نهر : لتشيلين ذنبهم
ريم : لاذنب على فاسق عمه وذوله همه اصلاً الي اخترعو الفسوق وحطوه الاساس مالته اشتغلو ويه ابو لهب وفرعون
غزل :اهم شى ابتعدي عنهم مالج دخل بيهم
ريم : وداعتج من يوم زواجنا ذاك يوم وهذا يوم ولا ادري اي شى عنهم الله يجفيني شرهم تصوري حتى من يطب حسين ولا اسأله شلونهم اهلك شصاير مصاير وهو هم ميحجي مطنشه ومشتريه راحة بالي
نهر : الله يكملج بعقلج يمه ويبعد عنج سمهن
ريم : امين صبن جاي تره صار تيزاب يفور ويرجع ليوره وانتي الصافنه تخططين شلون تهجمين بيوتنا شيلي الفكرة من بالج ليشيلها بابا بلقوه
رشا : اله اراسلها
سليل : متجاوب
رشا : عادي يجي يوم وتجاوب

ريم : كومني مابيه رجلي نملت
رشا : وين رايحه
ريم : اريد اكفشج حتى تبطلين هاي السوالف
رشا : دطيري شكد جبانه
ريم : عمه عقلي بت اخوج تره مناقصنا مصايب
غزل : والله تصير قصه بشده
ريم : واحنا هم نتعلك بنفس الشده من الله يشيل القصص منين طلعت النا وخلتجن بليه عقل لا جبيره ولا الصغيره حكمتك ربي

سليل : لو تعرفن بمنو حلمت
ريم : بيه اكيد
سليل : بإمجن وحسام
رشا : ستوب اضربي بربك اني ماعندي ام ولا اخ
ريم : اجت من زرف الحايط
سليل : بله شقه والله حلمت بيهن
غزل : راح اكول شى بس مو تعيطن عليه
ريم : شمسويه مكسوره
غزل : ممسويه والله بس بابا كل كم شهر يخليني اخابر نوران واجمع اخبار عن حسام وعن جهاله ومره دزت صورته هو وجهاله بلسوبر ماركت
نهر : اي شفتها
رشا : خوش والله واحنا مندري رجلنا بلشمس
نهر : اعذرن ابوجن تعرفن بيه گلبه طيب وحنين ويبقى ابنه
ريم : حسام جاحد وحقير ومتإكده الله بيوم يعيشه نفس شعور بابا وسبحان الله رب العالمين رزقه اثنين ولد حتى يشوفه شكد راح يتعب وتالي يديرون وجهم ويرحون عنه
الدنيا دواره وخاصه عقوق الوالدين تندار على الواحد لو شميسوي
شبيجن صفنتن
رشا : صفكولها
ريم : ياربي القصص خبلت اختي
رشا : مداعرفج شنو هذا الهدوء والكلام الرزن
ريم : شعبالج اعجبج من اتفستق
وسليل من تنامين بعد اتغطي زين مكشفه وحلمتي بيهم
نهر : يعين گلبك ياخويه متعرف شى عن ابنك الوحيد وادز الغرب يسألوله
سليل : مو بيده گلبه طيب
رشا : زين همه شلونهم فضول تره
غزل : حسب كلام نوران وضعهم زين وحسام يشتغل شغلتين وسياره وشقه عنده وجهاله بلمدارس بس ام حسام انتقلت على غير ولايه وسيارتها جواها وحالها زين يعني عايشة وناسيتنا خصم الحجي
سليل : صايره تسميها ام حسام
غزل : شسوي متطلع من لساني ماما استحيف اكولها بس الج ولماما نهر

ريم : سلول
سليل : هااا
ريم : اذا نشرتي قصتج تذكرين سالفه سلام
سليل : ياسالفه
ريم : القديمه
سليل : كمت ابلعم وارتبكت
غزل : ياسالفه اريد اعرف
سليل : بدت ريم تحجي بس مقتطفات ورجع شريط ذكرياتي واني طفله واتختل من عمي واتذكر شلون يلمسني بقذاره ومن كتله بابا متحملت وركضت للحمام تقيأت
رشا : كاافي ولج شذكرتيها
غزل : كل هذا صاير بماما بقيت صافنه عليها ونزلت دمعتي شلون تحملت كل هذا
وعمو يدري
ريم : اي يدري

نهر : كاافي يمعودات وكتها هسه تعالي وينج هستوها اكلت سوده عليه
سليل : دخلت ماما عليه وتفرك بظهري
نهر : على كيفج يوم
سليل : مجرد مايجي طاريه وينذكر معدتي تگلب
نهر : كله من وره هاي الملكوفه ريم يوميه طالعتنا بسالفه شكل غسلي وجهج وتعالي اسويلج نومي بصره يلزم معدتج
رجعت كعدت وراسي يريد يطك
ريم : والله مو قصدي بس سألت لعد شلون اذا انشرت وقريتي
رشا : ضلي نگي لحد ما ريام ترفض كتابة القصه
ريم : يوم عيد وترفضها ولتخافين مترفض ماطول قصه كلها لطم تاخذها من يوميه مخابرتني وتبجين وخشمج يخر من وره قصتها وهذا مات وذاك انفقد هاي قصه تازه مشكل يالوز بيها اغتصاب وقتل وسجن وحرك وموت وطلاك وخيانه كرزات مو مثلها

رشا : اطلعي منها وهي تصير
ريم : اكيد اطلع ماادخل لو تموتون
سليل : اباوع على حياتنا المشت وشلون كاعدات كلنا تزوجنا عدا رشا بس عدها فرح ماليه حياتها لمتنا كل فتره بيت اهلي مابطلناها واذا نتأخر ماما تخابرنا
ريم : تدرون مال شنو هسه
رشا : راشي ودبس وخبز على الصوبه

ريم : ولج لا مال حمص بطحينه وبنصها زيتونه وهاي الزيتونه الي الي تمد ايدها اكسرها وتبوله حامضه
نهر : وحامج بهذا الجاهل مو مثل تيم
ريم : اي والله عمه اجه تيم يركض ماما خابري بابا اريد جبس ليز اكلت الجبس مالتي فرح
ريم : اكتلها يمه لتخليها تاكل
رشا : ليش ولج نمونه
ريم : اسمعي وغمزت الها
تيم : لا ماما خطيه تحبه
رشا : يمه اروح فدوة لطوله للحنين
ريم : هذا هو ثبت عيد بتج لابني روح ماما العب هسه اخابرلك
رشا : غير اكبر منه
ريم : واذا اكبر ناخذها فصليه مثل القصص مالتج
رشا : هههه يمه وليش بله فصليه كاتله امج ابوج
ريم : ماخذه القمصله الجوزيه مالتي وهاي اطير بيها رگاب
سليل : وشعلان يكعد بلفصل
رشا : شذكرج بيه
سليل : على اساس انتي ناسيه
رشا : مو ناسية بس مدايره بال
نهر : ماخابر موو
رشا : ولا سأل حتى على بته
ريم : يطبه طوب رايدته بشى
رشا : ولا اريده بس فرح تسأل عنه
ريم : كليلها مسافر قشمريها
رشا : هذا الجيل ميتقشمر شايفته شكد ذكي
سليل : اي والله ذاك اليوم انمسح برنامج عندي وهذا زين فعله ونزله وهو طوله شبر مو جهال كارثه

رشا : فرح هم هيج وحتى تيم شفتي لساناته شطولها والموبايل يفلسوه تفلس
نهر : امهات تالي وكت حاطات الموبايلات بيد الجهال وعيونهم
رشا : يمعوده نخلص من الدوخه شايفه اذا ميلزموه شويه الخباثه والعركات تشتغل
ريم : اخابر على حسين يجيبلي مقبلات وليز تردن شى
غزل : يعينه الله عليج
ريم : شمسويتله ولج بس من اضوج اعضه لو اختل واخلي يدور عليه وافززه
سليل : هههه فديوم فزه ويشكل السكر يرعنه اكبري شويه
ريم : ضايجين وين نروح ومرات العب دومنه واسحله ومن يخسر اخسره اكل من بره مااطبخ
نهر : يمه ياحسوني يامظلوم
ريم : والله محد راح يخبله عليه غيرج عمه
نهر : غير ابني واخاف عليه
ريم : مابيه شى يخبل ابنج فدوة لجلاويه

سليل : بقينا لليل عشا وسوالف وضحك ويلعبون دومنه بابا وسجاد ضد عمار وحسين وكل وحده بينا تشجع رجلها ورشا تشجع بابا وكل شويه كابه العيطه ونضحك تالي بابا وسجاد فازو والعشا وكع براس حسين وعمار مقبلت ماما دومها مدبره بين مجنا نلعب لكيناها مكمله العشا باقي بس الصمون دومها معدله ومرتبه وتحسب حساب لكلشي
خلصت سهرتنا وكل وحده راحت لبيتها

