📜 القصيدة: يالتناشد عالهويه
🎤 أداء: مسلم الوائلي
🖋 كلمات: علي الموسوي
~
يالتناشد عالهويه
انه خادم لزجيه
~~~~
بالمجالس والعزه
روحي ضلت هايمه
واستمع يالناشدت
انه خادم فاطمه
ذايب بجو اللطم
وحيل ذبت بعالمه
ونذرت گلبي نذر
للحسين ومأتمه

تشهد جروحي عليه
انه خادم لزجيه
~~~
من جوابي وضحت
غايتي يالناشدت
فكري بالخدمه انشغل
وابد ما عندي وكت
خدمتي اكبر شرف
وانه بيها اتفاخرت
اي وحگ رب السمه
احله منها ما شفت

فضل من رب البريه
انه خادم لزجيه
~~~
بالصلاة وبالذكر
ارتجي وارفع ادي
وادعي يا رب السمه
ديم هالنعمه علي
خدمة حسين وهله
كل وكت صارتلي ضي
من يموت اليخدمه
بين ناسه يبقه حي

وافتخر وكت المنيه
انه خادم لزجيه
~~
بالعزيه ابقه أهم
لو عليها اتأخرت
أسرع وگلبي يدگ
خاف ياخذني الوكت
عاشگ وهذا العشگ
من صرت حد ما درت
بالمآتم واللطم
اگضي عمري قررت

روحي صارت بالعزيه
انه خادم لزجيه
~~~~
حيل قدست العزه
حضره عندي تنجعل
والحوائج تنگضي
بحضرة اصحاب الفضل
يا أهل بيت النبي
اندب ودمعي يهل
ما يخيبوني أبد
كل صعب عدهم سهل

أدعي ويحضرون أليه
انه خادم لزجيه
°°°°°°°°°°°°°°°°°°°°°°°°°

يالتناشد عالهوية | مسلم الوائلي
https://youtube.com/watch?v=3nkQ2P6DcS0&si=leywC9PD5Ykj3YAG

📜 القصيدة: مسلم غريب
🎤 أداء: مسلم الوائلي
🖋 كلمات: هاشم الصالحي
~~
وينه اليهم جدمه ويروح الليله
مسلم غريب وماكو ناس اتشيله
~~~~
وينه اليروح البني هاشم طلاب
گلهم الكوفه تحزمت شيب وشاب
ناس بسيوف وناس ترمي النشاب
محد فزعله ومحد يتجيله
~~~
خلهم يطرون الفيافي بهمه
مو سهله عدهم رايحلهم زلمه
خلهم يجون يطالبون بدمه
ودفنه وتراب المنايه تهيله
~
من فوگ قصر الكوفه شمروا للگاع
صاير وصل وجروح البجسمه وساع
خلهم يجون وخل يحضرونه بساع
خل يحضر حسين برجاله وخيله
~~~
خلهم يسرجون الشگر ويلگدون
عدهم خبر بالصار لو ما يدرون
مسلم عله التربان ظل ما مدفون
جيبوا حميده اتگابله وتبجيله
~~
وين الحيود الما تخاف من الموت
خلهم يجيبون الجفن والتابوت
وين الحضر يونس وجره من الحوت
خل يحضر ويراد شدة حيله
~
يا طارش اخبرهم الكوفه شسوت
وليه اعله مسلم كل زلمها ألتمت
ليش الهواشم بالعجل ما حضرت
خلهم يجون الما غفوا عالعيله
~~~
مسلم وحيد وحاطته جيوش الشر
من فوگ قصر الكوفه طاح موذر
وين الهواشم بالعجل خل تحضر
ولبيك يا مسلم تجي تناديله
~~
وين الهواشم خل ترف رايتها
معروفه عنهم بالحرب فزعتها
گلهم غريب بهل البلد زلمتها
خل تحضر اهله وفاتحه تسويله
°°°°°°°°°°°°°°°°°°°°°°°°°°

📜 القصيدة: مسك الختام
🎤 أداء: مسلم الوائلي
🖋 كلمات: علي الأكبر الغرابي
~~
اختصاراً للكلام
.. غداً مسك الختام
وبداية كل سلام
.. سلام الله عليك 
~
الليل ما ردنا جمل ردنه بطريجك
وألف هنياله اليظل بالطف صديجك
شادين حزامنه براية رفيجك
ننزل بيوم العطش ماي اعله ريجك

