‎ለትልቁ ሹመት ታጭቶ
‎በትንሽ ህልም ታጠረ
‎አላውቀው ብሎ ነው እንጂ
‎ሰው ለዚህ መች ተፈጠረ?
‎.
‎እያወቅክ...
‎ጤዛ አይደል ዕድሜ?
‎ስባክን ልቤ ሳይረጋ
‎እንደምን ልለፍ ዓለሜ?
‎.
‎ሀሳቤ የዛሬ ብቻ
‎ምኞቴ ለኀዘን ዳረገኝ
‎ጠፊውን እያሳሰበ
‎ስጋዬ ባሪያ አደረገኝ።
‎.
‎ገላ ተው - ተው ተለመነኝ...
‎እያየው ደግ አይራቀኝ
‎ካላፊው ከዕለቴ አላቀኝ
‎ከነፍስህ ከነፍሴ አስታርቀኝ።
‎.
‎ከምንጩ ቀድተን እንጠጣ
አቀበት ተራራ እንውጣ
ከወንዙ አብረን እንውረድ
‎ተፈጥሮ ድምጿን እንስማ
‎ስጋችን ይሸነፍልን
‎ከነፍስህ ነፍሴ ትስማማ።
‎.
‎አንዴ እረፍ ልረፍ ከመሮጥ
‎እኀቴ ወዳጄ ስትል...
‎ጥዑሙን ድምፅህን ላድምጥ።
‎ፈውሰው በቃልህ ቁስሌን
‎አስንቀኝ አፈር አካሌን
‎አራግፈው የዘመን ሸክሜን
‎ልበርታ ልርሳ ድካሜን።
‎.
‎ዋሽንቱን ተጫወትልኝ
‎በገናን ክራሩን ደርድር
‎ረቂቅ ግዙፍም እንሁን
‎የሚታይ ደግሞ የሚሰወር።
.
‎ሰውነት ጥጉ ሰማይ ነው
‎ከስጋ ሀሳብ ይርቃል
‎መስከንን
‎ልብ
‎ሲረዳ
‎የፍቅርን ከፍታ
‎ያውቃል።
‎.
እንሂድ - ከነፍስ ቦታ...

‎/አሁን እነግርሃለው ስል። የሆነውን ሁሉ። ያሳለፍኩትን። ሰው አላስጠጋ ያልኩበትን። ቁጥብ የሆንኩበትን። አንድም ሳላስቀር። ከዘፍጥረት ጀምሮ ያለውን ታሪኬን። ቀጥፌ እስከበላሁት ፍሬ። 'ርቃኔን አይቼ አፍሬ እስከተሸሸግኩበት። ሞቼ ተቀብሬ አበቃ ሲባል ትንሣኤ እስከሆነላት እኔ። ላወጋህ ሽቼ ነበር። ለትናንቴ እንግዳ እንዳላደርግህ ብዬ። ደግሞ ላልነበርክበት ስብራት ከፋይ እንዳትሆን። ወደኸኝ ነበርና የዳነ እኔ ይገባህ ስለነበር...መርሻ ላደርግህ አለመፈለጌን እንድታውቀው። ደህና ነኝ ብዬ ሳስብ ሁሉንም ሁሉንም ልነግርህ ነበር....ቀደምከኝ../
‎.
‎"ደስ ስትል" አልከኝ። "ብታይ የቅርቤ ነች" አልከኝ። "ብዙ ሳናወራ እንግባባለን። ሳላውቀው ነው የወደድኳት። አብሬያት እንደመሆን የሚያስደስተኝ ነገር የለም። ሁሌ ባየኋት። ሁሌ አብራኝ በሆነች። መልሷ ምንም ቢሆን ግድ የለኝም። እኔ ወድጃታለው።" አልከኝ።
‎.
‎/ጊዜ ስንት የቅርብ እንደሚሰጥ ረስቼው ነበር። ስንት እንደሚያለምድ። ስንቱን እንደሚያስረሳ። ስንት አዲስ እንዳለው....ልብ ስንቴ እንደሚወድ...ለአፍታ ረስቼው ነበር።/
‎.
‎.
‎"የት ሄድሽ?"
‎
‎"እም አለው። ደስ ይላል። ይቅናህ።"
‎.
‎.
‎/ህይወት የት ጋ አላዋቂ እንደምታደርገን'ኮ..የሞኝ ነገር።
‎ትናንት ላይ መች ይ'ቀራል። አላዘንኩም ግን ዝግጁ አልነበርኩም።
‎.
‎መንገዳችን ደጋግሞ ሲገጣጠም የሚቀጥል ነገ ቢኖረን ነው ብዬ ተስፋ ነበረኝ። ለካ ያልተቋጨ ትናንት ቀርቶን ነው። ይሁን እንኳን እንዲህ ጨረስነው። መቼም ከባዶ ተስፋ ያለፈ ትዝታ ይሻላል።
‎.
‎ይወደኝ ነበር.../

