📜 القصيدة: دهري ذبني
🎤 أداء: مسلم الوائلي
🖋 كلمات: عزيز الگلگاوي الكربلائي
~
دهري ذبني عبدالله يا شمعة ضوه عيوني 
~~
هاك اخذ ماي العين يبني وسلوتي
خل افرح بدنياي وانته فرحتي
خل ابتسم وارتاح واشتم وردتي
ردتك اليوم الشيب وتلم كبرتي
~
صدگ يبعد الروح ما نمت ليلي
لو يمر بيك الريح يحزن دليلي
ومن تربي تربي وياك همتي وحيلي
يا شمعة الأيمان يالتضويني
~~~
گلبي الذي رباك شينيمه الليل
يوليدي خليه وياك يتهادى ويميل
لو ردت مني تروح يتهدم الحيل
ودم نحرك المصيوب من عيني يسيل
~~~
مرت عليِ ساعات وتحملتها
جانت تمر كالطيف وموالفتها
بسوگ الدلال الروح لجلك بعتها
يوليدي لجل ارباك روحي حرگتها
~~~~
محتاره بين اثنين ودموعي تنصب
من گلبك المعطوب گلبي تعطب
ما اگدر الفرگاك فرگاك يصعب
فراگك يخلف نار بالگلب تلهب
~~
گلبي انرمه بسهمين وتقاسم الهم
سهمك وسهم حسين لاجنه اعظم
بالتضحيه للدين تعلم واعلم
من عالم التكوين امري تحتم
°°°°°°°°°°°°°°°°°°°°°°°°°°°°°°°°

📜 القصيدة: گعدوا اگبالي
🎤 أداء: مسلم الوائلي
🖋 كلمات: علي مالك الموسوي
~
گعدوا اگبالي بهاي الليله
.. راح يموت حسين
شلت وليدي موذر بيدي
.. وراحت تعمه العين

مشه وعاف عيوني
متت جا لحگوني
بهاي الليله .. بهاي الليله
~
بويه تفرهد حسين واركض بالميادين
راح الجان غافي بنص شليلي
تارس كربله اصياح من حضني الولد راح
حيلي انباگ والباگ ابني حيلي

جا شيصير بويه وتخلص شلون وعيونك غريبه
راح من آل هاشم شمعة حسين كتلتني المصيبه
مات وليد گلبي وصاحبي وغاب والراح شيجيبه
يا كسرت ابنادم منه لو مات دلاله وحبيبه

طاح حسين ويشيلونه گوه
فدوه اندارلك بس گوم فدوه

غفه بهاي جروحي
علي وطلعت روحي
بهاي الليله .. بهاي الليله
~~~
ذبحوها الدللول وامك فرت الجول
صاحت يا علي حاجيني يبني
گلتلها الولد نام بس غطوه بسهام
گالت يگعد امه انه ويحبني

شيگعد علي وشيسكت الروح حاجيني ارد اموتن
انه حسين المتعب الميادين تجيلي ارد اگومن
ابجي عليج وانتي عليه تبجين وانه بگلبي الومن
طاح احزام ظهري وسحگته الخيل دلوني ارد اروحن

بويه احتار بمك لو بنوحي
روح منيلي وذبحوها روحي

تعب هاي سنيني
علي بس حاجيني
بهاي الليله .. بهاي الليله
~~
والد حگي واحتار كتلوا هيبة الدار
دوهني وشلع گلبي وعماني
جان يحبني ويغار لو لميت الأنصار
محد غيري تنطي من حناني

اذكر مره گتله شلونك وگال انه بخير الحسين
گتله اتموت گال وداعت ام عون كلنه عليك ميتين
راح امشي بثوابك بويه للماي وثبتلك عناوين
من عدهه وركض گلبي وبده الضيم يوصل للنساوين

