በጊዜ ብዛት እንዲህ እንድንፈራራ ፣ እንዳንተማመን ፣ የጎሪጥ እንድንተያይ ፣ እኔን አይንካኝ እንጂ እንድንል ፣ ደርሶበት ይየው ብለን እንድንመኝ ፣ እንዳንተዛዘን ሆንን። በአንድ ሰማይ ስር እየኖርን የምንጋራው ብዙ ህመም ፥ አንድ ያደረገን ነፍ እንባ እያለ እርስ በ'ርሳችን ግን ባይተዋር ሆንን። ያቺ ሲወራላት የሰማናት እኛም ከደረስን ያየናት (እንጀራ አድርጎ ጎረቤት ቤት ወጥ አስደርጎ የመብላቷን አይነት ፣ ቤት ሳይቆልፉ አደራ ብሎ ብቻ የትና የት ደርሶ ውሎ አድሮ የመምጣቱ አይነት) ትንሽም ፍቅር ትንሽም መተሳሰብ እየተሸረፈች እየተሸረፈች እያነሰች እያነሰች እዚህ ጋር ደረሰን።

"ለካ እንዲህ ነው ማለቅ እህ እያሉ ነዶ
ሀገር የሞተበት የት ያለቅሳል ሄዶ"💔

ዳስ ጣል ልቤ!💔

ቴዲያችን ድምፅ ስለሆንከን እናመሰግናለን!

