📜 القصيدة: اتگوم لو لا
🎤 أداء: مسلم الوائلي
🖋 كلمات: علي مالك الموسوي
~~~~
ها حسين بگلبي جلمه وراده
وحگ عينك خويه اجيتك شارده

اتگوم لو لا ...
فدوه بس جزي بناتي اتگوم لو لا
اتگوم لو لا ...
لامه الدنيه ابعباتي اتگوم لو لا

صح انته طايح وادري مهظوم
بس انه اجيت ولازم اتگوم
مثلوم گلبي وجبدي مثلوم
لا شفتك ولا شايفه النوم

اتگوم لو لا ...
شوف كضولي الثنيه اتگوم لو لا
اتگوم لو لا ...
خذوا من عندي رقيه اتگوم لو لا
~
خويه جا ينطيك گلبك غافي
عاد گللهم خطيه وكافي

ما عرفناه ...
حسين موش حسين روحي ما عرفناه
گلبيناه ...
ماكو شي ما ساحگينه گلبيناه

كون اگدر احجيلج عليه
وشگاعد يسوون بيه
شما اصير زين وهدوا الخيل
يسحگونهن ومجتفه اديه

ما لگيناه ...
شكثر دورنه اعله جسمك ما لگيناه
تعبيناه ...
وگاموا يصيحون كلهم تعبيناه
~~
صدگ صارت بعد ما نتلاگه
شوف زينب راكضه ومشتاگه

علي وياه ...
موش بس حسين ذبحوا علي وياه
طشريناه ...
زينب اتلم همه صاحوا طشريناه

كلشي البالك خويه سووه
حته مهد عبد الله حرگوه
كلما طفل يشتاگ لحسين
جابوله راسك خويه راووه

حضريناه ...
سوگ كامل للعلاوي حضريناه
غاد وهنا ...
هو نفس الضيم زينب غاد وهنا
~
حجي يتعب بس اريد احجيها
عمامتك شفت الدمه غاطيها

زينب احاه ...
ميت وصاح ابو فاضل زينب احاه
گتله ويلاه ...
وين عينك وين جفك گتله ويلاه

يابو العيون الواسعه هواي
جدامهم بس اوگف وياي
الما طالعات ابابهن شوف
نسوان هاشم كلها حفاي

عاتبيناه ...
تدري خويه انته النحبه عاتبيناه
موتي هنا ...
شلي بالشام انه اريدن موتي هنا
~
خويه وصلوا فتش عويناتك
لابدات بسدك ابنياتك

اتگوم لو لا ...
ادري تعبتك يجبدي اتگوم لو لا
اتگوم لو لا ...
لجن غيرك ياهو عندي اتگوم لو لا

مابيه اگون وداعت ام عون
بس وخري عنهم خل يسحگون

وآ حسيناه ...
رايحه وضليت اثغب وآ حسيناه
مات عفناه ...
عدل بس من گتله اروحن مات عفناه
°°°°°°°°°°°°°°°°°°°°°°°°°°°°°

📜 القصيدة: اصول الحب
🎤 أداء: مسلم الوائلي وعلي الوائلي
🖋 كلمات: براق الخاقاني
~~~
حبيبتي يا فاطمه
~
من بعد شوگي والسلام
سئلي عيني الما تنام
تالي اول من اسلم ما تگومين وتجين
ما نشف دمعي بغيابج يا عشگ كل السنين

يحنلج كلشي ظل بيه جرف ومفارگ نهر
اعله وجهج شامر النيه ملاك بهيئة بشر
جنه طيور وعيونج عله العش جانن گمر

