لكل طلاب الجامعات 🧑🏼‍🎓🧑🏼‍🎓
ولكل محبي العمل الطوعي 🧡🧡
خليك إنسان مؤثر وقم بتكوين فريق عمل تطوعي،😃
وشارك بفكرة مبادرة تطوعية لتطوير جامعتك ونافس للفوز بـــمبلغ :
💵💵 1,500,000 جنيه (للفريق الأول)
💵💵 1,000,000 جنيه (للفريق الثاني).

تاق لصحبك المتطوع في أي منظمة وقول ليهو خليك جاهز💪🏼

📌 سيتم الإعلان عن المسابقة اليوم إن شاء الله.

"معانا ولا مع كأس العالم؟"

اقترب الموعد ، ونحن على أحر من الجمر

وحتى الوقت المرتقب شاركنا منتخبك المُفضل و حماسك للقادم ..

#VMC5
#VMC_Program

صباح الخير على الجميع
تُرىٰ ما الذي يختبئُ خلف الستار ؟
ما رأيكم أنتُم ؟
كونوا على استعداد ..

#VMC_Program

كما توقعتُم تمامًا ، اقترب موعد النُسخةِ الخامسة

أخبرونا بأفكاركم و توقعاتكم عن النسخة الجديدة ..

فنحن نتحرّق شوقاً للُقياكم يا أعزّاء

#VMC5
#VMC_Program

مرحباً بالجميع 🧡

دعونا نُجِب عن بعض الأسئلة التي تدور في أذهانكم !

_ ما هو ال VMC ؟

عبارة عن برنامج تدريبي مُكثّف لتأهيل و تدريب الشباب الفاعلين في مجال العمل الطوعي ، من أجل رفع مقدراتهم العملية و لتمليكهم المهارات اللازمة لإدارة و تطوير البرامج و المشاريع الطوعية..

#VMC5
#VMC_program

مساءُ الخير عليكم 🧡

استكمالاً لما بدأناه ، في الإجابة عن الأسئلة التي تدور في الأذهان

دعونا نُجِب عن سؤال "إلى ماذا يهدُف برنامج صناعة المتطوع

• يأتي هذا البرنامج ليعمل على معالجة بعض المشكلات التي شكّلت عائقاً -أمام الأفراد و المنظمات- دون الوصول لاستدامة المشاريع الطوعية بمُختلف أنواعها و مجالاتها .

#VMC5
#VMC_Program

VMC1
VMC2
VMC3
VMC4
نُسخ عِدة كُنتم أنتم روحها وعتادها ، والآن ونحن على وشك بداية جديدة لنسخة جديدة
يا تُرى من سيكون أبطالها ؟
وبماذا ستتميز عن بقية الدُفع المُتخرجة من برنامج صناعة المتطوع؟

كما نطلب من النُسخ السابقة كتابة أفضل لحظاتك في نُسختك ..

#VMC5
#VMC_Program

متأكدونَ أنّ حماسكم قد بلغ أوجه! وآن الأوان لنكشف لكم الستار عن تفاصيلِ النسخة الخامسة من برنامج صناعة المُتطوع..

تفاصيل هذهِ النسخة المُتفردة من البرنامج:
- 18 ولاية من جميعِ أنحاء السودان.
- 10 أيام تدريبية.
- 200 متدرب.
- 10 مدربين.
- 10 محاور رئيسية.
- 80 ساعة تدريبية.
- 30 لوجستي.
- 20 إداري
#VMC5
#VMC_Program

