ዋልድባ ገዳም

ከጋብቻ በኋላ ግንኙነት የሚከለከለው ለስንት ቀን ነው?

በቤተክርስቲያን አስተምህሮ ተክሊል እና ሰርግ የተለያዩ ናቸው። ተክሊል ጋብቻው ሲሆን ስርጉ ደግሞ የተክሊሉ በዓል ነው። በቀደመው የቤተክርስቲያን ትውፊትም ተክሊልና ሰርግ በአንድ ቀን አይፈጸሙም ነበር። ቤተክርስቲያን ተጋቢዎች ከጋብቻ /ተክሊል በኋላ ለ40 (አርባ) ቀናት በጾምና በሱባዔ ቆይተው ሰርግ ማድረግ አለባቸው የሚል ትውፊት አላቸው።

የፍትሐ ነገስት አንቀጽ 24 ትርጓሜም "በጋብቻ ጊዜ የሚደረገው ሥርዓት ከዘረዘረ በኋላ እሱ ከአባቱ ጋር እሷም ከእናቷ ጋር ሲተኙ ይሰነብታሉ፤ ቊርባኑን በሚሹበት ጊዜ እየሔዱ ይቆርባሉ፤ አርባው ቀን ሲፈጸምም ሰርጉን ያደርጉላቸዋል" ይላል። ሙሽሮቹ ተክሊል ተፈጽሞላቸው አሰቀድሞ ቆርበው ከወጡ በኋላ ወደየቤታቸው ይሔዳሉ ቢል እሱ ከአባቱ ጋር ሴቷም ከእናቷ ጋር እየተኙ ለአርባ ቀናት ይቆያሉ።

ይህስ ከጋብቻ በኋላ ተለያይቶ መኖር አይገባም ወደ ወንዱ ቤት ይሔዳሉ ብሎ እሱ ከአባቱ ጋር ፤ ሴቷም ከእናቷ ጋር ( ከእናቷ ጋር የሚለውን የሙሸራውን እናት ለሙሽራይቱ አደርጎ መናገር ነው) እየተኙ ይሰናበታሉ ማለት ነው። በአርባ ቀን ውስጥ ሙሽራው ቤተስብ የማሰተዳደርን ሥራ ከአባቱ፣ ሙሽራይቱ ልጅ ወልዶ የማሳደግን ተግባር ከእናቷ (ከሙሽራው እናት ) እየማሩ ፣በመከከሉ እየቆረቡ ይቆያሉ።

በአርባኛው ቀን ሰርግ ይደረግላቸዋል። ይኽውም ጌታ ሕሙማነ ሥጋን በተአምራት ፣ ሕሙማን ነፍስን በትምህርቱ እየፈወስ ከቦታ ፣ ቦታ እየተዘዋወረ ከማሰተማሩ በፊት በገዳመ ቆሮንቶስ 40 ቀንና ፣40 ለሊት እንደጶም፤ ሐዋርያትም ይህን ዓለም ዕጣ በዕጣ ብለው ተከፋፊለው ወንጌልን ለማሰተማር ከመውጣታቸው በፊት 40 ቀናት እንደጾሙ አብነት በማድረግ ነው።

ሙሸሮች 40 (አርባ) ቀናት የሚለያዬበት ምክኒያት ጾም ጸሎት አድርጎ፤ ሥጋ ወደሙን ደጋግሞ ተቀብሎ ትዳርንና የሚወለደውን ልጅ ለማስባረክ ነው።

እንዲሁ አድርገው ተጋብተው የተወለደው ልጅ መንፈሳዊ ቢሆን እንደ እንጦስ እንደ መቃርስ ፣ ሥጋዊ ቢሆን እንደ ቆስጠንጢኖስ እንደ አኖሬዎስ ይሆናል ፣ እንዲል ፍትሐ ነገሥት ትርጓሜ አንቀጽ (24 ገጽ 323 ) ።

ሰርጉ ከተክሊሉ የመለየቱ አሰፈላጊነቱ ደግሞ ሥጋ ወደሙ ተቀብሎ ፎቶ ለመነሣት ከመንገላታት፣ በድካም ምክኒያት ከሙወጣው ላብ ለመጠበቅና ለቅዱስ ቊርባን ሊሰጠው የሚገባው ክብር ለመስጠት ነው። መለያየቱን ምክንያት በማድረግ ሰርጉን ፊጽሞ ዓለማዊ ማደረግ ፣ ከልብስ መራቆትና ዘፈን ግን ተገቢ አይዴልም ።

