وييجى سيدنا ابو بكر ويدخل يصلي إمام بالناس.. فقال الصحابة فوالله ما فهمنا منه كلمة الا انه يقوم ويركع.. وصلي ابو بكر بالناس في حياة النبي 17 صلاة.. وفى تاني يوم.. اليوم الـ12 النبي حس بخفة فقام وتوضأ ويدوب وصل لحد الستار اللى بيفصل بين بيته وبين المسجد فوقع وأغمى عليه.. فراح له سيدنا علي وسيدنا العباس وسندوا النبي وخرج النبي مسنود بين علي والعباس ودخل إلي المسجد والناس كانت بتصلى فبمجرد ما الناس خدت بالها منه.. قالوا: ففرحنا وقلنا قد شُفي النبى.. فكدنا ان نفتتن في صلاتنا (الصلاة هتبوظ هنخرج من الصلاة عشان بنبص علي النبي) فشاور النبى إلينا بيده ان مكانكم (اثبتوا.. ماتطلعوش من الصلاة ).. فالنبي فضل يمشي بين علي والعباس لحد ما وصل عند ابو بكر الصديق..

فأبو بكر لمح النبى وفرح جداً.. فأبو بكر رجع خطوتين لورا عشان النبي يكون الإمام للمصلين.. فالنبي مسكه عشان يثبت مكانه وميرجعش لورا.. وقعد النبي جنب أبو بكر يصلي وبدأ ابو بكر يصلي بصلاة النبي والنَّاس يصلون بصلاة ابي بكر.. فكان أبا بكر يأتم بصلاة النبي والناس يأتمون بصلاة ابي بكر (يعني كان ابو بكر واسطة بين النبي والنَّاس.. ليه؟ لان النبي تعبان وصوته واطي فالناس مش سامعين صوته)..

خلصت الصلاة وهيتسند النبى على الصحابه ويرجع بيته.. فراح وراه سيدنا عبد الله بن مسعود.. كان عايز يطمن عليه فيقول: فدخلت الي النبى ووضعت يدي علي راْسه فإذا الحمي قد اكلت بدنه (سخن قوي).. فقلت بأبي انت يارسول الله انك توعك وعكاً شديداً.. فقال: نعم يابن مسعود، إنا معاشر الأنبياء توعك كَوَعك رجلين منكم.. فقال بن مسعود: وكذلك الأجر يارسول الله؟ قال: نعم وكذلك الأجر..

طيب دلوقتى الليل جه.. والنبي بايت في بيت زوجة من زوجاته.. وبكرة ميعاد وجوده عند السيدة ميمونة بس النبي عليه الصلاة والسلام نفسه يروح لعائشة.. ونفسه يُمرض عندها لأنه بيرتاح عند عائشة.. لكن مش عاوز يزعل زوجاته ويكسر قلبهم بس في نفس الوقت نفسه يروح لعائشة.. فالزوجات كلهم قاعدين.. فيبص النبي وهو تعبان قوي ويقول اين انا غداً.. ( هو انا بكره المفروض اروح لمين فيكم؟).. وبعدين يقول لزوجاته أتأذنون لي ان أُمرض في بيت عايشة؟ فقالوا طبعاً يا رسول الله.. أذنا لك يا رسول الله.. فأرتاح النبى انه هتمرضه حبيبته عائشة.

نكمل بكره إن شاء الله

قصة حياة النبي صلى الله عليه وسلم♥️♥️

لو حد حابب يساعد ، في ميزان حسناتكم جميعا باذن الله ❤️.

الحلقة 98 من السيرة النبوية

يلا صلوا على النبى

وفاة النبى ( الجزء 2 )

النبى هيمرض فى حجرة السيدة عائشة رضى الله عنها.. هى حبيبته واكتر حد بيرتاح معاه.. فخرج النبى من حجرة زوجته السيدة ميمونه وكان تعبان مش قادر.. فسيدنا علي وسيدنا العباس سندوه بس المرة دي النبي مش قادر يدوس بقدمه علي الارض.. فالصحابه بيقولوا: فخرج علي والعباس برسول الله وقدماه تخطان في الارض خطاً (يعني مش قادر يحط رجله علي الارض.. فهم ساندينه ويدوب رجله بتتجرجر فعامله خط على الأرض).. فالمنظر كان صعب وكان قاسي علي الصحابة.. كانوا بيبكوا ويعيطوا.. دخل النبي عند السيدة عائشة.. فتقول عائشة: فدخل النبى الي حجرتى ونام في الفراش..
َ
وحطت السيدة عائشه جنبه إناء فيه ماء فقالت: فجعل يضع يده فى الاناء ويمسح علي راْسه ويقول لا اله الا الله ان للموت لسكرات..(يعني يااااه ده الموت متعب قوي).. ويشتد الألم علي النبي لدرجة ان ورد في بعض الكتب ان النبي قال اللهم ثقل عليّ وخفف علي امتي.. يعنى خلى التعب بتاع سكرات الموت كله عليا وخفف عن امتى.. فالسيدة عائشة هتتجن شايفه النبى عليه الصلاة والسلام تعبان قوى فبتقول: فتذكرت انه كان يرقي المرضى ويضع يديه علي رأسهم ويقول اللهم رب البأس اشف وانت الشافي لا شفاء الا شفائك شفاء لا يغادر سقما.

