الجزء الثالث/ البارت الأول


كُلّ الخُصال التي تَحمِلها أنتَ تُجبرني على الإطمئنان
عِشقكَ
رِجولتكَ
غِيرتكَ
ضِحكتكَ الهادئة وَ صَوتكَ العَذب
كُلّ شيء فِيكَ يؤكد لي بـ أنني أحببتُ رَجلاً
لا بَل أحببتُ خِيرة الرِجال وَ سيِدهم
فَـ ليَطمئن قَلبي إذن بِحضرتكَ فـ أنا اليوم اميرة النِساء بكَ وَ
مَعكَ وَ مِن أجلِكَ فَقط رَجُلي . ✍🏻
___

ورد.. رجعت للواقع هذا هوَ حقق حلمها مثل مـ وعدها بس
الفرق بنت عدوه الدتمرجح حبيبته مو بنته

من حسيت على فرحتها قويت دفعتي الها وكلما اسرع أكثر
كلما هيَّ تضحك من أعماق گلبها أكثر وأكثر ، فجأة نظر رفع
إيده يأشر لي أوگف ، لزمت الحبل وگفت المرجوحة اجى صار
گبالها باوع عليها يضحك و حط إيده داخل جيوبه

نظر.. ماما خالو ناصر يگول حققت لأمك كل أحلامها وصار
الوقت حتى هيَّ تحقق حلمي بيها ، ورجع وصاني اگولچ هوَ
يگول : قمري هل تتزوجيني

نزلت رجلها ؏ الأرض بـ تعب ورفعت إيدها على راسها

عطاء.. ديلا بلا شوف شديعلم الطفل ، أف منك ناصر

نظر.. اني مو طفل اني صرت رجال

عطاء.. فوت جوة ماما ، فوت جوة

نظر.. شنو شكلچ ممصدگة اني كبرت ولسه عبالچ طفل لا
عيني اني كبرت حتى خالو طلب يتزوجچ مني لأن گال انتَ
رجالها الوحيد واني لأن رجالچ وافقت تتزوجون وحتى گلت له
گبع وأخذ لأن تستاهلها

عطاء.. صخام الصخمچ عطاء ولك انتَ منين جايب هذا
اللسان ، بعد ما ظل عليَّ غير نظر أفندي

عشق.. هههههه ليش أخته منو لو نسيتِ ماما

ورد.. سدي حلگچ ما صدگتِ تحچين عليَّ ، بعدين على شنو
مستغربين ترى نظر بالأول متوسط يعني صدگ صار رجال
ليش مستهينين بيه لـ هالدرجة

نظر.. اي عفية گوليلهم اني صرت رجال والكلمة كلمتي بهذا
البيت واني گلت لخالو ناصر ماما تتزوجك يعني تتزوجه ممنوع
تعترضين عطاوي ، سامعة

سحبت النعال من رجلها سمطته بيه ..

عطاء.. امشي لك ابن الكلب أخلص من اختك الشيطانة
تجيني انتَ ، وأموتك والله إذا بعد تحچي بـ هالموضوع ويا
خالك تسمع لو لاااااا

نظر.. حرامات المرجوحة بيچ لعلمچ تعبنا يلا نصبناها بس
هسه اگول لخالو يجي يشيلها واليوم ابات يمه ما اجي بعد لـ
هالبيت إلا تسمعين كلمتي وتقبلين تتزوجيه

عطاء.. عضت أصبعها حيل : ورد ورد ااخخ من هالورد هذا
لسانه الطويل تعلومها خربت الولد بنت النعال

ورد.. شماعة مصايبكم ورد ، شكو شي خايس تشمروه بـ
راسي عبالك ممخلفة غيري ، روحي ماما منچ لله على گولة
شيرين هوَ الياخذ حقي منچ

النعال الثاني صار من نصيب عشق لأن واگفة بـ ظهري وبس
شفت ماما رفعته طفرت من مكاني اجى بيها

عشق.. الله يطيح حظچ ورد

ورد.. رسالة من تحت الماء ، سوي تاك للمقصود

عشق.. عزة بـ عينچ ان شاء الله ، والله ماما مو قصدي

نظر.. امشي رمانة بعد مالنا عيشة هنا لأن محد يقدر مواهبنا
غير خالو ناصر عود من ماما توافق عليه نرجع

ورد.. يلا امشي حبيبي صح لسانك رجالنا المعدل

عطاء.. اخ يمة راح يجلطوني هالاثنين

ورد.. لا والله انتِ الـ راح تجلطين أبو حيدرا المسكين ادري
متگوليلي على شنو شايفة نفسچ عليه ترى مليون وحدة غيرچ
تتمناه بس هوَ الله يسلمه أحول مدري أثول حشاه ميشوف
غيرچ عبالك خلقچ وكسر القالب

اي افتهمنا حلوة بس مو لـ هالدرجة سحل نفسه عليچ شعر ؏
الحيطان ، بيت ملك ، أثاث راقي ، مسواگ ومصرف يوميا ،
مرجوحة بالحديقة ، ااا بعد شنو بلا !! ها اي تذكرت يصبغ بـ
أبنچ ويرجع ليورة على ابو صرت رجال حتى يأثر عليچ ، ادري
وين لاگية هيچ عريس لقطة ترى والله ميفيد العناد وياه لأن
هوَ راسه يابس أكثر منچ ومستحيل يمل أو يجوز عنچ فـ شنو
وافقي وريحيه وريحي شعب العراق كله وياه ترى ملينا بـ مكانه
مدري شلون متحمل عنادچ

عطاء.. تنهدت بـ تعب ونهضت من المرجوحة : ورد أمي
الموضوع مو مال شقى خصوصاً گدام نظر شغلي عقلچ
واعرفي شلون تسولفين ترى تعبتيني كلش

ورد.. منو گلچ داتشاقى ؟! لا والله داحچي بكامل قواي العقلية
لأن ما اتمنى شي أكثر من زواجكم بعد هالعمر

عطاء.. هذا الشي ميصير ، ميصيييييييير فـ لحد يرجع ويفتح
الموضوع وياية مرة ثانية حتى لا أتخبل عليكم ترى البيَّ كافيني
لتضغطون على أعصابي

ورد.. اي اي افتهمنا والله بس لتعصبين ليصعد ضغطچ

رادت تدخل للبيت وگفها صوت نظر ..

نظر.. وخالو شنو راح اجاوبه ماما ترى دينتظرني

عطاء.. گول له أمي تگول الله يريح گلبك غيرها لتحچي

- بس دخلت باوعت لي عشق بـ عصبية : شبيچ هاااااا شبيچ
تخبلتِ ليش دتأذيها و بيوم عيد ميلادها

- ليش شـ سويت اني يمعودة

- شنو عبالچ الموضوع عدها سهل ، كلكم أنتم الواگفين هنا
تتصورون يعني رفضها للإنسان الوحيد الحبته بحياتها ورباها
على إيده شي هين على گلبها ، محد شافها العام مثل هاليوم
شلون انهارت گدامه غيري اني ، اني بس الشفت وعرفت
شنو يعني ناصر بگلب عطاء ورغم كمية الحب واللهفة
والحسرة التحملها اله بصدرها بس مجبورة ترجع وترفضه مرة
واثنين وعشرة علمودي وعلمودكم وعلمود مرته وبيته وولده
وحياته وأبوكم ، أما عطاء توجع

ت ما توجعت محد
يحسسسس

حچتها تمسح بـ دموعها الصارت تنزل بـ غزارة ..

- ناس متريدها توافق علمود لتخرب بيته وتأذي مرته وناس
ثانية تشوف رفضها قمة بالأنانية وتستخسر بيها حب ناصر
ويشوفون هوَ حبها أكثر مما حبته لأن هوَ مُصر ؏ الزواج وهيَّ
مُصرة ؏ الرفض ، بس اكو واحد بيهم فكر ويا نفسه هالمرة
بشنو گاعد تحس ، اكو واحد جرب يحط نفسه بمكانها ويتجرع
وجعها بعد ما انحرمت من الإنسان التعتبره أهل مو بس
حبيب ويرجع بين ليلة ويوم يصير گدامها بـ حياة كاملة من
زوجة لأولاد لمناصب أما هيَّ ما طلعت من هالدنيا غير بينا ،
لا عاشت بـ استقرار ولا حضت برجال يحترمها ويدللها لا
وكفخت بيها الدنيا گدام اليسوه والميسوه بس حتى تظل
واگفة على رجلها وتگدر تعيشنا وتوصلنا للشي الوصلنا له
اليوم بـ فضل رب العالمين ومن ثم قوة تحملها واصرارها على
المقاومة علمودنا

كافي ارحموها اترجاكم ارحموها ، هيَّ من ترفضه تموت من
الداخل تعرفون شنو يعني تموت ، متحتاج بعد لا لنصيحتكم
ولا لملامتكم كافي عليها وجع گلبها كافي عليها غيرتها عليه
من حياته ولكم كافي عليها حسرة أحلامها الصارت لغيرها
گدام عيونها وهيَّ تتفرج

نبض.. انتِ الكافي لتبچين مو زين على گلبچ

ورد.. رفعت إيدي امسح دموعي المتقبل تتوقف : مو قصدي
ازعلها والله بس تمنيت توافق لأن اعرف حجم حب ناصر
بگلب عطاء القمر لأي حد واصل فـ ما ردت يبقى الرجال
الوحيد الحلمت بيه وفتحت عيونها وهيَّ بحضنه وعلى إيده
يظل حسرة بـ گلبها

عشق.. لازم تعرفون مو كل شي نتمناه نگدر نحصله ولا كل
أحلامنا مكتوب عليها النجاح ، اي نعم عدم زواجهم رغم
هالحب العظيم اليجمع بيناتهم صعب على خالو مرة وصعب
على ماما مليون مرة بس هذا قدرهم واحنه لازم نحترم قرار
الطرفين سواء بإلحاح خالو على الزواج أو إصرار ماما على
الرفض يعني لا نگدر نمنع خالو عن أنانيته بيها ولا نگدر نجبرها
على شي هيَّ تشوفه مو من مصلحة الكل لأن مثل متعرفون
أمكم متفكر غير بالعالم أما نفسها أخر همها

ورد.. واني لأن ادري آمنا مـ تفكر بـ نفسها حبيت أفكر عنها
گلت بلكي هيچ تعرف احنه مو ضد فكرة زواجهم ويخف عنها
الحمل شوية من ناحيتنا على الأقل

عشق.. تعرف احنه مو ضد زواجهم بس بـ نفس الوقت تعرف
كلش زين سبب موافقتنا هيَّ لأن بكل بساطة منريد نحرمها
من حب حياتها أما ماما متفكر هيچ تفكر بموقف نبض ويا
زوجها وبموقفي ويا نيار وبصورتنا گدام الناس لأن حتى لو كان
تفكيرهم خطأ بس بالنهاية هذا هوَ المجتمع واحنه عايشين بيه
ومتعايشين وياه وتعرفون ماما تموت ولا تسمح الواحد يمسنا
بكلمة وحدة مو عاد هالكلمة تلوحنا بسببها

نظر.. اني رايح يم خالو بالليل ارجع

عشق.. نظر

نظر.. ما راح احچي شي لتخافين

حچاها وطلع ، دخلنا للبيت تحولت فرحتنا لقهر واضح على
الجميع بحيث الضحكة اختفت من المكان والجو صار كئيب
بشكل مينوصف ، گعدن خواتي بالصالة حتى ما بيهن بعد
يكملن الحلويات ، شوية وگمت لغرفة ماما ردت ادگ الباب
ترددت اكيد مراح تسمح لي أدخل عليها واني أموت إذا مـ
عرفت شديصير وياها جوة

نزلت مقبض الباب بـ هدوء ومديت راسي ، مـ موجودة على
الچرباية دخلت اتسحب على أطراف أصابيعي بس تقربت من
الباب الداخلي سمعت صوتها دتشهگ من نص گلبها ، روحي
انسحنت من القهر اكيد مگابلة شعر خالو وگاعدة لأن احنه
وبدون منشعر فتحنا جروحها من جديد باليوم اللي المفروض
يكون احلى أيام حياتها بس للأسف ممكتوب لها الفرح

طلعت بنفس الهدوء الدخلت بيه ، سديت الباب ورحت
غسلت وجهي من القهر صار مثل الجمر بحيث أحس الحرارة
صارت تطلع من بين عيوني ، شوية وهدأت

رجعت للصالة البنات على نفس الكأبة ، تأفأفت بضجر

ورد.. گومن عاد ترى طگت مرارتي من وضعية البيت

عشق.. انتِ وين رحتِ

ورد.. شفت ماما

نبض.. وشلونها

ورد.. شلونها يعني شـ تتوقعون و هيَّ مجبورة ترفض روحها
علمود غيرها ، المهم كافي گومن خل نكمل الحلو مو مثل
العام يضيع علينا ميلادها بسبب هالموضوع لا اليوم نجبرها
تطلع وتحتفل ويانا لأن لو هيچ لو ماما تظل للصبح على بچية
وحدة هاي إذا ظلت عايشة

عشق.. اسم الله عابت ، عضي لسانچ بسرعة

ورد.. هذا الواقع تفاحة يعني بعد كل القهر الشافته طول
حياتها گلبها يتحمل قهر رفض ناصر اكيد لا فـ لازم احنه
نتصرف ونطلعها من الهم اللي هيَّ بيه حالياً

نبض.. كلام ورد صح شفتِ العام شـ صار بيها إذا هسه همْ
تركناها على راحتها يمكن گلبها ميتحمل للصبح ، يلا گومي
ضروري نتحرك حتى تنشغل عن قهرها بالحفلة ما اگولكم
تنسى بس تتناسى ؏ الأقل

عشق.. والله إيدي متاخذ ؏ الشغل ، ضايجة بـ شكل

نبض.. منو غيرچ يعرف للحلو ، يلا عادي بس وجهينا واحنه
نشتغل المهم كل شي يجهز بعد الصلاه مباشرةً

ما حچت شي گامت للمطبخ قبلنا ، أذن اجى نظوري توضى و
وگف يصلي بالصالة بس كمل سأل على ماما بالگوة منعته
يروح لها ، احنه همْ سألناه على خالو گال بلغته بـ جملة ماما
الله يريح گلبك ، بس سمعها خله وطلع من البيت حتى ما
سألني عن ردة فعلها بعد ما شافت ا

لمرجوحة لأن هوَ نصبها
مخصوص علمودها

رجعت الكأبة سيطرت علينا بسببه ،
منا ماما ومناك هوَ
بـ منو لازم نفكر وعلى منو نزعل ونضوج مـ ندري ..

للتسعة جهزنا الإستقبال وكل شي صار تمام ما ناقصنا غير
وجودها ، دخلنا عليها بـ وقت واحد گاعدة ؏ السجادة تقرا قرآن
انتظرناها تخلص الصفحة دقائق بسيطة صدقت ورفعت
راسها مبتسمة بـ وجهنا

نبض.. يلا ماما گومي كل شي صار جاهز ، نريد نحتفل

عطاء.. أخوكم وين

نظر.. اجييييييت ، حچاها ودخل يركض بـ إيده شمعة
المفرقعات طفى الضوة وصار يحرك بيها بـ قوة

نهضت ماما تضحك ، أخذتها منه حضنته حيل وأشرت النا
تعالوا لحضني ، ركضنا ضميناهم سوى كمية من السعادة
غمرتنا بـ هاللحظات رغم الحزن المخيم على قلوبنا بسبب
وضع ماما وخالو ناصر

هيَّ هذه عطاء القمر ، بكل مرة تنكسر وتنهد وترجع مرة ثانية
ترمم إنكسارها وتضحك بوجه الحياة علمودنا

نبض.. گاعدة بالليل وحدي بالغرفة ادرس إمتحان عينية رن
موبايلي باوعت للشاشة هذه ولاء !! استغربت إتصالها من
يوم مـ تخرجت قل تواصلنا كلش وإذا تواصلنا فـ على
الماسنجر أو الواتساب بس شلونچ أخبارچ وننهي المحادثة
لأن ما عندنا شي نتكلم بيه

سديت الملزمة وفتحت الخط ، سلمنا بالبداية و وحدة سألت
عن أخبار الثانية بعدين صرت أحس من نبرة صوتها عندها
شي تريد تحچيه بس شكلها مترددة

- لول ليش أحس اكو بحلگچ حچي مدتگدرين تحچيه

- شلون عرفتِ ؟!!

- مو گلت لچ أحس ، احچي شنو قابل معتبرتني غريبة غير احنه
خوات وعشرة سنين طويلة من الدراسة

- ولأن اني معتبرتچ أختي مترددة أفتح الموضوع وياچ

- دخيلچ بس لا مصيبة جديدة والله ما اتحمل بعد

- لا لا لتخافين هوَ الموضوع يخصني إلي ابد مو يمچ

- دحچي فدوة لتشلعين گلبي وراية إمتحان لازم أدرس

- هشام
- خير شبيه هشام ؟!!
- يريد يتقدم لي واني لسه محتارة شنو أجاوبه

- الله عليچ !!!