ድሮ ድሮ...
‎
‎በደጃች ውቤ አሳበን
‎በጌምድር ተላቀስን
‎ያለ እንባ የሸኘነውን
‎ወዳጅ ዘመድ አስታወስን።
‎
‎አለቀስን! አለቀስን!
‎.
‎ወንድምን መከታን አጥቶ
‎አካልን ልጅን ሸኝቶ
‎ያ ሳያንስ - ኀዘን ተቀምቶ!
‎.
‎እታበባ - ዛሬም ደሞ ዘመን ከፋ
‎ለእንባ 'ሚሆን - ዕለት  ጠፋ።
‎.
‎እንዳላፅናናሽ ቤትሽ መጥቼ
‎አይዞህ እንዳትይ ቤቴ ተገኝተሽ
‎የእኔን ቁስል ለማስታመም
‎እንዴት ያንቺን ኀዘን ትተሽ?
‎.
‎ህመሜን ልቻል
‎ዋጪው እንባሽን 
‎እንታገሰው..
‎ጎዶሎ ቀኔን - ክፉ ዕድልሽን።
‎.
‎ያንቺ ቤት ነገር -የኔ ቤት ዕጣ
‎ጊዜ ቀን ቀጥሮ - ቤቱ ሲመጣ
‎በበጌምድር በአዋጁ ቦታ
‎እንገናኝ የዛን ለታ።
‎
‎/"ዐፄ ቴዎድሮስ በበጌምድር ማንም ለሞተ ዘመዱ እንዳያለቅስ የሚል ዐዋጅ አውጀው ነበር። በዚህ መሃል ደጃች ውቤ ይሞቱና ለእቴጌ ጥሩወርቅ ወደ መቅደላ መርዶ ይላካል። ዐፄ ቴዎድሮስም ለሕዝቡ "ለደጃች ውቤ አልቅሱልኝ" ብለው አዘዙ። ሰዉ ሁሉ ለዘመዱ የቀረበትን ለቅሶ ያን ጊዜ ወጣለት። ያን ቀን ተለቅሶ የማያቅ ለቅሶ ተለቀሰ ይባላል።"/
‎

ወልካፋ ዕድል ~ ለአንዴ ትቶኝ
እንደሌላው ~ እኔም ቀንቶኝ
እኔም ቀንቶኝ ~ እንደው ለአንዴ
ድንገት ስታልፍ ~ በመንገዴ
ገልመጥ አርገህ ~ ካየህ ቤቴን
አደራህን ~ ሶስት ምኞቴን።

፩

ልክ እንደ ልጅ...
ዝቅ ማለት ~ ክብርን ጥሎ
በደል መርሳት ~ ይቅር ብሎ
የፈጠርከውን ~ መውደድ ያለአድሎ።
ሞክሮ ~ መሳት
እርዳታ ~ መሻት
አግዙኝ ማለት...
ኮርቶ መጠየቅ ~ ያላወቁ ዕለት።
እውነትን ብቻ እንዲናገር አፍ
በንፁህ ህሊና
በጥሩ እንቅልፍ ~ ለሊቱ እንዲያልፍ
ከሆነው ሁሉ ~ መልካም እንዲያተርፍ