فتقول السيدة عائشه فظللت أقول وأكرر الدعاء.. فلما انتبه لى النبى فأمسك بيدي وقال لا يا عائشة.. قد كان ذلك في المدة أما الان فلا ينفع.. يعني ايه؟ يعني الكلام ده ينفع لما يبقي لسه فيه في العمر بقية اما دلوقتى خلاص انا عمرى بينتهى فمش هتنفع.. فبتقول عائشة فبكيت وعلمت انه ميت.. فبينما نحن كذلك اذ علت الأصوات في المسجد.. وصوت العويل والبكاء عالي جدا في المسجد.. انتو عارفين ان بيت النبى كان جنب المسجد يدوب الفاصل بينهم ستار..

فسأل النبي وقال الناس مالها.. فى إيه؟ فقالت عائشة يبيتون منذ البارحة في المسجد يا رسول الله.. يخافون عليك.. فقال النبي أوقد فعلوا؟ فقالت نعم.. فقال احملوني اليهم.. النبى لقاهم خايفين عليه فقام وراح لهم بنفسه.. فجاء علي والعباس وحملوا النبي فخرج النبى للمسجد.. فاول ما خرج سكت الناس.. فحملوه الي المنبر.. وأجلسوه الي المنبر.. فقال النبي عليه الصلاة والسلام: أيها الناس مالكم لكأنكم تخافون علي؟.. فقالوا: فداك آبائنا وأمهاتنا.يارسول الله.. فقال النبى: أيها الناس موعدكم معي ليس الدنيا موعدكم معي عند الحوض.. والله لكأني أراه من مقامي هذا.. النبى بيصبرهم ويصبرنا احنا كمان..

فبكي الناس ويبدأ النبي يوصيهم وصايا فيقول لهم أيها الناس والله ما الفقر أخشي عليكم وإنما أخشي عليكم الدنيا فتتنافسوها كما تنافسها الذين من قبلكم فتهلككم كما أهلكتهم ( يعني انا يا مسلمين مش خايف عليكم من الفقر لكن خايف عليكم من الدنيا تتخانقوا علي المناصب وعلي الكراسي وتقتلوا بعض علي السلطان والجاه).. ويقول النبى: أيها الناس لا ترجعوا بعدي كفارا يضرب بعضكم اعناق بعض (يعني متقتلوش بعض) ويبدأ النبي يوصي أيها الناس الله الله في الصلاة (يعني خلي بالكم من الصلاة يا مسلمين) الله الله في الصلاة.. ويفضل يكرر ويكرر.. وبعدين يقول: الله الله في النساء أوصيكم في النساء خيراً..

وبعدين يقول جملة غريبة قوي أيها الناس من كنت قد جلدت له ظهراً، هذا ظهري فليقتص مني.. من كنت قد سببت له عرضا، هذا عرضي فليقتص مني.. من كنت قد أخذت منه مالاً فهذا مالي فليقتص منه قبل يوم القيامة حيث لا ينفع مال ولا بنون الا من اتي الله بقلب سليم وإني احب ان ألقي الله نقيا.. ولا يخشي احدكم الشحناء (يعنى خدوا حقكم منى ومتخافوش انا مش هاخاصمكم بعدها).. ويقول فمن كان له عندي حق فليأتي فليأخذه الان وليقتص مني الان.. طب معقول حد هيقبل على نفسه انه مهما كان له حق أنه يقتص من النبى !!

فيقوم واحد من الصحابه اسمه عكاشه بن محسن ويقول: انا اريد القصاص يا رسول الله.. فألتفت الناس للرجل وجفت الدموع.. اصل الناس مش مصدقة ان حد يقبل على نفسه انه يقتص من النبى مهما كان له حق عنده.. فعكاشة يقول انا اريد القصاص يا رسول الله، كنت يوم غزوة بدر يا رسول الله تسوي الصفوف فطعنتني بعصا بيديك في بطني.. فأوجعتني، فأريد منك القصاص.. فقال النبى: نعم يا عكاشة تعال.. المهم العصايه اللى كانت فى ايد النبى يوم بدر دي كانت عصاية معينة.. وكانت فى بيت السيدة فاطمه بنت النبى فبعت النبى واحد يجيب العصايه.. انتو متخيلين!! ان فاطمه لما حد يخبط عليها فتسألهم عايزين ايه؟ فيقولولها هاتي العصايه عشان واحد هيقتص دلوقتى من النبى.. موقف صعب جدا..

المهم وصلت العصاية للمسجد وعكاشة بن محسن عمال يتخطى رقاب الناس عشان يروح ناحية المنبر والنَّاس مش مصدقين انه هيقتص من النبي.. فاجتمع علي الناس حزنين حزن فقد النبي وحزن ان حبيبهم هيُقتص منه قدامهم ومش قادرين يعملولوا حاجة..

