الممشى العريض♥️🎼

‏يقول من التقط الصورة :- هما زوجان، هو أعمى وهي تقرأ له أراه مشهد يختصر مفهوم أن يُكمل أحدهم الآخر 💙🦋

💜✨

594 viewsfatima abd elmajed, 22:21

صديقَتي التي أُحِب.. جداً .

عاشَت قصة حب إستمرّت سنوات ، ت قريباً ما لقيت بت بتحِب بكل القُدرة الفيها زي ما عملت هي ، كانت بتقدّم بتقدّم بتقدّم رغم إن المقابل شحيح جداً .
ما حصل لاقيتها الا و كان في عيونها دموع ، دموع مدسوسة جوّة مدارياها بألف ضحكة زيف.
ياما سمعت ما بشبهِك
ياما سمعت دا ما طريقِك بس مع كل كلمة كانت بتتمسك أكتر.
رمضان الفات قالت لي يا رغَد أنا في ركعة في التراويح نسيت أدعي ليه فيها.. بكييت.
كان دايماً بستهلكها ، بياخد كل طاقاتها في المشاكل والخلافات وظروفو الماعايز يصلحها ، وكانت بتسكت بتصبر ، بتغفر لحد ما ضربت لي الليلة..
أول ما سمعت صوتها قلت ليها صوتك فرحاان ، مالك عقدو عليك ؟
قالت لي: إنفصلت ، إنتهت القصة و أنا هسة مبسوطة ، مرتاحة وفخورة بنفسي شديد ، ما حيجي يوم أندم و لا أقول كان مفروض أعمل حاجة ،عملت كل حاجة وهو ما قدّم ولا حاجة ، لحد ما إتسرب من جواي.. شوية شوية وعلى مهلتو مات تدريجياً ، وهسة مشى ، و أنا يادوب بديت ، بديت أشوف الحياة الكان محصورة فيه ، أعرف ملامح الناس كويس ، أضحك للبحبوني بدون أكون شايلة جواي هم ، و أحقق أحلامي الحكيتها ليه وقال لي " صعبة وبعيييدة وماقدرتك " .
كنت حاسة بيها جداً وهي بتتكلم معاي ، اول مرة تكون ضاحكة كده ، من جوووة ، منتصرة وروحها خفيفة..

*الخلاصة:
إنها تحبّك فدا يعني إنها محتاجة سند ، تميّل عليه وقت الدنيا تضيق بيها ، ما يضيق عليها الدنيا ، إنها تصبر عليك فدا بيعني إن جواها حب وعشم كبير ، بزيد وبينقص مع الزمن.
كل كلمة إتقالت ، كل موقف سيء ، كل غصّة نامت بيها وكل وجع كنت مسؤول عنو ، كان بنقص من عمر علاقتكم ، وبيهدّم فيك جواها
لحد ما تجي فترة تبقى فيها المكالمة وعدمها واحد ، خلي بالك وعدمها واحد ، المشاكل وعدمها واحد..
لحد ما تموت جوّاها ، بكل الصبر الكان والقصص الإتحكت ، تطلع منها زي النفس الكان مخنوق كده. وتبدأ تتنفس طبيعي بدونك.. لأنك نسيت ببساطة إنو
" الحُب طاقة و كل طاقة.. ممكن تُستهلك وتخلص "
و نرجع نقول سبحان الله زارع الشعور ونازع الشعور ، سبحان المسّخ في عيوننا ناس كانوا هم عيوننا ، و خلانا نمر بجنبهم كإننا ما بنعرفهم ، كإننا ما كنّا بنحاف عليهم أكتر مننا يوم ، ولا كان إسمهم مدسوس جوّة دعواتنا..

#رغد_عبدالرحمن

745 viewsfatima abd elmajed, 22:40