عزيز وراد لحد يسئل شلونه

انه ذيج العايشه وبان انكساري
خوفي اموت بدمعتي وشوگ انتظاري

يالرحت ما ظل صبر
حته زينب تنتظر     
بويه .. بويه
°°°°°°°°°°°°°°°°°°°°°°°°°°

📜 القصيدة: ثار البقيع
🎤 أداء: مسلم الوائلي
🖋 محمود الموسوي
~~~
           ثار البقيع .. ثار الحسن
~~
بأربعين حسين باجر عندي فكره وغايه
كون من تگضي الزياره انشيل نفس الرايه
ونكتب عليها البقيع وثار عدنه بهايه
توصل الأربع مراقد باجر المشايه

الحسن باجر ناره .. اترحب بخطاره
~
عدنه ثار وما نطالب كون ناخذ ثارنه
الگاع لأهل البيت لازم والبقيع اديارنه
والحسن شيخ المدينه وبالكرم يختارنه
موكب انحط بالبقيع انعزب ابخطارنه

حلوه العزوبيه .. تصير بحسينيه
~~~~
باجر اخبار البقيع تصير بيد الساده
لو طلع مهدينه تندگ للبقيع اوتاده
باجر الأضرحه تصعد والشمس نشاده
هذا گبر الحسن عالي لليريد امراده

باجر انعليها .. گبتك نبنيها
~~~~
باجر الخدمه جبيره والهله شمحلاها
المجلس بأربع مراقد والخدم تتباها 
يابو صالح والقصيدة بصوتك انته اقراها
يالثارات الحسين هناك رايه وياها

الثار باجر لو عله .. للبقيع وكربله
~~~
باجر انحط المواكب والبقيع انزوره
وتطلع المشايه كلمن بيده شايل صوره
بيها مرسوم الحسين وهيبة الله ونوره
وابو فاضل يمه واگف حته ياخذ دوره

بالبقيع ايطگ نهر .. ياخذ الثار الگمر
°°°°°°°°°°°°°°°°°°°°°°°°°°°°°

📜 القصيدة: شسولف يا علي
🎤 أداء: مسلم الوائلي
🖋 كلمات: وسام الشويلي
~
يا زينب اخبرج والجرح بيه
من هاليله احسبي حساب مسبيه
~
يا زينب دنيتج هيهات ما ترحم
كل يوم الجرح يكبر ويتلجم
يظل البيت خالي وموحش واظلم
عليج الفرح ما ينجاب طاريه
~
صحيح اخلاف ابوج وياج خوانج
الليله ام الخدر بالكوفه عنوانج
باجر تدخليها ويه عدوانج
واسمج راح تتغير معانيه
~~
ابوج وياج احجي من گبل كلشي
گليله اخذني وياك من تمشي
اريدن ويه نعشك يرتفع نعشي
لأن ادري العمر بالشام تاليه
~~
اذا گلج يزينب خوتج حراس
وعندج بالخدر متكفل العباس
گليله اذا طاح العمد بالراس
بعد هم انتظر من كافلي جيه
~~
شسولف يا علي والروح حساسه
يبقه حسين وحده اخلاف عباسه
صدگ بثنعش طبره ينگطع راسه
صدگ سوط النواصب ينطبع بيه
°°°°°°°°°°°°°°°°°°°°°°°°°°

📜 القصيدة: يلجمني الماي
🎤 أداء: مسلم الوائلي
🖋 كلمات: حسن الترابي
~
عايش بجروحك والخيل وياي
تحفر بضلوعي ويلجمني الماي

بالصادق محترگه اخيامك
وبگلبي العاشر وسهامك
والخيل وياي .. والخيل وياي
~~
ما بارحت نوحك عايش عله جروحك
گلبي انجوه بروحك وبنار الخيام
ليليه امد صدري للخيل اذا تدري
خل ينسحگ عمري عنك بالجدام

يوميه الذبح ينعاد وانه من الهظم گاضي
ما ميت سحگ وياك گلبي عليه ما راضي
كون الحوافر بالركض سحگتني مرتين
وانه اليطشرني السحگ وتعوف الحسين

گاضي من جروحه الما خلت حيل
يزحف لخيامه وترجعه الخيل

كلما شاف اخته ايغمض
ناس وخيل عليه تركض
وتريد افياي .. والخيل وياي
~~~
يا اول جروحي ولجماتك بروحي
يوجعني الك نوحي وشيطيب النوح
شيطيب الدمعه للمنكسر ضلعه
والحافر يوزعه فوگ الثره جروح

صوتك والنحر مگطوع وبخيامك سمعت اصياح
نص منك يريد يگوم ونص منك خذه الذباح
حز نحرك اگبال الخيم وطلعن خواتك
ركضن عله الله وعالنحر هنه وبناتك

عطلهن دربك عثراته هواي
من ركضن صوبك نيتهن ماي

وتبدن كلهن يمك
لمنك بس ظل دمك
يحسين هواي .. والخيل وياي
~~~
ذابل عطش گلبك وحته الهوه متعبك
عينك بجت ربك وكل الهظم لاح
تعاين عله ازغارك ونفضحت اسرارك
گت لله خطارك راسي اعله الارماح