10 محاور رئيسية في أضخم برنامج لصناعة المتطوّع.
أول المحاور هو التخطيط الاستراتيجي للمنظمات.
هو شنو، بيهدف لشنو، وبيضمن شنو؟
تعالوا مع بعض؛ عشان تعرفوا إجابات الأسئلة دي. 👇🏾
التخطيط الاستراتيجي للمنظمات هو عملية من خلالها بنحدد المنظمة اتجاها وخطتها.
الهدف من الموضوع ده شنو؟
من خلال دراستك ليهُ حتوصل لتجربة تطوعية مُمتازة وتقدر تدير المنظمات بطرق مؤسسة ومُتميزة.
ليه عملنا محور كامل للتخطيط الاستراتيجي؟
لأنو عايزينك يا عزيزي المتطوّع تعرف أكتر المدارس الاستراتيجية المنتشرة، وتكون مُتمكن فيها وبكدة إنت حيكون عندك نماذج كتيرة بتضمن ليك فعالية العمل التطوعي وتكون قادر تشتغل بيها وتعبر. 🧡

#VMC5
#VMC_Program

تاني محور من محاور برنامج صناعة المتطوّع هو محور البناء الأخلاقي للمتطوع.
للأسف الشديد في جزء من الأعمال التطوعية بيكون بعيد كل البعد من الجانب الأخلاقي والإنساني؛ عشان كدة جا المحور ده لتعزيز مبادئ وأخلاق العمل التطوعي، ومن خلال المبادئ دي العمل حيستمر ويخدم أكبر شرائح مُمكنة.

#VMC5
#VMC_Program

تعالو نتعرف على المحور الثالث

المحور الثالث هو محور الأُسس القانونية في العمل الطوعي

المعرفة بالأُسس و القوانين المتعلقة بالعمل الطوعي مهمة شديد ، عشان نقدر نوظف المجهود المبذول في مواضعه الصحيحة و ما يختلط العمل الطوعي بالمُخالفات القانونية .

و كمان لما نعرف القوانين المتصلة بالعمل الطوعي بنقدر نحفظ حق المتطوع ، و المؤسسة الطوعية ، و كمان المُستفيد أو متلقي الخدمة .

#VMC5
#VMC_Program

وصلنا في رحلة تعريفنا بالمحاور للمحور الرابع

و هو محور البناء النفسي للمتطوع

البناء النفسي هو من أهم الجوانب ، لأنه مع اختلاف الحالات و المواقف البتمر بالمتطوع ، سواء في مسيرته التطوعية أو في حياته الشخصية ، ممكن تتأثر إنتاجيته أو حتى تركيزه .

عشان كدا ركّز برنامج صناعة المتطوع على إنه يدي المتدربين المعلومات و المعرفة المتعلقة بالبناء النفسي للمتطوع ، لأنه المتطوع يُعتبر المورد الأول و الأساسي في العملية التطوعية .


#VMC5
#VMC_Program

"تيست تيست!
كأس العالم ما يكون نساكم VMC5؟"

وصلنا وين في التعريف؟
المحور الخامس يا فندم! ألا وهو:
"محور البناء القيادي للمتطوع"

حيخدمني كيف، والفائدة منه شنو؟
حأثني عليك في البداية وأقول ليك أنّك يا متطوع زول فنّان، وأخو أخوان وعشان تبقى قيادي كمان؟ لازم نديك جرعات قيادية مكثفة كدا تعزز فيك الجوانب القيادية، وتملكك مهارات مهمة جدًا تساعدك في صناعة القرارات واتخاذها.
عشان الفائدة تعم عليك وعلى الأفراد المتطوعين معاك في المشاريع والمبادرات التطوعيّة خاصةً، والريادة والقيادة والتأثير في المجتمع عامةً!

جاهز يا بطل؟؟🤩
#VMC5
#VMC_Program

محورنا السادس هو تأسيس المشاريع التنموية المستدامة.
الكلام كبير صاح؟
ولا يهمك حنبسطوا ليك..
عشان نستغل الموارد البشرية والمالية بشكل أفضل ونوصل من خلالها لفوائد كبيرة؛ ضفنا ليكم المحور ده.
من خلال المحور السادس المتطوّع حيقدر يعمل قوالب لكل العمليات التطوعية في قالب المشاريع الإحترافية، وده بعد ما يكون مُلم بكل مهارات، أدوات ونظريات بناء المشاريع وإدارتها لحدي الوصول لمرحلة القياس والتقييم.

