مسير السبايا الى الشام 2023

يبن امي حسين _ تعلم وين _ ودّونه
طبينه الشام_ والظلّام _ اذّونه
عن حال العلويات
يشهد باب الساعات _ اذّونه
......

يكتل دربنه.
وكلش تعبنه
لكن اشد من هالتعب وگفتنه عالباب
مچتوفه ادينه.
وتنظر علينه
عيون الشماته والعبي متغطيه بتراب
بشمس الظهيره
وحيرتنه حيره
ابوّابة الشام شكثر حجزونه الاجناب
برمح النواصب
راسك يراقب
حال اليتامه والحرم سابيها سلّاب

مشدوهه البال _ عالاطفـال _ مرعوبه
ماخذها الخوف _ وانت تشوف _ مسلوبه
تشكيلك چم مأساة
يشهد باب الساعات _ اذّونه
......
يبچن بناتك
خويه وخواتك
خلّونه نوگف بالشمس محّد رحمنه
لمجلس عدونه
ما دخّلونه
حدما كمل عيد الفرح خويه نهضمنه
المن نعاتب
شفنه المصايب
يتعايدون اسمعهم بمقتل زلمنه
براسك يغالي
سهروا ليالي
دفوف وطبُل وتشمّتوا ياوسفه يمنه

بأمر امن يزيد _ نبقه يريد _ يم بابه
ساعات هواي _ يرضي بهاي _ احبابه
نتحسّر مچتوفات
يشهد باب الساعات _ اذّونه
......

بعينك شفتنه
چم مرّه متنه
اباب الشماته امن النظر والله انخزينه
نجري المدامع
مامن مدافع
بس العليل امن المرض نسمع انينه
وين الهواشم
تحمي الفواطم
مسبيه ليش بلا ولي محّد يجينه
وين الكفلنه
ينظر وضعنه
براس الرمح راسه ارتفع مطفيه عينه

يرضه بهالحال _ بين ارجال _ خلّونه
يقبل عباس _ كل الناس _ شافونه
اتألّمن امن النظرات
يشهد باب الساعات _ اذّونه
......

وبروس اهلنه
لمّن دخلنه
متجمهره الناس بفرح تنظر علينه
بين اليسبنه
وبين اليذمنه
ولاچن بنات المصطفه والله انسبينه
راسك يشوفوه
بحجاره يرموه
من شفنه دم راسك جره لجلك بچينه

ياخويه صحنه
ريت انذبحنه
مثلك ولاشفنه السبي بهاي المدينه

مذبوحه وياك _ ريت هناك _ ياعمري
ولاشوف اعداي _ صعبه هواي _ لو تدري
راووني شگد لوعات
يشهد باب الساعات  _  اذّونه
......

وعظم رزيه
ادخل سبيه
لمجلس يزيد بيا وكت يسأل عليه
من مستحاتي
متّ بعباتي
وجهي سترته امن الخجل بچفوف اديه
اتمنّه موتي
ولا يعله صوتي
ويسمعني وسفه الماسمع بحلامه بيه
لمّن تعدّه
مجبوره اردّه
ما اقبل الذل بت علي حامي الحميه

اخضع هيهات _ للشمات _ والظالم
ثوره واصرار _ يبقه الثار _ للقائم
صوتك يصدح مامات
يشهد باب الساعات  _  اذّونه
.....

دهري الهضمني
منهم حرمني
لو چانوا ويايه اخوتي ما طب سبيه
لكن زماني
منهم خذاني
للشام اجيت بلا اهل بيد آل اميه
ياخويه صعبه
راسك يضربه
بالخيزرانه عله الثغر يبن الزجيه
بجرحه ومصابه
تالي بخرابه
ماتت على راسك قهر بنتك رقيه

مجروحه عليك _ حلمت بيك _ مشتاگه
ماتت عالراس _ والانفاس _ حرّاگه
وشگد حملت شوغات
يشهد باب الساعات  _  اذّونه

سيد زيد الفحام
_'__________________________________

ميمر // استشهاد الامام الحسن عليه السلام

الليله الحسن بالسم مات. ذاب وتگطع چبده
........

هذا الحسن سبط الرسول المختار
وارث علي حامي الحمه وحامي الجار
مستودع علوم النبي والاسرار
من وصّفوه بالاوصاف. يشبه مُحمّد جده
.........

