📜 القصيدة: أعظم جريمة
🎤 أداء: مسلم الوائلي
🖋 كلمات : محمد رسول الحميري
~
الله حذره .. تبجي هالمره
دمها لو جره .. تبتلون

بضعة النبي .. هيبة العبي
وانت ناصبي .. من تكون

تكسر ضلع قرآن .. يا عابد الأوثان
          من تكون .. من تكون
~
وفه راح .. حجي طاح .. نبي صاح .. يا علي
بده ثار .. دمه نار .. سبي صار .. يا علي

صاحت شخص طب داري
ويگلي هسه اختاري
ناسيني بتمن ثاري ... عجيب

كسروا ضلعها الناحت
يا رب دخيلك صاحت
دفعوها حد ما طاحت ... غريب

زمره ظالمه .. هزوا السمه
وعله فاطمه .. يعتدون

واضح القصد .. كل صنم يرد
يذبح الورد .. جي حنون

تتحاسب وتنهان .. يا عابد الأوثان
          من تكون .. من تكون
~~
يا حقود .. يا جحود .. يا حسود .. يا صلف
يا ذليل .. يا هزيل .. يا قليل .. يا صلف

دنيه وعدل ما بيها
وادم صفر ماضيها
صاروا زلم تاليها ... حرام

الما يعرف اجداده
يتبختر اعله اسياده
غثهم علي الرب راده ... إمام

هالمره الوحي .. منها يستحي
كلشي ينمحي .. للبتول

واضح الأمر .. جهز القذر
خنجر الغدر .. للرسول

هالحرمه ما تنهان .. يا عابد الأوثان
            من تكون .. من تكون
~~~~
شنو صار .. حجي دار .. على دار .. فاطمه
اكو ثار .. اكو نار .. علي حار .. فاطمه

جان الأمر كالتالي
اعصر طفلها الغالي
اكسر ضلعها اگبالي ... قرار

من هسه لترحموها
تصرخ أبي خلوها
عبره ودرس سووها ... حصار

اكسر الضلع .. نزل الدمع
خلها تنفجع .. بالجنين

أذي فاطمه .. خلها بالدمه
تمشي للسمه .. والأنين

فكرك فكر شيطان .. يا عابد الأوثان
             من تكون .. من تكون
~~
يا عظيم .. يا كريم .. يا عليم .. بالجره
يا قدير .. يا مجير .. يا خبير .. بالجره

يا ذا الجلال احميها
وبرحمتك عديها
بس انت تدري شبيها ... عذاب

يا خالق الحنيه
من يمته عالحب ديه
جي بت محمد هيه ... عقاب

حره طاهره .. ثوره مو مره
قبلة عالثره .. للعباد

سرها مو سهل .. عبرت العقل
آيه للعدل .. الله راد

أعظم جريمة الآن .. يا عابد الأوثان
            من تكون .. من تكون
~~~
يا زمان .. علي جان .. بأمان .. فاطمه
بجه ناح .. علي طاح .. علي صاح .. فاطمه

گامت تمر بحلامه
وتذكر احله أيامه
ظهره انكسر بيتامه ... حنين

كسر الخواطر عاشه
وحشة گبر بفراشه
ما ينسه فاطم حاشه ... سنين

ودع الگبر .. وانتهى الأمر
سيد الصبر .. حيله راح

مرعب العده .. بالهظم غده
جثه هامده .. غربه صاح

ما تنتهي الأحزان .. يا عابد الأوثان
            من تكون .. من تكون
°°°°°°°°°°°°°°°°°°°°°°°°°°°°°°°°°°°

أعظم جريمة | مسلم الوائلي | 1446هـ
https://youtube.com/watch?v=NGgTj50qoCE&si=UC4O0NKCBwxRvtWj

