اما شيباني

اللي جنب نادر😂

لياا فتره محضرتشش عرس.. يمكن من هداك العرس الي كانت العروسه فيه متوفيه
. بس اليوم عرسيي منقدرش نوقفه ابدا ليش هكك ليش انا بذات كنت نعرف ومش قادره نخبرهم.. خفت يقولو عليا مجنونه.. بس هما قالوو وخلاص . جايتككم بس اصبروو لحضه ونحكيلككم!!

كناا مقعمزبن جنب بعضض في خيمه العرس الي كانت بسيطه جدا
جت جلستي ع حافه الخيمه وكانو البنات قدامي كنت ماسكه الفون ونكتب على نفسي وع الجو الي قاعده فيه

بس تفاجأت بشيي كان في صوت بكي خلفي.. خلفي بزبطط

حاولت نمسكك روحي ومنلتفتش بسرعه بس مقدرتش لما سمعت اسمي!!.. كانت بنت وتقولي.. ريان ساعديني انا مفروض انكون مكانها مش هيااا
.. متتكلميش اكتبي في مذكرتك انا نقرا.. نقرا بس انتي اكتبي

_بخووفف و بصعوبه كتبت.. انتي منوو شن قصتك احكي.

انا العروس انا الي جهزت الطاولات والكراسي انا الي مفروض تباركولي مش هيا بلله ساعديني ملياش غيرركك هناا الله يربحك

_برغم من خوفي بس حاولت نهدا ونكتب بشوويي وبهدوء شن صار بالتفصيل احكي

كنت في المزين باريان زي اي عروسه ليبيه بس الي صار غريب المزينه مكانتش طبيعيه كانت تقولي.. ياريت انا مكانك ليش متخلينيش مكانك خليني مكانك
.. كانت أتردد في الكلمات هذينا لوقت قلتلها.. خلاص اسكتي زودتها راه
سكتت اشوي وردت عليا.. انا نبصر.. سايرينني
كنت عشان نتفادا مضايقاتهاا نهز براسي بهزوه وخلاص لوقت قالتلي.. اسمعي.. انا خلاص بنقعد العروسه

ضحكت وقلتلها اي انتي العروسه يالله كملي.. لما قلتلها اي انتي العروسه صار شي غريبه.. سكتت وقعدت تبكي

_شنو صار احكي

فعلا قعدت هي العروس ي ريان.. البنت مش طبيبعيهه متأكده انها مش انسان ابدا
_كيف ههكك
بعدين لما بتسلمي عليها شوفي ل رقبتها حتلقي علامه.. علامه نجمه صدقيني هديكا مش انااا انا العروس مش هيي..

تمام حنشوف
اوكك بس حاولي تفهمي القصه كويس ي ريان حاولي تحليها بلله متخليش شي يفوت عليك..

_تمام تمام خليني نوقف نسلم عليها

وقفت والخوف محاوط قلبي.. الشك ماليني كلي منعرفش الي نحس بيه خوف أو فضول نبي نعرف البنت شن قصتها وفي نفس الوقت متردده

مبروك عليك.. انشالله بهناتك
. _الله يبارك فيك.. العقبه لكك
انشالله.. تلفتت وعيوني قريب يطلعوو منعدلتش ع النجمه الي كانت مرسومه على رقبتها.. جسمها البارد هوا الي خوفني بجدد!!

قعمزت ف مكاني وبدأ العشا
_اسمعي

هاا

_شن بيصير توا

منعرفش.. بس الي نبي نعرفه انا وين توا انا شن أندير هنا طلعيني

_انا حنساعدك متخافيش.. توا نعرف شنو بيصيرر متخافيش

بدو الناس يروحو وخش العريس طلع عروسته وكان فرحان بيها.. فرحان لدرجه انه مستناش لحضه رفعها معاه وطالع يجري!

