#Қонунчиликдаги_янгиликлар

Фармацевтика маҳсулотларини сертификатлаштириш қоидалари тасдиқланди

Фармацевтика маҳсулотларини сертификатлаштириш қоидалари Адлия вазирлигида давлат рўйхатидан ўтказилди (рўйхат рақами 3386, 12.09.2022 й.).

✅ Мазкур қоидаларга кўра, фармацевтика маҳсулотларини сертификатлаштириш аккредитация қилинган сертификатлаштириш органлари томонидан амалга оширилади.

✅ Фармацевтика маҳсулотларини сертификатлаштириш учун аризачи электрон шаклдаги ариза ҳамда унга илова қилинадиган ҳужжатлар “Ягона дарча” божхона ахборот тизими орқали сертификатлаштириш органларига юборади.

✅ Сертификатлаштириш органлари 2 кунда аризани кўриб чиқиб сертификатлаштиришни ўтказиш тўғрисида қарор қилади ёки аризачига рад этилганлиги тўғрисида асослантирилган хулоса беради.

Сертификатлаштириш қуйидаги ҳолларда рад этилади:

🔘 аризада маълумотлар тўлиқ кўрсатилмаганда ва (ёки) аризага илова қилинган ҳужжатлар тўлиқ тақдим этилмаганда;
🔘 сертификатлаштириш учун тақдим этилган фармацевтика маҳсулоти давлат рўйхатидан ўтказилмаганлиги аниқланганда;
🔘 сертификатлаштириш учун тақдим этилган фармацевтика маҳсулоти қалбакилаштирилганлиги аниқланганда.

✅ Сертификатлаштиришни ўтказиш тўғрисида қарор қабул қилингандан бошлаб 2 кунда сертификатлаштиришни ўтказиш учун фармацевтика маҳсулотлари сақланаётган жойга чиққан ҳолда намуналарни идентификация қилиш ва танлаб олиш ишлари амалга оширилади.

✅ Фармацевтика маҳсулотларини сертификатлаштириш натижалари бўйича тўпланган ҳужжатлар сертификатлаштириш органининг фармацевтика маҳсулотини сертификатлаштиришда иштирок этмаган холис ходимига тақдим этилади.

✅ Холис ходим (техник қўмита) сертификатлаштириш натижалари бўйича тўпланган ҳужжатларни 1 кун ичида кўриб чиқади ҳамда мувофиқлик сертификатини бериш ёки уни беришни рад этиш тўғрисида қарор қабул қилади.

🕊@uzpharmcontrol

Репортаж | Дори воситаларини сифатини назорат қилиш ва стандартлаштириш лабораториясига янги ускуна ўрнатилди

Дори воситаларини cифатини назорат қилиш ва стандартлаштириш лабораторияси - Давлат маркази тассаруфидаги юқори таҳлил ускуналарга эга аниқ лаборатор таҳлилларини қила оладиган ва сўнгги уч йил давомида юқори технологияларни жорий қилаётган кучли билим салоҳиятига эга кадрларни ўзида жамлаган катта лабораториядир.

Ушбу лавҳада мазкур лаборатория фаолияти билан яқиндан танишасиз.

🕊@uzpharmcontrol

​​Қиёслаш лабораторияси томонидан навбатдаги ўқув семинар ва тренинг ташкил қилинди

Жорий йилнинг 14 сентябр санасида Давлат марказининг катта мажлислар залида Қиёслаш лабораторияси томонидан тиббиёт ташкилотида метрологик таъминотни ташкил қилиш юзасидан Тошкент шаҳрининг барча туғруқ комплекс ҳамда перинатал маркази бош ҳамширалари учун навбатдаги ўқув семинар ва тренинг ташкил қилинди.