an old note but...
‎
‎ይሄ ጊዜ የሰርግ ወቅት አይደል? አፍቃሪ ያደርጋል። የሆኑ የሆኑ ሰዎችን ያስናፍቃል። ወልዶ ከብዶ አብሮ የመኖርን  ነገር ደግ ደጉን ያሳስባል። ብቸኛ የሚፈተንበት ጊዜ ይመስለኛል። ለማንኛውም😁
‎.
‎.
‎.
‎በልጅነት ገለል ብላ ትቀመጥ የነበረች ሴት ታውቃለህ? yap, that is me.
‎
‎ዝምተኛ ሲበዛ አልቃሻዋ። ረጅም የሚጎተት ቀሚስ ካሰኛትም ሻርፕ ለባሽዋ። የጨዋታ ሰው አልነበርኩም። ጎበዝ ነኝ የምልበት የልጅነት ጨዋታም አልነበረም። ወሬ እወድ እንደነበር አስታውሳለሁ።(i still do.🙂) ዕድሉ ተሰቶኝ ባላወራም በደንብ አዳምጥ ነበር። ተማሪ ሆኜ ብዙ ጊዜ የእረፍት ሰዓቴን እዛው ክፍል እንደማሳልፍ ትዝ ይለኛል ዮንቨርስቲ እስከምገባበት ጊዜ ድረስ።(i can't recall how i spent it before ግን ከክፍል አልወጣም ነበር።) አራተኛ ክፍል ላይ አዲስ ትምህርት ቤት ገባሁ። በትምህርት ሰዓት አንድ ወረቀት እየፃፍኩ ምን መሆኑን እንጃ በቀይ እስኪርቢቶ እንደተፃፈ ግን አሁንም አስታውሳለሁ። አንድ ሰው ለአስተማሪ ሰቶብኝ ከተማሪዎች መሃል ወጥተው እንዲያነቡት አደረገ። i cried my eyes out. ያኔ ቃል በቃል ጽሑፋን ባላስታውስም ወሬው ተዳርሶ ስለነበር ስለ ፍቅር እንደነበረ ከሌሎች ክፍል የመጡ ልጆች "ልጅ አደለሽ?" "ትምህርትሽን አትማሪም?" እያሉ ሲመክሩኝ ስለነበር መገመት አያቅተኝም።😁 አብዛኛው የልጅነት ጊዜዬ በዝምታ እና በብቻ ያለፈ ነው። ከእኩዮቼ ጋር ከመግባባት ከእኔ ከፍ ካለ ሰው ጋር ማውራት ይቀለኝ ነበር። የእኛ ሰው ደግሞ በየትኛውም መንገድ እርሱ የሚያደርገውን እንዳታይ ስለሚፈልግ ሲያሸሽህ ነው የሚኖረው። behave like a child እባል ነበር..
‎
‎ልጅነቴ በማይነገሩ ጊዜዎቼም ድብዝዝ ብሎ ያለፈ ነው።
‎
‎suddenly ግን ሁሉም ነገር ተቀየረ። በደንብ ነገሮችን ከማስታውስበት ጊዜ ጀምሮ ደግሞ..
‎
‎I used to know a lot of peoples. ቤት ይገርማቸው ነበር። ይዣቸው ስመጣ ስልክ ሳወራ ምናምን who is she ደግሞ? አናውቃትም is she new? how do you know him? ምናምን ይሉኛል። well...አጋጣሚ አስተዋውቆን እላለሁ።
‎እንደ እውነቱ ግን ባለፍኩበት መንገድ ሁሉ ሰውን ሳልይዝ የሄደ ቀኔ ትዝ አይለኝም። አስቤውም ይሁን ሳላስበው። በሰው የሚሞላ ክፍተት ያለኝ መስሎ ይሰማኝ ነበርና ትንሽ ፈገግታ ያሳየኝን ሁሉ በትልቅ ስም በህይወቴ ቦታ አስይዤ አገኘዋለሁ። የሚገርመኝ ደግሞ i am not even an extrovert type of person እኮ ግን i used to know a lot of people.(a lot of toxic people actually.)
‎
‎ማወቅ ወደ መተዋወቅ መተዋወቅ ወደ ቅርበት ቅርበት ወደ እምነት እምነት ወደ ነፃነት ነፃነት ደግሞ ወደ ምቾት ሄደ እና የኔ የምላቸውን ሰዎች ለየው።(it's the cycle of any relationship i guess..)
‎
‎ሁሉም እዚህ ጋር ነው የሚጀምረው...
‎
‎
‎f r i e n d s.( am not talking about my favourite tv show i wish i were ግን ሰዓት አይበቃኝም😁)
‎
‎ጓደኛ ካደረግናቸው ካደረጉንም ጋር አወራን። ስለ ጥንካሬያችን ስለ ድክመቶቻችን እስከነርሱ ስለመጣንበት መንገድ ስለ ቤተሰቦቻችን(ቤተሰብ ተዋውቀን ቤተሰብ እስከመሆን ደረስን)
‎ስለምናውቃቸው ሰዎች ሁሉ ስለ ምንወዳቸው ኧረ በጋራ ስለምንጠላቸውም ሳይቀር አወራን። ከዛ የሆነ ዕለት ሳት ብሎን ስለስህተቶቻችን አወራን።ሳት ብሎን ማለት ድንገት አምልጦን ያወራነው ብቻ አይደለም። ምቾት ካመጣው ነገር ቅርበት ካመጣው የኔነት ስሜት የተነሳ የተናገርነው ለራስ ብቻ የሚነገሩ ታሪኮቻችንም...
‎
‎and guess what? ከሌላ ከሶስተኛ ሰው ሰማነው። because የተወራለት ሰው ለእኛ stranger ላወራንለት ሰው ደግሞ best friend ስለሆነ።  ቆይቶ ቆይቶ አንድ ነገር...ተገለጠልን...እንዲህ አይነት ሰው የቀን መሄጃ እንጂ safe place እንዳልሆነ። ስላለበት ጉዳይ ታወራዋለህ እንጂ ስለሌለበት ውሎህ ስላልነበረበት ቀንህ አታካትተውም። ያልዳነ ህመማችን ሌላ ምርቃት ነበሩ።(እኛን ማዳን የእነርሱ ኃላፊነት አልነበረም for sure. ግን what is friendship ,if not free from judgment? ደግሞ እንደ ቅርብ ሰው ቀርቶ እንደ ማንም ነፃነት ሰተው በሰሙት ህመም አይፈረድም።) ስለምንቀራረብ በሚል ስበብ ስለታለፋት boundaries ምን እንላለን?
‎and
‎the worst part is አያቁትም እንኳን:: they blame you. እህ ተቀይረሻል በጣም ምናምን። ያ ሁሉ ጊዜ በአንድ ጀንበር ተንዶ እንዳልሆነ አይገባቸውም። ያለፍናቸው ብዙ red flags ነበሩ። don't get me wrong am so thankful አብረን ስላሳለፍናቸው ስለ አንዳንድ የማይደገሙ ቀሽትዬ ቀናቶች። ደግሞ God knows how much i love them still. ግን እንኳን እነዛን ሰዎች ስላልጠቀመችኝ እኔንም ትናንት ላይ ትቻታለሁ። በዛ ላይ i now know something i didn't know back then...that it takes a lot to call someone a friend. to be a friend too.

