بيقول سيدنا كعب: "فأجمعت نفسى وقررت الصدق, وذهبت الى رسول الله فرأيت صفاً طويلاً من المنافقين أمامى. فانتظرت حتى جاء دورى, فنظر لى النبى وقال تعال يا كعب, فتقدمت, فقال لى اجلس يا كعب فجلست.. فقال النبى: يا كعب وأنت ما عذرك؟ ما الذى خلفك عن الغزوة؟, فقلت: يا رسول الله, والله لو كنت أمام اى احد من أهل الدنيا لكذبت عليه, فانى أعطيت جدلاً (يعنى أنا لبق وبعرف اظبط الكلام واطلع نفسى من أى مشكلة) ولكنك رسول الله ولو كذبت عليك لأرضيك, يوشك الله أن يغضبك عليا، ولئن قلت لك الصدق قد تغضب منى ولكن بصدقى أرجو الله أن يعفو عنى ويرضيك عنى..

وبدأ كعب يكمل كلامه ويقول: يا رسول الله ليس عندى من عذر فى تخلفى عنك, وكان عندى ناقتنين وكنت فى أحسن حال.. فنظر له النبى وقال: أما هذا فقد صدق." يعنى ال80 منافق اللى قبل سيدنا كعب كانوا كلهم كذابين الا سيدنا كعب هو الوحيد اللى مكذبش على النبى وقال له الحقيقة..
طيب النبى هيعمل ايه مع سيدنا كعب؟ طبعاً هيعاقبه.. النبى قال: "قم يا كعب, حتى يحكم الله فيك", فسيدنا كعب قام ومكنش عارف هيحصله ايه.. وراح النبى أمر المسلمين أن محدش يكلم كعب.. الكل يخاصمه.. ولا حتى يبيع له ولا يشترى منه ولا يتعامل معاه.. طب لحد أمتى يا رسول الله؟ النبى عليه الصلاة والسلام محددش مدة.. ويعدى يوم يومين أسبوع وهكذا.. وعدم تحديد مدة العقاب ده عقاب لوحده فكان كعب بيتعذب
بعد ما المنافقين سمعوا العقوبة جريوا على كعب وقالوا له: "ويحك يا كعب ماذا فعلت فى نفسك؟ كنت كذبت على النبى وانتهى الأمر", فأتهز كعب من كلام المنافقين وبعدين رجع فكر وسألهم لو فى حد تانى قال الصدق زيه, فقالوا له نعم اثنين كمان قالوا الصدق زيك وهما "هلال بن أمية" و "مرارة بن الربيع", فقال كعب فى نفسه اذن أثبت.. وثبت كعب لثبات صحابه.. ومن هنا نعرف قيمة قول الحق يعنى أنت ممكن تعمل الصح بتثبت وبتثبت حد على الصح بسببك وربنا يجعله فى ميزان حسناتك..

- تخيلوا يا جماعة بلد كاملة مخاصمة انسان, صعبة جداً محدش كان بيكلم كعب بن مالك ولا هلال بن أميه ولا مرارة بن ربيعه خالص بيحكى سيدنا كعب وبيقول: "لم يكلمنى أحد أبداً من أهل المدينة, فحين أخرج الى الصلاة, لا يكلمنى أحد. وحين أسلم عليهم فى المسجد, لا يردون السلام.. فأذهب الى رسول الله وأسلم عليه, فيدير رأسه عنى, فأقول فى نفسى هل حرك شفتيه بالسلام؟ لعله يكون قد حرك شفتيه.. ثم أقف لأصلى معهم صلاة الجماعة, فأختار موضعا أرى منه النبى وأسارقه النظر, فاذا أقبل على صلاته نظرت اليه, فاذا نظر إلى أقبلت على صلاتى (اصل النبى بيحب كعب وكعب بيحبه بس كعب غلط قوى.. فكان النبى بيحب يبص على كعب من غير ما كعب يحس والعكس )

المهم التلات صحابة تعبوا جدا وبقوا طول الليل والنهار يبكوا ويصلوا ويستغفروا.. سيدنا كعب ابن عمه كان سيدنا "أبو قتادة", وكان بيته حواليه سور, سيدنا كعب راح له وقال له من ورا سور البيت "السلام عليك يابن عمى, افتح", فمردش أبو قتاده عليه ويفضل كعب ينادى وبرضه ميردش عليه فبيقول سيدنا كعب: "فتسلقت الجدار, ونزلت بالمنزل فوجدت أبا قتادة واقفا يسمعنى, فسلمت عليه فأدار وجهه عنى.. فقلت له رد عليا يا أبا قتادة.. ألم تعلم أنى أحب الله ورسوله!! فيسكت ابو قتادة وميردش على كعب فيبكى كعب لحد ما يشهق من البكاء ويقول: يا أبا قتادة, أقسمت عليك رد عليا.. ألم تعلم أنى أحب الله ورسوله؟.. فيرد أبا قتادة ويقول: الله ورسوله أعلم.. ( يااااه انتو متخيلين احساس كعب.. اقرب الناس له فاكرينه بينافق ومش بيحب النبى ولا الجهاد فى سبيل الله.. بس برضه اصل سيدنا كعب غلط غلطة كبيرة ده مطلعش الغزوة مع النبى بس هيتوب احلى توبه)

فبيقول كعب: فبكيت ومشيت إلى السوق أبكى, حتى رأيت رجل من أهل الشام ينادى ويقول: من يدلنى على كعب بن مالك؟ فأشار الصحابة على كعب.. فراح الرجل لكعب وقال : "يا كعب أبشر! فإن ملك الغساسنة سمع ما حدث بينك وبين صاحبك, وأن صاحبك قد جافاك (يقصد ان النبى عليه الصلاة والسلام مخاصمه ) ويكمل الراجل كلامه ويقول : وبعث ملك الغساسنه اليك بهذا الخطاب يقول لك تعال إلينا نواسيك ونرحب بك". فبيقول كعب: فأخذت الخطاب وبكيت وقلت فى نفسى ماهذا البلاء.. ان اعداء الإسلام يطمعون في.. فمزقت الخطاب وقذفت به فى النار.. سيدنا كعب قطع الطريق اللى كان ممكن الشيطان يدخل له منه وده من ذكاء سيدنا كعب ودليل على صدق توبته..

المهم يعدى 30 يوم وكل المدينه مخاصمه التلات صحابه.. وفى اليوم ال40 يخبط واحد على باب كعب فكعب يفرح اخيرا حد كلمنى.. فيفتح كعب فيلاقى واحد من المسلمين واقف بيقول له: يا كعب ان رسول الله يرسل اليك برسالة"
يا ترى الرساله فيها ايه؟

هنعرف بكره إن شاء الله

قصة حياة النبي صلى الله عليه وسلم♥️♥️

الحلقة 90 من السيرة النبوية

يلا صلوا على النبى

غزوة تبوك(ج4 والأخير)

شوفنا امبارح سيدنا كعب وهلال ومرارة وهما فى انعزال عن كل الناس كعقوبة أمر بيها النبى وعرفنا ليه.. المهم بعد اليوم ال40 يخبط واحد من المسلمين على بيت كعب ويقول له: يا كعب ان رسول الله يرسل اليك برسالة" فقال كعب: "خيرا", فقال الرجل: "يقول لك, اعتزل زوجتك" (يعنى ميقربش من زوجته) فراح كعب لزوجته وقال لها: "ارجعى لبيت أهلك حتى يقضى الله فى أمرى".

ويروح مرسال رسول الله لسيدنا "هلال بن أمية" ويقول له نفس الكلام.. بس زوجة هلال راحت للنبى واستئذنته ان يا رسول الله لو ينفع اقعد مع زوجى عشان بس اخدمه عشان هو تعبان وكبير فى السن فوافق النبى: بشرط أن هلال ميقربش منها.. فقالت له: يا رسول الله ان هلال لا يعمل شئ سوى البكاء الشديد والصلاة.. ووسط بكاء الصحابه التلاته (كعب وهلال ومراراة) طول الليل والنهار ووسط استغفارهم وندمهم الشديد وبعد 50 يوم عذاب يجي فرج ربنا وعفوه عنهم ..

سيدنا كعب كان خايف يموت قبل ما العقوبه تنتهى ويموت وربنا وسيدنا النبى مش راضيين عنه،.. ولحد ما جت الليلة ال50.. كان سيدنا كعب على سطح منزله بيصلى قيام الليل فى وقت السحر.. وقت نزول الرحمات على العباد ربنا تبارك وتعالى بيقول كل ليله: هل من سائل فأعطيه؟ هل من مستغفر فأغفر له؟ هل من تائب فأتوب عليه؟ فنخلى بالنا خلينا حريصين اننا ندعي في الوقت ده.. المهم كان واقف كعب يصلى ويبكى ويدعى قبل صلاة الفجر

وتنزل الأية الكريمه دى من فوق سبع سموات على النبى: "لَقَد تَّابَ اللَّه عَلَى النَّبِيِّ وَالْمُهَاجِرِينَ وَالأَنصَارِ الَّذِينَ اتَّبَعُوهُ فِي سَاعَةِ الْعُسْرَةِ مِن بَعْدِ مَا كَادَ يَزِيغُ قُلُوبُ فَرِيقٍ مِّنْهُمْ ثُمَّ تَابَ عَلَيْهِمْ إِنَّهُ بِهِمْ رَؤُوفٌ رَّحِيمٌ, وَعَلَى الثَّلاثَةِ الَّذِينَ خُلِّفُواْ حَتَّى إِذَا ضَاقَتْ عَلَيْهِمُ الأَرْضُ بِمَا رَحُبَتْ وَضَاقَتْ عَلَيْهِمْ أَنفُسُهُمْ وَظَنُّواْ أَن لاَّ مَلْجَأَ مِنَ اللَّهِ إِلاَّ إِلَيْهِ ثُمَّ تَابَ عَلَيْهِمْ لِيَتُوبُواْ إِنَّ اللَّهَ هُوَ التَّوَّابُ الرَّحِيمُ"[ سورة التوبة]

ويخرج النبى لصلاة الفجر ويصلى بالآيات الجديدة فالصحابة بيصلوا وبيسمعوا "وعلى الثلاثة الذين خلفوا", فبقى الصحابه هيطلعوا من الصلاة من الفرحة بعفو الله عنهم.. ولما أنهى النبى الصلاة, ألتفت للصحابة وقال: "تاب الله على كعب بن مالك, تاب الله على هلال بن أمية, وعلى مرارة بن الربيع".. وبسرعه خرج الصحابة يجروا يبشروا كعب وهلال ومرارة. ومنهم واحد ركب فرسه وجرى على بيت سيدنا كعب, فسبقه صحابى تانى ووقف على سطح جبل ونادى: "يا كعب بن مالك أبشر!", يا كعب أبشر.. فبيقول كعب: "لما سمعت اسمى من سطح بيتى سجدت لله شاكرا", وبعدين وصل الصحابى اللى على الفرس لبيت سيدنا كعب, وقال: "أبشر يا كعب! تاب الله عليك", فسجد كعب لله شكر ومن فرحته قلع عبائته وحطها على الصحابى كهدية وجرى على المسجد النبوى، فلما النبى شاف كعب تهلل وجهه الشريف صلى الله عليه وسلم قال: "تعال يا كعب".. يقول كعب: "فما رأيت وجه النبى أجمل ولا أضوأ ولا أنور من هذا اليوم", فجلس كعب وقال له النبى:" أبشر يا كعب بخير يوم طلع عليك منذ ولدتك أمك, تاب الله عليك", فيقول كعب: "فما كنت أدرى ما أفعل فقلت: "يا رسول الله, انى سأجعل كل مالى لله" فقال النبى: "لا يا كعب, أمسك عليك مالك هو أنفع لك"..

وتنزل الآية اللى بعدها : "يَا أَيُّهَا الَّذِينَ آمَنُواْ اتَّقُواْ اللَّهَ وَكُونُواْ مَعَ الصَّادِقِينَ".. اللى نجا سيدنا كعب وسيدنا هلال ومرارة هو الصدق انهم غلطوا ومكدبوش على النبى عليه الصلاة والسلام.. رضى الله عنهم وأرضاهم.. لو تلاحظوا ان مدة البلاء كانت 50 يوم.. ومدة مشقة الغزوه على جيش تبوك كانت برضو 50 يوم.. فكأن التلات صحابه دول تحملوا نفس مشقة الجيش ولكن كانت أشد لأنهم مكانوش عارفين مرحبا مصيرهم.. فكان الجزاء من جنس العمل.. ياترى اللى اتأخر على النبى سنة واتنين محتاج قد ايه عشان تتوب وتصدق توبتك؟ طب واللى متاخر سنين؟ اللهم ردنا إليك رداً جميلا.