بدا الشتا يروح ويجي مكانه الحر هل علينا الشهر الرابع واشيل بلملابس الشتائيه مال الجهال وملابس سجاد والزوالي مگلوب البيت واصعد وانزل بلبيتونه وعندي جنطه ام السحاب قماش جبيره شكوو ملابس قديمه احطها بيها جان اصلاً بيها ملابس سجاد مره شمرهن كلت اكمل الملابس الباقيه وانطيهم لناس محتاجه واني اگلب بيهن واحط فوكاهن لمحت خاولي شايفته جريته بين الملابس اكلب بيه هذا الخاولي مالتي اي والله مالتي اخذته ونزلت ليجوه لكيت سجاد يصلي كمل صلاه وباوع عليه شبيج صافنه عليه
سليل : رفعت حاجبي وكتله هذا شجان يسوي عندك
سجاد : شنو هذا
سليل : لتسوي نفسك متعرفه هذا الخاولي مالتي
سجاد : حييل وين لكيتي
سليل : شجان يسوي يمك من الاساس
سجاد : جنت احب وحده ودكت الناقصه بيه واني گلبي رهيف اخذته اشم ريحتها بيه
كاام وشال السجاده والتربه وحطهم على صفحه وسحبني من ايدي وكعدني بحضنه
ليش تتحارشين
سليل : والله ممتحارشه بس لكيته استغربت حتى صاير اسود
سجاد : من كثر مجنت اشمه تالي ريحتج اختفت منه ضميته
سليل : لهاي الدرجه جنت تحبني
سجاد : ياظالمه النفس جنت احبج وهسه شنو مااحبج
سليل : يعني مو مثل قبل
جان يكرصني حيل من زندي اااخ أذيتني
سجاد : لو مو مثل قبل مجان لهسه ماابات بره بدونج ولا اكل بلياج وحتى من اروح محافظات علمود الشغل اضل الليل اسولف وياج واله اشوفج يله انام انتي متعرفين قيمتج عندي سليل انتي معجنونه بيه عجن تمشين بدمي ويه كل نفس يصعد وينزل ويايه
سليل : ليش لعد متكول هذا الحجي الحلوو اليه
سجاد : المفروض تعرفي كل شويه لازم اكوله
سليل : اي كل شويه وكل ساعه
سجاد : راح تملين والحجي ماكو اسهل منه بس الفعل هو الصعب وكدامج اركض على العيشه يعني هم على كيفج ويايه مقصر بشى وياج

سليل : الشهاده لله لا الي يضوجني نادراً متكول كلام حلوو
سجاد : بس احبج وكلشي بيج اعشقه وحتى واذا محجيت لازم تعرفين هذا الشى لهفتي وحضني الج يدل شكد متعلق بيج
وغيرتي وعصبيتي اني اذا طلعت وياج ابقى متوتر اخاف اخد يباوعلج بنظره مااحبها واتعارك وياه
سليل : غير هاي سوالفك قابل متزوج انجلينا جولي لو حلووه حيل شسوي
سجاد : انتي عندي احلى النسوان كلها كلمن وذوقه ليش هسه اني مو احلى رجال عندج
سليل : اي والله اموت عليك واغار عليك من الهوا
سجاد : مو اكلج الشاذي بعين امه غزال
سليل : هسه منو الشاذي طلع
سجاد : انتي
سليل : دفعته وردت اكوم كاام يضحك بصوت عالي وجرني بحضنه ونومني على الجربايه وصار فوكي شكد احب اضوجج اكزكز عليج سمنانه صايره بطه تخبلين
سليل : مو شاذي
سجاد : اشاقه وياج بسرعه تزعل ام دميعه

سليل : هذا هو خلصها تقلد وام دميعه
سجاد : بمناسبه الخاولي ليش مدشني
سليل : شون يعني
سجاد : تعالي اعلمج
سليل : رغم كل السنين الفاتت بعدني من اكون بحضنه انسى نفسي سجاد حب العمر الي فتحت عيني واني احبه مرات يكون هادئ بارد بس اي حركة مني ينگلب شعلت نار عنده تصرفات مزعجه حاله حال اي رجال بس طيبته وحبه اليه دوم تخليني اتغاضه عن الشغلات الي تضوجني
كل الفات والصار بيه علمني مااتنازل عن ملكي وسجاد ملكي تعلمت اصبر لو شكد ما اتأذه بعدني ابجي من اقل تصرف منه من اغار من يعيط بيه ولهذا اليوم من يشوف دمعتي يضوج ويسكت حتى لو نتعارك
جهالي قطعه من روحي اي قطعه لان سجاد هو الروح ولهذا اليوم اغار حيل عليه صرت احاسب وانتبهه على حركة منه رغم اعرف ماعنده شى بس شسوي غيرتي قويه عليه يمكن انعديت منه

رشا : راسلت الكاتبه وقنعتها بقصتنا وحبتها حيل بس بقت قصه ريم وحيل جذبتها وطلبت تحجي ويه عمتي ولان عمه تحبها وافقت ومدري شلون قنعت عمه تنطيها قصة بابا وقصتها توقعت بس قصتي تنزل تالي اخذت العائله مقاوله
مرات اتردد واخاف واكول شسويتي بروحج يرشا ومرات اكول شكوو بيها خلي الناس تشوف الظلم الي وكع علينا

ريم : حسوني
حسين : هااا حبيبي بيج شى
ريم : فدوة وديني لاهلي
حسين : مو قبل كم يوم يمهم
ريم : ما اتأخر والله لان غزل هناك على الواهس
حسين : بالاول اريد بوسه
ريم : تقربت وبسته
حسين : كم مره كتلج اني مو تيم وتبوسيني هيج
ريم : لعد شلون ابوسك
حسين : هيج
وسحب راسي وباسني بهدووء ويتفنن بشفايفي لحد مذبت بيده وكتله ااخ بطني
حسين : هاي كلاواتج بطليها اعرف لان عندج طلعه متخليني اتقرب منج
بسته بقوه من خده وكتله يله حباب حتى لنتأخر ومن نرجع اعوضك للصبح
حسين : ميحتاج تعوضيني اني اخذ حقي كامل منج
ريم : گلي الك بس يله
مااشي بدلي وامشي نروح
ريم : يمه فديته للحنين بسته من شفايفه قووي وهو يضحك ويهز بيده بدلت وبدلت لتيم وطلعنا بلطريق جان يدك الموبايل جاوب عرفت نوريه
حسين : وهسه شلونه مااشي جاي بلطريق
ريم : خير
حسين : ابويه متخربط ميعرفون شبيه.
ريم : توصلني لبيت اهلي لو ترجعني
حسين : حبيبي بس خلي افهم شبيه ابويه ماطول قريب على بيتهم شيرجعني للبيت سيطره وفره دقايق ابقي بلسياره بس اشوف شبي واجي
ريم :لتتأخر

وكف السياره باب بيتهم اباوع البيت شكد كأيب صاير ركزت عيوني على المشتمل الي بصفه جان مشتمل جديد حلوو رجعت ذاكرتي لنفس المكان جان بيه بيتنا الي انولدنا بيه صفنت عليه الهيكل حلوو وراقي وحديث بس الكاع هاي شافت اشكال من الضيم والقهر نفس الكاع جان على ظهرها بيت هيكله شايل نفسه بيه بنيه شابه تزوجت ابن عمها وكل ذنبها حبته من كل گلبها تالي ظلمها وموتها بحسرتها واخذ ابنها الي ورث قله الحظ منها وكبر الولد وكعد بنفس البيت وتزوج بيه واستقر هو وزوجته واربع بنات ولد عشنا الجوع والالم والمشاكل متنغصين حتى على لكمتنا اذا يوم راحه عشر ايام مشاكل وطلايب نفس البيت انتهت قصته يوم محترك وترك اثر بكل وحده بينه لنهايه عمرنا مننسى حالنا واحنا محصورات بلسطح ونخاف النار تاكلنا
البيت احترك وصار كوم فحم وانكرب وانبنا بمكانه بيت بس تبقى هاي الكاع شالت البيت القديم ولو عدها لسان كان نطقت وكالت شكد شفتو ظلم انتم وابوكم وبيبيتكم رازقيه
فزيت من صفنتي على صوت حسين
هاا حبيبي

حسين : انزلي
ريم : نزلت الجامه خير ليش انزل
حسين : حبيبي بس اودي ابويه حاله حيل تعبان ومتخربط انزلي ١٠ دقايق ويجي ياخذج سجاد هسه اخابره
ريم : منو هنا بلبيت
حسين : ماكو احد امي وابويه راح اخذهم ويايه وتبقى بس بيبيتي انعام
ريم : تعوفوها وحدها
حسين : شنسوي لعد منتأخر بس اشوف وضعه ساعه وراجعين
ريم : عوفني يمها
حسين : لا
ريم : لتخاف مااكلها ترجع تلكه اعضائها كامله
حسين : بدون مشاكل حبيبي هسه يجي سجاد ياخذج لبيت اهلج ومن اكمل اجيج
ريم : والله مااسويلها شى وانتظرك هنا مو تكول متتأخر
حسين : واذا صار شى
ريم : كتلك وعيونك مااسوي شى الها شايفني قاتله مجرمه تره والله حجيك ماصخ
حسين : يله انزلي وما نتأخر ديري بالج على نفسج وتلفونج بيدج لتذبي
ريم : اوك ونزلت وبيدي تيم صرت وجهه بوجهه ويه نوريه وعلي وجان علي تعبان وكوه يمشي كلت السلام عليكم مجاوبوني اثنينهم ابتسمت بوجهه حسين وكلت حبيبي دير بالك على نفسك وانتظرك ودخلت وسديت الباب اعرف راح تتخبل نوريه لان دخلت للبيت وعافتني وحدي بيه
باوعت على تيم تروح تلعب بلحديقه اكو طوبه متروح منا ومنا اطيح حظك
اي ماما
راح يلعب واني دخلت اباوع البيت هادئ بقيت افتر بيه تالي فتحت بابها لكيتها تباوع وساكته
تقربت منها وكعدت يم راسها كبرانه حييل ومنتهيه صفنت عليها وعلى وضعها ساعات اكول ليش لهسه عايشة وساعات اكول يجوز عذاب من الله لان حالتها كلش صعبه الحاجتين جواها وبيها زهايمر ومريضة كل وكت جريت نفس بهدوء وباوعت بوجهه تدرين جانت اقصى امنياتي واني صغيره اشتري سياره وادعمج بيها الجهال كلها معروفه يكرهون من يأذيهم بس اني مجنت اكرهج كلمة الكرهه قليله عليج جنت اريد اشرب من دمج الكاج محروكه مكطعه مذبوحه معلكه بلشجره تصوري طفله وتفكر بيج بهاي الطريقه لعد شكد تكرهج