وحگ شيبة حبيب
.. فلا غيرك حبيب
يسر الله العجيب
.. سلام الله عليك
~~~
وحگ ماي وجوهنه البي مشترينك
عاشگينك يبو الأكبر عاشگينك
لا اتعب السانك وأشر بيمينك
انطيحلك فدوه اعله فدوه اگبال عينك

فده اگبالك نطيح
.. ولا ترجع ذبيح
يمن بسمك نصيح
.. سلام الله عليك
~~~~
ذيج وادم للذهب باعت ضماير
واحنه وادم مشترينك بالمناحر
الما يجيس العطش گلبه وياك باجر
هذا ما محسوب من اهل المشاعر

اجيناك ونريد
.. نظل عندك عبيد
تحت هذا النشيد
.. سلام الله عليك
~~~~
مطمئن خليك يا شيخ العشيره
باجر الدم يحجي سالفته الأخيره
وحگ هاي خيامك وذيج الأميره
العنده غيرك يعني ابد ما عنده غيره

لگيناك الأمان
.. دفوا وخيمه وحنان
ويظل طول الزمان
.. سلام الله عليك
~~
بالمواقف تعرف الزلمه وقراره
والدليل الحر رجع حر بنكساره
ذيج وادم مالها بهاي التجاره
يا ربحنه وكلشي من دونك خساره

بضاعه ولن تبور
.. دمه هاي النحور
يظل صوت الغيور
.. سلام الله عليك
°°°°°°°°°°°°°°°°°°°°°°°°°°°

📜 القصيدة: شعجب عافوني
🎤 أداء: مسلم الوائلي
🖋 كلمات: حسن الترابي
~
اتباوعلهم ..
ايدي اعله ظهري وحيلي رايح
من ودعتهم ..
واگف جنت بس كلشي طايح

اتلفت وما عندي بس اخيالي واندار
ما هانت العشره شعجب عافوني محتار
من ودعتهم .. من ودعتهم
~
من فتحت جروحي
تتباوع بروحي
.. يا گلبي غربه

ما بيه اظل واگف
ومن طيحتي خايف
.. يم الخيم صعبه

اوگف عله جروحي اظل بس گلبي جندوب
مو من ثگل طاح المتن من شيلة الثوب
شيصير حيلي وانه كل شويه منهوب
من روحي من ضيمي وعلي من كلشي متعوب

من گلبي منهم ..
ازعل بالضنون واسامح
اتباوعلهم ..
وايدي اعله ظهري وحيلي رايح

من ودعتهم .. من ودعتهم
~
بعيوني ضاگ الطف
گمت انشف وانشف
.. وابجي اعله صحباني

بصدري الهوه اتكسر
خاف امشي خاف اعثر
.. ماتوا وانه متاني

ما بيه حيل وحيلي رايح من الأوداع
صحباني ماتوا كلهم ومحتاج فزاع
كلساع ميت مني واحد ليش كلساع
يا رايح ويا راد تعبت مني الگاع

ما عاتبتهم ..
بس العتب بعيوني واضح
اتباوعلهم ..
ايدي اعله ظهري وحيلي رايح

من ودعتهم .. من ودعتهم
~~~~
اركض رحت هايم
يا طايح وگايم
.. اعثر وارد اعثر

ما ظل نفس بيهم
وانه اعتب عليهم
.. من ضيمي ما اگدر

وياي گوموا وردوا يم الخيمه وياي
ما اريد اردن وحدي ومن عدكم اضماي
تنشدني زينب من ارد ما حاير بهاي
بس انه گلتلها من امس صحباني هواي

گالتلي حبهم ..
گلتلها طالع بالملامح
اتباوعلهم ..
ايدي اعله ظهري وحيلي رايح

من ودعتهم .. من ودعتهم
~~~~
طاحوا مثل حيلي
وردت اليتجيلي
.. ويصبر عليه

ياهو الاگعدنه
ما الگه شي منه
.. والرگبه ماهيه

وازتني بيهم عالشبگ يا گلبي الأسهام
والما مصوب منسحگ ومطشر الهام
ثگلان راسي من التعب وثگلانه الأجدام
ومطشرين هناكه وهنانه ولگدام

شگد حشمتهم ..
وأيس بعد صاحاني صايح
اتباوعلهم ..
ايدي اعله ظهري وحيلي رايح

من ودعتهم .. من ودعتهم
~~~~
صاحولي بالحومه
يحسين مو نومه
.. كلهم ذبحناهم