على فكرة سورة التوبة سميت بهذا الاسم لأنها توبة الثلاثة اللى تخلفوا عن رسول الله عليه الصلاة والسلام ...
طيب خلصت احداث تبوك وجه عام الوفود يعنى السنه اللى قبائل كتير كانوا حوالى 70 قبيله جت عشان تسلم وتعاهد النبى على الاسلام , ومن ضمن القبائل دى قبيلة "ثقيف" من بلد الطائف. والطائف كان عندهم صنم اسمه "الربة", فلما أسلموا.. النبى قال لهم لما ترجعوا بلدكم اهدموا الربة, فقال لسيدنا "المغيرة بن شعبة" روح معاهم وكسر انت الربة.. المهم قبيلة ثقيف طلبوا من النبى انه يسيبلهم الصنم دة مع انهم أسلموا! بس برضه مهزوزين شويه.. فالنبى رفض وبعت المغيرة للطائف,

فلما وصل المغيرة للطائف قال لأصحابه: "أأضحككم على ثقيف؟" فقالوا: "بلى", فراح المغيرة عند الربة ومسك الفأس وقال: "بسم الله توكلت على الله", وبدأ يكسر فى الربة وبعدين عمل نفسه بيتألم, ووقع على الأرض كأنه أتشل.. فقالت ثقيف: "قتلته الربة! قتلته الربة! أصابته لعنة الربة!", فقام سيدنا المغيرة وقال: "يا معشر ثقيف, قاتلكم الله خسرتم. هذه حجارة لا تضر ولا تنفع.. والله لأحطمنها حتى أحفر قبرها", وفعلاً عمل كده, ولما سقطت, ثبت الاسلام فى قلوب قبيلة ثقيف وعرفوا ان فعلا لا إله إلا الله

نكمل بكره إن شاء الله

قصة حياة النبي صلى الله عليه وسلم♥️♥️

الحلقة 91 من السيرة النبوية

يلا صلوا على النبى

إشاعة وخبر غير صحيح فى المدينه: "طلق النبى ﷺ زوجاته"

حاجتين حصلوا بعد غزوة تبوك على طول.. اول حاجة منهم ان فى واحد منافق يدّعى الإسلام اسمه أبو عامر الراهب (ولقبوه بالفاسق) ، قبل ما النبى ﷺ يطلع تبوك.. قام الراجل ده بنى مسجد وراح للنبى ﷺ وقال له يا رسول الله أنا بنيت مسجد جديد فمن فضلك تعالى صلى فيه ركعتين علشان يبقى فيه بركة يعنى (شئ طبيعى تخيل لو النبى عايش وانت بنيت مسجد فشئ طبيعى انك تطلب منه انه يصلى فيه ركعتين)

فالنبى بحسن نية وافق بس قال له: انا دلوقتى طالع تبوك فأوعدك أول ما ارجع من تبوك هصلى فيه.. راح النبى ورجع من تبوك.. فالنبى يدوب لسه رايح يصلى فى المسجد ده فنزلت اية فى سورة التوبة "وَالَّذِينَ اتَّخَذُوا مَسْجِدًا ضِرَارًا وَكُفْرًا وَتَفْرِيقًا بَيْنَ الْمُؤْمِنِينَ وَإِرْصَادًا لِّمَنْ حَارَبَ اللَّهَ وَرَسُولَهُ مِن قَبْلُ ۚ وَلَيَحْلِفُنَّ إِنْ أَرَدْنَا إِلَّا الْحُسْنَىٰ ۖ وَاللَّهُ يَشْهَدُ إِنَّهُمْ لَكَاذِبُونَ" (107).. اتارى الراجل المنافق ده مبناش المسجد ده لله عز وجل، طب بناه ليه؟ بناه زى ما ربنا قال إرصاداً وكفراً وتفريقاً بين المسلمين .. بناه عشان يبقى وكر للتآمر على الإسلام والمسلمين..

وكان قاصد ان الوكر ده يبقى مسجد عشان الناس تروح بحسن نية تصلى ويتعملهم جوه المسجد ده غسيل مخ وينقلبوا ضد النبى ﷺ فظاهرياً المبنى ده مسجد.. فأنت تبقى رايح مطمن لكن هو فى الحقيقة وكر للتآمر على النبى ﷺ (عشان كده بنقول أن المنافقين أشد خطراً على المجتمع من الكفار لأن الكافر انت عارف انه كافر فمتوقع منه الغدر لكن اللى بيدّعى الإسلام وبيطعن فيه من جوه.. عامل زى السوس اللى بينخر فى الخشب ومش واخد حذرك منه.. لأن المنافق بيقول لا اله الا الله زيك) ويتسمى المسجد مسجد الضِرار.. فربنا استحالة يسيب النبى يصلى فيه "لاَ تَقُمْ فِيهِ أَبَداً لَّمَسْجِدٌ أُسِّسَ عَلَى التَّقْوَى مِنْ أَوَّلِ يَوْمٍ أَحَقُّ أَن تَقُومَ فِيهِ فِيهِ رِجَالٌ يُحِبُّونَ أَن يَتَطَهَّرُواْ وَاللّهُ يُحِبُّ الْمُطَّهِّرِينَ (108) أَفَمَنْ أَسَّسَ بُنْيَانَهُ عَلَى تَقْوَى مِنَ اللّهِ وَرِضْوَانٍ خَيْرٌ أَم مَّنْ أَسَّسَ بُنْيَانَهُ عَلَىَ شَفَا جُرُفٍ هَارٍ فَانْهَارَ بِهِ فِي نَارِ جَهَنَّمَ وَاللّهُ لاَ يَهْدِي الْقَوْمَ الظَّالِمِينَ" (109).. فالنبى ﷺ يصدر أوامر بهدم المسجد وفعلاً يتهدم.

طيب قصة تانية حصلت بعد رجوع النبى ﷺ من تبوك.. اللى حصل أن النبى زعل من زوجاته.. طب ليه؟ أثقلنّ عليه فى النفقة (طلبوا طلبات كتير وكلهم فى نفس الوقت والنبى عنده 9 زوجات ﷺ ) فطلبات كتير.. طب يعنى هي أمهات المؤمنين كانوا طماعين؟ لأ طبعاً حاشاهم.. السيدة عائشة كانت مرة مع سيدنا عُروة بن الزبير "ابن اختها" فبيسألها: يا خاله ما كنتم تأكلون؟ (كنتوا بتاكلوا ايه مع رسول الله ﷺ) قالت يا بُنى لقد كان يمر علينا الهلال تلو الهلال تلو الهلال (3 شهور يعنى) ولم يكن يُوقد فى بيت رسول الله ناراً (مش بنطبخ) فقالها وما كان يُعيشكم يا خالة ؟ قالت يا بُنى كنا نأكل الأسودان يعنى التمر والماء..

فدلوقتى لما تكون دى حياة امهات المؤمنين فتفتكروا لما تطلب نفقة زيادة هتطلب ايه؟ اكيد مش حاجات فظيعه بس برضو النبى ﷺ معندهوش.. ومكنش المفروض يتجمعوا عليه بالشكل ده.. فزعل النبىﷺ واعتزل نسائه وقعد فى حجرة لوحده ومبيكلمش حد خالص
فطلعت إشاعه فى المدينة أن النبى ﷺ طلق نسائه ومن كتر ما الإشاعة انتشرت جداً فحتى أمهات المؤمنين نفسهم مبقوش عارفين هو فعلاً طلقنا ولا لأ.. سيدنا عُمر بن الخطاب بيحكى وبيقول: كنت قاعد فى بيتى وفجأة لقيت واحد صاحبى بيخبط جامد على الباب.. يا عُمر؟ يا عُمر؟

فعُمر راح فاتح بسرعة وقال: ويحك !مالك ؟ قال ألحقنا يا عُمر؟ فقال عمر: أجاءت الغساسنة؟ فقال الصحابى: بل أشد من ذلك.. لقد طلّق رسول الله نسائه.. طيب هى دى ازاى اشد من هجوم الغساسنه؟ لأن ده معناه أن النبى زعلان ﷺ وزعل النبى اكبر من أن الغساسنه يهجموا على المدينة..

فيجرى عمر على بنته السيدة حفصة زوجة النبى.. فلقاها بتبكى فسألها أطلقكى رسول الله فقالت: والله لا أدرى .. فقال عُمر: يا حفصة لا يغُرنّكِ جارتكى (ملكيش دعوة بعائشة ومتقلديهاش لو عملت اى غلطه) فإن رسول الله يحبها وإنما يُمسككى من أجلى (النبى بيحب عائشة فلو هى زعلته هتصالحه لكن انتى هو مش بيحبك زيها هو اتجوزك علشانى) فقال عُمر فازدادت حفصه فى البُكاءً (عُمر كلامه شديد بس عُمر خايف عليها وعايزها تفوق)..
المهم جرى عُمر على النبى ﷺ فلقى النبى قاعد لوحده فى الاوضه بتاعته وبلال واقف بيحرسه (بلال لقى النبى زعلان وعايز يبقى لوحده فقعد يحرسه علشان محدش يدخل عليه من غير اذنه) فقال عُمر: يا بلال إستأذن لعُمر.. فأستاذن بلال النبى..

فالنبى ﷺ مردش (يبقى مش عايز حد يدخله حتى عُمر) فخرج بلال وقال يا عُمر والله لم يأذن.. فعُمر ألح على بلال عشان يستأدن النبى تانى فبرضو النبى مرضيش عشان عايز يقعد لوحده.. وفى تالت مرة أذن النبى لبلال ان عمر يدخل.. فدخل عمر على النبى ﷺ ..

فبيقول عُمر: فدخلت فوجدت النبى يتكئ على جمبه وقد أثّر التراب على جمبه الشريف (المساجد والبيت زمان كانت الأرضية بتاعتهم تراب عليها حصير فالنبى ﷺ كان مريح على جمبه والتراب له اثر عليه) فقال عُمر بأبى أنت وأمى يا رسول الله أطلقت نسائك؟ فرفع رأسه وقال لا يا عُمر.. فقال عُمر الحمدلله.. فسأل عُمر النبى وقاله: ايه الى مزعلك يا رسول الله؟ فقال النبى: يا عُمر أثقلنّ على فى النفقة وانا لم استطع.. فعُمر قعد يفكر ازاى يخرج النبى من مود الزعل ده.. فقال عُمر: فقلت فى نفسى والله لأضحكن رسول الله ..
هيهزر سيدنا عمر مع النبى وبصوا هيقول ايه.. الاول لازم نعرف أن المدينة ومكة بلدين مختلفين.. المدينة بلد زراعى ومكة بلد تجارى ففى مكة الراجل بيشتغل تاجر وعادة التاجر حتى لحد النهارده معروف أن التاجر تلاقى مراته قاعدة فى البيت مش بتشاركه غالباً وزمان كانت الست بتقعد فى البيت وتاخد المصروف وملهاش رأى فده كان مجتمع مكه، أما بقى مجتمع المدينة مختلف لأنه مجتمع زراعى فالراجل بيزرع فى الأرض طول النهار ومراته معاه فبتشاركه فى الشغل والقرار والفلوس.. بتشاركه فى كل حاجة. فالست رأيها برأيه وكلمتها بكلمته غير المجتمع المكى..

فعُمر حب يضحك النبى فقال له: يا رسول الله أتذكر حينما كنا فى مكة؟ كنت اقوم الى إمرأتى فتسألنى النفقة (تطلب فلوس زيادة) فأقوم اليها لأجئ عنقها (أقطم رقبتها) فجئنا المدينة يا رسول الله فخالطت نسائنا نساء المدينة فتعلمن منهن.. فصارت امرأتى تسألنى النفقة فأقوم اليها لأجئ عنقها فأجدها تقوم إلي وتجادلنى..

فضحك النبى ﷺ.. فقال عُمر: أضحك الله سنك يا رسول الله.. ففضل عُمر مع النبى لحد ما خرج من الحجرة وكان النبى ﷺ ناوى يخاصم زوجاته شهر وخاصمهم شهر فعلاً ونزلت بعد كده آية التخيير.. دى اللى ربنا خير أمهات المؤمنين فيها بين طلب الدنيا والأخره.. لو عايزين زيادة نفقة يبقوا هما عايزين الدنيا .. قال تعالى: "يَا أَيُّهَا النَّبِيُّ قُل لِّأَزْوَاجِكَ إِن كُنتُنَّ تُرِدْنَ الْحَيَاةَ الدُّنْيَا وَزِينَتَهَا فَتَعَالَيْنَ أُمَتِّعْكُنَّ وَأُسَرِّحْكُنَّ سَرَاحاً جَمِيلاً (28) وَإِن كُنتُنَّ تُرِدْنَ اللَّهَ وَرَسُولَهُ وَالدَّارَ الْآخِرَةَ فَإِنَّ اللَّهَ أَعَدَّ لِلْمُحْسِنَاتِ مِنكُنَّ أَجْراً عَظِيماً (29)" [سورة الأحزاب]

فراح النبى وقال الكلام ده لزوجاته عشان يختاروا وسألهم زوجه زوجه وطبعاً كلهم اختاروا الله ورسوله والدار الاخرة، وبدأ بعائشه وسألها فقال لها: يا عائشة تمهلى حتى تستشيرى أباكى.. فقالت من أستشير !!وفي ماذا أستشير !! بل أختار الله ورسوله والدار الاخرة يا رسول الله..

