#Admin專欄 #四月一號家居垃圾徵費前因後果 @Windseasonbro

TLDR:3月31號掉晒垃圾出街。

2024年4月1號，香港將會實施家居垃圾徵費，到時候所有留港人士，都必須繳交垃圾費，只係實行方式唔同。

住戶須購買綠色膠袋去棄置垃圾，不過每種大廈嘅購買方式都可能唔同：私人屋苑收取更多管理費，唔知道會唔會有『代笠垃圾袋』服務呢？

根據官方說法，可以喺711、Circle K等便利店購入唔同價錢，唔同Size嘅垃圾袋放垃圾，體積愈大，價錢愈貴。

垃圾徵費原意係好，如果喺一個比較民主嘅國度嘅話，污染者自付原則下，其實都無可厚非。然而喺如今香港，喺藍黃都Suffer緊嘅香港，喺經濟不景而被中国人稱為國際金融中心遺址嘅香港，根本就係苛政。

苛政猛於虎，然而對環保係唔係好事呢？誠如好多網民所述，最後只會演變成不斷購入更多垃圾袋，造成更多浪費。

好多人唔知道究竟港共政府點解要垃圾收費，其實首先要講下中国「2060碳中和」目標政策：

『2060碳中和』、『2030碳達峰』係中国政策，前因係美國退出2016年4月22號簽署嘅《巴黎協定》(前身為1997年12月11號簽署嘅《京都議定書》)，然後中国喺2020年9月的聯合國大會上宣佈中国會『實施』『2060碳中和』、『2030碳達峰』，當然親中嘅港共政府喺2021年8月21號簽署咗《香港氣候行動藍圖2050》，比中国提高咗10年碳中和。

其實碳中和概念係對政權有幾個好處：
1️⃣利用碳中和概念推廣中国製電動車(以石油唔環保為由，推廣中国電動車及電池技術)，同時妄想打擊美國石油業。

2️⃣承上，乜都電子化，方便進一步監控。

3️⃣以碳中和概念，環保面具隱藏經濟下滑，同時透過環保方式抽稅或者搵『方便錢』。

4️⃣扮大佬左右國際政局。

以上各種因素，令中国更有因由推行『環保政策』，而港共要親中，就推行垃圾徵費。

我諗大家一定會幻想過2024年4月1號會發生乜事，等風巴喺度講下我嘅睇法：

1️⃣垃圾徵費初期，港共會有一個蜜月期，可能會比較鬆手，但如到咗2024年10月1號(因為港共設咗六個月適應期)，之後可能會多種方法『執法』。

2️⃣大家都可能怕垃圾徵費，而盡量喺2024年4月1號之前棄置垃圾，不過咁樣都提供咗好好嘅數據畀政府：對比立法前後少咗幾多噸垃圾云云。

3️⃣如果真係唔妥呢個政策，我認為最好喺2024年3月31號掉垃圾，等4月1號佢收垃圾時香港變成臭港。

4️⃣香港政府外判咗個清潔責任畀外判清潔公司，例如如果嗰區有好多無套上綠色指定垃圾袋，就罰外判清潔公司錢。

5️⃣我認為大家唔需要被佢道德勒索，因為清潔工都好清楚咁樣做唔到，所以都傾向辭職唔做。

6️⃣我認為，到時候好多人為咗避咗垃圾徵費，就照掉垃圾落垃圾桶，而港共為咗突顯可執法性，會用透明大膠袋，而如果發現有人用非指定垃圾袋就會執法，當然亦會喺垃圾桶位放閉路電視。