- باوعي نبض والله العظيم ما اعرف شلون صار هالشي يعني
مو قصدي أحب الإنسان الكان بيوم من الأيام يحب صديقتي
بس القدر لعب دور وجمعنا بـ عز تعبه

- هسه مـ راح اجاوبچ سولفي لي أول شلون تقدم لچ

- هيَّ القصة بدت من يوم مـ انخطبتِ لأستاذ آريان
- اييي دكملي يمعودة

- راسلني بعد فترة مِنهار ، عرف من الطلاب زواجچ من
أستاذنا قريب لأن هوَ علن عن هالخبر بالكلية والبيجات
التابعة الها وصار يسألني شلون صارت الخطوبة
اني همْ حچيت له العرفته منچ گال اني ردت اتقدم لها گدام
الكل حتى انهي كلام الطلاب عنها بس ما گدرت اخطي
هالخطوة وهيَّ تعبانة و واگعة بالفراش

المهم كسر گلبي كلش لأن واضح عليه يحبچ مو مجرد إعجاب
بحيث يحچي وصوته مخنوگ ، حاولت اصبره وگلت له مو
قسمتك وإلا ما كان صارت لغيرك بس هوَ شيقنعه بـ
هاللحظة بالذات بعد ما خسر الإنسانة الصار له سنين يبني
أحلامه عليها

- خطية والله ، ما ادري بيه واصل لـ هالمرحلة

- واتعس وداعتچ متدرين بيوم زواجكم شـ صار بيه ما كنت
اتوصل وياه بـ استمرار بس بـ هاليوم ما اعرف ليش گلبي
وجعني عليه فـ اتصلت اشوف شلونه ما رد ، راسلته ما فاتح
نت ، للفجر دز لي رسالة إذا گاعدة اريد احچي وياچ ، بسرعة
اتصلت عليه صوته تعبان كلش مبين مريض خطية بالبداية
حاول يكابر وميگول سبب مرضه بس بعدين انهار واعترف
گال اني سنين احبها من بعيد لبعيد اخاف حتى اتقرب منها
بحچاية والطلاب يلگوها حجة يجيبون سيرتها بالمو زين ،
حافظت عليها مثل نفسي وخفت عليها مثل خوفي على
اخواتي ليش هيچ بين ليلة ويوم فضلته عليَّ إذا على
المساعدة هيَّ تعرف كلش زين اني إيدي ممدودة الها دائماً
ومن تعافت وتواصلت وياها لمحت على موضوع الزواج بس
مـ تجرأت احچي اخاف عبالها اسوي هيچ حتى أستغل ضعفها

- لا والله مو هيچ السالفة وحتى انتِ تعرفين بـ زواجي ما صار
بـ ظروف طبيعية ولا كان وافقت لو ما ضغط أهلي يعني مو
قصدي أفضله عليه بالنسبة إلي قبل لا اتزوج اثنينهم واحد
واثنينهم رياجيل والنعم منهم بس الفرق القدر نصف آريان
لأنه أقاربي لذلك صرت من نصيبه أما هشام يشهد الله ذهب
صافي وألف وحدة تتمنى ترتبط بهيچ رجال شهم وأخو خيته
لأن وبعد كل شي عرفه عني ظل متسمك بيَّ وما فديوم
طلعت منه كلمة تخص حياتي السابقة وإلا هوَ كل شي يعرف
عني من البداية حتى سالفة إنفصالي

- ادري والله واني همْ حاولت افهمه هالشي ، حلفت له انتِ
وافقتِ بضغط من عائلتچ بس الحمد لله آريان طلع خوش
أدمي وگدر يسعدچ وتعيشين وياه بـ راحة

- اي عفية ، زين هوَ شلون تجاوز هالسالفة

- ماكو بالبداية الموضوع صعب عليه بس شوية شوية بدا
يتأقلم خصوصاً هوَ يعرف الحلال والحرام فـ جبر نفسه يشيلچ
من راسه بعد ما تزوجتِ ويلتفت لحياته

- مممم وانتِ صرتِ حياته مووو

- لا والله باوعي ، احنه ظلينا نتواصل كـ اصدقاء حتى الكلام
بيناتنا رغم كثرته بس كان جداً رسمي لحد قبل إسبوعين دز
لي مسج اريد احچي وياچ ضروري وراها اتصل اعترف يحبني
شلون وشوكت ما ادري المهم انصدمت صدمة عمري لأن
اني همْ ويا الأيام بدت مشاعري تميل له بشكل واضح بس اب

د
والله ما بينت له هالشي إلى أن هوَ صدمني بـ مشاعره
المتبادلة اتجاهي

- على شنو دتحلفين شبيچ مخبلة ؟!!

- نبض والله إذا هالموضوع يزعلچ بلاه أحسن لأن اني مو هيچ
لا استغليت حبه الچ ولا كنت قاصدة أحبه مو عبالچ أخذته
منچ لا وروح أبوية كل شي صار صدفة

- لحظة لحظة يمعودة شدتحچين !! أخذتيه مني شنو ترى اني
مرة متزوجة وبيني وبين هشام ماكو شي مشترك وإذا على
حبه ميهمني الموضوع لأن ولا يوم بادلته المشاعر أما على
مشاعره هذا الشي راجع له وحده فـ على شنو دازعل ؟!! اصلاً
بالعكس كلش فرحت لكم لأن لا هوَ اليحصل مثلچ ولا انتِ
التلگين رجال يستاهلچ غيره ، گولي يا الله ورجعي له موافقتچ
ترى هشام فرصة متتعوض دير بالچ تخسريه

- الله عليچ حچيتِ الحقيقة لو بس تردين تجامليني

- والله العظيم فرحانة كلش بـ هالخبر و أمانة إذا صار وعقدتوا
انطيني علم حتى اجي وأهلهل الكم بـ نفسي

- فدوة لعمرچ شگد طيبة ، الله يسعدچ ويفرحنا بـ نونو حلو
مثلچ حتى إذا جبت بنية يصير نسيبي بالمستقبل

- ههههههه آمين يا رب ، اي شوكت ناوين بالسلامة

- هوَ مستعجل لو بـ إيده ينهي كل شي بس اني مگدرت انطيه
الموافقة قبل لا اجي واحچي وياچ...

بعدها تحچي سمعت الجرس دگ عرفته آريان ، خطية لأن
يعرف بيَّ أخاف صار يدگ الجرس كلما يجي حتى ينبهني بـ
رجعته وما انهبط ، گمت من الخوف قافلة على نفسي الغرفة ،
فتحت الباب ورجعت گعدت داحچي وياها دخل سلم ، رديت
بـ ابتسامة

- اجى رجلچ موو
- اي

- يلا لعد ما اعطلچ أكثر وانتِ همْ وراچ إمتحان اسفة شغلتچ
وياية بس شسوي مجبورة ينتظر جواب مني

- ولا يهمچ حبيبتي بالعكس فرحت بـ اتصالچ وأمانة ها
تسلمين عليه وتباركين له نيابة عني وإذا حددتوا موعد المهر
عزميني مو تغلسين ترى أزعل عليچ والله

- أول وحدة راح تعرفين وتنعزمين وداعتچ

- ألف ألف مبروك مقدماً حياتي ، مهناية ان شاء الله

- الله يبارك بيچ بعد روحي ، اخذي راحتچ مع السلامة

- الله وياچ

سديت الخط دخل آريان ،
مـ انتبهت عليه من طلع يبدل بالغرفة الثانية ..

- الله يساعدك

- يخليلياچ حبيبي

- ليش تأخرت حتى ما گدرت انتظرك تعشيت وحدي

- صار عندي شغل ويا الوالد ، زين سويتِ ألف عافية

- احمي لك تاكل سويت تبسي بالفرن ما بيه دهن

- لا ما اشتهي أكلت شوية عند أهلي ، تسلميلي نبضي

- باوعت له ساكتة

- ها خير ؟؟

- هذه ولاء ، هشام خطبها وإتصلت تبلغني عبالها أزعل إذا
عرفت بـ ارتباطهم

- وليش تزعلين ؟!!

- مو تدري طلبني للزواج قبلك وهيَّ تعرف بـ هالشي

- شنو يعني قسمة وما صارت ما بيها زعل الشغلة

صفنت بـ وجهه ما اردي ليش حبيت أثير غيرته مثل ما سوه
هوَ يوم الضحك عليَّ على اساس الحلقة ضاعت

- وين صافنة

- مو ما اريد احچي اخاف تضوج بسبب كلامي

- لا احچي ما اضوج

- هوَ مو بس كان طالبني للزواج لا عنده مشاعر حب اتجاهي و
ولاء الوحيدة التعرف بـ مشاعره لأن كانت وياه خطوة بـ خطوة
إلى أن نساني وتعلق بيها لهذا السبب خافت أفكر استغلت
ضعفه بزواجي منك علمود تحببه بـ نفسها بس اكيد اني
مستحيل أفكر بـ هالطريقة

- ها والله !!!

- اي

- ادرسي عيناي ادرسي هالسوالف متفيدچ الاسئلة باچر
تخليچ تنسين حتى اسمچ مو بس ولاء وهشام

- گول والله !!! عزززة جايبها صعبة يعني

- اليدرس زين ماكو شي يصعب عليه لذلك ادرسي يلا

- مممم شنو غرت ؟؟ اعترف اعترف مـ يحتاج تكابر

- من شنو أغار ليش ما اعرف تربية زوجتي يعني، اكيد اعرفچ
كلش زين وهذا هوَ اليهمني أما مشاعر العالم ما عندي
سُلطان عليها المهم بالأخير انتِ إلي وببيتي

- ناوي تخجلني ؟!! للأسف دومك الطرف المُنتصر

بس حچيتها تقدم بـ اتجاهي ، گاعدة ؏ الچرباية نصى عليَّ
ساند جسمه على إيده ، كلما أرجع للخلف كلما يتقدم أكثر إلى
أن تمددت ، صار فوگاية سحب نفس من نحري ورفع راسه
ثبت خشمه على خشمي يزفر النفس بكل هدوء ، مدري
شصار بيَّ راسي أفتر اريد افتح عيوني ما اگدر ، فجأة لفحت
حرارة أنفاسه بـ مسامعي

- الإنتصار الحقيقي يوم الاسمع منچ كلمة أحبك آريان هنا بس
يلا اگدر أعد نفسي من اعظم المُنتصرين

باس خدي وابتعد اعرف ليش ميريد يضغط عليَّ واني
مشكلتي الوحيدة مگاعد اميز هل مشاعري اتجاهه حب لو
مجرد تعلق لأن هوَ الرجال الوحيد الحسسني بقيمتي بالوقت
الكنت بيه كارهة حتى حياتي

- يلا تگومين ادرسچ شوية

- سحبت نفسي عدلت گعدتي وباوعت له مبتسمه : بس لا
ناوي تغششني أستاذ آريان

- يا يوم سويتها حبيبي !!!

- اتشافى شبيك تحچي بـ جدية لو الغيرة سطرتك

- بثانية وحدة طفر عليَّ ، طوق خُصري بـ معصم إيده وسحبني
لحضنه رفعني من الچرباية : تتحارشين گوة

- مو بس انتَ تتحارش بعدين شكو بيها اعترف وگول غرت
ترى مـ ينقص منك شي والله العظيم

- يعجبچ تسمعيها يعني

- مممم

- اغار عليچ حتى من الملابس الترتديها مو بعد البشر

- بس ممبين عليك غيور لـ هالدرجة

- يعني تگدرين تگولين اعرف شلون اتحكم بـ غيرتي
ها هسه ارتاحيتِ نبضي

- هههههههه اي كلش

باس شفتي و

نزلني ؏ الفراش ، سحب الملزمة فتحتها وصار
يشرح لي من الأول ما تركني إلا بعد ما لخصها إلي بثلاث
ساعات ودون بعض النواقص المختصريها من الكتاب ،
ركزت عليها زين وفعلاً جايب لنا منها سؤال وفراغين ، طلعت
من الإمتحان ضحكتي تارسة گلبي المادة الوحيدة اليخافون
منها طلاب مرحلتنا العينية لأن كلهم يعرفون آريان شگد
دقيق بـ اسئلته لذلك صاروا يقرون بالكتاب محد يگدر يعتمد
على الملزمة بوجوده إلا اني النقص يجي يمي وبدون تعب

عشق.. السنة خلصت التدرج و صار وقت تنسيبي على
المستشفيات ، مُرسل اتصل يبلغني إذا أحب اداوم وياه
بنفس المستشفى حتى يكلم والده يتوسط لي تشكرت منه
ورفضت لأن عاجبني اداوم ويا نيار وبنفس تخصصه ، إذا
حالفني الحظ طبعاً

استحيت افتح الموضوع وياه مباشرةً ، رحت حاچيت خالو
بلكي يگدر يتوسط لي بـ معرفته ، أملي كان جداً ضعيف بـ
قبولي بـ هالمستشفى بس بالنهاية انصدمت بالواسطة القوية
العند خالو بحيث مو بس قبلوني لا حتى نفس إختصاص نيار
وبنفس قسمه هماتين

داومت بيها ، الفرحة كانت واضحة جداً على نيار عكس شمم
انزعجت بشكل ملحوظ مجرد ما شافتني داومت بـ قسمهم
وضمن تخصصهم ، مو مثل قبل ما اهتميت ولا شفتها من
گاعها خصوصاً بعد ما نيار طلب إيدي ، باچر راح نعلن خطوبتنا
للجميع ومن يوصل لها الخبر تتركنا بحالنا ان شاء الله

اليوم 14/2 يصادف عيد الحب ، طلعت الصبح للدوام نيار و
السائق ينتظروني بالسيارة ، صعدت سلمت ردوا بـ وقت
واحد ورجع نيار يقرا دعاء الصباح
ظليت اباوع على الشارع إلى أن وصلنا للمستشفى ..

نزلت قبله ، ظل يحچي ويا صباح شوية ونزل ، ابتسم وأشر لي
امشي ، مشيت ، دخلنا من الباب اتصلوا عليه يستعجلوه لأن
عنده عملية ، اضطر يتركني ويروح

لـ 11 و ربع واگفة اتناقش ويا الدكتور دخل علينا نيار هلكان
من التعب توه طالع من غرفة العمليات ، انتظره يروح مجرد مـ
انفردنا بـ بعض ابتسم بـ وجهي قابلته بالمثل وتكلمت بـ نبرة
خجولة ..

- الله يساعدك ، مبين عليك تعبت كلش بـ هالعملية

- يخليلياچ ، مو مهم التعب المهم النتيجة

- صح والله ، يلا صار لازم اروح محتاجيني بـ الردهة

- بس لحظة

حچاها وفتح الجرار طلع منه كيس صغير ، قدمه إلي مبتسم :
كل عام وانتِ العشق الأول والأخير لنيار ناصر

- باوعت له بـ خجل : بس اني مـ جبت لك هدية شلون

- ارجع واگول انتِ هديتي ، غيرچ ما احتاج

احممم اااا شكراً ، يخليلياك مثل متگول

- ويخليلي هالإبتسامة الحلوة بس يا ليت تخففيلي منها شوية
من غير شي انتِ سالبة عقل نيار مو بعد تبتسمين بـ
هالطريقة الجذابة ، ارحميني بس هالكم يوم ؏ الأقل

- نيار

- عيناه

- فعلاً هذا العام يختلف عن اعوامي بـ وجودك ، شكراً

حچيتها وطلعت بسرعة أحس گلبي يريد يغادر أضلاعي من
شدة السعادة الغمرت روحي بـ هاللحظات القليلة

رغم إنشغالي ما گدرت إلا ما افتح الهدية ، رفعت كف إيدي
على صدري اتنفس سريع والإبتسامة تارسة وجهي مفتاح
بيت بالمدالية مالته حلقتين وحدة رجالية والثانية نسائية بـ
اسفلها اسمي واسمه وتاريخ أول يوم جمعني بيه صدفة
بالمستشفى هالتاريخ نفسه البتدأ بيه أول سطر من أول
صفحة بالكتاب الهداه إلية

باوعت داخل الكيس اكو ورقة مطوية ، سحبتها بسرعة
دافتحها سقط منها شي ، نزلت نظري ؏ الأرض سلسلة ناعمة
مزخرفة على شكل كلمة عشق ، رفعتها اباوع عليها بـ تعجب :
يا الله هذا شديسوي بيَّ تعبت واحنه بالبداية ، شنو من حب
ديقدم لعشق !!!