وفى قصه تانيه كمان وهى ان النبى طلّق السيدة حفصة.. بس احنا مش عارفين زمن الحدث بالظبط وسيدنا عمر عرف وخالها عرف.. لكن ردها النبى فى نفس اليوم.. اللى حصل أن كانت السيده حفصة كانت قاعدة مع خالها وبتبكى فبمجرد ما دخل النبى عليها قامت غطت راسها وغطت نفسها مع انه كان لسه مطلقها يعنى هى كانت فى وقت العدة فينفع يشوفها لكن غطت نفسها وقالت خلاص مبقاش زوجى،

فدخل النبى ﷺ عليهم.. فخالها قال: يا رسول الله أطلقت حفصة ؟ فقال ﷺ: يا حفصة إن الله أمرنى من فوق سبع سماوات وقال: يا محمد رُدّ حفصة فإنها صوّامةٌ قوامة وهى زوجتك فى الجنة.. فردّ النبى السيدة حفصة فى نفس اليوم.. ايه بقى الحكمة وليه النبى طلقها ؟ اولاً طلقها ليه محدش يعرف العلم عند الله حاجة ربنا أراد أنها تبقى سر بين النبى وبين حفصة...
بس فى رأي واجتهاد شخصى وهو أن يمكن ربنا خلى موقف الطلاق والبلاء ده يحصل لحفصه عشان تاخد حفصه المكانه العظيمة دى وهي أن ربنا يقول عنها من فوق سبع سماوات انها صوّامة قوامة وهى زوجتك فى الجنة ..

نكمل بليل إن شاء الله

قصة حياة النبي صلى الله عليه وسلم♥️♥️

الحلقة 92 من السيرة النبوية

يلا صلو على النبى

ماريا القبطيه "أم ابراهيم ابن النبى محمدﷺ " (ج1)

هنرجع بس سنتين عشان نحكى حدث مهم.. الحدث ده بالظبط كان سنة 7 هجرياً.. الأول مين هى مارية القبطية؟ كلمة قبطى مش معناها نصرانى لكن معناها مصرى فالأقباط يعنى المصريين، فمارية كانت مصرية مسيحية وعندها اخت أسمها سيرين وكانوا عايشين فى مصر فى قصر المقوقس ملك مصر وكانت مارية جارية فى القصر، هي وأختها جوارى بس مش أى جوارى كانت ليهم منزلة عظيمة فى قصر المقوقس والمقوقس بيعزهم جداً وبيقدرهم جداً ..

( فى سنة 7 هجرياً هفكركم بالحدث اللى حصل فى السنه دى اللى بسببه جت مارية من مصر للمدينة.. سنة 7 هجرياً كانت بعد صلح الحُديبية بدأ النبى يبعت رسائل لملوك العالم.. من محمد رسول الله الى هرقل عظيم الروم أسلم تسلم، من محمد رسول الله الى كسرى عظيم الفرس أسلم تسلم، من محمد رسول الله الى المقوقس عظيم مصر أسلم تسلم فالجوابات كلها راحت للملوك فى نفس اليوم 14 جواب مع 14 رسول (عشان نعرف أن الصحابة مكنوش طول النهار بيصلوا ويصوموا وبس.. لا كانوا دبلوماسيين وسياسيين وخبراء عسكريين)

فمن ضمن الرسل كان حاطب بن أبى بلتعة.. ويطلع حاطب بالجواب بتاعه إلى مصر، ودخل على المقوقس بالرساله: من محمد رسول الله الى المقوقس عظيم مصر أسلِم تسلم يؤتيك الله أجرك مرتين وإن لم تُسلِم فعليك أثم القبط والسلام على من اتبع الهدى.. (يعنى لو ماأسلمتش يبقى أنا بلغت وانت اللى مبلغتش قومك فتشيل ذنبهم) وبعد ما المقوقس قرأ الرساله قال كلام غريب قوى.. قال: والله كنت أعلم أنه نبى أخر الزمان وما كنت أظن أنه من العرب وظننت أنه سيخرج من الشام (زى اليهود برضه كانوا متوقعين ان نبى اخر الزمان يكون من الشام زى باقى الأنبياء) إنى أراه قد خرج من العرب وإنى أُصدّقه ولكن أخشى من القبط (خايف من الشعب بتاعى) وأخشى على مُلكى .

بس كمان المقوقس كان راجل مؤدب ما غلطش فى النبى لما قرأ رسالته.. يعنى مثلاً كِسرى ملك الفرس لما قرا رساله النبى قطعها أما المقوقس قال لسيدنا حاطب إنى أبعث معك بهدية لرسول الله إكراماً له وبعت للنبى عليه الصلاة والسلام كمان رسالة وقال له: قد جاءنى كتابك وإنى أُصدقك وما كنت أظن أنك تخرج من العرب ولكنى أراك خرجت منهم وقد بعثت إليك بهدية.. وأترجى المقوقس النبى ﷺ عشان يقبل الهدية.. إيه الهدية بقى؟ جاريتين مارية وأختها سيرين وبعض المنسوجات والعطور اللى مصر مشهورة بيهم وبغلة عشان النبىﷺ يركب عليها والنبى هيسميها دُلدُل النبى ﷺ كان بيحب يسمى مقتنياته.. المهم مارية لقت نفسها فجأة بتتاخد من بلدها بالأمر كده ورايحة لبلد تانى خالص، وخرجت مارية وسيرين ورايحين مع حاطب من مصر للمدينة.. فى طريق طويل جداً بس وهما راجعين سيدنا حاطب بيقول بصيت على مارية وسيرين لقيتهم بيعيطوا (تخيلوا هى متربية طول حياتها فى مصر بتحب بلدها بتحب النيل وكانت عايشة فى قصر وهتسيب كل ده وهي مش عارفة هى رايحة فين ولا رايحة لمين ولا عارفه عيشتها هتبقى عاملة أزاى بس فى الأخر هى جارية لازم تنفذ الأوامر ) فيعمل ايه سيدنا حاطب بعد ما شافهم بيعيطوا؟
هيعمل حاجه عظيمه جدا.. هتعمل ايه يا سيدنا حاطب؟ هيدعوها للإسلام بس بطريقة فى منتهى الذكاء (طبعاً لو حد فى وقتنا الحالى هيدعوا البنات دى للإسلام كنا هنقول لأى بنت فيهم بصى انتى رايحة للنبى وده رسول الله.. والاسلام عندنا بنتوضى ونصلى خمس مرات فى اليوم وصلاة الفجر ميعادها الساعه 4 الصبح ولازم تصحى دى فرض.. ويا إما تتحجبى يا أما هتخشى النار !! وطبعاً البنت هتطفش.. بصراحه معاها حق ماهو مش معقول كده ابداً !)

هيدعوهم بقى حاطب بطريقة غاية فى الرقة والذكاء.. ويبدأ حاطب يحكى لماريا أن الطريق اللى انتى ماشيه فيه ده مشت فيه السيدة هاجر زوجة سيدنا ابراهيم هى خرجت برضو من مصر مع سيدنا ابراهيم وكانت جارية برضو وربنا أمره يطلع بيها هى وابنها سيدنا اسماعيل من مصر لمكة.. ومشيوا من نفس الطريق اللى أنتى يا ماريا ماشيه فيه.. ويبدأ سيدنا حاطب يحكى عن تاريخ مكة وبلاد الحجاز وان سيدنا ابراهيم وصل بهاجر مكة.. ومشى سيدنا ابراهيم وسابها وسألته: هل الله أمرك بهذا.. فيقول سيدنا ابراهيم: نعم.. فتقول هاجر: إذن الله لن يضيعنا.. وتقعد هاجر لوحدها وتبدأ تطوف بين الصفا والمروة (زى ما احنا بنعمل فى مناسك الحج ) وتطلع على الصفا تبص لأنها عايزة مايه وابنها الرضيع بيعيط من العطش وبعدين تنزل المروة.. وتفضل بين الجبلين رايحة جاية سبع مرات.. وبعد كده ربنا يفجر لها بئر زمزم وتبدأ تجرى هاجر عليه فتلاقى المياه بتجرى فى كل حتة فهاجر افتكرت ان المياة ممكن تخلص فقعدت هاجر تحاوط المايه بأيديها وتقول زم زم "كلمة زم يعنى قرب من بعضك ومتجريش" فبقت المايه محصورة جوه البئر.. بيقول النبى محمد عليه الصلاة والسلام: رحم الله هاجر لو لم تقل زم زم لظل النهر يجرى إلى يوم القيامة

ويحكى سيدنا حاطب ويحكى ويحكى وتبدأ عينين مارية تلمع وتتغير والدموع وقفت وبدأت العينين تبتسم.. ويحكى حاطب ان يا مارية إسماعيل بن هاجر الولد الصغير ده هيكبر وهيبقى رسول وهيبقى جد سيدنا محمد اللى انتى رايحاله دلوقتى صلى الله عليه و سلم.. وبعد ما حاطب اداها المقدمة دى قال لها يا ماريا سيدنا محمد ده بقى اخلاقه كذا وحنيته كذا وطبعه كذا وطيبة قلبه كذا فبدأت مارية قلبها يمتلئ شوقً لمقابلة رسول الله ﷺ

وبدأت ماريا تفكر ان مش يمكن أنا كمان يحصل معايا كده زى ما حصل لأمى هاجر والتاريخ يعيد نفسه انها جاريه برضو ومن مصر واتجوزت نبى فممكن تخلف منه زيها.. فيلاقى سيدنا حاطب فى عيون مارية الشوق الى رسول الله ويشوف فى عينيها الرغبة فى الإسلام.. فيقول يا مارية أتشهدين أن لا اله الا الله.. قالت أشهد أنه لا اله الا الله وأن محمداً رسول الله.. وأسلمت ماريا وأسلمت أختها سيرين قبل ما يوصلوا للمدينة

شوفتوا الدعوة الرقيقة الجميلة دى.. شوفتوا براعة سيدنا حاطب بن أبى بلتعة، وصلت ماريه لبيت النبى وكل قلب مارية شوق للنبى ﷺ دخلت عليه حيته بتحية الاسلام السلام عليك يا رسول الله ودخلت سيرين السلام عليك يا رسول الله.. وقرأ النبى الخطاب بتاع المقوقس، هتعمل ايه يا رسول الله؟ لأن المقوقس قايل لحاطب أن الجاريتان ليسا كالجوارى ومشدد قوى على الإهتمام بيهم.. فالنبى ﷺ عمل أقصى حاجة تبين للمقوقس انه فهم وقدر الهدية.. وتزوج النبى من ماريه وتزوجت اختها سيرين الصحابى الجليل حسان بن ثابت الصحابى الكريم وهتخلف منه عبد الرحمن بن حسان بن ثابت..

وماريه القبطية لم تكن زوجة النبى بل هى كانت ملك يمين..
زمان كان فى طريقتين شرعيتين للمعاشرة بين الرجل والمرأة، واحدة منهم الزواج الشرعي والتانية ملك اليمين، "وَالَّذِينَ هُمْ لِفُرُوجِهِمْ حَافِظُونَ * إِلَّا عَلَى أَزْوَاجِهِمْ أوْ مَا مَلَكَتْ أَيْمَانُهُمْ فَإِنَّهُمْ غَيْرُ مَلُومِينَ" [سورة المؤمنون] وملك اليمين كان موجود زمان وانتهى دلوقتى مش موجود فى عصرنا الحالى فمفيش حاليا غير الزواج الشرعى بس، والمرأة المملوكة بملك اليمين هى جارية من الأعداء وقعت فى الأسر اثناء الحرب فإمتلكها المسلم فأصبحت ملك يمينه أو الجارية الى أهداها سيدها لرجل أخر فتصبح ملك يمين لهذا الرجل ودى حالة السيدة مارية مع النبى ﷺ وطبعاً فى شروط علشان الرجل يطئ ملك اليمين هى انها ماتكونش مُحرمة عليه شرعاً زى مثلاً تكون اخته فى الرضاعة أو تكون لها أخت تانية ملك يمين له برضه أو انها تكون مشركة ، فلو مفيش أى مانع من الموانع الشرعية دى ملك اليمين،

وملك اليمين إذا انجبت من سيدها ولد تُعتق وتصبح حرة ومتبقاش جارية خلاص ولا ملك يمين يبقى اسمها ساعتها أم الولد فمارية رضى الله عنها لا تعتبر من زوجاته ولكن كانت ام الولد لأنها هتلد للنبى ابراهيم عليه السلام وأكرمها النبى ﷺ وأحبها وضرب عليها الحجاب زيها زى باقى زوجاته ﷺ

نكمل بعد شويه بس إن شاء الله منساش شبهه امبارح

قصة حياة النبي صلى الله عليه وسلم♥️♥️

الحلقة 93 من السيرة النبوية

يلا صلوا على النبى

ماريه القبطية "أم إبراهيم ابن النبى محمد صلى الله عليه وسلم" (ج2)

تزوج النبى عليه الصلاة والسلام من ماريه ويحصل موقف جميل جداً.. هتعيشى فين يا ماريه؟ طب زوجات النبى عايشين فين؟ فى حجرات جمب بعض حوالين المسجد النبوى.. بس مارية مش هتستقر جنبهم.. اصل ماريه جاية من مصر من بيئة فيها نيل وهوا.. وكمان وحدانية ملهاش حد، فهتعيش ماريه فى "العوالى" دى منطقة فى المدينة يعنى زى الريف عندنا.. فيها مياه وزرع.. جوها شبه شوية جو مصر..