ساعتها الگلب گام اعله حيله
هاي اطلابت وليدي الثجيله

مشت روحي بصوتي
صدگ گرب موتي
بهاي الليله .. بهاي الليله
~~~~
شنسه وشذكر هواي جان ايخبل وياي
ابني وموش حي الله ابني غالي
داروا كلهم عليه دمه بطوله غاطيه
صحت الله ولحد رحموا حالي

شلته وگلت خل ارجع للخيام وطشر بحضني
لميتك علي بس هيه ساعات ياهوه اليلمني
وعليك ارد امشي اليوم الحسين بس اسمعني يبني
ميت وانه احبك وانته مسحوگ فز يا بويه حبني

بويه بداعتي وداعت عمامك
گوم وجزي الحسين الخيامك

ارد بيك اموذر
شگل لم الأكبر
بهاي الليله .. بهاي الليله
~
غمض عينه ونوب ضاعت بيه الدروب
ادري شراح اگل لم عون حيره
تنشد خويه يحسين طول جا علي وين
جيب وليدنه وروح العشيره

زينب مالت الله انذبحت هناك وطشر ربانه
كضي حسين راح يثغب حسين ومگطع حنانه
ذاك الجان تارس كل الخيام يتلوه بمجانه
مذبوح الولد ما رد علي وراح مو قصة نسانه

زينب بعد ما ظل للحجي السان
واحد منذبح والثاني تعبان

خلص كلشي ابيتي
خلص وي عافيتي
بهاي الليله .. بهاي الليله
°°°°°°°°°°°°°°°°°°°°°°°°°°°°

📜 القصيدة: حان فرض اللطم
🎤 أداء: مسلم الوائلي
🖋 كلمات: عباس طالب السعيدي
~~~~
بالحلم جن فاطمه تحجي المحرم بينه
كلها صاحت بالحلم يا فاطمه سجلينه

والسجل من انعرض
حته المگمط ركض
يا حسين ينادي .. يا حسين ينادي
~
سواد .. رايات اجت
فوگ .. من رفرفت
شوف .. شفت السمه .. تگوم وتطيح

حان .. فرض اللطم
المات .. ما ينحرم
دوم .. نلگاه يجي .. يم الضريح

رايه الحبيبي علگت واللون الأخضر بي .. حرز بيدي
ما عندي موعد بالعشگ والخدمه من اجمل .. مواعيدي
كلما بده بوجهي التعب والوادم اتگلي .. خطيه انته
امسح تجاعيد الوجه بالرايه ويروحن .. تجاعيدي

توها عيني غمضت والطيف اجاني بسكته
گال التحبه وصل گوم اوگف بفاتحته

جفني اول ما غمض
حته المگمط ركض
يا حسين ينادي .. يا حسين ينادي
~~~
صوت .. بي معجزه
صاح .. قيموا العزه
ذيج .. ام الحسن .. من كربلاء

ناس .. طاحت دمع
ناس .. ركضت ضلع
صار .. هذا الحلم .. مجلس عزاء

والميت من سنين اجه وگللهه اريد ابجي .. بجي مربع
ثاري اليحب حسين اذا مات وسمع مجلس .. عدل يرجع
كل خادم تسئله شكثر حبك لبو سكينه .. يظل ساكت
من عابس يگلها استحي والحب مقابيله .. جذب يطلع

رايه شالت للخدم بس يمها ظلت رايه
ظلت المن من گلت گلتلي للمشايه

والدرب من انحفظ
حته المگمط ركض
يا حسين ينادي .. يا حسين ينادي
~~~~
جان .. ماكو ضمه
الماي .. بگد فاطمه
عليه .. من سلمت .. رد السلام

طير .. حط عالخيم
راد .. راية خدم
حسين .. عشگه عبر .. حته الحمام

گالت محرم معركه والينتصر عاشگ .. يسمونه
والحلوه من اهل المجالس تاج بالخدمه .. يلبسونه
لهناك اجه وياهم طفل گللهه اذبحيني .. يمولاتي
گالتله ليش وگال احب عبدالله ما اريدن .. يذبحونه

امي گالتلي اذا رديت الي بنفاسك
اخذك مثل ام وهب وگبالها اگطع راسك

حب الحسين انفرض
حته المگمط ركض
يا حسين ينادي .. يا حسين ينادي
~~
ما .. معنى العشگ
تگول .. من تحترگ
كون .. حته العمر .. بالحب رخيص