فمسك عكاشه العصا بس سيدنا علي مش قادر يستحمل المنظر فراح وقف قدام عكاشة وقال له خذ القصاص مني يا عكاشة.. فقال النبي لا ياعلي بل القصاص مني ياعلي

وجه العباس يقول نفس الحاجه فقام النبى قايل: لا بل القصاص منى يا عباس.. فوقف عكاشة بن محسن واول ما قرب من النبى قام رامى العصا على الأرض وقام حاضن النبي وقال: جسمي لجسمك فداء.. روحي لروحك فداءاً يا رسول الله.. فالنبي قال له: لم فعلت هذا يا عكاشة؟ (ليه قلت انك عايز تقتص وطلعت لا هتقتص ولا حاجه) فقال عكاشة: يا رسول الله اردت ان احتضنك.. فيتبارك جسد عكاشه بإنه احتضن جسد النبى..
- النبى مع الصحابه في المسجد فقال صلى الله عليه وسلم: أيها الناس إن عبداً خيره الله بين الدنيا وبين ما عند الله، فاختار ما عند الله.. فالناس سكتت ومفهمتش لكن كان سيدنا أبوبكر هو الوحيد اللى فهم الجملة، فانفجر بالبكاء وقاطع كلام النبى وقال: فديناك بآبائنا، فديناك بأمهاتنا، فديناك بأولادنا، فديناك بأزواجنا، فديناك بأموالنا، وفضل يكرر الكلام.. فالناس أضايقت وبصت لأبو بكر إنه إزاى يقاطع النبى بالشكل ده.. فقام النبى بسرعة مدافع عن سيدنا ابو بكر وقايل: أيهاالناس، دعوا أبوبكر، فما منكم من أحد كان له عندنا من فضل إلا كفأناه به، إلا أبوبكر لم أستطع مكافأته، فتركت مكافأته إلي الله عز وجل، كل الأبواب إلي المسجد تسد إلا باب أبوبكر لا يسد أبدا..

ويبدأ النبى يحس بشفقة ناحية الصحابة صعابنين عليه عشان شكلهم قلقانين عليه قوى.. فبدأ النبي يدعيلهم ويقولهم: آواكم الله.. نصركم الله.. ايدكم الله.. رحمكم الله.. غفر الله لكم.. ثبتكم الله.. فضل النبي يدعى وبعدين قالوا: يا رسول الله أرأيت ان مت فمن يُغسلك؟ فقال صلي الله عليه وسلم يُغَسلني اهل بيتي.. ثم قالوا يارسول الله ففيم نكفنك؟ فقال: كفنوني في ثوبي هذا.. فسكتوا طويلاً وسكت.. وبعدين قالوا وهما بيبكوا: يارسول الله فمن يصلي عليك حينها؟ فقال النبي أيها الناس إرفقوا بنبيكم.. اذا انا مت اخرجوا عني ساعة (يعني لما تيجوا تصلوا عليا سيبوني ساعة لوحدي الاول).. فقالوا لماذا يارسول الله؟ فقال: فإنه اول من يصلي علي ّحبيبي جبريل عليه السلام.. ثم يصلي عليّ ميكائيل.. ثم إسرافيل.. ثم يُصَلِّي عليّ ملك الموت.. ثم جنود من الملائكة.. ثم تدخلون عليّ فوجاً فوجاً وتصلون علي.. فقالوا يارسول الله ومن ينزلك قبرك؟ فقال النبي: اهل بيتي وجموع من الملائكة يرونكم من حيث لا ترونهم..
ويبدأ النبي يقول لهم كلام جميل قوي.. أيها الناس أٓقرؤا انفسكم مني السلام، أيها الناس اقرؤا مني السلام كل من آمن بي من امتي ولم يرانى ( دي لينا احنا بقى.. النبي بيسلم علينا احنا.. وعليك السلام يارسول الله)..

دلوقتى جه اليوم ال15 النهارده يوم الاتنين وقت الفجر.. يحصل ايه؟ يحصل ان النبي وقت آذان الفجر يشعر بشيء من الخفة.. يلاقي نفسه كويس.. قادر يقوم ويتحرك.. فيمشي لحد الستار اللى لما يفتحه يطلع منه على المسجد النبوي.. فأول ما يفتح الستار فيشوف المسلمين بيصلوا مؤتمون بأبي بكر الصديق.. ابو بكر واقف إمام عليهم.. فالنبي عليه الصلاة والسلام يتبسم النبى، فرحان بصفوف المصلين في الفجر والمسجد مليان علي الآخر.. آخر فرحة في حياة النبي كانت فرحته بالناس اللى بتصلى الفجر..

فتبسم صلي الله عليه وسلم، فالصحابة بيقولوا فظننا انه قد شُفي وجعلنا نسترق النظر اليه ونحن فى الصلاة.. ووالله ما رأيناه يوم قط اجمل ولا أضوأ من هذا اليوم.. ووالله كأنما الشمس طلعت علينا.. فكدنا ان نخرج من صلاتنا.. فأشار النبى إلينا ان أبقوا مكانكم.. وكان ابو بكر هيرجع لورا ( عايز النبي ييجى هو يبقي الامام ) فالنبي أشار له خليك مكانك.. والمسلمين كملوا الصلاة والنبى يبص لهم ويبتسم.. وبعدين دخل وقفل الستار.. وكانت دى اخر مرة هيفتح النبى فيها الستار صلي الله عليه وسلم..