نفضت الأفكار من راسي اتنفس بسرعة رهيبة، فتحت الورقة
كاتب : عشقي الثمين أما آن الآوان لترتبط اسمائنا كما
ارتبطت قلوبنا ، انتظرونا مساءً ، أحبُكِ

سديتها أنفض من الخوف ، شنو قصده يربي ؟! معقولة اليوم
ناوي يطلبني عزة بس لا صدگ شسوي هسه

رجعت كملت شغلي على السريع ، انتهى الدوام داجهز بنفسي
مر عليَّ نيار طلعنا سوى طول الطريق ساكت ولا كأن صاير
شي شگد احترم تربيته دائماً يحاول يحافظ على الحدود
البيناتنا رغم كم الحب اليحمله بداخله إلي

وصلت للبيت ، استغربت نبض موجودة ومسوين حملة
تنظيف طلعت مرت خالو مبلغتهم واني أخر من يعلم

للعصر كملوا التنظيف ، صار وقت إختيار اللبسة ، كلما يراوني
شي اعترض ملابسي كلها مدتعجبني ، من كل عقلي گعدت
ابچي ظلن السخيفات يضحكن عليَّ أخر شي ماما صيحت
عليهن وأخذتني حتى نشتري فُستان

بعد عناء طويل إختاريت فُستان نازك بشكل لون زهري ستن
بس بيه من جهة الصدر والظهر لؤلؤ جداً ناعم ومن الأسفل
كسرات بسيطة زايدة من جمالية التصميم

رجعت للبيت بـ وجهي للحمام ، بس صليت بديت أجهز بـ
روحي حتى عشا مـ تعشيت شوية واجن البنات يساعدني
مدري شجاني الله ذب نحوسية الدنيا عليَّ بـ هاليوم بحيث لو
شما يسون لي ما أقتنع

نبض.. كافي عاد ترى لعبتِ نفسنا والله حلوة شبييييچ

ورد.. جلدها يحكها هذا البيها متعرفين أختچ

عشق.. هسه شكو جايين كلهم مو هذه نبض من خطبها آريان
كل شي صار بسرعة وبدون هالتفاصيل

نبض.. وانتِ تجيبين نفسچ عليَّ ؟!! ليش اني خطوبتي صارت
مثل العالم والنا

س بعدين والله حلاتها بهذه التفاصيل تظل
ذكرى ، ركض ركض كل شي مـ فهمت

ورد.. بس ما قصر آريان عرسكم ولا بالأحلام لتنكرين

نبض.. ما قصر وبعده ممقصر بس داجاوبها على كلامها لأن
من التوتر ظلت تخربط متعرف بعد شتگول

عشق.. يعني هسه حلوة هيچ؟؟ الله عليكم لتجاملوني

ورد.. ألطممممممممممممم

عشق.. اوگفي خل ألطم وياچ اللطم ملعبي

نبض.. ههههههه والنبي والنبي تجننيييييييين اصلاً الله
يساعد العاشق الولهان شلون راح يتحمل جمالچ اليوم

عشق.. الدنيا باردة لتحمين زايد

نبض.. وربي حلوة شنو ما عندچ ثقة بنفسچ وين عشق
القديمة شو صرتِ غير وحدة بس انخطبتي

عشق.. متوترة والله متوترة

رن جهازي بـ هالأثناء رسالة باوعت هذه قمر دتگول راح نجي
لأن اني وصيتها تبلغني قبل ليطلعون ، درت وجهي ؏ المرايا
مخبوصة باوعت لنفسي المهم مرتبة مو المهم عاجبتني لو لا ،
خليت وطلعت للصالة أفتر على روحي من التوتر شوية واندگ
الجرس

راحت ماما ويا نظر يفتحون الباب و اني بقيت حايرة شوية
اگعد شوية اوگف ، انزل إيدي مرة ومرة ثانية اتكتف أخر شي
ضربتني ورد على راسي همزين مخرب الحجاب ، غميتها ؏
السريع ورجعت نظري للباب دخلوا

عزة گلبي راد يوگف اني طبيعتي مو خجولة بس اليوم مدري
شجاني أحس حتى الكلام طار مني اريد اسلم عليهم ما اعرف
شگول بحيث مرت خالو گالت السلام عليكم رديت مساء
النور عاد همزين هوسة محد سمع

تقدم نيار بـ اتجاهي مبتسم ، بـ إيده باقة ورد حجمها جداً كبير
وألوانها تاخذ العقل أحمر وأصفر ، سلم وقدمها إلي ، أخذتها
منه وابتسمت بـ إمتنان

دار وجهه على قمر سحب منها باقتين صغيرات ، قدم وحدة
لنبض والثانية لورد بعدين باوع لماما يضحك

- انتِ أرض الجنة لأن مخلفة هالوردات اكيد متحتاجين ورد
عمتي الغالية العطر الفواح منچ وبيچ

- هههههههه منو أبوك بعد ، طبيعي لسانك يصير عسل

- هههههه يخليلياچ يا رب

بس گعدوا أشرت لي ماما بـ عيونها ، أخذت باقة الورد ورحت
للمطبخ اجن البنات وراية ، باوعت حايرة أحس حتى القهوة
نسيت شلون المفروض اسويها

ورد.. شبيج شبيچ لخاطر الله أحد شربچ ماي الثووول

عشق.. نبض أخذيها عني لا اطلع قهري بيها

ورد.. قهر شنو عيوني مو هوَ هذا نفسه البچيتي عليه قبل فترة
وظليتي تصيحين أحبه ورد أحبه

عشق.. لچ سكتيها راح تفضحنييييي

نبض.. كافي جنية

ورد.. هيَّ الكافي شو تحبه و تموت بيه أما هوَ واضح مثل عين
الشمس واگع ومحد مسمي عليه بعد شكووو هالتوتر والدراما
التركية خليچ على طبيعتچ يولو

عشق.. اطلعوا من يمي خل اعرف اشتغل العالم تنتظر

ورد.. اشتغلي مو يمچ بس نتفرج ونذكرچ إذا نسيتِ

تجاهلتهن وبديت أجهز بالتقديم ، ربع ساعة يلا كملت شلت
الصينية طلعت الرجفة لازمة إيدي بحيث بالگوة مسيطرة ؏
الفناجين لينكبن واتفشل

قدمت لخالو هوَ اني من غير شي خجلانة وهذا كملها عليَّ بـ
كلامه الحلو لدرجة خلاني اتيه راسي من رجلي

كملت التقديم، حطيت الصينة ؏ الطبلة وگعدت مقابل نيار
رفع الفنجان ديشرب بقيت اباوع عليه شو هذا من أول رشفة
عقچ وجهه وتذمر من الطعم بشكل واضح صفنت عزة
شمصخمة اني ، وجه نظره باوع لي رافع حاجبه والإبتسامة
مرسومة على ملامحه

أشرت له بـ عيوني شكو ، حچى بـ صوت واضح حتى يسمع
الكل ممكن أغسل ، جاوبته طبعاً وگمت قبله اجى وراية بـ
نفس الإبتسامة فتح ماي المغسلة ونصى يمضمض حلگه هنا
بعد ما گدرت اسكت أكثر

- نيار شكو القهوة ما عجبتك لو شنو بالضبط

سحب الكلينس من جيبه يمسح بـ شفته وباوع لي ..

- صرتِ مثل الاتراك يعني ، تحطين ملح بالفنجان حتى
تختبريني إذا أتحمل الطعم أو لا بس ولا يهمچ نيار لعيون
عشفه مستعد يجرع المر مو بس المالح تمونين والله

- عززززة يا ملح والله ما حطيت ملح اكيد ناصب عليَّ

- يمعودة يا ما حطيتِ غير مليان حتى لساني انشل

- صفنت فاتحة عيوني : ورد والله ورد يبووو مو أخت طرگاعة
سودة من مروان و وگعت على راسنا

- ها وين رحتِ

- اسفة بس هذه سوالف الجنية إذا متعرف منو الجنية هيَّ
نفسها ورد تباوع تركي وتجي تطبق براسي وراسك

- ضحك بـ هدوء : مقبولة منها و ان شاء الله وصلت للي تريده


- اسفة والله مني ونيابة عنها ، ما ادري شلون عبرتها

قاطعني بـ ابتسامة ..

- عيناي ممكن سؤال واريد اسمع جوابه قبل الجميع

- ابتسمت بـ خجل : اكيد تفضل

- هَل تَقبلين

- نَعم قَبِلت

بس حچيتها تقدم بـ اتجاهي صار يمي كلش ، فتحت عيوني
عليه بـ صدمة فجأة نصى يهمس بـ مسامعي

- احمم هيَّ النظرة الشرعية إلى أي حد المفروض يوصل عُمقها


- ابتعد عني جفلت بـ وجهه من الكلام

- لتفهميني غلط مو علمود شي بس حتى اعرف شلون و وين
تكون النظرة بالحلال لأن أحس كلچ على بعضچ إغراء حتى
ابتسامتچ ومثل متعرفين اني رجال أخاف ربي بـ نفسي وبيچ
ولو ماكو فرق انتِ نفسي

سخنت من الموقف ، تركته ورجعت للصالة ؏ السريع
اجى وراية بس گعد فتح خالو موضوعنا

كل شي صار بـ كلمتين خالو طلبني وماما وافقت حتى مـ
تناقشوا بسوالف الحاضر والغايب لأن خالو گال بيته مو

جود
والتطلبه عشقنا يجرالها والتجهيز اساساً عليهم احنه منتدخل
هذه حياتهم وهمَ اليرتبوها مثل ميحبون

شوية واجى آريان گامت نبض استقبلته، سهرنا بيومها احلى
سهرة بـ مناسبة عيد العيد الحب ولأول مرة تصير هالسهرة
ببيتنا ، رادت مرت خالو نعقد ثاني يوم علمود عيد ميلادي
ماما رفضت لأن نحتاج وقت للتجهيز

للوحدة يلا راحوا ، بقيت أخر شي بالباب اودعهم ويا ماما بس
سدته دخلت أركض دورت على ورد بالصالة ماكو رحت
للغرفة توها دتبدل لزمتها من ياخة قميصها

- اخخ ولچ شبيچ

- تغشمين روحچ كلبه اني اعلمچ اليوم

- انتِ عمرچ سامعة واحد يگول زاد وشكر لا طبعاً هوَ المعروف
زاد وملح لذلك اني حطيت له ملح ويا القهوة حتى يصير
بيناتكم زاد وملح ، عيناي انتِ

- لچ ورررررررد

- بسم الله الرحمن الرحيم بسم الله الرحمن الرحيم

- تعالي لچ تعالييييي

گمزت من يمي فتحت الباب وركض لحضن ماما ظلت
تحتمي بيها سولفت لها الصار صح مـ قبلت على فعلتها
وشبعتها رزايل بس مع ذلك مـ رضت أمد إيدي عليها

ورد.. إسبوع واحنه مخبوصين بـ تجهيزات المهر ، اليوم صار
الموعد المُنتظر عشق كالعادة خلصتها ترجف مكنت اعرف
الحب يثول الوحدة لـ هالدرجة إلا بعد منخطبت أختي العاقلة
وطار العقل من راسها بـ هالخطوبة

مسوين حفلة بسيطة بيناتنا ، ما عزمنا غير عمة ميسم وخالة
أم هبة أما مرت خالو فـ اكتفت بأهلها المقربين

ماما وخالة أم هبة سون الها العادات القديمة فُستان ابيض
بسيط وماي الورد تحت أقدامها والقرآن الكريم بين إيدها ويا
باقي الأمور الما اعرف شنو فائدتها

قبل ليبدي الشيخ اتصل هتان فيديو يريد يحضر عقد أخوه
ويانا والكل يمه حيدرا وعائلته وحتى عمو مُنتصر ، أخذت
الموبايل وطلعت من الباب الثانية سلمته لنظر حتى ينطيه
لآريان يوثق لهم الحدث لحظة بلحظة

رجعت يمهم بدا الشيخ الحديث بالآيات القرآنية، لزمت كتف
عشق وعيوني ؏ الباب من بعيد اباوع عليهم ، بعده يحچي
سمعت صوت دفرت الباب كلهم وگفوا بوقت واحد ركضت
مديت راسي طب بابا من الباب الخارجي بـ إيده سلاحين
ضربهن ببعض ورفع واحد على خالو ناصر والثاني وجهه على
راس نيار

مروان.. شنو لك الشغلة تايهتلك حتى تاخذ بناتي فلاحة ملاچة
ولا عبالك أبوهم عايش ويشتم الهوى
وانتَ يالنغلللل شلون تقبلها تتزوج مرة على ذمة رجال غيرك ،
اي اي لتباوع هيچ بنتي بعدها على ذمة رجلها راكان ما
تطلگت منه ، ان شاء الله يعني ناوي تنزل عليه ضرة مثلك
مثل النسوان من غير شي شاك برجولتك.....

يتبع..

البارت الثاني

هيا لِـ نَلتَقي مِن دونِ وَداع ..
أين ؟!!
في عَقدِ قِران ، لي مِنكِ نَعم واحدة ، وَلكِ مِني عُمراً مِن
العِشق الثَمين الَذي لا يُقَدر بِـ ثَمَن . ✍🏻
___

ورد.. ضج المكان بالصياح وبابا بعده مستمر يستفزهم بـ كلامه
، وگفوا الرياجيل حاجز بينه وبين خالو ناصر هذا يريد يرميه
طلقة وذاك مُصر يتقدم بـ اتجاهه فجأة سمعنا صوت الرمي
منين وعلى منو مندري

رفعت إيدي على عيني غمضت بـ قوة ، دخيلك يا ربي كل
شي ولا خالو ناصر ، بعدني بـ خوفي سمعت صوته بيناتهم بـ
عز الرعب الكان مسيطر عليَّ تنفست بـ راحة

باوعت من بعيد هذا أحمد، ضارب سلاح بابا بـ سلاحه حتى
يوگف هالمهزلة البدا بيها أبوية ، ارتفعت اصوات الحاضرين ،
مـ نسمع إلا سحب الأقسام لو ما ستر رب العالمين وسرعة
أحمد بـ سحب السلاح من إيد بابا كان رمى على خالو بسبب
حدة النقاش الصار بيناتهم

تدخل عمو إبراهيم صار بنصهم يحاول يهدأ الموقف ..

مروان.. وخر من وجهي يمعود وأخذ أبنك لا أبتلي بيه

أحمد.. عليمن لككككك

إبراهيم.. أحممممممد ، ضب لسانك

محمد.. يابة على شنو دتسكته ، هوَ هذا ميلوگ له غير
هالتعامل ، لا إحترام و لا تقدير

إبراهيم.. لحد يتدخل لتجبروني أهينكم گدام العالم

مصطفى.. تهيننا علمود حشرة مثل هذا

مروان.. لك منو الحشررررررة

إبراهيم.. لا اله إلا الله وتالي وياكم اليوووووم ، التفت على بابا :
أبو رحيل امسحها بـ وجهي وامشي برة حتى نتفاهم ، الأمور
متنحل بالعصبية و الصياح

مروان.. شبيك انتَ يا تفاهم وهمَ يردون ياخذون مرة متزوجة
ترى ما صايرة حتى عند اليهود

صادق.. مو بكيفك طلگها و اني متأكد من هالموضوع

إبراهيم.. أبو حيدرا يعرف الحلال و الحرام أكثر منك ، واحنه
حسب علمنا البنية انفصلت عن زوجها فـ امشي وياية برة
فهمني السالفة بالتفصيل حتى أرجع أفهمهم بعيداً عن
المشاكل وان شاء الله ميصير إلا كل خير

ناصر.. تفاهم شنو أبو محمد هوَ هذا تگدر تاخذ منه حق وله
باطل منا لهنا ما اصدگ بـ كلامه ، عوفه خل ينقلع

إبراهيم.. ميخالف أبو حيدرا بس انطيني مجال شوية

حچاها وسحب بابا بالگوة طلعه للطرمة، بقوا يتساءلون عن
حقيقة الكلام السمعوه من بابا ، بـ لحظة انفتح الباب ودخل
علينا خالو امطافرنا صار ماله والي لأن ما لابسين الحجاب
وهوَ فات بدون استئذان






- دور على ماما بـ عيونه بس لمحها صرخ : * وين فوتي
جيبيها ؏ السريع

- شنو ما فهمت ؟!!

- يمعودة ورقة الطلاگ الدزرها العار لعشق ، جيبيهااااااا

- اي اي هسه

راحت ماما تركض رجع خالو للإستقبال يستغفر بصوت واضح
، دز لها نظر أخذ الورقة منها وطلعوا كلهم ما ظل بالبيت غير
النسوان ، شوية وبدا المهامس بين أقارب مرت خالي لأن ما
كان عندهم علم أختي مُنفصلة

تركتنا عشق ورجعت للغرفة أشرت لنا ماما نروح وراها دگينا
عليها الباب ما ردت ، نزلت المقبض دخلت نايمة على وجهها
وتبچي بصوت مخنوگ بس أكتافها تهتز ، تقربت منها نبض
گعدت بصفها تمسح على ظهرها گامت بسرعة رمت نفسها
بـ حضنها تشهگ بـ حرقة

نبض.. كافي يروحي ماكو مشكلة مالها حل بس گولي يا الله
وان شاء الله تخلصين من هالمصيبة

عشق.. بس فهميني ليش هالاثنين مُصرين يدمروني هذا اللي
على اساس أبوية لو ذاك الثاني السلمته گلبي بيوم من الأيام
وداس عليه ومشى ، شنو الذنب الارتكبته بحقهم حتى
يحاسبوني عليه بـ هالطريقة القاسية

- گولي حسبي الله ونعم الوكيل وعوفيهم لرب العالمين

- لچ حسبي الله ونعم والوكيل بيهم بدل المرة ألفففف الله
ينتقم منهم ويعيشهم بنفس الجحيم العيشوني بيها سنين
وسنين ويشربهم من نفس كاس الألم التجرعته بسببهم أيام
وليالي بجاه كلمن عنده جااااه

ورد.. كافي يمعودة گلبچ ليوگف

عشق.. عساه يوگف ويريحيني من كابوس مروان وذاك العار
الوياه لأن همَ هيچ راح يظلون وراية ميرتاحون إلا يموتوني
واني بعد مالي طاقة اتحمل قذارتهم

نبض.. اسم الله عليچ لتحچين هالشكل

هبة.. گومة غسلي وجهچ حتى ترتاحين شوية

قمر.. لو خلونا نشربها عصير برتقال بلكي تبرد اعصابها

عشق.. اطلعوا عفية محتاجة ابقى وحدي كلش تعبانة

نبض.. ماشي نطلع بس راح اجيب العلاج يمچ مشكولة الذمة
إذا متاخذيه في حال حسيتِ بالتعب

هزت راسها بدون متحچي ، راحت نبض جابت العلاج حطته
يمها وطلعنا للصالة لگينا مرت خالو دتاخذ أقاربها لبيتها
سألت قمر تجين ردت عليها خليني هنا يم عشق

شوية و استأذنت خالة أم هبة تروح ، بس طلعوا رحنا ويا ماما
نشوف عشق لگيناها مطشرة العلاج ؏ الچرباية ماخذة منه
المُسكن عند الحاجة ونايمة الشهگة بصدرها

أشرت لنا ماما نطلع ، سدينا الباب عليها ورحنا نصلي صار له
بالساعة من أذن عود أختي رادت العقد الصبح حتى يبقى
لحفلة ا

لمهر وقت كافي لأن نهار الشتا قصير تالي سودة عليَّ
لتنهنت بعقد ولا بحفلة كل شي خرب بـ لحظة وحدة بسبب
أبوية وليش ما ادري






تونا مخلصين الصلاه اندگ الباب حيل عرفناه خالو من طريقة
الدگة ، لبست الحجاب وطلعت فتحت له دخل هوَ وعمو
صادق سأل لابسين بس گتله اي فاتوا للداخل