📜 القصيدة: بدر طال أغيابه
🎤 أداء: مسلم الوائلي
🖋 كلمات: الشيخ زمان الحسناوي
~
يا بدر محجوب عن احبابه
ياهو مثلك بدر طال اغيابه
~~
ياهو مثلك بدر طالت غيبته
وابد ما انطانه موعد رجعته
سافر وطالت علينه سفرته
وخله جم دمعه عليه سجابه
~~
عادة العاشگ اللي يفارگ حبيب
حته لو يمه هله جنه غريب
وابد ما يرتاح دلاله ويطيب
وأبد ميداويه بس الصابه
~~
سيدي الفارگ حبيبه شيبگه بيه
يظل مأسور بأمل ساعه ويجيه
مو بيديه لو راد ينسه مو بيديه
جمرة الحب سيدي لهابه
~~
واحنه ضلينه اساره محبتك
الشوگ نحلنه ونناطر طلعتك
صدورنه مخنوگه كلها الفرگتك
وگمنه ندعي كلمن بمحرابه
~~
غيبتك مولاي حزت بالنفس
اظهر ولقن بني أميه درس
عدنه مأتم سيدي وعدهم عرس
وفوگ كل هذا وهم طلابه
~
سيدي عابونه بمعاگب سنين
وگاموا يگولون هذا الثار وين
صار الف عام اعله جتلتنه الحسين
وشفنه بس شيعته تبجي مصابه
~~
گلي شيگلهم الما عنده گلب
الخلص باللوعات والدمعه التصب
وبعد ما عدنه أمل غير الحرب
يا هله بيوم الحرب وصحابه
~~~
سيدي تنتظر جيت كربله
والمسافر كون يرجع يم هله
ياخذ بثارات ابن عقد الوله
والذي آذاه يصفي احسابه
~
تدري خلو عمتك عالتل تصيح
تدري خلوها تون ونة ذبيح
تدري خلوها عله الغبره تطيح
ومن تطيح الطف يهيج ترابه
~~~
آخ يالمهدي الك ثارات نار
وكون نفس النار هيه تصير ثار
آل أميه لا ازغار ولا اكبار
ذبح كلهم يبن داحي بابه
~~~
وحگ امك فاطمه وكسر الضلع
الصار بهلك سيدي ما ينجرع
والله منعوا عمتك من الدمع
واللي يهل دمعه السياط جوابه
°°°°°°°°°°°°°°°°°°°°°°°°°°°°°°°°°°

بدر طال اغيابه | مسلم الوائلي | 1446هـ
https://youtube.com/watch?v=s2OHwl8pQYw&si=U8K4H-K7hAKyfWGf

📜 القصيدة: يمه يزهراء
🎤 أداء: مسلم الوائلي
🖋 كلمات: علي محسن الزيادي
~~~
يمه يزهراء ... يمه يزهراء
~~~
انه بحلم لو صدگ يمي
المطروحه هاي اجنازة امي
يعني اليتيمه صار اسمي
واسود يظل للموت هدمي
~~~~
فلو الجفن خل احاجيها
زينب اگلها ياهو ليها
نار البضلعج دوت بيها
يم المحنه جاوبيها
~~
طلعت ثوبج گمت اشمه
مضموم يم زينب بدمه
الصدري من ادنيه يظل يلجمه
ما شفته كون العين تعمه
~
حاجيني يمه جلمه وحده
الما عنده أم جفنه شيسده
خليني انه اونيني اهوده
لجن ونين حسين شده
~~~
شتصير زينب بله شتصير
بوالدها لو بخوانها اتحير
للباب من اعيونها اتدير
تسمع بضلعج صوت تكسير
~
اتطشر شملنه وشيلمه
شوفي شعملتي بينه يمه
ياهو الفراگج ما مهدمه
ظل زلمه يتوجه اعله زلمه
~~~~
طحتي يخيمتنه الجبيره
ويتمتي زينب وهي زغيره
اخوتها يمها وجنها اسيره
حيرة وداعج والله حيره
~~~
روحي بريت الذمه روحي
ما راح ابطل عليج نوحي
بس مري بالعاشر يروحي
بيها تره يكثرن جروحي
°°°°°°°°°°°°°°°°°°°°°°°°°°°°°°°°°°°°°°

يمة يزهراء | مسلم الوائلي | 1446هـ
https://youtube.com/watch?v=44rTRE4GVU4&si=IG5cYG98OstI8j_D

📜 القصيدة: توجعني جروحك
🎤 أداء: مسلم الوائلي
🖋 كلمات: حسن الترابي
~~
يحسين عيونك توجعني وجروحك
من حزني الوادم سمتني مذبوحك

كلما اريد ارتاح بالعاشر احلم
واصحه اعله صوت اصياح من المخيم
بالعاشر احلم .. بالعاشر احلم
~~~
كل مغرب اذبل .. من صبري أزعل
المفروض اموت بأول جرح