بس سؤال نعوم تعرفيني بقت صافنه بوجهي ومبين معرفتني
الظاهر القرص مالتج مفرمت وناسيه كلشي سؤالين ياكلن ويشربن ويايه ومالكيت اجابه الهن لهذا اليوم اول سؤال انتي الحركتينا عيونها تباوع يمنه ويسره وعليه

حتى لو انتي هم اكيد متتذكرين اذا كم مره اسألج ومتجاوبين مو عاد هسه زين السؤال الثاني اني صرت هسه ام واعرف بالامومه عوفج من ابني لان طالع من روحي اكيد غير شى مثلاً بت رشا او جهال سليل اذا واحد وكع منهم اتخبل اذا انجرحو گلبي يأذيني انتي شلون من گلب عندج تاخذين طفل عمره ساعه وتربي وتهتمين بيه وتغسلين اله وتبدلين حفاظته لا تذكرت قبل ماكو حفاظات وصل وتغسليهم وتسهرين وتسبحين وتوكلين وتكبرين وتالي تكرهي ومطيقين شگله شلون تكدرين القابليه الشايلتها مشايلها بشر عادي ولا يوم حبيتي ولا عطفتي عليه رغم هو يحبج خلص عمره يتمنى يحس بأمومتج طه جان يعتبرج امه

جان تنطق بصوت ناصي وكلام مكسر طه الگلب
ريم : يعني نسيتي گلشي ومانسيتي ابويه والله يابابا حظك برتقالي ويه نعوم نست الكل ومنستك خلي اذكرج اني ريم بت طه حبيبج الي جنتي تمشين وتعيري بينا بنات طه أذيتيهن ومتأكده انتي الحركتيهن وخليتي حياتهن جحيم ومكفاج كسرتي فرحتي الاولى بحسين وحرتي شسويتي بعد هذا الوكت كله والسنين الراحت بنات طه اخذن منج اكثر ناس تحبيهم

سليل اخذت ابن اخوج جنتي روحج بيه وتزوجته وهسه الْحٍمَدٍ للـّہ بيت وحدها وجهالها اثنين ويموت عليها سجاد وراها تعلقتي بحسين وصار اعز حتى من ولدج وشكد حاربتي حتى مياخذني حتى انجلطتي وتاليها هسه اني مرته وهذا الي بطني بحركه خفيفه مشيت ايدي على بطني ابنه واني هسه چنت هذا البيت شفتي بنات طه شلونهن ذني العيرتي بينا وبت ابنج الي ربيتيها وجنتي تضربيني اذا تقربت منها اخذت انكس رجال فضاله رشا هم بت طه اذا ناسيتها

يعني بعد التعب والمشاكل والخطط والحرك وكطع الارزاق والسحوره صفت النه كلشي تحبي وانتي باقيه بهاي الغرفه وحدج محد بحالج لا ابن يسأل عليج ولا حفيد او حفيده لو جنتي زينه وحقانيه وطيبه ويه بابا جان هسه لكيتي كاعد يم رجلج يداريج انتي الخسرتي ابن جان صار عكازتج بهيج اوقات صعبه والي زرعتي كعد تحصدي هسه وبهذا وضعج الكسيف ربج عادل عظيم ومايقبل بلظلم وانتي ظلمتينا من اول يوم انولد بابا وسجلتي بأسمج
يجوز بعد مااشوفج ولا تصيرلي هيج فرصه احجي بيها وياج بس اكول مامبريه الذمه على كلشي سويتي وان شاء الله نتلاكه يوم القيامه وناخذ حقنا من عيونج
حسبي الله ونعم الوكيل كمت من يمها ورحت للمطبخ اشرب مي ودك تلفوني
رشا : وينج يمعوده تأخرتي
ريم : يم نعوم
رشا : يانعوم
ريم : كم نعوم عدنا بيبي نعال نسيتيها
رشا : شوداج يمصخمه
ريم : تعبان ابو حسين وداه للمستشفى شويه ويجي
رشا : ادزلج احد ياخذج
ريم : لت منتظره حسين
رشا : ديري بالج على نفسج
ريم :اختج بطله ضوجوني احرك البيت واطلع
رشا : ههههه كدها اعرفج
بقيت كاعده اتصفح بلفيس وصحت تيم كعدته يمي اخاف يلعب بشى ويتأذه وره ساعه سمعت صوت هورن وطبو كمت على حيلي طب علي لازمه حسين ودخله لغرفته جان تتقرب مني نوريه

نوريه : لا عبالج حبلتي راح تاخذي مني الصار لويت ايد اليه وغصب عني قبلت مااخليج تتهنين بيه يوم من عمري وازوجه تاج راسج وحده من مستواه مو مبكعه وارمله اخذله بنيه واكسر خشمج
ريم : ابتسمت بهدوء وتقربت منه وكتله شسوين سوي ايدج الج وذاك حسوني اذا كدرتي تزوجي زوجي براحتج
نوريه : هسه يمل منج هذا حب مراهقه قديم شى محصله وكتل نفسه وماطول حصلج راح يشمرج شمره الزبل

ريم : شبيج عمه متعصبه انتي مره مريضة ليصير بيج شى واذا على حسين يبقى ابنج ويروح ويجي عليج بس تالي الليل بحضني اني يكدر يعوفج بالايام والاسابيع ميجيج يكتفي بأتصال ويسده بس اني الليله الي ابات بعيد عنه يتصركع يجيني من الصبح ياخذني اني ريمته الي كسر كلامج وكلام ابوه وعائلته كلها واخذني لتعبين نفسج عمتي ابنج بإمانتي والبيه زود ياخذ حسين مني

جان يطلع حسين من غرفة ابوه ابتسمت بوجهه وكتله يله حبيبي تأخرنا
حسين : عينج عليه يوم واذا صار شى اتصلي
نوريه : ابقى بات هنا ابوك تعبان
حسين : تباتين حبيبي بيت اهلج
ريم :لا اصلاً رجعني للبيت تعبت وبطني توجعني حييل وسويت نفسي عندي الالام
حسين : يوم اوديها لريم للبيت واذا صار شى اتصلي دقايق اني يمج
ريم : طلعت وسحبت تيم ويايه واباوع نوريه شبت نار ابتسمت وطلعت ورجعت للبيت ودزيت خبر للبنات مااكدر اجي
وبيومها خليت حسين بحضني عبالك مثل الوحده تخاف ياخذوه منها وهو مكيف لان نايم بحضني ويشوفني يكوم ويكعد احضن وابوس بيه

تحسن علي هو نوبات سكر تجي ياكل حلويات ولا يهتم وحسين يروح ساعه ويرجع كل كم يوم
كاعده بلمطبخ اثرم زلاطه واباوع على بطني كبرت وصعد الطفل لگلبي سالفه البنات يكتبن القصه قالقتني وحجيت ويه الكاتبه ورفضت اكثر من شهر ونص يحاولون البنات يقنعوني واني قافله بس استفزتني وكالت مو مهم قصتج عاديه واني متحملت كتلها اكتبيها عادي وانطيت الموافقه لحد معرفت من رشا تقصدت تسوي هيج حتى اوافق
اهفي من الحر شهر السابع ٢٠١٩ والدنيا موت حر صار كم يوم وضع حسين معاجبني ذاك اليوم طلع بليل ورجع وجهه الصبح كال ابويه تخربط هواي صاير يروح لاهله والبارحه راح كال طالع لسجاد وخابرت سليل كالت سجاد نايم شصاير ومااعرف الفار گام يلعب بعبي واني اثرم كصيت اصبعي شاغت روحي كمت اغسلها جوه المي ودخل حسين وشافني هيج اجي يركض
حسين : شبيج حبيبي
ريم : وين جنت
حسين : اكلها شبيج وشنو هذا الجرح تكول وين جنت
ريم : وين جنت حسين وضعك هاي الفتره كلها معاجبتني تروح وتكول للمكان الفلاني وانت مرايح اله وتبقى من الصبح لليل بيت اهلك تره حيل اختنكت من هذا الوضع ومن اسألك تتهزم من الجواب
حسين : طريقة كلامج محابها

ريم : طلعت من المطبخ وكعدت بلهول وبطني توجعني ومختنكه خفت لا نوريه قنعته يخطب يتزوج دمعت عيني من مجرد فكرت بلموضوع
حسين : غير افهم شنو هاي الاعصاب والتوتر
ريم : عندك شى خطبتلك امك موو
حسين : ههههه وبقى يضحك ويضحك واني اشيط بلزايد
حسين :دومج ذكيه بس عندج هفوات مال وحده غبيه فول
ريم : تحجيلي لو اعيط اااخ بطني
حسيت بتقلصات خلتني اختنك واصفريت وهو حس عليه
حسين : يمعوده لتجيبين اسبيعي مثل اختج هسه احجيلج بالاول تحلفين متكولين لاحد وخصوصاً رشا