سلموا و گعدوا مباشرةً سألوا عن عشق گلت لهم نايمة

عطاء.. وين رحتوا وشنو صار وياكم

ناصر.. للمحكمة تأكدت من صحة الأوراق رغم آريان أكد لي
الإنفصال واقع قانونياً ومستمسكاتها الرسمية همْ تثبت
هالشي بس كل شي يطلع من هالعارات فـ گلت لازم نتأكد
حتى نقطع الشك باليقين و ميبقى لهم حجة علينا ، و فعلاً طلع
مطلگها النذل بس هذا ابن عمچ العار البيه ميخليه لازم يخرب
فرحتهم بـ مثل هاليوم

عطاء.. عزة بـ عينه ان شاء الله والبنية اجت تموت من القهر
شدعي عليك مروان الله ليوفقك وين ما چنت

صادق.. حس بالخطر اختفى النذل رحنا له للبيت ماكو بس
وين يروح منا نلگفه يعني نلگفه قابل يطير

عطاء.. الله يخليكم لتندگون بيه دتشوفوه بلا عقل كل شي
يطلع منه إذا ضغطتوا عليه ، خل يولي هوَ ميريد بنته تتزوج
ابن ناصر وبنفس الوقت ما عنده سلطة عليها مثل السابق
لأن صارت مرة ومسؤولة عن قرارتها فـ ديحاول يمنع
هالإرتباط بأي طريقة ليش دتنطوه الفرصة حكموا عقلكم
شوية ترى والله تعبنا

صادق.. بس سكوتنا ديخليه يتمادى أم رحيل

عطاء.. تنهون حياته لو تجنزوه حل يعني برأيك ؟! هذا هوَ
مروان ذيب بالمكر من يوم يومه وإلا ما كان تزوجني ولا خلف
هالبنات وزوجهن على مزاجه لو ما الحيلة والخديعة
الاستخدمها ويانا طول السنين الفاتت

ناصر.. جهزوا نفسكم باچر يجي الشيخ يعقد لهم

عطاء.. ان شاء الله بس انطيني مجال احچي ويا البنية خطية
لسه متدري راكان فعلاً مطلگها صدگت بأبوها

ناصر.. اكو غدة

عطاء.. من عيوني فوتوا صلوا اكيد بعدكم مـ مصلين بين ما
اجهزه الكم

گاموا للصلاه ، راحت ماما ؏ السريع طبخت التمن لأن التهت
بالمصيبة وعافت الأكل ؏ النص ، رحت ساعدتها اني والبنات
بتحضير السفرة نص ساعة وجهز الغدة

قبل لناكل خالو طلب اشوف عشق إذا گعدت لو بعدها نايمة
، فتحت الباب عليها مديت راسي رايحة بسابع نومة لأن
المُسكن الأخذته مفعوله كلش قوي

طلعت بلغتهم وگعدنا تغدينا ، بس شربوا الچاي راحوا
للعصر مجتمعين بالصالة وقمر ويانا انفتح باب الغرفة

گمت قبلهم اركض طلعت عشق مغيرة ملابسها توضت
ورجعت للغرفة تصلي ، ماما أشرت خلوها براحتها ردت انطي
خبر لخالو لأن وصاني من تگعد أبلغه انتبهت على موبايلي
مختفي يا ربي وين راح ، افتريت بالبيت ادور عليه هناك
وتذكرت انطيته لآريان علمود هتان






اتصلت عليه من موبايل ماما گال بالليل جايكم ، شوية
وراحت تحچي وياها تركناهم على راحتهم بالنص ساعة طلعت
من يمها العيون منفخة سألناها على عشق گالت نفسيتها
تعبانة حتى متقبل تعقد بعد تگول بطلت ما اريد اتزوج
وطلبت نبلغ بيت خالكم بـ هالشي

للتسعة اندگ الباب اجى خالو ويا آريان ، دخل هوَ على عشق
وظل آريان گاعد يمنا بالصالة سألته على جهازي طلعه من
جيبه سلمنياه يعتذر ، أخذته منه بـ ابتسامة وفتحته ؏ السريع
توقعت هتان متصل أو مراسلني على الأقل بس ماكو شي
أخر إتصال الصبح بالعقد

عشق.. خبر عدم إنفصالي عن راكان نزل مثل الصاعقة على
راسي ، خدرني روحياً قبل ليخدرني جسدياً وفزز كل جرح غافي
بيَّ من سنين بحيث حتى من تأكدت من عدم صحة الخبر
ظليت على نفس وضعي إلى أن دخلت مرحلة من الإنعزال
والوحدة نفسها ذيچ العشت بيها بأول أيام من إنفصالي عنه

طول النهار ماما تحاول تقنعني اتراجع عن قراري بس عبث ،
لليل اجى خالو يكمل البدت بيه ماما ، تكلم وياية لأكثر من
ساعة متواصلة وحتى اسكته طلبت منه وقت ارتاح بيه
وبعدين احدد موعد جديد للعقد

ثاني يوم صادف خميس أخذت إجازة مـ دوامت وياها الجمعة
والسبت للأحد همْ رجعت اخذت إجازة بس هالمرة بصعوبة
حصلتها لو ما حچيت ويا مُرسل ودبرلياها على معرفة والده ..

بالليل توني طالعة من الحمام داجفف بـ شعري علمود اقرا
قرآن صار لي كم يوم مقارية وعندي ختمة لازمتها على روح
عمتي آمنة ، سمعت الجرس اندگ

لميت شعري و سحبت السجادة بعدني دافرشها دخلت ماما
عليَّ گالت نيار بالإستقبال يريد يحچي وياچ

- رفعت نفسي تأفأفت بـ ضجر : ابد مالي مزاح حبابة حاولي
تتصرفين حتى لو تگوليله ماخذة علاج ونايمة

- فشلة أمي الرجال جاي مخصوص علمودچ إلى متى تظلين
شاردة أول وتالي راح تشوفيه الصبح بالدوام

- واني هسه شنو اجاوبه فهميني

- هوَ راح يعرف يسحب الجواب اليريده منچ امشي يلا

- لحظة شنو قصدچ ؟!!

- قصدي لتشيلين همْ الإنسان بين لحظة والثانية ممكن يغير
قراره متعرفين لبعد شوية شـ يصير

حچتها و طلعت ، انجبرت اقابله صدگ عيب ، لبست شي
طويل فوگ البجامة وحطيت الحجاب على راسي توني فاتحة
الباب صارت ماما بـ وجهي بـ إيدها صينية الت

قديم انطتنياها
وراحت للصالة ، تقدمت بـ خطوات مترددة وصلت للإستقبال
بالگوة انطيت الروحي جرعة من الشجاعة حتى أدخل و اواجهه

فتت گاعد ديقرا بـ موبايله ما اعرف شنو ، سلمت رفع راسه
بسرعة رد السلام مبتسم و نهض ياخذ الـ صينية من إيدي
حطها ؏ الطبلة گعدت بـ مكاني تقدم خطوات بسيطة گعد
يمي بيني وبينه مسافة خمس أصابع مو أكثر ، نصيت راسي
منه انتبهت عليه فرك كفوفه ببعضها من التوتر شوية وحچاها
بـ همس






- شلونچ اليوم

- الحمد لله و الشكر أحسن بـ هواي من قبل يومين

- الحمد لله .. سكت شوية : احممم ، زين ممكن اعرف شنو
سبب هروب نظراتچ من مواجهتي

- متوهم ماكو هيچ شي ، حچيتها ورفعت عيوني داخل عيونه
احاول اتحداه ظاهرياً بس من الداخل نظرة وحدة من عينه
كافية حتى تهزم جيوش مقاومتي

- القوة مو بالشيء السهل مثل متتصورين ، القوة قول وفعل
ومن ثم إصرار وتحدي على مواجهة عثرات الحياة في حال لو
ما استسلمنا بالعثرة الأولى وحققنا جزء كبير من أحلامنا لكن
بعد ما واجهنا العثرة الثانية سقطنا بـ إرداتنا وخضعنا للإستلام
للظروف مثلنا مثل الجبناء بـ هالحالة راح نتجرد من صفة القوة
ونخرج من دائرتها إلى دائرة الحظ والنصيب

- هه بعد كل شي عرفته عني وبنفسي حچيت لك شنو صار
بوقت إمتحانات السادس تحديداً ورغم هالشي كافحت
وقاومت واصريت حتى احقق حلمي وما اضيع تعبي تجي
هسه تعتبر هالمقاومة حظ ونصيب

- الشجاع يبقى شجاع في كل الظروف و ابسط مثال توضيحي
ممكن اقدمه الچ الوالدة الله يحفظها ويطول بعمرها ، انتَ
بنتها وتعرفين لأي مرحلة من التعب وصلت ولكم عثرة
واجهت وتصدت ورغم هالشي ولا مرة شفتوها استسلمت
لأنها فعلاً اِمرأة شجاعة و قوتها نابعة من إيمانها بالله ومن ثمَ
هدفها بالحياة واللي هوَ أنتم مو مجرد قوة مصطنعة حبت
تظهرها للعالم حتى تثبت للمقابل هيَّ قوية وماكو شي يهزمها

- اني مقاومت حتى اثبت لراكان اني قوية اني قاومت علمود
ماما ، علمود حلمها بيَّ ، علمود نفسي اني وتعبي ودراستي
وسهر الليالي ، ليش دتبخس حقي بـ طريقة تفكيرك ، مـ كنت
اعرف عشق بـ عيونك بـ هالضعف هذا

- وشنو التغير هسه ؟! بطلتِ تفكيرين بالوالدة وأحلامها بيچ لو
نفسچ صارت مو مهمة ومتستاهل المقاومة

- لا طبعاً صح تعبت هالأيام بسبب وضعي الصحي بس
مستحيل استسلم وإذا على سالفة ارتباطنا مشاكلي هواي
وراح تتعب وياية لذلك الأفضل نتراجع

- ما اتصور اشتكيت لچ ليش دتتكلمين عن لساني

- بدون متشكي لي شفت بعيني شنو صار من أول يوم قررت
ترتبط بيَّ ، ما طول ورانا مروان اليدخل لحياتنا يجي يوم
وينسحب منها بـ تعب فـ من هسه خلي كل واحد يروح بطريقه
بأقل الخسائر أحسن ما نتعمق بالعلاقة ويزيد ألمنا ، انتَ
متستاهل تنجرح نيار

- اني ما عندي نية اتخلى عنچ لكن في حال انتِ ردتِ تتخلين
عن نفسچ هنا نقاشنا راح يتغير

- باوعت له وسكتت .. همس :

- احياناً يَكون بَلائنا الوَحيد مِنَ اللهِ وجعٌ يُغرس داخل صِدورنا
على هَيئة حُب ، فَـ لا تَكوني وجعي .

- ولأن ما اريد اصير وجعك تراجعت نيار ، بعدنا ببداية الطريق
الإنسحاب يكون أسهل من الوقت اللي بيه نكون واصلين
لمرحلة من التَعلُق يصعب الإنفصال بيها






- من تكونين طلبي في كل سجدة ورجائي في كل دعاء هنا
اكون وصلت لقمة التملك فـ عن أي تَعلُق دتكلميني عشق
ليش اكو تَعلُق أكثر من مشاعري الحاولت اوصلها الچ بـ 365
يوم بين حبري ودفتري وروحي الارتبطت بروحچ من أول لقاء ،
بس المشكلة الحقيقة هيَّ الفرق بين المشاعر الاحملها الچ
ومشاعرچ إتجاهي

- لتكمل نيار شنو عبالك اني ما أحبك ..

أخذني بـ نظرته المُندهشة بعيد عن كلامي، نصيت من عيونه
خجلانه حتى نسيت شنو ردت احچي

- باوعي لي وكملي كلامچ ، خليچ شجاعة

- نياااار

- بداعة شمم باوعي بعيوني وكملي الكلام البديتِ بيه

- باوعت له بـ طرف عيني اضحك : انتَ حتى بالأوقات الجدية
تبقى مُستفز

- تنهد بـ ابتسامة واضحة : هسه اني عليمن المفروض اباوع ؟!!
على ابتسامتچ المُميزة المالها نظير لو على الغيرة الواضحة بـ
نبرة صوتچ لو على هالعيون المليانة سحر وجاذبية ..
كل شي بيچ ياخذ العقل ، انتِ عشق واسمچ عليچ

- وانتَ عبارة عن ألغاز
كل شي بيك غريب حتى طريقتك بالحب

قرب وجهه مني لدرجة صابتني الـ قشعريرة من حرارة انفاسه
لاخترقت مسامات جلدي وهمس بـ كل هدوء

- حَتى لو رَأيتِني لُغزَاً صَعْباً مُستَصعَبْ ، حَاوِليني حتى تَحُليني

- غمضت بـ تعب : خايفة من هالإرتباط كلش

- مستعد أقدم أمان الدنيا مهر لـ عيونچ حتى تطمئنين

- سكتت ..

- ها
- ها
- هااا
- هااااااا

حچيتها بـ ابتسامة فاتحة عيني بـ عينه ، سحب تفاحة صفرا
من الصحن أخذ منها عضة وحطها بـ حضني

- هذه الچ ما عجبتني اني تفاحتي الصفرا طعمها غير

- نيار !!!

- تنهد بـ عمق : يبنت الناس ليش تدخليني بالحرام يلا وافقي ،
دلالچ بدا يزيد كلش عن حده

- مو دلال

والله مو دلال كل ما بالأمر خايفة عليك منهم

- إذا تدرين تخافين ، خافي عليَّ منچ انتِ

- مني ؟!!

- اي نعم لأن الشي الوحيد الممكن يأذيني رفضچ انتِ أما غير
أمور ابداً مو مهمة ، على الأقل بالنسبة إلي

- اي تمام
- تمام ؟!!

- تمام نيار تمام موافقة ، بس انطيني فرصة لأن حالياً كل شي
طلع من عيني حتى الجهاز

- كل الوقت واحسبي حسابچ هالمرة العقد ببيت الأهل

- يكون أحسن لأن هنا بعد مو أمان بـ وجود بابا

- وإذا تحبين تغيرين الجهاز راح ابلغ الوالدة تطلع وياچ
ولتشلين همْ للمادة

- اغيره بس مـ يحتاج تتعبها والفلوس كفيت و وفيت هالمرة
خليها عليَّ لأن هالتغيير مالك ذنب بيه






- عشق !!!

- لتباوع لي هالشكل والله اخجل من والدتك اكيد هسه تاخذ
عليَّ نظرة محلوة إذا من أولها أجهز مرتين

- الوالدة متفكر بـ هالطريقة مع ذلك إذا متحبين يصير عدها
علم ميصير ولا يهمچ بس قمر راح تجي وياچ

- ليش دتتعبها من غير شي هيَّ صحتها على گدها

- لتخافين صباح راح يكون وياكم طول الوقت

- مممم ، علمود تتأكد شگد صرفت اعرفك شلون تفكر

- نهض بـ ابتسامه : لازم اروح بس شوكت حابة تبدين

- نهاية الإسبوع علمود العطلة وبالمنظمة ما راح اداوم

بس حچيتها سلم و صاح يا الله ، طلعت وياه التفاحة مالته بـ
إيدي رافقته للباب ماما ويانا لزمت بيه على العشا تعذر منها
لأن مياكل بالليل وإذا أكل فـ شي خفيف ومو بس هوَ حتى
أهله مثله أكلهم قليل بعد الغروب

طلع ، سدت الباب وراه باوعت لي ابتسمت بـ وجهها ..

- ها ولچ شو الضحكة تارسة حلگچ

- شنو تردين ارجع ابچي !!

- مو على اساس ما اريد اطلع واعتذري منه لو هيَّ بس عيارة ،
اخ منچن بنات مروان

- اوووي ماما لتخجليني

حچيتها ودخلت اركض خجلانة حتى من نفسي، گالت هسه
تغيرين رأيچ ما صدگتها إذا هوَ شي مثل الخيال كلمة منه
تقلب كل موازيني سبحان الزرع حبه بيَّ بـ هالطريقة العجيبة
بحيث حب هالإنسان يخوفني أكثر ما يسعدني لأن متعودت
أنحب لدرجة الجنون

باوعت للتفاحة مبتسمة وبدون شعور أكلتها بشهية مو
طبيعية رغم صار لي أيام العسل ما اشتهيه ، كملتها طلعت
مضمضت حتى اقرا قرآن اجت ورد تحقق وياية طلعت روحي
يلا قبلت تطلع من الغرفة بعد ما عرفت أدق التفاصيل
وراحت تركض دتبلغ ماما بـ موافقتي

هبة.. گاعدة ويا سلسبيل العصرية نباوع مسلسل تركي على
سينمانا دخلت أمي للغرفة تلبس بـ شيلتها

أم هبة.. ما تگومن وياي سيارة تاخذنا من الباب وترجعنا للباب
عليش هالعجز همْ تحصلن زيارة وهمْ تغيرن جو

هبة.. يمة آنه اكره طبت الوادي تعرفين بيَّ كلش زين

سلسبيل.. واني همْ والله ينقبض گلبي منه لو رايحة بس زيارة
نجي وياچ أما وادي وأربعين ميت لا تعذرينا

أم هبة.. انتن مو وجه نعمة اي والله...

دتحچي دگ موبايلي أحمد يتصل ، جاوبته بسرعة..

