اها يا امي
- توا انقولك على حل اديره
- شنو الحل ؟
- خالك جمعه
- خالي جمعه؟
- اها خالك جمعه .. عدي كلمه وقوله على موضوعك توا ايسفرك
- يا امي فكيني .. خالي جمعه مايحبنيش
- من قالك هكي؟
- من ساعه الموضوع اللي صارلي مع بنته اميره
- تي لا خالك مش امدوره الموضوع .. خوي ونعرفه
- مافيش حل اخر؟؟
- خلاص معناها اقعد في الحوش وماتوجعش راسنا بالسفر
................
...............
كان الباين ان خالي هو المنقذ الوحيد اللي ممكن يدعمني عشان السفر
قررت نمشيله ثاني يوم .. وصلت قدام حوشه .. وللعلم خالي راجل ثري وعنده فلوس .. سارق فلوس ياما وامعبي بطنه من الدوله
مش زي باتي الموظف المثالي المكافح اللي مايقدرش يسفرني لبريطانيا
ولو جابلنا دلاعه يحسسك ان جايبلك مرسيدس اخر موديل .. ونقعدو فرحانين بيها ونصورو معاها سيلفي
المهم مش هذا موضوعنا
طقيت على باب حوش خالي وانا كلي امل وتفائل
سمعت صوت بنت في الشارع يقول
- من ؟؟؟
قعدت نشوف يمين يسار ماشفتش حد.. الصوت هذا من وين طلع؟؟
- منوو ؟؟؟
في صوت بنت لكن مانشوفش في حد وقعدت نعيط في الشارع قدام باب الحوش
- من انتي؟؟
- انت اللي من ؟؟ تفضل ؟
- انتي اللي تفضلي ؟؟ وين قاعده انتي؟
- تي انت اللي طاق على باب حوشنا
شفت السبيكر اخيرا اللي جنب الباب ...
وكانت اول مره في حياتي نشوف الجو هذا
اصلا زمان مش اي واحد امركبه .. مش توا كاميرات وجو
استغربت . وين الجو هذا كله .. حوش خالي مطور بكل ..
الله غالب علينا ...ونحن شارعنا كان اللي امركب لامبه حلزونيه قدام باب حوشهم هذا معناها صقع بكل
المهم قلت
- انا انا .. عميد
- اها .. نعم شن تبي.؟
- خالي قاعد ؟
- لحظه نشوفه
عرفت من الصوت ان اللي ردت عليا ((اميره)) بنت خالي اللي تشوب علاقتي بيها بعض التوتر عشان قصه قديمه نموت ومانحكيها
المهم شوي سمعت صوت غريب
(( طيييييييييط كراخخخ ))
صوت القفل متاع الباب انفتح بروحه
وسمعت صوت اميره مع السبيكر يقولي
- خششششش
مافيش تفضل (( خشششش هكي ))
يلا مش مشكله ..
خشيت ووصلت لباب المدخل وفتحت اميره الباب
- خير يابنت خالي
(( اندير في جوي عادي ))
- نعم تفضل
- خالي قاعد ؟
- شن تبي فيه؟
- موضوع خاص .. كيف حالك انتي؟
- مازال عندك وجه تسال بعد اللي درته؟؟
(( من يا اميره ؟)) صوت خالي من بعيد
- هذا عميد يا بابا
- تعال ياعميد
هربت من اميره وخشيت على UNCLE وهو قاعد في OFFICE متاعه ويقلب في الاوراق
- خااااالي كيف حالك
- اهلا ياعميد تفضل
وبعد كلام المجاملات قررت نفتح الموضوع
- يا خالي نبيك في موضوع
- خير ان شاء الله
- نبي نسافر
- وسافر من ماسكك؟
(( مش حنعلق عليها الكلمه ))
- نبي نسافر لبريطانيا نبي نقرا غادي لغه
- ههههههههه وانت عندك فيها الانجليزيه
- T HOW MY UNCLE …. T YOU LIKE ME
(( تي كيف ياخالي ... تي نعجبك ))
- هههههههههههههه يعطيك الخير
- PLEASE ياخالي .. معاش في قدامي حل JUST YOU
(( معاش في قدامي حل الا انت يعني ))
- اوكي توا انديرلك حل
- ثانكيو يا خالي يا BOSS يا BIG يا ORGINAL
((شكرا ياخالي يا زعيم يا كبير يا اصلي ))
...........
طلعت من حوش خالي بعد ما اثرت اعجابه بلغتي الانجليزيه وروحت لقطت اوراقي وثاني يوم عطيتهن له وقعد التفائل والطموح يكبر .. واحلامي الورديه كل يوم في الزايد
بعد اسبوعين اتصل بيا خالي وقالي
- عميد انت وين ؟؟
- جنب الحوش
- اسمع بكره تمشي تحجز اول طياره وتمشي لطرابلس
- WHY ??
- عندك (( انترفيو )) عشان التاشيرة
- عندي WHAT ياخالي؟
- مقابله يعني؟
- اهاا اوكي
- مقابله بعد بكره .. انت عدي من بكره لطرابلس عشان ثاني يوم تمشيلهم من قريب
- اوكي تمام
- راهو اهم حاجه الوقت عندهم
- لالا .. DON’T BE AFRAID
- شنو؟
- يعني ماتخافش... بس في مشكله ياخالي؟
- شنو؟
- ال MONEY ياخال
- خليتلك الفلوس .. توا تلقاهن عند امك
...................
...................
قلبي يدق من السعاده .. الموضوع ماشي زي الورد .. وخالي اللي نحسابه يكرهني طلع كويس ..المهم في الليل قررت اندير اجتماع عاجل في القهوة لحزب الجبهه الوطنيه للعواطليه والصياع
.........
قعدنا انا وفوزي البطه وحمد الحول والمطحون وطلبتلهم كل واحد شيشه ارقيله بروحه
خلاص الحكايه بحبحت معاي والوضع ماشي تمام
وقلت
- اخواني .. في هذه اللحظات المباركه .. انحب انقول .. اني خلاص حنتبرا منكم . .وهذه اخر مره تشوفوني فيها .. ومعاش نبي نشوف وجوهكم المقلبه لمدة سته شهور .. لاني خلاص ..
GOING TO بريطانيا
قالي الحول
- شنو؟؟
- ماشي لبريطانيا؟
- امتى ماشي ؟
- بكره ماشي لطرابلس وناخذ التاشيره وبعدها .. FLY TO بريطانيا
- شنو ؟
- انطير لبريطانيا يا جاهل ... انتو ماتعرفوش انجليزي شكلكم
(( نقول فيها وانا انفشك طبعا))
قالي مطحون
- حصلت التاشيرة ولا مازال؟
- بعد بكره ان شاء الله
- مرات مايقبلوكش
- تي كيف مايقبلونيش .. خالي امستف الوضع قدامي
- باهي وكان؟ مرات مايقبلوكش
- معقوله؟؟
(( شعرت بالخوف))