وينام النبي في الفراش.. فالصحابة خلصوا الصلاة ورايحين له.. فأول واحد دخل عليه كان عبد الرحمن بن ابي بكر وكان في إيده سواك.. فتقول عائشة فنظرت الي عين النبي فرأيت عيناه تنظر الي سواك عبد الرحمن.. فقربت من النبى وقلت له: يارسول الله أتريد السواك.. فأشار النبى برأسه اي نعم اريده.. فبتقول عائشة: فأخذت السواك من أخي وطيبته ولينته له بفمي ثم أعطيته للنبي فأستاك كأحسن ما كان يستاك صلي الله عليه وسلم.. فكان من مٓنِ الله عليّ ونعمته انه اخر ما دخل في جوف النبي ريقي.. صلي الله عَلى محمد.. صلي الله عليه وسلم

و بعدين النبي يقولها يا عائشة أريد من اباكى ان يأتى الآن فإني اريد ان اكتب كتاباً (يعني عايز اكتب ورقة).. فتقول له حاضر يا رسول الله.. فتلاقيه يغمى عليه فتقعد جنبه ومتروحش تناديهم.. فيفوق ويقول لها ياعائشة اين أباكى اريد ان اكتب كتاباً.. فيتكرر نفس الموقف.. ففي المرة الثالثة قال ياعائشة اما دعوتيهم؟.. قالت يارسول الله أخشي عليك (خايفه اقوم واسيبك)..

فقال النبى: ياعائشة أني أخشي والله ان يتمني متمنٍ ويختلف الناس ويقول احدهم انا أولي.. ويأبى الله ورسوله والمؤمنون الا أبا بكر.. (يعني خايف ان بعد وفاته صلى الله عليه وسلم الناس تتخانق على مين يمسك ولاية المسلمين فالنبى عايز أبو بكر يكون الخليفة).. فكان النبى حريص ان حد يكتب الورقه دى.. طيب هتتكتب ولا لا؟

قصة حياة النبي صلى الله عليه وسلم♥️

الحلقة 99 من السيرة النبوية

يلا صلوا على النبي

وفاة النبى (الجزء 3)

شوفنا امبارح أن النبى عليه الصلاة والسلام عيان قوى بس قال اريد أن اكتب كتاباً زى ما عرفنا.. فالصحابه خايفين قوى عليه مش عايزينه يتعب.. وفعلاً مأردش ربنا أن الورقة دي تتكتب.. ليه؟ حكمة الله عز وجل وإرادته.. عشان المنافقين يبانوا وسط المسلمين.. واللي رفض خلافة ابو بكر يبان لنا وميبقاش من المسلمين ..

المهم بعد شويه تدخل فاطمة تسلم علي ابوها حبيبها.. تقول فاطمة فلما دخلت فلم يقم اليّ ليقبلني كما كان يفعل في كل مرة.. فعلمت انه قد أصابه البأس (عيان قوى).. فالنبى عليه الصلاة والسلام شافها فحاول يقوم بس مقدرش وقال لها قربى منى يا فاطمة عايز اقولك حاجه.. فجت فاطمة وحطت ودنها عند شفتي النبي فقال لها سر بصوت واطى قوى.. فعائشه بتحكى لنا المشهد وبتقول فرفعت فاطمه رأسها وبكت..

فقال النبى لها إدن مني يا فاطمة (قربي مني تاني) ففعلت وبرضو النبى وطى صوته وقال لها سر فرفعت فاطمة رأسها فضحكت.. فبعد كده راحت عائشة قالت يا فاطمة ما رأيت اعجب اليوم من بكائك وضحكك في نفس الوقت.. وسألتها قالك ايه النبي؟ فقالت فاطمة: ما كنت لأُفشي سر رسول الله..
فبعد وفاة النبي عائشة منسيتش وراحت لفاطمة وقالت لها قوليلى النبى قالك ايه يوميها.. فقالت فاطمة أما الآن فنعم سأخبرك.. يا عائشة قال لى أبى: يا فاطمة إني ميت الليلة.. فبكيت.. ثم قال لى يا فاطمة إنك اول أهلي لحاقاً بي فضحكت.. يعنى انتى اول حد هيموت بعدى.. شايفين البكاء والضحك عند فاطمة مرتبط بوجودها مع النبى سواء في الدنيا او الأخرة.
وده مش بس حال فاطمة.. ده حال كل الصحابة..

في مرة كان فى صحابي بيبكى فبيقول للنبى: يا رسول الله اني اخاف حتي ولو دخلت الجنة ان تكون انت في اعلي منزلة في الجنة مع النبيين والصديقين.. وانا أكون في ادني منزلة من الجنة.. فأخشى ان لا اراك يا رسول الله.. فعلاً يا جماعه لا تطيب الجنة إلا بك يا رسول الله.. فقال النبي له: أما علمت ان المرء يحشر يوم القيامه مع من أٓحٓب.. فرح الصحابى وجرى يبلغ الصحابة ففرحوا قوى وقالوا: فوالله ما فرحنا بعد الاسلام بشيء كفرحتنا بهذا الحديث.. انا وأنتو كمان لازم نفرح قوى بالحديث ده ونفتكره عشان نقدر نصبر على فراق النبى فى الدنيا عليه الصلاة والسلام..

