س بيبي ما قبلت ودخلت امي
وأغاريد للبيت والبيت چان كلش چبير لهذا انطوهن غرفه
واستقرن بيها لكن انتبهت على أغاريد تحسها شايله حقد
الدنيا كلها علينه وابد ما سلمت على احد حتى اني وعبرت
ايام وبدت الحرب وما استمرّت هواي وسقط النظام وبده
البوگ بدوائر الدوله

ومن السرقات لدوائر الدوله نعرف انه نظام الدوله انهار
وصارت فوضى الها اول ما الها بيوم گعدنه الصبح امي
وأغاريد ماكو وظل ابويه يصيح بحيث گد ما عصب ارتفع عنده
الضغط واخذنا للمستشفى ونزلوا ضغطه وهو يكرر وين راح
الگى أغاريد بهاي الفوضى

ومرت شهور بالسنة السقوط وبعدها كملت خامس اعدادي
ونجحت لسادس اعدادي وچانت سنة گشره لانه بدت
الطائفيه البغيضه وبوقتها طلعت معدل زين وقدمت على
كلية الشرطه وحمدلله نقبلت لانه طولي وزني وخالي من
الأمراض

داومت بالكليه وكملت السنه الاولى وبدوام السنة الثانيه
انتهت الطائفيه اللعينه بوقتها اتعرفت على بنيه أداوم بكلية
التربية قسم التاريخ والتعارف صار عن طريق ولد صاحبي اخته
اداوم وياها بنفس القسم وهنه صديقات البنيه حلوه ودائماً
اروح ويه صاحبي من يروح لاخته للجامعه والبنيه اسمها
ميقات

واخذت رقم موبايلها وبالبدايه چانت بس سوالف بينه وبعدها
صار إعجاب وبعدها ربطتنه علاقة حب استمرت إلى ما
تخرجت من كليه وفي وقتها چان عمري 23 سنه وميقات
ظلت تلح إلا تجي تخطبني
واني عمي وسام كلش قريب عليه لهذا فاتحت عمي وسام
بالموضوع لانه استحي من ابويه

اما ابويه عجز ومل وهو يدور على أغاريد وبوقتها عمي وسام
راح على اهل زوج امي وعرف انه زوج امي أنه اثناء الطائفيه
مقتول لهذا ضاع كل اثر لامي وأغاريد

وعمي وسام فتح موضوع زواجي ويه أبويه وبيبي رحبوا
بالموضوع وبوقتها عن طريق صديقي أخذنه موعد ويه اهل
ميقات وچان يوم جمعه وتم التعارف بين أهلي واهلها وحچوا
بموضوع الخطوبه

وتمت خطوبتي ويه ميقات واحنه اتفقنه انه تعيش بالمزرعه
ويه أبويه وبيبي وهي واهلها رحبوا بالموضوع وعقدنه محكمه
واهلي ما قصروا بتجهيز شتريد يجيبولها وچنت مستعد
انتظرها السنه الرابعه لما هي تخلص جامعه بس ما قبلت
وگالت السنه الجايه أداوم

اكو أشياء في وقتها من فرحتنه بشريك حياتنه ما ننتبه على
اي شي واني ما انتبهت انه ميقات چانت تلح بموعد الزواج
وتريده قريب وهذا السبب عرفته بعدين

حددنه موعد العرس ونسوان عمامي ما قصروا ويايه والله لو
امي موجوده ما تسوي مثل نسوان عمامي واجى يوم العرس
الموعود وفرحتي لا توصف بميقات لكوني احبها اموت عليها

وچانت ليلة العرس ليله ما أنساها طول العمر وبداية زواجنه
چانت سعاده بعد 6 شهور بده النكد على اصوله ولا عبالك
ذيچ ميقات الحبيتها

اما عدها موضوع ما يوگع من حلگها وهو موضوع الحمل
والطفل وهي چانت تريد تراجع دكتوره على موضوع الطفل
بس اني ما قبلت اما موضوع الغيره هذا ما احچي بي مع هذا
احبها طبعاً إذا يدگ موبايلي تجي تگعد يمي ولازم افتح مايك
حتى تسمع والف مره گتلها احنه الضباط بينه يصير فشار
وغلط وعيب سمعي بس ما يفيد ودائماً نتعارك وابويه وبيبي
يحچون وياها ويصالحونه المهم مر على زواجنه 10 شهور وهي
تريد تراجع دكتوره من كثر الإلحاح مالتها وافقت

وحجزت واخذتها لدكتوره وبعد السونار والفحص ما بيها شي
وانطتها تحليل صورة الدم وگالت الدكتوره خلي زوجچ يحلل

اما التحليل سوت ميقات التحليل وگالوا بعد 3 ايام تطلع
النتيجه

يتبع/

#البارت الخامس



احياناً تظن ان مكانتك كبيره بقلب
شخص ما ثم تمر بمواقف تجعلك
تضحك على سخافة ظنك

ريماس / اكو دائما جمله يگولون الحياة تعلم اكثر من
المدرسة وهذا صح المدرسه تعلم القراءة والكتابة والمدرسه
تنطي الدرس وبعدين تمتحنك اما الحياة تمتحنك وبعدين
تنطيك الدرس واني بحياتي چانت الدروس كلش صعبه
وخصوصاً چنت أواجهها وحدي ما عندي ناصر ومعين بس رب
العالمين

بيوم هذا الولد اخذني على غرفة البراميل من بعد ايده من
حلگي ظليت اعيط وهو خاف من ردة فعلي رجع خله ايده على
حلگي وايده الثانيه على رگبتي ويخنگ بيه حسيت روحي راح
تطلع بعدها سمعت صوت واحد يصيح وينكم اريد واحد ينفخ
التاير مال سيارتي وهو خف ايده من على رگبتي ورجع خله
حلگه بأذني وبصوت خافت يگلي / إش ولا نفس

ورجعت سمعت صوت ثاني يگول / شنو عايفين المحل فارغ
المن مفتحين المحل والثاني يجاوبه صار ساعه اصيح واني
خفت لا يرحون ويعوفوني ويه هذا الولد اكو قريب عليه برميل
دفرته برجلي حيل وچان هدفي انه اسوي صوت الفت انتباه
هذوله يحچون بره ومن حسن حظي البرميل چان فارغ واكو
برميل هم فوگاه هم فارغ وگعن اثنينهن وسون صوت كلش
عالي

وهذا الولد أتفاجأ والاثنين الچانوا يحچون بره صاروا يدگون
بالباب ويصيحون منو هنا وهو صار موقفه ضعيف كلش
وارتبك وايده رخت على حلگي دفعت ايده قوي وظليت اصيح
عمو اني هنا هذا الولد حابسني

زاد الدگ على الباب قوي والرياجيل البره يصيحون افتح الباب
وأني اعيط وبهاي الأثناء معرف شنو اخذ من الگاع وضربني
بحيث الضرب صارت على ايدي بوقتها عطت عيطه شاغت
روحي بهذا الوقت نكسر الباب ودخلوا اكثر من رجال والظاهر
من عياطي وهمه مفزعين الناس البره لان من طلعوني شفت
هواي ناس اما الولد ربطوا ايده وانتظروا الشرطه وما مر هواي
وقت حتى أجتي الشرطه وسبحان الله الناس الواقعه صارت
گدامهم وكل واحد يحچي شكل ناس يگولون الظاهر هنا
عصابه بخطف البنات وناس تگول الظاهر بينهم شي واختلفوا
وناس گالوا چان يريد يقتلها ويبيعها اعضاء بشرية اخير شي
الضابط صاح كافي وينهم الولد والبنيه اشروا علينه وگال
الضابط للشرطه / جيبوهم خلي نأخذهم للمركز واحنه هناك
نشوف شغلنه وياهم واخذوا معلومات عن الاثنين الكسروا
الباب نحتاجهم للشهاده

وبالفعل رحنه صعدنه بسيارة بس شنو ايدي الضربني عليها
مورمه جابونه للمركز ودخلوني بغرفة بيها ضابط بعده شاب
بس چان منزل راسه ما اعرف بشنو چان يقرأ والولد الشرطي
لدخلني يم الضابط دگ تحيه وگال / سيدي اجانه نداء انه اكو
بنيه مخطوفه بمحل مال بنچرچي وحررنه المختطفه والقينه
القبض على الخاطف

والضابط رفع راسه اني بوقتها جنت بيا حال بس انتبهت عليه
چان ولد حنطاوي وشواربه سود ثخان وحواجبه هم سود ثخان
وعيونه سود شعره اسود كثيف گالبه ليوره گال / اي وشكو
جايبهم روحوا اخذوا أقوالهم واسجن الخاطف

الشرطي / سيدي المدير گال التحقيق بهاي القضيه انطي
لملازم اول بيان

بيان / ادري يا قضيه واني اجازتي من اليوم تبدأ وأريد اروح

الشرطي / سيدي هسه شنو اجاوب المدير

بيان / ماكو داعي اني راح احقق بهاي القضيه وآمري لله
والولد اشمره بالتوقيف

ريماس / وساعتها باوع عليه وطلب مني اجي اگعد على
الكرسي المقابيله اتقدمت وگعدت على الكرسي وبده كلامه

بيان / اول شي شنو اسمچ وعمرچ وشلون صارت الحادثه

ريماس / ذكرت اسمي وعمري وحچيت شلون صارت
الحادثه ظل صافن عليه وبعدها گال

بيان / يعني انتي ما تعرفي ولا هو مستدرجچ ولا بينكم علاقه

ريماس/ لا سيدي اني ما اعرفه صاحلي اني عبالي دى ينطيني
فلوس ورحت عليه

بيان / شنو ينطيچ فلوس ليش انتي اي واحد يصيحلچ
تروحيله شنو انتي تشتغلين مگديه

ريماس/ لا مو گدايه مساعده

بيان / ترى ذني اثنينهن نفس المهنه ما رحنه بعيد بس هاي
الحادثه مو خطف هاي إعتداء لانه الخطف يكون يا من
شارع او بيتچ يعني المكان عام مو للولد بس بهاي الحادثه
المكان للولد يعني انتي جايه عليه لهذا هو يگدر يصفط بكيفه
يگدر يگول صاحبتي او اي شي

ريماس/ والله سيدي هذا الصار كله حچيته حتى ضربني على
ايدي
ورفعت ايدي وشافها مورمه

بيان / اهلچ وين انتي عمرچ صغير يعني قاصره همه يجون
يقدمون دعوه على الولد والقانون ياخذ مجرى

ريماس / آني ابويه ميت وامي هم ميته واني عايشه يم زوجة
أبويه و دليته على بيتنه وطلب من شرطي انه يروح يجيب
صفيه زوجة أبويه وطلب مني ابقى گاعده يمي

بوقتها اكو ثلاجه صغيره بالغرفه گام جاب الي بطل مي وعلبة
عصير ومن تقرب يمي انطاهن الي سأل انتي تريدين تاكلين

ريماس / سيدي جوعانه من البارحه على العشه
ظل يهز براسه ورجع طلع من الثلاجه صمون وجبن مثلثات
وانطاني

بيان / انتي ليش تطلعين تگدين ليش ما اهلچ يصرفون عليچ


ريماس/ سيدي ما عندي احد يصرف عليه ابويه من جان
مريض هم چنت اخذه اگدي بي اما صفيه زوجة أبويه هي

عايشه من الگدايه مالتي

بيان / بس تعرفين انه في حالة الشرطه القت عليچ القبض
وانتي دى تگدين يذبوچ بالاحداث بابا حاولي من طلعين منا
بعد لا ترجعين لأمور الگديه مره ثانيه ترى ذوله اشوفوهم
بالتقاطعات والشوارع ترى ذوله وراهم عصابات ملتزمتهم
بيوم إذا عرفوا بيچ احتمال يقتلوچ او يسوولچ شي وهاي
حادثة هذا الولد البنچرچي ابسط مثال گدامچ الناس بره غابه
والبقاء للأقوى فهمتي وهسه تجي زوجة ابوچ واتفاهم وياها

ريماس / اكلت وشربت عصير وبعدها دخل شرطي گال
لضابط انه اهل الولد البنچرچي بره

بيان / عوفهم خليهم هسه خلي تجي زوجة اهل البنيه واسلمها
الها وبعدين التفت عليهم

ريماس / ومرّ تقريباً ساعه او اكثر ما اعرف بعدها دخل الولد
الشرطي الي راح على صفيه وگال / انه زوجة أبويه بره ادخلها
وآمر الضابط انه تدخل ودخلت صفيه وهي تباوع عليه وتخز
بيه وبده الضابط كلامه بنبره حاده

بيان / انتي زوجة ابوها شلون مسرحه البنيه بالشوارع حتى
اجيبلچ فلوس هاي جريمه لأنه البنيه قاصر انتي تدرين اليوم
چان راح يعتدى عليها من ولد شاب

صفيه/ يايايايا عزه العزاچ ام الگمل والله سيدي اني ما
مطلعتها انت تدري هاي شالعه گلبي لا بالمدرسه داومت
وشگد چنت اوديها وكل نوب تشرد مللتني وسخه لا يفيد بيها
نظافه ولا نصيحه وكل مره تشرد من البيت وارجعها الله ما
يجرعها متحملتها لكون ابوها وصاني عليها

ريماس / اني بقيت ساكته وصفيه نزعت شحاطتها واجتي
عليه وتضربني على راسي وهي تگلي / اكيد هذا صاحبچ
خزيتينه الله يصخم وجهچ بالدنيا والاخره والضابط صاح بيها
بصوت عالي

بيان / اگعدي وين گاعده انتي في بيت الخلفچ لا ضربيها حقها
تنهزم منچ إذا انتي تضربيها شوفي لچ هسه اگدر احولچ
للاسره المجتمعية هذا تعنيف
هاي بنيه صغيره احتويها اكسبي بيها اجر
يله هسه قدمي دعوه على الولد حتى يتحاسب على الاعتداء
على ريماس

صفيه / لا سيدي احنه ما نشتكي عليه الله ياخذ حقنه شنو
اشتكي عليه حتى ننفضح احنه وهاي المعزايه الناس شتگول
عليها منو يصدگ هو معتدي عليها هسه يگولون هذا صاحبها
واخذتني للبيت بعدين عرفت هي ليش عافت الشكوى

بيان / كل رجل يحلم بالحياة المثاليه انه يزوج الي يحبها
وتحبه ويكون عنده هواي فلوس ويصير عنده اولاد وصحته
زينه بس هاي تبقى اماني لانه رب العالمين ما ينطي للبشر
كل إلا يبقى عنده شي ناقص يركض عليه واني حبيت ميقات
حب بس الله اليعلم بي وبنفس الوقت ما اگدر اوصف فرحتي
بزواجي منها بقى موضوع انجاب الاطفال وهذا الموضوع بحد
ذاته صار كابوس حياتي

إلحاح ميقات بهذا الموضوع خبلني ومن أخدتها لدكتوره
وفحصت وسونار گالت الدكتوره نظيف ما بي شي بقى بس
التحاليل وبعد 3 ايام رحت للمختبر استلم التحليل انطوا الي
ومن سألت على النتيجه ما قبلت ام المختبر تگول النتيجه
وگالت يم الدكتوره هي تگللكم

وبوقتها عندي صديق اخو يشتغل بمستشفى حكومي وگال /
تگدر تروح عليه للمستشفى وتسأله وبالفعل بوجهي رحت
عليه للمستشفى شاف التحاليل گال / صاحبة التحليل
مستحيل بيوم تخلف لانه عدها أملاح قويه بالدم وهاي الأملاح
تقتل الحيوانات المنويه وتبقى ارادة رب العالمين فوق كل
شي

هذا چان بالنسبه الي صدمه وخصوصاً ميقات من تعرف شنو
راح يكون موقفها الافضل ما اگللها ومن رجعت شفتها

ميقات / هااا بيان رحت على المختبر شنو النتيجه

بيان / اي رحت واستلمت نتيجة التحليل نظيفه كل شي ما
بيچ

ميقات / اني ما بيه شي يعني الخلل يمك شوكت تروح تحلل
الدكتوره تگول لازم 3 ايام ماكو علاقه زوجيه وتروح تحلل

بيان / بعيني من اليوم ماكو علاقه زوجيه وبعد 3 ايام أروح
احلل عندي سؤال الچ ميقات في حالة طلعت ما اخلف
تبقين ويايه لو تعوفيني