روحت للحوش ونا نسأل في نفسي.. شن صار معقوله الي كانت تحكي معاي هيا نفسها العروسه. َ. وإلى ع الكرسي المزينه َ... انا معادش فهمتتت شي!!... سكرت داري وبنرقد غمضت عيوني وبديت نسمع ف عياط من حولي ف الدار ولبرا
طلعت وكنتت خايفه مكنتش متوقعه الي صار ابدا

ماما شنو في ليش تبكي
_العرسان ي بنتي العرسان توفوو ينااري محرها ليله عرسهم هذي عين والعين حقق

العرسان.. هما لثنين قصدكك.

_هما لثنين.. يرى البسي سلم بنتي نمشو انشوفوهم

تمام تمام.. عرفت انه في شي صاير والي كانت تحكي معاي فعلا هي العروسه.. رفعت الفون ولبست عباتي وطلعت معا امي.. خشينا الخيمه وقعمزت ف نفس المكان الي قعمزت فيه في العرس وبديت نكتبب اول ما كتبت هلا

_عرفتك بتجيي.. هي قتلاته و قتلتني ي ريان.. ساعدي باقي البنات.. انا مش اول وحدا.. اي انا مش اول وحدا.. في قبلي وواجد

قبل م اتكمل كلامها نادتني ماما ووقفت روحنا وعقلي يااخدد ويجيييبب مووقفتشش تفكير ابدا شن قصه البنات الثانيات وشن قصه المزينه هذي!!
بعد فتره كان عندي عرسس.. لما مشيتتت سلمت ع العروسه شفت علامه نجمه ع رقبتها تباعدت بسرعه وشافت فياا وعيونها معرفتش نفسسرر منهم شي سمعتها قالت. َانا العروسه يا ريان شنو صارلك؟

ءء مبروكك وانشالله بهناتكك

_يبارك فيكك.. العقبه لكك انشاللهه!! انتي العروس الجايه

انشالله.. نزلت من الكوشه ومشيت قعمزت ف الطرف بروحي وعندي احساس بلذنبب... كله مني لوساعدتهم مكانش صار الي صار.. كنت عارفه نهايه العرس كويسس.. اي عارفتها

ونا في فراشي... بدت العياط يعلا ويعلا.. العرسان ماتو!!

تكررت القصه اكثر من مرا والغريب في مكانات مختلفه.. الي ركزت عليه انهاا نفس المزينه!! صوت البنات وهما يقولو ريان ساعدينااا.. يلحقق فيااا في اي مكان وبدون تفسييرر تمنيت اانيي مسمعتش لي كلام البنت يومها ولا كلمتها لانه عارفه ومتأكده من الي بيصيرر اليووممم!!

كان الاحساس بلذنب يلحقق فياا لدرجه استشرت بدكتور نفسيي بس مكانش يقدر يساعدني لانه كلامي مكانش مفهووم ابدا.. ابدا مش مفهووم..

مروو 10 سنوات ع الحادثه هذي!

اختي.. الووو.. ريااانن
_هاا نعم
اختي.. اضحكي وشوفي للمرايا انتي العروسه اليوم!
_غمضت عيوني َوسمعت صوت الباب تسكرر.. اختي طلعت..والمزينه تردد

في نفس الكلام
ريان . خليني انا العروسه.. خليني بلله
منعرفشش شنو يرجا فياا بس الي عارفته.. إنه في ليله عرسي بنموت!

في نهاية عام 1980 بدأ الأمر ..

و إلى ما تقدم من أعوام و تحديداً في عام 2001 عندما جاء ساحر من المغرب إلى برقه ليعالج فتاة مسحورة في أحدى المناطق مر من أمام هذا البيت نظر إليه ، و أشار إلى سائق السيارة بالوقوف على ناصية الطريق ، حدق في ثناياه بشدة ، و عن بعد و أمر السائق بأن يوصله إلى المطار فوراً !!

القصة الحقيقية لبيت الجان في الكويفية ..
بحسب توافق الروايات ..

هذا البيت ملك لعجوزين وكان لهم طفلين بالتبني من دار الرعاية و في نهاية عام 1980 بدأت القصة ..