/እንዲህ ለልቤ...
ከከፋው ሁሉ
እንዲታየው ደግ
ይኸው ምኞቴ
ወደ ልጅ ማደግ።/

፪

ያረጉልኝን ~ ዛሬ እንዳልረሳ
ስለ ሰው ክፋት ~ እንዳላነሳ
እኔው መጋቢ ~ ራሴው አራጅ
አይዞህ ባይ ወዳጅ ~ መልሼ ፈራጅ
በሁሉም ነገር ~ አስተያየት ሰጪ
እኔው ተሳሳች ~ ራሴው ቀጪ
እኔው ጠያቂ
እኔው አዋቂ
የማልፈጽመው
ቃል አስጠባቂ።
የወደድኩትን ~ ግፍ ተባባሪ
የጠላሁትን ~ ደግ አባራሪ
ለጨለመበት ~ ብርሃን አብሪ
እዛ ጋር ደግሞ ~ ልብ ሰባሪ

/ትዕግስት አጥቼ
ሆኜ እንዳልገኝ
ሁሉንም አሁን
የነገር መልሴ
ዝምታ ይሁን።/

፫

በመበለጤ ~ እንዳልናደድ
ሰውን ለመጣል ~ በግፍ እንዳልሄድ
በገንዘብ በርስት ~ እንዳልጣላ
ከሰው አብልጬ ~ ለጠፊ ነገር እንዳላደላ
መሙላት ቢሳነኝ ~ ጎዶሎ ጓዳ
አቅጄ አልሜ ~ ሰው እንዳልጎዳ።

አትንኩት ብዬ
ባላፈስ ደሜን ..
ሳልራራ እንዳልቀር
በግፍ የሞተ አይቼ
ወንድሜን..

/ እንዳልነጠቅ
የሰውነት ወዝ
የሰው ቀለሜን።
...አሜን! /

‎ፍቅር ለሰጠኝ - እምነት ስነሳ
‎ማጣትን ለምደህ - ተስፋ ሲያሳሳህ
‎ልባችን ከብዶት - እንዳይደላደል
‎ስንጠራጠር - ስንገዳደል
‎ትናንት ለእርቅ - አርደን ፍሪዳ
‎ደሙ እንኳ ሳይደርቅ - መልሰን ባዳ
‎ተላምደን ኖረን - ደግመን እንግዳ።
‎.
‎በድቅድቅ ዘመን - ጭላጭል ተስፋ - እንደተመኘው
‎ነገ ሌላ አለ - በሚል ጅል ተረት - እንደተሞኘው
‎ልቻለውና - ያልፋል እንዳልኩኝ - የእንባ ቀኔ
‎እንደተከፋው - ህመሜ ሳይሽር - ላልፍ ነው እኔ።
‎.
‎የለም የለም - ነገ መልካም ነው - ብለህ አትሸውደኝ
‎ያለፈው ቀኔ - የዛሬን ያህል - መቼ ከበደኝ?
‎.
‎ባልፀና ጉልበት - ባልዳነ ቁስል
‎ዛሬን ተገኘን - ከነህመማችን
‎በእጃችን ሆኖ ቀሎብን እንጂ -
‎ትናንት ነበር ደግ ቀናችን!
‎.
‎ታውቃለህ ከራሚ አደለም -
‎ሂያጅ ነው ስንትም ቀን ቢያድር
‎ዘመኑ የመዳፍ እፍኝ -
‎እንግዳ ነው ሰው ለምድር።
‎.
‎ዘንድሮ ብሶ ባይሻል
‎ከአምና
‎ከድካም በቀር
‎ትርፍ የለምና -
‎እስክንሄድ ድረስ ደርሶ ተራችን
‎እንክረም ዛሬን በትዝታችን።

‎ለኀዘንተኛ ልብ
‎መፅናኛ ነበር ወትሮ
‎ሙዚቃ
‎
‎መርሻ ነበረ እንባ እና ሲቃ።
‎
‎ተጠግኛለሁ በልስልስ ዜማ
‎በድንቅ ግጥም
‎አንዳንድ ቀን ግን ስሜት አይሰጥም።
‎
‎እንደትናንቱ
‎ደርሶ አያፅናናም አያባብልም
‎ሌላ ቁስል ነው ሸክም አያቀልም።
‎
‎ግጥም አይደለም
‎ሙዚቃ አደለም
‎ቃልም
‎አይጠቅመው
‎
‎እንዲህ ያለ ህመም
‎በዝምታ ነው የሚታከመው።

