Murotjon Azimov vohamiz yoshlari kelajagiga doir taqdimot bilan tanishdi

Muhtaram Prezidentimiz rahbarligida yoshlarni qo‘llab-quvvatlash, sharoitlar yaratish davlatimiz siyosatining eng muhim yo‘nalishlaridan biriga aylandi. Mavzusi qanday bo‘lmasin, o‘tkazgan yig‘ilishlarida yoshlar masalasiga alohida e’tibor qaratib, rahbarlarga ko‘rsatma beradilar.

Bugun Murotjon Azimov viloyat Yoshlar ishlari boshqarmasi boshlig‘i Abror Ahmedov va tegishli mas’ullarning yoshlar bilan ishlash borasida amalga oshiradigan joriy yilgi taqdimoti bilan tanishdi.

Ma’lum bo‘lishicha, yoshlar bandligini ta’minlash bo‘yicha ulkan rejalar olingan. Yil yakuniga qadar 29 804 nafar yoshlarning turli yo‘nalishlarda bandligi ta’minlanadi. Shundan 1 400 nafar yoshlarni Monomarkazlar hamda kasb-hunarlarga o‘qitish markazlarida o‘qitish orqali kasb-hunarga yo‘naltiriladi.

Yoshlarning iqtidorini yuksaltirishga qaratilgan qator loyihalar ham viloyat hokimi tomonidan qo‘llab-quvvatlandi. Jumladan, 333 ming nafar yoshlar iqtidorlarini yuzaga chiqarishga qaratilgan loyihalarga jalb qilinadi. Shuningdek, “Yashil makon” umummilliy loyihasi doirasida yoshlar bog‘larini tashkil etish davom ettiriladi.

Shu bilan bir qatorda yoshlarni vatanparvarlik ruhida tarbiyalash maqsadida 700 ming nafar yoshlar turli vatanparvarlik loyihalari bilan qamrab olinadi.

Bir so‘z bilan aytganda, yil davomida yoshlarni kasb-hunarga o‘qitish, bandligini ta’minlash, bo‘sh vaqtini mazmunli o‘tkazish, ijtimoiy qo‘llab-quvvatlash, turli tanlov va aksiyalar tashkil etish, rag‘batlantirish va amaliy yordam berish bo‘yicha ko‘plab loyihalar hayotga tatbiq etiladi.

Viloyat hokimi taqdimot yakunida mazkur loyihalarni ma’qullab, yana bir qator o‘z takliflarini ham o‘rtaga tashlar ekan, yoshlar taqdiri bilan bog‘liq har qanday kelajagi bor loyihani qo‘llab-quvvatlashga tayyorligini bildirdi.

Telegram | Instagram | Facebook