ميقات / بصراحه بيان ابقى وياك فتره تتعالج بس إذا ما
يصير بعدني ما مفكره ابقى لو لا

بيان / تدرين ميقات اني حتى لو ما تخلفين ابقى وياچ العمر
كله

ميقات/ هذا حچي صدگني تصبر عليه فتره وبعدها لازم تحب
يصير عندك طفل ولو تزوج عليه لو طلگني

بيان / لا ميقات اني من زوجتچ مو على الإنجاب اني زوجتچ
لكون احبچ
وبعدها سكتت ما ناقشتها وبعد 3 ايام رحت سويت تحليل
والنتيجه ظهرت بعد نصف ساعه وچانت النتيجه انه اني
سليم كل شي بيه وقادر على الانجاب بيومها گلت ويه نفسي
خلي اگللها انه السبب مني

ومن رجعت للبيت سويت روحي ضايج وبلغتها انه اني ما
اخلف وهي ظلت تبچي وتدگ وتلطم

ميقات / شوف بيان تروح من باچر تراجع دكتور لا وربك ما
ابقى

بيان / اجيت حضنتها وظليت ابوس بيها واگللها تدللين من
باچر اروح على احسن دكتور

وبيومها چانت عندي خفاره بالمركز وثاني يوم دوام يعني لباچر
العصر يله ارجع وبعد ما رضيت ميقات وسلمت على ابويه
وبيبي وطلعت رحت لدوام واني بدوام كل شويه تخابر عليه
ميقات وتحچي بموضوع الإنجاب وكلامي واحد وياها وهو انه
راح أراجع دكتور

وللصبح بده الدوام لهذا ما اگدر ارد على كل اتصالتها واني ما
اعرف ليش هلگد تتصل المهم وصلت لساعه 10 الصبح بعد
ما اتصلت

لما خلص دوامي رجعت للبيت اول ما دخلت
للبيت صارت بوجهي بيبي بستها من ايدها وسألت على أبويه
جاوبتني بيبي انه نايم

صعدت فوگ لغرفتي ما لگيت ميقات عبالي بالحمام رحت
صحت بأسمها ما جاوبت اتصل على رقمها مغلق نزلت لبيبي
وسالتها على ميقات
گالت / الصبح نزلت مبدله واخذت ملابسها وراحت لاهلها
ومن سألت بيبي شنو السبب

بيبي / والله بعد بيبيتك ما ادري تگول اتصل على بيان ما يرد
شوف رايح ويه منو مو كافي متحملته وهو ما يخلف ليش
بيبي انت ما تخلف شو گلت النه

بيان / بصراحه تفاجأت يعني هي البارحه عرفت اني ما اخلف
اليوم گامت تعايرني
المهم ما حچيت شي بس گتلها لبيبي مو ما اخلف بس عندي
التهابات وظلت بيبي تهز بيدها واتصلت على عمي وسام وهو
للمغرب يله اجى وابويه هم گعد من النوم وبعد العشى عرف
عمي وسام على موضوع ميقات وشنو گايله لبيبي

وسام / بيان انت كل عقلك تريد نروح وياك عليها والله وبالله
لو زوجتي تحچي عليه هيچ گدام واحد من اهلي ما اروح عليها
بوجهي اروح للمحكمه اطلگها وانهل ابوها لابو اليطلع وراها بابا
المره المتحفظ سر زوجها طلگها من هسه هاي راح تلعب بيك
شاطي شباطي

سامي / گول يا الله وسام هاي تغار عليه وگالت هيچ يعني
احنه اي واحد يگول كلمه بساعة عصبيه نطلگها والطلاگ مو
شويه ان ابغض الحلال عند الله الطلاگ

وسام / هاي انت گلت ابغض الحلال يعني حلال مو حرام
وثانياً اخذ معلومه الزواج مو مسألة حلال والحرام الزواج مسألة
احترام وتقدير وحب وعشره إذا نفقد وحده من ذني الشروط
الأفضل ينفصل من البدايه لانه راح تتعب بحياتك وشريك
شنو سويله ما راح يغزر بعينه واني إذا تريدون ترحون عادي
اروح وياكم بس دى اگللكم الموضوع غلط

بيان / واني لكون احب ميقات صرت ادورلها على عذر
واتفقنه على ثاني يوم العصر نروح الهم وهذا الوقت كله اتصل
على ميقات ورقمها مغلق وعلى ثاني يوم رحنه اني وابويه
وعمامي ومن دخلنه ابوها وأخوانها وجههم ثگيل وبعد السلام
گعدنه وبده الكلام ابويه

سامي / احنه اليوم جيتنه على بنتنه ميقات ويشهد الله اني
اعتبرها بنتي وما يهون عليه زعلها او اي شي يغثها

ابو ميقات / شوف ابو بيان البنيه من حقها من تتصل بزوجها
يجاوبها يعني افترض هي مريضه متخربطه تريد شي إذا ما
تتصل على زوجها عليمن تتصل

بيان / عمي ترى ماكو اتصال ما اجاوب عليه منها بس مرات
يكون عندي شغل او اجتماع شلون يعني انت صير بمكاني

ابو ميقات / إذا هيچ أنت معذور حچينه بالموضوع الاول
والموضوع الثاني بنتي مثل كل بنيه تريد تنجب اطفال وابنكم
ما يخلف وما يقبل يراجع دكتور شنو الحل بعيچ حاله

وسام / والله يا ابو ميقات اني اعرف انه الزوجه تكون ستر
وغطى على زوجها اما بنت حضرتك ما خلت واحد ما گالت اله
احنه اهله ما نعرف نزلت هي تعاير بزوجها گدام اهله ورجعت
گالت الكم وبعد الله اليعلم المن گالت بقت بس تنزلها على
الفيس وترى ابنه مو ما يخلف ابنه عنده التهابات وحاجز عند
دكتور وابنه مو ما يقبل يراجع ترى هو عرف قبل ما بنت
حضرتك ما تجيك بيوم بصراحه اعذار بنتك واهيه إذا ما تريده
خلي تگول ما اريده وبعينه تدللون من باچر يروح للمحكمه
ومثل ما دخلنه بالمعروف نطلع بالمعروف وما يظل خاطركم إلا
طيب واحنه راح نروح ومن هي تقرر شنو تريد رقم زوجها يمها
وتتصل عليه وتبلغه

يتبع /

البارت السادس



لا تتسول وداً بارداً ولا تسأل وصلاً متكلفاً
لا تنتظر مجيء من لا يجيء كن متقدماً
بعقلك ومتأخر بقلبك

ريماس/ كارثه من كوارث الدنيا انه تكون يتيم جور عليك
الدنيا وماكو احد تشكيله ويحميك من الي يظلمك وبوقتها
من چنت بالمركز الضابط طلب من صفيه انه تشتكي على
الولد بس ما قبلت وچانت ذريعتها انه تخاف عليه من
الفضيحه وأكيد هذا كذب لانه بعمرها صفيه ما خافت عليه
ومن رجعت للبيت كتلتني كتله بس الله اليعلم بيها

بحيث عياطي اجوي الجوارين عليه واني منا ايدي مورمه ومن
ضمن الدخلن للبيت من الجوارين چانت جارتنه ام زهراء
وتعرفون بقت النسوان تسال شبيها ريماس وحرام عليچ
ضربيها وهي كانه چانت متعمده هذا الشي حتى تفضحني
وبعدين فهمت ليش سوت هيچ

صفيه / مليت وحق ربچن اني غير اخاف الله واگول يتيمه
وين تروح غيري وحده ذبها بشارع لچلاب تنهش بلحمها

ام زهراء / گولي يا الله انتي بمثابة امها ليش شسوت وخطيه
ليش هيچ ضاربتها وأيدها مورمه خلي نأخذها للمستشفى

صفيه / ولچ عيني ايدها مو آني ضاربتها مرافجه واحد
ومتواعده ويا بمحل مال بنچرچي ومتعاركه ويا وضاربها واجتي
الشرطه جرجرتني اني تالي عمري تجي الشرطه جرجرني
بالمراكز

ام زهراء/ معقوله يمعوده البنيه مو مال هيچ سوالف
أسكتي يمعوده النسوان شوف بعينهن سوالف بناتهن
ويطمطمن وانتي تفضحين البنيه گولي يالله

ريماس / واكثر الجوارين ما قبلوا بتصرفها بس الحچايه من
تطلع بعد كل حچي ما يفيد ولليل اجوي رياجيل 2 ونسوان 2
اتقربت على الصاله واسمع

صفيه / عيني غيري وحده تشتكي على ابنكم وينحكم بس إذا
تريدون تفضوها بعيد عن الشرطه بكيفكم

ريماس سمعت رجال گال / ماكو داعي احنه نحلها ودي بينه
أي مبلغ تريدوا احنه ندفعه

صفيه / البنيه شوهت سمعتها وهو ضاربها وأيدها مورمه
لازم نعالجها وتعرفون هاي كلها فلوس ومصاريف والبنيه راح
تگعد بلا شغل فتره طويله ايده مضرره من الضربه واحنه كلنه
عايشين على شغلها

ريماس جاوبت وحده من النسوان وگالت / عيني سويتيها
معيشه عشيره كامله هي كلها مگديه وبعد يا سمعه انتي من
مديحتها بالشوارع حتى حبله تجيچ شنو قابل بالشارع ينطوها
بلاش إلا يلزمون ويجعصون يله ينطون اكو احد هسه ينطي
لوجه الله

وصفيه چانت ذكيه فرتها عليهم بكلام هاي المره وجاوبتها
صفيه / همزين ذكرتيني باچر اقدم شكوى بالمحكمه يحيلون
البنيه للطب الشرعي اكيد معتدي عليها

ريماس/ هنا اكو رجال گام يحچي على المره الحچت ورجع
كمل ويه صفيه انه شنو المبلغ الي تريده

صفيه /نريد 5 ملايين لانه علاج للبنيه وهي راح تگعد فتره لما
ايدها تصير زينه احنه شلون نصرف

ريماس / والرجال ظل يماطل ويه صفيه بالسعر وانه في حالة
اشتكت صفيه ما راح تحصل فلوس بس الولد ينسجن لهذا
تقبل بمليونين افضل
وصفيه ظلت تحچي وتريد تصعد السعر بس الرجال چان
قافل على السعر وگاموا يريدون يرحون بس صفيه قبلت
بالسعر واتفقوا انه ثاني يوم يجيبون الفلوس الها

هنا فهمت ليش تنازلت بس بقت اعرف ليش فضحتني گدام
الجوارين وبالفعل على ثاني يوم استلمت الفلوس الصبح
وبعد ما استلمتهن بنص ساعه طلعت اما اني بقيت وأخوتي
بالبيت وايدي توجعني كلش بحيث گعدت ابچي لانه ما عندي
احد يوجهني ولا يحميني من صفيه

چنت مكرفصه ومخليه راسي بين ركبي من سمعت دگ
الباب گمت رحت فتحت الباب چانت ام زهراء دخلت يمي
وسدت الباب وظلت تباوع عليه بعدها گالت

ام زهراء/ شبيچ ريماس ليش تبچين شنو صفيه ضربتچ

ريماس/ لا ما ضربتني بس اني ابچي على حظي والله البارحه
كل گالته صفيه كذاب
وحچيت كل شي لام زهراء ظلت متعجبه

ام زهراء/ حرام عليها هاي ستر بنيه وهي هم عدها بنات بس
تعرفين هي چذابه البارحه تگول اني اخاف الله بيها اني صار 3
ايام من گتلها اخويه يريد يزوج وما الگى احسن من ريماس اله
هسه عرفت هي ليش فضحتچ لأنه إذا ازوجچ معناها بعد منو
يجيبلها فلوس قابل تزوجچ وتستر عليچ وتخسر الدجاجه الي
تبيضلها ذهب لهذا فضحتچ حتى لا احد يجي يخطبچ وبالفعل
البارحه النسوان بين صدگن كلام صفيه وبين ما صدگن
واعتيادي الي ما صدگن طلعن فضحنچ بالمنطقه وبالفعل بعد
ماكو احد يجي يخطبچ نهائي

ريماس / ابد ما گالت ام زهراء خطبتچ

ام زهراء/ انتي مو بنتها المن باقيه يمها ماكو احد من اهل
ابوچ او اهل امچ تروحين يمهم وتخلصين من صفيه

ريماس/ اني ما اعرف لا اهل أبويه ولا اهل امي بس أبويه قبل
ما يموت بالمستشفى وصاني اروح لاهله وابقى يمهم وما
يقبل ابقى يم صفيه ومن خلصت من دفن ابويه گتلها اريد
اروح كتلتني وما خلتني اروح

ام زهراء/ اي عيني يعرفها الله يرحمه عشرة عمر شنو قابل ما
يعرفها ما اعرف وين لگاها لصفيه واتزوجها انتي تدرين ابوچ
اول ما اجى سكن يمنه بس انتي ويا حتى الله يرحمه يگول
لابو زهراء اجيب ريماس يمكم سبحها اختي ام زهراء وتبدل
الها وچان يجيبوچ يمي الله يرحمه غلطه الوحيد من زوج
صفيه شوفي ريماس انتي ايدچ مورمه اني الي

وم اجي على
صفيه بعد ما تخلص دياحتها اگللها اخذ ريماس للمستشفى
الحكومي ناخذ اشعه خاف بيها كسر بأيدها ونروح على اهل
ابوچ واخلصي منها

ريماس / بعد ما اتفقنه اني وام زهراء للعصر يله اجتي صفيه
وهي تتأفف من الطرق هي وين چانت ما اعرف وشافتني
واگفه عاطت بيه تريد مي

رحت جبت مي الها وهي تحچي ويايه طلعت من جنطتها جهاز
وهاي اول مره اشوف الموبايل چنت اشوفه عند الناس بس
اني ما اعرفه وظلت تباوع بي وهي تسألني غديتي الجهال
واني بس اگللها اي

وبعد رجوع صفيه بساعه ونص اجتي ام زهراء وبلغت صفيه
وهي من گد ما تعبت من الدياحه بعد ما بيها حيل تطلع لام
زهراء لهذا دخليها للصاله
دخلت ام زهراء لصاله واجتي صفيه ترحب وتهلي بأم زهراء
والجدير بالذكر انه صفيه من النوع لسانها عسل وتگدر تاكل
اي شخص بالسانها وأسلوبها الحلو

ام زهراء / مريت عليچ الصبح ما لگيتچ وچانت موجوده بس
ريماس والجهال وظل بالي يمچ گلت خطيه خاف مريضه

صفيه/ لا والله چان عندي زياره لابو الجوادين قاضي الحاجات
سلام الله عليه ودعيتلچ

ام زهراء/ زياره مقبوله وجايتچ بطلب واتمنى ما ترديني

صفيه / ياااا بعيني انتي اختي صدگ چذب آمري

ام زهراء/ اليوم من اجيت شفت ايد ريماس خطيه مورمه
ونكسر گلبي عليها وادري انتي تحبيها لريماس مثل بنتچ
وگلبچ ما ينطيچ عليها وانتي صلين وصومين وتزورين گلبچ
چبير انتي خلي اخذ ريماس للمستشفى خلي ياخذولها أشعه
خاف بيها كسر حتى يصبوها وانتي لا تعبين روحچ عندچ جهال
اني اخذها وهي مستشفى حكومي ما يأخذون بس فلوس
الباص والكروه واني ادفعهن الها في سبيل الله ولو انتي ما
مقصره وياها

صفيه / والله خجلتيني بكرمچ واني ما عندي مجال اروح
للمستشفى مري عليها الصبح واخذيها للمستشفى وجزاچ
الله الف خير

بيان / مرات القدر يخلينه بنفس ظروف شخص في يوم ما
نتقدناه حتى نشعر ونشوف شلون كان هذا الشخص بهذا بهذا
الموقف بصراحه اني من كبرت چنت دائماً انتقد أبويه بكونه
چان ينفذ كل طلبات امي هسه صرت بنفس الموقف وعرفت
هسه ليش ابويه چان دائماً يدور اعذار لتصرفات امي لكونها
يحبها واني هم نفس موقفه لكون احب ميقات احاول بكل
جهدي الغي عقلي وأفكر بس بگلبي

لانه لو فكرت بعقلي المفروض اطلگها اضافةً الچان يساعدني
انه أضعف هو أبويه ويگلي ميقات تحبك لكن تريدك تراجع
دكتور حتى يصير عدها طفل منك لو ما تحبك چان ما رادت
طفل منك