ريم : مااكول بس احجي
حسين : شعلان تزوج
ريم : لا بربك طفرت من مكاني
حسين : يمعوده بطنج
ريم : جرني وكعدني عوف بطني مابيها شى شمدريك انتي احجيلي كعدت بصفه لزك
حسين : اتزوج قبل شهرين وجابها ويه جنات بنفس البيت وعلكت عركات ومشاكل لدرجه جنات كاتله مرته الجديده وصايره من الروس بلشارع ولازمها شعلان مزوعها العافيه واجت من الكوت لبغداد هاجه بليله ظلمه وهو تخبل وحلف عليها يمين هي ترجع واله يطلكها
ريم : كللللللوووووووش
حسين : خبال شجاج
ريم : كمل الله عليك
حسين : حقي مااكول بس اعرف ماطول عقلج شطح بغير مكان راح تسوين مشاكل
ريم : مااسوي فدوة لوجهك الحلوو وسحبت وجهه وبسته كمل فدووة اروح لطولك الحلوو
حسين : باع اللواكه من عندج سالفه يمي
ريم : حبيبي اني ريمتك لا اتلوك ولا شى بس كمل مو راح اجيب والله من وراك

حسين : بس اثبتي والله مينلام سجاد يسميج زيبك
ريم : راح اشك هدومي من حرگان الاعصاب احجي دخيلك
حسين : ابنه تخربط ونقلناه للمستشفى ومن عرف اجه مثل المخبل وراد ياخذه وهي منطته ولمت المنطقه عليه بلعياط تالي كعدنا ويااه وفهمناه ميصير اثنينهن بنفس البيت كال لخاطر ابني راح افصل البيت كلمن الها نص بلبدايه مقبلت وكالت لو يطلكها لو يطلكني وجيب ودي صار شهرين تالي وافقت الخاتون من لحت عليها امي وابويه هم مقبل الها تطلك كال الها ما الفيج اذا اطلكتي اضطرت تقبل والبارحه اجه اخذها هي وجهالها صار شهر امي ادز عليه على شغلات تخصها لو ابنها تمرض لو كعده ويه شعلان علمود موضوعها واني مردت اكول الج اعرفج راح اطشيها
ريم : زين معرفت منين هاي الي اخذها
حسين : شمعرفني بس تكول جابها واجه وكال هاي مرتي وحالها من حالج وعلكت

ريم : طفرت ركض سحبت تلفوني ودك على رشا جان يجر التلفون مني
حسين : احنا شگلنا
ريم : بداعتي خلي ابلغها الله عليك
حسين : گلتي مااكول مااريد هوسه ريم صار شهرين ضام عليج من وره هاي السالفه وتالي هسه ركضتي على رشا
ريم : يله مااكول انطيني التلفون سحبته من ايده وركض واني وبطني ياساعه ادعبل وطبيت للحمام وقفلت الباب عليه
حسين : ريم افتحي الباب
ريم : ماااا
حسين : اذا اتزحلكتي وكعتي فوك وكعتج اضربج
ريم : لتخاف ماعليه شى
حسين : صوجي كتلج والله
ريم : اي عفيه جوصك
حسين : جوصك بعينج ولج افتحي الباب
ريم : احبك حسين هاي احلى بشرى انطيتها اليه
حسين : صوجي ااااخ شحجاني

اتصلت مره ثانيه جان تجاوب
ريم : زغرطي يانشراح الگاي احلى من الراح كلللوش
رشا : الحباله مبينه حيل مأثره سالمين شصار
ريم : شعلان تزوج
رشا :ناسيته ومااذكره عشت حياتي بدونه حسيت اخذت حقي منه راح ومكام يسأل حتى على بنته بس من كالت ريم هيج نغزني گلبي مو نغزت حب بس نغزت مفاجأه احتقار كراهيه اليوم تأكدت وبلدليل القاطع اني اختاريت انسان فاشل وعوينجي وابو نسوان واني مجرد مهره على كولته صعب ترويضها وروضها ومل منها وراح لغيرها سكتت التقط انفاسي الي تناثرت بلغرفه احاول اجمع كلمات تناسب الصدمه السمعتها

ريم : الوو وينج گلت راح تهوسين وتگلبين البيت بلعياط والهلاهل اني فلتت من حسين بلكوه حتى ابشرج وانتي تسكتين
رشا : بعدين نتخابر سديته حتى اجمع شتات نفسي ردت افهم وين عقلي جان من جنت مأمنه بيه واحبه ليش مكتشفت معدنه من وكت ليش صدكته حتى من رجع يتوسل
ونادم صدكته بس مقبلت ارجع اله تمددت على ظهري وجهي للسكف شهيق زفير وغمضت اريد اهدأ واجمع افكاري الغلط مني من الاول اني الي أمنت ومسألت ولا استفسرت يوم معرفت بيه مطلك تغاضيت عن هواي امور وعماني الحب وهاي نتيجتها
نبضات گلبي ادك بصدري وتتناغم ساعه تصعد وتعلن ثورانها وساعه تهدأ تعلن استسلامها گلبي مثل المحيط ثائر هادئ بنفس الوقت

جمعت نفسي ورجعت اتصلت بريم
ريم : مديت راسي بهدوء اباوع حسين ماكو طلعت جان يلزمني
حسين : هااا فختي اله كتيلها
ريم : اايييي مي بارد نزل على گلبي
حسين : وشستفاديتي هسه
ريم : ارتاحيت مو شرط استفاده
حسين : بعد ولا احجيلج شى
ريم : متكدر تضم بطرقي الخاصة اخذ الي اريده منك
حسين : وبعد لتكولين زوجتك مخبل اتزوج عليج غير تذبحيني واني نايم
ريم : زين تدري وتعال گلي يعني خوف مني متتزوج مو حب
حسين : من اكلج عندج هفوات مال اغبياء متصدكين اني حسين جدي احترك وانشوى وانحمس يله اخذتج شلون اتزوج عليج انت هنا واشرت على عقله وهنا واشر على گلبه وهنااا على صدره انتي بيه
ريم : اموت على رومانسيتك بس جعت تره
حسين : خربتي ام الرومانسيه ياجوعيه
ريم : هههههه تعال نتغدا
رجعت اتصلت رشا وفهمتها الي سمعته جان تكول
رشا : اريد رقم جنات
ريم :منين اجيبه
رشا : من تلفون رجلج
ريم : هاي سهله شعجب سهير مبلغتج
رشا : البنيه تزوجت والتهت ومن اخابرها ابد ماافتح هذا الموضوع
ريم : اجت ملبلبه لحد يمج
رشا : رقم جنات مو تنسي
ريم : خلي ينام ساعه والرقم يمج
رشا : اختنكت بدلت وطلعت لسليل
يتبع ...

ابي والغزلان الجزء الثاني

البارت الاخير القسم الثاني

لاتزرع ورد بتراب الايام ..
غدار الزمن ووروده ذبلانه .
ولا تعشك أخدود البيه ألوان .
مو كول الخدود الحمر خجلانه
مرات السنابل تنحني للكاع
مو مسكينه لكن هي ريانه .
ومرات السنابل تعله فوك الهام .
مو هيبه العلو تلكاهه فرغانه .
أو لاتسكي الزرع من ماي جاسه الغير
يجيب الماي كول ما لكت كيعانه .
وليغرك شجر لابس خضار الكون .
هذاك التوث منه الغنم شبعانه .
والبر حي عزيز وأغلى ماموجود
وجذوعه الخضار سنين عريانه ...

سليل :
اشتغل وملتهيه بلجهال اندكت الباب
فتحت الباب ولكيت وحده لابس بنطرون يمكن مدخلته عند البنچرچي والقميص كصير وشال موضوع الشال هذا داقني اباوع عليها تفصلي نعم
هذا بيت ابو زين
سليل : فتحت عيني عليها وكمت اطكطك كلت هسه تكول اني مرتي خرب عقلي الاكشن
اي بيته منو انتي
اني ام وليد وديت سيارتي للمحل مالتي وهو انطاني العنوان كال تجين ساعه ٤ الظهر تستلميها واجيت على الموعد
سليل : اباوع عليها من فوك ليجوه مو مره قنبله حتى مكتلها تفضلي
ثواني واشوف سياره عاليه طبكت بلباب ونزل منها سجاد
سجاد : السلام عليكم
وعليكم السلام هاي وينك ياعيني تأخرت
سليل : خزرتها هاي شبيها تتموع واباوع عليها وعلى سجاد
وسجاد يباوع وحاصرته الضحكه
سجاد : متأخرت تفضلي سويج السياره وضبطت الج كلشي
عااشت ايدك والله مو كدامك ايدك ذهب بلسيارات سيارتي متتصلح اله على ايدك
سليل : تفضلي ادخلي اخاف بعد عندج سوالف ويه ابو زيوني
لا حبيبتي تسلمين متأخره تفضل باقي حسابك وشيصير اخابرك عوود
سجاد : ان شاء الله

ركبت السياره وراحت واني طبيت للبيت شايطه لله
سجاد : قبل متعيطين وتسوين هوسه هاي زبونه عدنا بلمحل توكف وتخلي الرايح والجاي يصجم بيها
سليل : وانت شعليك بت عمك بت خالك وحده متقصده تجي لمكان تتصجم بيه
سجاد : تعالي اخذيلج راشدي
سليل : سجاد تره روحي واصله للسما مو مال هاي سوالفك
سجاد : ابتسم وكال تغارين عليه
سليل : اذا محجيت شعندك ويه هااي والقران لحظه مااضل بيتك واخذ جهالي واروح لبيت اهلي
سجاد : حتى اكسر رجلج مو هي تايهه
سليل : احجي شعندك وياها ونزلت دمعتي
سجاد : حضني حييل وعيونج ماعندي شى بس رجولتي مسمحتلي مره توكف بمحلي وتتصجم واسكت ولو عندي شى وياها مااخليها تجي للبيت هنا واعرفج راح تشوفيها اتواعد وياها بأي مكان بس اعرف بروحي مااسوي الغلط تالي عمري اغلط هاي شبيج حبيبي