لو رايد اتشمهم
وبجفك تلمهم
.. بالخيل تلگاهم

صاحولي ساعه وتنذبح مثل التحبهم
ما ظل شي منهم تتعب شما دورتهم
الروس عدنه ولو ردت ودع رگبهم
ما ظل وكت لم حيلك وبالگاع هدهم

تمنيت اشمهم ..
وخفت ألجم ارگبهم وابارح
اتباوعلهم ..
ايدي اعله ظهري وحيلي رايح

من ودعتهم .. من ودعتهم
°°°°°°°°°°°°°°°°°°°°°°°°°

📜 القصيدة: وآ حسيناً
🎤 أداء: مسلم الوائلي
~
وآ حسيناً وآ حسين
~~
حرگوا الخيمه علينه
گوم يحسين انولينه
صاحوا العباس وينه

وانته نايم بالصحاري يالعفتنه مسلبين
~~~
گوم شافوهن بناتك
حسين شو طلعن خواتك
گوم غطينه بعباتك

منذبح ضليت عاري واحنه هسه مطشرين
~
حسين مسبيه اجيتك
عالوجه نايم لگيتك
وتراب متروسه لحيتك

والگفه مطبرينه ثاري وهاي ناس بلايه دين
~~
گوم لسكينه ولوها
جدام علويه جووها
والربابك ركضوها

حافيه وشوج البراري وطاح ابو الملگه الحنين
~~~~
حسين ما تنگال هايه
وگبالنه كسروا الرايه
الحگ ان ضلت عبايه

ركضوا ستر العلاوي جي زلمها مطبرين
°°°°°°°°°°°°°°°°°°°°°°°°°

📜 القصيدة: ميت العباس
🎤 أداء: مسلم الوائلي
🖋 كلمات: محمد الموسوي
~~~~
لطمن ينسوان الخيم لطمن عله الراس
ما دامه مكسور العلم ميت العباس

طاح حزامي وطاح لواي
والله الساتر من الجاي
خويه .. خويه
~~
لطمن يزينب مات اخوجن وانجفه الماي
فوگه الحوافر تركض موصينها هواي
بأخر نفس بي لحگت شيگومه وياي

تنزف عيونه جفوفه ما موجوده
شگد حاول يطلع السهم بزنوده
والرمل حار وطابع عله خدوده
والرايه يمه اعله الترب ممدوده

گدما حوافر حاطته وسيوف وسهام
ما ظل مجال الرگبته تفتر للخيام

شفت سهام بجسمه هواي
والله الساتر من الجاي
خويه .. خويه
~
مو مال اكابر عالهظم من فشلة الناس
لا والله مال الطم وشگ ثوبي اعله عباس
وگعد وره سد الخيم ولطم عله الراس

متعذب بموته وجبيره جروحه
ميت وعينه من السهم مفتوحه
وسيوف اميه بكل مكان تلوحه
من كل كتر عباس طلعت روحه

عباس اضمد يا جرح وجروحك وساع
من يا حوافر يا رمح يالتارس الگاع

الخاطر زينب گوم وياي
والله الساتر من الجاي
خويه .. خويه
~~~~
عباس طايح عالنهر يا وسفه يا حيف
وگبالي من دمه العده يمسحون بالسيف
سير عله عيونه السهم جتال مو ضيف

هدوا الخيل عليه بلا خياله
وسهم المثلث شاگ عينه شماله
من السحگ گام يلجمه حته اخياله
كل هذا وخيام الحسين اباله