مو مال اكابر .. وكل الحوافر
بضلوعي ليش فوگ الذبح

وحدي بالف وتسعمية جرح
انلجم لو ردت اسد عيوني
نحري كلما حن اصبرنه برمح
ويستحي كلما تشيله متوني

يا جدي ليله من ضيمي اخذني
نحري اعله نحرك حن ولجمني
ارحمني ساعه يحسين احلفك
وبريني ذمه صبري اعله حزني

يوميه العاشر يحرگني بخيامك
وبشيبي اركض جني ازغارك بحلامك

گلبي اعله گلبك طاح والدم عله الدم
كلما اريد ارتاح بالعاشر احلم .. بالعاشر احلم
~~~
كلما احاول .. عالبيه اجامل
وما ابين بروحي الكسر

يفضحني دمعي .. ويلجمني ضلعي
ثاري الحزن ما ينستر

مره ذكروك وگمت بس گلبي طاح
جنه دمعة زينب اعله اغيابك
انت طايح مدري نايم تستراح
وركضت الوادم تبوگ اثيابك

صدرك تبده وثوبك تغرب
تتغطه بالدم خوف اعله زينب
ودك تجيلك وتگلها رجعي
خايف عليها من حالك اصعب

تحن إلها وخايف توصلك ما تنشم
صاحت وينك ما تندلك ضم الدم

حيلك عله اختك راح وبس ضيمك ألتم
كلما اريد أرتاح بالعاشر احلم .. بالعاشر احلم
~
يحجولي عنك .. الغربه اعله حزنك
وانه العشت حزنك عطش

يگلولي رمحك .. شياله يضحك
يم زينب وليل اهدعش

الناعي كلما ينعه يحسين اختنگ
وانكسر يم جلمة مسلبينه
خزعت صدره الحوافر بالسحگ
وعله زينب والمخيم عينه

اگبال المخيم ذبحوا وريده
فك عينه گوه وانشالت ايده
بأربع اصابع ودع خواته
وجروحه تنزف والحر يزيده

كلشي اتغير بيك وضايع من طولك
زينب عالتل وانت اتنازع صاحولك

فوگ الصدر ذباح ونحرك تهشم
كلما اريد ارتاح بالعاشر احلم .. بالعاشر احلم
~~
عشت انكسارك .. وغربة قرارك
من طاح ابو فاضل أمس

واليخله ظهره .. خطواته عثره
وعيونه توجعها الشمس

الغربه من ايطيح اخوك وتعتنيه
وما يعرفك عينه ماهي اتشوفك
انت ياهو ايگلك وتبجي اعله اديه
ومن حضنته اتنفس من اجفوفك

كل هذا بيه وكتلتني وحده
كلما تودعه ترجع تگعده
تكض جفه بيدك وتگله ظهري
بموتك كسرته وتبجي اعله خده

زاد الضيم بضيم عليه وما اكابر
ولا سامع زينب مسبيه بالعاشر

ثاري الحزن مرواح ويذري بالهم
كلما اريد ارتاح بالعاشر احلم .. بالعاشر احلم
~~~
كل مغرب اسئل .. عن عمتي التل
بذاك الضياع وين المفر

ويگلي عنها .. من گد حزنها
صعدتني وظهري انكسر

نزلت اركاض اعله اخوها وكلشي خيل
وفاضت من عيوني حته جروحي
طلعت وهذا الحجي غروب اعله ليل
وجلمة الطلعت تطلع روحي

لو عمري كله انحب عليها
ما يوفي دمعي خطوه بسبيها
ستر الهواشم بخت العشيره
احبال وأثر دم باقي اعله اديها