شايفين النبى بيحترم نفسية المرأة قد ايه.. ورغم كده ييجى حد فى زمنا ده يقول إن الإسلام مش بيحترم المرأة.. طب أزاى بس!! أقولكم حاجة جميلة فى الفقه اذا كانت المرأة مخدومة وجب على زوجها أن يخدمها وأن لم تكن فلن يجب عليه ولكن إحسانا لها يجيب خادم.. يعنى ايه؟ يعنى لو كانت البنت فى بيت أبوها عندها خادمة واتجوزت يبقى واجب على زوجها انه يجيبلها خادمة زى ما كانت فى بيت أبوها لو هو يقدر مادياً.. (لو هو مادياً ميقدرش ده موضوع تانى) طب لو مكنتش مخدومة يعنى متربية فى بيت مافيهوش خادمة؟ يبقى مش واجب عليه بس ان كان مُحسناً ولطيف وقادر ماديا يبقى يجيب لها خادمة (ده الفقه فى الإسلام بيقول كده فشوفتوا قد أيه إكرام الشريعة للمرأة فى الإسلام )

المهم هتعيش ماريه فى العوالى، طيب البيت اللى فى العوالى ده النبى عليه الصلاة والسلام جابه منين هو النبى معاه فلوس يجيب بيت فى منطقه زى العوالى؟ لأ طبعا ًولكن فى غزوة "أُحد" فى واحد يهودى اسمه مُخيريق ده أسلم وحارب فى غزوة أحد ومات شهيد ومكنش لحق يصلى صلاة واحده ولحظة موته قال: إن مت فمالى كله لمحمد يفعل به ما يشاء.. ومات فعلاً شهيد.. فالنبى قال عمل قليلاً وأُجِرَ كثيراً.. لأنه اسلم ومات وفى نيته طاعة الله ورسوله وهيدخل الجنة من قبل ما يسجد سجدة واحدة.. فلما مات ايه التركة الى سابها؟ حتة جنينة وأرض وبيت صغير فى العوالى هو ده اللى هتسكن فيه ماريه..

النبى ﷺ كان بيحبها.. وطبعاً كان بيحب عائشة اكتر بس عائشة كانت بتقول انها كانت بتحس بالغيرة من ماريه لأن النبى كان بيزورها كتير.. وطبعا كان النبى بيقدر ان ماريه ملهاش حد.. المهم بعد كام شهر حصلت مفاجئة وهى ان مارية حامل.. تخيلوا فرحة النبى ﷺ النبى خلف من السيدة خديجة بس أما التسع زوجات التانين مخلفوش منه فهيخلف النبى عليه الصلاة السلام على كبر ودايماً تلاقوا اللى بيخلف على كبر بيبقى قلبه رقيق قوى وبيدلع الطفل قوى لأنه جاله على كبر

فالنبى هيفرح فرحة شديدة وكأن ربنا بيعيد التاريخ من الأول.. زى ما هاجر زمان كانت جاريه وتزوجها سيدنا إبراهيم وخلف منها سيدنا إسماعيل لما زوجته السيده سارة كانت عقيم.. فبرضو ماريه الوحيدة اللى تخلف للنبى ﷺ.. فماريه تبقى حامل وكل المدينة تبقى فرحانة ومستنية المولود إلا واحدة بس .. السيدة عائشة.. لأن أى إمرأة بتحب زوجها بتبقى نفسها تخلف منه..

أوعوا تفتكروا انها كانت سهلة على عائشة أنها متخلفش من النبى ﷺ لأنها كانت صغيرة وتقدر تخلف.. وكانت بتقعد تدعى ربنا أن ربنا يرزقها الولد وراحت مرة بتبكى تقوله يا رسول الله كل نسائك لهن كُنية وأنا معنديش لأنى معنديش أولاد فقال لها: لا تبكى يا عائشة أنتى أم عبد الله (ابن اختها عبد الله بن الزبير) فكان نفسها تخلف،

طب ايه الحكمة ان ربنا خلى عائشه متخلفش؟ عائشة هتروى اكتر من 2000 حديث عن النبى وكلهم فى الفقه فمينفعش يا عائشة تنشغلى بأطفال فكان ده اصطفاء من ربنا للبشرية.. فزوجات النبى اللى بعد خديجه مخلفوش منه.. طب اشمعنا ماريه تخلف؟! عشان محدش يقول ان النبى مخلفش عشان ميقدرش يخلف.. لأ النبى يقدر يخلف بس إرادة ربنا أنه ما يخلفش لفترة.. المهم تحمل ماريه والنبى يبقى طاير من الفرحة.. ويعدى شهر اتنين تلاتة لحد ما نوصل للشهر التاسع وتخلف ابراهيم بن محمد صلى الله عليه وسلم
ماريه بتولد.. المدينة كلها كانت فرحانة، فبسرعة راحت اختها سيرين فى العوالى عشان تبقى جمب ماريه، والنبى عرف الخبر فبسرعة راح لهم.. وأول ما النبى دخل كان ابنه لسه مولود فأخده النبى ﷺ وحضنه وسماه ابراهيم تيمناً بسيدنا إبراهيم عليه السلام ويشاء الله انه يكون ابراهيم ده آيه فى الجمال وكان شبهه النبى محمد قوى.. فالنبى حبه حب غير طبيعى ﷺ وكان فرحان بيه قوى فكان يشيله ويخبط على بيت بيت فى المدينة.. ويدخل لأبو بكر ويقول: أرأيت يا أبا بكر ابنى.. ألا يشبهنى؟ أرأيت جماله وحسنه؟ فيبتسم أبو بكر ويقول له جميل يا رسول الله ويلف ﷺ على كل بيوت المدينة يوريهم ابراهيم.. النبى كان فرحان بيه قوى.. لحد ما ييجى النبى عند حجرة عائشة.. النبى ميقصدش يزعلها بس هو فرحان بيه فوى وبيحبها وعايزها تفرح معاه..

بس عائشة مجروحة كان نفسها تجيب من النبى أى مولود عشان تفرحه وكان نفسها ان هو لما يموت تفضل حاجة من ريحته صلى الله عليه وسلم بين ايديها.. فيدخل النبى عليها ويقول لها: أرأيت يا عائشة ألا يشبهنى؟ فبصت عليه عائشة وأخفت دموعها.. وقالت لا يشبهك ابداً.. قال كيف يا عائشة؟ قالت لا يشبهك ابداً يا رسول الله.. (كانت غيرانه شويه) بس النبى مهتمش وكان فرحان بأبراهيم فخرج
ويبدأ ابراهيم يكبر ويبقى شبه النبى أكتر كل يوم ويعدى شهر واتنين.. وقبل الفِطام بشهرين تيجي لإبراهيم حمى شديدة هيسخن وتجيله حمى شديدة، وتبدأ ماريه تبكى وتيجى سيرين جرى وتلاقى شكل الولد متغير والسخونية مش بتروح فيبعتوا للنبى بسرعة.. فالنبى ييجى جرى فيدخل يبص على ابراهيم فيفهم.. فييجى ياخد ابراهيم من ماريه.. ماريه ماسكة فى ابراهيم حضناه وبتعيط ومش عايزة تديه للنبى ﷺ فقال يا ماريه هو أبنى كما هو أبنك فأخده النبى وبدأ إبراهيم يحشرج الروح هيموت فى صدر النبى ﷺ فنظر النبى له وبكى وقال: يا بُنى أما إنى لا أملك لك من الله شيئاً (مقدرش أعملك حاجة) ويبدأ ابراهيم يحشرج فى صدر النبى ﷺ والنبى يبكى (ابنه بيموت) فواحد من الصحابه جه جمب النبى فقال له: أتبكى يا رسول الله؟ فقال النبى نعم إنما هى رحمة يضعها الله فى قلوبنا..

ويبدأ جسد ابراهيم يرتعش وتخرج روحه رضى الله تعالى عنه وهو فى صدر النبى ﷺ ويموت ابراهيم فتتقل راسه ويبرد جسمه فيعرف النبى انه مات فيبكى النبى ويقول أما إن العين لتدمع وإن القلب ليحزن ولا نقول الا ما يرضى ربنا وإنا على فِراقك يا ابراهيم لمحزونون.. النبى دفن أولاده كلهم الا فاطمة لأنها ماتت بعده ب6 شهور ووقت وفاته صلى الله عليه وسلم هيقولها انتى هتموتى بعدى.. فالنبى حتى كان عارف أنها ميتة.. فقد ايه استحمل وصبر صلى الله على محمد.

ويقول النبى إن الله عز وجل يُنادى يوم القيامة على أطفال المسلمين الذين ماتوا قبل الحُلم ويقول: ادخلوا الجنة فيقولون: لا يارب وعزتك لا ندخلها حتى نأخذ بأيدى أبائنا وأمهاتنا فيقول الله: ادخلو الجنه أنتم وآبائكم وأمهاتكم

أشد بلاء يا جماعة فقد الأولاد مهما كان اللى فقدته عزيز على قلبك لكن أشد فقد هو فقد الأولاد عشان كده أعظم أجر هو أجر فقد الأولاد ربنا يعافى أولادنا أجمعين.. فيبكى النبى ﷺ ويقول لأبراهيم وهو ميت فى حضنه كلمة عجيبة قوى يقول له: والله يا ابراهيم لولا أن وعد الله حق لكان حزننا غير هذا الحزن (بيقوله لولا ان أنا واثق ومتأكد من وعد ربنا ان قدر ربنا اكيد لمصلحتى وان ربنا هيعوضنى فى الجنة لكان حزنى هيبقى حاجة تانية خالص.. حاولوا تقولوها لنفسكم فى البلاء لما يحصلكم بلاء شديد وتحسوا أن الدنيا ضيقة وأنكم لوحدكم وأنكم تعبانين قولوا كده.. لولا أن وعد الله حق لكان حزن غير هذا الحزن كنت هازعل قوى بس أنا عارف يارب انك بتعمل كده علشان مصلحتى)

لما الطفل يموت يقول الله سبحانه وتعالى فى الحديث القدسى: يا ملائكتى أقبضتم ولد عبدى؟ وهو أعلم سبحانه وتعالى، فتقول الملائكة بلى يارب.. يقول يا ملائكتى أقبضتم فلذة كبد عبدى؟ فيقولون نعم يارب.. فيقول الله عز وجل يا ملائكتى ماذا قال عبدى؟ قالوا: حمدك واسترجعك "قال انا لله وانا اليه راجعون".. فيقول ياملائكتي ابنوا له قصراً في الجنة وسموه بيت الحمد

بس ماريه بتبكى فالنبى: يقولها لا تبكى يا ماريه إن الله عز وجل يُكمل لإبراهيم الأن رضعته فى الجنة.. ويموت ابراهيم ويتدفن فى البقيع.. وهيموت النبى بعد إبنه ابراهيم ب 8 شهور وماريه هتموت بعد النبى ب 6 سنين ومن يوم ما هيموت ابنها مش هتخرج من بيتها أبداً إلا عشان تزور إبنها فى البقيع وبس ولما تموت هتُدفن بالبقيع رضى الله تعالى عنها وأرضاها ..

وزى ما قولنا أن بسبب السيدة ماريه.. مصر أخدت فضل ومنزلة عند رسول الله ﷺ فقال النبى عليه الصلاة والسلام: اذا فتحتم مصر فأستوصوا بأهلها خيراً فإن لهم نسباً وصهرا (مين النسب ؟ ماريه ( فلولا ماريه أمنا العظيمة مكنش هيبقى لمصر فضل فى السنة النبوية طبعاً القرآن مدح مصر بس أحنا بنتكلم عن السنة النبوية)..
فى موقف حصل بعد ما مات ابراهيم ابن النبي صلى الله عليه وسلم ان حصل كسوف للشمس فقالوا كسفت الشمس لموت ابراهيم.. فنفى النبى ذلك وقال ان الشمس والقمر آيتان من آيات الله لا يخسفان لموت عظيم ولا لميلاد عظيم.. فقال النبى ده حصل قدراً وصدفة تزامنت مع موت ابراهيم..

نكمل بكرا إن شاء الله

قصة حياة النبي صلى الله عليه وسلم♥️♥️

الحلقة 94 من السيرة النبوية

يلا صلوا على النبي

حجة الوداع (ج1)

اول واخر حجة لرسول الله

بعد غزوة تبوك اللى اتعرف منها مين المسلم الحق ومين المسلم المنافق.. وفى شهر ذى الحجة هيطلع رسول الله أول وأخر حجة لبيت الله الحرام.. النبى ﷺ كان عامل عُمرة "عُمرة القضاء" لكن دى "حجة".. النبى ﷺ هيطلع ومعاه اكتر من 100 ألف مسلم.. ياااااه شايفين العزة.. قال تعالى: "وَلِلَّهِ الْعِزَّةُ وَلِرَسُولِهِ وَلِلْمُؤْمِنِينَ"..فاكرين يا جماعة زمان؟ فاكرين غار حِراء لما جبريل نزل على النبى لأول مره.. وكان النبى خايف جدا.. فاكرين لما كان فى غار ثور وأبو بكر خايف جداً ويقول له: يا رسول الله لو نظر أحدهم تحت قدميه لرآنا فالنبى يقوله يا أبا بكر لا تحزن إن الله معنا ..