‎ከዛ በሌላኛው የህይወት ክፍል ደግሞ...
‎
‎ስንቱን አፈቀርን? ስንቴስ አፈቀርን?
‎five times a day እንበል.😁
‎
‎ትንሽ ጥሩነት ያሳየንን ሁሉ በጎደለን አስገብተን መሙላት ስለተመኘን ወደድን። እየተገፋን ወደድን። እያልተፈለግን ወደድን። በአንዳንዱ ተወደድን። ተወደድን ግን አብረውን እስከመሆን አይደለም።
‎
‎የሆነ ዕለት ደግሞ በለስ ቀንቶን በወደድነው ተወደድን። (how can anyone put in to words the feeling of love on both sides!? its heaven!)ሰስተን የእኛ ብቻ እንዲሆኑ ላናጋራቸው ከሰው ሸሸግናቸው።(don't share anything good ይባል የለ? ሰው የሰማው ነገር..እደዛ።)
‎ወደን በወደዱን በኩል ገነትን አየናት። ስታምር! ገነት ውስጥ መሆን ዘላለም መኖርን አሳሰበን ተድላ ደስታን አሳሰበን ትንሽ መተማመንንም ፈጠረና ለቀቅ አርገን ልናሳይ ስንጥር ሳናጣጥመው ሳንጠግበው ሹልክ አድርጎ አወጣን። ስለ መለየት ስለ ማጣት ማሰብ ጀመርን። ከቃል በላይ ምን ያቆስላል? ዝምምም ማለት ስንችል ብዙ ተነጋገርን። ፍቅርን ባዜመ አንደበት ጉንጭን በሳመ ከንፈር።
‎ቆይተን ግን
‎እርም ብለን በፍቅር ማደም አልቻልንም። ደግመን የምናገኘው ስለመሰለን ባገኘነው ሁሉ ያጣነውን ሰው እናስስ ጀመር። የለም። ምናቸውም ምናቸውንም አይመስልም። እያዘንን ሌላውንም እያሳዘንን በህመማችን እያስከፈልናቸው መጣን።(ጎድተውናል ብቻ አደለም ለካ we hurt them too.)
‎
‎ወደ ልባችን ተመልሰን ጌትየውም ረድቶን

‎ከክፋት ከስብራት ከመጣንበት ህመም ሁሉ ነፃ መሆን ስንጀምር..ሽልማቱ እኛን ማየት ሆነልን። ለራሳችን እንግዳ ሆንን። ብዙ ጊዜያችንን ያሳለፍነው ለካ ከሌሎች ጋር ነበር።
‎.
‎.
‎ያለኝ ሰላም ከእነዚህ ሁሉ የተመረጠ ነው።
‎
‎ከአንተ ጋር ይሄንን ሁሉ ባወኩበት ሰዓት ተገናኘን።(ትልቅ እውቀት ነው? ለሚለኝ YES!!)
‎
‎ኖረውን ያላየናቸው ኖረናቸው ያላዩን የተሸዋወድናቸው ውብ ሰዎች እንደነበሩም አንክድም። ራሳችንን መርጠን ሰላምን መርጠን ያስተናገድናቸውን ስንብቶች ግን we won't look back with regret.
‎
‎ስለ ሰላም ልንገርህ...(am not talking about my name.😁)
‎
‎እንደ ጠቢብ ለሀሳቤ ጥቂት ቃል አልበቃ ብላኝ
‎ይሄን ሁሉ አልኩ እንጂ የፈለኩትስ
‎ስለዚህ ላወጋህ ነው።
‎
‎ቀላሉ ነገር ምንድነው ካልከኝ መጀመር። ፈልገህ አምነህበት መጀመር ከዛም ለመቆየት መወሰን ግን it is a real struggle. 
‎በህይወትህ መቆየት እፈልጋለሁ። አንተንም በህይወቴ ማቆየት።
‎.
‎.
‎እያንዳንዱን ቀን የትውስታ አርገን እንድናልፍ..
‎መኖር ያሏትን ነፍፍፍ ስጦታዎች አብረን እንድንቀበላት...
‎
‎taking long walks,writing letters(you know..love like the old days..)
‎ደግሞ
‎ስለ መጽሐፍ ስለ ፊልም
‎ስለ ዘፈን(በተለይ the old ones)
‎ስለ ልጅነት ስለ ምርጫዎቻችን ስለ ስህተታችን ስለ 'ሚፀፅተን ነገር እነዚህንም ሁሉ ደግሞ ያለ ፍርሃት ከመገመት በራቀ በፍቅር ዐይን እየተያየን ማውራት..
‎ደግሞም ስለ ተስፋ ስለ ነገ በነገ ውስጥ ስላለ አብሮነት ማሰብ(የልጅ ስም የማውጣትን አይነት አደለም። እሱም ቢሆን አልጠላም😁 ግን you know ነገ አብረን ስለምንሸኛት ጀምበር ስለምንጠጣው የናና ሻይ ስለ ምታነብልኝ መጽሐፍ  ስለ...i know it sounds stupid. የልጅ ስም ማውጣት በስንት ጣዕሙ እያልክ ይሆናል😁 ግን what is love? isn't it about being foolish?) ለእኛም ስም እናውጣለን አንተን በጠራሁበት ሌላ ሰው አልጠራም። ለእኔ ያወራከውን ከሌላ ሰው አልሰማም። ምስጢረኛህ እሆናለው የምታመንብህ ትሆናለህ። ለይቅርታ ልቤ ክፍት ነው አንተም ብዙ ልትተውልኝ ዝግጁ ነህ...
‎.
‎.
‎ይሄንን ሁሉ ማየት እንድትችል ግን መጀመሪያ heal my love.
‎
‎ከልጅነት ህመም ልክ አለመሆኑን ስታውቅ ከተሰመረልህ መስመር ላለማለፍ ከሚገድብህ አስተሳሰብ ከትናንት ማንነት ከራስህ መጥፎ ጠባይ ከtoxic relationship..ጥያቄ ካነሳብህ ሰላምህን ከቀማህ ነገር ሁሉ...heal.
‎
‎i don't want you to be my peace.(ቢሆን እሺ🖤 ካልሆነም ግን it's so fine. cause i already have that.) የምፈልገው ቀድመህ ከራስህ ጋር ሰላም እንድትሆን ነው። so we can know how to love each other the right way!