بيد ام عون الظل من نحرك بس دمه
كلما رادت تشتم عطرك تشتمه

كلما تشوف ارماح ياخذها مأتم
كلما اريد ارتاح بالعاشر احلم .. بالعاشر احلم
°°°°°°°°°°°°°°°°°°°°°°°°°°°°°°°°°°°

📜 القصيدة: دافن زهره
🎤 أداء: مسلم الوائلي
🖋 كلمات: عباس طالب السعيدي
~
الدفن بيده .. ضوه عيونه .. عثر بس ما دره
علي كلما .. يفگدونه .. لگوا بالمگبره

دافن زهره ... الله يصبره
         علي ... علي
~~
من شال الجنازه ومشه .. ولده يصيحون
مو راسك الشيب علي .. شيبك بالمتون
ميت هوه ... وشايل ميته

شايلها بس يمشي بحذر .. جن ممشه الدموع
بس يعثر يطيح النعش .. ويعور الضلوع
وهنا صعبه ... يكض خاصرته

تميل امتونه وها گالتله تعبتك حيل
خوفي يگلها اتفز ضلوعج من برد الليل

گاللها مو دربي .. ضلعج شلع گلبي
تعبني فرگاج

انه الجنت حيدر .. عالفرگه ما يگدر
لو ميت وياج

گالت كبره ... الله يصبره
        علي ... علي
~
گاللها شوفيني شكثر .. مجتوف الأيدين
گالتله من گد السطر .. ما اشوف بالعين
لخاطر ضلعي ... گبري توسعه

ما اشوف بعيوني صدگ .. يا حمل الأجتاف
بس شيب البراسك علي .. بالظلمه ينشاف
ظلمه الدنيه ... وشيبك شمعه

كلما حاول ينزل بيها يعرضله الباب
الگاع اتگله هاي الزهره مو مال تراب

كاسر ظهر حيدر .. شتسوي بي اكثر
.. يا موت البساع

الما ميته حاسبها .. شيقنعه يدفنها
.. بحرورة الگاع

نزل جوه الگبر يبجي ونسه عيونه ورجع
عدل بس ما گدر يحجي علي گلبه انشلع

حاير بأمره ... الله يصبره
         علي ... علي
~~
الطايح لزم ظهره ووگف .. جي يا علي صاح
هسه تره الطايح علي .. وشگال من طاح
طايح سكته ... مثل الدمعه

ساعه ويطر وجه الفجر .. والدم خذاها
لا هو دافنها ولا .. ميت وراها
شما گابلها ... يكسر ضلعه

ما دافنها خاطر ترضه وياها يموت
يتوسلها يصير وياها اثنين بتابوت

الما عنده بس هيه .. شيقنعه ما هيه
.. وشيكض العيون

الماتوا احبابه .. محد يدگ بابه
.. غير اليموتون

بده ينزلها بالگوه غرامه الأولي
يگلها الدنيه مو حلوه بلياج وعلي

شيرد ظهره ... الله يصبره
         علي ... علي
~~~
خلص دفنها ومن مشه .. يتلفت هواي
بلكت تگله يا علي .. رد موت وياي
بلكي اتگله ... وخر ترابي

يصيح اعله روحه لو مشه .. حيدرها للبيت
ويگول صاحتلي ويرد .. ويگلها رديت
روح اتگله ... يا ابو احجابي

يبعد خطوه وصاح لروحه رد يا ابو حسين
لا گالتله وهو يگلها هالصوت منين

الما ينطي بعزازه .. تعرفه من الجنازه
.. شيسولف هناك

اصعب دمع طايح .. من تدري بالرايح
.. ما يرجع وياك

رجع وتلگته الحره شني اخبار الضلع
يگلها من كثر كسره يزينب ينسمع

ويجر حسره ... الله يصبره
           علي ... علي
~~~
گال الضلوع مكسره .. وصاحتهن الگاع
من يندفن يتعورن .. ويموت كلساع
كلشي يلجمه ... الميت گوه

