شوط كربلائي لمصاب فاطمة الزهراء عليها السلام

وينك يا بطل خيبر وفرسان الوغه تهابك
تصبر وانت داحي الباب وعصروا فاطمه ابابك
٠٠٠٠٠٠٠٠٠٠٠٠
علي يالبلحرب معروف. محد يگدر لسيفك
ابن ود وخذت راسه. ومن مرحب خذت حيفك
انت الفارس الأوحد. تحلّ وتعگد بكيفك
بصولاتك يبوالسبطين
تشهدلك بدر وحنين
بيك اتعلّه اسم الدين
صبرت وماشلت سيفك. لابد عندك اسبابك
٠٠٠٠٠٠٠٠٠٠٠٠
عجب يمرجّف الفرسان صبرت وبالگلب نارك
عصروا فاطمه وطاحت. وحركوا يا علي دارك
نكسر منها الظلع ونصاب. ابنها وماخذت ثارك
الله يعينك عله الصار
صوّب فاطمه البسمار
حرت بين الصبر والثار
تشوف بعينك العدوان. تتمرجل على عتابك
٠٠٠٠٠٠٠٠٠٠٠
ما صاحت علي الزهراء. صاحت فضّه سنديني
كسرو ظلعي خلف الباب. وسطروا بالحقد عيني
انشلّت يمنتك يفلان. ليش تريد تعميني
صُبرت والظلع مكسور
تعرفك يا علي معذور
موصّه وعالصبر مجبور
دفعوا عالزجية الباب. وظلعها انصاب بغيابك
٠٠٠٠٠٠٠٠٠٠٠
طاحت فاطمه ابابك. من عصروها خلف الباب
ظلعها مصوب ومكسور. ومحسنها الجنين انصاب
حركـو دارك عليـها. الچانو يدّعون اصحاب
فوگ صوابها ونزفه
سطرها الظالم بچفه
انهضمت يا الف وسفه
تنطك فاطمه وتصبر. هم حاسبها بحسابك
٠٠٠٠٠٠٠٠٠٠٠٠٠
گالو ساكت وگلنه گمت للظالم وهنّته
راس الناصبي الملعون. برجلك يا علي دسته
گطعت انفاسه يا كرار. ولوما الدين ما عفته
ذكرت الهادي من وصّاك
تصبر والصبر خلّاك
ما تكطع رگاب عداك
ما تگدر تشيل السيف. وصيّة بقلّة اصحابك
٠٠٠٠٠٠٠٠٠٠٠٠٠٠
صبرك يا علي شكبره. تشوف الزهره مهضومه
طاحت والظلع مكسور. وما تگدر على الگوَمه
ريحانة مُحمّد ليش. ظلت تبچي مالومه
تبجي وتدعي عالثاني
هوه القاتل الجاني
عصرها وظلت اتعاني
صواب الزهره كسر ظلوع. وانت بگلبك صوابك

سيد زيد الفحام
٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠

وداع فاطمة لعلي

فراگج سهام وحجر تارك بوجهي اثر
ظلعج وگلبي انكسر. فاطمه يا فاطمه
٠٠٠٠٠٠٠٠٠٠٠٠٠
فاطمه آنه علي حامي الحميه
كسر ظلعج كسر گلبي يالزجيه
لكن تعرفين لزمتني الوصيه
ما اسل السيف امر الله ونبيه
عالمه وعندج خبر. چفي عالي وما گصر
ظلعج وگلبي انكسر. فاطمه يا فاطمه
٠٠٠٠٠٠٠٠٠٠٠٠٠
الچان يرجف بالحرب من ذوالفقاري
وسفه هسه تمرجل وهد عله داري
والله لو مسموح اردّ بسيفي ثاري
ما يرد كل ناصبي اتعدّه بجواري
ثاري لو لمح البصر اجري من دمهم نهر
ظلعج وگلبي انكسر. فاطمه يا فاطمه
٠٠٠٠٠٠٠٠٠٠٠٠٠
يا علي معذور لا يتأذّه گلبك
هذا وكت الصبر ما مريود حربك
ادري ما تسكت يحيدر من اندبك
گدها يا حيدر ولا يحتاج اجربك
لا تظن قدرك زغر. انت أعلى امن الكمر
ظلعج وگلبي انكسر. فاطمه يا فاطمه
٠٠٠٠٠٠٠٠٠٠٠٠٠
يا علي ما ظل صبر مهدوم حيلي
الليله آخر ليله راح اعلن رحيلي
اكعد اشكيلك جراحي وتشتكيلي
يا نفس عمري وسند ظهري وخليلي
گلهه يا ماي النظر. جرحج بگلبي كُبر
ظلعج وگلبي انكسر. فاطمه يا فاطمه
٠٠٠٠٠٠٠٠٠٠٠٠٠
گلها يا أم الحسن صبرج علية
مو وكت توديع وفراگ ومنية
منين اجيبن فاطمه بعدج الية
ريت اموت ولا عشت هاي المسية
حزني بمصابج كثر. ما رحم حالي الدهر
ظلعج وگلبي انكسر. فاطمه يا فاطمه
٠٠٠٠٠٠٠٠٠٠٠٠٠
شلون اعيش بلا وجودج يالحبيبه
فاطمه فراگج اشد وعظم مصيبه
من تغيبين الگلب يسعر لهيبه
منين اجيب الصبر راح منين اجيبه
نعشج اليكسر ظهر. شلون اشيله بيا قهر
ظلعج وگلبي انكسر. فاطمه يا فاطمه