فاكرين لما اسلم 3 من المسلمين وفضلوا يزيدوا شويه بشويه.. فاكرين لما بقوا مجموعة صغيرة بيتعذبوا فى مكة، فاكرين سيدنا بلال لما كان من كتر التعذيب بيقول أحد أحد فاكرين عمار بن ياسر لما من كتر التعذيب راح للنبى وقال: يا رسول الله أهكذا الدهر؟ (يعنى هى الدنيا صعبة كده ليه؟).. فاكرين سُمية لما فضلت ثابتة على اسلامها وأبو جهل بيعذبها ورماها بالحربة فى مكان عفتها وماتت.. فاكرين لما كان كفار مكة حابسين قبيلة النبى فى الشِعب.. فاكرين النبى ﷺ لما كان يبقى ساجد قدام الكعبه ويجيب الكفار أمعاء الأبل ويحطوها على ضهر النبى ورقبته.. فالنبى ميقدرش يقوم من قذارة الحاجات اللى عليه.. ويفضل ساجد فتيجى فاطمة تُزيل الوسخ عن كتفيه وتبكى فالنبى يقولها يا فاطمة لا تبكى إن الله ناصر أباكى..

فاكرين لما كان يقف النبى يصلى وييجى عُقبة بن أبى مَعيط اللئيم ويجيب عباية ويبرمها ويحطها على رقبة النبى ويخنق النبى فالنبى يقع على ركبتيه ويغمى عليه ﷺ.. تعب قوى يا جماعة تعب قوى علشانا..
دلوقتى رايح الحج مع سيدنا محمد 100 الف مسلم.. تعبك مرحش هدر يا رسول الله.. ربنا صدق وعده ونصر عبده..

يخرجوا من المدينة لمكة حوالين النبى من كل جانب وعلى فكرة ال 100 ألف دول المسلمين كلهم مش سكان المدينة بس دول من القبائل كلها.. ويبدأ المسلمين يلبوا ويقولوا: لبيك اللهم لبيك لبيك لا شريك لك لبيك تأملوا كده كلمة لبيك معناها ايه؟ احنا جايينلك يارب.. والنبى يقولها من قلبه لبيك اللهم لبيك (23 سنة تعب كان نفسى يارب من زمان أجيلك) لبيك اللهم لبيك لبيك لا شريك لك لبيك إن الحمد والنعمة لك والمُلك لا شريك لك.. وينزل جبريل ويقول: يا رسول الله إن الله يأمرك أن تأمر أصحابك أن يرفعوا أصواتهم بالتلبية (علو صوتكم ربنا فرحان بيكم) فيبدأ الصحابة يعلو صوتهم وتزداد الحماسة فقال الصحابة والله ظللنا نُلبى من المدينة الى مكة حتى بُحت أصواتنا) يوصل النبى لمكة، هتعمل ايه يا رسول الله.. ويحج النبي ماشى على رجليه!! من مكة لمنى مشى من منى للمزدلفة من المزدلفة لعرفة كله مشى!! ليه يا رسول الله؟ عايز أبذل كل طاقتى لله تبارك وتعالى صلى الله على محمد (بس مش هيقدر يكمل كده لأن العدد كبير وبدأت الناس تيجى ناحية النبى.. تخيلوا 100 ألف على واحد.. ده عايز يبوس رجله والتاني ايديه.. ده عايز يسأله.. ده عايز يبص فى وشه.. ده عايز يقوله كلمة..

فبدأ النبى يتعب فأضطر أنه يركب على ناقة وبدأ النبى يكمل مناسك الحج راكباً ﷺ ويقول للصحابة جملته الشهيرة أيها الناس خذوا عنى مناسككم (قلدونى.. علشان فى ناس بتسأل تفاصيل الحج دى جبناها منين؟ جبناها من حجة الوداع.. ويقول النبى عليه الصلاة والسلام: خذوا عنى مناسككم لعلى لا ألقاكم بعد عامى هذا (يمكن مشوفكوش تانى ويبدأ النبى ﷺ يطوف ويعرض مناسك الحج ﷺ ويبدأ النبى يقف شوية ويستريح ويكمل.. لحد ما يقف النبى ويخطب فى ال 100 ألف .. طب ازاى الصوت هيوصل ل100 ألف ومفيش ميكروفون ولا مكبرات صوتية؟
اصل كان النبى يقف فى مكان وبعد كام متر يقف صحابى تانى فالنبى يقول الكلام فالصحابى ياخد الجملة ويعيدها.. مكنش فى وسائل تانيه،.. فالنبى يقول الجملة ويسكت لحد ما الصحابى يقولها علشان تتنقل الناحية التانية.. ويقف النبى فالناس كلها تسكت فيبدأ النبى يقول كلام غريب قوى.. "أيها الناس أى يوم هذا؟ فيقولون اليوم الحرام، فيقول أيها الناس أى شهر هذا؟ فيقولون الشهر الحرام، فيقول أى بلد هذا؟ فيقولون هذا البلد الحرام فيقول أيها الناس: إن اموالكم ودمائكم وأعراضكم عليكم حرام كحُرمة يومكم هذا فى بلدكم هذا فى شهركم هذا"
مينفعش يا مسلمين تموتوا بعض مستحيل مينفعش يا مسلمين تخوضوا فى عِرض بعض مينفعش.. طب ييجى النبى يشوفنا دلوقتى اكيد هيزعل قوى.. ده النبى قال فى الحديث: اذا التقى مسلمين بسيفيهما فالقاتل والمقتول فى النار، القاتل والمقتول!! فالصحابه استغربوا.. فقال النبى فإن المقتول كان يحرص على قتل أخيه.. يعنى المقتول كان فى نيته يقتل أخوه المسلم برضو فهما الاتنين يدخلوا النار

ويكمل النبى الخطبة ويقول: أيها الناس إنما المؤمنون إخوة.. ويقول فى الحديث مثل المؤمنين كمثل الجسد الواحد إذا أشتكى عضو تداعت له سائر الأعضاء بالحُمى والسهر.. (احنا حاجة واحدة مينفعش نخبط فى بعض) ويفضل يكرر ﷺ الكلام.. ويكمل الخطبة ويوصى المسلمين على النساء هيقول كلام جميل جداً

هنعرفه بكرا ان شاء الله

قصة حياة النبي صلى الله عليه وسلم♥️♥️

الحلقة 95 من السيرة النبوية

يلا صلوا على النبى

حجة الوداع( (ج2)

يقول النبى فى وصاياه لأمته: إنى مباهى بكم الأمم يوم القيامه فلا تسودوا وجهى يوم القيامة

نكمل النهارده سوا خطبة النبى.. زي ماقولنا إمبارح ان النبىﷺ بيخطب فى المسلمين فى الحج وبيكمل الخطبة ويقول "أيها الناس إستوصوا بالنساء خيراً فإنكم أخذتموهن بكلمة الله واستحللتم فروجهن بكلمة الله فاتقوا الله فى النساء فاتقوا الله فى النساء فإنهن عوان عندكم"
النبى بيوصى على نساء المسلمين "فإنكم أخذتموهن بكلمة الله" ان الرجل بياخد المرأة من بيت أبوها بكلمة.. تقوله زوجتك نفسى وتقوله قبلت، فاتقوا الله فى النساء.. أوعى تأذيها لما تروح بيتك ده أنت اخدتها بأمان ربنا على كتاب الله وسنة رسول الله.. أنت شهدت ربنا بينكم!!
ويشدد النبى ويقول اتقوا الله فى النساء فإنهن عوان عندكم.. يعنى زوجتك بقت بتسمع كلامك.. بقت تحت أمرك.. مينفعش تأذيها اتقى الله فيها لأن عذاب ربنا شديد.. دى وصايا النبى الأخيرة يا جماعة خلاص النبى قرب يموت..
وتخلص الخطبة وينزل النبى ويكمل المسلمين مناسك الحج وبعد شويه يقف النبى ويعمل خطبة كمان.. فتبدأ الناس تستغرب وتسأل هو النبى بيخطب كتير ليه !! وتتجمع الناس تانى والصحابة يوازوا نفسهم عشان يكرروا للناس اللى واقفه بعيد كلام النبى عشان يسمعوا.. وكأن النبى بيخطب كذا مرة عشان يحفظوا الوصية..

فيقول النبى "أيها الناس أى يوم هذا؟ تانى!! فالناس قالت يمكن اسم اليوم اتغير وده وارد لأن الوحى لسه بينزل فيمكن اتغير اسم اليوم فقالوا الله ورسوله أعلم.. فقال أليس اليوم الحرام؟ قالوا: بلى، فقال النبى: أى شهر هذا؟ فقالوا الله ورسوله أعلم.. فقال: أليس الشهر الحرام؟.. فقالوا: بلى ، فقال أى بلد هذا؟ قالوا الله ورسوله أعلم، فقال النبى: أليس البلد الحرام؟ فقالوا بلى.. فيقول النبى: أيها الناس إن اموالكم ودمائكم وأعراضكم عليكم حرام كحُرمة يومكم هذا فى بلدكم هذا فى شهركم هذا.. إنما المؤمنون إخوة"

( كان عارف صلى الله عليه وسلم اللى هيحصل، كان عارف قد أيه المسلمين هيتفرقوا ويتشتتوا ﷺ.. النبى بيقول فى الحديث: توشك أن تتداعى عليكم الأمم كما تتداعى الاكلة إلى قصعتها.. هييجى يوم من الايام يا مسلمين الاعداء هييجوا ينهشوا فى لحمكم زى الناس الجعانه اللى بتقدمولها طبق أكل فيقطعوا بعض عشان ياكلوا حبة الأكل.. كأن المسلمين هما طبق الأكل الصغير ده واللى هياكلوه هما أعدائنا فرد المسلمين على النبي وقالوا: لماذا يأكلونا يا رسول الله.. هل سيكون بسبب قلة عددنا يومئذ؟ فقال النبى: لا بل ستكونون كثير ولكنكم غثاء كغثاء السيل "يعنى هتبقوا كتير يا مسلمين بس مش هتكون ليكم قيمة لأنكم هتكونوا مموتين بعض ومقطعين بعض ومتفرقين" (تعرفوا أن مرة واحد مسيحى قال: أيها العرب إنه لا يمنعكم من الوحدة إلا أنتم !)

ويشدد النبى ويكرر تانى ويقول "إنما المؤمنون إخوة " ويقول: "أيها الناس إنه لا فضل لعربى على أعجمى ولا لأبيض على أسود إلا بالتقوى" ويبدأ يقول لهم: "أيها الناس إنكم ستُسألون عنى يوم القيامة بين يدى الله فماذا أنتم قائلون يومها؟" (هتقولوا لربنا عنى ايه؟) فبدأ الصحابة يبكوا.. فقالوا يا رسول الله سنقول إنك بلغت الرسالة وأديت الأمانة ونصحت الأمة وجاهدت فى سبيل دينك.. فقال الحمد لله وينادى الصحابه اللى بينقلوا كلامه ويقلهم يعيدوا الكلام تانى على الناس عشان يردوا تانى ويُسمعونى صوتهم فيكرر الصحابه كلام النبى ويقولوا: أيها الناس ما تقولون لله عن رسول الله يوم القيامة؟ فقالوا بصوت عالى: نقول أنه بلغ الرسالة وأدى الأمانة ونصح الأمة وكشف الله به الغُمة..

فبدأ النبى ﷺ يبكى وقال لواحد من الصحابه اسمه ربيعه.. يا ربيعة مر بينهم اسألهم، فينزل ربيعة ويمر على صحابى صحابى يسأله ماذا تقول عن رسول الله يوم القيامة؟ فيبكى الصحابى ويقول والناس تبكى ويشتد الألم ويشتد البكاء.. النبى عايز يطمن هيقولوا ايه عنه لربنا يوم القيامة.. بعد كل التعب ده يا رسول الله !! صلى الله على محمد صلى الله عليه وسلم..

ويقف النبى ويقول لهم "أيها الناس ستُعرض عليا الأمم يوم القيامة وتُعرضون أنتم عليا يوم القيامة فيأتينى مسلمين منكم فأذهب إليهم واقول أُمتى أمتى.. فتأتى الملائكة فتدفعهم عنى فأقول لِمَ تحجبون عنى أُمتى؟ فتقول الملائكة يا محمد إنك لا تدرى ما أحدثوا بعدك فأقول سُحقاً سُحقاً بُعداً بُعداً".. تعالوا يا جماعة نتخيل أننا فى حجة الوداع والنبى بيودعنا بيقولنا الكلام ده.. يقف النبى ﷺ ويقول "أيها الناس أنا فرطكم على الحوض وإنى مباهى بكم الأمم يوم القيامة.. فيا أيها الناس لا تُسودوا وجهى يوم القيامة" (انا هستناكم عند الحوض وهتفاخر بيكم قدام الانبياء يوم القيامة فمتكسفونيش ومتسودوش وشى قدامهم يوم القيامة)..