سليل : كمت ابجي بعد مالك دخل بيها واحظرها اذا تتصل
سجاد : تأمرين ااخ شكد حلو من تغارين وتشيطين لو لاعب بعد عليج وكايلج صاحبتي
سليل : جان ملحكت تكمل الكلمة اكتلك خلاص
سجاد : مرتي صايره مجرمه
سليل : اذا شى يخصك اي ابو طبر ميلحكني
سجاد : ههههه تعالي اراضيج
سليل : راضيتني
سجاد : لازم اراضيج بعد
سليل : منا الجهال
سجاد : بابا زيون عينك على اخوك بس نشيل الفراش اني وامك ونجي
سليل : ههههه تموت على الشيل
اندكت الباب راح فتحها طلعت رشا وبتها ضحكت وكتله يله امشي شيل
سجاد : لا عبالج فلتي الليل كله عشا
سليل : هههههه
رشا : اجيت بوقت خايس مو
سجاد : كلش
رشا : لعد باقيه كاعده
سليل : هههه اي عفيه خلي ارد السواه قبل شويه
سجاد : رايح اودي غراض لابوج وارجع

سليل : شبيج وضعج مو طبيعي
رشا : منتظره خبر من ريم
سليل : شكوو ياستار
رشا : تجيبلي رقم جنات
سليل : هااا رجعنا شصار
رشا : كعدت سولفت كلشي الها
سليل : وشراح تسوين
رشا : اخابرها
سليل : يمعوده جوزي منهم خليهم حوبتج ناس تاكل ناس
رشا : اذا مااحجي ماارتاح
شويه وصلت رساله رقم جنات اخذت الموبايل وصعدت ليفوك بغرفة سليل
دك شويه وجان اسمع صوتها
صار ٥ سنوات ماانسى التاريخ ٢٠١٤/٩/١ من دخلت عليج ولكيتج بفراشي
جنات : منين جبتي رقمي وشتردين
رشا : بس ردت اكلج هااا توجع موو تأذي الخيانه الف الْحٍمَدٍ للـّہ هسه انتي كعد تعيشين نفس العشته بس اني عندي كرامه عفتها الج وطلعت وانتي بلا كرامه راح تضلين العمر كله يدمغ على راسج ويه ضرتج عايشه وتشوفين رجلج شلون ينام ويه غيرج هاي اذا مخلفت ولد وشمرج بلشارع
جان تسده بوجهي رجعت كتبت رساله الها وكتلها شفتي يجنات الي يعيش بلحيله يموت بلفكر وانتي يوميه راح تموتين وتعيشين احقر احساس من شعلان فضل وحده عليج وجابها بفرشتج شكد صارت مواقف ومصايب سواء بيج او بيه مرتاحيت بكد هسه الله يلراحه الي اني بيها ابقي هيج مكفخه اله وذليله انتي مو موجهه نعمه واحترام وجهه ذل واحتقار وحصلتيها بأمتياز الف الْحٍمَدٍ للـّہ والشكر طلعت حوبتي بيج واخيراً خمس سنوات انتظر واكول يارشا شوكت تضوك جنات الي ضكتي ويوميه وداعت بنتي اسبح وادعي وخاصه بصلاة الليل وارفع ايدي اكول يارب العرش العظيم ذوقها الي ذقته وحسبي الله الوكيل هذا دعائي يومياً خمس سنوات مابطلت يوم من هذا الدعاء واليوم الله استجابلي

من اليوم بعد ماادعي بس الي ولبنتي ولاهلي بلستر والصحه والعافيه انتم صفحه وانتهت من حياتي دزيت الرساله على الواتس حتى اعرف قرتها وصار خطين زرك كمت وحظرتها حتى لدز شى يغثني توجهت للقبله وسجدت لله شكر
سليل : صعدت وشفتها ساجده وتبجي وبس رفعت راسها حضنتها كاافي
رشا : ارتاحيت سليل كلش ارتاحيت عاشو كلهم الي عشته

سليل : اطويهم من عمرج
رشا : طويتهم وداعت فرح ومن اليوم مالهم وجود لا بخيرهم ولا شرهم
سليل : تعالي نسوي كيكه ونروح نتعلل يم ماما وهم نحتفل بمناسبة فرحتج
رشا : يله امشي
سوينا كيكه وحظرنا كلشي ساعه ورحنا هناك للبيت وكعدنا نسولف ونضحك وعمه تدعي لغزل تصير عمليه طفل الانابيب مبقى شى وتسويها

غزل : لميت الفلس على الفلس الخمسه الالاف والعشره وكل مينطيني مصرف ومرات البنات ينطوني اضمه بقوطيه صغيره لحد وماما من سمعت انطتني ٥٠٠ الف لامتهم خطيه الها حسبتهم وطلعو ٣ ملايين كلت لعمار اسوي بمستشفى كمال السامرائي على الخااص ورحت حجزت جنت اخاف وافكر بس متأمله خير وفحوصات وروح وتعال وعلاجات واركض بكل طاقتي وعمار وماما ويايه وسولي حقن الاجنه بلرحم الخوف متملكني لان حيل تعبت من العلاجات وهم لان لميت الفلوس كوه يعني احسه الامل الاخير الي
خاله وبسمه ساعدوني حيل ميخلوني اشتغل وطلبت من عمار اروح لبيت اهلي مقبل كال ابقي يمي استحي اروح واجي عليج يوميه بقيت مردت احرجه يوميه بليل الزم التسابيح والادعيه وعلى نومتي واتوسل يصير طفل كمت اخاف انام ليصير شى انطوني مده ١٤ يوم وارجع للمستشفى واحلل التزمتني دكتوره حتى للعياده رحت الها في سبيل ميصير خطأ خلصت ١٠ ايام نايمه على ظهري وبس التسابيح وايات القران ومرات احب اتصغح واقرا قصص ادزهم الي رشا حتى اخلص وكت
غزل : كعدت الصبح اليوم العاشر الي الالام قويه عندي كمت للحمام ولكيت عندي اسقاط لطمت وكعدت بلكاع ابجي
ام عمار : يمه غزل افتحي الباب شبيج
بسمه : شصاير يوم
ام عمار : ماادري نزلت من فوك تركض حتى مصبحت وبس دخلت سمعت عيطتها وبجيها
بسمه : اخاف سقطتت
ام عمار : دخيلك يارب غزوله بداعت ابوج افتحي الباب لتصعدين السكر عندي مابيه حيل هبطات
غزل : جنت ابجي بهستريا واني اشوف حالي ذبيت كوم فلوس ومصار عدا العلاج وأذيته مبين من وضعي ولا واحد ثابت لان نزف قوي اسمع خاله تبجي وادك بلباب شكول الها سحلت روحي كوه وفتحت الباب
ام عمار : شبيج يمه

غزل : وكعو خاله وحضنتها وابجي
ام عمار : فدوة الج حبيبة يجون غيرهم اذكري الله بنتي همه لحمه لو شباب شسوين
بسمه : خلي نغسل الها ونطلعها ونخابر عمار ياخذها للطبيب وضعها مبين موزين
غزل : غسلولي وبدلو ملابسي واني اشهك من البجي وصعدوني للغرفه وغيرو الفراش ومددوني واشهك
كعدت يم راسي ام عمار وتقرا ايات
خابري اخوج خلي يجي

بسمة : اي هسه
غزل : بقيت اشهك بدون توقف عبالك قهري كله انفجر بذاك الوكت بقت خاله وبسمه يحاولون يطيبون خاطري ومافاد هلمره احس بقهر اكبر لان اعرف بيهم ينتظرون الساعه الي احبل بيها

اجه عمار وكعد يم راسي ويبوس بيه
عمار : شبيها حبيبي شنو هاي الدموع يمعوده منو مات
غزل : جهالي عمار ماتو ولا واحد بقى
عمار : ومنو يكول كلهم مو زرعو ٦ وحتى اذا كلهم الْحٍمَدٍ للـّہ والشكر المهم سلامتج وانتي عندي تسوين روضه جهال
غزل : وديني للدكتوره
عمار : صار اني ابدلج واوديج
غزل : لا اني اكوم مابيه شى
ام عمار : اخذها يمه وطمني عليها وخلي تفحصها زين ليروح يصير بيها شى لان نزفت هوايه

غزل : اخذني للدكتوره وكوه امشي وبعد سره طويل فحصتني وكالت مسقطتهم ولا واحد باقي رجعت ابجي وهي اطمن بيه اكدر ارجع اعيد الكره شعيد هي فلس فلسين واعيدهم عبالها كل الناس مثلها عدها ملايين تذبهم كل وكت طلعت والدنيا طافره من عيني وسألني عمار وكتله ولا واحد
عمار : فدوة الج المهم انتي زينه وصحتج زينه

صعدت بلسياره واباوع على الشارع جهال اشكال والوان وجهال وصخين بلترفك لايت يبيعون ويجدون يعني شيصير لو اني هم عندي واحد ذوله مو شامريهم ردت والله واحد مو اكثر
اباوع على عمار اعرفه مقهور مثلي بس يغطي وميبين الي كتله وديني لاهلي