شوگ .. من اوله
لو .. ما كربله
جان .. عابس ولا .. شگ القميص

يالزهره نحسب كل سنه شباقي المحرم .. والمصيبتنه
ما نبدي مجلس إلا بحسين بضمايرنه .. ومبادئنه
والغير الحسين السواد انحرمه يالزهره .. بعقيدتنه
ونترخص من حسين اذا اسود لبسنه احنه .. بفواتحنه

حته المشيب تره والحيله مو كالعاده
بس يطب الكربله يرجع بگد اولاده

گلبه بالحب من نبض
حته المگمط ركض
يا حسين ينادي .. يا حسين ينادي
~~~~
راح .. كلشي وهده
الماي .. ظل وحده
صاح .. يا فاطمه .. عطشيني حيل

جان .. يمها العجب
تراب .. شفت الذهب
ليش .. جي ابو علي .. ساحگته خيل

الگتلها باجر بالمشي تموت انته والوادم .. يحسدونه
گالوله ربعه مبارك وما شيعوا گاموا .. يزفونه
كلمن رجع والطف بده وام الحسن صاحت .. مجالسكم
محسوبه بيها الدمعه والطايح نزف راسه .. عله امتونه

لحظه وانه من الحلم فزيت الم بدموعي
جي ملاگي فاطمه هل ما لگيت ضلوعي

للخذوها ضلوعه رض
حته المگمط ركض
يا حسين ينادي .. يا حسين ينادي
~~~~
جان .. يمها گمر
هاذ .. محسن كبر
غاب .. شفت الگمر .. كلما يدير

لو .. صادف طفل
صاح .. يا ابا الفضل
شما .. واحد عطش .. عباس اصير

گتله ورقيه شلون اذا ركضت وابن جوشن .. يلاگيها
گال اشلع عيونه وعلي الحاول بعد يشلع .. تراجيها
من گتله زينب تنسبي باوعلي بعيونه .. وخزر بيها
گال إلا ارفع كربله واگلبها سافلها .. اعله عاليها

حسين گاع الله شعجب ما تنگلب بجدامه
گال عافاها لجل تنصب عزه خدامه

ابو فاضل من رفض
حته المگمط ركض
يا حسين ينادي .. يا حسين ينادي
°°°°°°°°°°°°°°°°°°°°°°°°°°°°°

📜 القصيدة: زينب حيل ما ظل بيها للونه
🎤 أداء: مسلم الوائلي
🖋 كلمات: محمد النواس
~~~~
بعد يا گلبي ايس وگطع الضنه
راح حسين اخوي منين اجيبنه
مشه من اول حلم للموت لتربان
ما لحگنه نشبع شوف امس منه
كافي ادگ يگلبي واوگف ارد ارتاح
زينب حيل ما ظل بيها للونه

اليموت اخوها اتموت كلها من الضيم
~~~~
شبعت من الهوه اسم الله بكثر ما اطيح
ركض الهيمه ذاك هواي تعبني
عشيره بساعه وحده اگبالي راحوا موت
مدري المن اصير وكلها توجعني
انه العثرت ببنها وباوعت لحسين
رحت لحسين اشيلنه ونسيت ابني

خال ابني اغله هواي من ابني الطاح
~~~~
تراب وصوت عثره وخير جاي ايطيح
واسم الله اطلعت من حرمه متعوبه
لگيت حسين بس ما جنه ذاك حسين عطشان وغريب وسلبوا ثوبه
وجه متلثم بدم والتراب هلال
والذباح يركض هو وذنوبه

عينه الرگبته يريد يذبح لحسين
~~~~
شفت بعيني اخوي حسين لمن طاح
طلعت بدمعتي من ذاك المخيم
شال ايده وشلت ايدي واجته الخيل
ساعتها عرفت حسين ما يسلم
انسحگ قرآن صدره وفرهد الآيات
وألم نشرح بقت بالحافر من الدم