7️⃣而呢個時候，就會開始有人帶垃圾返學返工掉、喺後樓梯、後巷棄置垃圾，然而港共亦係無限地安裝閉路電視同埋搞一堆電話及Wechat、Whatsapp舉報熱綫。

8️⃣因為中国最想香港人民鬥人民。

9️⃣然後開始有人偷人哋用過嘅垃圾袋、淘寶買代用袋，港共開始警告市民。

1️⃣0️⃣兩送飯開始少咗客，但唔會少好多，因為大家都好難搵到比兩送飯更平嘅選擇。

1️⃣1️⃣但最近燒錢擊敗Deliveroo成為外賣師二哥嘅中国美團KeeTa如果要同Foodpanda繼續燒錢搶客嘅話，一定燒錢到仆街。

1️⃣2️⃣我預計3690美團股價會跌。

1️⃣3️⃣因為香港人而家都會慳得一文得一文。

1️⃣4️⃣亦預視到有兩送飯會選用『食客自己帶飯盒』／『堂食模式』（前者機會最大），又可以慳到餐盒成本，亦可以取悅到一班唔想產生更多垃圾嘅香港人。

1️⃣5️⃣同時，Aeon／一田之類就會好多人買可重用餐具，自備餐具會成為香港人(豬?)嘅新習慣。

1️⃣6️⃣然後市面上會有一堆家用『垃圾 Miller & Blender 二合一垃圾處理器』或小型焚化爐之類。

1️⃣7️⃣可預見廁所塞喉、爆屎渠情況會變得常見，低層尤其一二樓住客會受罪。

1️⃣8️⃣然後行公屋屋邨時小心你頭上有廢老高空擲物。

1️⃣9️⃣香港人變得極冷漠，消費意慾愈來愈少，『為咗唔產生垃圾畀額外嘅錢』就連本身幾乎必要嘅嘢都唔撚買。

2️⃣0️⃣公廁/商場會有好多人漏低垃圾，可能會請退休警察守廁所(順便睇下有無人寫光時或其他『挑釁性字句』)

2️⃣1️⃣到時去廁所可能都會有額外收費。

2️⃣2️⃣小型焚化爐都有可能引起火災。

各位，唔好覺得係我諗多咗，你活喺2024年嘅香港，2024年4月1號愚人節繼續用新方式愚民。

如果你對垃圾徵費有任何意見，都可以隨時pm @Windseasonbro 一齊討論下。

希望大家繼續支持暴風雨巴呢個TG Channel同 #Admin專欄，而如果你中意聽風巴 @Windseasonbro 鳩噏，請你Follow本Channel @Windseasonhk ，並叫多兩個朋友玩TG Follow風巴，感謝！

#Admin專欄 #車公靈籤2019及2024 @Windseasonbro

原Post: 有冇人識解車公籤
- 分享自 LIHKG 討論區
https://lih.kg/1333470

2019年7月20日，有手足幫香港示威者為721求籤，當時並無人知道721會發生白衣人無差別襲擊。

當時樓主分別抽到嘅籤文係：車公靈簽 第五十籤同黃大仙靈籤第八十五籤

車公靈籤第五十籤：上籤
籤文：困甚離家歲月長，失群孤雁正思量；馬牛不及終須及，縱事無方卻有方。

亦係今日鄉黑為沙田求嘅籤。

當時大家只對『縱事無方卻有方』翻譯為Be Water。但同時有人喺網上其他解籤網搵到『離鄉別井．欲歸不得．畜牲不如．後有轉機』，如果今時今日諗返起，就係講緊721之後香港示威者同鄉黑兩方都升級，然後香港示威者『離鄉別井．欲歸不得．畜牲不如』。

但最重要嘅係『後有轉機』，咁幾時有轉機呢？

樓主亦同時求到黃大仙靈籤第八十五籤。

太乙燃藜照讀書 十年窗下苦功舒
揚眉吐氣袍穿錦 駟馬高車擁道隨

劉向，漢室皇冑，因勸諫曾下獄，獄中堅持苦讀，後獲平反，出人頭地。太乙，天神中最尊貴者。

亦求黃大仙, 問香港革命發展：

第三十二 中平 古人占驗：蘇武牧羊
十九年前海上辛。節旄彫敗逐沙塵。
餐毛嚼雪誰憐我。惟有羊兒作伴群。

2019 + 10 = 2029
2019 + 19 = 2038
雖然呢個係連登嘅假膠Patten，但係亦可能真係冥冥中自有主宰，更使人心寒嘅係2016示威者都抽到車公靈籤 第五十籤上籤，佢哋都Suffer from『困甚離家歲月長，失群孤雁正思量』。

2024年，鄉黑為香港前途抽到第十五籤中籤 內容為「斧斤持以入山林，未得之時那處尋；損了良材失卻力，獻君留住待春臨」

車公即係話你哋班一事無成嘅撚樣唔好搞咁撚多嘢，乜逃犯條例、国安法、23條、明日大嶼、北部都會區、垃圾徵費、夜繽紛、大灣區一小時生活圈、中港融合......搞咁多嘢整走晒香港d人材，不如無為而治，等個山林（香港）休養生息，香港先會有春天。