- الوو

- هلا بـ روح أحمد

- هلا بيك عمري ، خير مو عوايدك تتصل بـ هالوقت

- والله عاجبني اطلع اتعشى ويا خطيبتي ومنها نتناقش ببعض
الأمور المهمة إذا بيها مجال طبعاً






- ميصير تأجلها لأن أربعين جيراننا وأمي رايحة للنجف ما اريد
اخلي سلسبيل وحدها بالبيت

- ما عندي وقت بس يومين وألتحق، أذا على سلسبيل تجي
ويانا عادي ماكو مشكلة

- ماشي يلا تعال بس بين ما انطي خبر لأمي واتحضر

سديت الخط منه بلغت ماما ظلت شايلة هم لسلسبيل

أم هبة.. چا آنه ما راح اروحن

هبة.. ليش مترحين هذا واجب ، آنه راح أخذها وياية

سلسبيل.. لا وياچ ولا وياها شكو عليَّ اسد الباب واگعد هيَّ
ساعة زمن وترجع هبة شگد تريد تتأخر يعني

أم هبة.. يا يمة وتظلين وحدچ لا ما ترهم

سلسبيل.. عمة شنو السالفة هناك يم أبنچ حتى نوم أنام
وحدي ، 24 ساعة ما هوَ ترى عادي والله متعودة اني

ظلينا نتجادل شوية لا هيَّ القبلت تروح ويانا ولا احنه الگدرنا
نأجل الطلعة علمودها ، رحت سبحت ؏ السريع بعدني ألبس
اجى أحمد ، طلعت ماما توصيه عليَّ وتوسلته منتأخر علمود
لتظل سلسبيل وحدها بالليل

سمع كلامها ، أخذني لمطعم قريب من منطقتنا علمود ليضيع
الوقت بالطريق ، بعد العشا أخذني غسلت وراح يغسل وراية
من رجع سحب الكرسي گعد بصفي ولزم إيدي من تحت
الطاولة ، باوعت له مبتسمة

- لتباوعين هيچ اني مو گد هالنظرات البريئة

- ولا آنه گد هالحب والله العظيم

- سحب حسرة غريبة وضغط على إيدي حيل : تعبان روحي
ومحتاجچ يمي كلش

- سلامتك حبيبي شبيك

- ماكو شي معين ضغط الشغل على ضغط الدراسة ومنا
التفكير بتجهيزات العرس اريد تقررين بسرعة حتى ابدي
اتحرك لأن ورى الإمتحانات مباشرةً لازم نتزوج التأخير ممنوع
من هسه اگولچ ، ما بيَّ اصبر أكثر

- مممم ، لعد وين راح كلامك آنه ما رايد غير تصيرين على
اسمي حتى لو نظل كل العمر مخطوبين ، ترى كلمة الرجال
وحدة ما تصير اثنين للتذكير يعني

- شسوي چنت اتصور بـ هالشي راحتي مـ چنت اعرف القرب
منچ مُتعب لـ هالدرجة ، بعدين قاعدة كلمة الرجال وح

دة بيني
وبين الناس مو بيني وبين روحي لأن الإنسان بـ طبيعته مزاجي
ألف مرة يغير رأيه بالدقيقة الوحدة لحد ميقرر القرار النهائي

- اي صح واني روحك

- آنه ولچ

- ههههههه والله مركز ، هسه شنو الفرق ترى كلها واحد

- ما ادري أحبها منچ بگد ما أحبچ

- وآنه ميتة بيك ، ميتة ميتة تعرف شنو يعني ميتة

- تنهد وسحب كاسة الماي شرب رشفة مبتسم : يلا صار لازم
ندخل بالمفيد لأن لو تظلين تتغزلين بيَّ انسى احنه مخطوبين
واخذچ لبيتنا وتعرفين بالباقي






- ههههههه ، لا يلا احچي بطلت اتغزل

- علمود المكان الراح نسكن بيه ، مثل مـ تعرفين أبوية اشتري
مساحة من گاع البُستان من عمي ناصر وبنى بيها لمحمد لأن
زواجه صار قريب وقبل يومين فتح الموضوع وياية حتى يبني
لي بصفه بس ما انطيته جواب قبل لا اجي واحچي وياچ
بالموضوع علمود نتفق

- سحبت إيدي من تحت إيده الدمعة بـ طرف عيني ..

- ها روحي شبيچ

- أمي أحمد ، اعرف هذه سنة الحياة ويجي يوم اتزوج و اعوفها
وحدها بس والله العظيم صعبة ، هيَّ مالها غيري بـ هالدنيا
شلون هيچ اخليها وحدها و هيَّ مرة صحتها على گدها ،
للأسف يعني عندها ولد محسوب عليها ابن گدام العالم
وبالحقيقة هوَ والماكو سوى

- ومنو گلچ راح تعوفيها ، يعني هذا أحمد بـ نظرچ هيچ ما
عندي رجولة حتى اخلي مرة چبيرة بالعمر تعيش وحدها لا و
منو هالمرة أم الإنسانة الما حبيت و لا راح أحب غيرها بـ كل
حياتي ، اكيد مـ راح اسويها روحي

- قصدك يعني ناخذها تعيش ويانا ؟! تؤ مستحيل أمي نفسها
عزيزة كلش ما راح تگدر تعيش ببيت النسيب ولتفهم غلط
والله تحبك هواي بس هيچ طبيعتها شنسوي

- تعلميني بـ خالتي ، اعرف كلش زين شلون تفكر لذلك
حاولت الگى حل يناسبني ويناسبها

- وشنو هالحل ؟!!

- اشتري البيت الگاعدين بيه أنتم من عمي صادق طبعاً بدون
علمها واجي اني اعيش وياكم

- هههههههه وگدام العالم تصير گعيدي

- كل شي يهون لعيونچ وعيونها المهم تظلون مرتاحين

- يا ربي مجاي اصدگ ، أمي لو عرفت بالخبر إلا تطش واهلية
بباب الحسين عليه السلام هيَّ من صغري چانت تگول وين
الگى الرجال الياخذچ و يقبل يعيش يمي

- شايفة هالفرحة الـ بعيونچ ، اني علمود تدوملچ مستعد
اموت مو بس اصير گعيدي ، أحمد هيچ يحب هبته

- انتَ شنووووو ، وروح أبوي أحسك ملاك مو بشر

- لا اني رجال هايم بـ محبوبته من سنين طويلة ومن صارت
على اسمه صار العالم بـ عيونه عيونها وبس

- عصرت كف إيده بـ قوة : بس آنه ما اريد اضرك خاف عمي
يزعل إذا عرف راح تعوفه وتجي تعيش ويانا

- مـ يزعل لتخافين ، صح تمنى يبني لي بالبُستان مثل ما
تمنيت اني اخذچ و نعيش هناك بنص أهلنا و ناسنا بس أبو
محمد أهم شي عنده راحة ولده ويعرف راحتي يمچ حتى لو
بعيد عنهم ، لتفكرين بيه روحي

- زين الفلوس شلون يعني البيت كلش چبير والمنطقة
الگاعدين بيها غالية ولتنسى هذا بيت ورثة عمو صادق ميگدر
يقلل لك من سعره واخوانه بالنص

- اني بـ السنين الراحت جمعت مبلغ لا بأس بيه وأبوية راح
ينطيني الفلوس الچان مقرر يبني لي بيهن والباقي أخذه منه
دين بعد ما اتزوج واستقر اسددهن اله على راحتي ، يعني راح
تدبر لتدوخين راسچ بـ هالتفاصيل






- هالتفاصيل يعني انتَ وراحتك شلون ما ترديني أفكر بيك
ليش آنه عندي شي أهم منك بـ هالدنيا

- روحي انتِ راحة أحمد هيَّ راحتچ ..
المهم اني حسمت الأمر حتى ويا أبوية، بس الموضوع كان
متوقف على موافقتچ وهسه حصلتها ، انتهت

- خوش وبعد شنو راح نسوي

- هسه ارجعچ للبيت وأمر على عمي صادق للبيت في حال
اتفقت وياه راح أجيكم بالليل حتى احچي ويا أمچ

- خو ما تگللها اشتريت البيت
- اكيد لا
- اي زين

المهم راح اطلب مقابل گعدتي يمكم اعيد بناء البيت حتى بـ
هالحالة متبقى لها حجة للرفض وهيَّ تظل تدفع الإيجار ، طبعاّ
الفلوس هنا استلمها من إيدها احطها بـ إيدچ وانتِ جمعيهن
الها بعدين نشوف لنا حجة نرجعلهيا يجوز نطلعها بيهن عمرة
حج كل شي يصير

- وطبعاً انتَ مقابل الإيجار راح تشيل مصاريف البيت

- لا ناقص اخليها تصرف واني موجود

- والله إذا عرفت بالحقيقة إلا تمسح بينا شوارع بغداد

- الله كريم منا لما تعرف

- زين منين راح تعيد البناء ترى كلش يكلفك

- روحي لتفكرين بالماديات كم مرة لازم اعيد هالجملة

- راح احچي شي بس الله عليك لتزعل
- شنو

- أخذ ذهبي بيعه حتى يسدلك جزء من مصاريف البناء

- والله لو ما گلبي الغبي چان انطيتچ ضربة على عينچ اطفيها بـ
إيدي .. حچاها من بين أسنانه

- ليش دتعاند غير هوَ بيتنا اثثنينا شكو بيها لو ساعدتك
بعدين آنه شلي بالذهب حتى والله مو كلش وياه

- هبة لتضوجيني

- حباب لتشلع گلبي بـ عنادك ، حاول شوية تفكر بـ عقل

- هبةةةةةة

- سبلت له عيوني : آنه مو هبة آنه روح أحمد

بـ عز عصبيته ابتسم ، هز راسه وسحب كف إيده مني رفع
كاسة الماي شرب وباوع لساعته ..

- لازم نگوم علمود سلسبيل خطية

- بس

ما گلت لي بـ هالفترة الراح تبني بيها احنه وين نگعد

- چان گلت يمنا بس اعرف خالتي مـ راح توافق لذلك احاول
اشوف لكم بيت مناسب للإيجار مؤقتاً

- اي هيچ أحسن ، يلا حبيبي امشي وسالفة الحچي ويا أمي
أجله لأن اكيد راح تتأخر بالرجعة

- أول وتالي اني رايح احچي وياه وراجع لكم مستحيل اخليكم
وحدكم بـ هالليل اصلاً أمچ من الصبح اتصلت بيَّ حتى اجي
يمكم گالت ممتوقعة روحتنا تصير بالليل وما آمن أخلي
البنات وحدهن بالبيت

- مممم ، اثاري اكو اتفاقيات وخطط من ورانا

- ههههه مو بس احنه نخطط على المسكينة من وراها






حچاها وگام دفع الحساب و طلعنا ، وصلني للباب بس دخلت
راح ، استغربت الممر اظلم ليش سلسبيل ما شاعلة الضوة ،
سحبت موبايلي فتحت اللايت وفتت البيت كله ظلمة
شعلت الضويات وآنه صيح بُلبل وينچ

ماكو رد ، گلبي لعب اريد اتحرك ما اگدر الخوف هد كل حيلي
، لزمت بالحايط ومشيت الموبايل بـ إيدي طلعت رقم أحمد
حتى إذا اكو حرامي ادوس اتصال يسمع صوت استغاثتي ،
وصلت للغرفة مديت إيدي لـ مقبض الباب ومباشرةً نزلته بـ
خوف ، ضربت اللايت بسرعة چان اطفر من مكاني بعد ما
شفت منظر سلسبيل

وجهها كله أثار ضرب والشعر كفشة أما الجسم فـ ماكو شي
ساترها غير الداخليات ، رفعت إيدي على حلگي بذهول
وعيوني تترقب حركتها متصنمة حتى مترمش

شعلت الضوة وركضت عليها رفعتها من اكتافها أهز بيها حيل
اريدها تتجاوب وياية ماكو ، نزعت الحجاب من راسي
وسحلتها سحل للحمام ، فتحت الباب دخلتها وشلت القدح
كبيته كله على راسها بس ولا عبالك بعدها على نفس الصدمة
أخر شي ضربتها كفين كف اقوى من الثاني بحيث إيدي
جمرت قبل خدها

واخيراً حركت عيونها بـ اتجاهي ..

- شنو صار يمعودة منو سوه بيچ هيچ لتگولين حرامي

- هزت راسها بالنفي تبچي

- عززززززة ، بلال اجى للبيت بـ غيابنا موووووو

- حضنتني تشهگ : اي هوَ هوَ الله ينتقم منه هبة أخوچ
مريييييييض ، مريض تعرفين شنو يعني مريض

- اششش كافي لتكملين ، انتظريني

طلعت للغرفة اركض ، جبت لها ملابس ورجعت غسلت لها
بنفسي حتى ما عندها طاقة تمانع ، بقى بس تتطهر من
نجاسته خليتها وحدها بس ظليت انتظر بالباب دقائق
وطلعت حتى ممنشفة بحيث ملابسها عبارة عن مايات
والدنيا باردة كلش ، ضميتها لحضني ورجعنا للغرفة شغلت
التدفئة وساعدتها تغير بعدين گعدتها ؏ السرير وگعدت وراها
أجفف بـ شعرها

طول ما آنه امشط لها دمعتها ما نشفت ، رجعت المشط
للميز وگعدت مقابيلها أخذت كفوفها بين إيدية

- شنو صار احچي لي بس بدون بچي حبابة حتى أفهم

- ورى ما طلعتوا مباشرةً سمعت صوت الباب انفتح ، عبالي
انتِ ناسية شي صحتچ من بعيد چان يطب هوَ عليَّ طفرت
من شفته ما ادري عنده المفتاح انصدمت

شهگت بصوت عالي : حاول ياخذني وياه ومن صممت على
البقاء يمكم اعتدى عليَّ بوحشية وبدل المرة مرتين بعدين
گالها بـ عظمة لسانه راح تحبلين مني وساعتها اجي أخذچ
غصباً على خشم أكبر واحد

- عزة بـ عينه هذا صدگ يحچي !!!

- ما ادري شنو يريد بالضبط لا هوَ اليحبني وعايشين حياتنا
مثل العالم والناس ولا هوَ الكارهني ومطلعني من راسه حتى
يرتاح ويريحني وياه ، أخوچ راح يموتني






- بعد شنو صار

- ماكو شي مهم بس قبل لا يعتدي عليَّ ظل يتوسلني ارجع
بحجة اني احبچ وضايع بلياچ بس من أول موقف بدر مني بين
حبه الحقيقي مثل متشوفين

- لا هذا ابد مو طبيعي لازم نشوف له حل و بسرعة

حچيتها و سحبت الموبايل ، اتصلت عليه غالق خطه الجبان
بس بسيطة آنه اله خل ترجع أمي و يصير خير

حاولت شوية أخفف عنها بـ كلامي بعدين گمت صليت توني
مخلصة اجى أحمد ، ظليت رايحة راجعة بينه وبينها المشكلة
نفسيتها كلش تعبانة ما اگدر اعوفها وحدها ، وين يلا اجت
أمي واخيراً

شفناها تعبانة لا آنه حچيت وياها بـ موضوع سلسبيل ولا
أحمد فتح وياها سالفة البيت ، خليتها ترتاح وأول ما گعدت
الصبح سولفت لها ، عقلها طار من عملة أبنها اتصلت عليه
بعده مغلق ظلت تلوب طول النهار تريد توصل له ماكو أخر
شي جزعت وعافته

ثاني يوم مر أحمد حچى وياها بموضوع البيت ، شگد چانت
ضايجة بسبب بلال بس سعادتها بعد سماع الخبر متنطيها
لبشر بحيث رأساً وافقت على موضوع البناء مثل ما هوَ وافق
يصير گعيدي لخاطرها خصوصاً اللوتي قنعها فلوس البناء
مشتركة بينه وبين عمي صادق لأن البيت يعتبر إيجار مو ملك

على اساس يأجر لنا بيت بنفس المنطقة بس من سمعت
خالة أم رحيل بالموضوع حلفت يمين عظيم مننزل غير يمها
ولأن أمي تحبها حيل وتريد خاطرها ما گدرت ترد الطلب
ووافقت نروح نعيش يمهم هالكم شهر بين ما يكمل بناء
البيت

أحمد ألتحق فوراً بس مع ذلك كلف أخوه يجي يساعدنا في
سبيل ميضيع الوقت ويصير الزواج بعد الإمتحانات مباشرةً
مثل ما مخططين له من البداية

اجى مصطفى وياه خالة ميسم ساعدونا بنقل الأغراض يومين
ضبط وانتقلنا لبيت خالة أم رحيل ..

عشق.. أخذت من جية خالة أم هبة

لبيتنا حجة أنشغل بيها عن
تجهيزات المهر لأن حرفياً ما كنت مستعدة أعيد التجربة بعد
كل شي صار ، بس اكيد هالشي ما دام لي إسبوع مو أكثر وبدا
الضغط عليَّ من كل إتجاه إلى أن جبروني اتحرك واحدد تاريخ
العقد

جهزت كل شي تقريباً ، بقت بس نواعم المهر والفُستان صار
لي أيام راسي أفتر وما لگيت شي حلو لو ما كارهة فُستاني
القديم بسبب عملة بابا كان لبسته وخلصت أحسن من
هالدوخة الما وراها نتيجة

طلعت اليوم ويا ماما و ورد وقمر ويانا ، تركتنا بمحلات
الفساتين وراحت تكمل النواعم ، خطية جزعت يوميا ساعات
أفتر وتالي ارجع بدون ما اشتري فـ ما حبت تضيع الوقت وياية
وراحت تخلص شغلها بين ما أقرر

ساعة واحنه نفتر وكلما يلگولي البنات شي مناسب لازم اطلع
بيه عيب من جوة الگاع يا لونه يا قالبه يا فصاله قديم يا فاضح
ما بيه شي مستور ، ما اسمع إلا ورد عاطت بكل صوتها حتى
العالم ظلت صافنة علينا






ورد.. إختاري عاد والله داحسچ تتحجيين وإلا الفساتين الحلوة
خير من الله بس انتِ مو جاي على بالچ تشترين

قمر.. على كيفچ خطية اكيد متوترة انطيها فرصة تقرر

عشق.. إذا حضرتچ تتعبين بسرعة شكو طالعة وياية

ورد.. اكيد مو هذا قصدي ليش إذا الأخت متتعب لأختها
بمثل هاليوم منو يتعب ، بس اني حچيت هيچ حتى انبهچ
والله هواي شفنا شغلات حلوة بس ولا تعجبچ معناها فعلاً
دتتحججين و ليش مگاعد اعرف

قمر.. زين ليش متلبسين الفُستان القديم لو همْ محابته

ورد.. بالعكس كلش حلوة حتى لونه ماروني يلوگ ويا بشرتها
البيضا بس طلع من نفسها بعد المشكلة الصارت

عشق.. يا ربي راسي أفتر ليش هيچ مگاعد اگدر أختار
صدگوني مداشوف شي يعجبني يعني مو اتحجج

قمر.. حاولي تبعدين التوتر عن عقلچ شوية و متأكدة راح
تلگين بدل الفُستان عشرة بس اهدئي

فجأة شهگت ورد بـ صوت فززتتي من صفنتي ..

