ဗဟိုတိုင်းရင်းဆေးဝါးကြီးကြပ်ရေးကော်မတီ အစည်းအဝေး(၁/၂၀၂၆) ဆုံးဖြတ်ချက် အရ တိုင်းရင်းဆေးဝါးမှတ်ပုံတင်(အသစ်) လျှောက်ထားခြင်းနှင့်စပ်လျဉ်းပြီး လိုအပ်ချက်များ ရှိပါသဖြင့် သက်ဆိုင်ရာလုပ်ငန်းရှင်များအနေဖြင့် တိုင်းရင်းဆေးပညာဦးစီးဌာန၊ ဆေးဝါးဌာန နှင့် ဆက်သွယ်ဆောင်ရွက်ရမည့် မှတ်ပုံတင်(အသစ်)လျှောက်လွှာများစာရင်း(၉)စောင်ကို ထုတ်ပြန်ကြေညာလိုက်သည်။
အဆိုပါလိုအပ်ချက်များနှင့် စပ်လျဉ်း၍ တိုင်းရင်းဆေးပညာဦးစီးဌာန၏ ကြော်ငြာစာ အမှတ်(၁၈၂/၂၀၂၆) ထုတ်ပြန်သည့် (၂၅- ၈-၂၀၂၆)နေ့မှစတင်၍ (၄)လအတွင်း ဆက်သွယ် ဆောင်ရွက်ရန်နှင့် ဆက်သွယ်ဆောင်ရွက်ခြင်းမရှိပါက တိုင်းရင်းဆေးဝါးမှတ်ပုံတင်(အသစ်) လျှောက်ထားခြင်းအား အလိုအလျောက် ပျက်ပြယ်မည်ဖြစ်ကြောင်း အသိပေးအပ်ပါသည်။

မွန်ပြည်နယ်၊ မော်လမြိုင်ခရိုင်၊ ကျိုက်မရောမြို့နယ် တိုင်းရင်းဆေးကုဌာနမှ (၃၁-၈-၂၀၂၆) ရက်နေ့တွင် cyclone shelter ရေဘေးရှောင်စခန်း၌ ကျား (၅)ဦး၊ မ (၂၅)ဦး၊ စုစုပေါင်း (၃၀)ဦး တို့အား ကျန်းမာရေးစောင့်ရှောက်မှုများ ဆောင်ရွက်ပေးခဲ့ကြောင်း သိရသည်။

တိုင်းရင်းဆေးပညာဦးစီးဌာန၊ မန္တလေးတိုင်းဒေသကြီး၊ ညောင်ဦးခရိုင်၊ ညောင်ဦးမြို့ (၂၅) ခုတင် ဆံ့ တိုင်းရင်းဆေးရုံမှ (၃၁-၈-၂၀၂၆) ရက်‌နေ့၊ နေ့လယ် (၁:၀၀) နာရီမှ ညနေ (၄:၀၀) နာရီအထိ ဆေးရုံအုပ် ဦးညီညီမောင်၊ ဒုတိယ‌တိုင်းရင်းဆေးမှူး ဒေါ်သင်းသင်း‌ဌေး၊ ဒုတိယတိုင်းရင်းဆေးမှူး ဒေါ်စန်းစန်း‌ထွေးနှင့် ညောင်ဦးခရိုင်တိုင်းရင်းဆေးကုဌာနမှ ခရိုင်တိုင်းရင်းဆေးမှူး ဦးတင်စိုး တို့ပါဝင်သော အဖွဲ့သည် ခရိုင်၊ မြို့နယ်အမျိုးသမီးရေးရာအဖွဲ့၊ ခရိုင်၊ မြို့နယ်မိခင်နှင့်ကလေး စောင့်ရှောက်ရေးအသင်းတို့နှင့်ပူးပေါင်း၍ ညောင်ဦးမြို့၊ သာသနာ့ရောင်ခြည်သီလရှင် စာသင်တိုက်သို့ သွားရောက်၍ လူကြီး (မ) (၂၅)ဦး၊ ကလေး (မ) (၅)ဦး၊ စုစုပေါင်းလူနာ (၃၀)ဦး တို့အား ဆေးကုသမှုများ ဆောင်ရွက်ပေးခဲ့ကြောင်း သိရသည်။

ရန်ကုန်တိုင်းဒေသကြီး၊ အရှေ့ပိုင်းခရိုင်တိုင်းရင်းဆေးကုဌာနနှင့် ပုဇွန်တောင်မြို့နယ် တိုင်းရင်းဆေးကုဌာနတို့ ပူးပေါင်း၍ (၂၄-၈-၂၀၂၆) ရက်နေ့မှ (၃၁-၈-၂၀၂၆)ရက်နေ့ထိ ဒုတိယ တိုင်းရင်းဆေးမှူး ဒေါ်နန်းယဉ်မိုးလတ်နှင့် လက်ထောက်တိုင်းရင်းဆေးမှူး ဒေါ်နန့်အိုင့်ပွားဟှီ တို့သည် တတိယအကြိမ် ရန်ကုန်တိုင်းဒေသကြီးလွှတ်တော် တတိယပုံမှန်အစည်းအဝေးသို့ သွားရောက်၍ ကျား (၃၀)ဦး၊ မ (၃၈)ဦး၊ စုစုပေါင်း (၆၈)ဦးတို့အား ကျန်းမာရေး စောင့်ရှောက်မှု များ ဆောင်ရွက်ပေးခဲ့ကြောင်း သိရသည်။