اهدي دقدق

انت اهدى يامعلم منور💛

ولد صغير مع امه
أني وراه:

روعه
بقلم : #عميد_العزاب
:
:
انا بطبعي انسان اجتماعي ونحب التواصل الاجتماعي ونحب نزور الاقارب وعلاقتي بيهم كويسه كلهم .. الا علاقتي بخالتي .. اللي ساكنه في امريكا ..حاولت اني نحتك بيها عن طريق النت بالك انحصلو دعوه تاشيرة .. حتى باكو مارلبورو امريكي اصلي .. لكن شي شي.. وهي مش قابلتني وماتحبنيش بكل .. تشوف فيا وصمة عار على العائله .. ومش عارف ليش .. ماعلينا ...
المهم مره رن نقال (العزوز) وانا قاعد جنبها .. وطلعت خالتي .. ردت امي وقعدت تحكي معاها
-كيف حالكم؟
- وايش اخباركم؟
- وشن دايرين؟
- وكيف حال عبسلام ((راجلها))؟
-وكيف حال العيال؟
-وكيف حال البنات؟
- ولا برانيه شوركم ؟
هنا وقفت امي وقلتلها خلااااص يا حاجه راكي سالتي 7 اسئله واجابتها نفس الاجابه و((اختك)) تكلم فيك دولي
المهم دارتلي امي اشارة الاصبع على الفم .. اللي معناها اسكت
وبعدها امي سكتت شوي وبدت خالتي تحكي وامي تقول
اها .. اها .. باهي .. اممم .. تمام.. اها .. اوكي .. لاااااااااااااااا ماتقوليش هكي ,, الحوش حوشها اتجي في اي وقت مرحبتين بيها .. امتى طيارتها ؟ .. خلاص توا نستقبلوها وكوني مطمنه .. باهي .. ايش درتي اليوم على الغداء ..
طوط طوط طوط .. ((فصلت المكالمه قبل ما امي تعرف شن دايره خالتي عالغداء))
المهم
سالت امي : كنها اختك ؟((نكرهها مانبيش نقولها خالتي))
قالتلي : بنتها روعه تبي اتجي ليبيا وتبي تقعد عندنا
-روعه؟
- اها روعه بنت خالتك
حسيت بفرحه في قلبي .. معقوله عائلتنا فيها وحده اسمها روعه
- روعه مانعرفهاش يا امي
- هذه اصغر منك بخمس سنين
- كوووووويس
- شنو اللي كويس؟
- لا شي كملي
- مافيهاش كملي .. البنت تبي اتجي عندها مشروع للجامعه تبي اديره في ليبيا وتبي اتجي تقعد عندنا كم يوم
- مرحبتين بيها . .امتى تبي اتجي؟
- يوم الجمعه
- يوم ذكرى حادثة السرقه يا امي
- ماقالك حد تمشي بكويش للجامع
- مش مهم
خشيت لداري وانا عقلي يدرس في التغيير الذي سوف يحصل في حياتي .. يجب ان استغل الفرصه .. ( روعه )) عايشه في امريكا ومتحضره وباتها ((عبسلام)) فلوس وثري .. يعني لو تزوجتها حتاخذني معاها لامريكا ونعيشو حياه هادئه وسالمه بعيده عن الشعب الرائع
المهم مشيت للحلاق ومشيت لمحل علاء لملابس الشباب ومشيت لمحل عزوز للاحذيه هو نفسه اللي شريت منه الكاويش الماركه اللي انسرق مني يوم الجمعه .
المهم درت نيو لوك واستعديت لاستقبال (( روعه عبسلام ))
:
وجا يوم الجمعه . وعيت من النوم نسمع في اهلي يسلمو على روعه .. خشيت للحمام بسرعه قبل ماتشوفني وفتلكت روحي وطلعت نبي انسلم عليها
حانت لحظة الحقيقه .. سوف ارى روعه
جيت للصاله القيتها امعاطيتني بظهرها
شافتني (( العزوز )) قالتلها سلمي على ولد خالتك
التفتت روعه واعطتني بوجهها
روعه .. يا الهي .. ماهذا .. لا اصدق .. مش ممكن .. مستحيل
انها .. انها ..
أنها رائعه انها جميله .. انها اجمل من ماتخيلت
كني قعدت نحكي عربي فصحى؟؟
المهم يا جماعه روعه طلعت طرف خيااااااالي بكل ..
و اول مره نحسن الظن ويطلع صح
سلمت على ايدها الرقيقه الناعمه وقالت لي كيف حالك ؟ بابتسامه بانت فيها اسنانها المصطفه مثل اللؤلؤ البراق .. والغمازه في خدها وعيونها السوداء .. ووجهها الرائع الابيض المتوسط ..
وانا قلت لها : انستي الوطن
- الله يانسك
ماشاء الله يعني قلتلها كلمه وردت عليا ..
معناها انا ماشي كويس ولازم نستمر
- قلتلها فطرتي؟
عطتني نظرة استغراب من السؤال الغبي الوهمي اللي انا نفسي مش عارف كيف طلع مني وشن يعني وشن الهدف منه وليش ومش امصدق اني خربتها من البدايه ..
المهم قطع صوت ابي العالي الطاغي اللحظه وقال .. خلاص خلوها اتريح شوي ..
المهم كنت في لحظة صدمه .. روعه قاعده عندنا في الحوش
ياللسعاده .. حنستغل الفرصه احسن استغلال .
كنت منسته ومبتسم بروحي ابتسامه غبيه ..
فجاه جت عيني في عين (الشايب) والقيته امعطيني نظرة (( ولدي مش طبيعي))
قتله : هيا نمشو نصلو الجمعه
قالي : غير راك تلبسلي كويش
:
طلعت من صلاة الجمعه وانا فرحان بكل .. مش متوقع ان في انسانه جميله ورائعه ولطيفه ورقيقه وانيقه .. تسكن معانا في نفس الحوش .. يعني فرص النجاح زادت وفي احتمال كبير اني انخليها اتحبني . بس كان لازم نستغل الفرصه ..
المهم في نفس اليوم بعد صلاة الظهر طق باب داري وهذه اول مره واحد من اهلي يطق على الباب ويحترم خصوصياتي
-من ؟
- أنا
الصوت هذا مش تبع حوشنا هذا صوتها .. صوت روعه
طرت طيران على الباب وفتحتلها .. القيتها لابسة توته متاع حوش لونها ((بودري)) توووووهببببل ..
وضمه شعرها بطريقه بريئه .. فتحتلها الباب وابتسمت انا الابتسامه الغبيه .. وشفتها هي ابتسمت وبانت الغمازه اللي في خدها اليسار .. وانا قلبي الصغير لايتحمل من كثر الفرحه
قالتلي
- ان شاء الله ما ازعجتكش
- تي لاااااااا امكسد ما اندير في شي
- باهي انا كنت جايه نبي نعطيك حاجه
- حاجة شنو ؟؟؟