عمار : ليش حبيبي بيتج ترتاحين اكثر
غزل : عفيه وديني اريد ماما
عمار :اذا ترتاحين اوديج
غزل : كتله جيبلي ملابس اذا تكدر حتى لو باجر
عمار : ليش تباتين
غزل : اي عفيه كم يوم اصير زينه وارجع
عمار : مااكدر غزل موتعرفين تعلمت عليج ليش تكبرين المواضيع شى ومصار قابل الدنيا انگلبت
غزل : فدوة اروحلك عوفني كم يوم هنا ارتاح بس ارجع وياك راح اتأذه
عمار : هذا هو اخلي بسمه تحطلج كم شغله واجيبهم واجي كم يوم تردين تبقين
غزل : مااعرف
وصلني للبيت ودخلني واجت ماما ورشا يركضون
هااا يمه خيرج
غزل : حضنتها وابجي
رشا : شصار عفيه تعاركتو
عمار : لا والله بس فشل سالفه الطفل ومعاش ولا واحد هسه جنا يم الدكتوره وهي كدامكم كالبتها مناحه
غزل : شلون مااكلبها مشفت شصار بيه لحد مزرعو
نهر : يمه عمار عوفها يمنا وروح ومن ترتاح تعال اخذها
عمار : هو جبتها يمكم عمه عينج عليها رحمه لاهلج وسكتيها تره والله الموضوع ميسوه
رشا : احنا يمها ليضل بالك توكل بالله

راح وسدينا الباب ودخلنها
نهر : شجاج يمه فدوة الج صحتج وعمرج بلدنيا
رشا : غزوله هسه انتي تذبين حركتج بلرجال هو شعليه
غزل : من قهري متعرفون شحس والله متعرفون
نهر : لا يمه اني حاسه بيج محد ضاك الي ضكتي غيري تعالي ارتاحي وربج يسهل

رشا : اباوع عليها بحضن عمه مثل الجاهله تشهك وتناشغ حيل مدمره نفسيتها جانت حيل فرحانه من سوت عمليه طفل الانابيب
خابرت سليل حتى تجي وريم اقلها من تشوفنا كلنا ترتاح
وره ساعه ريم وسليل يم راسها

ريم : يمعوده هسه اجيب وانطي الج فدوة الج جهالي كلهم ولا تبجين
سليل : واني تسوين فضل تاخذين زين وكيان مرمرو گلبي
رشا : بقت عليه اني اريد اقرا البارت مبقى شى وينزل اخذي فرح
صار عندج روضه

غزل : اريد من بطني اريد ابني وابن عمار متعرفون النار الي بصدري الله يحفظلكم جهالكم وهمه هم اعتبرهم جهالي بس اريد طفل من اكثر انسان احبه شنو ذنبه يبقى بله جهال
نهر : امر ربج
غزل : اني قررت اطلب الطلاك منه
ريم : هاي مأثر عليها الاسقاط انجبي واياج تعيديها
غزل : لعد يبقى بدون جهال مكافي تزوجني مطلقه هلمره مااخلف
سليل : اتزوجج بنيه او تزوجج مطلقه ماكو فرق مو فيصل اخذج بنيه ومحبلتي شنو هذا الحجي وثاني شى هو محد ضربه على ايده حتى تتزوجي وين يلكه منج گتل نفسه حتى تصيرين اله لتقللين من قيمة نفسج وهذا الحجي الماصخ بطلي
غزل : احسن مايتزوج عليه ويكسرني
رشا : هسه الرجال تصخم تزوج والي يسمعج يكول صار ٢٠ سنه ماعندج اطفال هو سنتين

غزل : بس الدكتوره كالت عندج خلل بالانابيب الناقله والطفل ميصير اله عن طريق الانابيب وسويت كدامكم وذبيت كومه فلوس عدا المراجعات والم العلاج وتالي مصار

ريم : يصير وعيونج مو مره مرتين او تلاثه لحد ميصير
غزل : اي مو عندي بنك اخذ منه ملايين واسوي
نهر : كلنا نساعدج
غزل : مااريد احد يساعدني اريد اطلك
سليل : هااي تخبلت اكوم اسويلج شى تاكلي بلكت تصحين على نفسج
غزل : جنت فاقده الامل وفاقده حتى الرغبه بلدنيا اصعب شى من افقد اهم احساس ممكن المره تعيشه وهي الامومه اشوف الي بعمري والي اصغر صارن امهات واني لا
نهر : سمعت صوت طه رحت اله وفهمته على وضع غزل بس هو يهديها خفت لتتصل بعمار وتهجم بيتها
حجي طه : وينها هسه
نهر : بغرفتي
حجي طه : خلي اصعدلها
غزل : كاعده والبنات دايرمدايري دخل اندكت الباب ودخل بابا كامو البنات كلهن يبوسن بيه ويسلمن واني ظهري ميلخني مااكدر اكوم تقرب مني وباس راسي شمرت نفسي بحضنه وابجي
حجي طه : لا لا غزالتنا الهاديه تبجي غزوله هاي العيون الحلوات متبجي بنيتي
غزل : مراح اصير ام
حجي طه : وشمدريج انتي تعلمين الغيب كله امر الله ورزق الله وفي السَّمَاء رِزقكم وما توعدون

غزل : تعبت بابا علاجات ومراجعات وكوه جمعت الفلس على الفلس وسويت ومنجح
حجي طه : ينجرح المره الثانيه
رشا : اجه عمار جاب غراضج ويريد يصعد يشوفج
حجي طه : خلي يجي
غزل : دنكت وافرك بيدي وامسح بعيوني
دخل عمار وتقرب مني سلم على البنات وباس راسي
حجي طه : ليش مكتلي على غزل
عمار : مردت ادوخك حجي وكلت اكيد من يرجع للبيت يشوفها

غزل : بلعت ريك وبتهور گلت
اني اريد اطلك الكل سكت وخواتي تخبلن وحده تباوع بعيون الثانيه
عمار : شنو تطلكين
غزل : تهسترت اعصابي وكتله مااخلف مو كدامك المن تضيع عمرك تنتظر طفل من مره متخلف
عمار : حجي متسكتها رحمه لابوك لوما مقدر وضعج جان عرفت شجاوبج
حجي طه : شبيج بابا حرام عليج هذا اعتراض امر الله وانتم بعدكم صغار والعمر كدامكم

غزل : افتهموني عفيه اني مااخلف والدكتوره كالت طفل انابيب وسويت ومصار على شنو بعد يبقى ويايه ويتعب نفسه ومصاريف ومغثه وروح وتعال
عمار : ليش اني تزوجتج علمود الجهال

غزل : بس الجهال اهم شى
عمار : عندج بس مو عندي
غزل : عندك هم بس انت متحجي وضام بگلبك
حجي طه : صوتج بابا نصي
غزل : العفو بابا اني هسه مااريد بس يعوفني وكلمن يروح لحال سبيله
عمار : يعني انتي تنطين فكرة موزينه عليه بأن اني رجال ماعندي ذمه وضمير وراح اذبج بيوم من الايام منو زارع هذا الشى بالج
نهر : اعذرها يمه دنكت وگلت شافتني وطبعت بالها

عمار : مع احترامي الج عمه تره مو كل الرياجيل سامي هواي اكو رياجيل ضالين ويه نسوانهم خمس سنوات وعشره و١٥ واكو ماتو وبقو ومتزوجو على نسوانهم وعاشو عيشه مرتبه وحلوة اعرف الجهال زينه الحياه الدنيا بس مو الحياه الدنيا كلها اني راضي بأمر الله اجه الْحٍمَدٍ للـّہ مااجه هم الْحٍمَدٍ للـّہ تره مو كل اصابيعكم سوه وعندي غزل تسوه الف طفل اني شسوي بلجاهل وانتي مو امه تره هاي تقلل من قيمتي من تتصرفين هيج لتقررين بكيفج والرجال اذا يريد يتزوج لو عنده عشر جهال يتزوج فوك مرته ويطلع عذر من جوه الكاع

حجي طه : اي والله يابني صدكت سمعتي رجلج شاريج وميريد شى منج بس حبج واهتمامج هواي عدهم جهال بس عيشتهم موزينه والرجال يكره الساعه الي يطب بيها بلبيت واكو ماعدهم بس ملك زمانه ويموت على زوجته
غزل : والناس كل مااشوف احد وصاح محبلتي
حجي طه : فضول الناس متخلصين منه اكو ناس هيه عايشه على هاي السوالف وحتى لو صار طفل عندج بعد مده يسألوج ليش مسويتي ناس فارغه تحب تدخل بغيرها عليج بيتج ورجلج ومالج دخل بأحد والي يسألج ليش ماعندج اطفال كولي اراده الله هاي الكلمة الوحيده الي اريدج تنطقيها بدون متناقشين اراده الله

عمار : هاي كدام ابوج اذا انعادت سالفه الطلاك والله اندمج راح اعبرها لخاطر وضعج بس اذا تنعاد ياغزل تشوفين شى محلو مني
حجي طه : هذا هو ابني بعد متعيدها
يله بنات عوفن اختجن ويه رجلها وانزلن سون عشا تره جعت
ريم : نزلنا وعفناهم جانت غزل تبجي بهدوء
غزل : باوعت عليه ضايج
لزمت ايده دفعها

عمار : موعيب تسوين هيج كدام اهلج اني ضاغط عليج على سالفه طفل فد يوم سمعتي حجايه مني تقهرج بسبب هذا الموضوع
غزل : لا
عمار : لعد ليش تسوين هيج مااقبل هاي السوالف كدامج مو طفل لتقررين بكيفج انتي حبيبتي ومرتي واريده منج مو من غيرج
غزل : كلتها لان احبك
عمار : تحبين لتجرحين وخلي شويه ايمان بگلبج لا يصير شى بسيط تنسين كلشي وتعترضين على حكمه ويله عقوبه عليج اخذج ويايه للبيت
غزل : لا فدوة عوفني هنا ارتاح
تقرب مني وباسني وحط كصته على كصتي