فيبكى الناس، ويكمل النبى الخطبة ويقول: "أيها الناس إنى آتى يوم القيامة أستنقذكم من النار (هشدكم من النار) فلا تسودوا وجهى يوم القيامة وييجى وقت الغروب يوم عرفة وتنزل آية "الْيَوْمَ أَكْمَلْتُ لَكُمْ دِينَكُمْ وَأَتْمَمْتُ عَلَيْكُمْ نِعْمَتِي وَرَضِيتُ لَكُمُ الإِسْلامَ دِيناً " [سورة المائدة] ،

فيبكى سيدنا أبو بكر ويقول سيدنا عُمر: لكل أمرٍ يكتمل لابد له من نقصان، وطبعاً خلى بالكم النقصان هنا هو موت رسول الله ﷺ .. الآية دى مرة واحد يهودى راح لعُمر بن الخطاب وقت لما كان أمير المؤمنين فقال له: يا أمير المؤمنين لو أُنزلت هذة الآيه فى كتب اليهود لجعلنا هذا اليوم عيداً فقاله اليوم أكملت لكم دينكم وأتممت عليكم نعمتى فيرد عُمر عليه ويقول هى نزلت فى عيد أصلاً يوم عرفة وكمان يوم جمعة..

نكمل بكره ان شاء الله

قصة حياة النبي صلى الله عليه وسلم♥️♥️

الحلقة 96 من السيرة النبوية 🙌

يلا صلو على النبى🌸💜

حجة الوداع (الجزء3 والاخير)

خلاص النبى خارج من مكة وهو طالع يقف ويبص على الحرم ويبص ويملى عينيه من الحرم.. مش بيفكركم الموقف ده بموقف تانى زمان؟ فاكرين لما طلع النبى من مكة للمدينة مهاجر بعد إيذاء قريش للمسلمين وبعد ما اتفقوا على قتل النبى عليه الصلاة والسلام.. خرج النبى مهاجر ووقف فى نفس المكان وقال الله يعلم انك احب بقاع الأرض الى قلبى ولولا أن قومك أخرجونى منك ما خرجت ..

من نفس المكان يقف النبى ويبص بس دى النظرات الاخيرة النبى قرب يوم وفاته فبيودع الحرم.. والنبى طالع يحصل موقف جميل جداً تجيى بنت شابة جميلة وشها باين بتسأل النبى مسألة فقهية وواقف جنب النبى صحابى اسمه الفضل بن العباس ابن عم الرسول ﷺ والفضل شاب صغير والبنت جميلة، فالفضل واقف والبنت بتسأل فالنبى رد عليها وخلاص البنت مشيت فالنبى بيبص على الفضل لقى الفضل عينيه ماشية مع البنت..

النبى يعمل له ايه؟ ( بصوا الدعوة الرقيقة اللى احنا مُفتقدينها جداً.. الفضل وشه مع البنت فالنبى يمسك دقن الفضل ويحرك وش الفضل ناحية وشه صلى الله عليه و سلم ويبتسم فى وشه وبس ومقلهوش ولا كلمة (فالفضل لقى عينه فى عين النبى وكأن النبى بيقوله خليك معايا انا أحسن فيقول الفضل فوالله استحييت من نفسى وما عدت لمثلها بعد ذلك قط) يخرج النبى ﷺ ويوصل المدينة، يدخل المدينة وتنزل الآيات الختامية الى بتحاول تأهل الصحابة لأصعب موقف فى حياتهم "وَمَا مُحَمَّدٌ إِلَّا رَسُولٌ قَدْ خَلَتْ مِن قَبْلِهِ الرُّسُلُ ۚ أَفَإِن مَّاتَ أَوْ قُتِلَ انقَلَبْتُمْ عَلَىٰ أَعْقَابِكُمْ ۚ وَمَن يَنقَلِبْ عَلَىٰ عَقِبَيْهِ فَلَن يَضُرَّ اللَّهَ شَيْئًا ۗ وَسَيَجْزِي اللَّهُ الشَّاكِرِينَ" [سورة آل عمران ]..

والآيات " إِنَّكَ مَيِّتٌ وَإِنَّهُم مَّيِّتُونَ"[سورة الزمر ].. " وَمَا جَعَلْنَا لِبَشَرٍ مِنْ قَبْلِكَ الْخُلْدَ ۖ أَفَإِنْ مِتَّ فَهُمُ الْخَالِدُونَ " [سورة الأنبياء].. ومع ذلك برضه الصحابة هيتعبوا قوى يوم وفاة النبى
ويدخل النبى ﷺ المسجد النبوى بعد ما رجع من مكة يصلى ركعتين ويجمع الصحابة هيقولهم حديث مهم قوى.. "أيها الناس أسمعوا عنى (ركزوا معايا )، أبو بكر فى الجنة وعُمر فى الجنة وعثمان فى الجنة وعلىّ بن ابى طالب وطلحة والزبير وسعد وبن عوف وأبو عُبيدة بن الجراح وسعيد بن زيد ( دول العشرة المبشرين بالجنة ) فاعلموا ذلك عنى والمهاجرين والأنصار فإنى راضٍ عنهم، أيها الناس لا تسبّوا أصحابى فلا يبلغنى أن أحد يسب أصحابى لا تؤذونى فى أصحابى "

(انا اعتقد وده اجتهاد منى والله اعلم ، أنا بعتقد أن الحديث ده من دلائل النبوة.. ليه؟ لأنه النبى وأبو بكر وعُمر والصحابة وبيقول لهم لا تسبّوا أصحابى.. طب هما هيسّبوا نفسهم يعنى؟ يبقى ده من دلائل النبوه لأن النبى عارف اللى هيحصل بعد كده ويقول حديث مهم جداً صححه الإمام الألبانى "ألا لعنةُ الله على من سبّ أصحابى".. فاللى يسبّ الصحابة ملعون، طبعاً لازم يبقى ملعون.. ويقول النبى: "ألا من ولىّ على المهاجرين والأنصار شيئاً فليتقبل من مُسيئهم وليحسن الى مُحسنهم" (يعنى اى حاكم ربنا هيوليه عليهم لازم يعاملهم بالراحة )

ويروح النبى ﷺ البيت فيبدأ جسمه يوجعه عاش 23 سنة تعب.. يبدأ النبى ﷺ يصلى السُنن قاعد فيدخل عليه عُمر بن الخطاب يلاقيه بيصلى السُنن قاعد، عُمر مش عايز يتقبل فكرة إن النبى تعبان (عارف لما تبقى مش متقبل الفكرة فتقعد تقلبها ضحك وهزار عشان مش عايز تتقبل الواقع.. عُمر هيعمل كده) فقال عُمر: شبت يا رسول الله (أنت عجزت)، طبعا النبى مش بيعجز، النبى عليه الصلاة والسلام وشه ألين وأطيب من وجه الصبى مافيهوش أى تجاعيد وشعره أسود من الليل ومات وفى لحيته 17 شعرة بيضاء..

الصحابة عدوهم شعرة شعرة والموضوع ده لطيف جداً.. يعنى أنا قعدت أفكر كده مرة أن النبى عليه الصلاة والسلام قاعد معاهم مثلاً بيخطب الجمعة أو بيدى درس أو قاعد معاهم قعدة لطيفة والصحابة قاعدين، فتخيل بقى الصحابى اللى عد ال 17 شعرة.. تخيل وهو قاعد بيعد 1 2 3 بعد كده النبى لف وشه فيضطر الصحابى يعيد من الأول بقى، ماهو أكيد مقالش للنبى اثبت عشان اعد.. وممكن كمان النبى يقوم قبل ما الصحابى يكمل عد فيضطر يعيد العد تانى يوم.. الموضوع صعب قوى ولكن الحب بيسهل أى شئ ويخلى صبرك طوييل..

المهم النبى عمره 63 سنه ومعندوش غير 17 شعرة بيضاء فالنبى لسه شباب وجميل.. هزر عُمر مع النبى وقال شبت يا رسول الله.. فابتسم النبى وقال نعم يا عُمر شيبتنى سورة هود.. فيها آية شيبتنى.. ايه هى يا رسول الله؟ " فَاسْتَقِمْ كَمَا أُمِرْتَ وَمَن تَابَ مَعَكَ "
طب إيه اللي هيحصل بعد كده

هنعرف دلوقتي ان شاء الله

قصة حياة النبي صلى الله عليه وسلم♥️

الحلقة 97 من السيرة النبوية 🙌

النهارده بقالنا 97 يوم بالظبط مع بعض بنتكلم عن حياة حبيبنا النبي ﷺ لحد مابقينا في اخر أيامه في الدنيا

يلا صلوا على النبي🌸💜

خلاص النهارده فاضل 15 يوم على وفاة النبى عليه الصلاة والسلام وتنزل اخر اية "وَاتَّقُوا يَوْمًا تُرْجَعُونَ فِيهِ إِلَى اللَّهِ ۖ ثُمَّ تُوَفَّىٰ كُلُّ نَفْسٍ مَّا كَسَبَتْ وَهُمْ لَا يُظْلَمُونَ" [سورة البقرة] .. انتو متخيلين! تنزل الأية وجبريل يقول يا رسول الله دى اخر اية.. ياااااه فاكرين وقت نزول الوحى وجبريل يسد الافق له 600 جناح ويقول للنبى أقرأ ويرد النبى يقول ما أنا بقارئ.. وتنزل أول آيه " أقرأ باسم ربك الذى خلق " [سورة العلق] ويجرى النبى مفزوع على السيدة خديجة ويقول زملونى زملونى وتنزل ايات رب العالمين: يا ايها المزمل قم الليل إلا قليلا..

فى معلومة مهمة لازم نعرفها هى أن القرآن نزل علي النبي مش مترتب ونزل علي حسب الأحداث اللي كانت بتحصل.. مثلا تحصل غزوة بدر فتنزل سورة الانفال.. تحصل غزوة تبوك تنزل سورة التوبة.. تحصل غزوة أُحد ينزل جزء كبير من آلِ عمران.. تحصل غزوة الخندق تنزل سورة الأحزاب.. فكل ما يحصل حدث ينزل القرآن.. وآخر أية في القران هي في سورة البقرة .. يعني الآيات كانت مش مترتبة لكن قبل وفاة النبي صلي الله عليه وسلم نزل عليه جبريل وعرض عليه القرآن عرضا.. يعني رتب جبريل مع النبي القرآن.. فالنبي مات والقران مترتب بنفس ترتيب المصحف دلوقتي.. وكان بيتكتب بوسائل كتير.. وفى عهد ابو بكر تم جمع القرآن كامل في كتاب..

المهم تنزل اخر ايه على النبى ويخرج النبى من بيته يزور شهداء أُحد كأنه بيودع الأحياء وبيسلم كمان على الأموات فيدخل عليهم ويقول السلام عليكم دار قومٍ مؤمنين انتم السابقون.. وكان فى كل زيارة ليهم يكمل ويقول: وإنا إن شاء الله بكم لاحقون لكن المرة دى كمل وقال: وأنا إن شاء الله بكم لاحق..

ويروح يزور شهداء البقيع ويدعى النبى لهم ويكون معاه خادمه سيدنا أبو مويهبه لكن النبى عليه الصلاة والسلام وهو راجع بدأ يحس بتقل فى جسده وبتعب فيسند النبى على سيدنا ابو مويهبه علشان مش قادر يمشي لوحده.. فيحصل بينهم حوار جميل.. فالنبي يقول له: يا أبا مويهبه أتدري ان الله عز وجل قد خيرني بين الخلود في الدنيا وان املك خزائن الدنيا ثم الجنة، وبين لقاء الله ثم الجنة.. وسكت النبي.. فأبو مويهبه قال له: بأبي انت وامي فلتختر الدنيا وخزائن الدنيا ثم الجنة.. قال النبي: لا يا أبا مويهبه إنى اشتقت الي ربي فأخترت لقاءه.. فبكي ابو مويهبه..