اما عمي وسام لا يفكر بعقله بيوم رجعنه من بيت اهل ميقات
گال / شوف بيان يشهد ربي اني ما اعتبرك ابن اخويه اني
اعتبرك ابني لانه حمدلله اني ما عندي بس بنات بس نصيحه
لوجه الله الما حفظت سرك وتعايرك بمرض دگلها طابع من
هسه افضل هاي مو صاحبة طويله وياك

سامي / وسام خطيه يعني المره اول ما تعبر عن غضبها
بخصوص موضوع ويه زوجها وتروح زعلانه نطلگها الله واكبر
ومن يطلگ ميقات افترض طلع بيان ما يخلف منو تقبل بي
بعد اقلها ميقات تحبه وتصبر عليه

وسام/ بيان معليك بحچي ابوك هو منو فرعن حنان غيرك
سامي وشتتحمل ميقات بابا هي يوم واحد ما تحملت مرض
زوجها وطلعت ناقلتها بأخبار الجزيره
وشنو تگول خاف بيان ما يخلف منو تقبل بي عمي اني انطي
بنتي لميس هديه لبيان وربك تعال هسه ويايه وياك سيد
وأعقد على لميس وآخذها وياك وأكسر خشمها لميقات خلي
تولي

سامي / بيان عوفك من حچي عمك وسام انطي وقت
لزواجك

بيان / اني هذا الحچي كله احس روحي ضايع ميقات ليش
سوت هيچ استمر الوضع ما يقارب اسبوع واني بهذا الاسبوع
صح مشتعله نار جوايه بس ابد ما حاولت اتواصل ويه ميقات
او حتى اتصل على رقمها لهذا ما اعرف رقمها مفتوح او لا لانه
من رجعت من بيتهم ابد ما اتصلت بيها ابد

وبيوم أني بالدوام دگ رقم ميقات رديت عليها

ميقات / بيان اريد احچي وياك

بيان / اني حالياً بالدوام بس احچي خاف تروحين تگولين
لاهلچ بيان اتصل عليه ما يجاوب

ميقات / الكلام مو مال موبايل اريد اشوفك واحچي وياك
تعال لبيتنه

بيان / عذريني لبيتكم ما اجي تردين نلتقي بغير مكان او نحچي
بالموبايل براحتچ

ميقات / نلتقي بالمطعم القريب على الجامعه قبل نلتقي بي
قبل زواجنه باچر العصر

بيان / تمام بعيني على الموعد
وغلقت الموبايل وياها بس إذا اگول مو فرحان كذب احس
روحي طايره من الفرحه لأنه احبها بس ردت اشوف هي هم
تحبني لو لا

ومن رجعت للبيت بعد ما خلص دوامي لگيت بيت عمي
وسام كلهم موجودين وعمي وسام بصراحه اني اعتبره اخويه
مو عمي وهو ما عنده ولد بس بنات واكبر بنيه عنده عمرها 17
وهي لميس

سلمت وگعدت وظليت اشاقه ويه عمي وسام وزوجته وكل
ما اصد ناحية زوجة عمي وسام بنتها لميس گاعده بصفها
الگى لميس مثبته نظرها عليه وابد ما تحول نظرها حتى من
اخلي عيني بعينها تبقى تباوع عليه لهذا اضطر احول نظري
عنها خوفاً لا ينتبهون علينه

بعدها ضجت من نظرات لميس استأذنت منهم بحجة اريد
ابدل ملابسي رحت صعدت فوگوبدلت ملابسي وسبحت
ونزلت واني گاعد بصاله دى نسولف زوجة عمي وسام وبناتها
وبيبي كلهن حولن ل

لمطبخ يسون عشه وللامانه احنه كلنه
نحب زوجة عمي وسام لان ملگاها حلو ترحب بالضيف الرايح
والجاي وأخلاقها عاليه كلش بحيث بين يوم ويوم تگول لعمي
روح شوف امك شوفها شنو محتاجه وقبل ما بيبي أصلاً
تنتقل للعيش بالمزرعه زوجة عمي وسام واسمها لقاء چانت
بيبي عايشه عدهم ولكون بيبي چبيره بالعمر حتى مي الوضوء
والطشت اجيبها يمها تتوضى حتى بيبي تگول / لقاء زوجة
وسام احسن چنه عندي

في وقتها صاح عمي وسام على لميس / گال جيبوا مي شي
نشربه قبل العشه

بيان / اجتي لميس انطت مي لابويه وعصير ورجعت نطت
لعمي واني چنت گاعد على القنفه مقابيل القنفه الگاعد عليها
أبويه وعمي وسام

وهي من دى تنطيني گلاص المي ايدها ترجف وتباوع بعيوني
وحتى صارت كلش قريبه عليه بحيث احسها تتنفس عطري
حتى العطر مخليته هي شميته بيها خزرتها وهي خلت العصير
والمي قريب عليه وراحت واني هذا كله أغالط روحي واگول
اني متوهم ما معقوله تفكر بيه

وبوقت العشه نفس الشي شلت حالي بس صافنه عليه واني
حبيت اذكرها اني مزوج كل شويه اعدل الحلقه مالتي بس ما
يفيد اخرها طگت روحي وگلت لعمي وسام گدام الكل اليوم
اتصلت بيه ميقات

سامي / اي يا الله شنو گالت راح ترجع

وسام / عساها لا ردت على العموم اي شتريد وشگالت راح
ترجع

بيان / لا باچر اشوفها واحچي وياها لانه من اتصلت اني
بالدوام وما گدرت احچي وياها لهذا باچر اخذها للمطعم وهذا
المطعم وجه خير چنت التقي بي بميقات وعسى باچر هم
يصير خير عليه وترجع ويايه ميقات

چنت مصور من راح اگول هيچ لميس راح تصد وجهه عني
بس ثبتت العكس ظلت نفس وضعها صافنه بوجهي وگلت
ويه نفسي خلي أتحملها ساعه ساعتين ويرحون لبيتهم همه
ما ساكنين ويانه ولميس بسنه حسنه يله مره تجي ويه اهلها
للمزرعه
وبعد العشه گامت لقاء زوجة عمو وسام وبناتها نظفن البيت
كله ما خلن شي يعتب عليهن وچنت مصور راح يرحون بس
ظني طلع غلط بقوا باتوا يمنه واني حدود الساعه 1 بالليل
صعدت نمت فوگ بغرفتي بعد ما حسيت على شي

وبين النايم وبين الگاعد احس اكو واحد فوگ راسي ومن
فتحت عيوني طلع مو حلم چانت لميس واگفه صافنه بوجهي
گتله/ بس اريد اعرف من البارحه لليوم صافنه بوجهي مضيعه
شي بوجهي وشنو هاي القباحه واگفه فوگ راسي شلون
دخلين غرفتي واني نايم

لميس / صباح الخير بيان بيبي گالتلي روحي على بيان وگعدي
ورا دوام وحضرتلك ريوگ

بيان / روحي اني هسه انزل
وهي نزلت ظليت صافن على نفسي معقوله اني أتوهم أشياء
ما موجوده لو البنيه صحيح عينها عليه گمت غسلت وبدلت
ونزلت لگيت الكل گاعدين وبس گعدت لميس صبت الچاي
وانطته الي

هاي المره تجاهلت نظراتها وبعد الريوگ طلعت وشغلت
سيارتي من دى أحركها اجتي لميس اشرت اجتي يم السياره
نزلت الجامه وگتلها بنتره/ خير شكو

لميس / هذا موبايلك انت نسيته على المرايه يم المغسله

بيان / فشلت منها وابتسامه خفيفه شكرتها واخذت الموبايل
ورحت للدوام ومر اليوم عادي وقبل ما ينتهي الدوام بساعه
اتصلت بيه ميقات
تذكرني بالموعد وانه هي راح تطلع من بيتهم واني هم
استأذنت من المدير وطلعت رحت للمطعم وصلت وانتظرت
ما يقارب ربع ساعه بعدها وصلت ميقات اجتي سلمت
وگعدت مقابيلي

ميقات/ اهون عليك بيان صار اسبوعين من طلعت من يمك
بالكذب ما سألت عني

بيان / ما اعرف تحچين هيچ دى تلطفين الجو ترى انتي لحالچ
طلعتي واتصل عليچ ما جاوبين ومع هذا اجيت وراچ لبيت
اهلچ وحتى بالكذب ما طلعتي سلمتي علينه وتدرين لو
متأخره اسبوع چان وصلت ورقة طلاگچ لباب بيتكم والله اني
هسه جاي عليچ وعمي وسام متخبل يگول المره طلعت سرك
ما تفيدك طلگها واخلص منها

ميقات / اني ما اعرف عمك وسام شكو محروگ گلبه مره
ورجلها هو شعليه وبعدين موبايلك شيسوي يم لميس من
اتصلت الصبح هي جاوبت شنو نايمه يمك بالغرفه

يتبع /

#البارت السابع



حين يتعلق الموضوع براحتك النفسية
يحق لك ان تستغني عن الجميع
بدون أي تأنيب ضمير

ريماس / الغرگان يچلب بگشايه واني غرگانه چنت اريد اي
شخص ينتشلني من هاي الهاويه اريد اعيش حالي حال اي
بنيه لهذا لگيت آمّ زهراء گشايه وتعلگت بيها چنت اريد اروح
لأهلي واخلص من صفيه ومن اتفقت ام زهراء وصفيه على
انه تأخذني للمستشفى بقيت اعد الدقايق احس الوقت ما
يمشي

حتى نومي بذيچ الله چان متقطع وانتظر الصبح بفارغ الصبر
ومن صبح عليه الصبح چنت كلي آمل انه راح ابدي حياة
جديده وحدود 8 الصبح اجتي ام زهراء وچنت دى اسوي ريوگ
لصفيه لانه اني لو آموت لازم اخدم صفيه

وصفيه من شافت ام زهراءكالت / شكو جايه من الصبح
خليها 9 او 10 شنو المستشفى راح طير

ام زهراء/ عيني راح نلزم سره على ابو الاشعه بعد مستشفى
حكومي وأنتي تعرفين يله يمه ريماس ما ظل وكت شويه
همي ايدچ

ريماس/ واني هم على السريع كملت الريوگ ورحت لبست
الجبه الي ما عندي غيرها وحمد لله حتى بالگدايه چنت اگدي
بيها وطلعنه نمشي حتى نوصل لشارع العام واجرت تكسي
وصعدنه بعدين سألتها/ آكلج خاله في حالة لگيت بيت جدو
وبقيت يمهم انتي من ترجعين شلون اكيد صفيه راح تجي
عليچ تگلچ ريماس وين

ام زهراء/ احنه من نندلهم ونتفق وياهم ترجعين ويايه وهمه
يجون يستلموچ من صفيه إذا تبقين يمهم غير صفيه من
تعرف تسوي بيه الما صاير ولا داير لا حبيبتي حاسبه حسابي

ريماس/ ظلت السيارة تمشي بينه لما وصلنه للمنطقه
وسألنه على المدرسه واحد واگف بباب بيت
وصدمنه من گال / ماكو مدرسه هنا بهذا الاسم

ام زهراء / ولچ ريماس أنتي متاكده من اسم المدرسه

ريماس / والله اسم المدرسه واسم المنطقه حافظتهن لانه
أبويه ظل يكرر بيهن عليه هوايه
والسايق تكسي / گال عيني ما اظل افتر اني رجال على باب
الله انزلن بعد انت دورن على العنوان

ونزلنه اني وام زهراء وانطته الكروه وظلينه نمشي بشارع بداخل
المنطقه صار گدامنه ابو أسواق كلش چبيره

ام زهراء/ تعالي خلي نسأل هذا ابو الاسواق اكيد يعرف

ريماس / دخلنه وصار گدامنه ولد 2 چانوا يرتبون بالبضاعه
وسألتهم ام زهراء على اسم المدرسه وجابوا الولد اثنينهم انه
همه عمال مو من المنطقه
واكو واحد وسطة عمر جاوبنه انه هاي المدرسه چانت بزمن
صدام هذا اسمها هسه غيروا غير اسم
وگال انه نمشي نخلص الشارع وندخل بالفرع على جهة
اليسرى صير گدامنه

بعدها الرجال گال اني خلصت مسواگ بس انطي فلوسهن
وتعالن ويايه اني ادليكم عليها لانه قريبه على بيتي

وبقينه واگفين لما الرجال تحاسب على مسواگه وطلعنه ويا
اخير شي سألته ام زهراء انه هو ساكن قديم بالمنطقه وعرفنه
انه هو يصيحوله

ابو منتصر وگال / اي قديم ساكن اني هنا ولادتي بهاي
المنطقه ليش من سألتي على المدرسه گتلچ هاي اسمها
القديم وغيروا اسمها

ام زهراء / حمدالله نريد نسألك المدرسه هاي چان قبل ساكن
بيها حارس تعرفه

ابو منتصر/ اي اعرفه ابو سلام الله يرحمه واصلاً هاي المدرسه
چانت مختلطه واني چنت بيها

ام زهراء/ شنو ابو سلام ميت

ابو منتصر / اعتيادي ميت عمره چبير وحتى ام سلام هم ماتت


ام زهراء / ياااا يعني بس ولدهم موجودين

ابو منتصر/ يا ولدهم ماكو احد منهم بالمدرسه وهمه ابو
سلام وام سلام ماتوا قبل ما يسقط نظام صدام وسلام أصلاً
عايف اهله اما الولد الباقين نزار صلوات على النبي دكتور
بالنمسا واحمد منتسب بالجيش وابراهيم يكولون صاير
مضمد بمستشفى لانه من طلعوا منا بعد فتره گاموا ما يجون
للمنطقه وضاعت اخبارهم

ريماس/ ظلينه اني وام زهراء وحده تباوع على الثانيه لانه ما
چان هذا بالنه انه يكونون أصلاً ما موجودين

ابو منتصر/ انتوا ليش سألون على بيت ابو سلام

ام زهراء/ والله يا اخويه هاي البنيه بنت سلام وجايه على آهلها
أشوفهم

ريماس/ وظل الرجال يهلي ويرحب بيه ومن عرف ابويه
متوفي ظل يترحم عليه وعزمنه على بيته بس ما قبلنه نروح ويا
ومن سلمنه عليه نريد نروح گال الي

ابو منتصر/ اگلج انتي مو امچ أنوار الله يرحمها لو اني غلطان

ريماس/ اي امي انوار

ابو منتصر/ بيبتج ام حمزه تروحين عليها لو لا

ريماس / لا ما اروح لانه ما اندل بيتهم
وهو أشار على فرع گال قبل ما يخلص هذا الفرع البيت قبل
الاخير هذا بيت ام حمزه بعدها سلمنه على ابو منتصر ورحنه
وما عرفنه البيت وين بالضبط سألنه عليهم والناس دلونه
عليهم

ودگيت الباب عليهم وبعد ما وگعت ايدنه من الدگ طلع ولد
عشريني سلمنه عليه وحچت ويا

ام زهراء/ عيني نريد أم حمزه

ريماس / والولد دخل للبيت وبعدها طلعت مره عجوز محنية
الظهر وگوه تمشي ومن وصلت يمنه سلمنه عليها ومن ام
زهراء گالت الها هاي ريماس بنت بنتچ انوار ظلت تبجي
ورجعت جرتني عليها وحضنتني وتبوس بيه ودخلتنه للبيت إذا
اوصف البيت يعني مال ناس فقره بس البيت چبير

گعدنه بالصاله وبعد حدود

ربع ساعه اجتي وحده تقريباً بعمر
صفيه فيما بعد عرفت هاي بثينه زوجة خالي وام زهراء ظلت
تحچيلهن على وضعي ويه صفيه وانه اني قبل يومين چنت
بمركز الشرطه بسبب انه اگدي وطلبت من بيبي انه ابقى
يمهم
بس بثينه زوجة خالو تخبلت وحچت ويانه بنتر

بثينه / عيني احنه شعلينه تجي خطار ربع ساعه وتروح هله بيها
وتشرب بس مي ماعندي حتى عصير انطيه مو تبقى يمي
شعندي اني ملجئ أيتام ذاك بيت ابوها وتگعد بي وهي طول
عمرها گاعده ويه صفيه هسه تذكرت صفيه صارت مو زينه
يله عيني الله وياكم احنه ورانه شغل ما منظفين

ريماس / ظلت ام زهراء تحچي تريد منها ابقى يمهم بس
موقف بثينه ثابت وبيبيتي لا حول ولاقوه الها گمت بوست
بيبي وطلعنه وكسر حاجز الصمت

