▌#TVB (AKA #老人台) 台慶月慘事頻頻，除咗今日(30/11)股價再創新低4.35元、市值跌穿20億之外，被視為台慶鉅慶嘅劇集《十月初五的月光》、《拳王》收視亦仆直，根據1000部收視記錄儀嘅數據，兩者分別只錄得19.4點、16.5點收視，以首週收視嚟計，後者更係比《刑偵日記》慘淡(17.5點)。

▌《#十月初五的月光》由胡鴻鈞、何依婷同羅天宇主演，該劇係翻拍返廿年前同名劇集，不過地點就由澳門改為流浮山，有網民就諷刺話拍「七月廿一的月光」可能更受歡迎。《十月初五》由 #CowEasy 雲端會計平台贊助，產品贊助商有支持肥媽嘅 #健絡通，以及汪阿姐代言嘅 #海馬牌。

▌《#拳王》由黎耀祥、張振朗、譚俊彥、姚子羚主演，同九年前另一套TVB劇集同名，唔知叫唔叫翻拍。老實講小編無點認真睇，只係知道黎耀祥一如既往地西口西面。《拳王》由電訊數碼贊助，產品贊助商有老是常出現嘅海馬牌，以及黎耀祥代言過嘅 #嶺南藥廠、#正官庄。

▌雖然2030、2130時段劇集再遇挫折，但《東張西望》(AKA廣告雜誌)就保住基本盤之餘仲有微升趨勢(21.6點)，似乎重點報導野狗襲人、女保安、曱甴老鼠的確可以幫到呢個節目洗底，令大家忘記TVB之前點樣借節目「欺凌」HKTV、Hard Sell一地兩檢、收廣告商錢發佈錯誤資訊等。至於長壽節目《愛回家》亦同《東張》相約，錄得22.7點，相信為咗保住台柱，都起碼要拍到2,000集。