اوقدت العجوز النار في مكانها المخصص في فناء المنزل ، و أثناء ذلك كان الطفلان يلعبان أمام النار على مرأى من العجوز ..
رمى أحد الأطفال النار بالحجارة وهنا بدأت القصة المرعبة ، الجان العجوز أصابها المس و بدأت بالصراخ و الندب ، بعدها و بحسب الرواية قامت العجوز بقتل الطفلين وقامت بالانتحار ، و زوجها أصيب بالجنون من هول ما رأى و عاش لفترة في منطقة الكويفية ليتوفى بعدها .

وبعد فترة من وفاة العجوزين أصبح أهالي منطقة الكويفية يسمعون و يشاهدون أصوات و أشياء غامضة و غريبة في هذا البيت .

و حاول أكثر من شخص أن يكسر حاجز الخوف دون أي جدوى ، كذلك بائت جميع محاولات الشيوخ والمشعوذين بالفشل ، ليجمعوا على نتيجة واحدة أدركها الساحر المغربي وهو وجود مارد بالمنزل .

وحاول أحد سكان المنطقة هدم البيت بآلات ( كاشيك ، و بلدوز ) لكن محاولته فشلت بسبب عطب مفاجيء في الآلات فور نزولها إلى داخل السور .

و حاول أحد افراد الدروع سابقاً نسف البيت بقذائف RBJ لكن كها تجاوزت المنزل و لم تصبه .

- و آخر عائلة سكنت هذا المنزل كانت عائلة سوادنية فبالرغم من تحذيرهم من قبل أهالي المنطقة إلا أنهم عللوا عدم خوفهم بسبب امتلاكهم للطلاسم ( الحجابات ) التي تحفظهم من شر من في المنزل
هذه العائلة سكنت ليوم واحد فقط و لم يعودوا إليه بسبب نومهم داخل المنزل ليتفاجؤو بأستيقاضهم فجراً في فناء المنزل !! .

- يذكر ان آخر صيانة للمنزل كانت منذ أربعة اعوام صين البيت ، وأوصلوا الكهرباء ، وصينت الأبواب و لم تلبث هذه الصيانة يوماً واحداً حيث أعطبت شبكة الكهرباء في المنزل بالكامل و خلعت جميع الأبواب !!

و هذا المنزل ليس الوحيد في برقه بل هناك العديد من المنازل الأخرى التي يشوبها الغموض مثل المنزل الذي يقع في منطقة السوق القديم بتوكرة ، و منزل آخر يقع بين منطقتي برسس و بوجرار ناهيك عن العديد من المنازل الأخرى في مدن برقة

كُنت جالسة، أنا وصديقتي نحتسي العصير تحديدا "البرتقال" في مساء يوم الخميس الساعة التاسعة والنصف، كنا نتبادل أطراف الحديث، فجأة قفزت من مكانها و أخبرتني أنها تود أن تخبرني عن شيئ غريب أجهله عنها ، وأصبحت ملامحها شاحبة ونظرت لي بحزن قالت أنها لم تعد تستطيع أن تكتم هذا السر حتى لو قُتِلت على أيديَهُم فنظرت لها بتساؤل وقلت لها بما تهذين فقالت لي أنها هي أنا وأنا هي ولكن في عالمين مختلفين فَضحكتُ بأعلى صَوتي وقلتُ لها بسخرية هل حرارتك مرتفعة أم شيئا من هذا القبيل فحدقت بي بنظرة مرعبة ومخيفة حتى تلاشت ضحكتي وبدأت بالتوتر حقا، فقلت لها وصوتي يرتجف ماذا تقصدين ، فقالت لي انا روحك في العالم الأخر في الدرك السفلي اللعين، فحملقت بها وقلت لها ومن سيقتلك قالت إنهم .....وقبل أن تكمل تم فصل رأسها عن جسدها فخرجت روحي حِينها .