- وسم ان شاء الله هاي شبيچ خرعتيني ثول حتى ثول

- لچ تفاحة دوري وجهچ بسرعة شوفي الضيم الوراچ

التفتت فاتحة عيوني من جمال المنظر بالشاشة العارضة
لابسة فستان أصفر طويل وعدل على قالب الجسم بيه فتحة
على طول الرجل من الجهة الأمامية ومن الجوانب فتحات
متصلة بسلاسل ناعمة جهة الخُصر والظهر مفتوح وبيه
سلسلة مربوطة من الكتف الأيمن للكتف الأيسر وتلتقي
بالمنتصف تنزل على طول العامود الفقري لنهاية الظهر

- ها ها شبيچ سطرچ أبو فاضل ، متحچين عجبچ موو

- تقربت منها بـ همس : يمعودة صدگ تحچين من غير شي
اني أول مرة انكشف على نيار الدور ألبس له فستان فاضح
ولون أصفر شنو تردين تجلطين الرجال

- اي اي اني اريد اجلطه يلا امشي بدون نقاش لا أبتلي بيچ
والنبي لأن هالمرة الإعتراض ممنوع

أخذتني سحل ، دخلنا للمحل سألت هيَّ ..

- قبل شوية اكو فُستان أصفر معروض على الشاشة إذا ممكن
نشوفه بلا زحمة عليك

- ابتسم بـ هدوء : اعتذر الفساتين المعروضة بالشاشة تجي
على الطلب لأن غالية كلش أقل فستان بيها 400 دولار وانتِ
صاعدة

- شهگت من يمي

ورد.. اششش فضحتينا شبيچ ، اي أخي ميخالف نريد نعرفه
سعر الفُستان الأصفر ، اي هوَ هذا الطلع هسه

- سعره 650 دولار

عشق.. ولچ ورد عزة فوگ المليون امشي يمعودة امشي

ورد.. ترى هيَّ مرة بالعمر ليش تخليه بنفسچ وإذا على جيب
نيار خايفة لتخسريه ادفعي انتِ مو دتجمعين للسيارة وعندچ
خير من الله عود لبسيه حتى وانتِ نايمة علمود تطلعين
فلوسه وأبو فلوسه ، ها شگلتي






عشق.. واني فلوسي لاگيتهن بالشارع حتى أذبهن على فُستان
ينلبس ساعة زمن وينشمر بالكنتور ، بطرانة

ورد.. والله تندمين ، ألزمي إيدچ بكل شي إلا بهالسوالف لأن
تفاصيل الزواج مستحيل تتكرر وانتِ من غير شي انظلمتِ بـ
زواجچ الأول ليش دتعيدين الكرة

عشق.. ورد لتتعبين روحچ ، فُستان فوگ المليون ماااا اشتري
لو تطلع نخلة براسي قبل راسچ ، سدي الموضوع

داحچي رن موبايلي طلعته من الجنطة هذا نيار!! بعدت عنهم
مسافة ورديت بـ استغراب : نعم نيار

- السلام عليكم
- وعليكم السلام

- الفُستان إذا ما اخذتيه اجي اني أخذه بـ نفسي

- درت وجهي على قمر غميتها بـ عصبية

- وينچ

- يمعود غالي والله ، حرامات الفلوس بيه

- لا مو حرامات يبقى ذكرى

- نيار اترجاك

- تشتريه لو اجي اني

- هوَ اصلاً على الطلب يعني يحتاج وقت يلا يوصل

- ناولي الموبايل لصاحب المحل

انطيته الموبايل ظل يحچي وياه مبين ديتفقون شوية وصار
يسجل يمه التفاصيل ، رفع عينه علينا أخذ القياس وگال لنيار
أربعة أيام ان شاء الله ويوصلكم

طلعنا من يمه اني ادردم على البنات وهنَّ ميتات ضحك
صدگ استفزني لأن على گد ما عجبني الفُستان على گد ما
استخسرت الفلوس بيه بس لعبنها صح وحطني گدام الأمر
الواقع من بلغن نيار ، مو بنات غضب

يوم الخميس 8/3/2018 ، گاعدة على الكرسي انتظر الشيخ
يسأل عن موافقتي و گلبي ينفض قبل جوارحي هيَّ ثواني
بسيطة ونطقت النعم حتى اصير بعدها زوجة لأعظم رجل
بالعالم شرعاً وشعوراً

گومني البنات بالهلاهل ، همزين هالمرة مرت خالو ما عازمة
الأقارب فقط أهلها المعنيين ، أخذوني لغرفة قمر لبسوني
الفستان وطلعنا للصالة هوسوا شوية بعدين گالت مرت خاله
العريس راح يفوت ألبسن الحجاب

عزة من سمعت صوت خطواته عبالك يمشي على گلبي مو ؏
الگاع ، غمضت عيني أردد الاستغفار ، حسيت عليه گعد يمي
ندستني ورد حتى انتبه لأن ديصورونا واني بغير عالم رفعت
راسي بـ خجل اجت والدته گومتني حتى نلبس الذهب ، أول
شي أخذه منها الگلادة تقرب ديلبسنياها حط شفته بين خدي
وأذني وهمس

- مو گلت تفاحتي الصفرا اشهى و ألذ من تفاح الجنة ،
شكراً لأن صرتِ .. جزء من روحي
ونصف قلبي
وكل حياتي

حچاها وطبع بوسة رقيقة على خدي وانسحب مباشرةً
رفعت عيني عليه أخذ الكلينس يمسح التعرق من گصته
هزيت راسي مبتسمة ويا نفسي ،
بيه طبيعة غريبة هوَ وأخوانه حتى بعز البرد يتعرقون في حال
توتروا أو خجلوا مثل أبوهم بالضبط






رجع كمل تلبيس الذهب أخر شي باسني من گصتي ، گعدنا
جابولنا الكيك قطعناه و بلشنا نوكل بعض علمود التصوير ،
رفع العصير ديشبرني صار عندي ردة فعل من سوالفه القديمة
رفعت إيدي بـ توسل

- اترجاك لتسويها عيب منا العالم

- ضحك وتقرب مني بـ همس : لا هالمرة الأصفر لـ نيار وبس
ولو وصلتيني لمرحلة أغار عليچ حتى من نفسي

- نيار !!!

- لو ادري الفُستان بـ هالشكل ما أصريت عليچ تشتريه

- ابتسمت بـ خجل : ليش ما عجبك

- تعرفين الجواب و إلا ما كنتِ تشترين هاللون بالذات بهاليوم
بالذات عشقي

- احممم ، كافي شوفوهم شلون صافنين علينا

بس حچيتها سحب إيدي اليمين باسها وكرر الفعل ويا إيدي
اليسار ، باوعت عليه بـ تعجب : ليش سويت هالشكل عود
گلت لك كلهم ديباوعون علينا

- متقصد حتى الكل يعرف شـ تعني هالإنسانة لـ نيار

نصيت راسي خجلانة شوية وانشغلنا بـ فقرة التصوير

قريب مديطلع سمعت صوت خالو صاح يا الله ،
فات من الممر الجانبي ديروح لغرفة المكتب صاحته أم زوجته

- تعال عمة ناصر ماكو واحد غريب بارك لوليدك ومريته

- حطيت إيدي على فتحة صدري : يبوووو هسه ليش دتصيحه
والله أخجل يشوفني بـ هالمنظر

دخل من الكشخة والترتيب شكيت هوَ العريس مو نيار

ناصر.. ها يوم

أم نيزك.. شبيك فوت داگولك ماكو غريب كلنا أهلك

تقدم بـ اتجاهنا مبتسم ، تباوس ويا نيار و التفت عليَّ دابوسه
سحبني حيل لحضنه اخ يأمان الدنيا المزروع بحضن هالرجال
رغم قلة الأيام الجمعت بيناتنا

باسني من گصتي و ابتعدت اللمعة بـ عيونه ..

ناصر.. ألف مبروك بنيتي ، الله يسعدكم ويحفظكم إلي

عشق.. ويحفظك النا بابا

بس حچيتها ابتسم وسحبني لداخل حضنه بلهفة أعمق من
سابقتها بحيث عصر أضلاعي بين إيده

أم نيزك.. يا يمة فدوة عبالك أبو و بنيته الله يحفظكم

ناصر.. وهيَّ بنيتي يمة

سحبتها بيبي تهامسن شوية بعدين رجعت باوعت له

أم نيزك.. ألف مبروك عمة ناصر يوم عرسك ان شاء الله

نيزك.. لا والقسمة هذا همْ حظي حتى أمي عليَّ الحمد لله
والشكر

نرجس.. اسكتي خايبة ما شبعتِ كافي اعتقي الزلمة

نيزك.. هههههه يا عمة شبعت شنو قابل هوَ أكله

نرجس.. ادري هذه شـ عجبك بيها وأخذتها لخاطر ربك






أم نيزك.. هيَّ قسمة دادا حولة ثولة من تريد تصير تصير

ناصر.. لا ما اسمح لكم لتحچون على أم حيدرا ما أقبل

نرجس.. لعد وقمرك الگاعدة هنا ما تريد خاطرها لو راح البارحة
ويا البارحة ؟!!

قمر.. بيبي بيبي كافيييييي

نرجس.. انچبي انتِ بعدني ما خرفت اعرف شداحچي

ماما صافنة على نقاشهم فجأة التفت خالو عليها التقت عينه
بـ عينها بعدت نظرها عنه تباوع عليَّ ، سلم وطلع بسرعة ، نيار
همْ گام وراه مباشرةً

بس خلصت الحفلة ماما گالت خل نرجع للبيت مـ تريد تذب
حمل خطارنا على بيت خالو ، صارت هوسة كلش خالة أم هبة
وبنتها وچنتها وعمتي ميسم وبناتها وقمر هماتين من عرفت
مجتمعين اجت حتى تسهر ويانا
لـ 12 واحنه گاعدين سوالف وضحك ما حسينا الوقت شلون
مر أخر شي گاموا ينامون واحنه رحنا للغرفة نكمل سهرتنا لأن
البنات مستحيل ينامن قبل الثنتين

بس طبيت سحبت الموبايل ، توقعت الگى نيار متصل بس
خاب ظني ، حطيته بجيبي تقربت مني قمر

- ميتصل لتنتظرين لأن يدري بيتكم هوسة بس هسه يراسل
لتخافين مينام بدون ميحچي وياچ

- لا صدگ عود ليش .. رن موبايلي رسالة

- ها شفتي مو گلت يراسل

- خوش حاط له مخبر سري ينقل الأخبار أول بـ أول

- واجب الأخوة حبيبتي

ضربتها على كتفها اضحك و فتحت الموبايل ..

✓ شلونچ حبيبي

✓ بخير الحمد لله واعتذر اكيد قمر حچت لك بـ وضع البيت
حالياً حتى ما فرغت اراسلك

✓ ولا يهمچ بس احسبي حساب من باچر ندوام سوى
بالمنظمة ان شاء الله فـ جهزي نفسچ من وقت

✓ ان شاء الله

✓ يلا ما اشغلچ عن ضيوفچ أكثر من هالشي وحاولي متطولين
بالسهر حتى تاخذين كفايتچ من النوم

✓ تمام ، تصبح على خير

✓ تُصبحين على خير و يصبح قلبي على حُبكِ ..
انتِ ال

خير كله عِشقي

طلعت من المحادثة الضحكة تارسة وجهي ، عاد شلون
البنات ميشتهن استلمني تصنيف الخبيثات

نبض.. للوحدة سهرانين نسولف فكري شمر يم آريان ما اعرف
ليش صايرة بـ قمة إنشغالي افتقده وكأنما هوَ صار جزء من
سعادتي ، متكتمل إلا بـ وجوده يمي

رفعت عيني عليهن البنات بعدهن يسولفن ، گامت ورد
ضربت عشق على شعرها من ورى تضحك

ورد.. راح تتزوجين وبعدچ على هالكعكعة مـ تبطليها

عشق.. بـ شنو ضارتچ كعكتي بس اريد اعرف

ورد.. لا عيني بـ شنو ضارتني قابل ظلي عليها أم كعكة






سلسبيل.. عوفيها همْ يا الله تلم شعرها بـ هالطريقة ما شاء
الله كلش ثخين شـ يلمه لو ما هيچ

هبة.. بشرفچ عشق من نيار يشوف شعرچ مفتوح عود تعالي
احچيلنا ردة فعله

عشق.. اي عيني متريدن بعد تصوير 3D لليلة الدخلة

هبة.. عاد والله ما يرد الكريم إلا البخيل و احنه وادم معروفين
بالكرم والنعم منه

عشق.. من تصورين ليلتچ ويا حمادة عود أفكر اصورلچ

ضحكوا بـ صوت عالي أما اني اكتفيت فقط بالإبتسامة،
رفعت عيني ؏ الساعة صارت الوحدة وعشرة بدون شعور
سحبت جهازي ودخلت للواتساب
دزيت له گاعد ؟؟
ثواني وصار نشط شاف الرسالة وبدا يكتب ..

✓ اي حبيبي گاعد

✓ شعجب مو عوايدك تطول بالسهر شنو ما اجاك نوم

✓ لتسأليني سؤال انتِ أكثر الناس تعرفين جوابه

✓ تجي تاخذني ؟؟

تأخر بالرد بعدين طلع لي يكتب الآن توقف فجأة شوية ورجع
يكتب الآن .. ظليت صافنة شنو السالفة

✓ متأكدة ؟!!

✓ هههههه هذا كله حتى تكتب لي متأكدة ، اي متأكدة لأن اني
همْ مديجيني نوم بعيد عن حضنك

✓ تمام شوية واصير عندكم

✓ هلا بيك

سديت الموبايل وگمت ؏ السريع ألملم بـ أغراضي ..

عشق.. ها وين ولچ

نبض.. راجعة لبيتي خلصت السهرة مو راح تنامون

ورد.. يا عينييي الحلوة بعد متگدر بدون حضن آريانها

نبض.. وررررررد

ورد.. شـ گلت قابل مكذبة ، شو ليلة مـ تحملتي بدونه

قمر.. روحي لأخوية حبيبتي معليچ بيهن

درت وجهي سحبت الحجاب وطلعت ، دگيت باب غرفة ماما
صاحت تفضل ، دخلت عمة ميسم نايمة يمها

- ماما آريان راح يجي ياخذني .. حچيتها بـ همس

- خو ماكو شي

- لا لا لتخافين

- على راحتچ حبيبتي وسلمي عليه
- يوصل عمري انتِ

بستها من بعيد و طلعت ، واگفة ألبس بـ حجابي اندگ الباب
بـ هدوء عرفته هوَ ، لفيته ؏ السريع وركضت فتحته بس
شافني گدامه ابتسم ونصى باس خدي

- شلونك

- تمام الحمد لله .. حچاها بـ همس مثلي ، ضحكت

- ماما سلمت عليك

- يخليلياها ويخليلياچ حبيببي

سحبني من إيدي سديت الباب وطلعنا نتمشى منطقنا ولا
حرف الهدوء كان سيد الموقف ، وصلنا للبيت فتح الباب
دخلت قبله اللابتوب على الچرباية مديت راسي ديشتغل
بالاسئلة ، فجأة انسحبت من خُصري






- ليش تغُشين نبضي

- لا والله مو قصدي حتى ما لحگت اشوف شي منها

- مممم متأكدة

- وداعتك عندي

- شنو هالتطورات صايرة تحلفين بـ آريان

- مو بس أحلف بيك ، انتَ سيطرت عليَّ لدرجة صرت أحس
بالغربة حتى لو العالم كله محاوطني بس لأنك مموجود يمي ،
رفعت إيدي مررتها على لحيته بـ هدوء : انتَ سحر آريان
شلون هيچ گدرت تتملكني

ابتسم وسحبني من خُصري لحضنه ، باس خدي بوسة رقيقة
بشكل ونصى على نحري باسه أكثر من مرة بعدها شمه بـ قوة
ورفع روحه زفر النفس على شفتي

گصته على گصتي ، أنفه محتك بـ أنفي و شفته قريبة من
شفتي لدرجة الملامسة .. حچى مغمض عيونه

- إذا اني سحر انتِ صرتِ إدماني ، أدمنت حُبچ نبضي
وهالإدمان بدا يشتتي كُلياً مو فقط يشتت تركيزي

- أحبك

- فتح عيونه بـ غرابة وهوَ على نفس قربه مني ..

- اي أحبك لتباوع هالشكل ، مو بس أحبك أموت عليك

حچيتها واحتضنت وجهه بـ كفوفي وبدون تردد رفعت نفسي
بست شفته بـ لهفة متنوصف ، خطية من الصدمة ظل
متصنم حتى ما گدر يبادلني المشاعر

ابتعدت عنه اضحك ، لمست شفته بـ طرف أصبعي من باب
التحرش ، عصرني بـ حضنه حيل

- كافي

- ههههههه ليش حبيبي قابل شـ سويت

تنهد بـ حسرة وحملني بين إيده للچرباية نومني واندار طبگ
اللابتوب بدون ميسده وتمدد أخذني لـ صدره

- باچر ترحين
- وين ؟!!
- غير عقد ولاء وهشام شنو نسيتِ

- يبوووو اي والله شلون راح من بالي انشغلت بـ عشق

- تمام جهزي نفسچ العصر أخذچ

- شنو مـ تروح للمنظمة

- بلي اروح بعد ما اوصلچ و شوكت متخلصين بلغيني

- مممم نعست كلش
- نامي حبيبي تعبتِ اليوم لازم ترتاحين

- تمام ، تصبح على خير
- انتِ الخير

ورد.. ثاني يوم من عقد عشق صادف جمعة عندنا دوام
بالمنظمة هيَّ راحت ويا نيار فـ اضطريت اروح وحدي وصلت
الدنيا مخبوصة عندنا إجتماع الأقسام بالقاعة الرئيسية رحت بـ
وجهي الها همزين وصلت ؏ الموعد

توني گاعدة دخلوا نيار و عشق سوى ، مباشرةً باوعت على
شمم اريد اشوف ردة فعلها بعدني اراقب ملامحها المصدومة
دخلوا الشباب ورى نيار حاملين انواع الحلويات قدمهن النا بـ
مناسبة خطوبتهم

شمم.. هاي شنو انخ

طبتوا صدگ ؟!!