‎የተመኘውን - ሳልከለክለው
‎የወደደውን - እንቢ ሳልለው
‎የታሰረውን - ሰንሰለት - ሰብሮ
‎ያሻውን ሁሉ - እንዲይዝ በሮ
‎ሁሉን ፈቅጄ - ልቤን ፈተንኩት
‎ወረተኛ ነው - ይኸው ታዘብኩት...
‎.
‎ሳቅ ከከበበው  - ደስታ ካለበት - አያሰኘዉም
‎የሚሰብረውን እስካላገኘ - እረፍት የለዉም።

‎ኀዘን ደጋግሞ ቤትን ያንኳኳል
‎ጽኑ ነው ያሉት ቅጥርን ያናጋል።
‎የሰው ዕጣ ነው ...
‎በባዶ መሄድ እርቃን መምጣትም
‎አያስገርምም ማግኘት ማጣትም።
‎.
‎ይሆናል ብለው የታመኑበት
‎ከእጅ መዳፍ ይፈለቀቃል
‎ለዘመን ያሉት በቀናት ያልቃል።
‎.
‎ሕይወት ከርሞ አዲስ በየማለዳ
‎አወኳት ሲሉ - ሁሌ እንደ እንግዳ
‎የቅርብ ሩቅ ናት - የዘመድ ባዳ።
‎.
‎በሕልም መክሸፍ - በምኞት ማጣት
‎በፀፀት ቁጭት - በናፍቆት ቅጣት
‎በወዳጅ ክዳት -በቀን ጎዶሎ
‎ባለፈን ዕድሜ  - በባከነ ውሎ
‎.
‎ስበብ ፈልጎ
‎ልብ እንደ ሸክላ - እንዲህ ሲሰበር
‎ተስፋ ባይኖር ግን - ምን ይኮን ነበር?

ምጡቅ አዕምሮ ብዙ አሳቢ..
‎መዝገቡን ከፍቶ - ጀመረ ማሰስ
‎ምን ቢለምኑ - ደጅ ቢጠኑ - ከማይመለስ
‎ከልጅነት ዘንድ - ከትናንት ሀገር
‎ሲለው ከዛሬ - ገና ካላየው ከነገም መንደር
‎የሀሳብ መዓት...
‎ሲያፈራርቅ - ሲጥል - ሲያነሳ
‎ሁሉን አስታውሶ - ሞቴን ረሳ!

ውኃውን በቀኝ - እሳት በግራ
‎እንድሞክረው - በተራ ተራ
‎እጄን እንድሰድ - ቀልቤ ካሻው ላይ
‎ሁሉ ተፈቅዶ - ያለ አንዳች ከልካይ
‎ራሴው ሆኜ - ለራሴ ጠላት
ነፍሴን ከእሳቱ - ገፍቶ ሊጥላት
‎መጥፊያዬን - መርጦ - እያስወደደኝ
‎ነፃነት ያሉት - ባሪያ አደረገኝ!

እንደምን አለሽ አበባዬ..?
እንዴት ሆኖልሽ ሌቱ ነጋ?
በረዶ ሲጥል - ባደረ ክረምት
ጠራራ ፀሀይ - ባዘለ በጋ?
እንዴት ቢሆን ነው - የአንድ ዕለት አዳር
ወዝሽን ወስዶ - ወና ያደረገሽ - ከዳር እስከ ዳር?
.
መልከኛ ነበርሽ..
ዛሬ እንደ ትናንት - ፈፅሞ አታምሪም
በወጠውለግሽ
ባጣሽው ሁሉ - አታማርሪም?
.
ብላት ምን አለች?
.
እንዳሳለፍኩት - ጠራራ ፀሀይ - ማማር አይጠልቅም
ተራ ጠብቆ እንደወረደው - በረዶ ዝናብ አይፈራረቅም
መልክ ሲቀይር - ተመልካች ካለ ውበት አያልቅም።
.
ትናንት ካየሽው - የፈካ ገላ - የተካከለ
ጠጋ ብትዪ..
በጠባሳዬ ተፅፎ 'ሚታይ - ውብ ታሪክ አለ።
.
ከትናንት ጋር
ትናንቴም ቢቀር - ዛሬን አተረፍኩ
አመስጋኝ ነኝ - ስላልተቀጠፍኩ።
ከውጣ ውረድ - ከግርግሩ - ታልፎ ሲታረፍ
ሚዛን ያነሳል...
ከህይወት ካጡት - በህይወት መትረፍ።