ماكو ولا طعنت رمح عبرت سلامات
من السحگ من العطش ميت حرامات

گدامه يطشرون الماي
والله الساتر من الجاي
خويه .. خويه
~~~
عباس حاجيني العساكر طلبت حسين
يحزام ظهري تشمتوا عدواني صوبين
بغضاً بحيدر تحترگ خويه الصواوين

عباس كلش طولت هالنومه
زينب تريدك والطرق ملزومه
وحسين ساعه وينزل اعله الحومه
وينام عاري مسلبات هدومه

عباس اخيك وحده يالماخذ الحيل
طلبوني يا خويه العده والتمت الخيل

انه الوحدي وهمه هواي
والله الساتر من الجاي
خويه .. خويه
~~~~
ما اريد اخوفج خويه بس مو زينه الأخبار
رخصيني اطيح خيمته الخلاني محتار
طاح الحنين الجان امس عالخدر يغار

باجر جفوفج بالحبل مجتوفه
والحادي يم عباس يمشي نشوفه
ويحرگ بگلبج من يشيل جفوفه
ويگله هاي اختك مشت للكوفه

باجر عگب جف الگمر بجفوفج احبال
وعگب العقيله ام الخدر مسبيه ينگال

باجر زينب وي عداي
والله الساتر من الجاي
خويه .. خويه
°°°°°°°°°°°°°°°°°°°°°°°°

📜 القصيدة: وآ ويلاه آه يحسين
🎤 أداء: مسلم الوائلي
🖋 كلمات: المرحوم عطيه الجمري
~~~
وآ ويلاه يبن امي
وآ ويلاه يبن امي
~~~~
ما اشوف انه يحسين غير جبال الهموم
تترادف اگبالي يخويه مثل الغيوم
من حنت الأيتام صرت بحال ميشوم
واحنه حرم تدرون ما نسلك بلا كفيل
~~
جيف الحريم بغير والي تگطع البيد
والشام يبن امي علينه دربه بعيد
مشي الحريم بليل فوگ الهزل مجيد
لو عثرت النوگ الهوادج لازم تميل
~~
محمل سكينه لو تزلزل من يجيله
لو طاح من عدنه طفل ياهو اليشيله
حادي الضعن ترويعنه يبرد غليله
وهالبر كلف ما تگطعه غير الرجاجيل
~
حرگ الخيم يحسين ما خله لنه حال
وحريمكم ذوب گلبها فگد الرجال
والله ما ظل النه جلد لركوب الجمال
ما غمضت عيني ولا ساعه من الليل
~~
يردونه انسافر يبعد اهلي ونخليك
ياريت گبل السفر يبن امي نراويك
هذا الفراگ وين يبن امي نلاگيك
لتگول خلتني العزيزه بغير تغسيل
~
لتگول عني سافروا ما ودعوني
شالوا خواتي وللگبر ما شيعوني
ياريتهم وياك بالبر يتركوني
ولا أروح حسره ميسره فوگ المهازيل
~~
حنت الناگه اعله حالي وعاينتلي بلا ولي
وصاحت اعله النوگ هونج هاي زينب بت علي

صبح المصباح الأگشر والهزل جابوها
وحشمت زينب بهلها والأهل ما جوها
ليش وحدهه العزيزه بلا ولي تخلوها
للضعن يراد والي ووادم يباروها
°°°°°°°°°°°°°°°°°°°°°°°°

📜 القصيدة: ظهري مكسور
🎤 أداء: مسلم الوائلي
🖋 كلمات: علي الأكبر الغرابي
~~~
عباس اجيت ودمعتي تفور
مجبور أجر بحيلي مجبور
مكسور گلبي وظهري مكسور
عباس خويه .. عباس خويه
~
الينكسر عالخوه ظهره
بعد بيش يفيد عمره
وانته جنت حزام ظهري

وشهگة الآخ الصحتها
الخيم زينب وصلتها
ومات يمك خويه صبري

ميت حسينك لو عدل ما يدري حته حسينك
ومن كثر ما حاير صرت يمي وادور وينك
وشضام بعيونك حجي سالفتي كلها بعينك

ما بيه ادير عيوني واندار
محتار گلبي هواي محتار
وبكل مجان الگالك أثار
عباس خويه .. عباس خويه
~~~
أمشي محني وظهري مايل
مو وكتها يا ابو فاضل
گوم لا تكسرلي خاطر

من طحت يا خويه تدري
للذبح حضرت نحري
وصدري رايته الحوافر

من هسه يا خويه شفت وحساسي يتراواله
لو ما تگوم اتحضرت لحسينك الخياله
اگعدلي ما ظل كل نفس وارحم حسين وحاله