عطتني شكاره صغيره متاع محلات وفيها باكو .. فتحته القيت في

ه ساعه مافيش حد من جماعه شارعنا لبسها في حياته .. لا حمد الحول ولا ليبي مطحون ولا فوزي البطه ماحد منهم لبسها قبلي .. ساعه سويسريه حااااجه صح .. بس الحق مش قيمة الساعه اللي فرحتني
اللي فرحني انها جابتلي انا بالذات هديه مخصوص من امريكا
شكلها سالت عليا وقالولها على جمالي وعلى اخلاقي وعلى مميزاتي
...
المهم خذيت منها الساعه وشكرتها وعطتني ابتسامه وقالتلي
-ان شاء الله عجباتك
- اي حاجه منك حلوه
طبعا الكلمه اللي قلتها هذه كانت اول محاوله رسميه لجعلها تحبني
:
.. مشت روعه وهي مبتسمه .. والعبد لله مستوه في الدار وبدات احلامي تكبر شيئا فشيئا .. البنت شكلها اتحبني .. ومن اول يوم ساعه ماركه .. معناها مستقبلا ياما نبي انحصل منها ومن بوها (عبسلام) الغني المليونير الثري ... وبدات امريكا تقترب شيئا فشيئا
فجأه
طلع صوت ((العزوز)) من وسط الصاله يقول
- تعااااااااااااااااالو تغدوووووووووو غدااااااااااء
طلعت من داري وانا انقول
-فضحتينا يا امي .. مش هكي قدام البنت
كان لازم انبانو راقيين قدام البنت عشان اتحبني
خشيت على الصاله القيت الشايب ماسك الريموت وراقد على ظهره.. ويتفرج على ليبيا التراثيه.. وايده تلمع
اها الشايب يده تلمع .. حاجه براقه في يده .. انها .. انها ..
انها ساعة زي اللي جابتها ليا روعه بس لونها اصفر لماع
تي كيف صار ؟؟؟
فجاه جا خوي الصغير وقالي
-ريتها ساعتي الجديده؟
-حتى انت؟؟
ومرت امي وخواتي والعائله كلها ايديها يلمعن
كلهم حصلو نفس الهديه من روعه
معناها انا مش مميز .. ومش هديه خاصه
الموضوع هديه للحوش كله .. تبا
جاني خوي قالي حصلت ساعه حتى انت؟
- تي خلاااص يا عيت ((سواتش)) اهدو يامفاجيع فضحتونا
المهم جت روعه تبي تحضر معانا اول وجبة غداء
الله يا جماعه البنت من السماحه والبراءه اتخليك تبتسم غصبا عنك
...
المهم ونحنا انتغدو .. سفرتين .. الرجاله بروحهم والصبايا بروحهن .. وبيني وبين روعه الجميله اللطيفه متر ونص بس
فجاه باتي سال روعه : كيف برنامجك بكره يا بنتي؟
- والله يا ((خالو)) ...الخ الخ الخ
ههههههه ضحكت في سري ... يعني الشايب باتي بو الشناب هذا قعد ((خالو)) يا والله عليك حاله ... المهم خليني انكمل الموضوع
- والله يا خالو انا نبي المكتبه اللي في جامعه قاريونس بكره نبي ناخذ منها شوي مراجع
- خلاص مش مشكله توا بكره ياخذك ولد خالتك
ولد خالتها من؟؟ قصده انا ؟؟ انا ناخذها للجامعه ؟؟ يابركة يوم الجمعه
التفتت بيا وبانت الغمازه في خدها وقالت
- مانبيش انتعبك
- تي لااااااااااااااااا عاااااااااااااادي تعبك راحه ادللي بس
طبعا الكلمه هذه كانت المحاوله الرسميه الثانيه لجعلها تحبني
وجت عيني في عين الشايب ((خالو)) والقيته امعطيني نفس النظرة اللي تقول
(( عليا اليمين مانك صافي))
فجأه زرقت اختي في النص ..
- نمشي معاكم
قلتلها وانا عاض على سنوني
- وين تمشي ؟.؟ ارقدي مافيش مشي
- خليها تمشي معانا
هذا اول طلب رسمي تطلبه مني روعه الراااائعه
لكن كان لازم نبعد اي حد عن طريقي عشان نستفرد بيها
- قلتلها لا لا توا تزعجك وخلاص .. خليك بكره بروحك عشان تاخذي راحتك
- باه اوكي
نجيها ياخيا تسمع في كلامي .. ان شاء الله مازعلتش مني ..
لكن بكره في الجامعه توا انرضيها
.................
كنت انراجي في الصبح امتى يطلع .. ومن الفرحه ماعرفتش نرقد .. وقعدت نمثل قدام المرايه في المشهد اللي حيصير في الجامعه لما نعترف لروعه بحبي لها ..
جا ثاني يوم وانا واتي وفي قمة الاناقه ..
فجاه عصبح رن تليفوني القيته فوزي البطه يتصل بيا :
-الو
- حبيبي
- لا حبيبك لا شي.. شن تبي يا بطه؟
- تمشي معاي ؟
-وين؟
-للجامعه
-مش فاضي
- ايش عندك؟
-ماشي للجامعه
- امكسد عليا انت ؟
- والله لا .. ماشي للجامعه نبي نوصل قريبتي للجامعه
- قريبتك ولا اختك؟
- قريبتي
- واختك؟ ماشيه معاكم
- عليش تسال ؟
- حكيتلك يا بو نسب يا حبيبي .. نبي اناسبك انا
- ها ها ها ها . .راجي انجمعلك ضحكه على خفة دمك عصبح
- هههههه انبصر معاك يا عميد .. يعني مايصير شي
- لا لا
- باهي نتلاقو غادي في الجامعه
- لا لا
- كنك ((حاقدني )) .؟
معناها كنك حاقد عليا
- مش ((حاقدك)) لكن والله واخذ قريبتي يا بطه
- باهي سلملي عليها
- من هي؟
- اختك
طوط طوط طوط ..
سكرت انا على وجهه مش حنسمح لثقالة دمه تخربلي اجمل يوم في حياتي
..
طلعت من داري خشيت الكوجينه القيت ((الشايب)) يفطر و روعه قاعده جنبه تشرب في عصير برتقال ...
-صباح الخير
طلعت الغمازه في خدها وقالتلي
-صباح الورد
قالي الشايب
-كنك واعي بدري .. ؟؟ غريبه
- تي كيف ؟؟ مش قتلي امس خوذ بنت خالتك للجامعه؟
- لا خلاص تريح .. توا ناخذها انا للجامعه
- كيف تاخذها انت؟؟؟
- في طريقي وانا ماشي للعمل توا ناخذها انحطها غادي .. وانا طالع انروح بيها
- وأنا ؟
- وانت كنك؟ وعطاني نظرة (( تحشم على وجهك راك فاقشها))

- جت عيني في عين روعه .. حسيتها كانت تتمنى تمشي معاي لكن فقدت الامل من الموضوع
قلت للشايب