你相信車公靈籤嗎？風巴不盡信，但我覺得過往十幾二十年睇車公靈籤嘅結果都好好笑，然而我今日睇到連登呢個Post，真係有少少心寒。

希望大家繼續支持暴風雨巴呢個TG Channel同 #Admin專欄，而如果你中意聽風巴 @Windseasonbro 鳩噏，請你Follow本Channel 😁 @Windseasonhk ，並叫多兩個朋友玩TG Follow風巴，感謝=)

#Admin專欄 #有心唔怕遲 #DOITNOW @Windseasonbro

一年之計在於春，係老生常談。

如果你一直都係風巴fans，都應該會知道我每年年尾直翌年年初都會鼓勵大家喺新一年做啲嘢去充實自己。

例如Set up一個Checklist，然後擺啲嘢On the list，然後每日執行，例如每兩個星期見一見老人家；例如每一日學一個新嘅英文詞語；又例如每星期跑90分鐘...

呢啲嘢喺一兩日當然無乜效用，但如果持之以恆，一年365個英文詞語，一年跑90 X 52 = 4680分鐘步，一年見26次老人家，呢啲變成習慣之後，少數會變成多數。

當然以上都只係舉例，你中意嘅可以用嚟學韓文、學煮嘢食，自己諗下有乜可以增值自己。

我以往都喺一年嘅1月1號Post呢篇文，而我今次選擇喺2月19號嘅原因係，建立好習慣有心唔怕遲，唔好再拖延症，唔好再要齊頭1月1號先下決心，那怕你由2月20號開始，定3月30號開始，只要你有心，永遠都唔遲。

當然，我希望大家落咗目標之後，可以連續達成，所以應承我，你趁呢幾日好諗定目標，喺3月1號開始改變自己，可以嗎?

希望大家繼續支持暴風雨巴呢個TG Channel同 #Admin專欄，而如果你中意聽風巴 @Windseasonbro 鳩噏，請你Follow本Channel 😂 @Windseasonhk ，並叫多兩個朋友玩TG Follow風巴，感謝=)

#Admin專欄 #VisionPro就係未來 @Windseasonbro

一直以來，風巴都好似其他香港人咁留意Apple嘅產品，最近Apple率先喺美國市場推出咗價值約3萬港幣嘅MR眼鏡VisionPro。

先唔好講戴到條頸勞損同埋青光眼先，睇外國嘅開箱片，佢所做到嘅沉浸式效果好似幾十年前荷里活片嘅世界。

可以幻想到第二時喺地球任何一個地方，兩個人打開VisionPro就可以『Face-to-face』對話。

呢件事係好痴線。

另外，試幻想下當你可以用Vision pro拍Spatial video，將你呢一刻嘅立體場景紀錄之後，然後幾十年後你個孫係可以以第一身角色去回憶呢段畫面。

佢嘅Immersive Video可以帶你去月球表面，亦可能可以帶你返去2019年示威現場(in case當年有西方人以呢樣技術拍攝/AI模擬Etc.)

先唔好講政治，佢可以令到用家浸淫喺虛擬實景都係一件好有趣嘅事，我唔熟VR眼鏡，我唔肯定以前有無咁嘅技術，不過佢做到喺月球表面睇Youtube就好似叮噹/多啦A夢嘅法寶一樣，嗰種震撼感，就係令人覺得而家就係未來。

2024年，我哋人類有AI同VisionPro，暫時呢一刻都只係試驗階段，但如果AI變成AGI，VisionPro經歷十年後進化成為一副眼鏡嘅容量同重量就做到而家佢做到甚至而家都做唔到嘅嘢呢？

我預言，Visionpro如果盛行，Pokemongo Vision pro版本應該更好玩。

通常Apple做到嘅事，Samsung喺幾年後都應該奮力追上，期望2030年當虛擬實境成熟後，大家可以有新嘅生活體驗。

希望大家繼續支持暴風雨巴呢個TG Channel同 #Admin專欄，而如果你中意聽風巴 @Windseasonbro 鳩噏，請你Follow本Channel 😶 @Windseasonhk ，並叫多兩個朋友玩TG Follow風巴，感謝=)