صاحبت العطش والماي ما ظل داعي اله ومعنه
مروا بهلك اعله الماي بس محد شرب منه
جان العطش جازي الشرب كل اهلك وياك
لو تمطر الدنيه نهر ما تجبر اضماك

عطشت عيونك لله وصليت
گتله يحبونك بس اهل البيت

منه وبينه اليعطشلك
گتله بهاي شگلك
گلك معناي .. والخيل وياي
~~
انته الخذوا راسه وباگ الهوه انفاسه
وانه البجه احساسه حد ما عمه العين
يالعاندت ذبحك فوگ الرمح تضحك
ما زعلت رمحك دللته يحسين

گتله ارتاح اذا تعبان راسي الوحده يفتر
عندي اعزاز الي اعله النوگ يمهم بالي ما اگدر
اثلمني حد باب الحلم بس خلي العيون
شوگي اليفرني اعله الرمح مو بيدي لم عون

سن رمحك يجوي وحته الدم حار
ياكل من نحري كلما تندار

مايل وعيونك ذبلن
عذرين دموعك صبن
طيفك ما جاي .. والخيل وياي
~~
بيتي احترگ وانته خيامك طفن سكته
وذاك العصر شفته من صعدت النار
طاح السگف فوگي ونشفت ضمه عروگي
وابجي اعله معشوگي ما ابجي عالدار

ببنياتي شفت الخوف يركضن وانه بحجايه
ركضن وانه اصيحن حيل زينب ركضت هوايه
ما حشمت ردت احترگ وفزعت الي ناس
وذكرت ذاك المسه ماهوه عباس

وزينب وحدهه وهواي النار
حرگت بالعاشر من عدهه ازغار

دخان وصارت خنگه
اطفي وهيه المحترگه
ودور راي .. والخيل وياي
°°°°°°°°°°°°°°°°°°°°°°°°°°°°°

📜 القصيدة: مناظرة الولاية
🎤 أداء: مسلم الوائلي
🖋 كلمات: علي آل  بوحمد الموسوي
~~~
مره اجالي واحد ابتر دينه السقيفه
گلي مغالي وعندك حيدر مو بس خليفه

ما جاملته وعاملته بأدب
وبس جاوبته تعصب وانسحب
گلي مغالي .. گلي مغالي
~~~~
تعلمنه الصدگ زلمه غيور وگصته تعرگ
والمشرفنه بالخدمه امرنه بكلمة الحگ

صعب عالواضح ترد توضحه
علي الخيط الي يلم المسبحه
مشكله الما عنده وي ام بيته راي
ينطي رايه بحيدر بلا مستحه

هذا سؤاله يمثل نفسه ويكشفلي طبعه
الكله ضلاله وضيع شمسه شتفيده شمعه

البايع بخته ما يسوه العتب
وبس جاوبته تعصب وانسحب
گلي مغالي .. گلي مغالي
~
سؤاله الأول يگلي اكيد مصرح الله
اريد بآيه تثبتلي علي وتذكرلي فضله

گتله واجب اسمه نصاً ينذكر
انطيني آيه اربع ركع فرض الظهر
الآيه گالت يا بشر طيعوا الرسول
والرسول بحب علي انطانه أمر

الهادي كلامه ومن باب الحق اعرف مفاده
ياهو حسامه يوم الخندق وزنه عباده

لتقيس انته اتراب ويه الذهب
وبس جاوبته تعصب وانسحب
گلي مغالي .. گلي مغالي
~~~
صعد غيضه ورفض يهدأ يگلي شتحجي انته
يظل حيدر بشر يخطأ منو اليثبت عصمته

گتله نرجع للبخاري ونلگه حل
والحجي بكتبك يجنبنه الزعل
النص يگلك علي ويه الحق حيث دار
هنا عرفت المخطأ بحرب الجمل

والله مصيبه وتدري بگلبك يجرح سؤالي
دنيه غريبه احجي بكتبك وطلع مغالي

هنا حيرته وسمعته العجب
وبس جاوبته تعصب وانسحب
گلي مغالي .. گلي مغالي
~~~~
انسحب ما يقبل يكمل شتمني وگلت اعوفه
مثل ذاك الأذا تحمل عليه يلهث تشوفه

هنا گلت خل استفزه بكلشي مر
وانه احب من زغري انفخ عالجمر
گتله لو ما علي ولو ما ذو الفقار
الهسه جدك عنده رب من التمر

هيه نصيحه الرادك تكبر لا تنسه فضله
وكلمه صريحه اليبغض حيدر مو طاهر اصله

التفرغ سلته يطعن بالعنب
وبس جاوبته تعصب وانسحب
گلي مغالي .. گلي مغالي
~~
علي ويه النبي دخيله كهارون ويه موسه
من اگلك الله يوحيله اقترب وفهم دروسه

