مٰہٰٖشہاعہرَ بّارَيہسہيہهٰہٰٖ℡

السلام عليكم.👋👋👋
به موضوع .ومشكله واقعيه في مجتمعنا
جو نتحاكى ونتناقش شويه

مشكلة بعض الشباب اليمني
مشكله ﴿ ان يومه عيده﴾ وهذه المشكله باتضر المجتمع ككل ولازم ندور لها على حل

احنا شعب بسيط قوي وجاهل بنفس الوقت ما نفكرش أبداً تفكيرنا ما يتعداش سقف غرفنا بمعنى أن الشاب اليمني همه الأكبر هو كيف يدبر تخزينة غدوه وهذه تعتبر مشكله كبيره في حياته وإذا تدبرت خلاص أموره سابره ولا يهم شيء ويسير يشتري له قات وسار ابسر له اطرف بقعه يخزن بها وفي آخر التخزينه يطنن ويحك راسه ويرجع ينتف شنبه
ويقول خلاص اخر يوم ازيد اخزن ولا متى عتجلس هكذا لا بلاد ساع الناس ولا به عيشه ولا به رواتب ولا به أشغال اين نسير؟
لازم الواحد يتغير وكل شي يشتي في الدنيا هذه
طبعا هذا الكلام من قوة التخديره حقه😁

وخلاص يبدأ يرسم بباله انو من غدوه عيتغير ويقع رجال ويشتحط ويبكر يقسط الله على نفسه ويسير يرقد وقده يهم الرازم ويهم كيف عيدبر تخزينة غدوه ويبكر الصبح وسار دبر له حق تخزينته ورجع يمارس روتينه المُعتاد..

طيب وكلام أمس والتغيرات و و و أين سارين؟
يقول مش وقت لا تهرموني خلوني اخزن
وعيجي موت وعليها نحيا وعليها نموت وهكذا
وبعض الشباب حق هذه الايام مايقدر يصرف على نفسه مابلا ابوه يصرف عليه ولا قادر يتزوج الا اذا عيزوجه ابوه او اذا ابوه شايبيع ارض او يبيع بيته عشان يزوجه و لوما نقول له افعل لك شغلانه بسيطه واصرف على نفسك وجمع نفسك يقول اخزى أنا ابن فلان ومشتي احد يعرفني انا فلان الفلاني وجدي فلان عيب اخرج اشتغل فوق عربيه ولا فوق بسطه مش انا برغلي ولا انا من ريمه ولا من وصاب ووالله ماعيب جلستك هكذا معطل لاسترت تبني مستقبلك ولا استرت تجمع نفسك ولا استرت تزوج نفسك هذا هو العيب وو الله ان اهل وصاب وريمه وعتمه والبراغله قولتك اشرف وانظف واكفئ من اللي يعتبروا انفسهم عيال فلان وما يشتغلوا ووالله انهم اكفئ من ذيك المسبع المربع الراقد العاطل الكسل اللي مابش معه حق صرفته واللي يمد يده للناس عشان ياكل هذا هو العيب اللي ينقص من قيمة الرجل أما الشغل مشو عيب واللي عيقلك عيب أنت ابن فلان جرب قله اصرف عليّا وانا ما اشتغلش وابسر ما عيقلك والله ما يدي لك حق حبه ماء لذلك اطلب الله على نفسك مش حاليه يكون وجهك ملان شعر وابوك هو اللي بيصرف عليك وكيف تجزم تدخل لا عند ابوك بكامل جثتك وتقله يا ابه ادي لي زلط؟ قسماً بالله ان قد بين اخزى انا بدلك

ولو تجي تشوف أغلب أصحاب ريمه وأصحاب وصاب وعتمه وإب وتعز وغيرهم كلهم رجال وشغالين في بسطات وفي محلات وفي كل شيء وأكثرهم تُجار ناس حق شغل وحق طلبة الله وما بش احد منهنم فارغ ولا بيشحت واما التعزاز والتشراط ما ياكل احد عيش ابدا لذلك أشقى اشتغل الشغل مُش عيب ورب الكعبة العيب انك تمد يدك وتطلب، بينما أنت بعافيتك وقوتك وقادر تصرف على نفسك..

لا متى عنجلس مشنا داري🤕 @ALFkamah

16 viewsفُـ,ـځـٌٌـٌٌآمـْـْْـْة ∆ صُـ,ـنـِِـِـعٌـِـِِـِـآنـِِـِـي % •💚, 13:51