يشبه مُحمّد بالخلُق والايمان
لوما الحسن لا دين ظل لا قرآن
ثبّت اساس الدين ذلّ العدوان
مختاره رب الاكوان ثاني الأئمّه بعهده
.........

حارب بني سفيان حدما غدروه
ما صالح العدوان لكن خذلوه
هدنه بشروط الحسن سوه ولاموه
جُهّال ما فهمو ليش. ضايع عليهم قصده
.........

راد الحسن يكشف حقيقة خصمه
لا ذمّه عد حاكمهم ولا رحمه
وهذا الجَرَه اعلن عدائه وظلمه
اتأمّر عليكم صاح. لا للحسن لا ودّه
..........

عاش الحسن مظلوم جهلوا قدره
حاكم بني سفيان صَـدر امره
ضد الحسن ينهون بالسم عمره
نفذت امر الطاغوت. بنت المنافق جعَده
...........

سمّت ابن بنت النبي الملعونه
گطّعت چبده وراح شكله ولونه
اهله واخوته يعالج يشوفونه
ودع هله بحجر حسين. مات الحسن شيردّه
..........

مات الحسن ياناس مهدوم الحيل
بس ما تگطع ما علت صدره الخيل
مو مثل ابوالسجاد دم نحره يسيل
ولا عالرمح راسه انشال. لا ظل مسلّب مُدّه

سيد زيد الفحام
______________________________________________

گبرك وين حاچيني يعباس
.......
جيت امن السبي بعيال ويتام. گبرك وين حاچيني يعباس
احچيلك عـذابي بطبّت الشام. گبرك وين حاچيني يعباس
مسبيه وحملت جـــروح وآلام گبرك وين حاچيني يعباس

تتفرج علية وتنظر الناس گبرك وين حاچيني يعباس
.............
ميته ولا رحت للشام ياريت گبرك وين حاچيني يعباس
گوم وشوف حالي شلون رديت گبرك وين حاچيني يعباس
من ضيم السبي عباس سلّيت. گبرك وين حاچيني يعباس

من حچيّ الشماته شيّب الراس. گبرك وين حاچيني يعباس
..............

زينب آنه اختك ياضوه العين. گبرك وين حاچيني يعباس
جيتك من عذاب الشام والبين. گبرك وين حاچيني يعباس
بية اصّار وسئلني چنت وين. گبرك وين حاچيني يعباس

كلشي يطيب ألّا جرح الاحساس. گبرك وين حاچيني يعباس
.............

للطف جيت خويه بعد لغياب. گبرك وين حاچيني يعباس
عندي وياك دمعه وشكوه وعتاب. گبرك وين حاچيني يعباس
شلون تعوف زينب بين الاجناب. گبرك وين حاچيني يعباس

جرح الشام ظل يسعر بالانفاس. گبرك وين حاچيني يعباس
.............

طر تراب گبرك ونهض وگوم. گبرك وين حاچيني يعباس
يا عباس جينه امن السبي اليوم گبرك وين حاچيني يعباس
گلبي عليك يسعر حيل ملچوم. گبرك وين حاچيني يعباس

جينه امن الشماته بلايه حراس. گبرك وين حاچيني يعباس
..............

تحت تراب نايم وختك تصيح. گبرك وين حاچيني يعباس
من گد التعب لو عثرت اطيح. گبرك وين حاچيني يعباس
تميل ويالهوى لو هبت الريح. گبرك وين حاچيني يعباس

حزني بأي حزن هيهات ينقاس. گبرك وين حاچيني يعباس

سيد زيد الفحام
___________

الامام الحسن المجتبى عليه السلام

خويه ياروح الزجيه
مو سهل فگدك عليه
عذّبك سم المنيه
يا حبيبي. يا حبيبي
.......

آنه اخوك حسين ياهيبة ابونه
وتعطف علينه مثل امنه الحنونه
يالحسن بصواب چبدك عذبونه
ما ابالغ لو گلتلك يتّمونه

بالطشت چبدك نظرته
وظهري بمصابك كسرته
يعينك الله عله الأذيه
يا حبيبي.     يا حبيبي
.......

