▌三台收視報告昨日出爐，今次報告特別之處唔係 #TVB 加插甚麼「大結局最高峯時段收視」，而係附上TVB劇集《#青春不要臉》同ViuTV劇集《#IT狗》嘅中国「豆瓣評分」[1]。

▌過去TVB都好鍾意喺收視報告「畫蛇添足」，專登喺收視旁邊打粒星＊，話埋俾人聽自己嘅王牌節目「最高收視」、「跨平台直播收視」幾多，不過今次就更加難睇，特登拎兩台劇集嘅中国豆瓣評分嚟比較，話畀人聽《青春》有7.8分，但《IT狗》得5.9分，連專欄作家 #游大東 都直言，TVB講埋呢啲有骨嘅說話，「既令一眾《青》劇的演員尷尬，亦凸顯大台心胸狹窄」。

▌《IT狗》係一套拍畀香港人睇嘅劇集，入面唔少笑點都係香港人先睇得明，難道你會期待中国人識笑IVE示愛毒男、Brian Cha、蕭生、連登呢啲gag位？如果要玩中国評分，TVB你哋上年播嗰套中国劇集《#山海情》喺豆瓣都有9.2分，不如又講吓收視幾多。

▌其實收視同作品質素並無必然關係，不過老人台就老是拎住點數自我安慰，好可惜，佢哋賴以「自慰」嘅點數就連年下跌，最終要不斷搬龍門，拎唔同指標混淆視聽，而家連豆瓣評分都拎埋出嚟，唔單止小家，仲會令人覺得你窮途末路，討好唔到香港人要返上去圍爐取暖，無錯，你可以鞏固到班死忠嘅市場，但亦會令年青一輩更加堅定地討厭你。

[1]豆瓣係一個中国社交平台，用家可以為電影、劇集、書籍等評價，根據美國之音評估，喺經過中共整肅之後，豆瓣活躍用戶僅剩下約1000萬。

報道TVB發盈警蝕6.4億 劇評人游大東FB page遭TVB檢舉
https://bit.ly/37sH4GH

TVB日前發盈警，料去年蝕逾6.4億，劇評人游大東昨亦在Facebook Page 報道此事。他今日再發文，指原Post遭Television Broadcasts Limited，即TVB檢舉，估計是與原post使用了TVB台徽有關。游大東稱，已另製作「打格」版配圖，又提醒友好專頁，「你哋做圖都要小心啲，方丈真係小器到冇朋友」。

他回覆Channel C表示，不會擔心太多，有需要的話會繼續報道TVB的動向，但就請電視台反思「自己都要諗真啲，想要一個點樣嘅形象？」

#游大東 #TVB #無綫 #無綫電視 #盈警 #方丈份人

▌#TVB法律部 近期戰狼上身，頻頻出征，繼強行註冊 #SayNo4TVB 商標及舉報本專頁之評論貼文後，今日(31日)本團隊再收到Instagram通知，指我哋一篇報導「《東張》主持黃穎君離巢 獲聘為民政事務局媒體主任」侵犯版權，舉報人為TVB。

▌呢篇報導用咗《#東張西望》嘅 #黃穎君 截圖，本身已經Blur咗Logo同咪牌，貼文內容分為三段，第一段係報導《東張西望》主持黃穎君離開TVB，轉往政府任職的敘述，第二段為介紹黃穎君在TVB的經歷，第三段則係敘述黃穎君的政治立場，及本團隊對黃穎君的期許。根據香港《版權條例》，在特定的情況下，例如批評、評論和報導時事，可合理使用他人的版權作品，而不會招致民事和刑事責任。換句話說，即係TVB又濫用舉報功能，以「侵權」為名義打壓言論自由、消滅異見聲音，而meta公司（包括FB及IG）又再一次成為幫兇，本團隊已經就裁決提出上訴。

▌各位做開專頁嘅朋友，我哋嘅遭遇並唔係孤例，你哋望吓 #游大東（@yautaitung）、#方以文（@fongemantvman）最近都一同遭殃，就知道TVB已經不顧企業形象，封殺所有中立，或者無一面倒唱好TVB嘅頻道，大家以後取用TVB素材，或者用到三色台Logo嘅時候小心啲喇。