قاعد حي مماتش هوا هداكا 😶😂

مـره م المرات تهدريز عشيـه بين جارتـنا وأمي الله يرحـمها!
يحكن أن في شايـب عنده حوش يأجر فيه للناس واللي يسكن في الحوش يطلع منه
ماحد أستـمر فيه اكثر من يوميـن او ثلاثـه !
فقعد يدلل بالحـوش يقول ياناااس للي يسكن ويرقد فيـه 3 ليالي ياخذه
يانـاااس اللي يقعد ويرقد فيه 3 ليـالي ياخذه!
جـاته وليه كبيره في لعمر وحوشـها بسيط شبه ماينسكنش فيه وقالتلـه مستعده ناخده ونسكن فيه أنا وعيـالي ففرح شـايب بكل ووعطـاها لمـفتاح خذت عيالها وحـولت للحوش وتغدت وعشت العويله ورقـدوا تسمع في تـخبيط عند البيـر امتـاع لحـوش
طلعـت أتـشوف لـقـت وليه شعـرررها طويـل ومقعمـزه عند البيـر خلتـها تخبط اتخبط عند مايطلع الضي يوقف تخبيط ثاني يـوم نفس القصه لعبوا هذكوم العويله نهارك كله ورقدوا نهاية النهار طلعت اخرى نص الليل تعـيط وتـندب أتـقول "ضربنـي ليـه قتـلني ليـه ضربنـي ليـه قتلنـي ليه"
قـعمزت يالاها و"قالتلها عدي سياتـه وأنسيه عدي سياتـه وأنسيه "
بعد أسألتـ الجيران طلع أن راجلـها ضاربها وعازقها في هذك البيـر !
وسمعتها هالقصه اكثـر من مرتين ثلاثه مانعرفش أن كانـت حقيقه أو خـرافه

قصص العزايز أيامات بالله 😔

#تـشارلي
اكـيد تـذكروا هذك لفتـره كيف كـانت متزعزعه وماحد فهم هل هي لعبه شيطانيـه أو ماسونيـه أو سحر أو مجموعة مراهقيـن ولعبـوا مع لشيـطان
فـي شي غامض في الفتـره هذك كنـت نـازحـه في البيـضاء وتـأخرت في القرايه فـأضطريت أنني نقـرأ في جامعة البيضاء الجديده تخصصي إدارة أعـمال تعرفت ع بنت تخصصها E لطيفه لبـنت وراقيه ماقوتش علاقتـي بيها وماضعفـتش ديـما فيها شئ يصد برغم مـعاملتـها اللطيفه نشوفها تشيرلي نحكي معاها وهـك محادثات جانـبيه مره ومرات منشوفهاش بكل م عليـنا
في ليـله حلـمت بالبنـت هذ أتـشيرلي من بعـيد في جامعه جيتـها مالقيتهاش هيا ألقيت وجه وحده أخرى
برمـت ألقيتـها ورايـا قتلها شيرتلي هذ نحسابها أنتـي قـالتـلي مش أي حد إيشير تمشيله فوعيـت شفت ساعه ألقيتـها 6 في صبـح !
وفي نفس ليوم مرضت وهبطت من غير سبب راسـي صداع غريـب ومافهمتش شن سبب صداع فضيع ماخلانيش نفتح عيوني ونبكي بشكل غـريـب ومشيت للمستشفـى عاينت مافيا شي فحصت شبه ع ضغط وسكر وراسي وتحليل دم مافيـا شي بـكل .
فوتـت يومـين كاملات بعدها شديـت روحـي ومشيـت للجـامعـه قـابلتـني هدرزت معاها فكلام خدانا وجابنـا من هنا و هنا !
قتلها حلـمت بيك قالتـلي ماتقوليليش شن حلمتـي بيا استـغربت من رد فعلها وفي نفس لوقت هي حره مش حـابه تسمع براحتـها!
قـالتـي حتـى نا حلمـت بيك قتـلها شن حلمتـي قالتـلي منقدرش نقولـك ماضغطتش عليها قتلها إن شـاء الله خيـر .
غـابـت 3 أيـام البنـت عالجامعـة
اليـوم الرابع وصـلت عند باب للجـامعه إيردـوا فينـا الأمـن عالبـاب أجبـاري وماحـد فـاهم حاجـه بـكل!
روحـت فتـحت النـت انقـلب قلت بالك نلقى حاجه اتوصلنـي شن فيه اليوم الأنسان أحسـاس سبحان الله حسيت الشئ اللي صاير جوا إيخصنـي أو إيمسنـي شي حيزعـلنـي بـكل!
ففتـحـت صفحة اللي تخـص الجامعـه امنزليـن أصور طلامس من حمام كلية ال E مكتـوبـات عالمـرايـه بخط مش مفهوم ومكتـوبات بحمـر وأسود وهكي قريـت نهاية المنشور أنها مـشنـقه روحـها في الحمام .
نفس البنت اللي نحكي معاها وحلمت بيا وحلمت بيهـا !
قعدت في دوامه هل كانت بتوصلي شي او بتقولي حاجه او قالت ونا مافهمتش الله يرحمها ويغفرلها!
في اللي قال شي جبرها أدير هكي وفي اللي يقول الهل وفي اللي يقول #تـشـارلـي وفي اللي ضغط نفسي والسبب الحقيقي في علم الغيب أكيد