ام زهراء/ مرات نلوم البنيه من تطلع من الطريق والناس الها
الظاهر لكن اكو بنات شيسون ما عليهن لوم

ريماس رجعنه للبيت وچان الظهر لانه نرفع اذان الظهر ومن
دخلت للبيت ويايه ام زهراء سألتنه صفيه شنو گال الدكتور
سوت اشعه لو لا وليش تأخرنه

ام زهراء/ ما سوت اشعه والناس هوايه گوه يله وصلنه السره
شافها الدكتور يگول هذا رض خلي بس تدهن الورم ودفي
تلف عليه بانذج هو يصير زين

ريماس / عفتهن يسولفن ورحت بدلت ملابسي بعدها
سمعت صفيه صيح عليه رحت يمها

صفيه / ام الگمل بيچ بخت تدرين اني عبالي تطلعين للشغل
گلت الناس من شوف ايدچ مورمه ينطوچ بس اليوم اجتي ام
رحاب وجابتلچ خوش شغل اليوم تجي بالليل وتفهمچ يله
روحي سوي غده

رحت للمطبخ سويت غده وكلنه تغدينه ونظفت ولليل هلت
علينه ام رحاب وصاحت عليه صفيه اجيب مي وچاي سويت
چاي وجبته الها وام رحاب عينها عليه اول ما دخلت

ام رحاب / شوفي صفيه هي جسمها حلو يخبل وعيونها حلوه
كلش بس قبل ما نصعدها للشغل لازم نتعب عليها هواي من
اهتمام بمظهر ومن تعليم يعني لازم صرف حسب علمي بيچ
انتي ما عندچ إمكانيه وبعدها انتي تحددين تريدين شغلها (
عملي لو نظري )

بيان / الانسان من يحب يكون اعمى وتكون اكو غشاوه على
عيونه لهذا ما يشوف عيوب محبوبه ولما تروح الغشاوه يصير
يدقق على الاشياء الچان ما يشوفهن واني من حبي لميقات
ما اشوف اي شي من عيوب ميقات من شفتها بالمطعم
وحچيت وياها سألتني موبايلي شنو يسوي يم لميس

جاوبتها / اني نسيته على المغسله وهي ردت عليچ حتى لا
تظلين تدگين ومن ما ارد عليچ تزعلين

ميقات / بيان اني بصراحه اريد يصير عندي طفل ومن حقي
لهذا طلعت من يمك مو المعنى ما اريدك

بيان / ترى گتلج ميقات راح أراجع وبعد انتي ويايه اني يم
الدكتور وانتي يم زوجته هم كذلك دكتوره حتى تطمئنين

ميقات / اني ارجع وياك بس مو ويه اهلك اريد بيت وحدي

بيان / شوفي مال بيت وحدج انسيها هاي السالفه انتي
گاعده بمزرعه چبيره وبيت چبير الطابق الفوگ 5 غرف بس الچ
وماكو احد وياچ غير بس بيبي وابويه وأكثر الشغل سوي زوجة
الفلاح آنتي گاعده شنو عذرچ تريدين ترجعين أهلاً وسهلا ما
تردين بكيفچ نطلگ وكل واحد يروح لحاله
وچان قصدي منها تهديد اما الأصل أنه احبها ومستحيل
اطلگها

ميقات / اني راح ارجع وياك لكوني احبك والله وهسه گدامك
راح اخابر ابويه وأبلغه وارجع وياك

بيان / اتصلت على ابوها وبلغته راح تروح ويايه وبعدها
وتعدينه وطلعنه للمزرعه وچنت مصور راح الگى عمي وسام
وعائلته رايحين لگيتهم موجودين وبيت عمي مهند موجودين
كذلك

وكلهم سلموا على ميقات ورجعت على نفس سالفة مال
لميس صافنه بوجهي واحنه اتغدينه بالمطعم لهذا گبل طفرت
لغرفتي اخاف تنتبه ميقات وچان ظني من صعدت وچنت
ابدل ملابسي دخلت ميقات مثل العاصفه

ميقات / اگلك بيان شنو القصه شو لميس صافنه بوجهك
اكو شي بينكم

بيان / اجيت يم ميقات وحضنتها
وجاوبتها / حبيبتي يا لميس اني يمي حبيبتي ميقات التفت
على غير وحده وثانياً وين تباوع عليه بابا تخلين عقلچ بوحده
طفله عمرها 17 سنه گولي يا الله كبري عقلچ
وگوه سيطرت على الموقف واني چنت تعبان گبل نمت ولله
يله نزلت اما ميقات بس نزلت گبل نزلت ورايه عبالك احسها
تراقبني مسوين چاي گعدنه نشرب الچاي ولميس نفس
وضعها قررت اخلي حد الها وعدنه عمي مهند وهو اصغر واحد
وهو من النوع النسونچي لهذا دائماً موبايله بيده ويتختل وهو
من شوينه چاي ماكو غمزلي عمي وسام

وسام /يله بيان خلي نروح نشوف عمك مهند حلب الهايشه

بيان / طلعنه ندور على عمي مهند لكينه لازم موبايله
ويسولف من وصلنه يمه غلق الموبايل وظل عمي وسام
ناصب عليه على انت مره وحده ما گادر عليها انوب تريد
الثانيه وعمي وسام عاف عمي مهند ورجع عليه

وسام / بيان ارجع واكرر ميقات ما تفيدك عوفها وإني انطيك
لميس بنتي وين الگى واحد زلمه ومعدل مثلك

بيان / عمي لميس على عيني وراسي ان شاءالله يجيها
الاحسن مني وميقات اني احبها واحنه متفاهمين

وسام / اني نظرتي ما تخطئ وبعدين تذكر كلامي بس
اتمنالك السعاده

ورجعنه المغرب ما لگيت ميقات بالمطبخ وياهن اشرت
براسي لميس وطلعت وهي طلعت ورايه وچنت واگف يم
سيارتي تقربت عليه لميس وا

ني ما انكر جمال لميس بس اني
اشوفها مثل اختي وما عندي مشاعر اتجاهه وهي بعدها
مراهقه ما اريدها تعيش بخيال

لميس / هااا بيان تريد شي

بيان / شوفي لميس انتي بنت عمي واختي بنفس الوقت
اعتبرچ لهذا لا ظلين تباوعين عليه بنظرات مفضوحه اني دى
أغالط روحي لكن اليوم حتى ميقات انتبهت عليچ لهذا إذا
تعيدين هاي النظرات راح اضطر اگول لعمي عليچ

لميس / يعني ميقات انتبهت وانت ما انتبهت

بيان / يعني شنو ما افتهمت

لميس / اني احبك بيان وهاي مشاعري واني حره بيها شنو
تريد تحاسبني على مشاعري اني ما مأذيتك بشي مشاعري
بداخلي

بيان / إذا اگول نصدمت بكلام لميس صدمة عمري اريد
اجاوبها انتبهت ميقات صارت قريبه عليه لهذا بدلت
الموضوع ويه لميس وگتلها / خلصي سادس هسه وبعدين
معدلچ هو يحكمچ

لميس / اني گلت خلي اسألك شنو رايك شنو التخصص
ادخله شويه انت احسن مني وافهم مني على العموم اني
أشكرك بيان ما قصرت

بيان / ابتعدت عنه لميس وميقات واكفه تباوع على لميس
وهي تبتعد واكيد ما راح تسكت

ميقات / شعدها هاي المسمومه الصفره واكفه يمك ترى
اساليبه مكشوفه اني ما ارتاحلها يعني إذا دى تحچي على
دراسه شكو منفرده بيك بره لو ما عدها فاينه

بيان / والله انتي بطرانه امشي يمعوده هي طفله مخليه عقلج
بعقلها
ومر ذاك اليوم عادي وبعد معاناة يومين راحوا عمامي
وعوائلهم اما اني وميقات بدت رحلة العلاج وهذا الدكتور عم
واحد من اصدقائي وزوجته كذلك دكتوره واني أصلاً متفق ويه
الدكتور وزوجته انه ما يبلغون ميقات انه منها السبب ابد لهذا
بقينه كل شهر نروح على الدكتور والدكتوره ويگولون زوجتك
ما بيها شي واستمرينه سنتين ونص بس شنو ميقات احسها
گاعده على أعصابها ويايه

وربي يشهد رغم كل المشاكل اني احب ميقات وما اگدر
بدونها وبيوم رجعت لگيت بيت عمي وسام يمنه وطبعاً اني ما
اگدر اگول لعمي وسام لا تجي لأنها أصلاً المزرعه مو مالتي

المهم سلمت وكل العاده لميس ونظراتها المهم اجاهلتها
وللمغرب گبت العيطه اسمع صوت ميقات كلش عالي اجيت
لگتيتها تغلط على لميس وعمي وسام تخبل گام يصيح عليها
ويگللها سكتي حتى اني اصيح عليها واگللها اسكتي ما يفيد
وبعد عناء يله سكتت في حين لميس ساكته بس دموعها
تنزل
وعمي وسام سأل ميقات ليش تغلط على لميس

ميقات / انت لو مربي بنتك چان ما محتفظه بصورة بيان
بموبايلها ومكبره صورت بيان وتباوع عليها

وسام / شوفي بنتي متربايه احسن منچ وهسه إذا صورة بيان
بموبايل لميس هسه اذبحها جيبي موبايلچ لميس

بيان / واخذ عمي وسام الموبايل واني وميقات وگفنه يمه
فتش الموبايل كله گدامنه ماكو اي صوره الي بموبايل لميس
وميقات تحلف تگول صورة بيان بموبايل لميس ومن سأل
عمي وسام لميس على كلام ميقات جاوبت

لميس / بابا صورة بيان مو بموبايلي انت صديقي على الفيس
وچنت داخله على صفحتك ودى اصفح بمنشوراتك وصارت
گدامي صوره انت وبيان وجنت دى اباوع عليها واجتي ميقات
گامت صيح وتغلط عليه

وسام / ميقات انتي ما عندج ثقه بنفسچ وبزوجچ لهذا اعذرچ
بيان انصحك تروح تراجع بمرتك دكتور نفسي لان حالتها
صعبه لقاء انتي وبناتچ گدامي لسياره وهذا البيت يحرم عليه
وعلى عائلتي طالما زوجة بيان بي

يتبع /

#البارت الثامن



عندما تعجبنا الروح تعجبنا
الملامح حتى وان لم تكن جميله

ريماس / من تكون بعمر صغير أكو أشياء تنحچي گدامك بس
ما تفهم معناها ومن تسأل لازم تسأل شخص يحبك ويريد
الخير الك واني اي شخص يحبني ويريد الخير الي ماكو وما
عندي ثقه بأحد غير ام زهراء

لهذا من چانت تحچي ام رحاب وصفيه ما افهم شنو قصدهم
وما افهم هو شنو الشغل يم ام رحاب وچنت بس اسمع
الحچي وام رحاب چانت تحچي بحيل صدر ومسيطره

ام رحاب / صفيه انتي ما تعرفين شنو نوعية شغلنه البنيه
تشتغل ويانه لازم تكون فاهمه وذكيه والا نروح بالرجلين
وبعدها يجي مظهرها هذا راس مالها لانه الدفع يكون عليه والا
اليدفع على شنو دافع

صفيه / هي من النوع ذكيه بس تعلميها گبل تاخذ شمره
وعلى المظهر انتي گلتي بالسانچ اني ما عندي اصرف عليها
شلون بهاي الحاله

ام رحاب/ شوفي صفيه بشغلنه شگد صرفين على المظهر مو
خساره لانه يجيچ اضعافه وما تخسرين ابد

صفيه/ شلون يعني افترضي انه صرفت فلوس وبعدين ماكو
احد دفع بيها شلون يعني اكون اشتريت سمچ بالشط

ام رحاب / صفيه شغلنه ما بي خساره ابد وربچ الفلوس بي
كرف حتى بالنظري هم كرف فلوس اما العملي هاي لا تحجين
بيها الليله الوحده بذاك الفلوس شبيچ

صفيه/ شنو عملي وشنو نظري وشنو الفرق بينهم

ام رحاب / العملي تروح تبياته النظري إلكتروني يعني جيب
الزبون هي واحنه نستلمه ونأخذ منه وتوصلها حصتها وما بي
تبياته ابد

صفيه / خليها على النظري ونشوف الفلوس شگد وبعدين
نفكر نحول على العملي واني مو هنا مشكلتي المشكله ما
عندي فلوس اصرف على شكلها منين اجيب

ام رحاب / شوفي حبيبتي احنه بشغل ما نعرف لا اخ ولا
صديق ولا جيران هاي كلها نعوفها على صفحه اهم شي
الفلوس صير قاتل ومقتول على الفلوس وأنتي كذلك تقبلين
اشغلها يمي وما انطيچ فلوس

صفيه/ لا عيني شنو بله فلوس قابل تطلع تشتغل لوجه الله
تعالى

ام رحاب / شوفي احنه مثلچ نحاسب على الفلس إذا تردين
اصرف عليها عادي بس هذا كله اسجله دين وترجعوا اليه ويا
أرباح تقبلين كان بها ما تقبلين الحچي مالتي كأنه ما سمعتي
مني اي حچايه

صفيه / عيني ابدي وياها وتوكلي على الله

ام رحاب / اني اتفقت وياچ على شكلها بعدني ما اتفقت
وياچ على دوره الالكترونيه لازم تدخل دوره الكترونيه وهاي هم
بفلوس ويحتاجلها موبايل هذا هم بفلوس

صفيه / عيني اصرفي وشگد يصيرن الفلوس من شغلها
ننطيچ الدين

ام رحاب / اتفقنه شغلها يبدي ويانه من باچر استلمها منچ
ساعه ب 11 بالليل وترجعلچ ساعه 8 الصبح

ريماس/ هذا الحجي كله صار ودار گدامي اني ما فاهمه شي
وعلى ثاني يوم الصبح صار شي ما چان في بالي گاعدين دى
نتريگ ودخلت بثينه زوجة خالي حمزه وهي لا دگت باب ولا
شي واحنه أصلاً بابنه الخارجي حمدلله والشكر حتى سرگي ما
بي ينسد يعني عادي اي واحد يدفعه ويدخل
وبثينه صارت بالصاله يله انتبهنه عليها

بثينه / صفيه اني چنت حالفه يمين اعظم ما اعتب بيتچ من
ايام المرحوم سلام بس مال ادزين بنت انوار علينه آخذوها
عدكم حتى تاخذين البيت الچ تگعدين بي انتي ونغوله مالتچ لا
عيني ساعتها اروح اشتكي عليچ فهمتي بعد ما اريد بنت انوار
توصل بيتي

صفيه / اشبيچ انتي هو منو واصل يمچ صار سنين حتى
ناسيتچ وناسيه خلقتچ هسه لما صيرين گدامي ما اذكرچ

بثينه / اي غشمي روحچ البارحه اجتي هي وياها مره ما اعرفها
بعد ما احچي نبهتچ وخلص

ريماس/ عافتنه بثينه وطلعت بعد ما فجرت قنبله بوجه صفيه
وهي گبل شمرت كوب الچاي على الحايط وفلشته بحيث
سوه صوت اني فزيت گبل هجمت عليه وجرتني من شعري

صفيه/ البارحه وين چنتي انتي والگواده ام زهراء احچي على
السريع

ريماس/ اني من چنت صغيره لما كبرت اكذب إذا اگول اني
ما أخاف من صفيه لانه چانت راعبتني من اجتي بثينه وحچت
كل شي بعد خلاص لازم احچي كل شي لهذا اضطريت احجي
كل الصار بما انزل واذا اگول صفيه تخبلت قليل بحقها

وصفيه ما قصرت خلت العبايه على راسها وطلعت شايطه
على بيت ام زهراء واني طلعت للگراج اسمع شنو راح يصير
لانه بيت ام زهراء بصف بيتنه واسمع صوت صفيه يلعلع
ودگ بابهم بكل قوه

صفيه / والله هسه اروح اشتكي عليچ ماخذه البنيه وتتفرفرين
بيها على البيوت تريدين تبيعيها وهسه أجتي الناس عليه

ريماس / ومن سوء حظ ام زهراء المسكينه انه ابو زهراء چان
موجود وعلى صوت ام زهراء كل الناس طلعت تتفرج واكو
نسوان اجني على صفيه ويريدن يعرفن شنو الموضوع وصفيه
ظلت تغلط على ام زهراء وابو زهراء انسان طيب الاخلاق لهذا
ظل يتعذر من صفيه ويتأسف على السوته ام زهراء في حين
هي كل شي ما سوت