ССВ тасаруфидаги даволаш профилакториясида қўлланиладиган ўлчаш воситаларини ўз вақтида қиёслаш бўйича сертификатлаштириш ва метрологик таъминотни таминлаш мақсадида маъсул ходимларга амалий ёрдам бериш ҳамда уларнинг амалий кўникма ва билимларини янада мустаҳкамлаш учун ташкил қилинган мазкур семинар давомида Қиёслаш лабораторияси мудири Нодирбек Абдуллаев иштирокчиларни қизиқтирган барча саволларига батафсил маълумот ва жавоблар берди.

Тиббиётда қўлланиладиган тиббий ўлчаш воситаларининг метрологик қиёслаш (текшириш) хизматларини олиб борувчи Қиёслаш лабораторияси томонидан жорий йилнинг 2 август санасида Тошкент шаҳрининг 12 туман бош ҳамширалари учун, шунингдек, 8-12 август кунлари Тошкент шаҳрининг барча оилавий поликлиникалари бош ҳамширалари учун махсус ўқув семинар ва тренинглар ташкил қилинган эди.

🕊@uzpharmcontrol

​​Давлат маркази Туркиянинг "Abdi Ibrahim" компанияси билан ўзаро ҳамкорликни йўлга қўяди

“Дори воситалари, тиббий буюмлар ва тиббий техника экспертизаси ва стандартлаштириш Давлат маркази” мутахассисларидан иборат ишчи гуруҳ хизмат сафари билан Туркия давлатида бўлиб тургани ҳақида хабар берган эдик.

Мазкур хизмат сафари Туркия фармбозорида сўнги 20 йил давомида етакчи бўлиб келаётган "Abdi Ibrahim" компаниясига ташриф билан давом этди.

Ташрифда ишчи гуруҳ вакиллари "Abdi Ibrahim" компанияси таркибида аккредитациядан ўтган Туркиядаги биринчи илмий-тадқиқот маркази лабораториялари фаолияти билан яқиндан танишишди.

Шунингдек учрашув давомида, Ўзбекистонга инвестиция киритиш жумладан, "Abdi Ibrahim" компаниясини маҳсулотларини юртимизда ишлаб чиқаришни йўлга қўйиш масалалари муҳокама қилинди.

Ташриф якунида Давлат марказининг синов марказлари ва лабораториялари мутахассислари учун жорий йилнинг 11-14 октябрь кунлари турк компанияси мутахассислари иштирокида қисқа муддатли малака алмашинишни ташкиллаштириш бўйича келишувга эришилди.

Маълумот учун "Abdi Ibrahim" компанияси дунёнининг 60дан ортиқ давлатига ўз маҳсулотларини экспортини йўлга қўйган, 110 йилдан буён фаолият юритиб келаётган дунёдаги нуфузли фармацевтика компанияларидан бири ҳисобланади.

🕊@uzpharmcontrol

​​Давлат марказининг Самарқанд вилоятидаги шўъба корхонаси ходимлари билан учрашув ташкил этилди

Вазирлар Маҳкамасининг 2022 йил 2 апрелдаги “Дори воситалари ва тиббий буюмларни мажбурий рақамли маркировкалаш тизимини жорий этиш тўғрисида”ги 149-сонли карорига мувофиқ жорий этилаётган, дори воситaлари ва тиббий буюмларни рақамли маркировкалаш ишлари юзасидан жорий йилнинг 19 сентябр санасида Давлат марказининг Самарқанд вилоятидаги шўъба корхонасида учрашув ташкил этилди.