-

هم مايدوروش خالك من .. هم يركزو على حاجات اخرى
- LIKE WHAT ?
(( زي شنو؟ .. طبعا الانجليزيه واخذه مجراها معاي ههههه))
- زي الشكل .. الكلام .. الاسلوب .. شنو توجهاتك السياسية
- انا مع الديمقراطيه
- هههههههههه والله ؟
- مش فاهم .. شن نقول علموني يا جماعه
قالي فوزي البطه
- اول حاجه البس قرواطه
- ههههههههههههه قرواطه صار
هز حمد الحول راسه موافقا على كلام البطه والجديه باينه في وجهه
على اساس هو امقطعها وعارف جو السفارات من كثرة المقابلات
قالي مطحون
- ماتهزاش على كلامه .. البس حاجه نظيفه ومحترمه .. راهم يعدلو على الشكل
- وانا شكلي كنه ؟؟
مطحون : لا ماشاء الله ... براد بيت
البطه : سمح سمح .. ديفيد بيكام
حمد الحول : اتهبل .. علي ادريس
- من علي ادريس؟
الحول : جارنا
- وكنه علي ادريس .. شكله سمح؟؟
- لا
- باهي عليش قلت اسمه؟
- مش عارف قلته وخلاص
عطيناه كلنا نظرة حقد على غبائه وثقالة دمه .. لكن مش هذا موضوعنا
- يا جماعه خلاص توا ناخذ معاي لبسه كويسه ونفتلك الجو ماتخافوش . نعرف كيف نصرف
قالي البطه
- وكان مشيت وين تبي تسكن ؟
- مش عارف .. بس الاغلبية يمشو يقرو في هذه .. شن اسمها .. ايوه .. مانشستر يونايتد
- انا نعرف واحد صاحبي يقرا في ارسنال
هزبنا مطحون
- يا اغبياء هذه اسماء اندية كورة مش مدن
نظرنا انا والبطه لبعضنا وضحكنا ... على الاقل طلعنا اغبياء مع بعضنا ماحد يشمت في حد
بينما حمد الحول .. كان ساكت وهادي بشكل يخوف مش عوايده ..
نحسابه مازال زعلان عشان موضوع ((علي ادريس))
قتله
- منوووور يا الحول ياطيري يا اصلي
- بوجودك
- كنك ساكت؟
- شي نفكر .
- في شن تفكر ؟
- في طرابلس
- كنها طرابلس؟
- لما تمشيلها يالطياره..تخشلها بجواز سفر .. ولابطاقه بس؟
((النماذج اللي زي حمد الحول هن اللي يخلن الواحد يفكر في الهجرة))
:
طارت الطيارة من مطار بنينه الدولي .. ايام كان عندنا مطار
الى مطار طرابلس الدولي .. ايام كان عندهم مطار
ووصلت لطرابلس .. ومشيت للفندق وحجزت ليله وكنت مستعد للمقابله وامجهز روحي
ثاني يوم خذيت تاكسي وركبت مع سواق التاكسي
وقعدنا نهدرزو
- وين تبي خونا
- السفاره البريطانيه
- شني امسافر شكلك ؟
- والله انشاء الله ياخيي عندي مقابله اليوم ويستر الله
- شرقاوي يا شاب؟
- اها شرقاوي
- بالله من وين في الشرق؟
- بنغازي
- اووو بنغازي .. والله عندي فيها هلبا ذكريات غادي
- باهي كويس
- بالله نبي نسالك على واحد غادي بالك تعرفه؟