طيب احنا النهارده يوم الاتنين ١٢ ربيع اول سنة ١١ هجرياً بعد الفجر بشوية تقريباً وقت شروق الشمس.. النبي دلوقتي في بيت عائشة.. طيب هتختار له موتة عامله ازاي يارب؟ هل وهو بيحارب في سبيل الله؟ طب وهو بيقرأ قرآن؟ طب وهو ساجد؟ لا ولا اى حاجة من دي.. امال ايه؟ ربنا هيختار ان النبي يموت في حضن مراته عائشة رضي الله عنها وأرضاها..

النبى على فراشه فى حجرة عائشة.. بتحكي عائشه وبتقول: فسمعت النبى يقول: وعليك السلام ياجبريل.. فعلمت ان جبريل بالحجرة.. ثم سمعته يقول : ائْذَن له يا جبريل.. ثم سمعته يقول: وعليك السلام يا ملك الموت.. تقول عائشة: ففهمت ان ملك الموت يقول له السلام عليك يارسول الله.. ثم أشار النبى بأصبعه إلى السماء وقال: بل الرفيق الأعلى بل الرفيق الأعلى.. فعلمت ان ملك الموت يخير النبى ويقول: يا رسول الله أن ربك قد بعثني إليك أُخيرك بين البقاء في الدنيا وبين لقاء الله فاختر ما شئت يا رسول الله.. اشتاق الله إلى لقائك.. فأشار النبى عليه الصلاة والسلام بإصبعه وقال: بل الرفيق الأعلي.. خلاص خلصت رسالة سيدنا جبريل على الأرض خلص نزول الوحى.. خلاص جبريل مش هينزل الارض تاني.. إلا مرة كل سنه فى ليله القدر.. ليله نزول القرآن على النبى محمد صلى الله عليه وسلم..
تقول عائشة ظل النبى يشير بالسبابة الي السماء ويقول بل الرفيق الاعلي بل الرفيق الاعلي.. فتقول عائشة فقلت له : خُيرت واخترت.. والله علمت أنك لن تختارنا.. وييجي ملك الموت.. ويقف عند رأس النبي ويبدأ ياخد روح النبي.. ويقول ايتها الروح الطيبة روح محمد بن عبد الله اخرجي الي رضاً من الله ورضوان ورب راضٍ غير غضبان..

فتقول عائشة فسقطت يد النبي.. وثقلت رأسه في صدري .. فأحسست انه قد مات فجعلت أهزه هزاً فرأيت انه قد مات.. فما استطعت ان افعل شيئاً.. وما علمت ماذا افعل.. فما كان مني الا ان وضعته وسجيت وجهه بالغطاء (غطيت وشه مش قادرة أبص عليه)..

وذهبت الي الستار وفتحت الستر.. فنظر إليَّ المسلمون بدهشة (ستار بيفصل بين حجرة النبى وبين المسجد النبوى.. فمكنش حد بيفتحه إلا النبى عليه الصلاة والسلام.. مفيش إمرأة فتحته) فتقول عائشه فما كان مني الا ان صرخت في المسلمين وقلت: مات رسول الله.. مات رسول الله..

فضج المسجد بالبكاء.. فأما علي بن ابي طالب فأُقعد (مش قادر يمشي بقى عنده زى شلل مؤقت).. وأما عثمان بن عفان فظل يجري في المسجد يُمنةً ويسرى، رايح جاى زى الطفل اللى بيبحث عن أمه..

أما عمر بن الخطاب فجُن جنونه ورفع سيفه وقال كذبتم والله ما مات النبى إنما ذهب إلى لقاء ربه كما ذهب سيدنا موسى وسيعود كما عاد موسى ليقتل كل من قال انه قد مات.. وورد في بعض الآثار ان احد الصحابة وقتها بص الي السماء وقال: اللهم ان كنت قد أخذت محمداً فخذ بصري فلا أريد ان اري بعده أحداً فأخذ الله بصره..

والغريب ان اثبت الناس يوم وفاة النبى كان ابو بكر الصديق حبيب النبى عليه الصلاة والسلام.. وييجى ابو بكر ويرتعد بدنه ويغطى عينيه مش قادر يستحمل منظر بكاء الصحابة.. ويعدى لحد ما يقف قدام عمر بن الخطاب فيقول له اهدأ يا عمر.. فعمر مش بيهدى.. عمر منهار عمر مش في الدنيا.. سبحان الله، عمر بن الخطاب!! ده فاروق الأمة.. ده الجبل.. ده الشيطان بيخاف منه.. معقول يهتز الهزة دي يوم وفاة النبى؟ اه اصل ده حب النبي صلي الله عليه وسلم.. عمر بيحب النبي قوي مش قادر يستوعب..

فابو بكر يقول له توقف يا عمر توقف يا عمر.. وعمر في دنيا تانية.. فيضطر ابو بكر انه يتخطى عمر ويمشى ويدخل ابو بكر لحجرة عائشه.. و يدخل على النبى بالراحة ويقفل ورآه الستر.. ويقعد جنب النبي علي الارض وينكب عليه يبكي ويقبل النبى.. النبي مات بس شكله جميل قوى.. فيقول ابو بكر: طبت حياً وطبت ميتاً يارسول الله.. ما أجملك حياً وما أجملك ميتاً يا رسول الله..