دافنها گلي بيا گبر .. سولف يدفان
تدليني لو اگلها تره .. الحسين عطشان
سولف دمه .. هنا ماهوه

گال مضيعه وما يندله غير الجناز
گالت غير الميت لازم توصله اعزاز

ما ترضه اجي يمها .. حسبالك ألجمها
.. ويكبر حزنها

ما ترضه اروح انه .. يعني امي تعبانه
.. وازرگ جفنها

يگلها اللي اعز ناسه يدفنه ويلتفت
اذا ما عطل انفاسه يگلها جا متت

جمره بصدره ... الله يصبره
            علي ... علي
°°°°°°°°°°°°°°°°°°°°°°°°°°°°°°°°°°°

دافن زهره | مسلم الوائلي | 1446هـ
https://youtube.com/watch?v=KwAHnUn-d_o&si=gCFOkVNEFkiJsSQg

📜 القصيدة: دليل التائهين
🎤 أداء: مسلم الوائلي
🖋 كلمات: عقيل الحريشاوي
~~~~
فاطمة يا فاطمة ... فاطمة يا فاطمة
~~~
ضلعي يريت انصاب .. مو ضلعج البالباب
ضلعي ابدالج كون .. من الدفع ينعاب

فاطمة ... الله بدمعتج نعاج انطيني
فاطمة ... للدمعه والنوح مسويني
فاطمة ... لو ما بجتلج شلي بعيني
~~
العاشگ المجروح .. ما يهوه غير النوح
لو مر عليه طاريج .. اتلوه جن مذبوح

فاطمة ... الما عنده مثلج ضايع دربه
فاطمة ... الما شايل اسمج ميت گلبه
فاطمة ... والما يحب ابنج ما احبه
~~~~
مولاتي ميت بيج .. راضي الله من راضيج
اتمنه اصير تراب .. وتمر عليه رجليج

فاطمة ... اتمنه فوگي جدامج تمشي
فاطمة ... انتي حياتي وروحي وكلشي
فاطمة ... انتي سواد عيوني ورمشي
~~~
اتمنه ازورج كون .. وابجي عليج عيون
والطم لحد ما اشوف .. مني تطيح امتون

فاطمة ... اتمنه يا مولاتي اندلج
فاطمة ... امشي اعله جرحي واوصل يمج
فاطمة ... يلجمني گلبي شما اجيب اسمج
~
مولاتي ما ظل حيل .. من گد بواجي الليل
روحي ويجيها الريح .. كلما يطگها الليل

فاطمة ... هيجي اليحبج صاير حاله
فاطمة ... غير الدمع محد يحلاله
فاطمة ... الفرگه لليعشگ جتاله
°°°°°°°°°°°°°°°°°°°°°°°°°°°°°°°°°°°

دليل التائهين | مسلم الوائلي | 1446هـ
https://youtube.com/watch?v=p8Murj6qlAc&si=U85L7AXtvTKesNyc

📜 القصيدة: الفاتحة اعله ام البنين
🎤 أداء: مسلم الوائلي
🖋 كلمات: علي مالك الموسوي
~~~~
هاي هيه اليوم اخلصنه بونين
خلي نقره الفاتحه اعله ام البنين

شيفيد الحجي .. خل اشبع بجي
         هاي هيه .. هاي هيه
~~~~
خبر واصل يروحي ووگف گلبي اعله حيله
يفزعون المدينه الفاتحه الليله ثجيله
اليوم عيوني شيكضها بواجيها وحزنها
واريدن واحد اعله الضيم يا روحي اشتكيله

ضلت يروحي الجنازه غريبه
وعيوني فگدت ولدها النشامه
يا گلبي كبرت علينه المصيبه
وقره اعله روحك وراها السلامه