انه ابو الراي وفاجد الراي
يا ماي وجهي بشحت الماي
گوم اعله حيلك وارجع وياي
عباس خويه .. عباس خويه
~~
سالفت فگدك جبيره
حيره تاخذني اعله حيره
وجيب اليصبر حسينك

فكلي عينك مره وحده
حسينك اگبالك تبده
وانته بعدك ساد عينك

ياخذني ويردني الدرب حد ما نشف كل لوني
حاجيني من كونك عدل يا بعد شوف عيوني
بيا سالفه ارجع للخيم لو عنك ينشدوني

لأم عون ارد شلون لأم عون
وحجيلها اعله فراگك شلون
ما ظل دمع لا ظلت عيون
عباس خويه .. عباس خويه
~~~~
جنها آخر ساعه جنها
الگاع مو مثلي حضنها
گوم وتبده اعله حضني

الخوه حگ تريد وانته
ماي وجه الخوه شفته
وانته كل اليوجعني

گوم اعله حيلك يالطحت وحسبها دين عليه
ما بين بوجهي العطش بين فراگك بيه
بحسين من گد التعب ما ظال بس شويه

يالرايح وعايفني للويل
يا حيل بعدك باقي يا حيل
ساعه وتطرني الزلم والخيل
عباس خويه .. عباس خويه
~
امشي خطوه وخطوه اعثر
كلها صاحت يا ابو الأكبر
عالنهر عباس طايح

وبين هاي وهاي حاير
انكسر لو ابقه اكابر
وانه يمك حيلي رايح

عباس خويه الوحدي ترضاها اظل وحاير
ما عندي بالفزعه أخو ويريد فزعه العاشر
وخيامي ظلت من رحت ظلمه وضواك مسافر

كل البنات متانيه تعود
وبماي عينك تارس الجود
ترجع الخيمة زينب اردود
عباس خويه .. عباس خويه
°°°°°°°°°°°°°°°°°°°°°°°°°

📜 القصيدة: طاح حسين من مهره
🎤 أداء: مسلم الوائلي
🖋 كلمات: رائد الناشي
~~~~
حيهم يا عمام حسين طاح حسين من مهره
واليته الزلم ويريد منكم واحد يحضره
~~
حيهم يا عمام حسين هذه حسينكم وحده
طايح والزلم والخيل هدتله فرد هده
ما صح بالخلگ نغار عنه العايل يرده
اول تالي هيج حسين حته خوان ما عنده

الكلها تطيح جدامه
سلبوا منه العمامه

ولا فزعت گرابه وياه ولا من ناصر ينصره
واليته الزلم ويريد منكم واحد يحضره
~
مامش زلم بالصيوان ظلت حته احشمها
لزينب يهل زينب ليش ما فزعت ولد عمها
ظل اعله الرمل مطروح ابن سيد مكارمها
طاح وعنده بس نسوان ركضت ليه من خيمها

هظمه وحيل مو سهله
بس نسوان تفزعله

وعلوياتكم بالبر ركضن والدرب عثره
واليته الزلم ويريد منكم واحد يحضره
~~
ركضن صوب ابو السجاد من فزعت الخياله
شافنه بهذاك الحال گامن يبجن الحاله
ذني مدللات حسين ما يتحاجن بجاله
هسه حسينهن من طاح صارن بيد جتاله

هسه الهظم كاتلهن
من طاح المدللهن

ومن ينطر فجر للشام وراهن عالهزل سفره
واليته الزلم ويريد منكم واحد يحضره
~~
ركض وملافت وعثرات من الخيم للحومه
اطيحن من يطگوني واحير انوب بالگومه
وصلت يمه ولگيته يلوج والحر غير ارسومه
صدگ نايم لگيت حسين بس شلونها النومه