አንበሳ አድነህ ፥ ተኩሰህ ባትገድል

በጠጠር ጥለህ ፥ ባይፃፍልህ ገድል

የሚጫን በቅሎ ፥ የምታርስበት ፥ ባይኖርህ በሬ

ባትዘራ ፥ ባታርስ ፥ ባታበራይም ፥ እንደ ገበሬ

እንደአባቶችህ ፥ ለአክሊል ባትሾም ፥ ባትደፋ ዘውድ

ጦር ጋሻ አንስተህ ፥ ሀገር ባይኮራ ፥ ባይመካ ዘመድ

ከህልም ፥ የሚያደርስ ፥ ባይኖርህ ምርጫ

ባታስጨበጭብ ፥ ባትሸለምም ፥ ወርቅና ዋንጫ
.
የተማመንከው...
ይሆናል ያልከው..
አፈር ቢለብስ ፥ ፊትህ ቢቀበር
ባንኳኳኸው ልክ ፥ ቢዘጋብህ በር
እ ን ዳ ት ሸ በ ር።
.
.
የሚያየን ሁሉ...
በጨበጥነው ልክ ፥ አቅማችንን እየተመነ
የነገን ተስፋ ፥ በዛሬ ማጣት ፥ እየመዘነ
መቼ ነገረን...
ሞክሮ መውደቅ ድል እንደሆነ!

እንኳን እኔን ፥ ፍቅርማ...

‎ስንቱን ጀግና ፥ ከእግሩ በታች ፥ ወስዶ ጥሏል

‎ጌታም እኮ ዙፋን ንቆ ፥ ከባሪያው ጋር ወርዶ ውሏል

የሰጠሁህ ቢቀልብህ ፥ መውደድ አይሆን ተለምኖ

‎ድሮም ፍቅር..
‎ካለቦታው ከተገኘ ፥ ከተጓዘ ልቡን አምኖ
‎
መቸንከር ነው ዕጣ ክፍሉ ፥ በአደባባይ እርቃን ሆኖ።
‎.
‎.
‎እንዲህማ ደስ አይልም እንዴ! ምን እየሆንሽ ነው? እልና ኩርርርት ልል ትውውውት ላደርግህ አስብና...ለወደደ ልብ መጀገን ሞቱ እንደሆነ ሳውቅ እያዘንኩ እተወዋለው። ንጉሥን እንኳን ሳይቀር ከዙፋን በረት ካስመረጠ ፥ ካስተናነሰ እኔ ታግዬ ላሸንፈው ነው?
‎
‎ባይሆን ምን ገባኝ? ይሄ ፍቅር የሚሉት ነገር ትዕቢት ላቆሰለው ልብ መድኃኒት ሳይሆን አይቀርም።  ጅንን ብሎ ያፈቀረ ሰው ታውቃለህ? እኔ አላውቅም። የአፍቃሪ ብልጥ የአፍቃሪ ኩሩ ያለ አይመስለኝም። ክብሬስ ብሎ መውደድ የለም። ከራስ በላይ ለሌላ ያሳስባል። ለሌላ ደስ ያሰኛል። በጎ ያስመኛል። ያፀልያል። ያለ ምላሽ ያስወድዳል። እኔ ብቻ ከሚል ሀሳብ ይለያል።
.
በህይወት መንገድ ልቤን ትንሽ የሰበረው ሁሉ የዋህ ጎኔን ነክቶት እልፍፍፍ ነው ያለው። ለልቤ ጌታዬን መምሰል እያስተማረው ሳይሆን አይቀርም...
‎

