▪️🔹

ادبی مکتب‌لر

#ایماژیسم


✍کامیار بالسینی

بایرام- شماره 81

«ایماژیست‌لر» لقبی ییرمینجی قرنین ایلک‌لرینده انگلیس شعرینه دَییشیکلیک یارادان بیر سیرا انگلوساکسن شاعرلره استفاده اولور.
ایماژیست‌لر یئنی سؤزلردن دانیشیردیلار، اونلار ویکتوریا ادبیاتی و رومانتیسمه قارشی دوروب یئنی شعرین یارانماسینی اعلان ائله‌دیلر. ایلک دفعه ایماژیسم سؤزجویونو آمریکالی شاعر «ائزرا پاوند» قوللاندی. ایماژیسمین یارانماسی‌نین دقیق تاریخی بللی دئییل آنجاق 1908دن ایماژیستی شعر آدلانا بیلن شعرلرین یازیلماسینی گؤره بیله‌ریک.
بو مکتبین تاریخچه‌سینه گؤره دانیشماق بو خلاصه مطلب ده سیغماز آنجاق بو قدرینی دئمه‌لی‌ییک یازیلسایدی دا ایچینده‌کی فیکیر آیریلیق‌لارینا گؤره، دقیق بیر زاد اله گلمزدی.
ایماژیسم‌ده، ان اؤنملی اولان مسأله اسکی‌لرین یوکونو بوینوندان آشیب ویکتوریایی عادت‌لردن آرینمیش و شخصی دویغولاری بلیرسیز بیر دونیایا آچیقلایان یئنی بیر شاعرانه دیل یاراتماق‌دیر. بو مکتبین تمل‌لرینی پاوند، «آلدینگتن» و «اچ.دی»یله بیرلیکده بیر سیرا اصل‌ده گتیریر:
1- بیر شئیی عینی یادا ذهنی اولدوغونا باخمایاراق، آچیق آیدین ایضاح ائتمک.
2- آیدین گؤسترمه‌یه فایداسی اولمایان هر هانسی بیر گرکسیز کلمه‌نی سیلمک.
3- شعرین ترکیبی بیر موسیقی قطعه‌سی کیمی اولمالی. منظم ضربه‌لر(مترونوم) یا عروضی وزن اولمایاجاق.
بئله‌لیکله اضافه سؤزجوک گتیرمه‌مه‌لی و دَیرسیز صفت ده اولمامالی‌دیر. مجرد نسنه ایله دویولان(لمس اولونان) نسنه بیری- بیریله قاریشمامالی. طبیعی بیر شئی اؤزلوگونده سمبول‌دور. تزئینی کلمه‌لر گرکسیزدیر و اونوتمامالی‌ییق کی شاعرین ایشی بیر موسیقیچی کیمی چتین دیر.
یوزده یوز ایماژیستی ساییلان بیر اثر هئچ زامان یازیلماییبدیر، اما ایماژیست‌لر یئنی شعرین تمل داش‌لارینی سردیلر. ایماژیسم بیر مکتب دن آرتیق، پاوند و الیوت و اونلارین آردینی توتان باشقا شاعرلرین بیر گئچیش دؤنمی‌نین چیچکلنمه‌سی ایدی.

قایناق:
1- سیدحسینی، رضا(1394) مکتب‌های ادبی، چاپ نوزدهم، تهران، نگاه.

https://t.me/Bayramzn