حـنزل القـصه (حقيقيه وربي وصايره مع خال ومرت خال صحبتي)
السـلام عليكم بنبدا نقوللكم القصـه
قـصه الجنين
فـ بيت جدهم طبعا كبير البيت بس لما ماتو الجد والجده البيت قعد لولدهم
فـ سافرو فتره والبيت فاضي قعد
بعد روحو للبيت اول م فتحو البيت شافو دم ف البيت كله ع السيسان والبيبان حتا السرميك يالي تحت فـ الوليه خافت وقالت لرجلها خلينه نجيبو شيخ جابو الشيخ وقاللهم ف حد بيديرلكم سحر والدم ه̷̷َـَْـُذآ ضروري تكافحو ف عطاهم اميه رقيه وحاجات واجد قاللهم ولعو البقره وبخو لميه ف قعدو ممكن اكثر من اسبوع برا بيتهم بعد حت تولع ف سوره البقره ف التلفزيون تسمع ف صوت عياط من خوفها تجري لدار النوم ودار النوم ف الدور اللوطي ف تسمع ف تخبيط من فوق والبيت مفيهش حد الا هيا وراجلها كان برا البيت بعد جا الراجل حكتله يالي صار قاللها اكيد تتوهمي مفش منها الدوه وقالتله ولع سوره البقره ف التلفزيون ف جا ولع التلفزيون والتلفزيون مولعش شافه وقعد يولع يولع بس مصارش منها
ف اكتشفو التلفزيون محروق قاللها خلاص خشي ارقدي ف رقدو ويسمعو ف تخبيط ف المطبخ معدلوش ف اليوم الثاني صاحبتي مشيت لخالها وقعدت معاهم بحكم باتها متوفي ومن هيا وصغيره مربيها هوا فـ قالت نرقد عندهم كم يوم بعد جتتهم مرت خالها محكتلهش شن صاير ف البيت محبتش تخوفها ف قالتلها عطيني الصلايه نبي نصلي فوق عطتها وطلعت مرت خالها ادير ف العشاء قالت طرحت الصلايه وكيف بنصلي تسمع ف وحده وراها تضحك وبعدين تحرك ف الفرشه يالي يلاها صحبتي خافت وقعدت تعيط وجت لمرت خالها تحكيلها وقالتلها نبي نمشي للبيت ف شلوها للبيت وفي الليل مرت خالها وخالها يسمعو ف تخبيط ف البيت بعد طلعو رقيو لطابق يالي فوق شافو نص موعين المطبخ ف الدار يالي تكون فوق دار النوم بعدين شافت تمت تعيط قالتله طلعنه من هنا معش نبيه البيت الجنون قعدن يضحكن بصوووت عالي وقعدن يخبطن ف الطناجر ويعيطن ف الوليه معش تحملت اغمه عليها والبيت طلعو منه مع انه جابو شيوخ بس مقدروش يطلعوهم ولحد الان البيت الناس فليل يمسعو ف اصوات غريبه

حوش الجان...