‎"ልጅነቴ ልጅነቴ
‎ማርና ወተቴ"
‎.
‎ስቄ ያልጨረስኩ
‎ ያልጠገብኩኝ ተጫውቼ
‎ገና ያልቀጡኝ መንገድ ስቼ
‎ ብዙ አጥፍቼ።
‎.
‎አላዋቂ ትንሿ ልጅ...
‎ ሆኜ ሳለው ዛሬ ጠዋት
‎ማታ ራሴን
‎ እየመከርኩ አገኘዋት።
‎.
‎ብርቱ ጉልበት
‎የማይደክም ፥ በማለዳ
ካመሻሹ...
‎ነጭ ጠጉር ሽብሽብ ቆዳ!
‎.
‎መኖር እንዲህ
‎የቀን ውሎ ፥
‎ጊዜም ችኩል
‎መብረር መብረር..
‎ከማህፀን እስከ እርጅና
‎አ ን ድ ጀ ን በ ር።

‎ውልብታ የሚለው የዓለማየሁ ገላጋይ(እንደአሌክስ አገላለፅ የአጭር አጭር ልቦለድ) መጽሐፉ ላይ አንድ የሚያስቀኝ ጽሑፍ አለ።
‎.
‎ሊፍት ሲጠይቁት አመናጭቋቸው የሄደ አንድ አዛውንት ናቸው ቦታው ይጠፋበትና ተመልሶ መጥቶ ሲጠይቅ የተፈጠረ ነገር ነው።
‎.
‎.
‎መኪናውን አቆመ ያለንበትን ተጠራጠረ። ጭንቅላቱን በመስኮት ብቅ አድርጎ መንገደኛ ጠየቀ።
‎
‎"ፌር ኢትዮጵያ የቱ ጋር ነው?
‎
‎"እታች ነው እኔ አውቀዋለው" አሉ አዛውንቱ
‎
‎"የት እታች?"
‎
‎"ላሳይዎ" ብለው የኋላውን በር ለመክፈት ሞከሩ።
‎
‎"በጥቆማ አሳዩን" አለ መልሶ።
‎
‎"በጥቆማ አይታይማ" አሉ አዛውንቱ ክፍት ብሏቸው "እኔ የምሰራው እዛው ፌር ኢትዮጵያ ነው። ዘበኛ ነኝ።"
‎
‎"ጥሩ ግቡ" ብሎ የኋላውን በር ከፈተላቸው።
‎
‎አዛውንቱ ሌሎች ጠና ጠና ያሉ ዘመነኞቻቸውን መርጠው ከእርሳቸው ጋር አስገቡ። ሄድን።
‎
‎"ደረስን" ሲል
‎
‎"ሂድ" ይላሉ
‎
‎"ደረስን?"
‎
‎"ሂድ"
‎
‎"ደረስን"
‎
‎"ሂድ"
‎
‎መጨረሻ ጦር ኃይሎች ደረስን። ጓደኛዬ ተጠራጥሮ "አሁንም አልደረስንም?" ሲል መኪናውን አቁሞ ጠየቃቸው።
‎
‎"አሁን ደርሰናል" ብለው አዛውንቱ የአዛውንቱን ጦር እየመሩ ከመኪናው ወረዱ።
‎
‎"ፌር ኢትዮጵያ የታል?"
‎
‎አዛውንቱ በእኔ በኩል በመስኮት አጮልቀው ፈገግ እንዳሉ።
‎
‎"ቅድም ያሳፈርከን ቦታ ላይ ነው። እኛን እዚህ ያደረስከን በግድህ ቢሆንም በግዳችን እንመርቅሃለን ደህና ግባ።"

የአባቶቼ ራዕይ - የሊባኖስ
የሃና እንባ - የጸሎቷ መልስ
የጥፋት ውሃን  መጉደል አብሳሪ
በሞቴ መዝገብ - ህይወትን ዘሪ..
ርግቤ ሆይ!
አበባዬ ሆይ...
.
"ልደትሽ ልደታችን ነው!"❤️