نيار.. الشغلة متحمل مزح دكتورة






شمم.. لا مو قصدي بس تعجبت احنه أخر الناس ندري

نيار.. العقد صار بين الأهل بس ان شاء الله على الزواج أنتم
أول الحاضرين ، ليظل بـ خاطركم

باوعت له وسكتت بس الوجه احتقن من القهر ، ظلت گاعدة
على أعصابها ومجرد ما انتهى الإجتماع غادرت القاعة مباشرةً
، لليل عشق وگعت بالفراش انفلاونزا واستبراد نامت من
العشرة حتى نيار استغرب وگعتها العصر كانت مثل الورد
مدري شجاها

ثاني يوم ما داومت لا هيَّ و لا شمم ، لليل اني همْ بديت
أعطس من غير شي المرض وياية يريد له حجة

بعدني احاول أنام رن موبايلي ، جابته هبة سألتها منو گالت
هتان ، ابتسمت بـ استهزاء بعد وقت الأفندي صار له
اسبوعين مختفي من عقدهم الأول لا عنده نت ولا يرد على
الإتصال المباشر توه يلا تذكر يسأل عني

رفضته بـ عصبية ، كرر الإتصال مرة ومرتين بالخامسة رديت بـ
نترة : نعم هتان رايد شي

- السلام عليكم
- وعليكم

- شبيها فزاعة الحقول تحچي من ورى خشمها الطويل

- لا والله ولا چنك مسوي شي

- كنت مسافر بـ شغل وعيونچ اليوم يلا رجعت

- اهاااا شغل گتلي !! زين ما گدرت تبلغني قبل لتروح لو تدز
رسالة على الأقل تكتب بيها اني مسافر لتقنعني طول هالأيام
انتَ متواصلت ويا أهلك ولا سألت عنهم

- شبيه صوتچ

- مريضة

- ألف سلامة على بدنچ

- شكراً

- سكت شوية اني همْ سكتت : مشتاقلچ مراح تحچين

- تعبانة اريد أنام ، تريد شي قبل لا اسد الخط

- ورد

- مع السلامة

حچيتها ونهيت المكالمة ما رجع إتصل ، استغربت من نفسي
اي صح هوَ زودها بـ غيابه الماله مبرر بس ليش اني داتصرف
بـ هالطريقة الغريبة يعني يروح يرجع يظل مجرد ابن خال
وصديق واكيد صداقته مترتقي لصداقتي ويا أحمد فـ ماكو
داعي لـ هالعصبية الزايدة المفروض اكتفي بـ معاتبته والسلام
وتظل عليه نقطة أذكرها بيه بـ استمرار بعيداً عن الزعل

فصلت الشبكة من الجهاز و رجعت راسي على المخدة من
المرض نمت بسرعة ، الصبح صحيت على صوت هبة

هبة.. گومي يلا شنو ما تداومين

ورد.. لا مالي خلگ الأنفلونزا دتضرب على راسي

هبة.. تصدگين آنه همْ ما عندي مزاج للدوام كلششش

سلسبيل.. إذا مـ تداومون اني همْ ما اروح

هبة.. چا يلا اليوم نعتبره غياب جماعي

ورد.. ولن مني اريد أنام ما ناقصني إزعاج من الصبح

هبة.. هههههه مولين خايبة

ورد.. سدن الباب وراچن

حچيتها ورجعت راسي نمت خلال ثواني ، للعشرة ونص اجت
ماما گعدتني جبر سوت لي الريوگ وانطتني العلاج بلعته
وگعدت مثل الأميرة لأن من نتمرض ابد متخليني نمد إيدنا
على شغلة بالبيت ، نخلصها راحة

للثنتين الظهر گاعدة يم عشق هيَّ تون و اني اساعدها
ومتنسمع منا غير شفطة الخشم ، دخلت علينا ماما

عطاء.. گومي أمي ورد ولو تعبانة بس سويت لكم اليوم دولمة
وذكرت أختچ ودي لها هالجدر يتغدون بيه

عشق.. اهووو ماما يعني ما حلالچ تسوين الدولمة إلا واني
مريضة ترى والله ميصير

عطاء.. وهذه صار لها ساعة الروائح تفتر بالبيت توچ يلا فطنتي
غدانا دولمة

عشق.. ما اشتم يا عرب ما اشتتتتتتتم ، شفطت الهوى حيل
: هاچ شوفي كل شي ما اشتم لا ومسويتلي دولمة صايرة
لوتية لأن تعرفين بيَّ مريضة وما راح اخلصها روحة رجعة ؏
المطبخ لما أنسف الجدرية

عطاء.. لچ نصي صوتچ خالتچ أم هبة اشتهتها وسويت
علمودها عود ارجع اسوي لچ من تصيرين زينة

عشق.. والله إذا ما سويتِ افضحچ بين العربان

عطاء.. بنت النعال لتهددين گتلچ اسوي لصمي هالحلگ

عشق.. ما انساها عليچ وحدة هذه

عطاء.. گومي انتِ الثانية اخذي الدولمة لأختچ لتبرد

ورد.. ترى والله ميصير هذا يسموه اضطهاد يعني اني المريضة
اروح اودي للصاحية غدة ليش هالتفرقة عطوة ترى ان
المفرقون أخوان الشياطون

نصت على رجلها دتسحب النعال طفرت من مكاني ..

- گمت والله گمت لتنزعيه

- فضيني ولچ

- منكم لله وين تروحون من ربكم وأنتم مسويني خدامة
بنگلادشية بس الله فوگاكم

اجاني النعال طاير ، بلعته وسكتت دومني مظلومة ..

لبست الحجاب و طلعت اتطوطح عبالك واحد سكران دگيت
الباب أكثر من مرة ماكو رد ، باوعت للجهة الثانية سيارة آريان
مموجودة ، افتريت خلف البيت مديت راسي للشباك حاجبة
اشعة الشمس بـ كفوفي البيت اظلم مبين بعدهم ما راجعين
بس شعجب !!!

سحبت الموبايل من جيب البجامة اتصلت عليها مغلق شنو
السالفة يربي ليش غالقة تلفونها !! أخذت لي صفنة احاول
استوعب الموضوع بعدين اتصلت على آريان

- هلا بالغالية

- هلا بيك عيناي ، اگول ليش اليوم متأخرين بالرجعة

- منو المتأخر اني مو بـ بغداد طلعت من الصبح وصلت أختچ
لدوامها وسافرت لأربيل عندي ندوة تخص الجامعة ونبض
قبل ساعة إتصلت بلغتني وصلت للبيت

- وصلت شنو آريااااااااان !!! أختي ماكو وبيتكم اظلم ومقفول
شلون قبل ساعة إتصلت بيك تگول وصلت وشلون لسه ما
راجعة شديصير هنا دخيلك شديصير نبض وين
راحتتتتتتتتتت.......

يتبع..

البارت الثالث


العَالمُ مِن حَولي كَـ جَهنمٍ في شَرهِ وَ وَحدكَ جَنَـتي ..
لا تَفلت يَدي ،
أمسِكني جَيداً لِكي لا أحتَرِق بـ جَحيمِهم
أمسِكني جَيداً لِكي أعيش . ✍🏻
__

آريان.. اهدئي بس اهدئي لتوتريني واني بعيد عنكم

ورد.. هدأت احچي يلا

- روحي لبيت أهلي بدون ضوضاء شوفيها هناك عسى ولعل
واحد منهم جاي ماخذها لأن عندهم علم بـ سفري وفي حال ما
لگيتها يمهم أخذي نسخة المفتاح من قمر وأدخلي للبيت
يجوز نايمة ، صار لها عارض لا سامح الله كل شي يصير
لنسبق البلاء قبل وقوعه

- اسد الخط

- لا لا بقيه مفتوح وحاولي تستعجلين ورد

رجعت الموبايل لجيبي وركضت لبيت خالو انقطع نفسي يلا
وصلت ، دگيت الباب بـ هدوء فتحت لي قمر

- ها ورد شنو هذا حالچ

- نبض يمكم

- نبض !!! شـ تسوي يمنا ، يعني اقصد لا مموجودة

- نسخة المفتاح وين

- يا مفتاح

- لچ مال بيت أخوچ شغلي لي عقلچ شوية عوفي الثول

- هذا موجود بس ليش والله خوفتيني

- روحي جيبه لخاطر ربچ روحي جيبه ولتحچين لأحد

- اي اي هسه رايحة

دخلت تركض ، ظليت واگفة على أعصابي دقيقة اجت بـ
إيدها المفتاح والحجاب على راسها ، سحبته منها ورجعت
ركض وصلت لبيت أختي فتحت الباب وفتت اصيح بكل
صوتي نبض وينچ نبببببببض

دخلت لغرفة نومهم الفراش على ترتيب الصبح، ركضت
للحمام فتحت الباب مموجودة ، المطبخ ، الغرف ، الصالة ،
السطح ، اركض وقمر تسحل بروحها وراية بسبب رجلها متگدر
تلحگني ، نزلت من الدرج روحي تسبق خطواتي ، سحبتني قمر
من زندي

- حبابة ورد اوگفي وفهميني ، نبض شبيهااااااا

- ما هيَّ ولچ ، أختي ما هيَّ

- شلون يعني ما هيَّ ؟!!

- خل اني اعرف شلون بالبداية بعدين عود اجاوبچ..

داحچي رن موبايلي بـ جيبي طلعته آريان ، يبووو من صدمتني
نسيت هوَ وياية ؏ الخط ، جاوبته ؏ السريع

- آريان ما هيَّ ، دورتها بـ كل زاوية بالبيت مموجودة

- استغفر الله العظيم من كلِ ذنبٍ عظيم ، سحب نفس عميق
وزفر الهوى بـ وضوح : امشي ورد ارجعي لبيتنا بلغي الوالد
حتى يتصرف بين ما اوصل لبغداد

- شـ اگوله هااااا شـ اگوله .. حچيتها وبچيت

- لتبچين ورد دخيل ربچ لتبچين ، روحي للوالد بسرعة وكل
حرف دار بيني وبينچ لازم يعرفه لتنسين ولا كلمة ، عندي كم
إتصال انتهي منهن وأكلمه بـ نفسي

- افتهمت ، رايحة

سديت الخط منه وطلعت حايرة ، ما اعرف شلون راح
يستقبل خالو الموضوع والأهم من هذا ما اعرف ماما لو
شمت خبر بـ غياب أختي شنو ممكن يصير بيها !!!

وصلت لبيت خالو الباب مفتوح دخلت اركض گاعدين ياكلون
سألتهم عنه گالوا بالمطبخ ، طبيت واگف يشرب ماي وعيونه
على البُستان ، بدون مقدمات گلت له خالو نبض مختفية
ونتصل على موبايلها مغلق

قبل ليلتفت طلع الماي من خشمه ، مسح وجهه واندار عليَّ
عيونه مفتوحه من شدة الصدمة ..

- مختفية شنو ؟!!!

- حچيت له كل شي صار بـ أقل من دقيقة

- أمچ عرفت
- لا

بعدني ما حچيتها اتصلت ماما ، سحب الموبايل مني راد
يرفضها تراجع ، مد لي الجهاز يصيح جاوبيها بوية بس لتخليها
تشك بشي گولي لها راح ابقى يم أختي

ردت افتح الخط فصلته ،
دارجع اتصل سحب موبايلي مرة ثانية ..

- بعد خالچ ارجعي للبيت بسرعة ما اريدها تحس بشي

- وأختي خالو

- اني اتصرف ، يعني شـ تريدين تسوين لأختچ انتِ

حچاها بـ عصبية وغادر المطبخ ، طلعت وراه الكل عرف
بالموضوع لأن قمر حاچيتلهم بعدها مرت خالو تستفر مني
طلع من الغرفة يلبس بـ سترته بس شافني گدامه نتر بـ كل
صوته بحيث نزيت من مكاني

- انتِ ليش بعدچ واگفة هناااااااااااا

- اي اي هسه رايحة

- دامشي وگفني صوته : لحظة أختچ عندها صديقات

- لا بس هبة و هبة اليوم مـ مداومة

ضغط على راسه بـ كفوفه حيل و طلع ؏ السريع ..
نيار همْ راح وراه ، تبعتهم
ديمشون بـ اتجاه السيارة واني راجعة للبيت شفت ماما

هيَّ صارت بـ وجهي لو مدري شـ حسيت ، الدنيا افترت بيَّ
شوية بعد واوگع من طولي ، فجأة اجاني صوت خالو صاح
متتحركين يابة ، ظليت متصنمة ، التفت بس شافها وراه سد
باب السيارة وتقدم عليها بحركة سريعة

- شديصير شنو هذا حالكم ؟!!

- شـ بيه حالنا ، طالع ويا أبني عندي شغلة و ورد مرت علمود
قمر وهسه دترجع للبيت گدامچ يلا روحن

باوعت عليَّ .. اريد استفرغ من الحالة الغريبة الـ كنت عايشتها
واكيد هالشي بين على وجهي ، عاد شلون ماما مـ تحس إذا مـ
نكون على طبيعتنا

- ناصر شـ صاير احچي

- بوية ماكو شي ، اخذي بنيتچ و ارجعي لتعطليني

- ورد أختچ وين

ورد.. هاااا ، بالبيت غير حتى رحت وديت لها الدولمة

عطاء.. جدر الدولمة بعده بالباب والبيت مقفول !!

ورد.. اقصد ببيت خالو لأن آريان مسافر فـ شنو خطية تعرفين
تضوج وحدها عاد همَ دزوا عليها ؏ الغدة

عطاء.. خوش اروح اشوفها لعد

- دتمشي قطع خالو عليها الطريق بـ جسمه : قمررر !!

- ها خير شنو بيتك صار ممنوع عليَّ !!!

- اكيد مو قصدي بس شنو معنى تصرفاتچ ، دتكذبيني

- محشوم بس گلبي ممرتاح ، واني أم أبو حيدرا

- تأفأف بـ ضجر ورفع إيده على گصته ، غمض يستغفر بـ
صوت واضح ، تساءلت بـ خوف عن سبب حيرته باوع عليها
ونطق بـ ارتباك : نبض لسه ما رجعت

- شلون يعني لسه ما رجعت !!!

- ما ادري ، رايح للجامعة اشوف شديصير بس اترجاچ قمر
تماسكي ما عندي حيل للمصايب وحق ربچ

- اني اللي اترجاك ناصر لتگول راح اعيد مأساة نظر

- ان شاء الله ماكو شي بس لتتشاءمين ، يلا يا عيني اخذي
ورد و ارجعي للبيت ساعة زمن مو أكثر و اچيچ جايب بنيتچ
وياية بس گولي يا الله

- يا الله .. ناصر احلفك بـ اعزاز گلبك لتتأخر عليَّ

- وعيونچ ما اتأخر

حچاها وصعد للسيارة ؏ السريع ، قبل ليتحرك أشر لي بـ عيونه
عليها تقدمت سحبتها من إيدها بالگوة تحركت الطريق كله
تمشي و تتعثر مدري شلون وصلنا للبيت

دخلت قبلي بـ وجهها للموبايل ، اتصلت على نبض بس طلع
الرد الآلي طار عقلها ظلت تخربط بالحچي على صوتها كلهم
التموا ما ادري احير بيها لو احير اجاوب على اسئلتهم ، ماكو
ثواني بسيطة وأمي تكومت بالگاع

صحت بيهم يجيبون عشق تشوفها راحن البنات شوية
ورجعن سانداتها من المرض والتعب مالها طاقة تمشي على
حيلها ، گعدت يم راس ماما تحاول تفيقها ما سألت شصاير
من خبصتهم عرفت الموضوع ، بس فتحت عيونها سندت
نفسها على الجدار وأشرت على إيدها يعني تريد جهاز الضغط

گمت بسرعة جبتلهيا ، قاست ضغط ماما كلش مرتفع
علمتني ؏ العلاج و تمددت بالممر رادن البنات ياخذنها للغرفة
ما قبلت بالها يم ماما ، رحت جبت العلاج انطتهيا وظليت
بيناتهن ما اعرف على منو أركز وبمنو أهتم ، هسه المصيبة
عشق مدري شجاها قبل شوية كانت حالتها أحسن شو هسه
حتى راسها متگدر تحركه

ساعات من التوتر مستحيل تنوصف ، كلما نتصل عليهم
يگولون بعدنا بالجامعة ليش وشنو ديسوون محد يعرف
ساعة واجوي بيت خالو يمنا حتى بيبي وياهم ..