صوفر بوجهي الدلال وخضر الهم والدمع
والورد مو للتراب ولا تطگه ويندفع
كلشي ميت بيه عگبج بس ضواج الما يموت
من كثر ما باجي لجلج بس أشر ماكو صوت
~~~~
تالي اول بيه هاي
امشي وتلفت وراي
الليل وحشه الدنيه وحشه كلشي اظلم من وراج
لا بواجي لا نعاوي بسكته من شيعوا ضواج

اميل منهد ما شلتج ومتني البنعشج هدل
حرام الما تهل عينه عله فاطم خير العمل
وانه ذبيت العمامه وعليج الون هل ثگل

ضلوعي والحدر الضلوع حنن ونن عليج
وكل حجي يمر ماله ذوق ذاني تستطعم حجيج
حته خاجيتي بغيابج ثگلت ابمتني وتطيح
بيه مدري اشسوه فگدج گمت اميل بلايه ريح
~~
بعيني كل الدنيه ليل
گوه اجيتج مالي حيل
مو هذاك الجان يمج كلشي بعيونه اختلف
راح اعوف انه المدينه وانطي وجهي اعله النجف

بعد المن اظل بيها الاحبهم كلهم مشوا
غالي مجلب بغالي ضوه ومن عيني طفوا
عليمن اشمر عيوني اذا وادم سيرو

بجاهج أرد ادعي إلهي وانتي سمعي شرد اگول
ربي لم بيتي ارد اروحن خوفي لا عمري يطول
هو هيج الحب اصوله كل محب يوفي الحبيب
اليبقه جرحه بلايه نيه محير الطب والطبيب
~
صافن وعيني تهل
لا انه ميت لا عدل
رحمي حالي يا دلالي وگومي خل نمشي ونرد
ومني هايه اخذيها جلمه لا باب احط ولا اسد

عفت دمعه اعله عتبتنه رسايل عش محترگ
وانه الما احطن بريتي عداج شما اختنگ
الوادم ما تعرف الله ولا تعرف للعشگ

گلبي صار وياج موته وهسه ينبض ذكريات
هنا ضحكنه هنا گعدنه هناكه دفعوا الامنيات
ما مشه الدم بوريدي اسمج البيه يدور
وانه شاتل روحي يمج عالگبر شتلت بخور
~~~~
هسه اضلن مدري اروح
زينب ابابج تنوح
وانه ادري تموت هيه شتحمل افراگج جفاي
وباجر ولا جاها باجر شتصير شيگضيها هاي

تظل ولا يظل احد ولا ام ولا ابو
المشت بخوانها التسعه تظل بعازة اخو
خل الحگ وارد الها لا يلفيها العدو

صح بردتي وما برد ثارج ويه المنتقم
الله ما رخصلي هايه إلا ما اخلي زلم
باجر ابنج بيده ثارج واحنه ندعليه الفرج
ربي عجل بالظهور خاتم اولاد الحجج
°°°°°°°°°°°°°°°°°°°°°°°°°°°°°°°°

📜 القصيدة: لگباله امه اتموت
🎤 أداء: مسلم الوائلي
🖋 كلمات: عباس طالب السعيدي
~~~~
لگباله امه اتموت ويده بديها
ليش الصبح تلگاه يدور عليها

تمشي الجنازه ويلحگها سكته
شيسوي معذور غير امه ميته
لگباله امه اتموت .. لگباله امه اتموت
~~
زاد بلا ملح مو فاهي مرات
بلايه الأم يصير الزاد فاهي
وكض زينب حزنها وگوه تنشاف
يمهم گاعده يگولون ماهي
لو ما زينب ازغر منها بهواي
جا محد يعرف الميته ياهي

من شافت التابوت اجه يشيل الزجيه
صاحت يالحسين شوكت امشي سبيه
نزلوا النعش وحباله خلوهن بديه

من شافت التابوت جابت حصيره
گلتله يله حسين شوف النه ديره

الفاگد عزيزه وما كف دمعته
شيسوي معذور غير امه ميته
لگباله امه اتموت .. لگباله امه اتموت
~
اليروح بلا وداع يروح مكسور
غريب يعيش كلما ناس يلگه
الهظم زينب وداع امها بالعيون
لأن كسر الضلع ما ينطي شبگه
محد غمض عيون ام الحسين
من گد ما مورمه وحيل زرگه

يتوادعن مثل المطر والغيمه گوه
وحدتهن تحاجي الگلب يا گلبي تگوه
مو سهله اليفارگ محب وگباله توه

مو كل حرگ يا ناس بالماي يطفه
حرگ الگلب سر بير محد يعرفه

العاش بضوه امه وطفوا شمعته
شيسوي معذور غير امه ميته
لگباله امه اتموت .. لگباله امه اتموت
~~~~
علي شال الجنازه وركضت ام عون
وطلع من ظهره عباس ولحگها
وراج اركاض ارجعي يگلها عباس
تگله التركض وميته امها حگها
يزينب وانه بالذر خايف عليج
وگول حسين هنياله شبگها

حيدر يگلها امج ضلع يلجمها ارجعي
گالتله وخر البي كسر ونطيها ضلعي
لو اگدر ارجع جا رجع لعيوني دمعي