گلي جاوب حته اغير مذهبي
الوحي شجابه العلي يگول الناصبي
القاعده اتگول الوحي للأنبياء
وگتله النحله بقياسك هم نبي

مو عله مايك نص ودروسه ما حاج اوضحه
ها شنو رايك حته أم موسى الها الله اوحه

هنا فاضلته حب ومستحب
وبس جاوبته تعصب وانسحب
گلي مغالي .. گلي مغالي
°°°°°°°°°°°°°°°°°°°°°°°°°°°°°°°

مشاهدة "مناظرة الولاية :: ملا مسلم الوائلي :: موكب مصائب كربلاء" على YouTube
https://youtu.be/IfNW8DBbbMo

📜 القصيدة: يطارش بأهل يثرب
🖋 أداء: مسلم الوائلي وعلي الوائلي
~~~~
يطارش بأهل يثرب صيح وطلب منهم النخوه
جنازه الكم بأرض بغداد حيهم يهل المروه
~
يهاشم يا اسياد الگوم غديتوا اعله الوسيعه اضياع
يهاشم دمكم الطاهر ترس كل شبر من الگاع
يهاشم ليمت الموعود يرد كل صاع مية صاع

جم بيت العلي حرگوا
جم منحر شمس گطعوا
حته البالمهد ذبحوا
لابد رايته تنشال من جف الوفه النخوه
~~~~
هدوا الخيل خلها اتميل ردوا المالها رداد
واكتب عالسمه والگاع شيخ الگاع ما ينگاد
يهل يثرب هنايدكم خل تلمع بأرض بغداد

شدوا الثامكم والحيل
خل تردم الخيل بخيل
يشموس بظلام الليل
هاي الساعه ساعتكم الرايحلك شهم يسوه
~~
صوارمكم بحر للموت روج بروح يتلاطم
عجيبه بيوتكم لليوم بيها الضيم متراكم
شلون عيونكم تغفه وغريبه جنازة الكاظم

يهل الغيره شيلوها
فوگ الراس خلوها
عيون الدنيه فگسوها
نظرات الشماته نار بيها گلوب تجوه
~~~~
يهاشم شمس من عدكم بليل السجن محبوسه
موسى گطعوا جبده احضروله يهل موسه
احماميل اربعه يشيلون نعش الوفه وناموسه

ضاگ الما بشر ضاگه
تحز برگبته اطواگه
ترضه السلسله بساگه
ينهطر عالوجه لو راد من الشباج يتهوه
°°°°°°°°°°°°°°°°°°°°°°°°°°°°°°

📜 القصيدة: بعيوني مولاي
🎤 أداء: مسلم الوائلي
🖋 كلمات: ابو حميده الشويلي
~~~~
حبيبي حسين .. حبيبي حسين
~~
بعيوني مولاي لاحت دمعتي
منك ردت هاي ابقه بخدمتي

بس الثبات بخدمتك كون
هاي المهم والباقي يهون
ادري اليحبك لازم يعيش
بس بالجروح يصير مدفون

يگضيها حسرات
الحزن الغريبات
.. ما لحظه يرتاح

هيج اليحب كون
يبجيلك عيون
.. وانته اعله الارماح
~~~
خليني وياك ابجي المصابك
عفت الملذات رايد عذابك

هو التعب بالعشگ مريود
والما تعب بالخدمه مگرود
لنعاك مثل الفگدت اوحيد
شرط البواجي اتشگ الخدود

طف كربله يريد
دمعه ولطم وايد
.. مو بس حجي افعال

من باب الخيام
البوابة الشام
.. يعيش الحزن حال
~~~
الدمعه لحسين بس هيه واجب
واسجد عله اتراب باب المواكب

اباب المواكب اشمر الروح
حته اردلك وين ما اروح
ما دام جرحي استوطن اخيام
معناها اظل لحسين مجروح

عالداسته الخيل
صار اللطم حيل
.. للمحد وياه

من مهدي للموت
ما عندي بس صوت
.. اي وآ حسيناه
~~
كلي ندم جيت عاصي وندبك
كل الحجي يروح وتبقه ال أحبك

بس ال أحبك جايب وجاي
الغيرك  گلتها ونادم هواي
بس انته تستاهلها يحسين
تحرم الغيرك والله مولاي

كل العشگ صار
خيمه بحلگ نار
.. ما تطفه وتهيد

يالواگف جروح
وين المن تروح
.. وخيامك ابعيد
°°°°°°°°°°°°°°°°°°°°°°°°°°°

مشاهدة "بعيوني مولاي || مسلم الوائلي" على YouTube
https://youtu.be/7Ozz-E9DuSI

السلام عليكم
اطلبوا قصائد بالتعليقات وارد عليكم كلكم ❤