በስርጉ ዕለት ለክርስቲያን በተፈቀደው መጠን ማጌጥ ፤መደሰት ፤መብላትና መጠጣት አልተከለከለም። ለሌሎች ሕይውት ሓላፊነት ለመውሰድ የሚፈጽሙ ምሥጢራት በጾም በጸሎት ፈቃደ በእግዚአብሔር ሊጠየቅባቸው ይገባል።

ጋብቻ ደግሞ እንዲ የአንዱን ሸክም ለመሽከም፥ልጅ ወልዶ ለማሳደግ የሚገጥም ምሥጢር ሰለሆነ ተጋቢዎች ለአርባ ቀናት እግዚአብሔር ደጅ እየጠኑና እየተማጸኑ መቆየት ይገባቸዋል።

40 ቀን እስኪፈጸም በጾምና በሱባኤ የሚሰነብቱትም እንደ ፍትሐ ነገሥት ከወላጆቻቸው ጋር በመተኛት ነው ። በአሁኑ ነባራዊ ሁኔታ ከእናት አባት እየተኙ ማሳለፍ የሚቻልበት ዕድል ባይመቻች እንኳን ለፈተና በማያጋልጥ ሁኔታ ማሳለፍ ይገባል።

በዚህ መሰረት በቤተክርስቲያን ትውፊት ጋብቻ ከተፈጸመበት ዕለት እስከ ስርጉ ዕለት (ለ40ቀናት) ግንኙነት ማድረግ አይቻልም። የቤተክርስቲያን ትውፊት ይህ ቢሆንም አሁን ያለው ሥርዓት ስሕተት ነው ማለትም አይደለም ።ይኽውም ተክሊልና ስርግ አንደ ቀን የሚፈጸም ቢሆንም ተዋህዶተ መርዓዊ ወመርዓት (በጥምቱ ትውፊት ጫጉላ) በዕለቱ ሰለሌለ ማለት ነው ትርጓሜ ወንጌል ስርግ ተዋህዶተ መርዓዊ ወመርዓይ የሚደረግበት ነው። ሰለሚል ስርግ ከተክሊል / ጋብቻ ዕለት የተለየ መሆኑ ግልጽ ነው። ምክኒያቱም ሥጋ ወደሙ ተቀብሎ በዚያው ዕለት ግንኙነት ሊደረግ አይቻልምና። በቅዱስ ቁርባን የሚገባው ጋብቻ ጥንቃቄ ሊደረግለትም ይገባልና። ቅዱስ ቁርባን ከተቀበሉ በኋላ ለሁለት ቀናት ግንኙነት ማድረግ የተከለከለ ነው።

ሁለት ቀን ማለት ለአርባ ስምንት ስዓት ማለት ነው። በምሳሌ ብናየው እሑድ ቅዱስ ቊርባን የተቀበሉ ባልና ሚስት መገናኘት የሚችሉት ዕለቱ ጾም ካልሆነ ሐሙስ ነው ማለት ነው። ሦስተኛው ቀን ማክሰኞ ቢሆንም ማክስኞ ለረቡዕ አጥቢያ የሚቆጠረው ወደ ረቡዕ ሰለሆነ ጾም ነው።

የሁለት ቀን ክልከላው መሠረቱ በሉቃስ ወንጌል ካህኑ ዘካርያስ ቤተ መቅደስ ሲያጥን ብሥራተ ቅ.ገብርኤልን ስምቶ አግልግሎቱን ጨርሶ ወደ ቤቱ ከሔደ ከሁለት ቀናት በኋላ ሚስቱ ኤልሳቤጥ እንደጸነስች ሰለሚናገር በዚሁ መሠረት ነው።

አንድምታ ወንጌሉ ከሁለት ቀን ኖሮ ተገናኝቷታል። ዛሬም ሕጋውያን ሰለ ሥጋ ወደሙ ክብር ለሁለት ቀን ኑረው መገናኘት ይገባቸዋል፤ በማለት በግልጽ አሰቀምጦታል።

ወስብሐት ለእግዚአብሔር
ወለወላዲቱ ድንግል
ወለመስቀሉ ክቡር ለዘለዓለሙ አሜን!

https://www.facebook.com/sost.philip

906 views14:52