Учрашувда Давлат марказининг Дори воситалари ва тиббиёт буюмларини рақамли маркировкалаш бўлими етакчи мутахассиси Искандар Иногамов томонидан мазкур корхонада фаолият юритаётган ходимларга:

- маҳаллий ишлаб чиқарувчиларга дори воситалари ва тиббий буюмларни мажбурий рақамли маркировкалаш тартиби жорий қилинган кундан бошлаб, мажбурий рақамли маркировкалаш тартиби жорий қилинган кунга қадар ишлаб чиқарилган дори воситалари ва тиббий буюмларни (қадоқда кўрсатилган сана) рақамли маркировкаланмаган ҳолда 90 кун ичида сертификациядан ўтказишга;

- хорижий ишлаб чиқарувчиларга дори воситалари ва тиббий буюмларни мажбурий рақамли маркировкалаш тартиби жорий қилинган кунга қадар ишлаб чиқарилган (қадоқда кўрсатилган сана) ва рақамли маркировкаланмаган маҳсулотни 180 кун ичида сертификациядан ўтказиш ҳамда “эркин муомалага чиқариш (импорт)” божхона режимига расмийлаштиришга рухсат берилганлиги юзасидан батафсил тушунтириш берилди.

Шунингдек, Давлат марказининг Самарқанд вилоят шўъба корхонаси Сертификатлаштириш органи ва Синов маркази мутахассилари томонидан берилган саволларга атрофлича жавоблар берилди.

Вазирлар Маҳкамасининг тегишли қарорига мувофиқ, дори воситалари ва тиббий буюмларни мажбурий рақамли маркировкалаш тизими 2022–2025 йиллар давомида босқичма-босқич жорий қилиниши белгиланган бўлиб, Қарорга кўра, 2022 йил 1 сентябрдан бошлаб иккиламчи (ташқи) қадоқларда ишлаб чиқарилган дори воситалари мажбурий рақамли маркировкаланиши лозим.

🕊@uzpharmcontrol

​​Европа фармакопеяси тақдимотига бағишланган халқаро конференция иш бошлади

Жорий йилнинг 19 сентябрь куни Франциянинг Страсбург шаҳрида Соғлиқни сақлаш ва дори воситалари сифати бўйича Европа директорати томонидан Европа фармакопеясининг 11-нашрининг чоп этилиши ва амалиётга татбиқ этилиши муносабати билан “Ҳамкорлик, инновация ва илмий маҳорат” мавзусидаги халқаро конференция ўз ишини бошлади.

Гибрид шаклда ўтаётган халқаро тадбир доирасида 60 га яқин давлатлардан ташриф буюрган 200 дан ортиқ тор доирадаги етакчи экспертларни, жумладан, Европа институтлари, миллий ваколатли органлар, саноат ва илмий тадқиқот институтлари ва давлат идоралари вакилларини, олимларни, мутахассисларни бирлаштириб, дори воситаларини хавфсизлиги, сифати ва самарадорлигини таъминлаш борасида эришилган ютуқлар ва мавжуд муаммоларни бартараф этиш бўйича мунозаралар ўтказилмоқда.

Таъкидлаш жоиз, мазкур анжуманда Фармацевтика тармоғини ривожлантириш агентлигининг ҳузуридаги “Дори воситалари, тиббий буюмлар ва тиббий техника экспертизаси ва стандартлаштириш Давлат маркази” мутасадди мутахассислари ҳам иштирок этишмоқда.

🕊@uzpharmcontrol

​​“Хавфга йўналтирилган Постмаркетинг назорати” ўқув курси ташкил этилди

Жорий йилнинг 13-21 сентябр кунлари Фармацевтика тармоғини ривожлантириш агентлиги ҳузуридаги “Дори воситалари, тиббий буюмлар ва тиббий техника экспертизаси ва стандартлаштириш Давлат маркази”да Постмаркетинг назорати тизимини жорий этишни йўлга қўйиш юзасидан постмаркетинг назорати жараёнининг тўлиқ циклини синов тариқасида ўтказишни ўрганиш мақсадида “Хавфга йўналтирилган Постмаркетинг назорати” мавзусида ўқув курси ташкил этилди.

USP техник маслаҳатчиси Тимоти Нвогу иштирокида бўлиб ўтган мазкур ўқув курсида:

▪️ Давлат марказининг Постмаркетинг назорати бўлими ва синов лабораториялари ходимлари;
▪️ Стандартлаштириш ва сифат бўлими ходимлари;
▪️ «Зарур амалиётлар маркази» ДУК ходимлари;
▪️ Агентликнинг Лицензиялаш ва назорат қилиш бошқармаси ҳодимлари қатнашишди.