- منو ؟
- ولد صاحبي اسمه احمد يسكن في السلماني
- ههههههههه احمد ويسكن في السلماني .. هذه نفسها ياتاجورا ماشفتش عمر .. شن لقبه؟؟
- لقبه لقبه .. استنا خليني نتذكر لقبه شنو .. ايه ايه لقبه العقوري
- احمد و عقوري ويسكن في السلماني ؟؟ ههههههههه
- تعرفه؟
- ازبطته ايه ايه عنده خوه اسمه محمد البرعصي؟
- كيف يعني ؟؟
- هههههههه نبصر نبصر معاك خوي .. لا والله مانعرفه
- صار ماشي لبريطانيا
- ايه ايه (( نقلد في لهجته))
- باهي وين بتسكن غادي ؟
- مانعرفش ماعمريش مشيت
- رد بالك تسكن في توتنهام ... تركينه كلها شعابيط وخنبه
(( يعني كلها شلتت وسراقه ..و اكتشفت بعدين ان توتنهام اسم نادي في لندن لكن السواق ايفلم عليا ))
- وانت ماشي قبل ياخوي ؟؟
- تي اييييه ياخوي ايه ... غير الوقت بس اللي خلانا نخدمو تاكسي من قبل خوك ماشي لمالطا وايطاليا وتركيا وبريطانيا
- قصدك مشيت لبريطانيا قبل
- تي ايه .. دوه قديمه بكل
- وكيف درت في المقابله ؟
- تي لا زمان .. ماكانش في مقابله .. نمشو طول هكي
(( عرفت ان السواق كذاب وخليته يحكي بروحه ))
وصلت للسفاره وخلصته السواق .. وحانت اللحظه الحاسمه
:
:
خشيت وقعدت نراجي في دوري .. ونشوف في ليبيا كلها جايه عندها مقابله .. كلها ناويه الرحيل
تعرفت على شاب جاي من ترهونه حتى هو وحسيته قريب ليا في التفكير وفي الجو
وقعدنا جنب بعضنا ونضحكو ونشفطو .. ونفهمو في روحنا شن نقولو جوا
:
حان دوري وخشيت للمكتب
اول ماخشيت القيت راجل و بنت قاعدين عالمكتب
البنت كان باين انها ليبيه .. بس الراجل هو اللي استغربت فيه نحسابه ليبي في الاول لانه اسمر تقول افريقي
قالي الراجل
- WELCOME SIR ..
طلع بريطاني الراجل بس انا مانحسابش انه بريطاني
قتله
- مرحبا والله
نسيت نقول (HELLO )) مع انها ابسط كلمه
قعد يسال فيا في اساله .. حاجات فهمتها وحاجات لا .. واللي مانفمهاش اترجمها ليا البنت وهي طول الوقت اترجمله في كلامي .. مع اني كنت نحكي انجليزي صافي ..
ممكن هو مايسمعش ولا مايعرفش انجليزي زي مانعرفه انا
في النهايه قالي
-OK THANK YOU FOR COMING
(( شكرا لقدومك))
حسيت اني تمام واعجبته وقررت نساله
- WHEN تاشيرة GO OUT
(( امتى التاشيرة تطلع؟ ))
قالتلي الموظفه
- مازال توا نتصلو بيك ونقولولك قبلوك ولا لا
- باه تمام شكرا اختي
وقررت نشكر البريطاني وانديرله جو عشان ايحبني ويقبلني
- THANK YOU MY BIRD
(( شكرا ياطيري ))
-WELCOME SIR
- ARE YOU FROM BRITANIA