ورجعت صفيه للبيت وهي تنبه عليه انه ما احچي ويه ام زهراء
ابد وللعصر عرفنه انه أبو زهراء كاتل ام زهراء كتله معدله
وطاردها على اهلها

واني لليل لساعه 11 رحت على بيت ام رحاب ومن دخلت ما
شفت احد غير ام رحاب وبنتها رحاب
ظليت اتلفت ماكو

كل احد والبيت هدوء وام رحاب هي
وبنتها ظلن يباوعن عليه ويتفحصن عبالك دى يشترن سلعه
ويريدن يتفقن عليها اخرها حچت

رحاب / ماما فدوه لعمرچ هاي شسويلها يعني هاي بمثابة
زباله وتريديها ورده شلون

ام رحاب / ترى هي يرادلها بس تشتغلين عليها مو مستحيله
رحاب اليوم اريد منچ تبدين تعلمين بيها شلون تهتم بنفسها

رحاب / هاي لو اخليها في برميل قاصر هم ما تنظف شنو
هاي ما چانت تسبح عفيه خلي تسبح بالبدايه وتفرش
اسنونها وتخلي عطر يله ما أتقبل الوسخ اني

ريماس / صاحت عليه ام رحاب اخذتني للحمام ودخلت يمي
علمتني على الدوش شلون افتحه وشامبو وليفه وطلعت وهي
تگلي / سدي الباب هسه اجيبلچ ملابس

وبصراحه إذا اريد أقيس ويه حمامنه كل مقارنه ماكو بيت ام
رحاب كل شي حلو حتى الحمام كون واحد يفرش بي وينام
نزعت ملابسي وگعدت اجلف بروحي طلعت الوسخ مال
عمري كله حتى المي ينزل مني اسود خلصت من جلف
شعري وجسمي وظليت العب جوه الدوش بالمي هواي لما
صاحت عليه ام رحاب حتى اطلع وطلبت مني افتح الباب
حتى اخذ ملابس ومنشفه اخذتهن منها الملابس كلها جديده
ما ملبوسه سواء الداخليه لو التراك

بدلت وطلعت شافتني ام رحاب وهي تگلي هسه طلع وجهچ
وأخذتني للمغسله وانطتني فرشه ومعجون وظلت واگفه يمي
وتعلم بيه افرش سنوني كملت رجعت سرحت شعري
ورشتلي عطر وأخذتني على غرفه بيها رحاب وطبعاً رحاب
عمرها ما يقارب 25 سنه وهي حلوه ومعتنيه بنفسها كلش
ومن دخلنه غرفتها چانت تحچي بالموبايل ومن شافتنه دخلنه
أنهت المكالمه وامها تگللها / شوفي رحاب گتلچ ما عدها احد
يعتني بيها والا هي حلوه جنن
بعدها عافتنه ام رحاب وطلعت

رحاب / اول شي تعالي اعدل وجهچ لانه هو راس مالچ

ريماس / وراحت جابت خيط وملقط واني هاي اول مره ينحف
شواربي شاغت روحي للخالق نظفت بس شواربي ورجعت
على حواجبي سوتهن بطريقه كأنه مرسومات في حين هي ما
شالت هواي شعر من حواجبي وتكلي حتى يبينن طبيعيات

بعدها جابت المگص وعدلت شعري وسوت گذله
وطلعت موبايل من علبه وگالت

رحاب / هذا موبايل وبي سيم كارت راح اعلمچ على
استخدامه لانه اكثر شغلچ وجذب الزبائن بي

بيان / اكو ناس بحياتك تحسهم يدورون حجه عليك لانه
تكون تصرفاتهم ما الها معنى غير هذا الشي اني بمرور الوقت
ويه ميقات دائماً احسها قنبله موقوته ويايه چنت امتصّ
غضبها عن طريق أنه احضنها أو اطلعها او اجيبلها هديه لكن
مع اهلي شسويلها ما اعرف بيوم الي تعاركت بي ويه لميس
وعمي وسام صاح بزوجته لقاء وبناته انه كلهم يروحون على
سيارته بوقتها زوجته وبناته رادن يروحن يبدلن بس هو ما قبل
وهن كلهن طلعن راح وگفن يم سيارته والدنيا غروب

وعمي وسام راح لصاله دى ياخذ السويچ مال السياره
وموبايله واني ورا أتوسل بي وابويه يطلب منه يگعد بس هو
ما يقبل وبيبي صيح عليه انه يبقى بس الليله وباچر الصبح
يروح وهو اذن من طين وأذن من عجين اجى بوس بيبي
وابويه وطلع واني ورا گتله / عمي والله أذا رحتوا بهاي المغربيه
بعد ما احچي وياك للموت صدگ چذب تاخذ على حچي مره
هنه نسوان بينهن

وسام / بيان انت مو بس ابن اخويه أنت ابني أعتبرك بس
مرتك انت هواي ناطيها مجال واگلك حچايه وحده وراها بس
اي حچي بيني وبينك ماكو وتحسب عمك وسام مات وكلامي
هو العيب إذا يطلع من اهل العيب هذا مو عيب انت فهمت
كلامي مع السلامه

بيان / صعدوا كلهم لسياره وانتبهت چانت عمه لقاء ولميس
يبچن وتحركت السياره وراحوا اختفوا من گدام عيني اي كلمه
اگولها ما توصف النار البداخلي حبي لعمي وسام ما ينوصف
وهو أقرب شخص الي وهاي انتهت علاقتي بي دخلت للبيت
الجني راكبني ما شفت ميقات صعدت فوگ لگيتها بالغرفه
ظلت تباوع عليه گتلها / انتي عندچ رب ودين اريد افهم شنو
معنى الصار ويه لميس

ميقات / الف مره گتلك لميس عينها عليك انت ما صدگ
اني شفتها مكبره صورتك وصافنه عليها

بيان / ترى انتي مو عاقله والله ترى اني نفسي انشر صوري
على مواقع التواصل الإجتماعي واكو هواي بنات يعلقن
ويتغزلن بيه شنو تروحين تتعاركين وياهن ترى ميقات صرتي
لا تطاقين ارحميني
وبعدها صارت مجادل بيني وبينها وعركه وظل ابويه يصيح
عليه ويگلي انزل اريد احچي وياك

نزلت والله ابويه ظل يحچي عليه ويگلي مرتك تحبك وتغار
عليك وهاي كل مره هيچ وحتى بيبي تگول وكت مغربيه مو
زين المشاكل وضيجت الخلگ

ونزلت ميقات دگ حچي على ابويه وبيبي وتگللهم
ميقات / عجوز البين رجليچ بالگبر وتحرضين زوجي عليه
تردين بيان ياخذ بنت ابنچ لو تموتين

بيان / صدگ بعد ما تحملتها ضربتها وحلفت عليها تروح تبدل
حتى اخذها أوديها لاهلها بس ظلت تتوسل بأبويه واني
غلطت وزوجي واغار عليه وبعد ما أعيدها وراحت باست راس
بيبي

وظل أبويه يحچي عليه وهي صعدت فوگ وگتله لأبويه/ تدري
راح أموت شلون هيچ عمي وسام طلع من بيتنه

سامي / خلي نفوت كم يوم ونروح اني وياك نطيب خاطره

بيان / بس اني ما اقتنعت بحچي أبويه ومر عليه ذاك الليل
واني محترگ حتى غرفتي فوگ ما صعدت وللصبح بس
صعدت

جبت ملابسي مال الدوام بدلت وطلعت للدوام قبل
انتهاء الدوام بساعتين طلعت من دوامي ورحت على بيت
عمي وسام دگيت الباب طلعت عمه لقاء ونفس وضعها تهلي
وترحب

لقاء /ادخل بيان يمعود هذا بيتك ليش واگف بالباب

بيان / عمه موجود عمي اريد احچي ويا والله من البارحه لليوم
ما بلعت الصار وما ادخل إلا هو يگول خلي يدخل هاي اني
واگف بالباب

دخلت عمه لقاء وغابت حدود ربع ساعه بهذا الوقت شفت
لميس واگفه بالشباك وتباوع عليه بعدها طلعت عمه لقاء
تقدم رجل وتأخر رجل وصلت يمي وهي ما تعرف شلون
تحچي وكل حچيها بارتباك

لقاء / بيان ادخل للبيت صدگ چذب يعني انت ما تجي إلا
على وسام راح ازعل عليك عمتك لقاء ما تجي شوفها

بيان / الله عليچ عمه حلفتچ شنو گال عمي وسام

لقاء / والله احرجتني بحلفانك يگول خلي يرجع منين ما اجى

بيان / ما حچيت شي سلمت عليها وحلفتها توصل سلامي
لعمي وسام ورجعت للمزرعه احس روحي راح انفجر وبقيت ما
احچي ويه ميقات تقريباً شهر وبعدها رجعنه اما عمي وسام
رحنه اني وابويه اكثر من مره بس هو موقفه واحد واستمر
الحال هذا الوضع ويه عمي وسام سنه كامله واني زواجي صار
مر عليه 3 سنوات ونص وبهاي السنه حياتي ويه ميقات إذا
أوصفها بالجحيم قليل وما يمر أسبوع إذا مو اقل شي احنه
متعاركين 3 مرات واسم لميس ما يوگع من لسانها ومشاكلها
ويه بيبي وابويه ما تخلص وبيوم اگشر نزلنه من غرفتنه وابويه
چان يحچي بالموبايل

سامي / صدگ الف مبروك والله انتي تستاهلين فرحتلچ
فرحه بس الله اليعلم بيها

بيان / من خلال الكلام عرفت دى يحچي ويه لميس بحيث
ميقات بصوت خافت تگلي / اي حمد لله لميس نخطبت

ظليت متفاجىء شعجب شنو الموضوع ما اله مقدمات بس
ظليت ساكت وابويه غلق الموبايل وسالته ميقات أنه
انخطبت لميس وجاوب ابويه چان صادم الها

سامي / لا يا خطوبه نجحت لميس من السادس اعدادي
ومجموعها يدخلها علوم سياسية

بيان / إذا اگول صدمة ميقات ما تنوصف وظلت تبلعم وجهه
يتگلب الوان ورجعت صعدت فوگ وابويه وبيبي بيهم طبيعه
عشاهم لو لبن وخبز لو فواكه لهذا ما يحتاجون احد كله أبويه
يجيب لبن وخبز وفواكه ويتعشون وبما انه ميقات گلبت
شكلها معناها الي مسوي عشه لهذا هل مره اني جبت لبن
وفواكه وخبز لأبويه ولبيبي وگعدت اكل وياهم اشرفلي

وظلينه نسولف ونشاقه اني وابويه وبيبي والموبايل چان
بجيب البرموده ومسوي صامت لهذا ما سمعته ابد سمعت
صوت ميقات تصيح عليه صعدت فوگ واول ما دخلت
للغرفه

ميقات / گمت ما ترد على مكالماتي اي سمعت لميس
صارت بالجامعه وحنيت الها

بيان / الله مطولچ يا روح بابا كل النسوان يحاولن بكل
جهدهن انه تريح رجلولتهن إلا بيان الله غاضب عليه النكد
والمشاكل 3 أوقات مثل العلاج بابا لميس صارت بالجامعه
اني شنو دخلي الله يهنيها ويسعدها والموبايل هذا بجيبي
وصامت ما ادري بي وتعالي انتي طلعي من جيبي وشوفي
بنفسچ بابا كافي عيب ترى تعبت شنو انتي ما تعبين

ميقات / اني عفت جامعتي على مودك هسه اريد ارجع
ادرس بدل ما گاعده بين اربع حياطين

بيان / عادي ما عندي اشكال بس احنه بأطراف بغداد
والجامعه بنص بغداد واني عندي دوام منو يوديچ ويجيبچ خلي
اشوف شلون أدبرها

ميقات / أبويه أشترى القطعه بصف بيتنه ابنيها واحنه نگعد
هناك وأداوم

بيان / وشنو تريدين اعوف أبويه وبيبي وحدهم واروح اگعد
قريب على اهلچ وتعالي شنو ابني بقطعه مشتريها ابوچ انتي
تعرفين البناء شگد يكلف يعني اني مثل واحد مشتري سمچ
بالشط وبعدين منين اخذ فلوس البناء والقطعه بسم ابوچ

ميقات / شوف بيان هاي الأعذار معليه بيها بس انت گول
لميس عايشه بعقلك وما تريد تبتعد عن المزرعه خاف تجي
لميس وانت ماكو ابويه يگول خلي يبنيها واذا عنده فلوس
خلي ينطيني فلوس القطعه وأني اسجلها باسمه واذا ما عنده
اصبر عليه لما ينطيني فلوسها او إذا تريد سددها بالقساط
ومن هسه اگلك إذا ما وافقت على بناء القطعه ونطلع منا
خلي كل واحد يروح لحاله و طلگني

يتبع /

#البارت التاسع

اترك مر افعالهم للزمن
فكل ساقي سيسقى بما سقى

ريماس/ كل شي بحياتنه اله ثمن وماكو واحد ينطي شي او
يعلم شي بدون مقابل إلا ما رحم ربي اني قبل چنت متعلمه
على الگديه يعني عقلي محدود بس شغل ام رحاب لا غير
شغلي السابق واني اول ليله يم ام رحاب ما فهمت منها شي
لانه الوقت كله رحاب تعلمني شلون انظف نفسي من الشعر
وأني اول اعرف انه ازالة الشعر صير للجسم كله وحتى
المناطق الحساسه علمتني وخلتني أسويهن بيدي شاغت
روحي لله هاي اول مره

رحاب / عفيه انتي مصوفه حالچ حال الدب شنو هاي امچ ما
چانت شوفچ بابا ريحتچ تكتل كتل أنتي هسه راس مالچ كله
بمظهرچ وانتي ما شاء الله كلش حلوه

ريماس/ انتي گلتي امچ واني أمي ميته منو بعد يعلمني

رحاب / إذا امچ ميته لعد منو جابچ هنا

ريماس / زوجة أبويه

رحاب / ابوچ وين

ريماس/ مات وعافني

رحاب / آسفه عذريني ما چنت اعرف شوفي انتي آثرتي بيه
مشاعر الحزن اريد انصحچ نصيحه لوجه لله اني افتهمت من
امي انه انتي بعدچ بنيه نصيحتي الچ شغلچ خلي نظري ولا
تحولين شغلچ على العملي وشگد راح تنعرض عليچ فلوس
على شغل العملي لا تقبلين وراح انطيچ اهم نصيحه بشغلچ
ابد لا تحبين شخص وتتعلقين بي لانه نهايتچ راح تكون على
ايده

ريماس/ تمام
وعلمتني على الموبايل وبدينه بشغل الإلكتروني وهي چانت
تفتح مايك وتحچي ويه واحد وشلون تتغزل بي وهو يتغزل
بيها وبعد سوالف هي ويا طلب منها تفتح كاميرا وفتحوا
كاميرا وثبتت الموبايل وصارت بعيده عليه حتى يشوف
جسمها وظل يتغزل بجسمها وبعدها هي طلبت منه رصيد
وهو حوللها وخلصت حچي ويا تقريباً ساعه ب 5 الفجر

رحاب / شفتي شنو سويت هذا الوضع تعلمي عليه وگدامنه
بعد اسبوع اعلمچ يله احول واحد عليچ واهم شي ركزي على
جيبه وشگد ما تگدرين خلي يحولچ ارصده واذا يطلب منج
موعد عادي تواعدي وخلي يتلمس بجسمچ حتى ينطي
فلوس وهدايا اكثر فهمتي اكثر من تلمس الجسم ماكو فهمتي


ريماس/ بعد تعليم رحاب وتوصياتها انه دائماً أعتني بنظافتي
وبمظهري آنتهى آلوقت ورحاب راحت نامت واني ميته نعاس
بس ما اگدر انام طلعت من غرفة رحاب ما يقارب 6 ونص
الصبح لگيت ام رحاب واكو واحد وياها بالمطبخ بس شنو
يخوف ضخم وشواربه ثخان سود وام رحاب صاحت عليه حتى
اگعد لأنه مسوي ريوگ حتى اتريگ وياها
وهذا الرجال سال عليه جاوبته ام رحاب / انه اني بنيه جديده
نزلت لشغل
وهو ما علق على شي