ولما يدخل النبى عليه الصلاة والسلام للمسجد النبوى الشريف ويجمع الصحابة ويقول لهم اخر أحاديث قبل ما يشتد عليه المرض.. وكان اخر كلام عننا أحنا قال صلى الله عليه وسلم: وددت لو أنى لقيت إخوانى (يا ريتنى لحقت اقابلهم) فقالوا أولسنا إخوانك يا رسول الله؟ قال بل أنتم أصحابى ولكن إخوانى قوم يأتون من بعدى آمنوا بى ولم يرونى.. إن شاء الله ده انا وأنتم كلكم.. فأبو بكر سمع الكلام وأستغرب إن ازاى حد يحب ويشتاق لحد من غير ما يشوفه!! فقال النبى: يا أبا بكر أفلا تحب قوماً علِموا حبك لى فأحبوك لحبك لى يا أبا بكر.. يا أبا بكر أحبهم.. أولئك أحبهم الله

ويبدأ النبى ﷺ تجيله حمى وسخونية شديدة ويمرض مرض شديد.. فاضل على الوفاة 15 يوم، وأفكركم بكلام أنس بن مالك وهو بيحكى عن يوم وفاة النبى ويقول: " لَمَّا كَانَ الْيَوْمُ الَّذِي دَخَلَ فِيهِ رَسُولُ اللَّهِ صَلَّى اللَّهُ عَلَيْهِ وَسَلَّمَ الْمَدِينَةَ أَضَاءَ مِنْهَا كُلُّ شَيْءٍ، فَلَمَّا كَانَ الْيَوْمُ الَّذِي مَاتَ فِيهِ أَظْلَمَ مِنْهَا كُلُّ شَيء"
فاضل 15 يوم علي الوفاة وفى اول 11 يوم فيهم كان النبي قادر يصلي واقف وقادر يطلع يصلي إمام بالصحابة.. اما في اليوم الـ11 فيحاول النبي يقوم عشان يصلي الفجر.. ويادوب لسة رايح يتوضأ فيقع ويغمى عليه.. النبى عنده حمي (سخونة شديدة).. فالبيت اضطرب وأهل بيته اضطربوا.. فتقول عائشة: فصببنا عليه قربة من الماء فأفاق.. فراح يتوضأ فوقع واغمى عليه تانى.. فصببنا عليه قربة من الماء فأفاق.. فراح يتوضأ وبعدين أغمى عليه لتالت مرة ويصبوا الميه ويغمى عليه لحد سابع مرةً فلما فاق قال: حسبكم حسبكم.. مروا أباً بكر ان يصلي بالناس.. فقالت عائشة: لا يا رسول الله بل تصلي انت بالناس.. قال يا عائشة مروا أبا بكر فليصلي بالناس.. قالت يا رسول الله ان أباً بكر رجلاً اسيف ( بيعيط كتير يعنى هيدخل في الصلاة وهو عارف ان انت تعبان فمش هيعرف يقرأ قرآن والنَّاس مش هتفهم هو بيقول ايه.. وتقترح عائشه وتقول للنبى: نقول لعمر بن الخطاب يارسول الله.. فقال صلي الله عليه وسلم: لا يا عائشة انكن صويحبات يوسف ( انتم بتتكلموا كتير ليه زي صويحبات سيدنا يوسف اللى مذكورين فى القرآن ) ويكرر النبى كلامه ويقول مروا أباً بكر فليصلي بالناس.. فقالت عائشه: نعم يا رسول الله .

وييجى سيدنا ابو بكر ويدخل يصلي إمام بالناس.. فقال الصحابة فوالله ما فهمنا منه كلمة الا انه يقوم ويركع.. وصلي ابو بكر بالناس في حياة النبي 17 صلاة.. وفى تاني يوم.. اليوم الـ12 النبي حس بخفة فقام وتوضأ ويدوب وصل لحد الستار اللى بيفصل بين بيته وبين المسجد فوقع وأغمى عليه.. فراح له سيدنا علي وسيدنا العباس وسندوا النبي وخرج النبي مسنود بين علي والعباس ودخل إلي المسجد والناس كانت بتصلى فبمجرد ما الناس خدت بالها منه.. قالوا: ففرحنا وقلنا قد شُفي النبى.. فكدنا ان نفتتن في صلاتنا (الصلاة هتبوظ هنخرج من الصلاة عشان بنبص علي النبي) فشاور النبى إلينا بيده ان مكانكم (اثبتوا.. ماتطلعوش من الصلاة ).. فالنبي فضل يمشي بين علي والعباس لحد ما وصل عند ابو بكر الصديق..

فأبو بكر لمح النبى وفرح جداً.. فأبو بكر رجع خطوتين لورا عشان النبي يكون الإمام للمصلين.. فالنبي مسكه عشان يثبت مكانه وميرجعش لورا.. وقعد النبي جنب أبو بكر يصلي وبدأ ابو بكر يصلي بصلاة النبي والنَّاس يصلون بصلاة ابي بكر.. فكان أبا بكر يأتم بصلاة النبي والناس يأتمون بصلاة ابي بكر (يعني كان ابو بكر واسطة بين النبي والنَّاس.. ليه؟ لان النبي تعبان وصوته واطي فالناس مش سامعين صوته)..

خلصت الصلاة وهيتسند النبى على الصحابه ويرجع بيته.. فراح وراه سيدنا عبد الله بن مسعود.. كان عايز يطمن عليه فيقول: فدخلت الي النبى ووضعت يدي علي راْسه فإذا الحمي قد اكلت بدنه (سخن قوي).. فقلت بأبي انت يارسول الله انك توعك وعكاً شديداً.. فقال: نعم يابن مسعود، إنا معاشر الأنبياء توعك كَوَعك رجلين منكم.. فقال بن مسعود: وكذلك الأجر يارسول الله؟ قال: نعم وكذلك الأجر..

طيب دلوقتى الليل جه.. والنبي بايت في بيت زوجة من زوجاته.. وبكرة ميعاد وجوده عند السيدة ميمونة بس النبي عليه الصلاة والسلام نفسه يروح لعائشة.. ونفسه يُمرض عندها لأنه بيرتاح عند عائشة.. لكن مش عاوز يزعل زوجاته ويكسر قلبهم بس في نفس الوقت نفسه يروح لعائشة.. فالزوجات كلهم قاعدين.. فيبص النبي وهو تعبان قوي ويقول اين انا غداً.. ( هو انا بكره المفروض اروح لمين فيكم؟).. وبعدين يقول لزوجاته أتأذنون لي ان أُمرض في بيت عايشة؟ فقالوا طبعاً يا رسول الله.. أذنا لك يا رسول الله.. فأرتاح النبى انه هتمرضه حبيبته عائشة.

نكمل بكره إن شاء الله

قصة حياة النبي صلى الله عليه وسلم♥️♥️

لو حد حابب يساعد ، في ميزان حسناتكم جميعا باذن الله ❤️.

الحلقة 98 من السيرة النبوية

يلا صلوا على النبى

وفاة النبى ( الجزء 2 )

النبى هيمرض فى حجرة السيدة عائشة رضى الله عنها.. هى حبيبته واكتر حد بيرتاح معاه.. فخرج النبى من حجرة زوجته السيدة ميمونه وكان تعبان مش قادر.. فسيدنا علي وسيدنا العباس سندوه بس المرة دي النبي مش قادر يدوس بقدمه علي الارض.. فالصحابه بيقولوا: فخرج علي والعباس برسول الله وقدماه تخطان في الارض خطاً (يعني مش قادر يحط رجله علي الارض.. فهم ساندينه ويدوب رجله بتتجرجر فعامله خط على الأرض).. فالمنظر كان صعب وكان قاسي علي الصحابة.. كانوا بيبكوا ويعيطوا.. دخل النبي عند السيدة عائشة.. فتقول عائشة: فدخل النبى الي حجرتى ونام في الفراش..
َ
وحطت السيدة عائشه جنبه إناء فيه ماء فقالت: فجعل يضع يده فى الاناء ويمسح علي راْسه ويقول لا اله الا الله ان للموت لسكرات..(يعني يااااه ده الموت متعب قوي).. ويشتد الألم علي النبي لدرجة ان ورد في بعض الكتب ان النبي قال اللهم ثقل عليّ وخفف علي امتي.. يعنى خلى التعب بتاع سكرات الموت كله عليا وخفف عن امتى.. فالسيدة عائشة هتتجن شايفه النبى عليه الصلاة والسلام تعبان قوى فبتقول: فتذكرت انه كان يرقي المرضى ويضع يديه علي رأسهم ويقول اللهم رب البأس اشف وانت الشافي لا شفاء الا شفائك شفاء لا يغادر سقما.

فتقول السيدة عائشه فظللت أقول وأكرر الدعاء.. فلما انتبه لى النبى فأمسك بيدي وقال لا يا عائشة.. قد كان ذلك في المدة أما الان فلا ينفع.. يعني ايه؟ يعني الكلام ده ينفع لما يبقي لسه فيه في العمر بقية اما دلوقتى خلاص انا عمرى بينتهى فمش هتنفع.. فبتقول عائشة فبكيت وعلمت انه ميت.. فبينما نحن كذلك اذ علت الأصوات في المسجد.. وصوت العويل والبكاء عالي جدا في المسجد.. انتو عارفين ان بيت النبى كان جنب المسجد يدوب الفاصل بينهم ستار..

فسأل النبي وقال الناس مالها.. فى إيه؟ فقالت عائشة يبيتون منذ البارحة في المسجد يا رسول الله.. يخافون عليك.. فقال النبي أوقد فعلوا؟ فقالت نعم.. فقال احملوني اليهم.. النبى لقاهم خايفين عليه فقام وراح لهم بنفسه.. فجاء علي والعباس وحملوا النبي فخرج النبى للمسجد.. فاول ما خرج سكت الناس.. فحملوه الي المنبر.. وأجلسوه الي المنبر.. فقال النبي عليه الصلاة والسلام: أيها الناس مالكم لكأنكم تخافون علي؟.. فقالوا: فداك آبائنا وأمهاتنا.يارسول الله.. فقال النبى: أيها الناس موعدكم معي ليس الدنيا موعدكم معي عند الحوض.. والله لكأني أراه من مقامي هذا.. النبى بيصبرهم ويصبرنا احنا كمان..

فبكي الناس ويبدأ النبي يوصيهم وصايا فيقول لهم أيها الناس والله ما الفقر أخشي عليكم وإنما أخشي عليكم الدنيا فتتنافسوها كما تنافسها الذين من قبلكم فتهلككم كما أهلكتهم ( يعني انا يا مسلمين مش خايف عليكم من الفقر لكن خايف عليكم من الدنيا تتخانقوا علي المناصب وعلي الكراسي وتقتلوا بعض علي السلطان والجاه).. ويقول النبى: أيها الناس لا ترجعوا بعدي كفارا يضرب بعضكم اعناق بعض (يعني متقتلوش بعض) ويبدأ النبي يوصي أيها الناس الله الله في الصلاة (يعني خلي بالكم من الصلاة يا مسلمين) الله الله في الصلاة.. ويفضل يكرر ويكرر.. وبعدين يقول: الله الله في النساء أوصيكم في النساء خيراً..

وبعدين يقول جملة غريبة قوي أيها الناس من كنت قد جلدت له ظهراً، هذا ظهري فليقتص مني.. من كنت قد سببت له عرضا، هذا عرضي فليقتص مني.. من كنت قد أخذت منه مالاً فهذا مالي فليقتص منه قبل يوم القيامة حيث لا ينفع مال ولا بنون الا من اتي الله بقلب سليم وإني احب ان ألقي الله نقيا.. ولا يخشي احدكم الشحناء (يعنى خدوا حقكم منى ومتخافوش انا مش هاخاصمكم بعدها).. ويقول فمن كان له عندي حق فليأتي فليأخذه الان وليقتص مني الان.. طب معقول حد هيقبل على نفسه انه مهما كان له حق أنه يقتص من النبى !!

فيقوم واحد من الصحابه اسمه عكاشه بن محسن ويقول: انا اريد القصاص يا رسول الله.. فألتفت الناس للرجل وجفت الدموع.. اصل الناس مش مصدقة ان حد يقبل على نفسه انه يقتص من النبى مهما كان له حق عنده.. فعكاشة يقول انا اريد القصاص يا رسول الله، كنت يوم غزوة بدر يا رسول الله تسوي الصفوف فطعنتني بعصا بيديك في بطني.. فأوجعتني، فأريد منك القصاص.. فقال النبى: نعم يا عكاشة تعال.. المهم العصايه اللى كانت فى ايد النبى يوم بدر دي كانت عصاية معينة.. وكانت فى بيت السيدة فاطمه بنت النبى فبعت النبى واحد يجيب العصايه.. انتو متخيلين!! ان فاطمه لما حد يخبط عليها فتسألهم عايزين ايه؟ فيقولولها هاتي العصايه عشان واحد هيقتص دلوقتى من النبى.. موقف صعب جدا..

المهم وصلت العصاية للمسجد وعكاشة بن محسن عمال يتخطى رقاب الناس عشان يروح ناحية المنبر والنَّاس مش مصدقين انه هيقتص من النبي.. فاجتمع علي الناس حزنين حزن فقد النبي وحزن ان حبيبهم هيُقتص منه قدامهم ومش قادرين يعملولوا حاجة..