እንዳልታዘብ...
‎ሸፍቶ ሄዶ  - ማጣት ካልገባው - ሞልቶ የፈሰሰ መች ይታወቃል?
‎በአባትህ ቤትም - ልጅነት ቀርቶ - የባርነትን ወግ ያስናፍቃል።
‎.
‎እንዳላዝንብህ...
‎እንኳን ሌላውን - ለመኖር ብሎ - ካጣ የሚጎርሰው
‎የገዛ ራሱን - ሽጦ ያድር የል ወይ - የቸገረው ሰው?
‎.
‎.
‎በቃልህ ፈተህ ልታስር
‎በጥላህ ህመሜን ልትሽር
‎በእጆችህ ብትዳብሰኝ
‎ከስቃይ እንድትፈውሰኝ
‎በእኔ ላይ ሥልጣን እያለህ
‎ምን ኖሮ የሚተካከል -
‎ከእልፍኜ አስኮበለለህ?
‎.
‎እንደ ልጅ ተለማምኜ
‎መለወጥህን በተስፋ አምኜ
‎በፍቅርህ ፍጹም መንኜ
‎እያየህ ከእግርህ ስር ሆኜ
‎ጥሎ ለመሄድ እንዴት አስቻለህ
‎ላለመምጣትስ...
‎ከክብርህ የሚልቅ እዛ ምን አለህ?
‎.
‎የፍቅሬን ጥልቀት - የታገስኩህን ቁስል እያየህ - አትረዳኝም
‎እኔም ስላንተ - ጨክኜ እንዳልቆርጥ - እርም አያውቀኝም።
‎.
‎የሆነው ሆኖ..
‎የአንድ ነጋዴ - አቅሙ የሚለካው
‎ወይ ካተረፈ - አልያም ደግሞ - ክስረት ካልነካው።
‎ንገረኝ እስኪ
‎ድንገት ብፅናና - ዋጋዬን ሳውቀው
‎ስንት አውጥተሃል - ስንንት አትርፊያለው?
‎እርሷ ናት ብለህ - ጠቁመህ እስክትሰጥ
‎እስከ ኀሙስ ማት - ስመህ እስክትሸጥ
‎ስላለው ሂደት አልጠይቅህም..
‎ምን አልባት ያኔ - በነፃም ቢሆን አላከስርህም።
‎.
‎በሳምከኝ ቅፅበት - ሲደማ ነፍሴ
‎ሲፈረድብኝ - ሲፀና ክሴ
‎በስስ ምናብህ - አፍቃሪ ልቤን - ከፊትህ ስትስል
‎በዕድሜህ መጠን - በሚከተልህ የህሊና ቁስል
‎የዋጋዬን ልክ ስትተምነው...
‎ከሸጥከኝ ወዲህ በምትከፍለው -
‎ንገረኝ እስኪ - ስንት አወጣለው?

ትናንትና ማታ - የወረደውን ዶፍ
በምድጃ እሳት - በብርድ ልብስ ንጣፍ
በሞቀ ቤቴ ውስጥ -
ሽሽግ ኩርምት ብዬ
አለፍኩ - ተከልዬ።
.
በአራት ግድግዳ -
ጣራው በማያፈስ
እሸት ከበን - ብንጠብስ
በሻማ ብርሃን - በደራ ጨዋታ
በሳቅ - በደስታ
በሺህ - መንደላቀቅ
በብዙ - አይነት - ምቾት
ልክ እንደዝናቡ..
አያልፍም ወይ ናፍቆት?