- السياره تبيها ؟
- سيارتي نبيها
- والسياره الاخرى؟
- طالع فيها خوك
- تي وين ماشي بيها ؟
- واخذ امك ايعزو في سيدي خليفة
.....
طلعت من الحوش وانا انفكر في المصيبه اللي انا فيها .. اتصلت بوجه النحس فوزي البطه ..
- اها شن تبي
- فوزي وين انت توا؟
- توا عرفت اسمي فوزي ؟
- تي كنك يا فوزي اتهزب ؟
- انت كنك سكرت عليا من بدري ؟
- فصلت المكالمه بس
- اها صدقتك انا
- تي باهي طلعت من الشارع ؟
- لا مازال
- باهي انت ماشي للجامعه خطم عليا نمشي معاك
- مش قتلي نبي نوصل قريبتي؟
-ماصار شي .. تعال توا نحكيلك
- جايك يا بونسب هههههههههه
.....
. اضطريت نتحمل ثقالته عشان نوصل للجامعه بس ووصلت اخيرا
وبعد ماوصلت نزلت من السياره ومشيت للمكتبه .. واول مره في حياتي انخش لمكتبة الجامه مع ان ليا في الجامعه ثمان سنين
دورت في المكتبه شفت روعه ماسكه كتاب لونه سماوي وتقرا
... مش عارف شن علاقة لون الكتاب في القصه ؟؟؟
المهم
مشيتلها وقلتلها : روعه
- عميد ؟؟ شن ادير هنا
-.........
- عميد كنك؟
- ممكن نحكي معاك يا روعه؟
حسيتها فهمت قصدي لكن ماعجبتنيش ردة فعلها حسيتها خافت
- تفضل احكي
- مش هنا
- باهي وين؟
- تعالي نمشو لتركينه هاديه
طلعت بيها جهة تراكين ((العاشق والمعشوق )) وبالمره درت بيها تخطيمه على القسم وشفت فوزي البطه وليبي مطحون وزملائي في القسم كلهم قاعدين .. وكلهم يشوفو فيا ومنبهرين ومش امصدقين
درتلهم نظرة (( صقع عليكم )) وبعدها خطمت عليهم ودرت روحي مانعرفهمش وهم مش امصدقين اني ماشي مع وحده زي هذه
فجاه سمعت صوت من وراي .. صوت فوزي البطه
- اووووووي .. تواضع يا اوووووووي عدل علينا يا اووووي
نبي نمشي للحوش توا .. الشاب اللي جا معاي في السياره شن وضعه قاعد امطول ولا انراجيه ؟؟ يا اوووووي
....
في خاطري نقوله (( سمعتك سمعتك .. غير راك تمشي واتسيبني))
المهم وصلت للتركينه وقعدنا وقلتلها
- روعه انا نبي نكون معاك صريح
- باه
- بصراحه انا معجب بيك
ابتسمت البنت ووطت راسها .. كويس معناها انا ماشي صح
قالت : باه
- شنو اللي باه؟ انا معجب بيك بصراحه وعندي نيه نتعرف عليك اكثر ونبي نكون انسان مميز في حياتك ونبيك تعرفيني اكثر
- انا نعرفك يا عميد
- عارفك تعرفيني انا ولد خالتك .. قصدي نبي نكون الراجل اللي اتحبيه
- مافهمتنيش انا نعرف عليك كل حاجه .. ماضيك ووضعك قرايتك وشن اتحب وشن تكره
... خفت من كلمة عارفه ماضيك .. لكن قعدت نحاول معاها وقلتلها
- باهي يعني مافيش مشكله؟
- لا في مشكله
- شنو؟
- المشكله في قرايتك ياعميد
- باه
- انت لك ثمان سنين في الجامعه ومازلت ماتخرجت واللي نعرفه انك مش امعدل عليها القرايه .. وتسقط ديما في الامتحانات وانا اتهمني الشهاده
- لا لا اسمعي انا في الجامعه ماشي كويس.. طولت في الثانوي بس .. عاودت السنه كم مره ايام الثانوي هذا اللي اخرني
(( مش عارف كني نقول فيها وانا فخور ))
- قالتلي يعني كم مازالك في الجامعه عشان تتخرج؟
- كان ماسقطتش بكل ثلاث سميسترات ممكن
- اوكي اسمعني ياعميد انا هذا بالنسبه ليا اخر سيمستر مازالي مشروع بس . لو انت مازالك ثلاث سيمسترات انا نستناك .. ولو ممكن تتاخر اكثر من هكي انا مانقدرش نستناك ياعميد
فجاه
مسكت ايديها .. قلتلها : روعه انتي مش عارفه كلامك كيف اثر فيا
حولت ايديها بالشويه وقالتلي : كيف اثر فيك؟
- قلب حياتي خلاني انسان جديد .. انا نوعدك اني انركز على قرايتي وانصفي موادي ونتخرج ونخدم ونبني مستقبلي
-ياريت ولو انت درت الشي هذا انا نوعدك اني نكون معاك لكن تو مانقدرش نحكي معاك لعند ماتكمل قرايتك
- انا موافق
جت لحظة صمت غريبه ورن نقالها طلع الشايب .. قالتله ..
-ايوه يا خالو انا كملت توا نستنا فيك
قالتلي : خلاص بوك جايني في الطريق
قلت : اوكي نتلاقو في الحوش بعدين
-اوكي
-باي
..... وصلتها لعند مكان بارك السيارات ونراقب فيها من بعيد لعند ماركبت مع الشايب .. مشيت اندور في فوزي البطه .. القيته هو وليبي مطحون جايبين ((كاوات)) لان بطاريه سيارته هابطه ويعانو فيها
جيتهم فرحان وجوي سمح ..
-كنها سيارتنا ؟؟؟
رد عليا فوزي - مش عارف كنها .. شكلها جتها عين
وهي سيارته نوعها شفروليت اوبترا بيضا ماشيه 400 الف ومحركها امغير مرتين وامزوقه خمسطاشر وجه زواق .. وحالتها يرثى لها
وفي الاخير يقولي جتها عين
.....
بعد كلام روعه .. قررت فعلا اني نلها قرايتي وقررت نبذل مجهودي ونقرا ونتخرج من الجامعه .. بعد كم يوم سافرت روعه لامريكا وودعتها .. ووعدتها اني انكمل قرايتي
وبديت انلقط في المناهج ونقرا .. وبديت نحضر في محاضراتي ومعاش نطلع من الحوش .. وقلبي يخفق شوقا لروعه ..
عدا اول اسبوع وانا نقرا وحسيت روحي ماشي كويس
المهم يوم الخميس في العشيه رن نقالي ليبي مطحون يتصل بك
- ها
- ايوه
- كويس .. معناها مازلت حي
- شن قصدك؟
- كنك رايح؟
- لا مافي شي