‎ለትልቁ ሹመት ታጭቶ
‎በትንሽ ህልም ታጠረ
‎አላውቀው ብሎ ነው እንጂ
‎ሰው ለዚህ መች ተፈጠረ?
‎.
‎እያወቅክ...
‎ጤዛ አይደል ዕድሜ?
‎ስባክን ልቤ ሳይረጋ
‎እንደምን ልለፍ ዓለሜ?
‎.
‎ሀሳቤ የዛሬ ብቻ
‎ምኞቴ ለኀዘን ዳረገኝ
‎ጠፊውን እያሳሰበ
‎ስጋዬ ባሪያ አደረገኝ።
‎.
‎ገላ ተው - ተው ተለመነኝ...
‎እያየው ደግ አይራቀኝ
‎ካላፊው ከዕለቴ አላቀኝ
‎ከነፍስህ ከነፍሴ አስታርቀኝ።
‎.
‎ከምንጩ ቀድተን እንጠጣ
አቀበት ተራራ እንውጣ
ከወንዙ አብረን እንውረድ
‎ተፈጥሮ ድምጿን እንስማ
‎ስጋችን ይሸነፍልን
‎ከነፍስህ ነፍሴ ትስማማ።
‎.
‎አንዴ እረፍ ልረፍ ከመሮጥ
‎እኀቴ ወዳጄ ስትል...
‎ጥዑሙን ድምፅህን ላድምጥ።
‎ፈውሰው በቃልህ ቁስሌን
‎አስንቀኝ አፈር አካሌን
‎አራግፈው የዘመን ሸክሜን
‎ልበርታ ልርሳ ድካሜን።
‎.
‎ዋሽንቱን ተጫወትልኝ
‎በገናን ክራሩን ደርድር
‎ረቂቅ ግዙፍም እንሁን
‎የሚታይ ደግሞ የሚሰወር።
.
‎ሰውነት ጥጉ ሰማይ ነው
‎ከስጋ ሀሳብ ይርቃል
‎መስከንን
‎ልብ
‎ሲረዳ
‎የፍቅርን ከፍታ
‎ያውቃል።
‎.
እንሂድ - ከነፍስ ቦታ...

‎/አሁን እነግርሃለው ስል። የሆነውን ሁሉ። ያሳለፍኩትን። ሰው አላስጠጋ ያልኩበትን። ቁጥብ የሆንኩበትን። አንድም ሳላስቀር። ከዘፍጥረት ጀምሮ ያለውን ታሪኬን። ቀጥፌ እስከበላሁት ፍሬ። 'ርቃኔን አይቼ አፍሬ እስከተሸሸግኩበት። ሞቼ ተቀብሬ አበቃ ሲባል ትንሣኤ እስከሆነላት እኔ። ላወጋህ ሽቼ ነበር። ለትናንቴ እንግዳ እንዳላደርግህ ብዬ። ደግሞ ላልነበርክበት ስብራት ከፋይ እንዳትሆን። ወደኸኝ ነበርና የዳነ እኔ ይገባህ ስለነበር...መርሻ ላደርግህ አለመፈለጌን እንድታውቀው። ደህና ነኝ ብዬ ሳስብ ሁሉንም ሁሉንም ልነግርህ ነበር....ቀደምከኝ../
‎.
‎"ደስ ስትል" አልከኝ። "ብታይ የቅርቤ ነች" አልከኝ። "ብዙ ሳናወራ እንግባባለን። ሳላውቀው ነው የወደድኳት። አብሬያት እንደመሆን የሚያስደስተኝ ነገር የለም። ሁሌ ባየኋት። ሁሌ አብራኝ በሆነች። መልሷ ምንም ቢሆን ግድ የለኝም። እኔ ወድጃታለው።" አልከኝ።
‎.
‎/ጊዜ ስንት የቅርብ እንደሚሰጥ ረስቼው ነበር። ስንት እንደሚያለምድ። ስንቱን እንደሚያስረሳ። ስንት አዲስ እንዳለው....ልብ ስንቴ እንደሚወድ...ለአፍታ ረስቼው ነበር።/
‎.
‎.
‎"የት ሄድሽ?"
‎
‎"እም አለው። ደስ ይላል። ይቅናህ።"
‎.
‎.
‎/ህይወት የት ጋ አላዋቂ እንደምታደርገን'ኮ..የሞኝ ነገር።
‎ትናንት ላይ መች ይ'ቀራል። አላዘንኩም ግን ዝግጁ አልነበርኩም።
‎.
‎መንገዳችን ደጋግሞ ሲገጣጠም የሚቀጥል ነገ ቢኖረን ነው ብዬ ተስፋ ነበረኝ። ለካ ያልተቋጨ ትናንት ቀርቶን ነው። ይሁን እንኳን እንዲህ ጨረስነው። መቼም ከባዶ ተስፋ ያለፈ ትዝታ ይሻላል።
‎.
‎ይወደኝ ነበር.../