سيد زيد الفحام
٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠

مولاتي فاطمة الزهراء

عكب عيونك. تعمه عيوني
كسروا ظلعي ما رحموني
شسوّو بيه ما تدري
بعدك ما ردت عمري
ما رحموني
..............

مُحمّد يارسول الله وابو العتره
أنه الاية العظيمه وبنتك الزهره
اخبرك عالجرالي واسچب العبره
ضلع مكسور بويه وعالوجه سطره

لذت يابويه خلف الباب عصروني
كسروا ظلعي يالمختار اذوني
يبويه اعله الوجه يالهادي سطروني
محسن طاح مني ودمعت عيوني

ناس التحقد عالوا بيه
دفعوا بابي. بويه عليه
آه وصوّبو صدري
بعدك ما ردت عمري
ما رحموني
..............

يريتك بويه حاضر من اجو ليه
فلان وربعه كلهم هجموا عليه
خلف الباب انحب من دروا بيه
عصروني وطحت مصيوبه مچويه

طحت من عصرت الطاغوت عالغبره
ظلعي انصاب بويه وعالوجه سطره
صحت وينك يبويه وبالگلب جمره
يريت تشوف حالة بنتك الزهره

شفت المحسن. طاح مدمّه
روحي وگلبي. طاحن يمّه
محنيّه انكسر ظهري
بعدك ما ردت عمري
ما رحموني
..............

خذوا حيدر علي مچتوف من يمي
وراهم بويه اركض وعثر بجدمي
صحت يهل السقيفه خلّو ابن عمي
لا ادعي عليكم وصرخ بدمي

هضموني وصحت ياوالدي وينك
تعال وشوف حالي ودمعتي بعينك
وسفه الموت فارگ بيني وبينك
لوما صبر حيدر ينهدم دينك

اخذو حيدر نكرو حكمه
لوما اطلع سفكو دمه
جارت دنيتي ودهري
بعدك ما ردت عمري
ما رحموني
..............

مُحمّد بويه ريت اتغطّه بترابك
بنتك فاطمه ظلموها بغيابك
اثر كسر الضلع ظل ينزف ابابك
بعدك ما دريت اشسوّوا اصحابك

بچيت عليك حدما راحن عيوني
هضموني بغيابك حيل هضموني
كسروا ظلعي بويه وضربوا متوني
ليش بياذنب گومك يعادوني

ادعي الباري. ياخذ روحي
بويه شينفع. دمعي ونوحي
ابچي ومانفع صبري
بعدك ما ردت عمري
ما رحموني
..............

بقيت ابچي بغيابك ما غفت عيني
دعيت الله اموت ويختم سنيني
كسر ظلعي جرحني وظل يأذّيني
ونار فراگك بكل لحظه تچويني

اريد ارتاح بويه بلحدي وبگبري
ظلموني بغيابك ما ردت عمري
صبرت عله المصيبه ومانفع صبري
متت من حزن گلبي ومن الم كسري

بويه الهادي. تسمع صوتي
ما مرتاحه. الراحه بموتي
افضل اختفي بگبري
بعدك ما ردت عمري
ما رحموني

