#Qusba Lakqo taamal asseek lakal 14 Bilyoon Birr Takke Lakqo Banki Fanah Cultem Timixxige. Samara- Qunxa garabluk 23, 2013 (AFMMA) Qusba Lakqo taamal asseek lakal 14 Bilyoon Birr Takke Lakqo Banki Fanah Cultem Timixxige. Ityoppiya Doolat Qusba lakqo taamal asisseek lakal warrayte namma bacureh addat dubuh 580,000 yakke mari Bankil qusba akkaawunti (Account Book) fakeenim kee 14 Bilyoon Birr takke lakqoy Bankik iroh sugte Banki fanah cultem Ityoppiyak Agat Banki Diggoyse. Tah tannal anuk, 67 Bilyoon Birr takke lakqoy Doolat Qusbih teyyeeqe Baaxô caddol tan Bankitte Luuditte hebeltô taqabi sinnim fixiixiseenim Agat Bankih Xayrekterih Dr. Yinnaager Xese kassiise. Lakqo qusbannal taamal asisaanam kah faxxinte sababittek tiyak teeni Bankik iroh sugte lakqo banki fanah gacisaanamak sugtem kassiiseh yan Dr Yinnaager Xese 'dagoo uddurih addat agide takke lakqo banki fanah cultam doolat lakqô milaagu kah abte madma aracat gactem taybulle' axcuk baxxaaqise. Gersí katuk, Doolat Lakqô milaagu kah abte madmoomik madmak Teena Banki Ayfaaf baxcisaanamak sugtem warseh yan Agat Bankih Xayrektor Dr Yinnaager Xese '580,000 yakke maray Qusbih Banki Buuk fakte osah Inki Milyoon yakke mari Buuk fake-lon' axcuk qammaalaanam kee ayyunti gabat yabbixen dumî lakqo banki fanah gacisak qusba lakqo beyaanam faxxintam hawwasuuse. #Raceena: FBC