عمار : مااكدر انام بلياج كومي غزوله لتعوفين حبيبج ينام بوحده وماكو احد يداريج بكدي وامي وبسمه ضال بالهم كومي حبيبتي هناك نداريج
غزل : باوعت عليه وتقربت وبست خده اعتذر والله من حبي الك خفت لابيوم تتزوج عليه او تكسر بيه او تريد جهال ومتكولي

عمار : لو اريد اسوي الكلتي ميوكفني جاهل وحطي بالج اني احبج وتحبيني وحياتي مرتاح بيها والحمدلله ماكو واحد بيدي يجيب المشاكل لروحي غزل اني ماجبتها هين ومرتاح اني من يوم وفاة ابويه واخويه ضكت المر لحد موصلت لهاي الراحه والضايك الجوع يعرف قيمة الخبزه

مااقبل تبجين ولا تجيبين طاري هذا الموضوع نرجع نحاول نجمع ونسوي سلف وكل ميصير نسوي لحد ما الله يرزقنا كافي رازقنا الصحه ومنذب فلوسنا على الاطباء مال الامراض كومي ويايه لبيتج واياج بيوم تتنازلين عني وعنه
غزل : بسته وحضنته ولزم ايدي يله كوومي

سليل : كاعدين بلمطبخ وايدنا على خدنا بالنا يم غزل ونزلت وكايدها عمار
حجي طه : خيركم
عمار : ماخذ مرتي حجي هاي مالتي شسوي بيها
حجي طه : بهاي حقك بس تره اني هم الي حق بيها
غزل : انت الخير والبركه بابا وبست ايده وهو باس راسي
نهر : ليش متبقيها يمنا
عمار : تصير زينه واجيبها
ريم : الاسبوع الجاي نجمتع كلنا هنا عود جيبها عفيه
عمار : ميخالف اجيبها يله نروح
غزل : رجعت وياه للبيت وخاله باستني وطيبت خاطري اباوع على طيبتهم وخاصه خاله ولا كسرت بيه ولا غثتني وبسمه شالت شغل البيت كله بس وكت الاكل يصيحوني حتى ناكل سوه
سلمت امري لله وحاولت اهدي نفسيتي واتعامل طبيعي حتى مااخسرهم

رشا : ٢٠١٩/٨/٢٣ اول بارت نزل من قصتنا جنا نتراسل كلنا بكروبنا الي بلواتساب وفرحانات وخايفات بنفس الوقت وكل شويه ريم تعيط راح اجيب من الخوف جنا نقرا بأستمتاع وخاصه تفاصيل تخص بابا اكو شغلات نعرفها هو حاجيها النا واكو شغلات من عمه نهر عرفناها
دوم ايدنا على گلبنا لتنعرف شخصياتنا
نقرا ونندمج والاحلى نبجي وبعدين نضحك على نفسنا

لحد مايوم قرينا شى دوخنا سالفه صبا حبيبة بابا راسلنا عمه كالت اي ابوجن جان يحب وحده وكت مامتزوج امجن الفضول قره الف واحنا ماشاء الله ابد مو فضوليات او متجمعنا كاعدات كلنا وتكمز زيبك وبطنها اكبر منها
اليوم اسأل بابا لو مطي ينطح مطي لازم افهم هاي صباوي منوو
نهر : مو قريتن البارت
رشا : بس مو مثل منسمعها منه نزلنا جوه جان كاعد والجهال يمه ياكل ركي ويوكلهم
حجي طه : نزلتجن مو راحه
نهر : راح يستلمنك
حجي طه : شصاير
ريم : منو صبا

سليل : اباوع على وجهه بابا تغيرت معالمه وابتسم ودنك وسحب السبحه الي حاطها صفح وكاام غسل ورجع كعد بمكانه واحنا كاعدات بلكاع مثل الجهال انريد نسمعها منه لحد ماباوع بعيونه المتروسه تجاعيد من الگبر بس بقن حنينات وتشع منهن الطيبه

حجي طه : بال ٨٥ شفتها شطب ريحان واكفه وتبجي العيون سبحان الخالق سوادها
وكفت يمها واني قصدي افهم منها جنت نازل من الجبهه ومن سألتها عرفت بايكين جنطتها وراكضه وره الحرامي ومكسور الكعب
كعد يسولف النا شصار بينهم واكيد اكو شغلات خفاها عنه لان ماما كالت يحجي شغلان ويحتفظ بلباقي بس كلنا حسينا بعد هذا العمر كله من يحجي بيها بحسره وغصه

رشا : يعني اني انولدت على ايدها
حجي طه : اي على ايدها
رشا : من هيج گلبي طلع اعوج وبيه مصايب وامراض ومكسور اثاري من وراها لان تحبك وانكسر كلبها بتك هم انكسر گلبها
حجي طه : والله يابنتي مجانت نيتي سوء وروح ابويه ومعزتكم تكدرين تكولين ظهرت بحياتي بلتوقيت الغلط تمنيت بوكتها اكون سبع وشويه افكر بنفسي جان هسه هي مرتي الي وكفني زواجي من امجن ولا صارو ٣ جهال عندي سليل وانتي وحسام خفت عليكم

سليل :وشنو الفايده محصلتها
حجي طه : قسمه ردت اشوفها بس حتى اتعذر منها وماشفتها وره مده كم مره اروح لبيتهم وماالكاها لحد متجرأت سألت وكالو تزوجت وشالو من المنطقه غلطتي حبيت بلوقت الغلط وكسرت گلبي وگلبها
ريم : المهم ابويه طلع رميو وحب على سندس حقها تحاربك غير حاب فوكاها
حجي طه : ليش هي امجن تتعاشر
ريم : شبيهه بس تتمالخ وتعد وتصف وتتأفأف وتندب حظها شحلاتها من تكعد الصبح على عياطها اكشن بابا
حجي طه : وخوش عيشتني سندس الاكشن
الْحٍمَدٍ للـّہ على كل حال منو كلكم على صبا
كلنا اشرنا على عمه
نهر : كاعدين نسولف وذكرناها
حجي طه : الله يذكرها بلخير تمنيت اعرف وين صارت يله هاي الدنيا متنطينا كلشي
كعدنا ويه بابا وكل شويه نسأله بحجه ونجمع معلومات عنه تكول استخبارات بيومها صوت ضحكنا وسوالفنا للكراج واصل وكاعدات كلنا يم رجله

مشينا ونقرا بحياه بابا ومعاناته ويه امنا اكو هواي امور منذكرت لان منعرفها ولا شفناها اسرار بقت بگلب طه وسندس محد يعرفها غيرهم
بدايه شهر التاسع دك الموبايل وصوت حسين يرجف كعد تجيب ريم ركضنا كلنا للمستشفى لكينه جايبها وجاي نضحك اني والبنات على شكل حسين يريد يبجي
نهر : يمه على كيفك قابل داخله بعمليه انتحاريه هي رايحه تجيب وصحتها زينه شجاك ترجف
حسين : مشفتيها شلون تعيط ومي نزل منها

نهر : جنك عمك من كلشي تنهز هسه تطلع من العمليات واسمع شلون تقسم بلبنج
حسين : ليش تحجي
سليل : اووو بطولات وداعتك
شويه واجت السستر بلغتنا جابت جنا نعرف بيها ولد والحمدلله ولدت بلسلامه اباوع على حسين كاام يبجي من الفرحه
سليل : كون يشوفك سجاد اله يسويك نصبه
حسين : حقي سليل متعرفين شنو شعوري من راحت مني وعاشت حياتها وخلفت كلت هاي هيه مراح تصير بيوم ام بيتي وام جهالي واليوم الله رحمني وحققلي الي اريده متريدين ابجي زين واكف على طولي ريم حصلتها بدم گلبي

نهر : اي والله يابني الله يحفظكم بحق النبي محمد واهل البيت ويبعد عنكم عين الحساد
غزل : طلعت
ركضنا عليها ودخلوها للغرفه وبدت السنفونيه مالتها واول شى عاطت وصاحت ااااخ من اشتعلت نوريه الساقطه ولزمنه حلكها
حسين : لا مبين راح تقسم على الثكيل
سليل : نصيحه اخويه اطلع كمل حساب المستشفى وطكلك جكاره بره بين متخلص هوستها لان راح تستلم اهلك بلسره
هز ايده يضحك وطلع وصدك مباشره غزل وخرت ايدها وعاطت علي باك الدجاجه والطلي ولك طلي عبالك اعوف حسوني
نهر : اليوم راح اطلع ضيمها كله هههههه
رشا : واكيد امج وياها

نهر : تعلمت على سوالفها شسوي اسكت
ريم : نعوووم عساج بلغم يطشر راسج يم السحوره لا انتي ام البعوره ام السحوره نوريه نويره هي ونورس البربوك
رشا : سكتوها شهرتنا ههههههه

بعد الفلم الي سوته ريم خلت وحدتنا ميته ضحك نريد نسكت ماكو صحت البرنسيسه وصاحت سحليه وينك ااااخ بطني شكيتوها موو
رشا : لا حياتي دسنا دكمه ونزل الطفل ورجعنا طفينا الدكمه
نهر : هلمره كلجن عمليات موتني ولا وحده طبيعي بيجن
سليل :غير الدكتورات ياهي التروحين الها وصاحت ماعندج توسع دخلوها عمليات ونطلع هيج انون ونعيط ونسب
رشا : بس مثل ريم ضاربه الرقم القياسي بلبنج
حسين : هااا صحت
نهر : اي يمه تعاال يمها
كعد يم راسها ويبوس بيها وبأيدها وفرحان حييل سحبت غزل وبستها يوم الالج يووم
غزل : الله كريم ماما كلشي رزق
نهر : اي يمه عفيه بلسباعيه دوم اريدج هيج متهتمين وتعوفيها على الله