سيد زيد الفحام
__________

رسالة المهدي لنا

أنه المهدي يخادم لا تجافيني
احبك ما نسيتك انت ناسيني
٠٠٠٠٠٠٠
شكثر مديت ايدي وما تمد ايدك
غافل ملتهي وي ناس متريدك
يخادم منهو غيري اتّبعه ويفيدك
تضيع بلحظة لوما شافتك عيني
٠٠٠٠٠٠٠
اگلّك وين رايح وانت ما تسمع
كافي ذنوب اوگف أنتبه ورجع
اخاف عليك من ثگل الذنب توگع
ولا مهتم صرت كل يوم تاذيني
٠٠٠٠٠٠
يخادم لا خفتني ولا خفت ربك
ولا مني استحيت ولا عفت ذنبك
أنه المهدي ردت باب ادخل لگلبك
اريد ادخل لگلبك ما تخليني
٠٠٠٠٠٠٠
أنه الماغايب انت الماتشاهدني
اذا فد يوم ما تذنب تعاهدني
اجيك بنفسي يمك لا تواعدني
ذنوبك هيه تحجب بينك وبيني
٠٠٠٠٠٠٠٠
يخادم كل ذنب منك يأخّرني
اريدك تلتزم ما تكفي تذكرني
اذا رايد صدك من گلبك تسرني
تتوب امن الذنوب بهاي ترضيني
٠٠٠٠٠٠٠
رغم كل الذنوب البيك لازَمتك
لأن تحضر مجالس جدي ما عفتك
أنه الحاضر يخادم باللطم شفتك
اكيد بدمعتك رايد تواسيني
٠٠٠٠٠٠
عله جدي حسين ياما دمعك اتجاره
أخذ مني يخادم هاي الابشاره
يحضرك بالگبر وتشاهد انواره
يگلّك جاي اشكرك يالتعزّيني
٠٠٠٠٠٠٠٠
رغم تقصيرك وذنبك يخادمنه
لچن شفناك ما عايف مآتمنه
هاي البيهه تفرح فاطمه أمنه
وتصيح بصوت ما عوف اليوافيني

سيد زيد الفحام
٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠

نزلة العزاء
[ بحماج يا فاطمه ]
للشاعر: سيد زيد الفحام
-
ليالي الفاطمية
ليلة ٧ جمادي الأولى ١٤٤٧ هـ
حسينية وموكب لبيك يا عباس | كربلاء المقدسة
💠telegram
https://telegram.me/m7bebasim

نزلة العزاء
[ عظم الله لك الاجر علي ]
للشاعر: زيد الفحام
-
ليالي الفاطمية
ليلة ٢٨ جمادي الأولى ١٤٤٧ هـ
ديوان انصار الحسين (ع) | البصرة
💠telegram
https://telegram.me/m7bebasim

عظم الله لك الاجر علي


الحاج باسم الكربلائي
كلمات سيد زيد الفحام

(﷽)
✨خدمة محبي باسم الكربلائي تقدم:
📜قصيدة: عظم الله لك الاجر علي
✒️للشاعر: السيد زيد الفحام
📌 : الليالي الفاطمية
📅: ليلة 28 جمادى الأولى 1447 هـ
🕌: ديوان أنصار الحسين (ع) - كربلاء المقدسة
https://t.me/m7bebasim/59297