Мазкур ўқув курси Ўзбекистон Республикаси Президентининг 2022 йил 21 январдаги “2022 — 2026 йилларда Республиканинг фармацевтика тармоғини жадал ривожлантиришга оид қўшимча чора-тадбирлар тўғрисида”ги ПФ-55-сон Фармони ижросини таъминлаш мақсадида ташкил этилган бўлиб, Фармацевтика тармоғини ривожлантириш агентлиги ва Америка Қўшма Штатлари Халқаро тараққиёт агентлиги (USAID) ўртасида 2020 йил 9 октябрда “Дори воситалари сифатини рағбатлантириш плюс” дастурини (“PQM+” дастури) амалга ошириш борасидаги ҳамкорлик тўғрисида имзоланган меморандум доирасида амалга оширилмоқда.

🕊@uzpharmcontrol

“Велосипед куни” акцияси юқори савияда ташкил этилди

Президентимизнинг тегишли қарори ижросини таъминлаш мақсадида бугун “Халқаро автомобилсиз кун” муносабати билан мамлакатимизда “Велосипед куни” акцияси бўлиб ўтди.

Мазкур акцияда 700 нафардан ортиқ ҳамюртларимиз қаторида Фармацевтика тармоғини ривожлантириш агентлиги ҳузуридаги “Дори воситалари, тиббий буюмлар ва тиббий техника экспертизаси ва стандартлаштириш Давлат маркази Фармакопея қўмитаси мутахассиси Мирсодиқ Назарқулов ҳам иштирок этди ҳамда пойтахтимиздаги “Ашхобод” истироҳат боғида 11.08 километр масофани велосипедда босиб ўтди.

🕊@uzpharmcontrol

​​Ҳалқаро конференциясида Ўзбекистон Давлат фармакопеяси 1-нашрининг 2-жилди тақдим этилди

Аввал хабар берганимиздек, айни кунларда Франциянинг Страсбург шаҳрида Европа фармакопеяси 11-нашрига бағишланган халқаро конференция бўлиб ўтмоқда.

Мазкур конференцияда Ўзбекистон Республикаси Давлат фармакопеяси бош муҳаррири Хабибулла Джалилов давлат фармакопеяси 1-нашри, 2-жилдининг 3 қисмдан иборат бўлган китоб кўринишдаги ва электрон шаклларинин Соғлиқни сақлаш ва дори воситалари сифати бўйича Европа директорати (EDQM) раҳбариятига тақдим этди.

Маълумот учун, бугунги кунга нисбатан Жаҳон соғлиқни сақлаш ташкилоти томонидан жами 30 дан ортиқ ҳудудий ва миллий фармакопеялар эътироф этилиб, Жаҳон фармакопеялари ва фармакопея органларининг индексига («The Index of World Pharmacopoeias and Pharmacopoeial Authorities by World Health Organization») киритилган бўлиб, шу жумладан Ўзбекистон Республикаси Давлат фармакопеяси ҳам мазкур индексдан ўрин эгаллаган.

Шунингдек, пленар мажлисда Европа фармакопеяси фаолиятига оид кўплаб чуқур таҳлилий мавзулар, жумладан, Европа Иттифоқининг дори воситаларига нисбатан қонунчиликни шакллантириш муаммолари, Европа фармакопеясининг 11-нашри тўғрисида, миллий фармакопея органининг фаолияти ва бошқа масалалар тўғрисида спикерлар маърузалари билан иштирок этишди.