بوقتها تريگت ومن ردّت اطلع ام رحاب الملابس الي اجيت
بيهن كلهن شامرتهن بالزباله وانطتني علاگه ملابس كلها
جديده حتى انطتني جبه وشال جديدات ورجعت انطتني علاگه
ثانيه بيها عطور ومكياج وانطتني 10 الالاف گالت

ام رحاب / شوفي شنو تعلمچ رحاب حفظي وهذا المكياج
بيتكم هم حاولي تتعلمين شلون تخلين مكياج

ريماس/ وعدتها أتعلم وطلعت رحت لبيتنه وبس بدلت
ملابسي نمت نومه عميقه ما حسيت غير صفيه تگعد بيه
رفعت راسي عليها وهي باوعت بوجهي

صفيه / معقوله انتي ام الگمل هيچ حلوه حمدلله ام الگمل
گعد حظها وصفيه مثل بول البعير ترجع ليوره

ريماس/ ام رحاب انطتني عشرة الالاف بالجنطه اخذيها واني
راح انام تعبانه
ورجعت نمت ما گعدت غير العصر ميته جوع گمت سويت
اكل الي واكلت واجتي صفيه گعدت يمي تستفسر عن الصار
يم ام رحاب وحچيت كل شي الها
وهي بس تسمع ما علقت شي واستمر الحال ما يقارب
اسبوع اني بالليل يم ام رحاب ورحاب والنهار نايمه وبعد
اسبوع من رجعت من يم ام رحاب ونمت كعدت العصر لگيت
ام رحاب هواي متصله عليه رجعت اتصلت عليها جاوبت

ام رحاب / وينچ ريماس تعالي هسه راح نروح لصالون تعالي
ويانه

ريماس / جاوبتها بالموافقه وگمت سبحت واكلت وبلغت
صفيه انه ام رحاب تريدني وانطيتها الفلوس انطتهن الي ام
رحاب وطلعت ومن وصلت لبيت ام رحاب طلبت مني انزع
الجبه والبس بنطلون وبدي لبست وخليت الشال على شعري
وطلعنه رحنه على صالون كلش فخم واني ورحاب وام رحاب
گصوا شعرنه واني بس خصلوا شعري ورجعوا على أظافر ايدي
ورجلي وأيدي تنظيف وبرد وصبغ أظافر وجوهنه تنظيف ومن
خلصنه ام رحاب طلبت مني اخلي مكياج خفيف خليت
لنفسي تعجبت رحاب شلون تعلمت بسرعه وعطرت نفسي
خلصنه وطلعنه

واحنه بعدنه قريب على الصالون طبگ يمنه ولد شاب عنده
سياره حديثه وگال / أوصلكم
يحچي وعينه عليه وام رحاب انتبهت عليه يباوع عليه جاوبته

وام رحاب / خاله خاف نأخرك خاف عندك شغل

ريماس/جاوبها الولد انه ما عنده شي وهو بخدمتنه صعدنه
ويا ام رحاب يمه بالكرسي ليگدام واني ورحاب بالكراسي
الخلفيه واني صرت ورا مباشرتاً وهو الوقت كله عينه عليه
بالمرايه ويغمز
وام رحاب يمه تشكر من عنده لكون راح يوصلنه لانه عدنه
حفلة عيد ميلاد وهسه طلعنه من الصالون وام رحاب تصبغ
بي انه هو خوش ولد وهي تخاف على بناتها الي هي آني
ورحاب

وام رحاب ما انطته عنوان بيتها اخذتنه على بيت ثاني وصلنه
والولد

ظل يتوسل أنه انطوني رقمكم وهو هم ينطينه رقمه
خاف نحتاجه يوصلنه لأي مكان وبكل وقت موجود بس
فاجئتني ام رحاب انه تگول الي اسم غير اسمي

ام رحاب / لينا انطي رقمچ واخذي رقمه خاف نحتاجه يوصلنه
الولد مبين خوش ولد وابن اوادم

ريماس/ ودخلت رحاب وام رحاب للبيت وبقينه اني والولد
انطيته رقمي وهو هم انطاني رقمه

والولد گال / اسمي زياد والله من شفتچ تخبلت عليچ
تخبلين ممكن شوكت ما تكونين فارغه بالليل تتصلين بيه
انتظرچ على احر من الجمر

ريماس/ يصير عندي وقت بالليل بس موبايلي ما بي رصيد
وطلع 25 الف من جيبه وانطاهن الي

زياد / اشتري رصيد ونزلي على موبايلچ وبالليل انطيچ بعد

ريماس/ تمام أنتظرني
اخذت منه الفلوس ودخلت ورا ام رحاب للبيت وهو راح
وبلغت ام رحاب بالصار وانطيتها الفلوس

ام رحاب / هذني الفلوس الچ والرصيد هم الي يحوله هم
تاخذي الچ ومن نوگعه الچ حصتچ

ريماس/ خاله احنه ليش اجينه هنا ما رحنه على بيتچ

ام رحاب / حبيبتي هذا بيت الشغل وذاك بيت السكن يله
خلي نروح لبيتنه صدنا وهو النچر

ريماس/ رجعنه لبيت ام رحاب وچانت حدود الساعه 9 ونص
بالليل وشفت رحاب دخلت لغرفتها بدلت وتعطرت وطلعت
وبقينه بس اني وام رحاب وحدود ساعه 12 بالليل طلبت مني
ام رحاب اروح احچي ويا الولد ابو السياره واخذ كافة
المعلومات عن الولد وأبلغها بيها

ريماس/ وچنت ناسيه الموبايل بالجنطه طلعته لگيت زياد
هواي متصل وراسل رسايل رجعت اتصلت بي فصل
الاتصال واتصل هو

زياد / لا تتصلين بيه بس رمشي وآني اتصل عليج حتى لا
تخسرين رصيد وخلي نحول على الواتساب افضل

ريماس/ اتصل بيه على الواتساب وظلينه نسولف وعرفت
هو وحيد امه وهو موظف وبعده ما مزوج وامه وابو مطلگين
وبقينه نسولف وطلب نفتح كاميرا يريد يشوفني بملابس
البيت
واعتذرت منه انه اروح اشرب مي وارجعله لكن الاصل انه
رحت بلغت ام رحاب انه الولد يريد افتح كاميرا ويا

ام رحاب / شوفي ريماس لبسي ملابس خفيفه من ملابس
رحاب وعدلي نفس ورتبي شعرچ ومكياجچ والاهم من هذا كله
من يفتح كاميرا شغلي التصوير وصوري لانه نحتاج هذا
التصوير بعدين

بيان / مرات نكون بمفترق الطريق لا نگدر نتقدم إلى الأمام ولا
نگدر نرجع للخلف ويكون الاختيار صعب إذا تقدمت إلى الأمام
معناها راح نفقد اعز شخص بحياتنه واذا رجعت للخلف
معناها رجعت على نقطة الصفر والاختيارين واحد اصعب من
الثاني وإني حياتي ويه ميقات كل تقدم ما بيها ابد كأنه
عايشين بدائره ونفتر بيها كل نهايه وجديد بحياتنه ماكو وبيوم
الي وصل خير انه لميس دخلت جامعه تخبلت ميقات
وخيرتني بين اروح ابني بقطعة ابوها وبين نطلگ

بقيت صافن بوجهه معقوله راح اگظي حياتي كله هيچ لازم
اعيد نظر بحياتي ويه ميقات احس روحي ضايع قبل چنت
احچي ويه عمي وسام هسه ويامن احچي عفتها ونزلت خليت
كرسي بره واني ادقق بظلام وما انتبهت إلا لمن أبويه خله
كرسي بصفي وگعد

سامي / شبيك بيان شنو مراكبك غرگانه ليش گاعد وحدك

بيان / والله يابه كل ما يمر وقت احس روحي غلطان وندمان
على زواجي من ميقات

سامي / ابني كل زواج يمر بوقت عصيب ومشاكل بعدها
الانسان إذا عرف يتعامل ويه ظروفه بشكل صحيح تنتهي
المشاكل وصير سوالف ولا تنسى انه انت ما تخلف او بمعنى
اصح انه انت عندك مشاكل بموضوع الإنجاب حتى لا تگول
أبويه يعيرني لكون ما اخلف

بيان / يابه اريد اگلك بموضوع اريده يبقى بينه

سامي / ابني اني ابوك يعني اسمعك إذا ما أفيدك بشي ما
راح أضرك

بيان / بصراحه يابه موضوع الإنجاب مو مني السبب اني كل
شي ما بيه الخلل بميقات بس اني من حبي الها ما بلغتها
وخليتها تعتقد انه السبب مني

سامي / عفيه بيك ابني انت ستر وغطى على زوجتك وجنبتها
طول الوقت الكلام اليجرح ومن اي شخص مضايقات

بيان / يابه بس ميقات كل الوقت صارت تتعالى عليه
ومشاكلها ما تخلص حياتي گلبتها جحيم

سامي / ابني انت زوجتها عن حب وهي هم تحبك وانت
صبرت عليها عسى بعد هذا الصبر رب العالمين يجازيك
بطفل منها

بيان / يابه تريد اطلع منكم واروح ابني بقطعة ابوها ونستقر
هناك

سامي / ابني اول وتالي يجي يوم وتستقر وحدك واني
وبيبيتك كبار بالعمر يعني يوميه عزرائيل يفتر علينه روح ابني
واستقر بحياتك ولا تخسر زوجتك الطلاگ مو شي بسيط
الطلاگ تهتز اله عرش السماء واذا ما عندك فلوس بناء اني
اساعدك

بيان / يابه صدگني إذا وافقت على كلامها وسويت شنو تريد
راح تطلب اكثر

سامي / ابني إذا بيوم يصير طلاگ خليها تطلع منها مو منك
حتى ضميرك يكون مرتاح وتكون انت ما ظلمتها وهي
ظلمت نفسها

بيان / خلاص راح ابني بقطعة ابوها واشوف وين تاليتها
وبعد ما خلصت تعلوله ويه أبويه صعدت لگيت ميقات گاعده
وبلغتها انه موافق على بناء ونطلع من المزرعه وهي فرحت
وبعدها بأيام رحت ذبيت مواد بقطعة ابو ميقات وبلش البناء
وابو ميقات هو واگف على العمال

اما ميقات من بلش البناء بالقطعه هي راحت لاهلها لانه
رجعت قدمت على جامعه ودى داوم لهذا ما تگدر تجي
للمزرع

ه

وبيوم اني گاعد بالليل بغرفتي ودى اگلب بموبايلي وصلني
اشعار على الواتساب برقم غريب ومكتوب كلمه وحده وهي (
احبك)

راسلت الرقم انت منو اتصل يفصلون الخط وما يردون ومن
اسال انت منو لو توصلني كلمة احبك لو مقطع مال أغنيه
عفته بعد ما فتحت الرسائل وخليت الرقم بالأرشفه بحيث من
يوصل اشعار ما اشوفه
وبقيت ما افتح الرسائل إلى ما اتصل بيه الرقم نفسه رديت
عليه بس ما حچى شي ظل بس يسمع صوتي وبعدها غلقه
رحت فتحت الرسائل اكيد هاي بنيه بس منو لكيت رسائل
ومقاطع لا تعد تحصى

صار عندي فضول اعرف منو صاحبة الرقم لهذا اتصلت على
ولد بشركة الاتصالات وانطيته الرقم وطلبت منه يشوف الرقم
بسم منو

وچان الرد صادم من عرفت الرقم بأسم عمي وسام
يعني هاي لميس معقوله مر هذا الوقت كله ما نستني
واخذت اجازه زمنيه وطلعت رحت للجامعه مالتها ودخلت
للعماده مال الكليه وطلعت هويتي وطلبت اشوف الطالبه
لميس وسام بقسم العلوم السياسية وهي بنت عمي وافق
العميد أنه يستدعوها وطلعت من يم عميد الكليه وگفت
قريب على باب مكتبه

ومر تقريباً ربع ساعه واجتي لميس وهي شافتني لو تفاجأت
بوجودي وطلبت منها احچي وياها 5 دقايق على إنفراد وهي
وجهه يتگلب الوان طلعنه من يم مكتب عميد الكليه

لميس / تعال خلي نگعد بالكفتريا مال الجامعه ونسولف

بيان / لا تعالي نگعد 5 دقايق بالسياره مالتي واگلچ شنو اريد
منچ
هي تمشي ويايه بس اشعر بأرتباكها وخوفها سيارتي چنت
راكنها بگراج قريب على الجامعه وصلنه لسياره فتحت باب
السياره باب المقعد الأمامي وصعدت وسديت الباب

اجيت اني صعدت بمكاني مكان السايق وسديت الباب ومن
التفتت عليها وهي تباوع عليه سطرتها براشدي والله حسيت
توازنها اختل من قوة الراشدي وهي مو محجبه التراچي مالتها
طفرت من أذنها ومكان التراجي يجري دم وهي بياضها ناصع
أصابع ايدي طبعت بخدها وسألتها بصوت عالي

بيان / بس گليلي شتردين مني ولچ ما كافي عمي وسام ما
يحچي ويايه بسببچ بس گليلي من شوكت بده هذا الحب
عندچ واني أصلاً ما ناطيچ وجهه عبالچ من تراسليني من رقم
غريب ما اعرف انتي منو لا حبابه اني ضابط واگدر اطلعه عن
طريق شركة الاتصالات طلعت الرقم وطلع بأسم عمي وسام
يعني هاي انتي والا ما معقوله عمي وسام يدزلي أحبك
ومقاطع اغاني

لميس / اي صح هاي اني والله احبك ودى اموت باليوم الف
مره لا اني وياك ولا اگدر انساك گلي شنو الحل الله يخليك
ساعدني والله دى اموت

بيان / من شفتها تبچي صدگ أنقهرت عليها جاوبتها / بس
گليلي شسوي والله اني متعجب لچ بابا على شنو تحبيني
هسه لو شايفه مني غزل أو رغبه چان عذرتچ بس كل شي
ماكو ادري انت عندچ عقل شلون حبيتيني

لميس / الحب ما يحتاج سوي كل هذا الحب يدخل گلبنه
بدون استأذان واني احبك اموت بيك گلي شسوي

بيان / بابا راح اجي على خبالچ تحبيني زين اني مزوج وما
اخلف وگوه مچلب بميقات خاف تعوفني منو بعد تقبل بيه
وشنو نهاية حبچ اليه هسه انتي جاوبيني

لميس / اني اقبل بيك حتى لو ما تخلف والله احبك بيان

بيان / احمدي ربچ واشكري انتي تدرين گوه لزمت اعصابي
من عرفت الرقم بسم عمي وسام اجيت عليچ ما رحت لبيتكم
وگلت لامچ عليچ

لميس / حتى لو رايح لأهلي ما راح انكر حبي الك وامي تعرف
بمشاعري اتجاهك بيان هذا شي مو بيدي والله انت ليش ما
تريد صدگ

بيان / آخر جمله گالتها لميس لزمت ايدي وظلت تعصر بيها
واكلي بيان أحبك سألتها / بس جاوبيني لميس شنو نهاية
حبچ الي اني مزوج بابا انسيني وعيشي حياتچ صدگيني هسه
يجيچ الاحسن مني وينسيچ بيان والخلفوا بيان

لميس / اني اعرف انت مزوج وعرفت ميقات راحت يم اهلها
وهناك انت دى تبني الها وبعد ما ترجع للمزرعه ازوجني
بالمزرعه بدون علم ميقات والله ما يوصللها خبر لا مني ولا من
أي احد أو إذا تخاف يوصللها خبر نزوج اني وياك بالسر ماكو
احد يدري بينه المهم تكون انت الي بيان

يتبع /

#البارت العاشر

قد يأتيك الخير
على هيئة خروج اشخاص
منافقين من حياتك

ريماس/ حياتنه نكون بيها اما مخيرين او مسيرين اني بحياتي
حمدلله كله مسيره ما عندي شي بيها مخيره وشغلي ويه ام
رحاب كذلك مسيره لانه ما عندي ام او اب يخافون عليه او
يصرفون عليه ومگعديني في بيت لا باقيه جوه ايد صفيه
وبالبدايه ديحتني بالشارع اگدي وهسه يم ام رحاب اشتغل
وما يهمها شنو يصير بيه المهم اجيبلها فلوس

لهذا بيوم انطاني زياد 25 الف خليتهن بالجنطه حتى انطيهن
لصفيه ثاني يوم ومن طلب مني زياد افتح كاميرا سالت ام
رحاب انه افتح كاميرا وقبلت بس اهم شي أصوره