كل حنين اليوم خل يشبگ حنين
خلي نقره الفاتحه اعله ام البنين
~~~
شسولف عالوفه عليها اعله بزرتها وفعلها
عله أيام الگضت بتعلعل وزايد حملها
حنينه وتنطي من كل وگلبها وهذا شاهد
مشوا اربع ولد والشاهد حسين الكتلها

راحوا ولدها وتنادي بوراهم
يمه اربعتكم فداوي الحنانه
شمسويه مدري ويخبل رباهم
كلساعه واحد يموت بمجانه

زلم صاحت لمها بشري وخادمين
خلي نقره الفاتحه اعله ام البنين
~
خلص صبري وگلت بلكي استراح وجاني ساعي
يگول ام البنين وغربت وينك يناعي
بالموادع حرت وعيوني وحدها غريبه
گبل هم خلصت عيني اعله زينب يا وداعي

متعيني زينب مصايب گضتها
بس هسه هايه المصيبه الجبيره
مهظومه تنحب يويلي وشفتها
يا حيرة امي اللي ما منها حيره

وآل هاشم وره عيونج رايحين
خلي نقره الفاتحه اعله ام البنين
~~
بشر متعلگ بروحك مناره وروحه خضره
عجيدة گوم بس جابت زلم للعركه مره
شكو ابالك عمل يتحقق بلايه متاعب
مجرد ما عليها الفاتحه ولحسين تقره

هاي الحنينه التسدلنه عازه
هسه انه اموتن يروحي بجفاها
گلبي كتلني وعليها توازه
ما أريده عمري من اعيشه بوراها

بعد ما تنفعني كل هاي السنين
خلي نقره الفاتحه اعله ام البنين
~~
مشت بس بگلبها اعله الخيم يا بويه لوعه
تلاگت وي بشر وعليها ظل يصب دموعه
ما تعبها كل واحد ولا نشدت عليهم
خنگها حسين من سمعت كسر واصل الضلعه

متعيني تدري الخيم شنهو بيها
وضعون اهلها بخرايب خذوها
ورقيه ملتف حبل فوگ اديها
وحجايه مره اعله زينب حجوها

ما سمعها وكون ما ضلتلي عين
خلي نقره الفاتحه اعله ام البنين
°°°°°°°°°°°°°°°°°°°°°°°°°°°°°°°°°°°°°°°°

الفاتحة على أم البنين | مسلم الوائلي | 1446هـ
https://youtube.com/watch?v=XbeB4VHqYfQ&si=hizH5uTIi71PKkRb

📜 القصيدة: ردت عباس
🎤 أداء: مسلم الوائلي
🖋 كلمات: سعد شميل
~~~
الحگولي .. يولدي الغربه مو سهله
الحگولي .. خطيه الما تشيعه أهله

بأخير انفاس .. ردت عباس
يسد عيوني عالقبله
~~~
حجي بگلبي  .. قبل لا اموت
واخاف اجرحكم من احجي

اذا كلكم .. عليه ابعاد
منو الفوگ الگبر يبجي

هذا المجافه يطلع الروح
مذبوح ومتانيله مذبوح
گعدولي من الموت عباس
هلبت يجي يدفني ويروح

تعالولي .. زغر متني وكبر حمله
الحگولي .. خطيه الما تشيعه أهله
~
الغرف ظلمه .. الشمع جذاب
منهد ما رحتوا ما ضوه

اعيش ألمن .. وانه ادري البيت
وره اهل البيت ما يسوه

هنا سيروا يمي العزيزين
وهنا ضحك عبد الله لحسين
وهنا بليله ويوم فزيت
كل البهذا البيت ميتين

ويصيحولي .. الغريبه الفاگده الثكله
الحگولي .. خطيه الما تشيعه أهله
~~
متت يهلي .. وشفتها شلون
عازتكم صدگ عازه

متت بس ما .. لگيت ام عون
تناشغ فوگ الجنازه

ما لطمن بفاتحتي نسوان
مخلفه اربعه وزتوني جيران
جانت امنيتي بساعة الموت
يم راسي يقره حسين قرآن

ويودعني .. ويصير اعله النعش ظله
الحگولي .. خطيه الما تشيعه أهله
~~~
نخيت الله .. شكثر يحنان
اجي ويمكم يدفنوني

والي حضره .. والي شباج
والي وادم يزوروني

واكتب عباره تفرح العين
ترقد هنا خادمة الحسين
انه المره الما بخلت بيوم
والنذرت الزينين لزين