لميت اخوي حسين گوه من الخيل
~~~~
المغرب من ثگل بعيوني صار الخوف
وجسم حسين گوه من الترب لموا
صحت حسين اريد حسين شفت حسين
گدامي بطشت بس راسه من جابوا
شريد انسه وشفتهم اهلي شوف العين
وين الوجه يشبه گلبه امس ذبحوا

صاحوا عليه تحضري زينب للشام
°°°°°°°°°°°°°°°°°°°°°°°°°°°°°

📜 القصيدة: ذباح اهلنه
🎤 أداء: مسلم الوائلي
🖋 كلمات: محمد الغزي
~~~~
غريب الحادي وامشي بواهسي وياه
عرف عدنه الغريب العافته اخوانه
گالوا راح يخلص گلت كون يطول
طريجي وگمت اعطل بالضعن انه
درب مابي هلي بس روحي صارت بي
رغم ما سوگ يخنگ بي مرانه
درب يكتل تعب بس الرماح اعزاز
ما يتفارگن وله انه تعبانه

ضعن لا لايگ علينه ويمشي بي ذباح اهلنه
هاي اول مره نتعب وگمنه نفرح لو تعبنه
الرفگه حلوه طول ما دام الرماح عيونها النه
~~~~
موش اعله الدرب وصيت الوياي
عينك عالرمح عن لا يتيهون
هسه اليمشي موش عيونه للگاع
عكس لو دنگوا كلهم يطيحون
الحادي يصيح خل نرتاح ونگوم
وصحت عالحادي امشوا لا تگعدون
ينسه احبال اديه الگايده الشوف
مرتاحين نمشي عيون بعيون

ليش توگف طول الممشه يحادي وامشي بينه
عيونهم نستنه كلشي تگود بينه وما درينه
گلوبنه والشوف يمهم بعد جا شلنه بدينه
~~~~
من ترد للصدگ لا نگعد نريد
بس يم الغرب ما ردنه نرتاح
عذر ماكو وحجه انحط للعيون
اهل ما عدنه گلنه انرافگ ارماح
اقروا عيونه من بعيد لبعيد
المن نشكي محد رمحه يلاح
امشامر لو حجينه الصوت مفضوح
وما ترهم علينه انسولف اصياح

كلشي نرضه وارضوا منه من السوالف گلبي خايف
بالعيون انسولف احسن ماكو حل كل السوالف
نحجي ننطگ لو حجينه ارماحكم والعدوا واگف
~~~~
اسمعوا عيون هسه الصوت ينشاف
الحدر والفوگ ينغث من نحاجيه
انجذب ارواحنه المذبوح نحجي وياه
من لا جاره بي من ضيمنه انسويه
درب الله كريم عليه ما ينگال
هظمنه هواي مدري شلون تاليه
معارك عالرمح رماح وي مجتوف
تعته جفوفنه بس هو ما ينطيه

لا رضه ينزل رمحكم ولا احنه انهده رضينه
صحنه كافي الفوگ تعبوا من الرمح حطهم بدينه
شكثر هومشنه وتعبنه انكسر خاطرنه علينه
~~
بعد ظلت عليكم بعد حل انريد
هلي توازينه كلش لازم تفزعون
كلما جايها ترد بينه للمو خوش
بعد يجروحنه من عدنه شتانون
واحد خل يحاجي الثاني ودنوا
مبارك فوگنه ما لازم تنزلون
الحگونه استحت من حالنه النوگ
الگلنه اتهون ماضن تگضي وتهون

النوگ خجلت وستحينه نمشي من وادم الوادم
عشره ما دامت وياكم بس حزنكم بينه دايم
مو ابعاد ويمكم احنه ابينكم نشبع شتايم
°°°°°°°°°°°°°°°°°°°°°°°°°°°°°

📜 القصيدة: يجرني النفس
🎤 أداء: مسلم الوائلي وعلي الوائلي
🖋 كلمات: حسن الترابي
~~~~
ما بيه اجر حته النفس يا زينب يجرني النفس
ما بيه اعدل گعدتي بمتوني ظل حافر فرس
شفتج ركضتي واشرت دم ورمل شوفي انترس
صحت وگطع صوتي الوجع بجروحي الصياح انحبس

گمت بس من گمتلج گاموا اثنين
نص يحشم بنص طول الحسين
~~
التمت علي من كل كتر خيل وزلم وتحيرت
ظل بالي يمج بالخيم دفعوني من ردت التفت
گد ما اهم بيج وعلي حسبالي واگف ما طحت
واحد جنت وطشرت ما ادري هسه شگد صرت