- كيف مافي شي؟ لك اسبوع مختفي الجماعه كلهم يسالو عليك
- لا شي غير كنت نقرا
- كنت شنو؟؟؟ (( مش امصدق))
- كنت

نقرا
- جوك سمح انت؟ واتشفط
- والله لا .. واقسم بالله كنت نقرا
- شن تقرا؟
-كيف شن نقرا .. تي رانا طلبة جامعه ياخوي
- لااااا انت حالتك صعبه
- حالتي صعبه ؟
- اسمع توا انجوك توا في الطريق انا والبطه
- لا لا مانبيش نطلع
- جايينك قدام الحوش وتطلع غصبا عنك
(( اطلع يا كلب)) صوت فوزي البطه من بعيد
- باهي باهي تعالو
قررت نعطي روحي فرصة راحة .. مشينا للقهوه وطلبنا 3 شاي وشيشة ارقيله وحده فقط .. لان الظروف الاقتصاديه لاتسمح باكثر من ذلك
..
المهم حكيتلهم القصه كلها ووضحتلهم السبب
سكت فوزي البطه وعطاها نظرة لسقف القهوه وقال
-البنت هذه تكذب عليك
عطيت نظرة لليبي مطحون القيته ايهز
في راسه بمعنى (( كلام البطه صح ))
قلتلهم : كيف تكذب عليا ؟ في شنو تكذب
- مش حتستناك
- البنت وعدتني
- ياراجل انت ولد خالتها وهي عارفتك فاشل .. وعطاتك اصعب شرط مش حتقدر اتنفذه .. يعني هي دارتلك توزيعه بطريقه فنيه
- مش توزيعه .. نقدر نكملها القرايه
المهم جا ليبي مطحون قعد جنبي ولف ذراعه على رقبتي من الخلف وقالي بصوت حنون : يا عميد .. مش بالعناد ياخوي .. نحنا اصحابك ونبو مصلحتك .. ونبو ننصحوك
هديت شويه وقتله : باهي
- البنت يا عميد حلوه وسمحه وباتها الخاج (عبسلام) يعني مش حتقعد تراجي فيك انت بس .. هذه حيجوها طلاب واجد وانت حتتعب بعدين
وافقه فوزي البطه وقال وفمه يطلع في دخان الارقيله تقول تنين
- مزبوط كلامه
وكمل ليبي مطحون كلامه
- وانت والله ماناقصك حاجه .. راجل امصنع امنع .. ومش قصة شهاده اللي تخليها تتشرط عليك الراجل مايعيبه شي .. اوكي تبي تقرا مش ماسكك اقرا وكملها قرايتك ياريت .. لكن انك تقعد تقرا ونفسيتك مدمره عشان بنت .. مانرضاهاش لك انت رفيقي
سكتت وقعدت نفكر في الكلام لعند ماقاطعني فوزي البطه
_ عطاتك رقمها ؟
- قتله لا بصراحه انا ماطلبتش
- فيس بوك .. ((واطس)) اب .. فايبر .. ((واي)) شات؟
- قلتلها عطيني الفيس بوك قالتلي مش دايره اكاونت على الفيس
ضحك فوزي البطه ضحكة الشماته .. وضحك معاه ليبي مطحون
قتله : كنك تضحك ؟؟
-يعني تبي تقنعني ان روعه الامريكيه المتحضره ماعندهاش حساب على الفيس؟
- عادي توقع
هزبني ليبي مطحون وقالي : كنك حمار انت؟
قرر البطه ان ايديرلي مثال عملي ... وقعد ايكلم في (جاقما) الافريقي متاع الارقيله
- جاقما تعال هنا
- نعم مدير
- انت في عندك اكاونت فيس بوك
- انا في اكاونت .. جاقما مانجولو
- ريت ياعميد . . حتى الافريقي الراقد ريح في ليبيا عنده فيس بوك .. يعني تبي تقنعني روعه ماعندهاش ؟ هذه اكيد عندها وعندها صاحبها يعلقلها في الفيس وماتبيكش تعرف ياراس السطل
........
فجأة راجعت شريط الايام الماضيه . .هل فعلا كلام اصحابي صح؟
هل فعلا انضحك عليا ؟ يعني روعه مش البنت الملتزمه لهدرجه انها ماتكلمش شباب .. قصدي وانا ماعنديش اي طريقه نوصلها بيها
... مشيت للحوش وانا مهموم .. ونحارب في افكاري
لكن تذكرت ابتسامتها الرقيقه .. وقررت نستمر في وعدي لها ونقرا ونتخرج عشان نكون معاها
خشيت للحوش فجاه سمعت صوت اختي تقول
- يا ماما اتسلم عليك روعه
- عليك وعليها السلام
وانا سمعت اسمها استكيت وقعدت نصنت
- كلماتك ؟
- لا لا خشت عليا على الفيس
... يا الهي .. عندها فيس بوك
- وشنو صار في مشروعها؟
- قالت بعد بكره اتناقش
يا الهي بعد بكره تناقش وانا مازلت مادرت امتحان نصفي
تي تكذب عليا .. كلام الجماعه صح .. بلطتها عليا .. وانا امصدق ... والله ماني املحق عليها .. اصلا خالتي ماتحبنيش ... وبوها الحاج ((عبسلام)) رجل مادي حقير .. وانا من وين لي الفلوس .... نكذب على روحي ولا على من نكذب انا ؟؟
:
وفعلا بعد فترة انخطبت ولا دورتني ولا عبرتني
وانتهت قصتي مع روعه قبل ان تبدا

....
النهاية

............