ልናገር ብዬ የውስጤን ብሶት ሰሚ ስላጣሁ
‎ዛሬም ከቤትህ ስለሆነብኝ ላማርር መጣሁ።
‎.
‎ለነገሩ ሰው ምን ዕዳ አለበት ምን አደከመኝ?
‎ቻለኝ በል አንተ መከራን በአይነት እንዳሸከምከኝ!
‎.
‎አረ ተው እግዜር...
‎መቼ ነው እኔ ደጅህ ምስጋና ይዤ 'ምቀርበው?
‎እንደ ሰው ሁሉ ስለቴ ሰምሮ መባ የማቀርበው?
‎ሁሌ ማማረር ሁሌ ለእንባ ሁልጊዜ 'ሮሮ
‎ምን ነበረበት...
‎ዛሬ አመጣጤ ላመሰግንህ በሆነ ኖሮ?
‎.
‎ላታዘልቅልኝ እያሳየኸኝ ትነሳኛለህ
‎የማትሰጠኝን እስከ መች ድረስ ታጓጓኛለህ?
‎መርዶ ነው እንጂ የምስራችን ዕጣዬ አይወድም?
‎እስከ መች ድረስ ከልብ መሳቅ ለእኔ አትፈቅድም?
‎የንፋስ ያህል ሽው ያለ ደስታ...
‎መከራን አዝሎ ይጠብቀኛል
‎የቅፅበት ሳቄ ስንት የእንባ ቀንን ያስከፍለኛል?
‎.
‎አረ ተው እባክህ!
‎መገፋት መራብ ማዘን ማልቀሱን
‎እኔኑ ሆነህ ስታውቀው ሁሉን
‎እስኪ ምናለ..
‎ለትከሻዬ ብታሸክመው መርጠህ ቀላሉን?
‎.
‎ከአንተ ፊት እንጂ
‎ወንድ ልጅ እንዲህ 'ሚነፋረቀው
‎በአደባባይስ ችሎት ይውላል ሲተናነቀው።
‎.
‎ስማኝ እንግዲህ...
‎በሞት ስትነጥቀው የሚወደውን
‎ከእጁ ስትቀማው የጨበጠውን
‎እየከበደው አይቶ ማጣቱ
‎መኖር ነው እንጂ..
‎ሞትስ አይደለም የሰው ቅጣቱ!

አሁን አዲስ ዓመት በመጣ ቁጥር የማንተገብረውን ማቀድ ትተናል። ሲጀመር ሕይወት ለዕቅድ ብዙ አትመችም። ነገዋ በብዙ ድንገቴዎች የተሞላ ስለሆነ። በሕይወት የሆነውም የሚሆነውም ግን ያን ያህል አያስገርምም። ማለዳ ማለዳ አዲስ ሁሌ የሚደነቅ እርሱ እግዚአብሔር ብቻ ነው!
‎.
‎ተስፋ ግን እናደርጋለን! ተስፋ የምናደርገው የሚረዳን እርሱ እንዳለን ተማምነን ነው። እጃችንን አጣጥፈን ግን አንቀመጥም። እንጥራለን እንሞክራለን ስድስት ጊዜ እየወደቀን በሰባተኛው እየተነሳን እንቀጥላለን።
‎.
‎ቢሆንልን ብለን የምንመኘውን በልባችን እንጠብቀዋለን። ግድ በዚህ ዓመት ካልሆነ አንልም። በጊዜው እስኪሆን ድረስ ግን በመጠበቅ ውስጥ እኛን እስኪሰራን መታገስን እንዲሰጠን እንለምነዋለን። ያልተሰራ ማንነታችን ፥ ከዘመን ጋር ያልታደሰው አሮጌ እኛነታችን የልባችን ሲሆንልን እንዳያቀልብን! መመኘት ብቻ ሳይሆን መቀበልም ላይ ጎበዝ እንድንሆን! ለምኞታችን የተገባን ሰው እንዲያደርገን ነው!
‎.
‎.
.
‎ጭንቅ የሆነውን የሕይወታችንን ክረምት አሳልፎ ዳግመኛ ፀሐይን የሚያወጣልን ፤ አዲስ ቀን አዲስ ዓመት እየሰጠ ከተስፋ የማያጎድለን አምላክ እግዚአብሔር ይመስገን!
‎.
‎መልካም አዲስ ዓመት!🤍