ويبكي ابو بكر ويرتعد بدنه ويبدأ يقول: وااا حبيباه.. وااا نبياه .. وااا خليلاه.. ويبكي ابو بكر ويغطى وجهه النبى.. ويطلع للناس ويقول لهم كلمات في منتهي القوة: أيها الناس من كان يعبد محمد فإن محمداً قد مات.. ومن كان يعبد الله عز وجل فإن الله حي لا يموت.. ويتلو قول الله تبارك وتعالي: { وَمَا مُحَمَّدٌ إِلاَّ رَسُولٌ قَدْ خَلَتْ مِن قَبْلِهِ ٱلرُّسُلُ أَفإِنْ مَّاتَ أَوْ قُتِلَ ٱنْقَلَبْتُمْ عَلَىٰ أَعْقَابِكُمْ وَمَن يَنقَلِبْ عَلَىٰ عَقِبَيْهِ فَلَن يَضُرَّ ٱللَّهَ شَيْئًا} [سورة آل عمران]

عمر بن الخطاب بيقول: بمجرد إنى سمعت الآية دى حسيت انى بسمعها لأول مرة.. فسقطت علي ركبتي وعلمت ان رسول الله قد مات.. وظللت اجري في المدينة وحدي ابحث عن مكان ابكي فيه وحدي حتي لا يراني الناس.

نكمل بكره إن شاء الله

انتظروا الحلقة الأخيرة غداً ان شاء الله.🥹

قصة حياة النبي صلى الله عليه وسلم ♥️

الحلقة ( 100 والاخيرة) من السيرة النبوية

يلا صلوا على النبى

زي ماقولنا إمبارح مات النبي عليه الصلاة والسلام.. والصحابة يتعبوا جداً.. ويتلم الناس على سيدنا أبو بكر الصديق وياخدوا موقف غريب جداً.. الصحابة في الظروف دي كلهم بايعوا ابو بكر الصديق اختاروه خليفة عليهم.. الصحابة فى منتهي الوعي، لو كانوا اتأخروا في اختيار الخليفة كان ممكن يحصل مشاكل.. كان ممكن تحصل فتنة، كان ممكن يحصل اختلاف.. لازم بسرعة نلم شملنا.. بسرعة منسمحش لحد يدخل بيننا..

وأجمع الجميع علي ابو بكر الصديق وتمت المبايعه بالخلافة في مكان اسمه سقيفة بني ساعدة علشان كده اسمها بيعة سقيفة بني ساعدة.. طيب ايه اللي هيحصل دلوقتي؟ طيب النبى فين دلوقتى؟ النبى في البيت وحواليه اهل البيت.. طبعاً اهل بيته تعبانين بيعيِّطوا جنبه والمسلمين كلهم في المسجد بيعيِّطوا.. آل البيت بيقولوا فسمعنا صوتاً من جانب البيت ينادي ويقول يا آل البيت: إنا لله وإنا اليه راجعون عظم الله أجركم.. اصبروا فإن نبيكم سبقكم علي الحوض (ربنا بيعزيهم).. فسكنوا وهدأوا.. فربنا ثبت آل البيت من فوق سبع سموات لمكانتهم عنده عز وجل.. فهدأوا لكن بعد شويه يسمعوا بكاء الناس في المسجد فيرجعوا للبكاء مرة اخري.. فقد النبي صعب..

طيب هنعمل ايه دلوقتي؟ لازم نِغسل النبى عليه الصلاة والسلام.. طيب نِغٓسله ازاي؟ معقولة نجرده من ثيابه؟ فوقفوا محتارين.. فبيقول آل البيت: فأُلقي علينا النوم (فكلنا فجأة نمنا) فسمعنا كلنا نفس الصوت يقول: يا آل البيت غَسِلوا رسول الله في ثيابه.. لا تجردوه من ثيابه.. ففوقنا وكلنا سمعنا نفس الكلام.. فقلنا إذن يُغسل النبى في ثيابه .
طيب مين اللي هيغَسِلك يا رسول الله؟ ٦ من آل البيت: علي بن ابي طالب - العباس - قثم بن العباس - الفضل بن العباس - أسامه بن زيد بن حارثة - شقران مولي النبى (خادمه)

وهيبدأ الغسل.. فيقف زيد والفضل بن العباس يقلبون النبي.. ويقف العباس يَصْب الماء.. ويبدأً سيدنا علي يُغسل النبي.. آل البيت بيقولوا: والله كنّا لا ندري ايتقلب معنا.. أيستجيب!.. أم تقلبه الملائكة.. وكأن جسمه عايش وبيتحرك أثناء الغُسل..

وييجي ميعاد الصلاة علي الميت.. الصلاة على النبي.. وقلنا فى الحلقات اللى فاتت ان النبى وصاهم يسيبوه ساعه لوحده بعد ما يغسلوه.. فأول من صلي عليه جبريل عليه السلام.. ثم ميكائيل.. ثم إسرافيل.. ثم ملك الموت.. ثم جنود من الملائكة.. ثم يدخل الصحابة وآل البيت وباقى المسلمين فوج فوج فى صفوف يصلون علي النبي..