خذت من عندي كلها الخيل والگاع
لمي حسين حته اوگف للوداع
~
حسينج كبر گبل الذبح الف وتسعمية عمر
مو من كتر واحد احن ظليت احن من كل كتر
ثوبي انسلب يختي استحي ودواره ادور عالستر
وصي الفواطم لا يجن لا عندي ثوب ولا عذر

العتب يوجعني وانه بطرگ الونين
انعم الله اعله السهام الساتره حسين
~~~
ادعيلي اموتن وخلص من البيه كلش مختنگ
اتلميني گوه من الرمل واطشر بكيف السحگ
شلج بخو ظل بس نحر لا يفزع ولا ينشبگ
ارد اشهگ وما اگدر الدم اليبس ما ينشهگ

يزينب ردي ما بحسين ويگوم
ركضت فوگ اخوج الخيل والگوم
~
طاح العطش بعيوني وللخيمه تيهت الدرب
ادنه بالخيل وارد ساعه انعدل ساعه انگلب
لا عندي اخو ولا عندي ابن لا صاحب ولا ظل محب
ضلوعي گضن كلهن سحگ شتسوي بالمثلي الحرب

گمت بسهامي وطحت اعله السهام
وطلعن من وراي البيه گدام
~~~
يا بعد الزغار الگضن فوگ من الكبار الذبح
ردت اگعد وكتري انلجم وكل ضني يا زينب جرح
مديت اديه اتلمست بخاصرتي مجلب رمح
ادنه يم ضلوعي والحافر عله ضلوعي يلح

البخت ما كض حوافرهم بالضلوع
ولا سد العطش بحسين والجوع
°°°°°°°°°°°°°°°°°°°°°°°°°°°°°°

مشترك | يجرني النفس | ملا علي الوائلي ملا مسلم الوائلي | حسينية القربان
https://youtube.com/watch?v=k8x6ZRVlJAw&si=jnOYoHQtEhnT7a8M

📜 القصيدة: اليوم شلنه الرايه
🎤 أداء: مسلم الوائلي
🖋 كلمات: سمير صبيح
~
جموع صفت واعتنت مشايه
گاصده حسين الهدف والغايه
~~~~
گاصده حسين وتعرف الي يصير
گلوب اجت بأيمانها تخط المصير
الطلع هاليوم نعتبره نصير
وجنه وي حسين شال الرايه
~~~~
جنه وي حسين شارك بالطفوف
وبمشيهم طلبوا بثار الجفوف
شيعتك تطلع ملايين وألوف
سهام نگلات الجدم رمايه
~~~
سهام نگلات الجدم ترمي العده
والغدير اليوم جينه انجدده
مبايعينك بيعه ظلت خالده
وشوكه لعيون العده وسلايه
~~~
شوف تاريخك بقه بنفسه يعيد
گلوب مات ايمانها وصارت عبيد
كل عشر مترات نصبولي يزيد
واحنه بالنيه اعتقد وفايه
°°°°°°°°°°°°°°°°°°°°°°°°°°°°

📜 القصيدة: موسم الحج
🎤 أداء: مسلم الوائلي
🖋 كلمات: علي الأكبر الغرابي
~~~~
دولة الحب كربلائك صارت الهاي الخدم
طلعوا بهاي المسيره وجفك عليهم خيم
ترسم جاي .. كل مشاي .. بعيونك
~
موسم الحج ابتده
وكربلائك موعده
بدمعته العاشگ حده .. زاير

ورفت گلوب الخدم
گبل ليرف العلم
طلع مسرع كل جدم .. زاير

فرض واجب طريق الحب لگيته بهل الزياره
بلف حجه وبلف عمره ربح هاي التجاره
صلاة العاشگ دموعه ورفع بسمك شعاره

وبطريقك جلمه وحده يا هله ومية هله
ما يحير الي يزورك بابك بگد كربله
وانته افياي .. كل مشاي .. بعيونك
~
من اول واخر سطر
منين ما اباوع صور
جنها مو وادم نهر .. يجري

وگلب ابو الموكب يرف
للعرف والمو عرف
خيره ما ساعه يجف .. يجري

وشوف بكل شبر موكب تعلت فوگه رايه
وابو الموكب عله اليجبل يهوس بالعبايه
هله ومية هله بكل من يزورك عن درايه

واليزورك عن درايه وعارف بمعنه العشگ
هذا گلبه من المشاعر بس الك لمن يدگ
وبيدك راي .. كل مشاي .. بعيونك
~~~
الرايح يوصي اليرد
لخدمة حسين استعد
وخادم بخادم يشد .. شفته

