سلام عليكم طالبات، مبارك الاعفاء لكن وحظ أوفر للاتي لم يحالفهن، أريد اتكلم معاكم بخصوص كم شغلة قريبًا إن شاءالله 🫶🏻

حبايب مثل متعرفون هذي آخر عطلة الكم فاستمتعوا بيها قدر الإمكان وسووا وشاركوا بكل شيء تحبوه،

بالنسبة للدراسة إلى الخامس فصراحةً ما أنصح بيها لأن بالنسبة الي جربت هالشيء بآخر شهر قبل الدوام ومو شغلة نسيته بس ابد مافادني كل الي قريتة، إذا تفكرون تدرسون فاقروا شيء بسيط ولتضغطون على نفسكم أبدًا لأن مااالة داعي ابد.

بالنسبة إلى الطلاب الاعفاء اكيد مستوياتهم متفاوتة يعني يجوز اكو طالبة طلعت الاعفاء وهي هذا مستواها الاعتيادي يعني مابذلت جهد مضاعف ويجوز اكو وحدة كوة كوة كدرت تحصله فالمستويات متفاوتة وإن كان كلاهما إعفاء، صراحةً اني اريد أنصحكم بشيء لكن مترددة اتمنى محد يطبقه غير الي يدرس هالشيء تماما ويحسب حساب لكل شيء يلا يخطي الخطوة.. الطالبات الشاطرات الي طلعلكم الاعفاء بدون متبذلون جهد مضاعف لان هو هذا مستواكم أنصح لأن تدخلون مادة للسادس هسة بشهر السادس، بس مادة وحدة حتى متتعبون بعدين،، صراحة اني متندمة لأن ماسويت هالشيء ومحد نبهني أو اجة وكالي وحط هالفكرة ببالي، لذلك كلت اكللكم يجوز اكو وحدة بيكم حتفيدها،،، ربط الخامس كلش قليل وتكدرون عادي،،، زين شلون؟

تسجلون مادة وحدة مثلًا حضوريًا بمعهد، شرط قريب عليكم يعني بدون خط حتى متتبهذلون بالدوام واسألوا كون أستاذ زين يالا،

زين يامادة؟ المادة الي انتم تعانون منها وتحسوها صعبة ادخلوها..

زين والدورة تستمر بوقت الدوام؟  أي نعم من شهر السادس هذا الى شهر الرابع القادم، وهي ٣ محاضرات بالاسبوع، الشاطرة والي تشوف نفسها ميأثر عليها بالاعفاء وتكدر تطلعه، انصحها تخطو هالخطوة وحتفيدها بس الي لاوالله وكوة طلعت الاعفاء وكوة مسيطرة على الدروس لا ختسوي نفسها مقرت هالرسالة لان يأثر عليها سلبًا،

أعيد واكرر فقط الي تشوف نفسها كدها وتكدر تكمل بالدوام، ولاعبالكم عطلتكم حتروح كلها لا، هي بس ٣ مرات ترحون، ويعني بس ٣ ايام بالاسبوع تقرون فقليل كلش..

أو فكرة ثانية مثلا تدخلون دورة إلكترونية هم اسعارهم اقل وهم انتِ وبالبيت ومرتاحة ومتتعبين بالدوام وصراحة اني افضل هاي الفكرة لأن آني شخصيًا من النوع الي اتعب من الطلعة،

الفكرة موسهلة ترى يحتاجلها اهتمام وخطة مدروسة تمام، يجوز الكلام الي كلته ميناسب 95% منكم بس بنفس الوقت حيناسب ال5% لأن آني اتمنيت احد يكلي هالشيء ✨ .

أنصح تشدون حيلكم بالخامس وتطلعون إعفاء عام لأن حيفضالكم شهرين وهالشهرين تفيييد.

كذلك سالفة أخرى خطأت بيها..