Конференциянинг миллий фармакопеяларни уйғунлаштириш мавзусида ўтказилган секцион йиғилишида фармакопея қўмитаси раиси Камола Нуридуллаева Европа фармакопеясининг 9-, 10-нашрлари билан уйғунлаштирилган ҳолда ишлаб чиқилган Ўзбекистон Республикаси Давлат фармакопеяси 1-нашри, 1- ва 2-жилдларини амалиётга жорий этиш бўйича юртимизда амалга оширилаётган ишлар бўйича маъруза қилди.

🕊@uzpharmcontrol

​​Давлат марказининг Қашқадарё ва Андижон вилоятидаги шўъба корхонаси ходимлари билан учрашув бўлиб ўтди

Ўзбекистон Республикаси Вазирлар Маҳкамасининг 2022 йил 2 апрелдаги “Дори воситалари ва тиббий буюмларни мажбурий рақамли маркировкалаш тизимини жорий этиш тўғрисида”ги 149-сонли қарорига мувофиқ жорий этилаётган, дори воситaлари ва тиббий буюмларни рақамли маркировкалаш ишлари юзасидан “Дори воситалари, тиббий буюмлар ва тиббий техника экспертизаси ва стандартлаштириш Давлат маркази”нинг Қашқадарё ва Андижон вилоятидаги шўъба корхонасида учрашувлар ташкил этилди.

Учрашув давомида Давлат марказининг Дори воситалари ва тиббиёт буюмларини рақамли маркировкалаш бўлими етакчи мутахассиси Искандар Иногамов томонидан мазкур корхоналарда фаолият юритаётган ходимларга дори воситалари ва тиббий буюмларни рақамли маркировкаланмаган ҳолда сертификациядан ўтказишга қачондан бошлаб йўл қўйилмаслиги ҳамда рақамли маркировкалаш тартиби ва қоидалари ҳақида батафсил тушунтириш берилди.

Шунингдек, Давлат марказининг ҳудудлардаги шўъба корхоналари Сертификатлаштириш органи, Микробиология таҳлил лабораторияси ҳамда Фармако-токсикологик таҳлил лабораторияси мутахассилари томонидан берилган саволларга атрофлича жавоблар берилди.

🕊@uzpharmcontrol

Фармаконазорат ўзи нима ва унинг мақсадлари нималардан иборат?

Фармаконазорат (pharmacovigilance) - дори препаратлари қўлланилганда нохуш оқибатларини аниқлашга, баҳолашга, тушунишга ва олдини олишга қаратилган илмий ва амалий фаолият тури.

Фармаконазорат беморлар ва аҳоли саломатлигини ҳимоя килишга қаратилган.

Фармаконазоратнинг мақсадлари қуйидагилар ҳисобланади:

🔘 одамда рўйхатдан ўтказилган дори препаратларининг рўйхатдан ўтказилганлик гувоҳномасининг шартларига мувофиқ ёки мувофиқ бўлмаган қўлланишидан кейин, ёки касбий фаолияти билан боғлиқ бўлган таъсир этиши натижасида ривожланадиган нохуш реакцияларнинг нохуш оқибатларини олдини олиш;

🔘 дори препаратларининг хавфсиз ва самарали қўлланилишини, жумладан, беморларга, соғлиқни сақлаш тизими ходимларига ва аҳолига уларнинг хавфсизлиги ҳақидаги маълумотни ўз вақтида тақдим этиш орқали таъминлаш.

Ҳурматли юртдошлар! Агарда Сиз, дори воситаларни қўллаш чоғида унинг ножўя таъсир ҳолатига дуч келсангиз, белгиланган тартибда Фармацевтика тармоғини ривожлантириш агентлиги ҳузуридаги “Дори воситалари, тиббий буюмлар ва тиббий техника экспертизаси ва стандартлаштириш Давлат марказига мурожаат қилинг. Бунинг учун хабарнома картаси шаклини юклаб олишингиз ва тўлдиришингиз керак бўлади.

Wорд шаклида тўлдирилган хабарнома картаси шаклларини қуйидаги электрон почтага - farmakonadzor@ssv.uz ёки 100002, Тошкент ш., Озод кўчаси, К. Умаров тор кўчаси, 16-уй манзилига жўнатишингиз керак.