عَظّم اللهُ لكَ الأجرَ علي
عَظّم اللهُ لكَ الأجرَ علي
▪️▪️▪️▪️▪️
حگهن عيونك اذا من دم بچن
بيدك عله الزهره لفّيت الچفَن
شگال گلبك من دفنت ام الحسن
يا علي وما أنصف وياك الزمن
ضدك اندار بحزن ما ينجلي
عَظّم اللهُ لكَ الأجرَ علي
▪️▪️▪️▪️▪️
من شلت نعش الزجية بياوضع
محني ظهرك سيدي وتجري الدمع
شگال گلبك من شفت كسر الظلع
منشوكت نوحك يحيدر ينسمع
بس على الزهره نياحك يعتلي
عَظّم اللهُ لكَ الأجرَ علي
▪️▪️▪️▪️▪️
من هلت بچفوفك تراب اللحد
عالزچية نزلت دموع الورد
ضاگ صدرك يا علي وذاب الچبد
ما حسبت حساب عنك تبتعد
فاطمه وبجروح فاطم تبتلي
عَظّم اللهُ لكَ الأجرَ علي
▪️▪️▪️▪️▪️
يعينك الله شلون من هلت الثرَه
عالزچية ومامتت يا حيدره
خدها احمر والظلوع مكسّرَه
عالگبر مو ماي دمعك دم جرَه
تكثر احزانك ابد ما تنجلي
عَظّم اللهُ لكَ الأجرَ علي
▪️▪️▪️▪️▪️
فاطمه چانتلك الحب والهوى
اجمل الأيّام من عشتو سوه
من وجهّه ابيتك يشع الضوه
بياذنب كسروا ظلعها ونطوه
ماتت ومن دم مدامعها اتهَلي
عَظّم اللهُ لكَ الأجرَ علي
▪️▪️▪️▪️▪️
ما نلومك لون تبچي وتنهظم
جرح فگد الزهره واصل للعظم
يا علي انواسيك بدموع ولطم
شوكت يظهر ابنك ويفني الظلم
والأرض قسط وعدل بي تمتلي
عَظّم اللهُ لكَ الأجرَ علي
▪️▪️▪️▪️▪️
ما يضيع الثار والمهدي وراه
بذولفقارك يظهر وشايل لواه
يرد حق الزهره من چف الخذاه
يبني مرقد فاطمه وندخل معاه
بالصحن يلتم شملنه الأوّلي
عَظّم اللهُ لكَ الأجرَ علي
▪️▪️▪️▪️▪️
ابوذيات: مهدلا ، ينزار ، ملا عين
🖋️للشاعر: ناظم الحاشي
https://t.me/m7bebasim/59298

گلبها من الحزن ساعة مهد لا
ومصاب المرته الثاني مهدله
المحسن مات ما هزت مهد لا
ولا لولت على مهده الزجية
▪️▪️▪️▪️▪️
جرحج بالگلب هيهات ينزار
وبسمار الضلع بالروح ينزار
گبرج بالبقيع شوكت ينزار
واطوفه وتنزل النعمة عليه
▪️▪️▪️▪️▪️
العين ام الحسين محد ملا عين
غيرك يا علي وحبك ملا عين
الحرگوا بابها زمرة ملاعين
ولا عدهم على الصاحب حمية
▪️▪️▪️▪️▪️
#اللهم_عجل_لوليك_الفرج
◇◈◇⇩..تابعونا..⇩◇◈◇
💻Facebook
https://facebook.com/m7bebasim
📷Instagram
https://instagram.com/m7bebasem
💠telegram
https://telegram.me/m7bebasim
📝 Tel : للقصائد المكتوبة
https://t.me/bassempoems
📲Whatsapp
+96170873295🇱🇧
+989371659815🇮🇷
*💠خدمة محبي باسم الكربلائي💠*

لسان حال الامام علي الهادي عليه السلام

وينه الرايد يواسيني يحبابي
يقره عله الحسين وينعه يم بابي
........

يقره عله الحسين بونّه مسموعه
جدي المات ضامي وكسرو ضلوعه
دموعي تسيل دم وتسبق دموعه
اصرخ وا حُسيناً ونفض ترابي
........

يالرايد مكاني وتسأل عليّه
روحي بكل عزاء وكل حُسيّنيّه
كل جروحي تشفه بصوت لطميّه
اقروا مصاب جدي بساعة مصابي
........

عانيت شكثر من جور عدواني
لكن ما شكيت لجرحي وحزاني
ناسي جروحي والهمني جرح ثاني
جرح حسين جدي اليلچم صوابي
........

جسمي بگبري لكن روحي يم جدي
زاير للحُسين ومدمعي ابخدي
ابچي عله الذبيح وادعي للمهدي
دمع الطف يصب ما فارگ اهدابي
.........

آنه الهادي انحب وبچي عالضامي
عاشور وصفر كل عمري وايامي
ما انسه السبي لا نظرة الشامي
لزينب عمّتي وقصّتها بكتابي
.........

آنه الهادي اسمي والعرف اسمي
خل يبچي لمصابي ومحنتي وهضمي
بسامره اندفن برض الغُرُب جسمي
آخذ بالحشر من قاتلي حسابي

سيد زيد الفحام
_______

الامام علي الهادي النقي عليه السلام

ياعلي الهادي عيونك شبيها
مو ماي تنزف دم بواچيها
لحسين جدك دمعك يسيل
مذبوح ضامي وسحگته الخيل
وا حُسيناه. وا حُسيناه
.................