الله يلعن (جَعدَه) بالذل والمهانه
سمّتك ياخويه بچفوف الخيانه
صايم وچبدك تگطّع من مكانه
بالطشت طاح وتوذّر يا رجانه

آنه ودموع اليتامه
نندعيلك بالسلامه
يا شبل حامي الحميه
يا حبيبي.     يا حبيبي
.......

خويه دير الألم لية واخذ راحه
كافي تتعذّب يوجه الله وصباحه
ما تفيد دموع عيني والمناحه
وگلبي من جرحك يألمني بجراحه

يالحسن حالك هضمني
والجرح چبدك لچمني
الله يلعن آل اميه
يا حبيبي.     يا حبيبي
.......

خويه يحسين آني حالي اهون هواي
لا ذبح لا طعنه بية وانت وياي
باجر يذبحوك ضامي بجانب الماي
بكربله وزينب تشوفك فكّر بهاي

يومك اعظم من مصابي
قطره من بحرك عذابي
تنذبح بالغاضريه
يا حبيبي.     يا حبيبي
.......

ارد اودعك ياحُسين واجري دمعي
ريت مثل ظلوعك يدوسون ضلعي
وانتي يازينب اسولفلج اسمعي
من يذبحه الشمر لخيامج ارجعي

للحرگ لمن يجوكم
فرّوا بالبر من عدوكم
اختك واختي سبيه
يا حبيبي.     يا حبيبي

سيد زيد الفحام
_______

للأمام الحسن المجتبى عليه السلام

اصيح ودمعي سچاب. يموت اليفگد احباب
حبيبي يالحسن ليش. تگطع چبدك وذاب
...............

اليفگد احباب الگلب يتمنّه موته
لا نياحه تفيده لا ينفع سكوته
شلون لو گلبه انفجع بكبر اخوته
يبقه شبه الميت ومبحوح صوته

بچيت عيون ودموع. عله المسموم ويلوع
اشوفه يعالج الروح. تغيّر لونه ونصاب
......................

من دخلت عله الحسن ياحاله شفته
يجرح بچبده الألم وينوح سكته
لونه متغيّر يويلي وماعرفته
صحت وا ويلاه يبن امي وشبگته

يخويه الصار ويّاك. دخيلك احنا بحماك
يبعد اختك يمظلوم. وحيد بعازت اصحاب
..................

يختي يازينب تره چبدي تگطّع
وين امشي لياكتر گليلي اطلع ؟
والله من كثر الألم مااگدر اهجع
جعده سمّتني وحس جسمي تصدّع

الچنت اعطف عليها عسه انشلّت اديها
سگتني سم عدوّي علية سدّت الباب
..................

يعينك الله عله الألم يبن الزچيه
هذا چبدك بالطشت ينزف بديه
يعني گربت يالحسن ليك المنيه
تغيب عني يالچنت خيمه عليه

يريت ابدالك انموت. وتظل رحمه عله لبيوت
يشمس الدنيا والكون. هضيمه يضمّك تراب
.....................

اقسه من جرحي ومصابي دمعتچ هاي
نشّفي دمعاتچ يزينب صبري ويّاي
باجر تشوفين موقف اصعب هواي
عالرمل مطروح اخوچ ويطلب الماي

عله حسينچ تنوحين. يذبحونه وتشوفين
تدوس بجثّته الخيل ويجيج الشمر سلّاب
.........................

شلون اشوفك بالنعش ميت يغالي
يالچنت مثل البدر تضوي الليالي
يالحسن يالصورتك دوم عله بالي
شلون محرابك اشوفه بعيني خالي

اخذني لگبرك اَرتاح. بعد ما احمل جراح
يضدني دهري غدّار. يويلي شضاملي مصاب

#سيد_زيد_الفحام

_________

واضح معروفك. هيهات انعوفك
المشايه ضيوفك. نوصل ونطوفك

حبك بينه لا ما نتعب
حبك بينه لا ما نتعب

بالاربعينية. موعد شيعتك
بالاربعينية. نوصل حضرتك
هاي الملايين
مشايه يحسين نوصل حضرتك
.......

