Dixebra!!

Depués de reposar dellos díes, préstabanos unviar un agradecimientu a la xente que nos echó un gabitu nesta edición del Conciertu pola Oficialidá:

•A los cuatro grupos participantes pola so disposición y pol so trabayu desinteresáu: Alienda, Herbamora, Dixebra Rock n'Asturianu y Llevólu'l Sumiciu. Tamién a Xuacu Amieva y Emilio Fidalgo pola sorpresa qu'abrió'l conciertu.
•Al espaciu Kuivi Almacenes poles facilidaes y l'ayuda.
•Al personal de la sala (lluces, soníu y accesos) pol so bon facer.
•A Marina y Elena (Asturxules) por ser les meyores maestres de ceremonies.
•A Espacio Nube poles idees, diseñu y impresión del cartelu, entraes y otros materiales.
•A los chigres y llibreríes (La Raposa, L'esperteyu Chigre Folk, Café Trisquel Chigre, La Revoltosa, libros y café y Cervecería Cabanón) que vendieron entraes pal conciertu.

A tolos y toles que mercastis la entrada (¡que s'acabaron!) o difundistis el cartelu nes redes o ente les amistaes.

A quien vos averastis el sábadu y mercastis material (bolses, camisetes, llotería...). Gracies a vós la Xunta pue entamar conciertos como esti, convocar movilizaciones, redactar informes, poner clas d'asturianu y trabayar pola dignificación y normalización de les llingües propies d'Asturies.

Gracies a la xente que-y prestó'l conciertu... ¡y a quien non! A quien-y gustaben los grupos... ¡y a quien quería más folk! A quien queríeis sidra y a quien queríeis una carpa... Agradecemos toles opiniones y observaciones sobre'l conciertu y sobre otres tantes coses. Con too, animámosvos a facevos socios y socies de la Xunta, a participar nel día a día de la organización: ye la meyor manera d'apoyanos y de da-y puxu y futuru al movimientu de reivindicación llingüística. Alcordámonos tamién de Xuan, Yoli y Damián. De la xente que nun ta güei pero siempre trabayó pa que'l conciertu saliere alantre.

Como dicíemos nel conciertu, pa que l’asturianu gane pesu social siguen faciendo falta escritores, maestros y maestres, músicos y músiques, periodistes, xente con negocios qu'usen les llingües propies..., pero tamién la ciudadanía en conxuntu, caún y caúna falándolo y escribiéndolo. Y esi puxu social precisa estructures organizatives que propongan, que denuncien y que muevan acciones reivindicatives pa conquistar derechos llingüísticos. La reivindicación nun vive del aire: necesita un movimientu que la sostenga, que la quiera viva añu tres d’añu, y necesita organizaciones qu'aguanten nel tiempu ensin atase a nada nin a naide. La Xunta lleva más de cuarenta años nesi empeñu y vamos siguir nello.

¡Hai llotería de la Xunta! ¡Nun quedes ensin ello!

Gárralo en:
·Avilés - El Cabanón.
·Uviéu - Espacio Nube y L'Esperteyu.
·Xixón - Sidrería Canteli.
·L'Infiestu - Cervecería La Traviesa.

Dende mañana martes 9 hasta'l día enantes del Anguleru (23 avientu) vas poder pasar pela Xunta (cai Cimavilla 15, escalera A 1°C) a mercar coses del nuestru puestu (camisetes, bolses, chapes, discos, llibros, llotería, banderes, pañuelos, pegatines...). L'horariu va ser martes y xueves de 17 a 20 h. Hai que llevar euros que nun hai bizzum nin datáfonu.

Esti iviernu, el gripe de los eufemismos pa sustituyir reivindicaciones históriques ta pegando fuerte. Por eso, ta bien recordar un cartel nuestru de va diez años. La meyor estratexa, Oficialidá PLUS. 😉

Esti xueves 18 d'avientu volvemos abrir el nuestru local n'Uviéu de 5 a 8 de la tarde por si queréis mercar dalgún material de la Xunta pola Defensa de la Llingua Asturiana. Alcordáivos: cai Cimavilla, escalera A, 1.º C. Y la selmana que vien, el martes y el xueves.

Tracamundiémonos colos díes qu'abrimos esta selmana. Rectificamos: vamos abrir llunes 22 y martes 23. Última oportunidá nestes fiestes p'ayudanos mercando les nuestres coses. 😉
De cinco a ocho, na cai Cimavilla d'Uviéu, escalera A, 1.º C.

Tocó lo xugao na llotería de la Xunta, quier dicise, cuatro euros por papeleta. Sabemos que sois xente arrogante y que lo vais perdonar, pero si hai quien quiera recuperar eses perres o gastales en material nuestro, pa esi fin vamos tener abiertu'l local, de mano, mañana martes 23 d'avientu y el xueves 8 de xineru de 17:00 a 20:00 h.

Qu'esti 2026 venga acorrompináu de llabor, compromisu y llealtá llingüística. #oficialidá

Esti xueves 8 de xineru, de cinco a ocho de la tarde, el local de la Xunta va tar abiertu pa quien queráis recuperar lo puesto na llotería o bien mercar daqué del nuestru material. Cai Cimavilla 15, escalera A 1C, Uviéu.

Dende esti martes 13 de xineru hasta'l xueves 19 de marzu, tolos martes y xueves, de seis a ocho de la tarde, el local de la Xunta va tar abiertu pa quien queráis recuperar lo puesto na llotería o bien mercar daqué del nuestru material. Cai Cimavilla 15, escalera A 1C, Uviéu.

Esti sábadu, actu d'homenaxe a Tino Brugos.

Un añu y la pena nun pasa. Damián, n'alcordanza.

Nel Día de la Llingua Materna convién nun escaecer que pa que les llingües propies d'Asturies sigan siendo maternes tien qu'haber tresmisión xeneracional. Pa eso, ye imprescindible -y inaplazable- un marcu d'oficialidá que favoreza qu'asturianu y gallego-asturianu vivan munches xeneraciones más.

Dende la XDLA sofitamos al profesoráu d'asturianu y gallego-asturianu y la so reivindicación que ye la de toes, pola especialidá docente y la igualdá de derechos. Ensin oficialidá siguimos siendo ciudadanes de segunda en tolos ámbitos, pero nel educativu, que ye'l principal motor de la tresmisión xeneracional de les nuestres llingües, más.

#8m Nin la tierra,
nin les muyeres somos territoriu de conquista.