الحوش قصتة قديمة وغربية من الستينات تقريبآ.طبعا الحوش موجود في سبخة عين الزيانة.الكويفية عالطريق الساحلي.قريب من بنغازي..وتواردت علية قصص كثيرة..ومنها أن عائلة كانت تسكن فية في فترة الستينات شايب وعزوزة ومعاهم عيلين صغار .في يوم كانت العزوز ادير في خبزة تنور قريب من المغرب وواحد من العويل عزق حيطة فالتنور...التمست العزوز وبعد فترة قتلت العويل وبعدها شنقت روحها..قعد الشايب فترة وبعدها مرض ومات وقعد الحوش فاضي لفترة طويلة...وبعدها سكنت فية عائلة سودانية قعدوا يسمعوا في أصوات وفالصبح يلقوا في أرواحهم مرقدين برا.....فية شايب قالوا يرعى حذاة فالليل قال لسكان المنطقة نشوف في العزوز فالروشن وبعدها تختفي....عدوا هل المنطقة وجابوا كم واحد يقراء ويدير في رقية وماصار شئ...وجابوا كم كاشيك علشان يهدوة ويخرب الكاشيك اول مايقرب مالحوش... ..ومازااااال فاضي وموجود لعند هذا اليوم.....

ف قصة وتعتبر رعب ومش رعب لما كنا نسكنو ف القرية قبل ماانحول جنبكم ولد جيرانة الصغير يدور هوا وامه وجارتهم وبنتها المهم لوح شبشب بنت جيرانة ف جابية يحطو فيها ف المخلفات متع مركز البحوث ف كبشت وقتله برا جيبه وهوا يحسابها امية عادية نقز جلده ابدي يتقشر لين توفى وانه حاولت اطلعه بس مافيهاش كيف حصلت حرقات وهوا توفى وابدي كل ليلة نسمعو فيه ينادي ع امه وبوه وخوته ف الليل اول فترة وبعدين معادش اتكلم...وقصة ف الرسمي هادي صايرة راه😂

المهم حوش جدي هذا قبل ماياخدوه كان يسكن فيه واحد مريض والحوش ع دورين المريض هذا يقعد ف التاني المهم جي يوم قالو قتلوه ف الحوش ورجع دمايا والخ والمكان اللي يموت فيه حد ودماياه تطلع غولته زي ماكلنا نعرفو..جو حوش جدي شرو الحوش وسكنو فيه..حناي وجدي ف الدور الاول بحكم كبار وامي وخوالي وخالاتي ف الدور الفوقي..وطبعا ف اول ايام مافيش شي صار بس ف يوم خالي الكبيؤ كان يقرا فوق وخوالي مدايرين دوشة جنبه ف قاللهم انزلو لوطا ولزهم باش يقرا ف هما نازلين خالي سمع حد يضحك بصوت عالي ف يحسابه واحد من خوته ناداهم وقاللهم علاش تضحكو وجو زي هذا ف قالوله مش احني كلهم..ف خالي خنس المهم وهما نازلين سمع صوت عيل يضحك وهما ماعندهمش عيل ف الحوش اصلا..ف ابدي يزبط انه ف حاجة ف الحوش..ومن اهني ابدت القصص خالي مقعمز ف داره يشوف للسقف يلقى نجوم ف هكي سقف مهناش..ف يوم ف الليل امي وخالاتي متغطيين انجبدت منهم البطانية..فاقو ردوها وانجبدت تاني وهكذا اتغطو بالبساط فوق البطانية وانجبد..ف من يومها عرفو انه ف حوشهم فيه حاجة تاني يوم امي وخالتي الصغيرة معادش رقدو فوق وخالاتي التانيات دارو روحهم فالحات ورقدو فوق وحطو معاهم موس..ف ناضو عقاب الليل يسمعو ف حد يسن ف اماس والموس ماهوش معاهم..وحناي راكبة بتفيق خالي الصبح مرة الدروج ولعلها نار..وجابو كلب الحوش ع خاطر يقولك الكلب يخوف الجن او شي زي هذا ماانفعش والكلب اللي جاته الحالة..جابو شيخ وبرضو ماانفعش...بعدها بفترة لين باعوه وطلعو منه