اجي يمكم .. تمنيت الگبر شتله
الحگولي .. خطيه الما تشيعه أهله
~~~
الحسن وانه .. نشوف الناس
حيل مقصره ويانه

الگبر حطوا .. عليه حراس
تمنعه الينعه فوگانه

محد شعل يم راسنه بخور
وبس المطر يغسل بالگبور
صعبه الكريم تمره خطار
ويصير بينه وبينهم سور

غريبه انه .. وموت الغربه شيحمله
الحگولي .. خطيه الما تشيعه أهله
°°°°°°°°°°°°°°°°°°°°°°°°°°°°°°°°°°°°°

ردت عباس | مسلم الوائلي | 1446هـ
https://youtube.com/watch?v=_V7D1cuoCEs&si=tCryZKnskQjOeyAm

📜 القصيدة: كل جمعة اتانيك
🎤 أداء: مسلم الوائلي
🖋 كلمات: عباس طالب السعيدي
~
خليني اكبر مولاي بعيونك
ضايع يتيم ومسكين من دونك
يبقه السؤال المكتوب وين انت
محد يجاوب إنسان مجنونك
~~
برموش العيون دورتك
بلكت حلم طايح واشوف خيالك
يا اول اهلال ما شفتك
يا عيد الگلوب شبعد لهلالك

لو ما انت مولاي .. محد يوگف وياي
الدنيه تريد اليحبك ذليل وماله تالي

بحر وشراعي غرگان .. ميت وانه عطشان
احبك انه من اول عطش مر اعله بالي

مثل النفس أشعر بيك وبگدي
بس النفس ما ينشاف يالمهدي
عايش غريب بنص ناس مو غربه
غيرك وطن والعباس ما عندي
~~
كل جمعه اتانيك عوجيه
جي ادري ظهرك بي كسر من حافر
ما أشعل شموع ليليه
ما اريد اجرحك بالخيم والعاشر

بعد ما احجي بالشام .. بلكي عيونك اتنام
يل وجهك طفن يمه تره شموس الظهاري

حالف من الاگيك .. اتغزل غزل بيك
واگلك دورة عيونك متاهات الصحاري

ضايع وادور عن عين تلگاني
وتگلي غيرك ممنوع حب ثاني
شرياني لو بالدم تاه وتشوفه
بيدك يمولاي اتگود شرياني
~
اتمنه الاگيك بس خايف
نتلاگه وتگلي بعد ما اريدك
صح مني كل خير ما شايف
بس من اگلك طايح اتمد ايدك

القصور البيه وياك .. ما يسمحلي الگاك
رغم انت اقرب الوادم واعز واحد عليه

العشگ بي تضحيه هواي .. واول تضحيه الماي
اعوفه الخاطرك واشرب دمع كل مغربيه

وينك صحت يم كل طير بغروبك
بلكي الله ويگلي هناك محبوبك
يالثوبك اسود من يوم عاشورك
بس راسك الما بي لون من ثوبك
~~~
شمعه العمر صار بغيابك
خافنها تطفه وما اشوف عيونك
گد ما حزن بيك ومصايب
مشتاگ اگلك يا حبيبي شلونك

ضيمك واليبجيك .. بيه انه ولا بيك
اليحب ما يرضه يتعور گلب خله وحبيبه

البقه بعمري إله اطياح .. اليگلي المهدي مرتاح
إله عيوني اليدليني بضواك منين اجيبه

يالمهدي عين التهواك سهرانه
من گد بواجيها عليك تعبانه
وين انت من گد ما اصيح ليليه
صاير اصيح اعله الناس وين انه
~
بتكبير الأذان تانيتك
وي كل صلاة اتخيلك گدامي
بعيوني محتاج حنيتك
وتشوفك بواقع گبل احلامي

غايب انت عالعين .. من گد حب الحسين
منو اليگدر يباوع عالشمس من گد ضواها

بسمك لو تهجيت .. عطرك يترس البيت
والصوره العله الحايط نذر جيتك وراها

اظهر اگلك بس خاف ما انصرك
وذنوبي تدفع بالخيل يم صدرك
سامحني قصرت وياك بعمالي
بس انه احبك مولاي وانتظرك
°°°°°°°°°°°°°°°°°°°°°°°°°°°°°°°°°°°°°