فمسك عكاشه العصا بس سيدنا علي مش قادر يستحمل المنظر فراح وقف قدام عكاشة وقال له خذ القصاص مني يا عكاشة.. فقال النبي لا ياعلي بل القصاص مني ياعلي

وجه العباس يقول نفس الحاجه فقام النبى قايل: لا بل القصاص منى يا عباس.. فوقف عكاشة بن محسن واول ما قرب من النبى قام رامى العصا على الأرض وقام حاضن النبي وقال: جسمي لجسمك فداء.. روحي لروحك فداءاً يا رسول الله.. فالنبي قال له: لم فعلت هذا يا عكاشة؟ (ليه قلت انك عايز تقتص وطلعت لا هتقتص ولا حاجه) فقال عكاشة: يا رسول الله اردت ان احتضنك.. فيتبارك جسد عكاشه بإنه احتضن جسد النبى..
- النبى مع الصحابه في المسجد فقال صلى الله عليه وسلم: أيها الناس إن عبداً خيره الله بين الدنيا وبين ما عند الله، فاختار ما عند الله.. فالناس سكتت ومفهمتش لكن كان سيدنا أبوبكر هو الوحيد اللى فهم الجملة، فانفجر بالبكاء وقاطع كلام النبى وقال: فديناك بآبائنا، فديناك بأمهاتنا، فديناك بأولادنا، فديناك بأزواجنا، فديناك بأموالنا، وفضل يكرر الكلام.. فالناس أضايقت وبصت لأبو بكر إنه إزاى يقاطع النبى بالشكل ده.. فقام النبى بسرعة مدافع عن سيدنا ابو بكر وقايل: أيهاالناس، دعوا أبوبكر، فما منكم من أحد كان له عندنا من فضل إلا كفأناه به، إلا أبوبكر لم أستطع مكافأته، فتركت مكافأته إلي الله عز وجل، كل الأبواب إلي المسجد تسد إلا باب أبوبكر لا يسد أبدا..

ويبدأ النبى يحس بشفقة ناحية الصحابة صعابنين عليه عشان شكلهم قلقانين عليه قوى.. فبدأ النبي يدعيلهم ويقولهم: آواكم الله.. نصركم الله.. ايدكم الله.. رحمكم الله.. غفر الله لكم.. ثبتكم الله.. فضل النبي يدعى وبعدين قالوا: يا رسول الله أرأيت ان مت فمن يُغسلك؟ فقال صلي الله عليه وسلم يُغَسلني اهل بيتي.. ثم قالوا يارسول الله ففيم نكفنك؟ فقال: كفنوني في ثوبي هذا.. فسكتوا طويلاً وسكت.. وبعدين قالوا وهما بيبكوا: يارسول الله فمن يصلي عليك حينها؟ فقال النبي أيها الناس إرفقوا بنبيكم.. اذا انا مت اخرجوا عني ساعة (يعني لما تيجوا تصلوا عليا سيبوني ساعة لوحدي الاول).. فقالوا لماذا يارسول الله؟ فقال: فإنه اول من يصلي علي ّحبيبي جبريل عليه السلام.. ثم يصلي عليّ ميكائيل.. ثم إسرافيل.. ثم يُصَلِّي عليّ ملك الموت.. ثم جنود من الملائكة.. ثم تدخلون عليّ فوجاً فوجاً وتصلون علي.. فقالوا يارسول الله ومن ينزلك قبرك؟ فقال النبي: اهل بيتي وجموع من الملائكة يرونكم من حيث لا ترونهم..
ويبدأ النبي يقول لهم كلام جميل قوي.. أيها الناس أٓقرؤا انفسكم مني السلام، أيها الناس اقرؤا مني السلام كل من آمن بي من امتي ولم يرانى ( دي لينا احنا بقى.. النبي بيسلم علينا احنا.. وعليك السلام يارسول الله)..

دلوقتى جه اليوم ال15 النهارده يوم الاتنين وقت الفجر.. يحصل ايه؟ يحصل ان النبي وقت آذان الفجر يشعر بشيء من الخفة.. يلاقي نفسه كويس.. قادر يقوم ويتحرك.. فيمشي لحد الستار اللى لما يفتحه يطلع منه على المسجد النبوي.. فأول ما يفتح الستار فيشوف المسلمين بيصلوا مؤتمون بأبي بكر الصديق.. ابو بكر واقف إمام عليهم.. فالنبي عليه الصلاة والسلام يتبسم النبى، فرحان بصفوف المصلين في الفجر والمسجد مليان علي الآخر.. آخر فرحة في حياة النبي كانت فرحته بالناس اللى بتصلى الفجر..

فتبسم صلي الله عليه وسلم، فالصحابة بيقولوا فظننا انه قد شُفي وجعلنا نسترق النظر اليه ونحن فى الصلاة.. ووالله ما رأيناه يوم قط اجمل ولا أضوأ من هذا اليوم.. ووالله كأنما الشمس طلعت علينا.. فكدنا ان نخرج من صلاتنا.. فأشار النبى إلينا ان أبقوا مكانكم.. وكان ابو بكر هيرجع لورا ( عايز النبي ييجى هو يبقي الامام ) فالنبي أشار له خليك مكانك.. والمسلمين كملوا الصلاة والنبى يبص لهم ويبتسم.. وبعدين دخل وقفل الستار.. وكانت دى اخر مرة هيفتح النبى فيها الستار صلي الله عليه وسلم..

وينام النبي في الفراش.. فالصحابة خلصوا الصلاة ورايحين له.. فأول واحد دخل عليه كان عبد الرحمن بن ابي بكر وكان في إيده سواك.. فتقول عائشة فنظرت الي عين النبي فرأيت عيناه تنظر الي سواك عبد الرحمن.. فقربت من النبى وقلت له: يارسول الله أتريد السواك.. فأشار النبى برأسه اي نعم اريده.. فبتقول عائشة: فأخذت السواك من أخي وطيبته ولينته له بفمي ثم أعطيته للنبي فأستاك كأحسن ما كان يستاك صلي الله عليه وسلم.. فكان من مٓنِ الله عليّ ونعمته انه اخر ما دخل في جوف النبي ريقي.. صلي الله عَلى محمد.. صلي الله عليه وسلم

و بعدين النبي يقولها يا عائشة أريد من اباكى ان يأتى الآن فإني اريد ان اكتب كتاباً (يعني عايز اكتب ورقة).. فتقول له حاضر يا رسول الله.. فتلاقيه يغمى عليه فتقعد جنبه ومتروحش تناديهم.. فيفوق ويقول لها ياعائشة اين أباكى اريد ان اكتب كتاباً.. فيتكرر نفس الموقف.. ففي المرة الثالثة قال ياعائشة اما دعوتيهم؟.. قالت يارسول الله أخشي عليك (خايفه اقوم واسيبك)..

فقال النبى: ياعائشة أني أخشي والله ان يتمني متمنٍ ويختلف الناس ويقول احدهم انا أولي.. ويأبى الله ورسوله والمؤمنون الا أبا بكر.. (يعني خايف ان بعد وفاته صلى الله عليه وسلم الناس تتخانق على مين يمسك ولاية المسلمين فالنبى عايز أبو بكر يكون الخليفة).. فكان النبى حريص ان حد يكتب الورقه دى.. طيب هتتكتب ولا لا؟

قصة حياة النبي صلى الله عليه وسلم♥️

الحلقة 99 من السيرة النبوية

يلا صلوا على النبي

وفاة النبى (الجزء 3)

شوفنا امبارح أن النبى عليه الصلاة والسلام عيان قوى بس قال اريد أن اكتب كتاباً زى ما عرفنا.. فالصحابه خايفين قوى عليه مش عايزينه يتعب.. وفعلاً مأردش ربنا أن الورقة دي تتكتب.. ليه؟ حكمة الله عز وجل وإرادته.. عشان المنافقين يبانوا وسط المسلمين.. واللي رفض خلافة ابو بكر يبان لنا وميبقاش من المسلمين ..

المهم بعد شويه تدخل فاطمة تسلم علي ابوها حبيبها.. تقول فاطمة فلما دخلت فلم يقم اليّ ليقبلني كما كان يفعل في كل مرة.. فعلمت انه قد أصابه البأس (عيان قوى).. فالنبى عليه الصلاة والسلام شافها فحاول يقوم بس مقدرش وقال لها قربى منى يا فاطمة عايز اقولك حاجه.. فجت فاطمة وحطت ودنها عند شفتي النبي فقال لها سر بصوت واطى قوى.. فعائشه بتحكى لنا المشهد وبتقول فرفعت فاطمه رأسها وبكت..

فقال النبى لها إدن مني يا فاطمة (قربي مني تاني) ففعلت وبرضو النبى وطى صوته وقال لها سر فرفعت فاطمة رأسها فضحكت.. فبعد كده راحت عائشة قالت يا فاطمة ما رأيت اعجب اليوم من بكائك وضحكك في نفس الوقت.. وسألتها قالك ايه النبي؟ فقالت فاطمة: ما كنت لأُفشي سر رسول الله..
فبعد وفاة النبي عائشة منسيتش وراحت لفاطمة وقالت لها قوليلى النبى قالك ايه يوميها.. فقالت فاطمة أما الآن فنعم سأخبرك.. يا عائشة قال لى أبى: يا فاطمة إني ميت الليلة.. فبكيت.. ثم قال لى يا فاطمة إنك اول أهلي لحاقاً بي فضحكت.. يعنى انتى اول حد هيموت بعدى.. شايفين البكاء والضحك عند فاطمة مرتبط بوجودها مع النبى سواء في الدنيا او الأخرة.
وده مش بس حال فاطمة.. ده حال كل الصحابة..

في مرة كان فى صحابي بيبكى فبيقول للنبى: يا رسول الله اني اخاف حتي ولو دخلت الجنة ان تكون انت في اعلي منزلة في الجنة مع النبيين والصديقين.. وانا أكون في ادني منزلة من الجنة.. فأخشى ان لا اراك يا رسول الله.. فعلاً يا جماعه لا تطيب الجنة إلا بك يا رسول الله.. فقال النبي له: أما علمت ان المرء يحشر يوم القيامه مع من أٓحٓب.. فرح الصحابى وجرى يبلغ الصحابة ففرحوا قوى وقالوا: فوالله ما فرحنا بعد الاسلام بشيء كفرحتنا بهذا الحديث.. انا وأنتو كمان لازم نفرح قوى بالحديث ده ونفتكره عشان نقدر نصبر على فراق النبى فى الدنيا عليه الصلاة والسلام..

طيب احنا النهارده يوم الاتنين ١٢ ربيع اول سنة ١١ هجرياً بعد الفجر بشوية تقريباً وقت شروق الشمس.. النبي دلوقتي في بيت عائشة.. طيب هتختار له موتة عامله ازاي يارب؟ هل وهو بيحارب في سبيل الله؟ طب وهو بيقرأ قرآن؟ طب وهو ساجد؟ لا ولا اى حاجة من دي.. امال ايه؟ ربنا هيختار ان النبي يموت في حضن مراته عائشة رضي الله عنها وأرضاها..

النبى على فراشه فى حجرة عائشة.. بتحكي عائشه وبتقول: فسمعت النبى يقول: وعليك السلام ياجبريل.. فعلمت ان جبريل بالحجرة.. ثم سمعته يقول : ائْذَن له يا جبريل.. ثم سمعته يقول: وعليك السلام يا ملك الموت.. تقول عائشة: ففهمت ان ملك الموت يقول له السلام عليك يارسول الله.. ثم أشار النبى بأصبعه إلى السماء وقال: بل الرفيق الأعلى بل الرفيق الأعلى.. فعلمت ان ملك الموت يخير النبى ويقول: يا رسول الله أن ربك قد بعثني إليك أُخيرك بين البقاء في الدنيا وبين لقاء الله فاختر ما شئت يا رسول الله.. اشتاق الله إلى لقائك.. فأشار النبى عليه الصلاة والسلام بإصبعه وقال: بل الرفيق الأعلي.. خلاص خلصت رسالة سيدنا جبريل على الأرض خلص نزول الوحى.. خلاص جبريل مش هينزل الارض تاني.. إلا مرة كل سنه فى ليله القدر.. ليله نزول القرآن على النبى محمد صلى الله عليه وسلم..
تقول عائشة ظل النبى يشير بالسبابة الي السماء ويقول بل الرفيق الاعلي بل الرفيق الاعلي.. فتقول عائشة فقلت له : خُيرت واخترت.. والله علمت أنك لن تختارنا.. وييجي ملك الموت.. ويقف عند رأس النبي ويبدأ ياخد روح النبي.. ويقول ايتها الروح الطيبة روح محمد بن عبد الله اخرجي الي رضاً من الله ورضوان ورب راضٍ غير غضبان..

فتقول عائشة فسقطت يد النبي.. وثقلت رأسه في صدري .. فأحسست انه قد مات فجعلت أهزه هزاً فرأيت انه قد مات.. فما استطعت ان افعل شيئاً.. وما علمت ماذا افعل.. فما كان مني الا ان وضعته وسجيت وجهه بالغطاء (غطيت وشه مش قادرة أبص عليه)..

وذهبت الي الستار وفتحت الستر.. فنظر إليَّ المسلمون بدهشة (ستار بيفصل بين حجرة النبى وبين المسجد النبوى.. فمكنش حد بيفتحه إلا النبى عليه الصلاة والسلام.. مفيش إمرأة فتحته) فتقول عائشه فما كان مني الا ان صرخت في المسلمين وقلت: مات رسول الله.. مات رسول الله..

فضج المسجد بالبكاء.. فأما علي بن ابي طالب فأُقعد (مش قادر يمشي بقى عنده زى شلل مؤقت).. وأما عثمان بن عفان فظل يجري في المسجد يُمنةً ويسرى، رايح جاى زى الطفل اللى بيبحث عن أمه..