ريم : ابني وينه
حسين : شويه وبجيبوه الج
ريم : صرت اب حبيبي
حسين : ومنج هذا احلى شى منج ياحب عمري المستحيل
ريم : الف الْحٍمَدٍ للـّہ اهلك درو
حسين : اي بلغتهم وباركولي
ريم : باوعت حسيته مقهور عرفت مفرحانين اله لزمت ايده وبستها وكتله لتضوج كافي اني وتيم وابنه وياك صدك نفس الاسم الي اتفقنا عليه

سليل : شراح تسموه
حسين : ردت اسمي علي عاطت لان على اسم ابويه تالي اني اريد اسمي من اسماء الامام علي سميته حيدر
رشا : وهلا بحيدوري نور حياتنا اجه وان شاء الله اجه الخير ويااه

سليل : طلعنا ريمو من المستشفى وطلبت تبقى يمنا متكدر وحدها من وره تيم لان حرك

رشا : دك رقم غريب فتحته سمعت صوته لاول مره اسمعه وكأنه واحد غريب عرفت بروحي طبت تماماً منه
هااا شعلان
شعلان : اريد اجي اشوف فرح
رشا : هله بيك تكدر تروح تلكاها بلبيت بس يمهم بابا
شعلان : ليش انتي وين
رشا : شى ميخصك ومبروك على زواجك
شعلان : توقعت عرفتي
رشا : هاي حياتك وانت حر بيها من رخصتك مستعجله بتك بلبيت شوفها وتوكل وسديت الخط
ابتسمت وامشي بممرات المستشفى واباوع على حسين شلون يدفع بريم مكيف

اليوم بغداد صبحت على تظاهرات بالاول عبالنا مثل التظاهرات القديمه مسيره وساعه وساعتين وتفض بس الصار شى فاق التوقعات ظهر جيل جديد قوي وسبع ثبت للكل العراق بلد الابطال بكل اجياله وجيل الببجي ثبت هو جيل يقهر المستحيل

كل ولدنا طلعو بلمظاهرات وخاصه عمار جان يبات مرات بساحه التحرير وهذا الشى يخوف غزل بشكل بس هو يصبرها
علكت المظاهرات واشتددت وتوقعو يقمعوها بس شبابنا انطو شهداء في سبيل متنطفئ الثوره
دز بابا على البنات كاعدات كلنا نسوي اكل ولفات للمتظاهرين هلقاسم الله كص دجاج ومجموعه من الكبب كل وحده لازمه جهه وريم متكدر تكعد لان بعد الاربعين مطالعه وباقيه تأشر انطوني هاي القطعه وانطوني هااي وتاكل

سليل : خلي نكمل يمعوده
حسين : انطوها غير جوعانه
ريم : شفت حبيبي شلون يضطهدوني هي لفه
رشا : ثالث لفه تاكلين مو معده جيس زباله كلشي بيها
غزل : هااج هاي لفه
ريم : غزل احسن منكم
سجاد : استعجلو بنات ورانه طريق خلي اخابر عمار حتى يستلم الاكل من عدنا

حجي طه : بابا غزوله تعاالي
غزل : رحت ويه بابا للغرفه وطلعلي علاكه سوده
حجي طه : هااج بنتي
غزل : شنو هذا بابا
حجي طه : هاي فلوس هلنكدر عليه هاي ٥ ملايين مني ومن عمتج وخواتج لميناها مال طفل والعلاجات الوراه
غزل : لا بابا مااخذهم
حجي طه : اياج تردين ايد ابوج لو مو تتزوجين وان شاء الله يقسملج بلخلفه اياج بيوم تردين ايدي
غزل : عمار ميقبل
حجي طه : لزمته وحجيت وياه وقنعته صح تعبني بس بالاخير وافق هااج بنتي وتوكلي على الله تخلص المظاهرات وارجعي سوي ولتشيلين هم كل ماالله يرزق رجلج ويرزقنا نحاول لحد مابيوم تكعدين كعدت ريم هسه وبحضنج الطفل
غزل : حضنت بابا وكعدت ابجي
حجي طه : هاي شنو مااريد اشوف عيونج الحلوات تبجي صايره من كلشي تبجين يله اطلعي ويه خواتج ورانا شغل
طلعت دموعي بعيني وابتسم بستهم كلهم وتشكرت منهم وهمه اصلاً سوو نفسهم ميعرفون شى خابرني عمار وبلغته وكاال اردها الهم ان شاء الله دين برگبتي المهم راحتج حبيبي
غزل : راحتي ترجعلي سالم
عمار : لتخافين حبيبج على گلبج باقي وبحضنج
غزل : احبك
عمار : اموت عليج
غزل : انتبهه على نفسك
عمار : من عيووني

غلقته والفرحه ماليه نفسي والكل يضحك ويسولف وماما باستني ومسحت دموعي ورجعت اكمل شغلي وياهم ودخل عمو محسن طبعاً فيصل صار غنده طفل من زوجته فرحت لعمو لان جان امنيته يصير عنده طفل يشيل اسمه كلشي قسمه والله يرزقني مثل مارزقهم

محسن : هاااا بنات طه انجمعتن
نهر : غير يساعدني مااكدر وحدي
محسن : وزيبك تاكل هاي ضربوها دخانيه بلكت تبطل اكل
ريم : تغار مني لان مااسمن وانت شوف كرشك شكبره
محسن : من جنت بشبابي خير اخبل غير النسوان الرايحه والجايه تتغزل بيه
حجي طه : بدا مسيلمه الكذاب
محسن : اي حقك مو تشوف وجهك ٢٤ ساعه تعوي وتروح وتجي منزل راسك ممركز بلحلوات من يصجمن بيه حقك هو اليتزوج سندس يمشي ويسولف ويه روحه ويكول شسويت بروحي ويغم بكصته

حجي طه : عمجن بس بوخه وخلصها اتزوج وهاي حلووه وذيج تخبل
محسن : غلطتي مازوجتك ام حمزه الله يرحمها
سليل : غص بابا جان يشرب مي وكاام يضحك
حجي طه : محد عم عليه غيرك تمشي وتصيح اتزوج ام حمزه طولها بعشر نسوان وتالي لا تزوجتها ولا تزوجت غيرها ومكابلك وكاعد
محسن : هذا ابوجن كل خير مابيه بس بشى واحد خلفجن حتى اضحك عليجن
ريم : هيج صارت عموو هدوني عليه اليوم اقطه لو تجي ام حمزه

سليل : كاعده واباوع عليهم بابا وصوت ضحكاته الدافيه وعمو محسن وريم التركض وراه ولازمه عمليتها وماما ورشا وغزل وحسين وسجاد الواكف على صفحه وبيده الجكاره ومبتسم

كل واحد بيهم لزمنا ايدكم ودخلناكم حياتهم وشوفناكم الظلم الفقر القهر الجوع الالم الدموع الموت الخذلان الخيانه وشلون عشناها وشلون كدرنا نجتازها بأيمانه بالله وقدره يجوز ايامنا الجايه اصعب ويجوز اسهل كله بأمر الله كل الصار بينه سببه الاختيار الخطأ يوم ما وافق بابا يعيش مع الانسانه الخطأ ويرتب حياته على اساس رغو ضعيف وقبل يسكن بصف ناس خطأ اختارو الصح ولو بعد تعب وعناء لان مستقبلكم يعتمد على اختياركم

واليوم نفس الايد الي سحبتكم لبيت طه وبناته وعيشتكم الاشهر الفاتت حياتهم بجيتم ضحكتم تألمتم معاهم راح اطلعكم
الكاتبة ريام : ودعو معي طه وبناته سحبتكم من ايدكم وغلقت باب البيت وكفنا كلنا بعتبت باب بيت طه وگلوبنا تدعيلهم بلخير
عمو طه الله ينطيك الصحه والعافيه انت ابونا كلنا حنيتك وطيبتك وايمانك بالله علمتنا هواي امور الله يرزقك على كد نيتك الطيبه
عمه نهر منبع الاصاله والطيب انتي مثال للشرف والاخلاق والامومه والكفاح كلنا عشنا حنيتج وطيبتج وندعيلج بلخير ياغاليه

سليل ام دميعه دمعتج غاليه علينا يارب عيونج متشوف دموع والله يحفظلج عموو الوحش واطفالج الحلوين ولتنسين سجودي اربعيني ديري بالج عليه ههههه نتشاقه وياج الله يحفظلج عائلتج وسجاد الطيب العم الحنون والسند القوي والشهم لبيت طه انتم احلى اثنين مختلفين حبكم المميز والمختلف خلانا نعشق التحدي مثل صبرج وتحديج لحد مصرتي لسجاد راح نشتاق الكم يااحلى ثلل

رشا : اااه يارشا ياطيبه وقويه ياصاحبه الكرامه والقوه يارزانه بيت طه الله يحفظلج فروحه ويعوضج الخير انتي علم ومتتعوضين شكراً لان سمحتي نعيش المج ونشاركج كل لحظه عشتيها يارب حياتج القادمه افضل من الفاتت ندعيلج بكل خير ولتنسين مو كل اصابيعج سوه ونبقى نردد ونكول اشتعلتي جنات

ريم : عسل بيت طه وحلاوته وضحكته وقوته وسباعيته غزال البراري راح نشتاق لكل ضحكه منج ولكل عركه وكل كلمة الله يحفظلج حسين واطفالج انتي وحسين مثال للحب الصادق ومثال للي يكول مستحيل هذا الشى يصير ثبت حسين من تزوجج ماكو شى اسمه مستحيل اكو شى اسمه اسعى ياعبدي وانا اسعى معاك الله يحفظكم