وجوه سمره من الشمس
احله من في الأمس
بربعينك جم درس .. شفته

واليخدمك واليزورك والمحصل ثوابه
الرفع جفه وبجت عينه وفتح للملگه بابه
يقين بلا جدل باجر من الكوثر شرابه

بربعينك صوره صوره ترسم جفوف الخدم
ويم ضريحك شايل ايده جنه شيال العلم
وادري بهاي .. كل مشاي .. بعيونك
~~~~
الخدمتك كلمن نوه
احله ما بيهم سوه
كلها نفس المستوى .. خادم

بربعينك كل سنه
ماكو انته ولا انه
اليمشي ليك اتعنونه .. خادم

الخدم كلها بگلب واحد تصير من الموده
يمن خيرك عله احبابك جزه الحد وتبده
اليجي يزورك يرد منك امير وكلشي عنده

يا حبيبي الكربلائك كلمن بجدمه سعه
نظره منك كل مراده لمن يهل مدمعه
يا رواي .. كل مشاي .. بعيونك
~~~
موقف بهذا الدرب
شفته ودموعي تصب
اعمه ويگوده الگلب .. عاشگ

وشايب من اهل العشگ
گلبه بالحب محترگ
وقره بعيونه الصدگ .. عاشگ

طريقك للعشگ سفره وملايين اليجونه
والف عابس رسم دربك يمولاي بجنونه
والف هنياله التبدت عله عيونك عيونه

انته للعاشگ محطه وسفرته بهذا العمر
وانته لو ما انته لسه ضايع بدرب الهجر
في وماي .. كل مشاي .. بعيونك
°°°°°°°°°°°°°°°°°°°°°°°°°

📜 القصيدة: والله زمن
🎤 أداء: مسلم الوائلي
🖋 كلمات: ابو حميده الشويلي
~~
اذكر اول ما بجيتك جنت ما عرف المصاب
من اكبرت گالولي اميرك نايم بحر التراب
منها عفت اللذه كلها گمت ادور عالعذاب
بيا شباب اتهنه بله ونذبح سيد الشباب

گلبت صفحات عمري وشلگيت
يوم ما باجيلك هواي استحيت
يا حبيب اللامني بخيمه ودلال
وبالفله ضاعن بناته بلايه بيت

ما بينه يستاهل تضحيله ابو فاضل
وتضيع اهلك بالفله يا سيدي شحالك
والله زمن اغبر خلاك جثه ابر
وانه اعيش برحمتك ومأمن بجالك
~
وياك اريد ابدي بسوالف جرح بيه وما يطيب
ليش من اجلي حبيبي اتطيح عالغبره سليب
وانته غير الدنيه بيدك وحدك تبقه عجيب
شيسوه دمعي من يصبلك وانته سموك الغريب