علي الهادي امام وعاشر العتره
التشوفه بعينك احنا نجهل بأمره
تشوف الواقعه عن واقع ونظره
حگ لو دم تسيل ابخدك العبره

مو عن خيال ولا يخبرونك
عاشر محرم شفته بعيونك
عالگاع من ظهر الفرس طاح
الف وتسعميّة جرح صاح
وا حُسيناه وا حُسيناه
..................

بسامره غريب بدمعك ونوحك
لكن رايح لطف كربله بروحك
شفت جروح جدك هاجت جروحك
كل سهم اليلوح حسينك يلوحك

چم طعنه شفت بجمسه چم طبره
ياعلي الهادي ومنگطع نحره
معذور لو ناديت جدّاه
بالخيل داسو صدره ويلاه
وا حُسيناه وا حُسيناه
................

شفت يابالحسن بعيونك يذبحه
الشمر ذاك اللعين ويلچم بجرحه
حز راس الحُسين وشايله برمحه
وزينب من بُعد بعيونها تشبحه

لاشك شفت زينب ذُعُر بيها
خيل وزلم من هجمت عليها
لا اكو حسين ولاكو عباس
تركض ابين الخيل والناس
وا حُسيناه وا حُسيناه
................

سجين بدارك ومن كل كتر حُرّاس
هيّج من فؤادك ياعلي الاحساس
زينب بالطفوف بلا حمه العباس
تركض طلعت وتنظرها عين الناس

هاي المصيبه هدّمت حيلك
خلّتك تبچي صبحك وليلك
گلبك عليها هواي مجروح
مسبيه عكب خوانها تروح
وا حُسيناه وا حُسيناه
...................

اكيد النظره تفرق بينّه وبينك
شفت زينب سبيه مچتفه بعينك
لذلك خلّصت بدموعك سنينك
حضرنه الليله نجري الدمعه ونعينك

ياعلي الهادي نظره لحبابك
هاي المجالس كلها لمصابك
مثلك بچينه عله الغريبات
عمّاتك الراحن سليبات
وا حُسيناه وا حُسيناه
..................

مثل ما بالسّهم چبد الولي تثلّم
چبدك ياعلي بچف ظالم اتسمّم
ومثل ما گلبه ضامي وبالضمه تألّم
گلبك ياعلي الهادي تنازف دم

لكن تشيّع نعشك بهيبه
مو مثل ذاك مصيبته مصيبه
ظل جسمه عاري عالثره الحار
سحگته الخيل وصار طشّار
وا حُسيناه وا حُسيناه

#سيد_زيد_الفحام
__________

هوسات للامام علي الهادي عليه السلام

خدامك نظل للموت يالهادي
شيعه وكل وكت لعدائك انعادي
نجيك نزورك لسامره ونّـادي
( للمحشر نتمسّك بيكم )
____

انت الماترد ياسيدي ضيوفك
اجينه لحضرتك بالمدمع نطوفك
كل حاجه وطلب نلگاها بچفوفك
( يالهادي وتكرم زوّارك )
____

كل شيعي اعتناك يزورك بلهفه
والمعلول والله من المرض يشفه
بيدك تنگضي ياسيدي الكلفه
( كل حاجه بچفك تگضيها )

سيد زيد الفحام
______

https://youtu.be/5xLIvg8oYFE?si=lawu3ARAcRVQt-fr

يا وارث علوم النبي

الرادود كرار ابوغنيم
الشاعر سيد زيد الفحام

ليالي استشهاد الامام علي الهادي عليه السلام
رجب الاصب ١٤٤٧هـ

بعد لا تنشر قصيدتك بغير قناة حتى تصعد وتحصل مشاهدات

انشر قصيدتك بقناتك الشخصية ونروجها لك ترويج حقيقي عراقي شاهد النتائج نماذج الترويج هنا👇👇

https://t.me/+QpvYD4uBBSBJMhUi

❉❉❉❉❉❉❉﷽❉❉❉❉❉❉❉
لسـتة #دعم_مؤسسة_منبريون_الحسينية🌻.
#التثبــيت_سـاعـه
#الحــــــــــذف
بـعـــد نشر اللسـتـةّ بـ4  سـا؏ـات
� غَـير مبري الـذمـةّ ٲمـام الله ڪـل من يـحذف البــوت دون ؏ـلمنا
استقبل 1000 عضو فما فوق
━━━━━━━━━━━━━━━
للإشـــتِـراك 👇🏻.

التواصل مع @ahmed_alziwar0

قناة خاصة بتلحين القصائد

https://t.me/+PZwpTt2HLXcvUQZh

------------------------------------------------------