راية المشاية رفت وعتنينه
سيدي يحسين زوارك اجينه
نواسي زينب باالمشي وكل السبايا
رجعت لگبرك يبوالأكبر حزينه

شوف شبيها ردت زينب
شوف شبيها ردت زينب

ردت يواليهه. من درب السبي
ردت يواليهه. ياروح النبي
دمعتها بالعين
مشايه يحسين نوصل حضرتك
.................

زغار وكبار اعتنتلك تمشي كلها
شيعيتك يحسين ما واحد يذلها
لا نهاب الموت لا نخشه المخاطر
بحبك الشدات من تصعب نحلها

زامط بينه لا ما نرجع
زامط بينه لا ما نرجع

ما توگع الرايه راية ثورتك
ما توگع الرايه احنه بخدمتك
زحف الموالين
مشايه يحسين نوصل حضرتك
.....................

والله دربك سيدي ماصح نظيره
موكب بصف موكب بطول المسيره
بخدمتك اهل المواكب ما يتعبون
لخدمت الزوار بيهم والله غيره

ميعوفوها خدمت دربك
ميعوفوها خدمت دربك

حي الله خدامك. مدّو سفرتك
حي الله خدامك. صانو نعمتك
شما مرّت سنين
مشايه يحسين نوصل حضرتك
...................

الزاير بدربك ملك من بيته حد ليك
شيطلب شيتمنّه يلگه من مواليك
بيا هلا تعزّبله خدامك يصيحون
شنهو رايد منهم يگلوله لبيك

بس مر بينه خل نتبرّك
بس مر بينه خل نتبرّك

قدسية الزاير. من اسمك تره
قدسية الزاير دنيـه وآخـــره
شيعه ومجانين
مشايه يحسين نوصل حضرتك
...................

ما نحس بأي تعب رغم المسافات
ولو وصلنه لكربله ننسه المعانات
من نطب الحضره نصرخ واحسيناه
نلتم بربعينك يمك انبات

ما ننساها آلام الطف
ما ننساها آلام الطف

گلناها للتالي. منعوفك ابــد
گلناها للتالي نبقى عله العهد
هذا العهد دين
مشايه يحسين نوصل حضرتك

سيد زيد الفحام

قصيده رجوع زينب والسبايا يوم الاربعين
انهض تلگّاني. جيتك باحزاني
يا كفيلي. يا كفيلي
..........

من طحت يم الشريعه ما دريت بحالي
عالهزل زينب سبيه لا خدر لا والي
تدري لو ما تدري خويه ياكفيلي الغالي
امشي عالناگه الهزيله والشمر يبرالي

والدرب اذّاني. جيتك باحزاني
يا كفيلي. يا كفيلي
..........

وينه گبرك يبوفاضل ياگمر دلّيني
جيت ازوه وشكي همي رتّك تواسيني
صدك يا عباس خويه ما اظن ناسيني
ليش تقبل امشي عنك والشمر يسبيني

چم جرح بچاني. جيتك باحزاني
يا كفيلي. يا كفيلي
..........

خويه مشتاگه اجيتك يابوفاضل وينك
جيت انوح عليك خويه ولطم بچفينك
هنا عفت جسمك يخويه دامي ومگطعينك
والچفوف هنانه طاحن والسهم نص عينك

ما نسيتك آني. جيتك باحزاني
يا كفيلي. يا كفيلي
..........

آنه زينب يابوفاضل يا كفيل ظعوني
بت مُحمّد والله وسفه بالحبل چتفوني
راسك ويايه يشاهد حالي من هضموني
بالسهم مطفيه عينك ما تشوف عيوني

ماكو من يرعاني. جيتك باحزاني
يا كفيلي. يا كفيلي
...........

ما دريت شصار بينه يالنمت بترابك
شفنه آلام ومصايب يا گمر بغيابك
ترضه يا عباس ننسب ياكفيل احبابك
عالرمح راسك يغالي ينزف امن صوابك

ابچي دم خلّاني. جيتك باحزاني
يا كفيلي. يا كفيلي
............
هذا ماي النهر يجري ما گطع جريانه
خويه مو عطشانه ماي لشوفتك عطشانه
جيتك امن السبي خويه معذّبه وتعبانه
جيت اخبرك عن عذابي ياگمر لهفانه

من درب عدواني. جيتك باحزاني
يا كفيلي. يا كفيلي

سيد زيد الفحام
_____________________________________________