وييجي ميعاد الدفن فالصحابة مترددين مش قادرين ياخدوا الخطوة.. ازاي هيحطوا على النبى صلي الله عليه وسلم التراب.. فيبدأ الصحابة يثبتوا بعض ويبدأوا يدفنوا النبي في مكان وفاته يعنى فى حجرة عائشة.. في نفس المكان اللي مات فيه.. فيبدأوا يحفروا القبر وينزلوا النبي فيه.. ولسه يادوب هيقفلوا القبر، فيجي صحابي اسمه المغيرة بن شعبة وهو كان واقف وقت الدفن والخاتم بتاعه وقع منه فيقول: أيها الناس انتظروا فقدت خاتمي فقدت خاتمى..فسيدنا علي واقف فقال: يا مغيرة اي خاتم؟.. قال: ياعلي أقسمت عليك فقدت خاتمي..

فسيدنا علي يأذن له انه ينزل القبر.. فنزل المغيرة فأنكب علي النبي وظل يقبل النبي ويبكي ويقول أردت ان أكون اخر من يودعك من الدنيا يارسول الله (يعني هو ألقي خاتمه في قبر الرسول قاصد) ويحاولوا يشدوه ويخرج المغيرة ويتقفل القبر علي النبي..

سيدنا أنس بيقول: بمجرد ما أغلقنا عليه القبر، بقينا مذهولين كأننا منعرفش بعض.. فاكرين كلمة أنس لما قال: دخل النبي المدينة يوم الاثنين فأضاء منها كل شيء ومات يوم الاثنين فأظلم منها كل شيء.. النبي مات يوم الاتنين واتدفن يوم الأربعاء.. فضل يومين معاهم عشان يصلوا عليه وكان جسد النبى من أطيب ما يكون ..

وتيجي السيدة فاطمة بسرعة عند قبر النبى وتقف امام أنس وتقول للصحابة: أطابت انفسكم ان تحثوا التراب علي وجه رسول الله؟ ازاى قدرتوا تدفنوه وتحطوا عليه التراب.. فبيقول أنس: فأفزعتني بما قالت.. وظللت ابكي ومشيت..
ويمشى كل صحابي ويرجع بيته بعد دفن النبى فيقولوا: والله كنّا لا نكلم بَعضُنَا البعض.. ولا يتحدث احدنا الي أهله فظللنا نبكى حتى آذان الفجر.. فى حاجه مهمه حصلت تاني يوم بعد وفاة النبى.. ايه اللي هيحصل؟ وقت صلاة الفجر.. لازم نأذن لصلاة الفجر.. ولازم الحياة تستمر.. فيطلع بلال يقف علي المنبر.. ويبدأ بلال يؤذن.. الله أكبر الله أكبر اشهد ان لا اله الا الله اشهد ان محمد!!! ويتخنق صوته من العياط فميقدرش يكمل الآذان..

فيحاول تانى ويتماسك ويعيد الاذان.. وبرضو ميقدرش يكمل.. مش مصدق انه مش هيشوف النبى وهو فاتح الستر وجاى يصلى معاهم ف المسجد.. فينزل بلال ويروح سيدنا بلال لأبو بكر الصديق.. ويقول له: يا خليفة رسول الله اعفني من الاذان.. والله ما عدت أستطيع ان أؤذن لأحد بعد رسول الله فأبو بكر يقول: يابلال لا تتركني.. (انا محتاجلك)..

فيقول بلال: يا خليفة رسول الله، اعفني.. فقال ابو بكر : لك ما أردت يابلال.. الجميل ان بلال بعد فترة مقدرش يعيش في المدينة.. كل شبر في المدينة بيفكره برسول الله.. بلال كان ملازم للنبي.. فبلال مش قادر يعيش.. فيروح لأبو بكر ويستاذنه انه يذهب إلي الشام.. فقال ابو بكر: أتتركني يابلال!! لاتتركني يابلال.. لكن من حزن بلال.. يوافق ابو بكر على انه يسمح له يسيب المدينه.. ويروح بلال الي الشام يعيش في بلد اسمها داريه.. يفضل فيها شهور.. ويتزوج.. وبعد فترة وهو نايم بالليل بجوار زوجته فيشوف رؤيه.. فزوجته بتحكي وبتقول: قام بلال في منتصف الليل فازعاً.. فقلت له مالك يابلال.. فقال رأيت في منامي رسول الله يقول لى ما هذا يابلال؟ ما كل هذه الجفوة؟ اما آن لك ان تزورني؟.. فتقول زوجته: فوالله ما كلمني بعدها كلمة.. ووضع عليه ثيابه.. وركب فرسه ولم ينظر خلفه.. وانطلق الي المدينة

ووصل بلال المدينة.. فأول شخص قابل بلال كان عمر بن الخطاب.. ففرح به عمر وسلم عليه وقال له: ممكن تأذن لنا الاذان يا بلال زى ما كنت تؤذن لرسول الله؟ فقال بلال: اعفني ياعمر، ما عدت أستطيع.. ويكمل بلال طريقه فيقابل ابو بكر الصديق.. فيفرح ابو بكر بيه ويستأذنه انه يأذن فيرفض بلال.. مش قادر خالص يا جماعه قلبه مكسور على فراق حبيبه..
ويكمل بلال طريقه وقبل ما يوصل عند قبر النبى فيقابل الحسن والحسين احفاد النبى.. كانوا لسه أطفال.. فبيحكى بلال ويقول: فأحتضنتهم وشممت فيهما رائحة جدهما.. وظللت أحتضنهم وابكي..