للعصر سمعنا صوت سيارة خالو وگفت بـ باب البيت طلعت
اركض قبلهم فتحت له توه رفع إيده ديدگه بس شافني نزلها
وباوع عليَّ بـ تعب ، عمو صادق ونيار وراه

- أمچ شلونها

- مو زينة خالو ، كلش مو زينة ودتنتظر منك خبر

عطاء.. ها ناصر بنيتي وين ؟!!
انتَ مو وعدتني مـ ترجع إلا وهيَّ وياك وين راح وعدك

ناصر.. عند وعدي وعيونچ ، رجعت لهنا لأن بالي وياچ

عطاء.. شنو صار هناك احچولي

صادق.. شفناها بالكاميرات طلعت من الجامعة وحدها يعني
السالفة مو يمهم حتى ما قبلوا يتدخلون

عطاء.. مروان اكيد منو غيره ، الله ياخذه و يريحني

صادق.. راح نلگفه ونشوف ويا ويله إذا صدگ هوَ وراها

ناصر.. خالو نظر روح صيح لي أحمد قبل ليطلع بسرعة

نظر.. صار خالو

حچاها و طلع يركض ، أشر خالو عن بُعد على الكرسي رحت
جبت لهم اثنين لأن نيار اجاه إتصال وطلع يحچي برة ، گعدوا
التعب هاد حيلهم ، اجت قمر انطتهم ماي توه خالو ديشرب
رن موبايله سحبه من جيبه ؏ السريع من قرا الأسم تأفأف بـ
قلة صبر وانطاه رد

- ها وليدي ، لا رجعنا ..
شنو يعني ليش رجعتوا شبيك انتَ ؟!!
آريان هوَ خيط ظال بـ راسي لتطيره و ليرحم والديك
اي ادري مرتك بس لتنسى قبل لتصير مرتك هيَّ بنيتي يعني
مستحيل ارتاح إذا مترجع لحضني وحضن أمها ،
هسه بس يجي أحمد نطلع للمركز ،
المهم انتبه لتسوق سريع مناقصني مصايب كلنا هنا ما واگفة
على وجودك شوكت مـ توصل هلا بيك ،
ان شاء الله بس لتخبصني بالمكالمات ، في أمان الله

صادق.. خليك وياه ؏ اتصال ، الطريق كلش طويل وإذا ما
عرف شديصير ويانا فكره يتشتت عن السياقة

ناصر.. ليش هوَ ينطي مجال ، نيااااااااار

نيار.. نعم يابة

ناصر.. شـ صار وياك

نيار.. حصلت رقمه واسم المركز اليداوم بيه بس يجي أحمد
نتحرك ، مثل مـ تعرف وجوده ضروري هناك

بعدهم يحچون اجوي بيت عمتي ، الدنيا انخبصت من عرفوا بـ
سالفة نبض ، راح عمو إبراهيم و ولده وياهم وعمة ورهف
ظلوا يمنا ، للعشرة يلا رجعوا وجوههم متبشر بخير ، قدمت
لهم ماي شربوا وبدا خالو يسولف لنا شنو صار وياهم
بالساعات الماضية

رايحين للمركز بالواسطات يلا گدروا يفتحون التحقيق لأن
القانون العراقي يشترط لإفتتاح التحقيق بجريمة الخطف مرور
24 ساعة على غياب المُختطف

أول الأسماء الدرجهم خالو بـ ملف التحقيق بابا وبعده اسم
شبل وعلى هالأساس تم استدعائهم ، أبوية ما حضر بسبب
سفره لخارج العراق قبل يومين تقريباً وتأكدوا من هالشي عن
طريق المطار فـ تم إستبعاده من القضية وإقتصر التحقيق
على شبل كـ خطوة أولية

هذا همْ الثاني ثبت لهم عدم مغادرته للبيت طول فترة إختفاء
نبض ولحين استدعاؤه من قبل المركز عن طريق الشهود أولاً
و موقع جهاز الموبايل ثانياً ، و رغم هالشي بات ليلتها
بالتوقيف لـ غرض التأكد من صحة أقواله مع أقوال الشهود
ومن ثم يتم إطلاق سراحه في حال تم إثبات براءته فعلياً .

خالو تخبل عليهم بالمركز ، گال ماكو غير هالاثنين الهم
مصلحة بخطف البنية جاوبه الضابط الخطف بالعراق صاير
مثل شربة الماي بس انتَ لأن عايش بالخارج متدري بالأوضاع
هنا ليوين واصلة ، يعني مو شرط عداوة ممكن يكون الغرض
من هالجريمة مادي ح

تى يستفادون منكم وممكن يكون
جسدي مجرد يعتدون عليها وينهون حياتها بنفس المكان
لذلك لتحصرون تفكيركم بـ دائرة العداوة حتى لتعرقلون سير
التحقيق

ماما من سمعت كلامه انهارت نريد نسكتها ماكو ، خالة أم
هبة ومرت خالي أخذنها للغرفة ترتاح وعمو صادق طلع ويا
خالو وعمو إبراهيم للحديقة مدري شعدهم ظلوا بس الشباب
گاعدين ، أحمد طلب چاي راحت هبة تسوي لهم ، بيبي
نرجس همْ گامت توضت وراحت للإستقبال تصلي و تقرا
قرآن

انتبه على نيار دور على أختي بـ عيونه شوية وباوع لي يسأل
عنها ..

- لعد عشق وين ؟!!

- اييي نسيت اگولك ، مريضة كلش مدري شجاها تعال
شوفها الظهر ساءت حالتها وهسه كلش نايمة بالفراش

بس حچيتها نهض من مكانه ، مشيت قبله فتحت باب الغرفة
عليها رايحة بـ سابع نومة من الحرارة الوجه أحمر ومن شدة
التعرق حتى شعرها صاير ماي

ابتعدت عن الطريق فات بس شافها بينت الصدمة على
ملامحه بس مـ حچى أي شي ،
تقرب منها گعد ثاني ركباته وسحب راسها لحضنه قاس
حرارتها بـ إيده و ضرب على وجهها أكثر من مرة ينطق بـ اسمها
حتى تحس فتحت ثواني و رجعت غمضت

- من شوكت و هيَّ على هذه الحالة

- مو گتلك من الظهر

- قصدي من شوكت فقدت الإدراك ونامت هذه النومة

- هاا المغرب بعد الصلاه مباشرةً

ضغط على منطقة النحر بـ قوة بعدين فتح حلگها ، رجع راسها
للمخدة و نهض راد يطلع باوع لي ..

- بـ شنو دتحسين انتِ

- شنو ؟!!

- اعراض المرض عندچ ، وصفيها إلي

- هاا ، انفلاونزا وحرارتي مرتفعة وراسي كلش يوجعني

- ما استفرغتي
- لا

- تمام

- وين ؟؟ شو مـ گلت لي عشق شبيها

- عندها إلتهاب حاد باللوزتين رايح اجيب لكم علاج من
الصيدلية ، تردين شي من طريقي

- سلامتك

بس حچيتها طلع مشيت وياه سحب سترته من الزاوية دافتح
له الباب سمعت صوت آريان بالطرمة يحچي ويا خالو ناصر بـ
عصبية واضحة ، طلع نيار مديت راسي اباوع شديصير وياهم .
.

آريان.. يعني شنو لسه ما عرفتوا مكانها وين !!!

ناصر.. شلون نعرف مثلاً نشتم گفى إيدنا غير الشرطة
ديحققون بالموضوع واحنه همْ دنحاول نساعدهم

آريان.. و شبل طلع لو لا

ناصر.. لا بعده بالتوقيف ، و مروان مسافر لـ سوريا
التفت ديطلع صاح وراه خالو : وين

آريان.. لبيتي أخذ كم غرض مهم واروح اشوف شـ صار وياهم
بالمركز ما اگدر اگعد هنا وما اعرف زوجتي وين

نيار.. يابة روح وياه لتخليه وحده اني بس رايح اجيب علاج
للبنات واجي بعدكم ، عشق حالتها تعبانة كلش

طلع خالو وعمو صادق ورى آريان ونيار راح يجيب لنا العلاج ،
ربع ساعة و رجع من الباب علمني شلون انطيه لعشق و
وصاني عليها ألف مرة وغادر البيت مباشرةً ديروح وراهم
للمركز لأن خطية باله ويا أخوه

يومين وتحسنت حالتنا الصحية بس الحالة النفسية من سيئ
إلى اسوء واحنه منعرف أختي وين وشنو ديصير وياها
خصوصاً ماما لا ليلها ليل ولا نهارها نهار من غير شي هيَّ
دائماً تخاف على نبض أكثرنا لأن خلصت حياتها مريضة
ونايمة بالفراش بالنذورات والدويات يلا گدرت توگف على
حيلها وتتجاوز أزمتها على خير .

الأيام دتمشي وماكو أي خبر يطمئن قلبنا عن أختي ، كل شي
مجهول بابا مسافر ومختفي تماماً وشبل احتجزوه يومين
وراها اخلوا سبيله بعدما عجزوا عن إثبات التهمة عليه ، حتى
احنه صرنا نشك اختطافها وراه غاية بعيدة كل البعد عن
العداوة القائمة بيننا و بين شبل و أبوية

لا نوم لا أكل لا دوام حياتنا انقلبت رأساً على عقب بعد اختفاء
نبض ، خصوصاً خالو ناصر و الشباب مـ نشوفهم بالبيت نهائياً
غير تالي الليل يجون يريحون دماغهم ساعتين مو أكثر و مجرد
مـ يصلون الفجر يرجعون يطلعون ، وين و شنو ديسوون محد
يعرف .

بعد اسبوع ضبط مجتمعين بالصالة نقرا قرآن لأن لزمنا ختمة
لصاحب الزمان بلكي رب العالمين بجاهه يفرجها علينا وترجع
لنا أختي بالسلامة ، اندگ الباب واجوي الرياجيل استغربنا
جيتهم مو بالعادة نشوفهم بالبيت بمثل هالوقت ، گمنا نركض
استقبلناهم وأولنا ماما

عطاء.. شـ صار دخيلكم طمنوني

زفر عمو صادق الهوى بـ تعب وسند نفسه على الباب ..

صادق.. اتصل واحد من العصابة ، طالبين 550 مليون حتى
يخلون سبيلها

بس حچاها وجهت ماما نظرها على خالو ناصر وكأنما دتتسوله
بـ عيونها حتى يخلص أختي من ايديهم ..

نيزك.. وشلونها خوما مأذيها

أحمد.. يگولون بالحفظ والصون ، بعدنا ما حچينا وياها
ينتظرون قرارنا إذا ننفذ طلبهم حتى يوصلنا بيها

عطاء.. أبو حيدرا اعرف المبلغ كلش هواي...

ناصر.. لتكملين أم رحيل ، فلوس شنو الدتحچيلي عنها ليش
اكو شي أهم من سلامة نبض بس انطيني مجال

عطاء.. شنو ناوي تسوي ؟!!

ناصر.. اريد اوصل لبلال اتصلت عليه ميجاوب و ماكو غير ورد
تگدر توصلني بيه ، تحركي بعد خالچ

التفتت على سلسبيل بـ تردد صح راح يجاوبني بس أدز له
مسج لكن بنفس الوقت متأكدة راح يرد عليها لو راسلته وهيَّ
افضل مني لأن تظل زوجته مو طليقته

- تقربت منها بـ همس : حبابة سلسبيل اتصلي انتِ اني حتى
رقمي ما عنده يعني راح يشلع گلبي يلا يجاوب

- دزي رس

الة بس يشوفها يرد اعرف شنو تعني له انتِ

- ما اريد اتواصل وياه ولا يعجبني حتى محلوة بحقچ وحقي
اتواصل ويا طليقي وانتِ موجودة

- بس تعرفين بالوضع شلون متوتر بيناتنا

- لخاطر نبض على الأقل

باوعت لي بـ حيرة ، توسلتها بـ نظراتي التعبانة ، رفعت إيدها
على عيونها مُعلنة استسلامها ..

- أف ماشي لخاطرها بس

راحت للغرفة رحت وراها ، سحبت الموبايل من الـ ميز طلعت
رقمه تريد تنطي اتصال مـ تگدر .. مديت كفي من بين إيدها
ضغطت على الإتصال حتى انهي صراعها الداخلي ، بس رن
رفعت السبيكر و الوجه محتقن

- هلا والله عاش من سمع هالصوت حياتي

- وين انتَ ؟؟

- ليش ؟!!

- اتصل عليك خالو ناصر مـ ترد ، محتاجيك ضروري

- شوكت اتصل

- ما ادري شوكت بالضبط بس اليوم

- ما جاي اجاوب على الأرقام الغريبة و ما خازن رقمه ، المهم
خير خوما اكو شي ظل بالي

- نبض أخت ورد مخطوفة صار لها اسبوع تقريباً

- گولي غيرها

- للأسف ، المهم محتاجيك إذا تگدر تجي

- طبعاً جاي بس عندي شغلة بـ إيدي اخلصها وأمر لكم

- مو تتأخر ، كلهم هنا ينتظروك

- لا شغلة نص ساعة مو أكثر ، يلا تردين شي بعد

- لا

حچتها وسدت الخط بسرعة : سمعتيه گال راح اجي

- شكراً وجداً اسفة لأن حطيتچ بـ مثل هالموقف الحرج

- المهم ترجع نبض بالسلامة الباقي يهون

تقدمت حضنتها بادلتني الحضن ، ثواني وطلعت بلغت خالو
راح يجي بعد نص ساعة طبوا للصالة گعدوا على اعصابهم
والعيون ؏ الساعة يحسبولها دقيقة دقيقة

آريان.. وين صار تأخر كلش مرت 40 دقيقة على إتصاله

محمد.. انطي صبر يجوز لزمه الإزدحام تعرف الشوارع

صادق.. لا اني ما بيَّ اصبر بعد ارجعن اتصلن عليه

سلسبيل.. عمو ما طول گال اجي يجي ، رجلي واعرفه

توها حچت رن الجرس رفعت إيدها تأشر : ها شـ گلت

نهض أحمد ؏ السريع يفتح له الباب ..
دقيقة ودخل بلال وياه ،
سلم عليهم و التفت على ماما طيب خاطرها بـ كلمتين

توه ديحچي صارت عيونه علينا اني وسلسبيل واگفات وحدة
بصف الثانية ، ابتسم لنا وهز راسه بالسلام
اني جاملته بالإبتسامة بس هيَّ حتى مباوعت بـ وجهه

بلال.. اعتذر منك أبو حيدرا والله العظيم اني ما خازن رقمك
يمي وتعرف بحكم شغلي الأرقام الغريبة متخلص لذلك أغلب
الأحيان ما اجاوب خصوصاً إذا مشغول

ناصر.. ولا يهمك عادي تصير ، المهم محتاجك بـ خدمة

بلال.. عيوني الك تأمر انتَ

ناصر.. رحم الله والديك

حچاها ونهض أشر له يمشي ، أخذه للإستقبال الشباب همْ
تبعوهم ، ظليت صافنة يا ترى شنو يردون منه وشعجب ما
حچوا گدامنا ؟!! معقولة نبض بـ خطر بس ميردون يبينون
هالشي حتى لننهار خصوصاً ماما

نفضت الأفكار من راسي بـ خوف ، اسم الله عليها الله ليگولها
غير أموت إذا صار لها ، التخم وراية رجعت بخطواتي گعدت
بصف عشق وسندت راسي على كتفها الدمعة بـ طرف عيني
بس ما اريد ابچي خطية ماما عيونها تراقبنا تحاول تقوي
نفسها علمودنا فـ إذا انهارينا اكيد راح تنهار ويانا ، لازم نقاوم
لخاطرها .

بعد عشر دقائق مو أكثر سمعنا صوت الباب انفتح گمنا
نركض شو ذولة خلوا وطلعوا حتى ما گالوا على شنو ناوين ،
تلفت اعصابنا إذا همَ يتعبون بـ حركتهم مرة احنه دنتعب ألف
مرة بالإنتظار و يا ليت محصلين نتيجة ، هاي مر على
اختطافها تسعة أيام ضبط والحال مثل ما هوَ حتى عافية ما
ظلت بـ جسمنا من السهر والخوف تحديداً ماما شگد حاولت
تقاوم بالأيام المضت بس بالنهاية ما صار إلا ما وگعت وحقها
أذا لا أكل لا نوم من غير القلق الدياكل بـ روحها و هيَّ أم
متلوعة سابقاً وخايفة لا جرحها يرجع ينلچم من جديد ..

ورد.. گوم نظر أكل و بطل هالعناد ترى شلعته الـ گلبي

نظر.. ما اريد گلت لچ ما اشتهي

ورد.. شلون تالييييي

نظر.. لتصيحين عليَّ اني مو جاهل گدامچ ، كلكم هيچ
تعاملوني حتى خالو ناصر ميقبل ياخذني وياه أدور على أختي
لأن اكيد يشوفني طفل بس ميحچي بوجهي

ورد.. وين تروح وياهم انتَ مدتشوف شلون ديتعبون

نظر.. اي عادي اتحمل التعب لأن مثلهم رجال مو طفل

ورد.. كافي عااااااد اعصابي تلفانة مالي خلگك

عشق.. شبيچ تصيحين

ورد.. تعالي شوفي أخوچ خبلني من البارحة مماكل شي

عشق.. عوفيه اني أوكله

أخذت الماعون مني وسحبته عليها دتحط لگمة بحلگه دار
وجهه بـ عصبية للجهة الثانية ، لزمت إيده حيل

- ليش دتعاند نظري مو زين تبقى بدون أكل ، تتمرض

- اني ليش بعدني صغير ، شوكت أكبر حتى اگدر اوگف وياكم
إذا صار شي مو زين وما اعوفكم للغريب

- ماكو غريب كلهم أهلنا ، بعدين انتَ مو صغير بس كل ما
بالموضوع وحدك متگدر تسوي شي دتشوف شگد اكو
رياجيل هنا وما گدروا يسوون شي لأن السالفة مو سهلة مثل
متتصور ، يلا أكل لخاطر ماما هيَّ من غير شي مريضة و إذا
تمرضت انتَ تأذيها أكثر

- اشتاقيت لبزونة وخايف عليها ليأذوها واحنه مو يمها

- سحبته لحضنها تبچي : ادعي لها ترجع بالسلامة ماكو غير
الدعاء يحميها من شرهم ، لتخاف ربك موجود

بادلها الحضن يشهگ من گلبه مـ تحملت منظرهم خليت
وطلعت للصالة ماما همْ من المرض روحه