رسالة نسرين
بقلم #عميد_العزاب
:
:
زمان كنت حافظ وجوه البنات في مدرسة البنات القريبة من حوشنا
وعندي بعض التجارب مع بعضهن
وباعتراف رفقاء دربى (البطة) و(الحول) و (مطحون)
كنت شايف روحي ومعتبر نفسي روميو المدارس ..وفلانتينو المرحلة الثانوية كلها
وعندما اقرر خوض قصة جديد لا بد من النجاح
فكلمة اسفة لم اسمعها من قبل ولا اظن انى ساسمعها
لان عميد العزاب _بلا غرور_ صار حلما بعيد المنال لكل البنات
((طبعا كله كذب .. ))
وانا نعرف ان البنات تعشق الشاب صاحب التجارب وكل واحده فيهن تحلم بان تكون الفتاة التي ستغيرني وتحلم ان تكون واحدة ممن نلن ذلك الشرف الرفيع
:
رأيت ((نسرين)) ذلك اليوم لاول مرة
ترتدى ملابس المدرسة الساحرة
وتحضن حقيبتها السوداء فى حنان
فكانت هذه الفتاة تختلف عن كل ما عرفتهن
او احببتهن من قبل الان........
انا عارف ان اي علاقة او اعجاب يكون حلو في البداية وان اي بنت تعجك في البداية وتقعد تشوف في البنت اللي عاجبتك ارق واجمل انسانة في الدنيا و بعد فترة حتقعد تشوف فيها عادية ويختفي ذلك الجمال ((الوهمي)) اللي كنت تشوف فيه
وبما اني ادرك هذة الحقيقة او الخدعة
لكن رغم ذلك كله لم اتمكن من كبح جماح قلبى
:
وجدت نفسي هايم في البنت ونسرح معاها كل ماتخطم من جنبي
وكل ماتخطم انحس العالم اللي جنبي يختفي كله ومعاش يقعد في حد الا نسرين فقط وحتى اصوات الناس تختفي ونسمع في اصوات عصافير الربيع وامواج البحر ونحس روحي خفييييييف وطاير في السماء .. بمجرد مانشوفها معاش نرمش بعيوني عشان ماتفوتنيش لحظة من رؤية هذا الجمال البديع.
:
ولما شفتها ماشية هي وصاحباتها قلت بيني وبين نفسي (( نعلاي منك يا النغمة ))
وماحد يسألني شن كنت نقصد بكلمة نغمة ... لكن حسيتها الكلمة معبرة
وللاسف يبدو ان هذه الكلمة طلعت مني بصوت عالي من حيث لا ادري
وسمعوني ((البطة)) و ((الحول))
قالي (البطة) وعيونه فيهن دهشة وقال:
- بالله؟؟ .. من امتى يا خونا ؟!
سأل (الحول) فى استغراب :
- كنه؟ شن قالك؟
رد البطة
- قال ان البنت اللي في النص هذه نغمة
مد (الحول) رقبته الطويلة وضم عيونه ليرى جيداً
وقال وهو يشوف في شكل البنت من بعيد
- قصدك هذه البنت الطويلة الى ماشيه مع ريما ومنى؟
كريت الحول من ذراعة وقتله:
- معاش اتبحت فيها هكي؟
- من امتى يا خونا؟ نحنا طول عمرنا هكي انفنصو؟ تبي اديرلي روحك توا تعرفها ؟؟؟
خليتهم واقفين وسيبتهم ومشيت وانا نعيط
- انا اللي غلطان وتافه اللي انتبع فيكم!
لحقنى (البطه) ومسكني وقالي:
- دقيقه يا عمده ... ماعليش مش قصده .. انت شكلك امكبد جديات!
- اها جديات .. انا لازم نمشيلها البنت ونصبي عليها ونكلمها؟
قال (الحول) وهو مبتسم
- ساااااهله
سالته فى لهفة وشكلي نسيت اني زعلان منه
- كيف ساهلة؟
- ريما اللى ماشيه معاها نعرفها صاحبتي
رد (البطه) وهو يتهزا
- صاحبتك من وين؟ ... تي انت من امعبرك؟
رد (الحول) بثقة
- ارقد ارقد .. والله مانك عارف حاجه
وحط يده فى جيب السروال وطلع ورقه صغيرة
وقال
- هذا رقم نقالها.. ايش رايك توا؟؟؟
كنا نتناقشو في الموضوع ونحنا واقفين في نص الشارع
فقلت :
- هيا نمشو للقهوة ونهدرزو في الموضوع !
:
وكالعادة طلبنا شيشة ارقيلة يتيمة نظرا للانهيار الاقتصادى الذى نعانيه
وكان (ألبطة) اكثرنا شوقا واحتياجا اليها
خليتله الشيشة و قربت من الحول وقلت له وانا نترجى فيه
- تقدر تكلم ريما توا .. وتخليها تعرفني على نسرين
- حاي عليك ... قصدك عرفت حتى اسمها
- طبعا سمعت ريما وهي تكلم فيها وهن طالعات من المدرسه
- نسرين اسم حلو والله
- وهي احلى من اسمها؟
رفع الحول راسه وهو يتامل سقف المقهى القذر وهو يقول:
- والله كل واحد وذوقه و كل واحد ووجهة نظره يا خوي
- احسن اصلا لو عجباتك كنت حنشك في ذوقي
- ايش قصدك؟
- ماقصدي شي ياراجل خلينا في الموضوع ... عندك رصيد في نقالك؟
- توا هذا سؤال؟ انت عارف ان نقالي استقبال ورنات بس
- شي الواحد مايحصل منك شي.. وانت يا (بطة)؟؟
كان (البطة) في تلك اللحظه يسحب نفسا عميقا من الشيشة
حتى خفت ان تزهق روحه
فكان يبي يرد عليا لكنه شرق وبدا يكح
واحمر وجهه حتى اصبح زي الطماطم
قعد الحول يخبط فى ظهره وهو يقول
- ارحم روحك.. والله مانداعكو فيك عليها الشيشه خوذها بروحك؟
:
هدا وقال بعينين امعبيات دموع وصوت مبحوح
- عندي جنيه رصيد لكن ماتكملوش كله؟
:
خذ الحول النقال القديم الذي كنت اظن انه انقرض من مده
وبدا يطلب في الرقم وانا ملهوف قلبى يرقص طربا
وادعو الله فى سرى ان تنجح هذة المساعى الدولية لحل المشكلة الاقليمية
(( جو سياسي ))
لكن الحول توقف بعد عدة محاولات وسال البطة:
- رقم 7 مايخدمش ولا كيف؟
- اوووه فيها رقم 7 .. لا معناها مايصيرش منه رقم 7 مايخدمش
عطيته نقالي وقتله
- هاك ياراجل بدل الشفره وحطها في جهازي غير كلمها وراس امك
:
شفت في عيون البطة احباط وخيبة امل
شكله كان يتمنى ان تفشل محاولاتنا فى استغلال الرصيد
نجح الاتصال اخيرا وعندما وصل صوت ريما الى مسامع الحول