شفته وعسن لا شفته
يتگلب عزيز اخته

يصيح الماي اريد الماي گلبه من العطش جمره
واليته الزلم ويريد منكم واحد يحضره
~~~~
من فوگ المهر للگاع طيحت شيخكم صعبه
لا ظلت عشيره وياه لا خوان لا صحبه
گبل الذبح يطلب ماي محد يقبل يشربه
ومن بعد الذبح سلبوا وسحگت خيلهم گلبه

طايح شيخكم زحمه
بيد المالهم رحمه

من كثر السحگ بالخيل ضلوعه انطبگت بظهره
واليته الزلم ويريد منكم واحد يحضره
~~~
بس انه فزعت لحسين ما صحت زلم تنغر
خلصت الدرب لوعات نوبه انهض ونوب اعثر
لگيته من التعب مگطوع نفسه وميت من الحر
الف وتسع مية صواب بيه وبعد بيه اكثر

حرت يا جرح اضمدنه
آخ يصيح اسمعنه

اشدن يا جرح بحسين وبي من كل كتر طبره
واليته الزلم ويريد منكم واحد يحضره
°°°°°°°°°°°°°°°°°°°°°°°°°°

📜 القصيدة: حكاية وفه
🎤 أداء: مسلم الوائلي
🖋 كلمات: علاء عبد
~~~
وگف عالنهر عاين خياله بالماي
ركض للشمس عاقب خياله وفاي

يخيالي تبتل گبل الحسين
مو هيجي وصتنه ام البنين
ركض للشمس عاقب خياله وفاي
~
وگع لكن توجه بسهم العيون
سلامه اعله الخيم يبدي من الذراع
شوفت وجهه عيد الهاشميات
وره نظرت عيونه تخلص الگاع

هذا ابو فاضل بي حجي هواي
كافي اختصره بس عله الماي
اسألوا مالك عن العيون
تموت النظره ضربته شلون

وصت روح .. رخص الروح
عيب السالم يعود
گبل الخيل .. هد يكحيل
خلي الزلم بالجود

تهد يبني وعداكم اتيه الراي
ركض للشمس عاقب خياله وفاي
~
عيون حسين ملهمت البدايات
من اتگله خويه أجمل الأيام
مجبر يحله جان بعينك الموت
حرب وانته اعله رجل حسينك تنام

راسك بحجره گلبك شگال
من رجع منك مثل الهلال
منك المهره خطوته بعام
جن دفن روحه ورد للخيام

حيره وراي .. وانته الماي
ما صد عينه للجود
كاشخ بيك .. ومتانيك
يا وفاي العهود

حكاية وفه تعلم الماضي والجاي
ركض للشمس عاقب خياله وفاي
~
مواقف من صفاتك عنبر تفيض
من اربع جهات حسين تنشاف
تسولف والبعيد يسمعك أذان
ومن تسكت هدوئك فجر الرياف

سيد الموقف دين الأحساس
عطشي يا خوه وشربي عباس
بوصلة مبدأ هاشمي الطور
ترهم جفوفك عش للطيور

حب مكتوم .. والمهموم
بس الروحه يقراك
وجهك عيد .. وبلا أيد
تترس خادمك هاك

عرض دمعته يوسف وگتله شراي
ركض للشمس عاقب خياله وفاي
~~
يل اسمك علاج الما يحنون
انزيم المحنه بعلم الأنسان
وگفتك يم عضيدك كون تنباع
علاج وياخذوها الگطع الأخوان

حيدري الحمله عزم ابو اتراب
تمايلت بيدك ميلت الباب
اصفي السرعه گبل الرموش
تعزل بسيفك موسم الطوش

ملگه منين .. مو بالعين
كلهم جانوا ظهور
رافع هام .. بين اسهام
ما يعبرها عصفور

صرخ ما درت للحرب عمري مگفاي
ركض للشمس عاقب خياله وفاي
~~
تقوس مهره گد ما شايل افعال
ثگيل ورجله جانت تشخط الگاع
من يخطيله زلمه يعرف الأصلاب
الشردوا من اديه سموهم اسباع

سطرت جفوفه سرعة الصوت
گبل لفظ اسمه الگابله يموت
عالم الوحده منفرد لون
تنتهي الدنيا عنده بم عون

ذب جفوف .. راح الشوف
كلها العينج تهون
يصعد نار .. مثل الثار
يطفي بجلمة ام عون

غضب ورتجز هاشمي وجيتي بحماي
ركض للشمس عاقب خياله وفاي
°°°°°°°°°°°°°°°°°°°°°°°°°°°°