ذني اليعذبني حاير يخلني
شحال البقه وحده عگب ما طاح عباسه
كل ميت بساعه يشيلونه من گاعه
وتلتم عليه ناس وهله يبجون عد راسه
~~~~
ضام جمرة يوم عاشر بگلبي تطفه ما اريد
عيب تطفه الجمره بيه وانته مگطوع الوريد
شما اسمع هل من مناصر افزع واركض بعيد
بس اشوفك لسه وحدك مسلب ونايم وحيد

يا دموع تكفي لجلك يا دموع
بكربله حافر سحگ فوگ الضلوع
الما عرف گدرك يجي يسلب ثياب
واختك بنار الهظم ظلت تلوع

المن تروح المن خيل وعده التمن
طلعوها گوه من الخيم الما مره مشيوفه
طلعت بعد گوه شافوها بس توه
من طاح اخوها اعله النهر ومگطعه جفوفه
~~
امك الكوثر اسمها وعنك يشح الفرات
الماي تروه الخيل منه وضامي ابن الزهره مات
شسوه عاشور المصيبه بجه اعز مدللات
فارگ اولاد ويه امهم وفارگ خوان وخوات

اليستحي يحاجيها اخوها يا زمان
حجه وياها الماله قيمه ولا مكان
ونخذت فوگ الهزل عگب الدلال
بلايه اخو دوم المشي مابي امان

عافت اهاليها ونجتفت ايديها
ودرب اليسر ما ينمشي بلا هودج ورايه
لشام جابوها بديوان وگفوها
وراحت واجت نفس الدرب يا ويلي مشايه
°°°°°°°°°°°°°°°°°°°°°°°°°°

📜 القصيدة: زينب ردت من الشام
🎤 أداء: مسلم الوائلي
🖋 كلمات: عبد الحسين الشرع وعلي أكبر الغرابي
~~
زينب ردت من الشام تنشد عن اهاليها
تشكي تريد للوليان ضيم الي سده عليها
~
صاحت يا علي السجاد وتهل الدمع عبره
يبني جسم ابوك حسين گلي بيا كتر گبره
اريد اگعد وسولفله كل اللي سده وجره

وسجب دمعة عيوني
وراوي للولي امتوني
عنه بيوم مشوني
وخبره بناگتي الهزله ياهو الي يباريها
~
دليني ارد اسولفله عالشام وخرايبها
واحنه شلون طبينه ديره المحد يطبها
لا فزعت عشيره ولا رف بيرغ گرايبها

وهاي الما علينه اتلوگ
علويات فوگ النوگ
طبينه بهذاك السوگ
كل وحده اتعثر يحسين بسوطه الشمر يوليها
~~~~
دلاها اعله گبر حسين لاجن عالگبر طاحت
گامت عالوجه تلطم وسالت عينها وصاحت
خواتك من عگب عيناك يبن امي بيسر راحت

ردت ليك تشكيلك
تتصارخ مداليلك
يبو السجاد شحجيلك
يوم الوصلوها الشام والوادم لفت ليها
~~~
بهمها جوجبت يمه وصاحت خويه يحسيني
شيال الرمح يحسين يمك ما يخليني
كلما گرب بشوفي دار الراس عن عيني

ويهز رمحك اگبالي
وانه يشوغ دلالي
هذا حسينج الغالي
گام يصيح وانه العين غرگانه بواجيها
~~~~
لگيت الناس ملتمه زلم يحسين ونساوين
تدگ بدفوف يبن امي كلها بجتلك معيدين
من شافوا ضعنه اگبل داروا عالضعن صوبين

اتعاين گامت علينه
كلها اتشمتت بينه
سجادك امگيدينه
وطفالك يبو السجاد عالهزل يجتفوها
~~~~
بثمانينك احتاريت كلها اتصيح يا عمه
ومامش بس علي السجاد يمي وحاير بهمه
وخلفله اعله راسك ذاك دار عيونهم يمه

وصار الشام كله عيون
ويعاين الطول ام عون
من بعد التعب لا لون
من بعد الخدر يحسين طولي انشاف تاليها
~~~~
ضلينه ثلث ساعات والوادم علينه اصفوف
كلها معيده بجتلك يحسين وتدگ بدفوف
وطفالك عله الهزل تبجي وترجف من الخوف

عالهزل يرجبونه
وسبي الكفر يسبونه
خوارج من يسمونه
روحي اتشوغ يبن امي ودي الموت يلفيها
~
طبينه القصر يحسين بس شلون طبينه
كلها عيونها اعله الراس وانته عيونك علينه
ومن هول المصايب ذيج هسه عليك ردينه

ردينه اعله هذا الحال
بعيوني الدمع شلال
يا سهم الهجر جتال
وبس عليك راح اتصير زينب كل نواعيها
°°°°°°°°°°°°°°°°°°°°°°°°°°°°°°°

مسلم الوائلي | زينب ردت من الشام | 1445 هـ
https://youtube.com/watch?v=Xq8-FzYvK5c&si=R-ti8-JXF4cWhu2i