قال فى تركيز:
- ريما انا (( حمد )) هذا رقم صاحبي اسمعي مانبيش انطول ماعنديش رصيد
عميد صاحبي معجب بصاحبتك نسرين ويبي يتعرف عليها والراجل على ضمانتى
يقدر يكلمها كيف وامتى ووين؟
:
سكتت الحول وقعد يسمع في كلام ريما وعيوني امركزات على ملامح وجه الحول
كانت ملامح الحول تتبدل وتغير بسرعة
و قلبى يدق بقوة.. وانا نشوف فيه ما زال يسمع وعلامة الاحباط تسلل الى قسمات وجهه
ولما شفته دار حركة بشواربه معناها ((للاسف)) وشفته بلع ريقة
طاح قلبى عند كرعيا وحسيت بطني وجعتني
حسيت انه ماصارش منه الموضوع وقعدت نراجي فيه يسكر السماعه
بدا البطة يتوتر ويشوف فى ساعته
وقال للحول
- تي خلاااص كملت الرصيد ؟
دارله الحول اشارة الاصبع اللي على الفم بمعنى اسكت
ووجه الحول كله جدية وتحسه امركز في كلام البنت
وفجأه
حسيت وجه الحول ارتخى شوي.. وشفت ابتسامة على طرف فمه
و بدأ الامل يداعبنى من جديد
يبدو ان الامور تتحسن وتسير فى صالحى
كان البطة قد وصل الى ذروة غضبه وقعد يمسك في ذراع الحول ويقول
- سكر خلاص الرصيد الرصييييد
كريت البطة وقلت له وانا ((نجدا فيه))
- بطه .. وراس العزوز خليه .. هذه لحظات تاريخية
-تاريخيه شنو ياراجل .. انا شن دخلني
فجأة انهى الحول المكالمة بكلمة واحدة
- باى
هجم البطة على النقال وقعد يطلب في *111# يبي يشوف الرصيد
وانا انظر نحو الحول نظرة واحد (( مسكين يشحت في صدقة))
وسألته
- ها ايش صار؟
اتكا الحول بظهرة الى الوراء ورفع ايديه وهو يتمطع فى استفزاز
و يقول:
- شن صار في شنو؟
- شن قالتلك ريما ؟
- على شنو؟
كان قاعد ايتبرد ويذل فيا .. قتله وانا واضح ان صبري بدأ ينفذ
- تي هيا فكني من الجو.. شن صار في موضوعي؟
- مايصيرش منه الموضوع
- ليش؟
- البنت طلعت مؤدبه بكل وبنت ناس ونوعيتها مش حتصبي عليك ولا حتعطيك رقمها ولا حتعبرك
قلت في يأس
- تكذب ياراجل والله كذاب انت .. شكلك امكسد عليا
- مانكذبش عليك.. تي جديات
- بس شكلك في اخر المكالمه مايقولش هكي
سأل فى برود:
- كيف؟
- كنت مبتسم ...... ووجهك كله يضحك
- هاهاهاها عشان ريما كانت تقولي انحبك وانموت فيك
:
قبل نبي نضربه على راسه لعند ماتتعدل الحولية اللي في عيونه
لكن منعنى البطة وقال :
- تريحت يا حمار؟ خليتلي فيه 100 درهم؟
:
:
مضت الايام التالية كئيبة قاسية
وكبر الموضوع فى راسى
خاصة وان صورتى اشوهت
بعد ماعرفت ريما باني معجب بنسرين
وبالطبع سوف تتناقل وكالات الانباء هذا الخبر
:
ولكن للامانة ماكانش هذا اللي شاغل بالى
لاني فعلا تعلقت بيها البنت
وقعدت 24 ساعة انفكر فيها
اخيرا قررت نشجع
واندير خطة محكمة للتعرف عليها
وايصال مشاعرى الى قلبها الرقيق
:
ثاني يوم بدات تنفيذ الخطة
قلت للحول والبطه مايدورونيش اليوم لاني عندي موضوع خاص
حسيتهم عرفو الموضوع
:
قعدت واقف جنب المدرسة نراجي فيها امتى تطلع
ولما شفتها تباعدت من الباب وبديت نمشي وراها
:
سارت كالغزال بين صديقاتها
وانا نمشي من بعيد مانبيش حد منهن يشوفني ولا يلاحظني
كنت خايف توصل نسرين لحوشها قبل صديقاتها
لاني كنت نبي نكلمها بروحي
وبعد دقائق قليلة طلعت ريما من القطيع
قلت بيني وبين نفسي الحمدلله معاش في توا الا منى
ولاول مرة منذ ايام اشعر بسعادة حقيقية
وراحة كبيرة عندما وصلت منى الى منزلها تاركة نسرين وحدها
كانت الفرصة ذهبية
بديت نسرع في خطواتي عشان نعوض فرق المسافة اللي بيني وبينها
قربت منها وتاكدت ان مافيش حد يشوف فيا او امركز عليا وقلت
- نسرين!!
قلتها لها وانا نهمس
ماباتش تلتفت وماصارش منها اى حركة تدل انها سمعتنى
قررت نرفع صوتي شوي
- نسرين ... لحظة ماعليش
حسيتها هالمرة اضطربت وعرفت انها سمعتنى
لكنها زادت من سرعتها
وخفت توصل لحوشها قبل مانكلمها
- بالله عليك يا نسرين اسمعينى بعدها ديري اللي تبيه
- خليني في حالي لو سمحت
لما قالتلي هكي سكرت راسي وقلت
- ماعليش ضروري تسمعيني
- ماعليش لو سمحت انا مستحيل نحكي معاك
-عارفك والله وومتاكد انك مش زي باقي البنات وعارفك بنت ناس عشان هكي نبي نقولك كلامي على السريع مانبيش انسببلك مشكله والله
:
لان هذة الجملة طلعت من قلبى وكل حرف كان صادقا
حسيتها اثرت فيا
دارت وجهها شوري وهي تمشي وقالت لي بهدوء ووجهها باين عليه الخوف
- باهي اسمع انا توا قريبه من الحوش وانت هكي حتسببلي مشكله .. مرات خوي يشوفني نحكي معاك واتصير مشكله
:
كاد قلبى انا يطير ويغادر جسدى من الفرحة
المبدأ موجود .. يعني هي ماعندهاش مشكلة لكن الظروف لا تسمح
فقلت وصوتى كله امل وتفائل :
- اسف يا نسرين بس بالله عليكي نبيك تعطيني فرصه وتسمعيني
قالت بعد تفكير قصير:
- حاضر ..توا نبي نمشي ممكن
- اوكي تفضلي.. واسف لو ازعجتك
- لا عادي
ومشت وانا وقفت في مكاني
خليتها لعند ماتباعدت ومشيت ((اتكيت )) على سور المبنى اللي جنبي وحسيت روحي ((داهش)) اتقول طالع من مباراة كورة.. مش من المشي لا
من قلبي اللي يدق بسرعة من الفرحة وماعطانيش فرصه نتنفس
:

(( انشوف فيكم مبتسمين توا ياللي تقرو في القصة.. فرحتولي صح ؟))
:
المهم
قضيت اسعد ليالى عمرى فى غرفتى
وقررت نكتب رسالة ونعطيها لها ثاني يوم .. وانا كان عندي ثقة في فكرة الرسالة اكثر من رقم النقال .. لاني بحسب خبرتي.. نعرف ان البنت تحب الراجل الرومانسي وتحب جو الرسائل والكلام العاطفي الدرامي ... فكانت فكرة الرسالة رغم انها قديمة هي افضل حل للمشكلة
وقلت لها في الرسالة
:
نسرين
لم اناديكى بحبيبتى
فاسمك هو الحب فى قاموسي
هو الحب نفسه
سامحينى والتمسى لى عذرا
فلم اكن اقوى على رؤيتك وامضى فى سبيلى
ولم يكن قلبى يتحمل فيض الحب الذى تفجر بداخلى
دون ان ابوح لك
لم اقاوم شعورى لعلمى انى ساهزم
لم احاول كبح عواطفى
حتى لا يحرقنى لقيبها
منذ راتك عينى حتى اعلنت جوارحى الحرب عليا
وحملتنى مسؤلية فنائها
لو فشلت فى توصيل امانة اشتياقها لك
نسرين انا اتحرك رغما عنى
اتجة نحوك رغم ارادتى
اقرب منك دون ان اخطو لكى
صرت اسيرك وانتهى الامر
صار مصيرى مرتبطا بك
وعمرى مرهونا بعمرك
قبلتينى او رفضتينى سالاحقك
واتبعك
واكون ظلا لكى اينما ذهبت
انه ليس تهديدا
فما كنت لاهدد سبب كياني ووجودى
نعم لقد صرت سبب وجودي فى هذة الحياة
فلا عيش لى بدونك
ولا حياة فى غيابك
تصورى انى انتبهت الان فقط
ان يدى تكتب فما امرها سوى شعورى واحساسى
نسرين يجب ان تعرفي انك
الشاطئ الذى سترسو عليه سفينتى الهائمة
انت مستقر روحى الشريدة ونبض قلبى المرتجف
انت نقطة التحول
انت من ستغير هدفى فى الحياه
بل ستصححه
ساثبت لك انى لن ارى سواك منذ الان
بعد ان اثبتي انتِ لى ذلك دون ان تدرى
ساشهدك على عميد الجديد المسؤل الجاد المحترم المجتهد
ساعدك بمستقبل مشرق
يدك فى يدى نخوض الحياة
ونتخطى الصعاب
ونلبس ثوب السعادة الذى يدثرنا
اتمنى من كل قلبي ان تعطيني فرصة لاثبت لك كلامي

(( شن رايكم بالكلام.. حتى نزار قباني ماقاله ))

سكرت الرسالة وحطيتها فى ظرف صغير
:
ثاني يوم وقفت قدام المدرسة انراجي فيها
وبديت نمشي وراها زي اليوم اللي قبله
ولما روحت ريما وبعدها منى اصبحت نسرين وحدها
:
قربت منها وتنحنحت بصوتي
لما سمعت صوتي ابطأت في السير
قربت منها ووحطيت رسالتي في يدها
:
وواحد من صوابعي لمس يدها .. حسيت بشعور مانقدرش نوصفه
التقطت الرساله واسرعت في خطاها نحو بيتها
:
اتكيت مره اخرى على الساس اللي جنبي نبي نتنفس بسبب ارتفاع دقات القلب
ولكن مع هذا الارتباك كان قلبي يرقص فرحاً وكانت الدنيا لاتسعني
فلقد كنت شبه متأكد ان نسرين سيصلها احساسي
:
مشيت لمطحون في الحوش نبي نحكيله اللي صار لكن ماكانش قاعد
اتصلت على نقاله بطريقتي التي اسميها ((رنه ))
فرد علي برساله ((من فضلك اتصل بي))
بعد ما قريت رسالته عرفت انه امفلس ومستحيل يعاودلي
مشيت لبطة والقيت معاه الحول وقعدت نحكيلهم في القصه ونعاود فيها
لعند ماحسيتهم ملو مني
:
لكن طز .. ماعدلتش عليهم لان فرحتي كانت كبيرة
وقعدو يسألو فيا اسألة غبية
- كانت حاطه عطر ولا لا؟
- ايديها بيض نفس لون بشرة وجهها؟
- سنونها بيض ولا صفر من قريب؟
:
فتتهم وروحت للحوش وقعدت نحسب في الساعات اللي يفصلن فيا على شوفة نسرين قعدت نراجي في اليوم الثاني الذي سيكون ((نهار الحسم))
:
في اليوم الثاني وبنفس الطريقه لحقت بنسرين وعندما اصبحت وحدها ناديت على اسمها بشوق ((نسرين))
فالتفتت علي وفي وجهها ابتسامه خفيفه صاحت معها جوارحي ((ياالله يا الله))
وقالت لي بصوتها الناعم
- ممكن اليوم اتجيني في المنتزه (الفلاني) في العشيه
- اكيد امتى تبي تمشي؟
- مش عارفه بصراحه
قلت نستغل الفرصه
- باهي ممكن رقم تليفونك عشان نعرف امتى تبي تمشي؟
- اوكي عادي خزنه عندك
طلعت نقالى من جيبي بسرعه ونسيت لحظتها ان نوع نقالي لا يجب ان يراه الناس الطبيعييين لان موديله اصبح يوضع في متحف اثري
- كم الرقم؟
-092*******
- اوكي خلاص توا انكلمك بعدين
:
عرفت اني اصبحت قريبا جداً من نهاية العذاب وبداية الحياة السعيده
وقبل العصر اتصلت بها وقلت لها
- طلعتي من الحوش؟
- انا في المنتزه توا .. انت وين؟
- توا جايك
:
وصلت للمنتزه كلمتها
قالت لي :
- اهو انشوف فيك تعال
لما قالت انها تشوف فيا حطيت ايديا الاثنين في جيوبي ومشيت شورها
و مشيتي كانت تفوق في روعتها مشية عارضي الازياء
بعد ماقربت منها شفت معاها بنتين واضح ان وحده منهن اختها الكبيره والمصيبه انها لم تكن جميله مثل اختها وعلى مايبدو انهن من نوعية النساء التي يقال عليهن ((فاتكن القطار))
اما الثانيه فكانت طفله تلعب بالعاب الاطفال وكانت تشبهها
سلمت على اختها الكبيره التي سلمت عليا وبوجهها نظره كانها تقول في نفسها
- هذا اللي طلعتي بيه يا اختي؟
اما الثانيه فحاولت ان ادللها واضحك معها لكي اكسب عطف نسرين فلم تهتم بي
كانت نسرين في قمة الاناقه واقتربت مني وقالت
- تعال نمشو نقعدو غادي
قلت وانا مش امصدق اني قاعد في موعد معاها
- اوكي هيا
نظرت نظره اخيره لاختها فكانت تفنص فيا بكل حقد .. حسيتها لخبطت جوي
المهم