خليني يا دفان يم امي وحدي
وحلفلك شما اخاف ما اگلها اگعدي

طايح بديها لو گلبي شفته
شيسوي معذور غير امه ميته
لگباله امه اتموت .. لگباله امه اتموت
~
تره كبروا سوه زينب والغروب
ومحد يدري ياهي المغربيه
بده يكبر حسين ويزغر الماي
لحد ما خضرت بالطف رقيه
المغرب صار ليل اهدعش يا ناس
وزينب صار اسمها الخارجيه

من دفعوا الباب ونزف محسن دلاله
عبد الله صاح من السمه انه ابداله
اليشبه علي بسمار اجه وخرب جماله

كلما يمر خطار عالباب يلگه
استأذن الزهراء يله تدگه

المحترگه روحه وكبرت جمرته
شيسوي معذور غير امه ميته
لگباله امه اتموت .. لگباله امه اتموت
~~~
متغيره منهد موت ام الحسين
والمگابلته گال امنين هايه
البياض البلعبايه مو للتراب
هذا الشيب طالع بالعبايه
تحركها المصايب وين ما جان
مثل زينب ولا متحركه رايه

من ماتت الزهره وصل زينب خبرها
گام اعله حيله الطف واجه يكسر ظهرها
دفعوا سماها وطاح من عدهه گمرها

كلما يمر الليل عالهاشميه
تعرض صور للخيل كلها اعوجيه

اتصيح العقيله ضلع الكسرته
شيسوي معذور غير امه ميته
لگباله امه اتموت .. لگباله امه اتموت
°°°°°°°°°°°°°°°°°°°°°°°°°°°°°°°°

📜 القصيدة: خل انشيع ام حسين
🎤أداء: مسلم الوائلي
🖋 كلمات: محمود الموسوي
~~~~
خل انشيع ام حسين يا ناس
ونشيل الجنازه انحطها عالراس
~~~
جابولج نعش وانتي اثمنطعش
عمرج يم حسن آه يالحنينه
مكسورة ضلع بابج يندفع
وعيونج طفن رحتي من ادينه

بالعيون مصابج يزهره يا غريبه
ولگينه اعله بابج اثر للمصيبه

حيدر وحده وتعبان ابو حسين
مو حيل المصيبه اتريد حيلين
~~~
تابوت العشگ حيدر مختنگ
ظهره المنكسر شال الزجيه
يمشي وما گدر خطوات وعثر
جا تالي العمر دفنج بديه

علي يصيح تره الباب كسر كل حياتي
مشه وطاح ابو اتراب مشت كل ذكرياتي

راحت من ادينه الزهره ويلاه
الله يعين حيدر محد وياه
~~
عيون ام الحسن يالساده انطفن
ما صاحت علي صبرت عالفجيعه
المحسن والضلع ما يكفي الدمع
حرمه وتنولي عالباب الوديعه

دوت نار عله الدار والآثار بديها
طفل راح والارماح تلاگن عليها

وين اهل اللطم وين اليشيعون
لتشييع الزجيه خل يحضرون
~~
زهره وما غفت عصروها وطفت
عالباب انجفت هيه وضواها
من حزن الحزن غربه وتندفن
مهظومه وتون كسروا گفاها

تروحين والحسين وراه خيل يزهره
تونين تصيحين انسحگ يا يمه صدره

ضلعج والجذع نيشان تدرين
باجر خيل تسحگ فوگ الحسين
~~~~
يا روحي وهلي تعبتي علي
افراگج مو سهل طول ام حسن راح
باجر كربله تسبي العايله
زينب عالهزل و ولدج عالرماح

مصابج وداعج بده وصار سبيه
اعله بابج والغياب خيم تدوي بيه

باجر زينب اعله الناگه يا ناس
باجر بالغرب لو طاح عباس
°°°°°°°°°°°°°°°°°°°°°°°°°°°°°°°

📜 القصيدة: لحگيلي يمه فاطمة
🎤 أداء: مسلم الوائلي
🖋 كلمات: ابو حميده الشويلي
~~~
ويلاه يا فاطمة .. ويلاه يا فاطمة
~~~
طفله وعمري خمس سنين
وشفت الزهره بين النار
منا امي جاي اتموت
ومنا غربه وين اندار

من شفت الحرگ عالباب
گلت باجر يشب صيوان
من داسوا حدود البيت
گلت باجر اطب ديوان

ويلاه .. بخامس سنيني اتعذبت
ويلاه .. اتطيح امي گدامي شفت
ويلاه .. واسمع شتم جدي الرسول

عالباب .. اتلث ميه اجوها بالحطب
عالباب .. لا غيره عدهم لا اكو رب
عالباب .. كسروا ضلع امي البتول

بخامس سنه وحيلي انهدم
شحال اذا توگع خيم
~~~
كل ليله امي گدامي
تتلوه وألمها يزيد
من تدعي بصلاة الليل
ما تگدر تشيل الأيد