رجعت لغرفة رحاب لبست من ملابسها مال النوم خفيفه
حتى اللباس والستيان مبينات وعدلت نفسي واتصلت بي
كاميرا وفتحت التصوير وهو شافني لو تخبل

زياد / ولچ صدقه لله شنو هذا الجمال شنو تردين بس آمريني


ريماس/ اكلك باچر اريد اروح لصالون بس فلوس ما عندي

زياد / تدللين بس فلوس شگد ما تردين اني حاضر
وهاي جبتلچ رصيد راح احوله الچ

ريماس/ انت شگد بخيل يعني اليوم ماما گالتلك عدنه عيد
ميلاد وهو عيد ميلادي ما جيبلي هديه

زياد / شنو تردين هديه اني حاضر بس اطلبي

ريماس/ اريد موبايل حديث جهازي مو حديث

زياد/تدللين باچر وين اشوفچ وانطيچ هديه وفلوس
الصالون

ريماس/ خلي اشوف ماما

زياد / اگلچ تعالي وحدچ ما اريد امچ واختچ وياچ فهمتي

ريماس/ ما ادري خلي اتفق ويه ماما واردلك خبر
وظلينه لصبح سوالف بعدين استأذنت منه وغلقت الموبايل
لانه تعبت ونعست انتبهت الساعه 7 الصبح
طلعت من غرفة رحاب بس ام رحاب موجوده وحچيتلها كل
كلام زياد

ام رحاب/ اي عادي نروح لصالون وخابري خلي يجي وطلعي
ويا بس قريب على الصالون مو بعيد وشنو ينطيچ كله ألج

ريماس/ اريد اسالچ خاله بس مستحيه منچ

ام رحاب / اسألي اكو شي ما ذكرتي عن الولد

ريماس/ لا كل كلامه ذكرته بس سؤالي ليش اي شي ينطي
الي زياد تگولين اخذي إذا كله اخذه اني انتي شنو تستفادين

ام رحاب / عفيه عليج والله انتي ذكيه شوفي حبيبتي راح
انطيچ معلومه تستفادين منها وهي احنه ما نباوع على
الفتافيت احنه ناخذ الهبره الچبيره شغلنه بحر لاتحاولين
تبحوشين بي لانه ماكو احد راح يغرگ غيرچ اخذي فلوسچ
واكلي وصوصي واليوم العصر موعدنه ويه زياد فهمتي

ريماس/ طلعت من يم ام رحاب ورجعت لگيت صفيه وقبل
ما تسألني على اي شي طلعت 25 من جنطتي وانطيتها وهي
اخذتهن وسكتت ومن السهر احس نفسي هلكانه گبل نمت
حسيت الظهر گعدت ميته جوع رحت للمطبخ لگيت صفيه
وجهالها ملتمين دى يتغدون گعدت وياهم اكل

عندي اختي من صفيه الچبيره وهي عمرها 8 سنوات اجتي
خلت راسها على زندي وتگلي انطيني ربع وللامانه اني صح
اكره صفيه بس اخواتي واخواني من صفيه احبهم وهمه هم
يموتون عليه سالت صفيه / ليش انتي ما تنطين مصرف
الهم

صفيه / شوف هاي هنه وين يكفن

ريماس/ ليش اليوم الصبح انطيتچ 25 الف بعد كل يوم
تنطينهم مو كافي اني الله غضب عليه وما يوم شفت مصرف
منچ وعيشتيني بالجوع والحرمان هذوله هم نفس وضعي
تريديهم

وظلت ما اعرف شنو تحجي بس اني ما اهتميت الها لبست
جبه وخليت شال على راسي وطلعت رحت على ابو موبايلات
يمنه وحولت اله الرصيد انطاني فلوس الرصيد ورجعت وكل
واحد بيهم انطيته الف وتخبلت صفيه وتگول راح اطلعين
عينهم منين اجيب كل واحد بيهم الف يوميه

وانطيتها الها 10 الاف ودخلت للغرفه شفت موبايلي لانه
مخليته على الشحن لگيت زياد گالب الدنيا اتصالات ورسائل
واتصلت بي فصله ورجع اتصل بيه واتفقنه العصر يم الصالون
الچنت بي قبل يوم وغلقت ويا وبديت احظر بنفسي وللعصر
رحت يم ام رحاب وچانت رحاب موجوده بس ما اجتي ويانه
رحنه اني وام رحاب احنه قبل يوم چنه بالصالون لهذا بس
صبغنه اظافرنه وشسوار شعر واني خليت مكياج خفيف
اتصل بيه زياد

وظلت ام رحاب تنتظرني بالصالون وگالت / خلي يتلمس
بكل مكان بجسمچ حتى يطمع بيچ اكثر فهمتي واخاف يگلچ
تعالي نروح بمكان وحدنه ارفضي فهمتي وگليله امي بالصالون
وما تدري بيه طالعه وياك يله روحي

ريماس /واني طلعت لگيت زياد واگف بسيارته صعدت يمه
وهو ظل صافن بوجهي بعدها طلع علبه بيها موبايل وياها باقة
ورد وانطاها الي واني إذا اگول ما فرحت كذب اول مره بحياتي
احد يجيبلي هديه وهو سحبني عليه وباسني من خدي ويگلي /
العمر كله الچ غاليتي

وبعد طلع فلوس وحسب وانطاني 300 الف وهو يگلي / كل
ما تردين فلوس گليلي واني انطيچ
بصراحه اني عمري ما شايفه هيچ فلوس ابد وشغل سيارته
وطلع يفتر بيه واحنه نسولف ونضحك وهذا الوقت كله ما خله
مكان بجسمي ما خله ايده عليه

زياد / لينا دى اموت اريد موعد بمكان خاص مو عام وكل شي
ما نگدر نسوي

ريماس/ بعدني اريد اجاوبه اتصلت عليه ام رحاب وهي تگلي
تعالي
وگتله زياد عفيه رجعني لصالون بسرعه ماما تريدني لانه اني
گتلها اشتري بطل مي وارجع وهاي

أني اتاخرت عليها وياك
بسرعه رجعني

هو ظل يتوسل يريد موعد واني وعدته أنه احاول أرتب موعد
رجعني لصالون وبقينه حدود ربع ساعه بالصالون ومن طلعنه
اجى زياد طبگ يمنه وظل يسوي نفسه انه متفاجىء انه
شافنه صدفه وظل يحلف ام رحاب انه نصعد ويا ويوصلنه
للبيت

وصعدنه ويا وظل يسولف ويه ام رحاب وبأثناء السوالف
گالت لزياد

ام رحاب / باچر عدنه طلعه لجنسيه اني وبنتي الچبيره وانت
تعرف دوائر الدوله والتأخير بيها اگول لينا تعالي ويانه وهي ما
تقبل تگول اريد انام ادري شلون اعوفها وحدها بالبيت نايمه
وماكو احد اخذ حرامي يطفر على البيت شگول لناس

زياد / خلي تقفل الباب عليها إذا تريد تنام لا جبريها خاله

ريماس / وام رحاب جاوبته انه خوش فكره وصلنه للبيت الي
قبل يوم وصلنه اله وراح وبعد ربع ساعه طلعنه اجرنه تكسي
ورحنه في بيت ام رحاب وهي تگلي

ام رحاب / ريماس باچر ما تروحين الصبح لساعه 10 الصبح
يله ترجعين لبيتكم
ريماس/ وبلغتها على الفلوس والموبايل

ام رحاب / حبيبتي هذا زايد خير وكله الچ احنه ناخذ الحصه
الچبيره وهم الچ حصه

ريماس / ودخلت الغرفة رحاب چانت دى تبدّل وسألتها ليش
ما اشوفچ

رحاب / حبيبتي اني شغلي مو مثل شغلچ مرات ايام ما
أتواجد بالبيت مو شرط

ريماس/ طلعت رحاب وبقيت يم ام رحاب وچانت سوالفها
عاديه لما اجى هذا ابو شوارب الضخم وهي طلبت مني ادخل
بغرفة رحاب وما اطلع منها

واني هم دخلت واتصل بيه زياد وهو يگلي
زياد / اگلچ طالما باچر امچ واختچ راح يطلعن هاي خوش
فرصه النه اجي ونبقى وحدنه شتگولين

ريماس/ بوقتها طلبت منه شويه وارجعله وصحت على ام
رحاب وگتلها على زياد شلون يريد يجي من انتوا ماكو

ام رحاب / عفيه عز الطلب يعني بلع الطعم گليله امي واختي
يطلعن من ساعه 7 الصبح وانت تعال ب 8 بعدهم بساعه

ريماس / بس خاله هو ما يعرف عنوان هذا البيت
ضربتني على راسي وهي تگلي

ام رحاب / ثوله انتي على عنوان ذاك البيت يله روحي اتفقي
ويا

ريماس/ رحت اتفقت ويا وهو ظل يلح شنو محتاجه گتله
محتاجه ملابس ما عندي وعدني انه الصبح من يجي يجيبلي
فلوس ويا وبقينه الليل كله نسولف لما وصلت لصبح يله
غلقت ويا الموبايل واجتي ام رحاب للغرفه طلبت مني ابدل
واجيب ويايه تراك لانه راح احتاجه

ونفذت كلامها وطلعنه رحنه للبيت الثاني وهو بيت أثاثه قليله
ومو ذاك البيت الچبير وطلبت مني ام رحاب البس التراك
وأعدل نفسي وسويت مثل ما گالت وهي راحت فوگ بعد ما
طلبت مني اتصل بزياد اتصلت بزياد وهو كأنه چان قريب
على البيت وبس گتله تعال دقايق وصار يدگ بالباب طلعت
فتحت الباب اله ودخل

والمسكين دخل المصيده برجله

بيان / مرات يصير وياك موقف يخليك عاجز ما تعرف
شسوي وموقف لميس ويايه خبلني اني ما منطيها وجه لهذا
جاوبتها على كلامها / بابا انتي ليش تحكمين على نفسچ
بالإعدام ويايه اني احب زوجتي وما مفكر بيوم ازوج عليها
وبعدين تعالي گليلي من ازوجچ بالمزرعه اشوكت اجيچ واني
كل وقتي ويه ميقات

لميس / اني موافقه حتى لو تجي يوم واحد بالشهر المهم
اكون زوجتك

بيان / بصراحه موضوع زواج بس اني ما عندي اي مشاعر
اتجاهچ خلي عقلچ براسچ وان شاء الله يجيچ الاحسن مني

لميس / هذا آخر كلام بيان

بيان / اي

لميس / عندي طلب واحد يمك والله عليك لا ترفضه ابد

بيان / گولي

لميس / رقمي لا تحظره وخليني يوميه أشاركك مشاعري الله
عليك بمعزة عمي سامي عندك

بيان / تمام بس ما اجاوبچ ابد

لميس / موافقه

بيان / نزلت لميس من السياره ورجعت لجامعتها واني رجعت
لدوامي واتصلت بميقات وبلغتني انه نگدر نسكن بالبيت لانه
باقيه شغلات بسيطه وكلها خارجيه يعني متأثر علينه واني بناء
البيت صحيح هو طابق واحد بس كلفني هواي وكل فلوسي
خلصت والدين صار اعلى من راسي لهذا گتلها لميقات انه
ناخذ اغراضنه من المزرعه بس ما قبلت وتگول البيت مبني
جديد وأغراض البيت هم أريدهن جديدات

رجعت اثاث البيت كله صار بالقسط عليه واخيراً سكنه
بالبيت وابويه وبيبي وبيت عمي مهند اجوي باركولنه على
البيت ومرت الايام وندمت لكون اجيت سكنت بصف اهل
ميقات لانه امها هي تآمر وتنهي بالبيت عندي وكل حچايه
والثانيه وتگول بنتي عمت عيني عليها حتى طفل ما عدها
صار 4 سنوات ونص واني اسمعها واغلس اما ميقات
صارت انسانه ثانيه حتى مرات احس عدها شخص ثاني تحبه
وارجع استغفر ربي إلى ما بيوم اجيت من دوامي تعبان هلكان

ودخلت للبيت لگيت عمتي ام ميقات يمنه بالبيت وما أبالغ
إذا اگول امها لميقات تقريباً مقيمه عدنه گلت لميقات /
جوعان اريد غده

جاوبت ام ميقات / خلص الغده ما حاسبين حسابك روح
جيب لفه لنفسك

بيان / تجاهلت كلام ام ميقات وحچيت ويه ميقات انه
سويلي غده و رن جعت امها جاوبتني انه غده مخلصين
نرفزتني بشكل جاوبتها / بلا زحمه دى احچي ويه زوجتي ما دى
احجي وياچ
كلمه منها على كلمه مني گبت بينه للستار واجى ابو ميقات
وهذا حمدلله لا يحل ولا يربط وچان يگلي / انت هم نزل ودبچ
على السطح ت

رى انت گاعد هنا گعيدي

صدگ هنا تخبلت ضربته بوكس على عينه ورحت اخذت
مستمسكاتي وملابسي وطلعت رحت للمزرعه وبلغت أبويه
بالصار وهو بدوره بلغ عمامي مهند وسام وبعد قطيعه دامت
سنتين اجى عمي وسام بالليل صدگ من شفته فرحت رحت
عليه بوسته وهو هم حضني وگعدنه نحچي بالمشكله

وسام / شوف رجعه لميقات ماكو هاي على بيان ما يخلف
اذله ما عاش وما نخلق الي يذلنه واني هاي ابوك گاعد وعمك
مهند گاعد لميس بنتي هديه لبيان حتى لو ما يخلف الله
موجود هو الرزاق

بيان / ظليت لا أبثّ ولا استلم شنو ازوج لميس وعمي مهند
طينها عليه

مهند / خلي تولي انت شفت منها يوم الجمعه توكل على الله
وازوج لميس وخلي تروح شوف حالها اريد اشوف منو يتحملها


سامي / والله اني ذيچ السنوات كلها ما چنت انطي بيها
واگول خطيه نكسر حظها وبختها بس بعد موقف اليوم اني
صرت أشجعه انه ينفصل عنها عسى رب العالمين يرزقه ذريه
من غيرها

بيان / اني ساكت ما جاوبت شي مرات اكو شخص يكرهك
بي وانت ويا وهذا شي سوت ميقات خلتني اكرهه واريد
انفصل عنها بس مو المعنى اروح ازوج لميس هو اني
مشكلتي ويه ميقات ما خلصانه انوب اجيب لميس وبصراحه
ردت اعترض بس ما اريد خلاف بعد ويه عمي وسام لهذا گلت
اني اتفق ويه لميس انه تگول ما اريد بيان

وعمي وسام رفض انه نروح عليهم او نحچي وياهم لما نشوف
همه شنو راح يسوون وبالفعل ما ضيعوا وقت بعد اسبوع من
المشكله وصلني تبليغ انه لازم احضر للمحكمه مرفوعه عليه
قضية طلاگ من ميقات

وقرب اليوم المحدد انه اعقد على لميس گلت خلي اتواصل
وياها اتفق ومن دخلت الواتساب فتحت الرسائل مالتها لانه
بسبب مشكلتي ويه ميقات صار ايام ما فاتح رسائلها لگيت
هواي رسائل تشرح بيها حبها وسعادتها بزواجنه اتصلت بيها
وهي ردت وطلبت منها احچي وياها واذا اكو احد يمها تبتعد
عنه حتى نحچي براحتنه

لميس/ صعدت فوگ للغرفه وقفلت الباب عليه احچي بيان
قلقتني

بيان / شوفي لميس اني ما اريد ارتبط بيچ مو انتقاص منچ
لكن والله ما عندي اي مشاعر اتجاهچ حتى ما اظلمچ واني ما
اريد اگول ما اريد لميس حتى لا يزعل عمي وسام اريد منچ
إنتي تگولين ما اريد بيان وهذا فضل ما انسى طول عمري

لميس / انت متصل بيه تريد اگول ما اريد بيان لو تموت ما
اگول ما اريد بيان واذا انت رجال وما تريدني كول انت وانهي
الموضوع اني بالنسبه عني انتظر هذا اليوم بفارغ الصبر

بيان / بعدني ما مجاوب وغلقت الخط بوجهي أنوب
استفزتني بكلمة إذا انت رجال رجعت اتصلت عليها مغلق
خلتني أفور وانطفي ويوم الخميس بالليل اتصل عمي وسام
بيه ومن رديت عليه