ድሮ ድሮ...
‎
‎በደጃች ውቤ አሳበን
‎በጌምድር ተላቀስን
‎ያለ እንባ የሸኘነውን
‎ወዳጅ ዘመድ አስታወስን።
‎
‎አለቀስን! አለቀስን!
‎.
‎ወንድምን መከታን አጥቶ
‎አካልን ልጅን ሸኝቶ
‎ያ ሳያንስ - ኀዘን ተቀምቶ!
‎.
‎እታበባ - ዛሬም ደሞ ዘመን ከፋ
‎ለእንባ 'ሚሆን - ዕለት  ጠፋ።
‎.
‎እንዳላፅናናሽ ቤትሽ መጥቼ
‎አይዞህ እንዳትይ ቤቴ ተገኝተሽ
‎የእኔን ቁስል ለማስታመም
‎እንዴት ያንቺን ኀዘን ትተሽ?
‎.
‎ህመሜን ልቻል
‎ዋጪው እንባሽን 
‎እንታገሰው..
‎ጎዶሎ ቀኔን - ክፉ ዕድልሽን።
‎.
‎ያንቺ ቤት ነገር -የኔ ቤት ዕጣ
‎ጊዜ ቀን ቀጥሮ - ቤቱ ሲመጣ
‎በበጌምድር በአዋጁ ቦታ
‎እንገናኝ የዛን ለታ።
‎
‎/"ዐፄ ቴዎድሮስ በበጌምድር ማንም ለሞተ ዘመዱ እንዳያለቅስ የሚል ዐዋጅ አውጀው ነበር። በዚህ መሃል ደጃች ውቤ ይሞቱና ለእቴጌ ጥሩወርቅ ወደ መቅደላ መርዶ ይላካል። ዐፄ ቴዎድሮስም ለሕዝቡ "ለደጃች ውቤ አልቅሱልኝ" ብለው አዘዙ። ሰዉ ሁሉ ለዘመዱ የቀረበትን ለቅሶ ያን ጊዜ ወጣለት። ያን ቀን ተለቅሶ የማያቅ ለቅሶ ተለቀሰ ይባላል።"/
‎

ወልካፋ ዕድል ~ ለአንዴ ትቶኝ
እንደሌላው ~ እኔም ቀንቶኝ
እኔም ቀንቶኝ ~ እንደው ለአንዴ
ድንገት ስታልፍ ~ በመንገዴ
ገልመጥ አርገህ ~ ካየህ ቤቴን
አደራህን ~ ሶስት ምኞቴን።

፩

ልክ እንደ ልጅ...
ዝቅ ማለት ~ ክብርን ጥሎ
በደል መርሳት ~ ይቅር ብሎ
የፈጠርከውን ~ መውደድ ያለአድሎ።
ሞክሮ ~ መሳት
እርዳታ ~ መሻት
አግዙኝ ማለት...
ኮርቶ መጠየቅ ~ ያላወቁ ዕለት።
እውነትን ብቻ እንዲናገር አፍ
በንፁህ ህሊና
በጥሩ እንቅልፍ ~ ለሊቱ እንዲያልፍ
ከሆነው ሁሉ ~ መልካም እንዲያተርፍ

/እንዲህ ለልቤ...
ከከፋው ሁሉ
እንዲታየው ደግ
ይኸው ምኞቴ
ወደ ልጅ ማደግ።/

፪

ያረጉልኝን ~ ዛሬ እንዳልረሳ
ስለ ሰው ክፋት ~ እንዳላነሳ
እኔው መጋቢ ~ ራሴው አራጅ
አይዞህ ባይ ወዳጅ ~ መልሼ ፈራጅ
በሁሉም ነገር ~ አስተያየት ሰጪ
እኔው ተሳሳች ~ ራሴው ቀጪ
እኔው ጠያቂ
እኔው አዋቂ
የማልፈጽመው
ቃል አስጠባቂ።
የወደድኩትን ~ ግፍ ተባባሪ
የጠላሁትን ~ ደግ አባራሪ
ለጨለመበት ~ ብርሃን አብሪ
እዛ ጋር ደግሞ ~ ልብ ሰባሪ

/ትዕግስት አጥቼ
ሆኜ እንዳልገኝ
ሁሉንም አሁን
የነገር መልሴ
ዝምታ ይሁን።/

፫

በመበለጤ ~ እንዳልናደድ
ሰውን ለመጣል ~ በግፍ እንዳልሄድ
በገንዘብ በርስት ~ እንዳልጣላ
ከሰው አብልጬ ~ ለጠፊ ነገር እንዳላደላ
መሙላት ቢሳነኝ ~ ጎዶሎ ጓዳ
አቅጄ አልሜ ~ ሰው እንዳልጎዳ።

አትንኩት ብዬ
ባላፈስ ደሜን ..
ሳልራራ እንዳልቀር
በግፍ የሞተ አይቼ
ወንድሜን..