امي وهاي حالتها
حگي من ابجي ما ألام
تون من لوعة البسمار
ما خلاها حته اتنام

مكسور .. خاطرها من كلمة وأن
مكسور .. ضلع امي والدنيه حزن
مكسور .. گلبي عليها وگمت اصيح

شيفيد .. وضلع امي ما اضنه يطيب
شيفيد .. وحيدر علي اگبالي غريب
شيفيد .. من يمشي كل خطوه يطيح

اسمع ابوي هنا حجه
يا فاطمه صاح وبجه
~~~
امي اگبالي اشوفنها
تغطي بجفها جي محروگ
معناها انه هم باجر
اضم جفوفي فوگ النوگ

بعدني بخامس سنيني
وشفت السطره فوگ العين
گلت يا روحي شيظل بيج
لو صار العمر خمسين

لو صار .. يا روحي خمسين العمر
لو صار .. جدمي يدوس اعله الجمر
لو صار .. بعاشور جا شيظل عليج

يا روح .. موتي قبل لا تنسبين
يا روح .. باجر تره ايطيح الحسين
يا روح .. ويلتف حبل فوگ اديج

بداري اهوم ولا فله
باجر اضيع بكربله
~~~
راحت امي من البيت
وصار اظلم نهار البيت
ابجي وادري ما ترجع
بس زغيره وگلت ياريت

اول ليله مرت خوف
بدون امي وثگيله هواي
بعد عندي حزن ودموع
والله يستر من الجاي

ظليت .. ادعي الله لو يطلع حلم
ظليت .. ترجعلي امي تبتسم
ظليت .. كل ليله ابجي وانهظم

يا باب .. بشرني لو امي اجت
يا باب .. گللها زينب ما غفت
يا باب .. شلون اكبر وما عندي ام

هذا العمر مابي طعم
المن يعيش الماله ام
~~~
ظليت اعله هذا الحال
ليليه ابجي ما ظل حيل
كبرت دمعتي وهظمي
وشفت ابن امي جوه الخيل

كبرت ودمعتي بعيني
وكبر بيه الهظم والنوح
الربيت وياه وعشت وياه
شفته بكربله مذبوح

مذبوح .. الجبت العمر وياه سوه
مذبوح .. من الگفه بطف نينوه
مذبوح .. بصف النهر ميت ضمه

ناديت .. يا فاطمه يمه اشبعد
ناديت .. لا ظل اخو ولا ظل ولد
ناديت .. لحگيلي يمه فاطمه

شوفي شعمل بينه الزمن
ضاعن بنات ام الحسن
°°°°°°°°°°°°°°°°°°°°°°°°°°°°°°

مشاهدة "لحكيلي يمه فاطمة ملا مسلم الوائلي حسينية وموكب الغدير _الليالي الفاطمية1444هـ" على YouTube
https://youtu.be/IYuOJlTZ58k

قصيده راس السنه مسلم الوائلي
استمعوا قبل نزولها
https://vm.tiktok.com/ZMF3FBUqE/

📜 القصيدة: دخيل ابو الحسن
🎤 أداء: مسلم الوائلي
🖋 كلمات: محمود الموسوي
~~~~
دخيل ابو الحسن ودخيل فقاره
~~~~
حيدر حيد حيدر ..
نار يصير من يزعلن عيونه
الشايل باب خيبر ..
دخيله والدرع ما كفه بمتونه
لو طب الغضنفر ..
يردم بالحرب لمن يلاگونه

حيدر من يهد بالسيف يا ناس
شيسوي بزلمها الأبنه عباس

ميدان الهواشم تشتعل ناره
دخيل ابو الحسن ودخيل فقاره
~~~~
دخيل الزهره لو هد ..
تحتار الزلم لو طب علي ليها
يسوي بروسهم حد ..
ورگاب المعارك يسحگ عليها
النار شلون تبرد ..
خيال بخزرته العركه يگضيها