وسام / بيان باچر تعالوا من وكت حتى قبل اذان الظهر نعقد
واني بلغت مهند وسامي وعزمنه خوالها وخالاتها ويعني حفله
بيناتنه

بيان / هسه بله هذا شنو اگله ظليت ساكت وبس اگله تمام
وبس غلقت الخط ويه عمي وسام رحت شايط على أبويه
وبلغته بكلام عمي وسام وانه اني ما اريد لميس

سامي / بيان ابني قبل چنت اوصيك على ميقات ابني هي ما
تخلف وطلعت من عدهم مو من عدنه هسه بعد التفت
لحياتك صار عمرك 27 سنه وانت طفل ما عندك ازوج لميس
وهي بنت عمك كافي قبلوا وهمه عبالهم انت ما تخلف بابا
عمك وسام مشتريك زلمه لبنته توكل على الله وازوج لميس
واذا انت ما تريد لميس گول لعمك وسام انت اني ما ادخل

بيان / عافني ابويه وگام واني بقيت أفكر معقوله هاي الناس
كلها تريدني ازوج لميس من مصلحتي واني الوحيد ما اريد
هذا الزواج وما بقى كلها ساعات وأعقد على لميس قررت
استسلم لأمر الواقع واسكت وعلى ثاني يوم رحت للحلاق
ورتبت نفسي ومن رجعت لگيت ابويه وبيبي محضرين
نفسهم صعدت فوگ لغرفتي جهزت روحي وبدلت وعطرت
نفسي ونزلت وابويه وبيبي صعدوا ويايه بسيارتي والطريق كله
بيبي تغني لموسه يا چكليته حامض حلو باكيته وصورت بيبي
وابويه واني ونزلته ستوري

وصلت لبيت عمي وسام وچانت الساعه حدود 12 إلا ربع ومن
دخلت اقارب عمه لقاء كلهن يهلهلن دخلت بالاستقبال
وهواي زلم من اقارب عمه لقاء موجودين وعمي مهند سلمت
على الكل وگعدت وتقريباً 10 دقايق واجى السيد وبده العقد
وچنت يم الباب مفتوح شويه ولميس گاعده گدامي چانت
لابسه بدله بيضه والظاهر هي جايه من صالون ومخلين على
راسها برنص ابيض

وبده السيد العقد ومن سال لميس على رايها بزواج مني
گالت موافقه وبموافقة لميس صارت زوجتي وخلص العقد
وطلبوا مني اجي البسها الحلقه رحت يمها وگعدت اسمع
موبايلي يدگ طلعته چانت تتصل ردت الغي الاتصال بس
لميس لغته الاتصال
خزرتها لكون لغته واجني مسج من ميقات كاتبه بي ( راح
تتزوج وانت بعدك ما مطلگني ابن القندره )

يتبع /

#البارت الحادي عشر


ليس كل ما نفقده خساره
فالاستغناء عمن لا يدرك قيمتنا
حياة جديدة

ريماس / رب العالمين في كتابه يگول ما ظلمناهم ولكن كانوا
أنفسم يظلمون صدق الله العظيم
الانسان من يكون كل شي متوفرله تصرفاته يكون هو
مسؤول عليها لهذا هو يظلم نفسه ماكو احد يظلمه وزياد
مبين عليه حالته زينه يعني بمكان ما تتعرف على بنات ما
تعرف شنو وراهن روح ازوج واخذ بنيه بنت حلال وبهذا وضعه
هو ظلم نفسه واليجي من ايده الله يزيده

وبيوم چنت متواعده ويا الصبح فتحت الباب ودخل وهو
يسألني إذا اكو احد واني جاوبته انه بس اني موجوده بالبيت
دخلنه لصاله طلع فلوس وخلاهن بصدري وهو يگلي

زياد / هاي الفلوس الچ حبي وشنو تردين تأمرين اني حاضر

ريماس/ سحبني عليه وظل يبوس برگبتي ويتلمس بجسمي
وهو يگلي اموت عليچ واني ادفع بي وهو چان منطي ظهره
للباب واني مقابيل الباب والشباك الموجود بالصاله يطل
على الگراج وشفت
هذا الضخم ابو شوارب الي دائماً اشوفه يم ام رحاب ويا 3
ولد شباب

وزياد چان مندمج ما شافهم إلا ما صاروا بنص الصاله وگاموا
يصيحون علينه وهذا الضخم ابو شوارب يصيح ويگول / بنتنه
جابتلنه العار اليوم اثنينهم نذبحهم ونذبهم بالبلعوه إذا اگول
على موقف زياد ما يسولف وجهه گام ينطي الوان وهمه
حصرونه من كل جهه بحيث صرنه بزاويا وهذا ابو شوارب گال
لواحد من الشباب الموجودين اخذها لهاي عديمة التربيه إلا
اليوم اذبحها بعد ما اذبح هذا داس بيتنه وعرضنه

اني جرني الولد ومشاني گدامه وطلعني من الصاله وسد
الباب صارت بوجهي ام رحاب انطتني جبه وشال لبستهن
وطلعنه نركض من البيت اجرنه تكسي ورجعنه لبيت ام رحاب
واني چنت كلش تعبانه رحت لبيتنه مباشرتاً وچانت صفيه
گاعده بالصاله وظلت تسال ليش ما اجيت من الصبح وانه
مصرف ما عدها طلعت من جنطتي 50 الف وانطيتها
وسكتت ودخلت للغرفه طلعت الفلوس من صدري الخلاهن
زياد حسبتهن طلعن 250 الف وهو قبل يوم انطاني 300 الف
انطيت منهن 50 الف بقن 250 الف صار المجموع عندي
500 الف لازم اضمهن بمكان ماكو احد يعرفه لا تاخذهن
صفيه

دفنتهن ويه غراض قديمه لما اشوف الهن مكان واضمهن
رحت للحمام سبحت واجيت نمت لأنه بالليل اني ما نايمه وما
حسيت غير اختي تگعد بيه وتگلي امي تريدچ واني عبالي صار
العصر طلعت من الغرفه اباوع على الشباك ظلام انتبهت على
الساعه ب 10 بالليل يعني اني نايمه من الظهر لساعه 10
بالليل رحت لصاله لگيت ام رحاب موجوده من شافتني افرك
بعيوني گالت

ام رحاب / صحي النوم من ما اجيتي گلت خطيه تعبانه خليها
اليوم ترتاح وباچر نبلش شغل

ريماس/ اي خاله تعبانه واحس روحي بس اريد انام

ام رحاب / ابقي راحه اليوم وجبت حصتچ

ريماس/ وطلعت ام رحاب فلوس وگالت هذا مليون

صفيه/ مليون كله النه

ام رحاب / لا عيني 500 الكم و500 الي اني گتلچ اصرف عليها
وترجعوهن الي بارباحهن وهاي هسه اخذت جزء من الدين

صفيه / بس 500 الف قليله البنيه صار اسبوعين وياچ حتى
ما يسوون

ام رحاب / صفيه احنه ولد الگريه كلمن يعرف أخيه ليش
ريماس شنو چانت تشتغل مدير عام وجيبلچ 10 ملايين
بالشهر شو هي چانت مگديه تموت روحها ما طلع 10 الاف
باليوم احمدي ربچ واشكري منين تحصلين هلگد فلوس لما
ريماس

ريماس/ انطتهن الفلوس الي وهي تگلي انتي ومرة أبوج
تتفاصلون إني معليه
وراحت ام رحاب وبقت صفيه تستفسر على طبيعة عملي ويه
ام رحاب وحچيتلها كل شي وچان رد

صفيه / هو هذا الشغل الخابصتنه بي وعليمن تروحين يمها
وتاخذ اكثر الفلوس هي ليش احنه شبينه ما نفتهم لو ما نعرف
بعد لا تروحين يم ام رحاب ولا تردين على موبايلها ابد واني
وياچ نشتغل هذا الشغل هنا في بيتنه ومرگتنه تنچب على
زياگنه

ريماس/ اني ما جاوبتها مهمتي بس انفذ كلامها والفلوس
تقاسمناها اني وصفيه وطلبت منها تشتري ملابس للجهال
يكسرون خاطري ويذكروني بنفسي هم مريت بنفس هذا
الحرمان واني يوميه انطيهم كل واحد الف وشگد تحچي عليه
صفيه بس اني ما ارد على كلامها لأنه احبهم وشگد تقسى
عليه صفيه ما يوم كرهتهم وهمه هم يحبوني بس اني وهمه
ونوجدنه بالمكان الغلط

وبعدها بقيت يومين ما ارد على ام رحاب ولا رحت عليها
وبيوم الثالث العصر هي اجتي علينه مثل الإعصار واني چنت
بالغرفه من سمعت ام رحاب تحچي بصوت عالي طلعت من
الغرفه ورحت يمها لصاله

ام رحاب / شنو علمنا على الگدايه سبقنه على البيبان شوفي
صفيه خلي عقلچ براسچ قبل ما الفاس يوگع بالرأس ترى
الجماعه الشتغل وياهم ما عدهم رحمه من اشتغلت وياهم
ريماس بعد خلاص دخلت بشغلهم ومن تنسحب صدگي
يطلعون روحها يله يعوفها يعني سرهم تاخذه وياها للگبر

صفيه / عيني بطلنه الي يعطلنه البنيه اني وين ما يعجبني
اشغلها انتي شعليچ بنتي واني حره بيها ورحوا أضربوا راسكم
بالحايط

ام رحاب / للمره الاخيره اسالچ هذا آخر كلام عندچ

صفيه / روحوا المكان تخلون بي رجليك

م خلوا بي راسكم واذا
اجيتوا بعد هنا اروح ابلغ عليكم الشرطه

ام رحاب / ربي يشهد كلامچ راح انقله بالحرف الواحد لا أزيد
حرف ولا انقص حرف وتلگي راح يجيچ منهم اللهم اني بلغت
اللهم فشهد

ريماس/ هذا الكلام كله دار ما يقارب 10 دقايق بس ولكن جر
علينه ويلات واحنه إلى ذيچ اللحظه ما نعرف احنه ويامن
نشتغل وام رحاب راحت من يمنه حدود 6 العصر واني ما
حچيت شي رجعت للغرفه وقبل ما تجي ام رحاب چنت اگلب
مواقع التواصل وبقيت لليل بعدها سوينه عشه واكلنه واحنه
بينه طبيعه ما نسهر اني بس يم ام رحاب جنت اسهر
وما يقارب ساعه 1 بالليل اني بالغرفه احس اكو بره حركه

واني اعرف صفيه والجهال نايمين وهاي منو دى يمشي بره
گمت اني طلعت من الغرفه اكو واحد گبل خله ايده على حلكي
وسحبني عليه بحيث ظهري على صدره

ويمشيني گدامه جابني لصاله شفت اكو بعد أربعة ويا وكلهم
ملثمين واكو واحد منهم صوته مو غريب عليه گال / جيبها
للغرفه

واحد فتح الباب وبسرعة البرق دخلوا لغرفة صفيه واني وياهم
وهذا ايده على حلگي وايده الثانيه مقيد بيها ايدي يعني كل
شي ما اگدر اسوي

وصفيه بسرعه فزت رادت تعيط واحد منهم خله ايده على
حلگها وكتم صوتها

واحد واگف گال / ديري بالچ صرخين وربچ هسه طلقه براسچ
واذبچ للچلاب

ريماس/ وهذا الچان مخلي ايده على حلگ صفيه ابعد ايده
عن حلگها ورجع هذا الواگف گال لصفيه / الطمع قل ما جمع
شلون تمنعين ريماس من الشغل ويانه انتي تدرين شنو
مصير اليلعب ويانه

صفيه / توبه بعد إذا احچي لو اعترض شغلكم ابد وهاي
ريماس شوكت ما تريدوها تجيكم

ريماس / رجع گال / انتي بعدچ ما تعرفين بيمن اندگيتي احنه
تبلغين علينه هسه اشوفچ شلون تبلغين علينه إلا اخليچ
تمشين وتحچين ويه نفسچ

ريماس / رجع گال لشباب الموجودين ويا / يله شباب شوفوا
شغلكم

بيان / ان تصل متاخر خير لك من ان لا تصل اني شگد چنت
احب ميقات وأفضلها على روحي بس اكو انسان يخليك تكره
بقناعه وهذا الشي سوته ميقات خلتني اكرهه قبل شگد چنت
اخاف عليها من الكلمه لا تجرحها اما هسه لا صار ما يهمني
شنو يصير بيها بعد الصار وبيوم خطوبتي من لميس ونشرت
الستوري عقدت على لميس ودى البسها حلقتها اتصلت
ميقات واني عندي خلاص بعد ميقات انتهت بالنسبه الي ومو
لكون خطبت لميس لا هاي الثانيه هم بالي مو يمها بس احس
روحي جزعت اريد ابقى وحدي وما اريد اي انثى بحياتي

واكو شخص هو يجيب المذله لنفسه ولميس من هذا النوع
هي جابت المذله لنفسها چنت گاعد يمها من اتصلت ميقات
وهي رفضت الاتصال خزرتها وميقات طول الوقت ترسل
رسائل تغلط بيها عليه وإني مطنشها ما اجاوبه وما آفتح
رسائلها

وبس لبست الحلقه لميس گمت من يمها ورحت بالاستقبال
يم ابويه وعمامي والزلم الگاعده واني في وقتها عبالي بس
خطوبه وعقد بعدين يله فهمت انه العصر الزفه واخذها ويايه
حولت مكاني يم ابويه وحچيت ويا بصوت خافت گتله / ادري
اخوك لو. بنته عمرها 40 وعانس هم ما يسوي هيچ

سامي / اني اعرف وسام هو يريد سند لبناته وما يثق باحد
غيرك لهذا اعتبرك ابنه وما يشوف نفسه مثل ما تگول انت

بيان / ادري يريد سند لبناته مو إلا يزوج بنته الي ترى اني ابن
عمهن وحزام ظهرهن

المهم الحچي ضايع لهذا اسكت احسن وبعد الغده
والمجاملات قرب العصر راح عمي مهند جاب مزيقه وظلت
ادگ المزيقه ما يقارب نص ساعه حتى الناس تعرف انه
لميس عرسها اليوم وعمي مهند رگص رگص ما صاير الله
يساعد عظامه ومفاصله

وبعدها دخلت اخذت لميس وصعدتها بسيارتي وابويه وبيبي
صعدوا ويه عمي مهند ورحنه للمزرعه وصلنه المغرب وبيبي
گبل اخذت لميس صعدتها لغرفتي واني بقيت احچي ويه
ابويه وعمي مهند على هاي دگه سووها بيه شلون عقد عرس
بيوم واحد واني بعدني ما اعرف راسي من رجلي ويه ميقات

مهند / اگلك انت چنت نايم وهستوك گعدت غير صار أكثر
من اسبوع من بلغك عمك وسام بموعد الزواج روح بابا
لغرفتك ترى العروسه صارت بغرفتك وانت بعدك تعترض

بيان / وعمي مهند من النوع النسونچي ودمه خفيف ويضحك
اكبر واحد بحيث اني شگد چنت معصب ضحكت وهو يكلي
بابا روح لغرفتك وافحص المنتج جيداً قبل الاستعمال لانه
المباع لا يرجع بكل الاحوال يعني لميس باقيه على گلبك

عفتهم وصعدت لكيتها بالغرفه اني ما اهتميت بيها بدلت
ملابسي وكعدت على السرير اگلب بموبايلي وهي عينها
مركزتها عليه آخر شي نطقت

لميس / بيان انت زعلان مني لكون لغيت اتصال ميقات

بيان / لا والله اني چنت ناوي الغي الاتصال من الأصل مثل ما
انتي چنت ناوي الغيچ من حياتي وظليتي مچلبه بيه

لميس / يعني شنو بيان

بيان / شوفي لميس خلي اگلچ من هسه ونتفق حتى كل
واحد يعرف حدوده اني اتصلت بيچ وگتلچ لميس ارفضي انتي
من يمچ بس چان كلامچ انت إذا رجال ارفض من يمك واني
لكوني مو رجال وعلى لسانچ اعترفتي لهذا راح نبقى اخوه لانه
سبق وگتلچ ما الي نفس بيچ

لميس / يعني شنو بيان تريد نبقى اخوه اني احبك ومستعده
انتظرك العمر كله إلى ان يصير الك نفس بيه

بيان / شوفي اني ما اگدر أ