كنت بالرابع والخامس من يجي طاري السادس أكول بعدني صغيرة واصلًا حتى ما افكر بيه أبدًا وصراحةً اتندمت هسة،،

انصح بأن تخلوه على بالكم وابحثوا واسألوا عن معاهد زينة حتى من تبدي عطلة الخامس على السادس انتوا مرتاحين وكبل ترحون تسجلون بالمكان التردوه ومتحيرون وتتأذون

وصراحة ابد ما احس انتوا حتتعبون بسالفة وين تدخلون لان احنه موجودين وحننصحكم بكل شيء زين ويفيدكم، أما احنه يجوز لان ماكو دفعة قبلنا سادس فدنتعب جدًا .

وترى كلّش عادي متسجلون مو إلا يعني .

اتمنالكم كلّ التوفيق
أحببتُ أن اقولَ لكم شيئًا تمنيتُ لو أحدهُم قالَهُ لي🫶🏻.

✍🏻 شهدويه

وها بعد شغلة..

اكو بيكم كلّش شاطرات ويدورن معدلات بالرابع والخامس صراحة ميحتاج والله لا متسواكم ينزل ولا هم يحزنون

ترى والله متفيدكم الدرجات والمعدلات العالية بالرابع والخامس، تدرون آني بالخامس شسويت؟ نصّيت طموحاتي يعني مجرد ما اجيب ثمانينات تسعينات هاي هيَّ كلّش كافي ولا أتّعب روحي زيادة والله ميحتاج،،، انتوا بس اضمنوا الاعفاء العام هاهية والله، بيكم حظ طلعوا الاعفاء وبلشوا سادس من وقت وهاهية، متوكل خبز معدلات الخامس .


كونوا بخير دائمًا وتذكّروا قول الإمام علي: "اقضوا حوائجكم بالكتمان" .

مرحبا بنات شلونكم قلبي🎀✨
هذا بيج وحدة من بنات مدرستنا شغلها يجنن والبنات دائما يطلبون منها شي كولش حلو ومرتب شوفو🫶🏻

🫂♥✨.

السلام عليكم
الوان الزي المدرسي للعام الدراسي ٢٠٢٤ _ ٢٠٢٥ للمرحلة الاعداية الرابع والخامس والسادس
قميص سمائي فاتح سادة
صدرية رصاصي سادة
شال سمائي فاتح سادة
حذاء رياضي ابيض او اسود او رصاصي

الرجاء الالتزام باللون المطلوب والابتعاد عن تدرجات الالوان

عود ليش؟

وكل هاذه علمود يصير الدوام يوم الأحد ونداوم دوام اسبوع كامل مو مثل الثلاثاء الي راح يصادف ١٠/١ و١٠/٢ عطله الرابع كل أربعاء و١٠/٣ اصلا عطله رسميه فا التربيه ما عجبتهم هاي الخربطه
ترة راضين هيجي عود شيحسون؟

عود صدك يحجي هذا اني ١/١٠ واكول قليل ميخليهه بشهر ١٢ يروح يقدم💀💀

السلام عليكم عزيزاتي الطالبات
هذه الاستمارة أعلاه تسحب من المكتبة وتملى المعلومات المطلوبة فيها بكل دقة ضروري مع الاستنساخ
المطلوب وصور حديثة عدد ٥ تجلب
ضروري عند إبلاغكم بموعد استلام الكتب الأسبوع المقبل ان شاءٍ الله
والتي لا تجلب المذكور لن تستلم كتب
الرجاء الاهتمام بالموضوع وجلب المطلوب عند تبليغكم
تحياتي للجميع

السلام عليكم طالباتي العزيزات
غدا الاحد ان شاء الله المصادف ٨ /٩
موعد تسليم كتب صف الخامس
الرجاء الحضور إلى المدرسة غدا الساعة التاسعة والنصف صباحا لاستلام الكتب مع جلب الاستمارة المذكوره أعلاه وما مطلوب فيها
وجلب براءة الذمة
ضرورة الالتزام بالموعد لاستلام الكتب
تحياتي للجميع