كل جمعه أتانيك | مسلم الوائلي | 1446هـ
https://youtube.com/watch?v=8uZ65IEUNUU&si=BEXyu0BTw-kBOXhw

📜 القصيدة: قصة عشگ
🎤 أداء: مسلم الوائلي
🖋 كلمات: ابو حميدة الشويلي
~~
دمع اليصب من العين
قصة عشگ بيها أسرار

اول سطر حب حسين
يبقه جديد شما دار
~~
من اول قرايه الك
گلبي عشگ تعزيتك
.. وانگلب عمري قرايه

ما عندي بيت ولا اهل
وانت جبتني البيتك
.. شلون المجازه بهايه

حبيتك وما فكرت هذا العشگ وين يودي
سلمتك امري وامنت ادري بضعن گلبي تحدي
كل امنياتي بهالعمر كونك تگلي يا عبدي
حته انحسب عدكم عبد وانتظر أمر المهدي

بس گلي مولاي بهاي
يا عبدي واقبلني وياك

يا راي ما يمك راي
لا سامح الله وانساك
~~
يا حب حلاته بالدمع
هذا العشگ ما صاير
.. تنجرح يله اتحبه

من تسهر الليل بقهر
وتخلص ايامك حاير
.. واسمه بدموع تكتبه

من اسمك الحب ابتده وشفتك جرح بي حنيه
گتلك يمولاي انه احب وحسيتك اتقرب بيه
شما ذنبي طيحني صحت انت ادره واعلم بالنيه
نيتي اظل بخدمتك وما اريد بس عينك ليه

ذنوب متروس ذنوب
بس حبك يخلي امال

گلبي اذا ينوي يتوب
انت التغيرله الحال
~~
احله السوالف بالدمع
لو گابلت شباجك
.. تنزل اركاض دموعي

اول احجايه من الگلب
يا ابو علي محتاجك
.. تلزم البين ضلوعي

يم مرقد اصحابك صحت هنيالكم يالحبيتوا
شفتوه وتگطعتوا اله واگباله يا حب سولفتوا
بالشده وبوكت الحرب انطاكم امان وما رحتوا
علموني احبه بالشدد وضوگوني حبكم يالضگتوا

هو واهل بيته احنان
كل الحجي يمهم غير

علموني احب العطشان
هذا الگلب مابي خير
~~~
اتدور السنه وتوصل سنه
وانه اعله ثوبي الأسود
.. ما اعوفه لا وعيونك

يا لون يحله ويا لبس
وجسمك بهيمه موسد
.. ما قبلوا يدفنونك

يمر عام بيه وانه الك وحزنك الي بكل اعوامي
افرح يگلولي الخلگ وانه الهظم واصل هامي
ليش افرح وسيد العشگ ليهسه بعده اسمه الضامي
خلوني ابجي الغربته الظل طايح ينادي اخيامي

كل عام ما عدنه شموع
جي النه حرگوا صيوان

كل عام نبجي اعله الشام
ونصيح آه يالديوان
~~
الغيرك حرامات العشگ
والدمع يا ابو النعمه
.. يالغيرت مضموني

حبك اخذ بيدي ومشه
مثل اليكض ايد اعمه
.. ويمك فتحت عيوني

عاصي وعلنت التوبه الك رحمه وعطف لمن شفتك
بديت ماي البالوجه وناديت يحسين ابختك
خليني اظل يا سيدي فاگد وانوح بفاتحتك
وابجي الهظم زينب لمن راحت وطايح عافتك

يا دنيه تحله بهالعين
وسلبوا اثيابك مولاي

وزينب اگبال الميتين
اتحشمهم تريد افياي
°°°°°°°°°°°°°°°°°°°°°°°°°°°°°°°°°°°°°°

قصة عشگ | مسلم الوائلي | 1446هـ
https://youtube.com/watch?v=pPCvS0jgGKo&si=iVvA9mEThV38j7vL