#VMC5
#VMC_Program

" الإعلام ركيزة أساسية لكُل عمل في الدنيا ، سواءًا كان طوعي أو حتى عمل ربحي ، ولو مافي إعلام ومُحتوى ماكان حيكون VMC وصل النسخة الخامسة والآن أنتو بتشاهدو في منشوراتنا الآن "

لكن للإعلام أسس ومهارات ، وطُرق لصناعة مُحتوى إعلامي يلبي غرض المتلقي من مشاهدته ليك ، ويكون متوافق مع مبادئه وقيمه وحاجات تانية كتيرة شديد حنعرفها أكتر وأكتر في داخل محور " صناعة المحتوى الإعلامي "

ما حنقول ليكم خليكم مُتحمسين لأنه عارفين كمية الحماس الفيكم ، بس حنقول ليكم ما تبقى إلا القليل ..

#VMC5
#VMC_Program

مساء الخير يا شباب 🧡

اشعلو الحماس 🔥

باقي ٤٨ ساعة بس لفتح استمارة التسجيل للنسخة الخامسة من برنامج صناعة المتطوع VMC 5 🔥🧡

خليكم قريبين و تاقو أصحابكم عشان يكونو معاكم كمان 😉🔥

#VMC5
#VMC_Program

صباح الخير 🧡

محاور برنامج صناعة المتطوع ١٠ محاور ، اليوم حنعرف المحور الثامن منها
و هو محور " المشكلات المُعيقة لاستدامة العمل الطوعي "

في كتير جداً من المشاكل و المعيقات البتواجه العمل الطوعي ، اتعملت إحصائيات كتيرة لمعرفة المعيقات دي و حصرها .
عشان كدا تم إدخال محور كامل بيناقش و يفتش عن حلول لمُعيقات العمل الطوعي ، عشان نقدر نضمن تجربة تطوعية ممتازة و مستدامة .


#VMC5
#VMC_Program

وصلنا لمحورنا التاسع؛ وهو محور صناعة المبادرات والابتكار الإجتماعي..
اتكلمنا في المحور السابق عن المشاكل المُعيقة للعمل الطوعي ومحاولتنا لإيجاد حلول ليها ودا أساس محورنا لليوم..
فتجدد المشكلات يستلزم تجديد الحُلول ولأننا في VMC هدفنا الأساسي نوصل لتجربة تطوعية مُثلى خصصنا الإبداع والابتكار المجتمعي بمساحة يتم من خلالها تعريف المتطوع على مفاتيح الابتكار المجتمعي وتعزيز ثقافة الإبداع والتطوير لدى المتطوعين.

#VMC5
#VMC_Program

سألنا جُزء من المتدربين في النسخة الرابعة من برنامج صناعة المتطوع ، استفدت شنو من انضمامك للبرنامج التدريبي .. غير المعلومات الاتقدمت في الورش ؟
- و دي كانت إجابتهم :
• مجتمع ، تفكير ، تطوير ذاتي..
• ممكن نقول تغيير في الرؤى العامة بتاعتي من زاوية نظر ضيقة لي زاوية اكبر بي كتير..
• معرفة التطوع بمنظور أعمق..
• تعزيز في جوانب شخصية..
• بقت عندي ولو القليل من الجرأة اتكلم قدام الناس..
• ثقة في الذات، طموح أكبر، آفاق جديدة مختلفة تماماً الحمد لله..

- كل واحد من الناس دي طلع بحاجة مختلفة ، رغم انو في منهم اجاباتهم كانت متشابهة ، لكن برضو كل واحد فيهم لقى حاجة جديدة بناءً على تفكيره و شخصيته

- طيب لو سألنا كل واحد منكم ، في رأيك بعد ما شفت إجابات المتدربين ، حتطلع بشنو من البرنامج التدريبي غير المعلومات اللي حتكون في الورش ؟

خلونا نشوف أرآئكم ! 🧡

#VMC5
#VMC_PROGRAM