(( ان

ت بريطاني ؟ ))
- YES I AM
- BUT YOU LOOK NOT ORIGINAL BRITANIA
(( بس شكلك مش بريطاني اصلي ))
- WHAT?
- YOU LOOK SAY FROM HERE ..
((شكلك تقول من هنا ))
- I DON’T UNDERSTAND SIR?
(( شكله مش فاهمني ))
- MY FRIEND KHALIFA … HE IS LIBYAN .. HE IS BLACK TOO .. JUST LIKE YOU
(( صاحبي خليفه .. هو ليبي .. حتى هو اسمر .. زيك ))
مش عارف لما قلت كلمة BLACK الموظفه الليبيه دارتلي نظرة وحركه بعيونها وفمها كانها تبي تقول
(( لالالا شن ادير شن تقول مش هكي ))
شكله البريطاني فهم كلمة BLACK وحسيتها وجعاته .. قعدت نبي انرقعها
- NO NO .. KHALIFA IS MAN MAN .. I MEAN ORIGINAL MAN
(( لا لا خليفه راهو راجل راجل .. راجل اصلي قصدي ))
- OK THANK YOU SIR .. YOU CAN LEAVE
(( اوكي شكرا ياسيد .. تقدر تمشي ))
حسيته نقم عليا .. قعدت نبي نوضحله وانا ماشي شور الباب اني مش عنصري ولا حاجه وقلت
- I LOVE BLACK MENS
(( انا راهو انحب الرجال السود ))
انا كان قصدي شريف لكن السيد البريطاني انصدم وفتح فمه وعيونه توسعو من الكلمه .. مش عارف شن فهم بالزبط .. والبنت الليبيه حطت ايديها الاثنين على وجهها من كثر ماحشمتها قدام الراجل
فتحت الباب نبي نطلع وعطيت البنت نظرة اخيره وقلتلها وانا طالع
- بالله عليك فهميه وراس خيتي
سكرت الباب وانا وجهي احمر وعرق ومتخزرط
جاني الترهوني وقالي
- شن صار طمني؟
- يستر الله ياراجل شكلي لبزتها
- شن سالوك؟
- مش عارف .. جايبيلي واحد شكله حتى انجليزي مش فاهمه
- معقوله؟
- اسمع اسمع .. مهما يصير ماتقولش BLACK مهما يصير
-علاش؟
- هكي وخلاص اسمع كلامي
- باه اوكي .. يستر الله
- هيا اوكي ان شاء الله معرفة خير
- تي وين ماشي؟
- للفندق .. ونبي نمشي نحجز عودة
- باهي برا .. توا انجيك للفندق بعدين
- اوكي
في العشيه جاني الترهوني وزدنا تعرفنا على بعضنا وقعدنا اصحاب وطلعنا وهيجنا مع بعضنا .. وحلف اني نمشي معاه لترهونه ومشينا ثاني يوم وقعدنا يوم ماننساه بكل في مزارع ترهونه وغيرلي جوي بكل ووصلني بعدها لعند مطار طرابلس ودعته وقتله ان شاء الله اللقاء الجاي في الطياره اللي ماشيه لندن
....
رجعت لبنغازي ومانبيش انطول عليكم جاني اتصال بعد كم يوم .. وتم رفض التاشيره لاسباب مجهوله .. وحتى صاحبي الترهوني رفضوه حتى هو رغم انه ماقالش كلمة BLACK
و تحطم حلمي .. وعرفت ان حظي BLACK ومش حيصير منه .. وكملو الفلوس اللي عطاهم ليا خالي .. ورجعت للقهوه الحزينه انا و فوزي البطه .. وقعدت نشكيله من الوضع الBLACK .. قالي
- خلاص يا عميد فوتها
- لعند امتى بس يابطه؟
- لعند مايفرجها ربك .. اشقا بقرايتك وفوت السفر توا
- ياراجل حتى مصر كويسه يشكرو فيها لكن انا امفلس توا
- تدبر ياراجل .. خليها مع الوقت
- والله وكان مشيت لبريطانيا راهو توا (( انورور )) بالانجليزي
- تقدر تتعلمه حتى هنا الانجليزي مش موضوع
- ايييييح
- والله .. اهو انا خشيت من قبل لدورات انجليزي هنا والله استفدت منها عادي
- قصدك عندك انجليزيه انت يا بطه؟
- اوف كورس يامان
- ان شاء الله خير ياراجل
:
جا المصري متاع القهوه وقاللنا
- حسابكم 3 دينار ياباشاوات
حطيت يدي في جيبي نبي نخلص .. مسك يدي فوزي البطه وقالي
- DON’T PUSH .. I WILL PUSH
(( ماتدفعش .. انا توا ندفع ))
....
خلاصة الوضع
صحيح اني مامشيتش لبريطانيا .. لكن في الاخير كسبت معرفة راجل اصلي وكسبت زيارة مدينة ليبية جميله .. والله حتى مزارع ترهونه ماعندك ماتقول فيهن ..
ومنورين
:
:
النهاية