قالوا يابلال أذن للصلاة لنا كما كنت تؤذن لرسول الله.. فقال بلال: اما أنتما فلا أستطيع ان أرد لكما أمرا.. ويطلع بلال عشان يأذن ويبدأ يأذن ويقول الله اكبر الله اكبر.. فبيحكى الرواه أن اول ما بلال أذن وسمعت المدينه صوت بلال.. فضجت المدينة.. وخرج الناس من بيوتهم رجالاً ونساءاً وأطفالاً.. وقالوا أَبُعث رسول الله !!.ويكمل بلال: اشهد ان لا اله الا الله.. اشهد ان محمداً !!...ويتخنق صوت بلال من العياط.. مش قادر يكمل الاذان وينزل..

فبيقول الرواه: والله ما عرفت المدينة يوما أشد بكاءاً ولا عويلاً بعد وفاة رسول الله كذلك اليوم الذى اذن فيه بلال وقال اشهد ان محمداً رسول الله.. صلي الله على محمد.. صلي الله عليه وسلم..
خلصت السيرة النبويه بس لازم نعرف كام حاجة..
اول حاجه هى أن ربنا سبحانه وتعالي قال: "واعلموا ان فيكم رسول الله".. فيكم.. ده مش فى الماضي.. ده في الحاضر والمستقبل.. فالنبي مات بجسده.. لكن النبي عايش فى كل واحد فينا بدينه وبسنته وبحديثه وبعقيدته.. النبى فينا بسيرته صلى الله عليه وسلم..

فمش معني ان النبي ميت يبقى مش معانا.. لأ هو معانا.. فينا بالصلاة عليه.. اكبر دليل ان النبي موجود انك بتصلي عليه صلاة واحدة فياخذها منك الملائكة وتروح تبلغ النبي وتقول: يارسول الله ان فلان/ فلانة (بالإسم) يسلم عليك، فيقول صلي الله عليه وسلم: وعلي فلان/ فلانة السلام.. فواحد من الصحابة بيقول له: يارسول الله احنا هتبقى عارفنا يوم القيامة، طب واللى هييجوا من بعدك وبعدنا هتعرفهم ازاي؟ فقال صلي الله عليه وسلم: بل اعرفهم باسمائهم وأنسابهم..

تانى حاجه لازم نعرفها ان فى السيرة عرفنا ان فقد النبي هي اكبر مشكلة واكبر مصيبه بتواجه الانسان.. يعني اي حاجة تهون بالمقارنة اننا فقدنا رسول الله.. قال النبى: اذا اصاب احدكم مصيبة فليذكر مصيبته في موتي فإنها اعظم المصائب..
-و في حديث تاني النبي قاله للصحابة وده اللي هيساعد الصحابه بعد وفاة الرسول فى انهم يتحملوا صدمة موته.. قال صلى الله عليه وسلم : حياتى خيرُ لكم ووفاتي خَيْرٌ لكم.. فالصحابة قالوا له ازاي وفاتك خير لنا يا رسول الله؟ فقال حياتي خير لكم أهديكم الي الخير.. ووفاتي خير لكم تُعرض علي اعمالكم يوم الخميس فما كان فيها من خير حمدت الله عز وجل وما كان فيها من شر استغفرت الله لكم

افتكروا دايما كلام النبى اللي قاله يوم حجة الوداع "أيها الناس لا تسودوا وجهي يوم القيامة (ماتكسفونيش قدام الناس يوم القيامة)

- احنا دورنا منتهاش.. لازم ندافع عن النبي بالعلم وندافع عن سنة النبي.. النبي قال "من أحيا سنتي فقد احبني ومن احبني كان معي في الجنة ".. نعلم الناس سيرته صلي الله عليه وسلم.. لازم ندفع الشبهات عنه.. لازم نبرأ الاسلام والنبى عليه الصلاة والسلام من الاخلاق السيئه اللى بيعملها بعض المسلمين.. لازم نتوب..

اللهم نسالك مرافقة النبى وآله وصحبه فى الجنة بفضلك وكرمك وعفوك يا ذا الجلال والإكرام

استودعكم الله وفعلاً مبسوطه اننا كنا مع بعض اجتمعنا على سيرة النبي صلى الله عليه وسلم.

وأرجوا منكم دعوه ليا

السلام عليكم ورحمة الله وبركاته.♥️♥️

اتمنى تكونو استفادتو وتفضلو علطول تقرأوها وتخلو حبايبكو يقرؤوها اتمنى تعملو باللي استفادتوه وتدخلو اللي اتعلمتوه من السيره ف حياتكو يارب تكون حياتكو اتغيرت للاحسن.
هابقا شاكره لأي حد قرأها يدعيلي.
واتمنى بجد تشيروها وتاخدو الاجر.
وخليكو فاكرين أن الدال على الخير كفاعله
ربنا يجعل حياتكو دايما ف افضل حال 🤍.

هاستنى كل حد قرأها يقول ايه اكتر حاجه علقت معاه واتعلم منها يمكن حد يعملها شبهه وياخد الاجر .