قعدنا انا ونسرين
وقالت لي
- عميد نبي انقولك على حاجه؟
لاول مره كان اسم ((عميد)) يخرج بطريقه جميله
- الله اول مره انحب اسمي
ردت بجديه :
- نبي انقولك سر مهم بس لازم توعدني انه مستحيل يطلع منك
- اكيد والله مانقول لحد
جت اختها الصغيره مقاطعه للمشهد
- نبي جيلاطي
- باهي حبيبتي خوذي من سعيده
اكتشفت ان اسم اختها ((سعيده)) وفعلا اسم على غير مسمى
قلت لها بكرم
- هاكي حبيبتي
- لالالالا توا شرينالها
- خليها عادي
- لا والله الله ماتعطيها
كان الحوار هذا قائم بيننا والبنت الصغيره تنظر اليا بنظره استعطاف وكانها تقول لي
ان لم تعطني انت فلن تعطيني اختي انت املي الوحيد
فمددت لها النقود وقلت لها
- عدي اشري حبيبتي
شعرت نسرين بالخجل الشديد
حاولت ان انسيها الموضوع
- باهي كملي
- المهم ياعميد انا السر هذا مايعرفه حد وانت الوحيد اللي نبي انقولك لاني مانبيش نضحك عليك ومانبيكش تتعب معاي
- والله شغلتيني ان شاء الله خير
-عميد .. انا .. انا !!
- شنو؟؟
- انا كنت متزوجه وتوا مطلقه
نزل الخبر على راسي كالصاعقه .. وتوقفت ساعة الزمن .
. واصبحت في حالة غياب عن الواقع
سالتها : من امتى؟
- من سنه
- اول مره نسمع بيها
- لان ماحد يعرف انا انتقلت لبنغازي توا وماحد يعرفني هنا ولا حد في المدرسه
- كيف تزوجتي وانت صغيره
- انا مش صغيره انا وقفت سنتين ماقريتش لاني كنت محبطه وتوا قررت انكمل قرايتي
- وليش اطلقتي
- للاسف هو طلع مدمن وكان يضرب فيا
- وكيف وافقتي عليه من الاول
- ماكانش حد يعرف وانا كنت انحبه وهو قريبي
-.......
- كنك ساكت؟
- مش عارف شنو انقول
- عارفه عشان هكي حبيت انقولك لاني وثقت فيك وحسيتك حبيتني بجد ومانبيكش تتعلق بيا لان اصلاً اهلك مش حيرضو انك تاخذ وحده كانت متزوجه
كنت نقول لها ان اهلي حتى بدون هذا السبب لن يوافقو على تزويجي لعدة اسباب اهمها ((ألازمه الاقتصاديه العالميه)) لكني قررت ان اصمت
لكن ياجماعه خطر في بالي سؤال مش عارف من وين وكيف خطر على بالي نساله
- كنتي ساكنه معاه بروحك ولا في حوش هله
- لا كنا بروحنا
جائت لحظة صمت ومعاش عرفت شن نقول
يعني الموضوع مش عيب .. شن فيها ؟ لكن انتو عارفين مجتمعنا
وانا مازلت صغير في السن
حتى لو عشت معاها علاقه كم سنة شن بعدها .. هلي عارف تفكيرهم مستحييييل يزوجوني لوحده كانت متزوجه لان تفكيرهم من الاخير ((ليبي))
قطعت اختها ((سعيده)) الصمت لما قالت لها
-هيا خوك كلمني في الطريق
صبت من جنبي وقالت لي في وجهها ابتسامه حزينه فيها نوع من الحشم
- اوكي باي توا نحكو مره اخرى
رددت بكلمه واحده
- باي
:
وجعتني البنت .. بصراحة ياجماعة وجعتني بكل ..
حسيتها فرحت بكلامي في اليوم اللي قبله ..
حسيتها فرحت ان في حد يحبها ويبيها..
حسيتها فرحت ان في حد عيشها لحظة سعادة ولو قصيرة وان في شاب يحبها وعيشها لحظة جميلة من عمرها
لكن وجعتني انها شافت في تعابير وجهي ان هذا كله مش حيستمر
لكن بما انها اصبحت تدرك الواقع من المر اللي شافاته قررت تحكيلي من البدايه عشان ماتبيش تعيش معاي قصة حلم وهمي
:
لكن في نفس الوقت استحقرت نفسي وزعلت على روحي..
شن اندير.. شن انقول؟
ياريتني ماجيتها ولا كلمتها ياريتني ماعطيتهاش امل..
وانا نفسي حزنت على روحي
لاول مره نحس هكي ونحس اني نبي نعيش فرحه
لكن حسيت كاني ارتفعت فووووق وفجأة طحت
:
روحت للحوش وانا هايم
وبعدها بيومين كنت قاعد مع هلي على سفرة العشاء وانا مازلت نفكر في الموضوع
بعد العشاء وانا نشرب الشاي سمعت امي واختي يتهامسان في موضوع
سمعت اختي تقول
- تبي تزوجه فلانه بنت عيت فلان
وامي تقول في دهشه
-ان شاء الله فلانه هذه المطلقه!!!!!!!!!!!
-اها المطلقه
-وكيف تاخذ لولدها وحده مطلقه
:
عندما سمعت الجملة اللي قالتها امي شعرت بالشفقه على امي وعلى المجتمع اللي عايشين فيه اللي صارت عندهم كلمة مطلقة تعني عيب وخزي وعار
شعرت بسخرية القدر.. كيف ينفتح موضوع زي هذا قدامي توا؟
وعرفت ان هذه رساله تقول لي
((اياك ان تفتح الموضوع حتى بالكذب))
"
سمعت صياح الوالد وهو يقول
- من اللي سارق رصيد من نقالي؟؟
:
عرفت من جملة امي ان تفكير المجتمع الليبي لن يسمح لي بالارتباط بمطلقة
وعرفت من هزايب الشايب ان الوضع المادي منهار لدرجه انه متعصب من اجل رصيد مسروق من نقاله والذي اؤكد لكم برائتي من سرقته
يعني لا حيزوجني لا مطلقه ولا مش مطلقة ولا حيعطوني حتى كرت نكلم بيه
:
ثاني يوم كان الحول بجانبي ونحنا طالعين من المدرسه وهو يسال فيا
- ياراجل كنك ايش صايرلك اليوم .. مش عاجبني؟
ماكنتش مستعد نفضح سر البنت التي استامنتني عليه
وماعنديش نيه نحكي مع حد
:
قتله مافي شي وخلاص
وفي عمق تفكيري خطم عليا (البطة) يسوق في موتو
سالته : لمن الموتو هذا؟
قال بغرور : متاع ولد عمي امخليه عندي
قلت له بشوق ولهفه : عطيني جيرو .. نبي نجربه
:
اكتشفت اني مازلت هاوي وعيل وافكاري مازالت صغيرة
وفعلا بعد فترة نسيت الموضوع ونسيتها البنت وكل واحد عدا في حاله
:
النهاية

Toss a coin to your witcher...

ﺍﻟﻠﻬﻢ ﺍﺟﻌﻞ ﻫﺬﻱ ﺍﻟﺠﻤﻌﻪ ﺣﺎﻣﻠﻪ ﻟﻨﺎ ﻣﻦ ﺍﻟﺨﻴﺮ ﻓﻮﻕ ﻣﺎ ﻧﺮﺟﻮﺍ ﻭﺍﺷﺮﺡ ﺻﺪﻭﺭﻧﺎ ، ﻭﻳﺴﺮ ﺃﻣﻮﺭﻧﺎ ، ﻭﺃﺭﺣﻢ ﻣﻮﺗﺎﻧﺎ ﻭﺃﺷﻒ ﻣﺮﺿﺎﻧﺎ ﻭﺃﺟﻌﻠﻬﺎ ﺟﻤﻌﺔ ﺧﻴﺮ ﻷﻣﻮﺭﻧﺎ ﻛﻠﻬﺎ 💛✨

كيف عرفتني من هديكا المنطقة 🙂😂