/ እንዳልነጠቅ
የሰውነት ወዝ
የሰው ቀለሜን።
...አሜን! /

‎ፍቅር ለሰጠኝ - እምነት ስነሳ
‎ማጣትን ለምደህ - ተስፋ ሲያሳሳህ
‎ልባችን ከብዶት - እንዳይደላደል
‎ስንጠራጠር - ስንገዳደል
‎ትናንት ለእርቅ - አርደን ፍሪዳ
‎ደሙ እንኳ ሳይደርቅ - መልሰን ባዳ
‎ተላምደን ኖረን - ደግመን እንግዳ።
‎.
‎በድቅድቅ ዘመን - ጭላጭል ተስፋ - እንደተመኘው
‎ነገ ሌላ አለ - በሚል ጅል ተረት - እንደተሞኘው
‎ልቻለውና - ያልፋል እንዳልኩኝ - የእንባ ቀኔ
‎እንደተከፋው - ህመሜ ሳይሽር - ላልፍ ነው እኔ።
‎.
‎የለም የለም - ነገ መልካም ነው - ብለህ አትሸውደኝ
‎ያለፈው ቀኔ - የዛሬን ያህል - መቼ ከበደኝ?
‎.
‎ባልፀና ጉልበት - ባልዳነ ቁስል
‎ዛሬን ተገኘን - ከነህመማችን
‎በእጃችን ሆኖ ቀሎብን እንጂ -
‎ትናንት ነበር ደግ ቀናችን!
‎.
‎ታውቃለህ ከራሚ አደለም -
‎ሂያጅ ነው ስንትም ቀን ቢያድር
‎ዘመኑ የመዳፍ እፍኝ -
‎እንግዳ ነው ሰው ለምድር።
‎.
‎ዘንድሮ ብሶ ባይሻል
‎ከአምና
‎ከድካም በቀር
‎ትርፍ የለምና -
‎እስክንሄድ ድረስ ደርሶ ተራችን
‎እንክረም ዛሬን በትዝታችን።

‎ለኀዘንተኛ ልብ
‎መፅናኛ ነበር ወትሮ
‎ሙዚቃ
‎
‎መርሻ ነበረ እንባ እና ሲቃ።
‎
‎ተጠግኛለሁ በልስልስ ዜማ
‎በድንቅ ግጥም
‎አንዳንድ ቀን ግን ስሜት አይሰጥም።
‎
‎እንደትናንቱ
‎ደርሶ አያፅናናም አያባብልም
‎ሌላ ቁስል ነው ሸክም አያቀልም።
‎
‎ግጥም አይደለም
‎ሙዚቃ አደለም
‎ቃልም
‎አይጠቅመው
‎
‎እንዲህ ያለ ህመም
‎በዝምታ ነው የሚታከመው።

‎የተመኘውን - ሳልከለክለው
‎የወደደውን - እንቢ ሳልለው
‎የታሰረውን - ሰንሰለት - ሰብሮ
‎ያሻውን ሁሉ - እንዲይዝ በሮ
‎ሁሉን ፈቅጄ - ልቤን ፈተንኩት
‎ወረተኛ ነው - ይኸው ታዘብኩት...
‎.
‎ሳቅ ከከበበው  - ደስታ ካለበት - አያሰኘዉም
‎የሚሰብረውን እስካላገኘ - እረፍት የለዉም።

‎ኀዘን ደጋግሞ ቤትን ያንኳኳል
‎ጽኑ ነው ያሉት ቅጥርን ያናጋል።
‎የሰው ዕጣ ነው ...
‎በባዶ መሄድ እርቃን መምጣትም
‎አያስገርምም ማግኘት ማጣትም።
‎.
‎ይሆናል ብለው የታመኑበት
‎ከእጅ መዳፍ ይፈለቀቃል
‎ለዘመን ያሉት በቀናት ያልቃል።
‎.
‎ሕይወት ከርሞ አዲስ በየማለዳ
‎አወኳት ሲሉ - ሁሌ እንደ እንግዳ
‎የቅርብ ሩቅ ናት - የዘመድ ባዳ።
‎.
‎በሕልም መክሸፍ - በምኞት ማጣት
‎በፀፀት ቁጭት - በናፍቆት ቅጣት
‎በወዳጅ ክዳት -በቀን ጎዶሎ
‎ባለፈን ዕድሜ  - በባከነ ውሎ
‎.
‎ስበብ ፈልጎ
‎ልብ እንደ ሸክላ - እንዲህ ሲሰበር
‎ተስፋ ባይኖር ግን - ምን ይኮን ነበር?

ምጡቅ አዕምሮ ብዙ አሳቢ..
‎መዝገቡን ከፍቶ - ጀመረ ማሰስ
‎ምን ቢለምኑ - ደጅ ቢጠኑ - ከማይመለስ
‎ከልጅነት ዘንድ - ከትናንት ሀገር
‎ሲለው ከዛሬ - ገና ካላየው ከነገም መንደር
‎የሀሳብ መዓት...
‎ሲያፈራርቅ - ሲጥል - ሲያነሳ
‎ሁሉን አስታውሶ - ሞቴን ረሳ!