حيدر من يطب تگضي الميادين
كلها اتصيح اشردوا طب ابو حسين

الجن يخاف من يشوف بتاره
دخيل ابو الحسن ودخيل فقاره
~
الحگ والطلابه الحگ ..
تطلب ثار وانته الثار راعيه
بيت الله العلي انشگ ..
واهل السمه يحجون بمحاجيه
گوه العاص لحگ ..
ذب هدومه لمن سمع طاريه

حيدر مو سهل طارينه ينجاب
للسبعه وصل من شمرته الباب

من بيت الله طالع يعني خطاره
دخيل ابو الحسن ودخيل فقاره
~
لو طب موت احمر ..
عزم الله بيمينه ورايه بشماله
صفوف الجيش تنطر ..
بالنص من يطگ يگسم الخياله
بالشدات يحضر ..
واليحضرله حيدر الف هنياله

حيدر شيخ فوگ السبعه والگاع
جي ذكره عباده انذكره كلساع

يحضر بالشدد للمالهم جاره
دخيل ابو الحسن ودخيل فقاره
~~~~
غيم غيض غيم ..
غيم اسود يطبها وترجف الحومه
لو غار المشيم ..
خيال الكلافه اتخوف علومه
عنده العيد مردم ..
واليشرد اگباله محد يلومه

عاده اليشرد من المعركه عار
مو عار الشرد من علي الكرار

سيفه بالحرب خلاها طشاره
دخيل ابو الحسن ودخيل فقاره
°°°°°°°°°°°°°°°°°°°°°°°°°°°°°°°°°

📜 القصيدة: يا ام الحسن
🎤 أداء: مسلم الوائلي
🖋 كلمات: المرحوم ملا عطيه الجمري
~
مظلومه يا زهراء
محرومه يا زهراء
~
يم الحسن بطلي الونين وجاوبيني
شوفي اولادج بالبواجي مذوبيني
گالت يحيدر فرقوا بينك وبيني
بوداعة الله مسافره عنك يبو حسين
~~~~
من هالمرض ما اشوف يا حيدر سلامه
تزوج عگب عيني يبو حسين بأمامه
بس هالله هالله عگب موتي بهاليتامه
سكن خواطرهم ونشف دمعة العين
~
وجمع اصحابك عگب موتي وجهزوني
وطلعوا الجنازه بليل خفيه ودفنوني
واللي اكسروا ضلعي وبالباب اعصروني
لا يحضرون اجنازتي يمشيد الدين
~~~
ما قصروا يالمرتضى رضوا ضلوعي
لليوم من ضرب الرجس ما سكن روعي
وبعدي عله المختار ما نشفت دموعي
طبلي ولطمني فوگ خدي ومحجر العين
~~~
خبري ابوج المصطفى بلي جره وصار
من كسر ضلعج والضرب والجزل والنار
خبريه عن حالي وخبري بهجمت الدار
وبلغي سلامي المصطفى خير النبيين
~~~
دخلوا عليها اثنين يبدون الندامه
والكل منهم يبتدي التوبه بكلامه
ينادون يا بنت المظلل بالغمامه
عنه اصفحي يعزيزة المختار ياسين
~
حولت للحايط وجهها كوكب النور
صاحت مخليتوا من التلويع والجور
هيهات ميطيب الگلب والضلع مكسور
هذا جرح صدري وهذي حمرت العين
°°°°°°°°°°°°°°°°°°°°°°°°°°°°°°°°

📜 القصيدة: العشگ مابي نهاية
🎤 أداء: مسلم الوائلي
🖋 كلمات: علي أكبر الغرابي
~~~
.. من گبرج للباب
.. شايل ديره اعتاب

من يوم الهاجرت عيونج
ما مر عيني الوسن
دورت وما صار اگبالي
غير عيونج وطن

شايل ديره اعتاب
شايل ديره اعتاب
~
العمر لحظه بغيابج
متت وگفه اعله بابج
عشت لوعة مصابج
فاطمة .. فاطمة