= أقسم بالله ما خونتك

- طب افتحلي موبايلك

= أقسم بالله ما هخونك تاني

"لكنّنا كنّا أصدقاء.. والأصدقاء لا يجدون الكثير من الصعوبة في صناعة الأحاديث والحكايات.. والطرائف.. لذا نحن لم نعد صديقين جيدين.. ولا حتى صديقين فقط.. منذ اللحظة التي فقدنا فيها القدرة على صناعة الحديث.. منذ اللحظة التي صارت أحاديثنا إجابات على مقاس الأسئلة فقط." 💜

لو كان خيرآ لبقى ، لكنه خرآ فمضى 💙

كُلهم قرفة يابسة ، إلا انتِ سينابُون❤️🔥🐸

ايام القراية كنا خايفين من الامتحانات وايام الامتحانات خايفين من النتيجة وبعد النتيجة خايفين من التخصص ونهار احرف عالخوف لاامتي بيستمر ☻💔

انت لستَ حزيناً..ولست كئيب ولا ما يحزنون
انت فقط لا تملك المال💸

رسبت في بعض المواد فى الجامعة بينما نجح صديقي بها ، صديقي الآن مهندس في شركة ميكروسوفت وأنا أملك الشركة

_بيل جيتس

الدرس المستفاد معش تقراء واسقط بس فكره كيف ولا هو صاحب الشركه مش شورنا

بس بيل جيتس مش ليبي واضح من اسمه يعني🌚
والليبي لو بيقرا مش حيخدم أما لو قري واجتهد وصارع الحياة وقاوم وهكي هديكا حاجة تانية..بس مش حيخدم برضو🌚❤️

شت🌚🤦‍♂💔😂

شكلي مو مثل الاشوفه بالتصوير.
ولاصوتي بالتسجيل
ولا اجاباتي بالامتحانات نفس الي قريتها
يااخي منو اني؟🐸🌚

خالد