مغامرات نادر😂

هادي القصه تانيه...
طبعا لما كانو يحكولي فيها ماكنتش نصدق ونكدب فيهم ونقوللهم مافيش منها الدوه لين صارت قدامي وصدقت.. مهم نخشو ف احداث القصه...
عندي عمتي متزوجة وعندها بنات. من ندي يعني ديما نمشيلها ومرات وين نكسدو اني وبنات عمتي نقعدو نهدزو ع" الجنون " وكل مرهه يحكولي ع الحوش لي مقابلهم انو هوا مسكون واني مانصدقش فيهم ويحلفولي واني شي شي مانصدقش كالعادة ومش مره ومش اتنين لين مرهه حبيت نتاكد منه الحوش هدا معا ساعه 12 ركبنا فوق السطح وقعدت نشوف الحوش وع حسب مايحكولي انو فيه اصوات الحوش هدا وضحك واصوات ادوات مطبخ ايطيحو وفي الدور تاني كله يصير هدا وفي الدور تاني كل مره ضي يولع بلون مره أخضر مره احمر مره اصفر كل مره لون وصوت ضحك وتهدريز كانه فيه حد ف الحوش والحوش هدا لي يسكن فيه مايقعدش اسبوع ويطلعو منه معاش يولو وطبعا بعد هدا كله لي شفته وقعدت ف حاله خوف مش عاديه وهديكا اليلة قعدت اني وبنات عمتي ندورو ع معلومات ونبو نعرفو واكيد مرقدناش للصبح من الهول لي شوفناه... ف الصبح ناضت عمتي لقتنا نهدرزو مشينا بنفطرو واحني مقعمزين ع الطاوله نفطرو قطعت كلهم كلهم وقعدت نسال ف عمتي ع الحوش هدا وقعدت تقولي فيه هلبا قصص اتجاه الحوش هدا ع اساس انو هوا مكان الأرض كانت مقبره ولما بدت قديمه المقبره هادي نحوها وشرها واحد الارض وبناء فيها حوش ع دورين وانو ع حسب مايقولو ناس هادي ارواح ناس لي ماتت ومدفونه تحت التراب الحوش هدا..... وفيه قصص تانيه قالت انو قالو الحوش هدا زمان بكل سكنت فيه مره صغارها وكان عندها ولد الوسطاني كان مش طبيعي حتى حركاته مش حركات انسان طبيعي.. وفي من اليالي قالو انو قتل امه وخواته كلهم ولاصوات هادي أصواتهم هما وارواحهم هما.. طبعا كل حد قعد يحكي ف قصه شكل ولي حد الان مش معروفه قصه الحوش هدا الحقيقة.. وحاليا الحوش فاضي ومفيهش حد وقاعدين الجيران لي جنب الحوش ولي مقابلينه يمسعو ف اصوات غربيه بكل وهدرزه مش مفهومة وسر هدا الحوش مش معروف لي وقتنا هدا.. واني قاعده نبي نعرف قصته برغم انو اني انسانه نخاف من الحاجات هادي بس فضولية ونحب نعرف ونتشجع عليهم ونقعد نبي نعرف وفتره جت تمت نحلم ف احلام مش مفهومه بكل وكوابيس شينة......
استنوني ف القصه التانية❤️
منقول

في شهر يونيو عام 1972م فوجئ طاقم العمل الذي كان يعمل بمستشفى سيدار سيناي الذي يقع في لوس أنجلوس بظهور إمرأة مفزعة الشكل غريبة الملامح والأسلوب والتصرفات وهي ترتدي ثياب بيضاء عليها الكثير من الدماء مما أدى لإثارة الكثير من الرعب بين جميع العاملين وحتى المرضى ممن رأوها بهذا الشكل المخيف .....

قصة بأحداث حقيقية وغير طبيعية

اللي متفرجش عليه قبل🤣