والتكتله المشاعر
يموت بجرحه باجر
اذكرج وبقى حاير
فاطمة .. فاطمة

طيف عيونج ما جافاني
حيدر دونج واحد ثاني
.. انه اول معشوگ
.. بنار الحب محروگ

وعيونج ما تسوه احلامي
الما بيها ام حسن
دورت وما صار اگبالي
غير عيونج وطن

شايل ديره اعتاب
شايل ديره اعتاب
~~~
بغيابج حالي جنه
حضن مابي محنه
عمر وشباقي منه
بالهجر .. بالهجر

بمواعيدي واتاني
بصده المامش خذاني
بسنه تمر الثواني
بالهجر .. بالهجر

حيدر بعدج مدري شلونه
كل سالفته من عيونه
.. وعن عين الشمات
.. ضميت الدمعات

وسنيني الما بيها ايامج
ما اريدنهن لأن
دورت وما صار اگبالي
غير عيونج وطن

شايل ديره اعتاب
شايل ديره اعتاب
~~
منو اليفهم حجيها
اذا مو انتي بيها
تسامرني بجيها
دمعتي .. دمعتي

العشگ ما بي نهايه
ولا يعرف بدايه
وتخط اجمل روايه
دمعتي .. دمعتي

واذكر جانت اخر نظره
من عيونج بس منكسره
.. واوگف كلما اطيح
.. واركض مثل الريح

لو مر طاريج يالزهره
دمعاتي اتسابگن
دورت وما صار اگبالي
غير عيونج وطن

شايل ديره اعتاب
شايل ديره اعتاب
~
يسالفتي الوحيده
وعشگ گلبي ونشيده
صدگ صارت بعيده
شوفتج .. شوفتج

اليحب من طبعه لازم
يظل كل عمره هايم
وانه بعيوني راسم
شوفتج .. شوفتج

بيت احزاني بلون دموعج
يرسم صوره عن ضلوعج
.. ما جانت عالبال 
.. نتفارگ بالحال

دمعاتج ودموع عيوني
بالمحسن يلتقن
دورت وما صار اگبالي
غير عيونج وطن

شايل ديره اعتاب
شايل ديره اعتاب
~
ضعت بين امنياتي
ودور عن حياتي 
ولگيت بذكرياتي
بس ألم .. بس ألم

بمحطات انتظاري
وگفت ودمعي جاري
وعرفت الدنيه ثاري
بس ألم .. بس ألم

يلسافرتي بذني احلامي
ابقه اخلافج بالحب ضامي
.. البايگ عمره الشيب
.. جرحه بموته يطيب

وسنين الغربه العشناهن
بالهم يتشابهن
دورت وما صار اگبالي
غير عيونج وطن

شايل ديره اعتاب
شايل ديره اعتاب
°°°°°°°°°°°°°°°°°°°°°°°°°°°°

📜 القصيدة: ام عباس تگضيها
🎤 أداء: مسلم الوائلي
🖋 كلمات: علي أكبر الغرابي
~~~
لو رايد اطلب حاجتك
.. ام عباس تگضيها
والطلبه گبل احجايتك
.. ام عباس تگضيها
بس يمها تعگد رايتك
.. ام عباس تگضيها

اليعگد الرايه .. تفرج لو بسمها
~~
احجي الثگال ابابها
.. ام عباس تگضيها
ما يرد جف طلابها
.. ام عباس تگضيها
ما تبخل اعله احبابها
.. ام عباس تگضيها

ما يرد خالي .. جف الي نخاها
~~~~
الدنيه وضجيج احزانها
.. ام عباس تگضيها
شما ثگلت بميزانها
.. ام عباس تگضيها
الشاهد گمر عدنانها
.. ام عباس تگضيها

مدافع ابابه .. ويحلفونه بمه
~~~
كل محنه باجر طايحه
.. ام عباس تگضيها
بس نقره ليها الفاتحه
.. ام عباس تگضيها
جم شده شفنه البارحه
.. ام عباس تگضيها

الطايح بشده .. يقره الفاتحه الها
~~~
بصحن الكفيل ونوره
.. ام عباس تگضيها
كل حاجه ما ميسوره
ام عباس تگضيها
وكت الشدد مشكوره
.. ام عباس تگضيها

تضحك عيونه .. اليوصل باب ابنها
~~
الثگلت عليها ذنوبها
.. ام عباس تگضيها
الرادت ستر لعيوبها
.. ام عباس تگضيها
كل جمعه يم محبوبها
.. ام عباس تگضيها

يرجع الرايح .. يمها بلا ذنوبه
°°°°°°°°°°°°°°°°°°°°°°°°°°°°°°°°