Мурожаат учун: (71) 203-01-01 | 4144

🕊@uzpharmcontrol

Фармацевтика маҳсулотларини сертификатлаштириш қоидалари тасдиқлангани ҳақида хабар берган эдик.

Хўш, бу қоидалар билан фармацевтика маҳсулотларини сертификатлаштириш жараёнида қандай ўзгаришлар бўлиши кутилмоқда?

Ушбу савол юзасидан “Дори воситалари, тиббий буюмлар ва тиббий техника экспертизаси ва стандартлаштириш Давлат маркази” директорининг биринчи ўринбосари Амирхон Азимов "Ёшлар" телеканалига интервью берди.

🕊@uzpharmcontrol

25 сентябр - Бутунжаҳон фармацевтлар куни!

Жаҳон фармацевтлар куни 2009 йилда Туркиянинг Истанбул шаҳрида Халқаро фармацевтлар федерацияси (ХФФ) Кенгаши томонидан ҳар йили 25 сентябрь куни нишонланиши белгиланган.

Анъанага кўра, Халқаро фармацевтлар федерацияси соҳа мутахассисларини шу кунда инсонлар саломатлигини яхшилашда фармацевтларнинг ролини намойиш этувчи турли тадбирларни ўтказишга чорлайди.

Бу йилги фармацевтлар куни “Дорихона соғлом дунё учун ҳаракатда бирлашди” шиори остида нишонланади.

Фармацевтика соҳасининг жонкуяр, фидоий вакиллари барчангизни бугунги байрам билан муборакбод этамиз!

🕊@uzpharmcontrol

29 сентябр куни тадбиркорлар билан очиқ мулоқот ўтказилади

Тадбиркорликнинг, айниқса кичик ва ўрта бизнес ривожига кўмаклашиш мақсадида жорий йилнинг 29 сентябр санасида Фармацевтика тармоғини ривожлантириш агентлиги ҳузуридаги “Дори воситалари, тиббий буюмлар ва тиббий техника экспертизаси ва стандартлаштириш Давлат маркази” биносида тадбиркорлар билан учрашув бўлиб ўтади.

☑️ Мазкур мулоқотда бизнес эгалари:

▪️Мавжуд фармацевтика маҳсулотларини ишлаб чиқарувчи корхоналар фаолиятидаги масалалар ҳамда соҳада амалга оширилаётган лойиҳалар;
▪️ Фарммаҳсулотларни ишлаб чиқариш, рўйхатдан ўтказиш ва сертификатлаш;
▪️ Референт нархларни шакллантириш, рақамли маркировкалаш тизимлари;
▪️ GxP стандартларини жорий қилиш жараёнлари ва бошқа масалалар бўйича ўзларини қизиқтирган саволларга жавоб олишлари мумкин.

Мурожаат учун: (71) 203-81-81 | 231
Онлайн рўйхатдан ўтиш учун: produce@uzpharmagency.uz

🕊@uzpharmcontrol

​​Хорижлик мутахассислар Ўзбекистон Фармакопеясини ишлаб чиқиш бўйича амалга оширилаётган ишларни юқори баҳолашди

Франциянинг Страсбург шаҳрида бўлиб ўтаётган Европа фармакопеяси 11-нашрига бағишланган халқаро конференция доирасида Ўзбекистон делегацияси вакиллари Жаҳон соғлиқни сақлаш ташкилоти Тиббий маҳсулотлар соҳасидаги сиёсат ва стандартлар департаменти ва Халқаро фармакопея раҳбари Gwaza Luther ҳамда Америка Қўшма Штатлари Фармакопея конвенциясининг фармацевтик ҳамкорлик бўйича бош менеджери жаноб Dr. Moore Kevin билан учрашишди.

Суҳбат чоғида Давлат фармакопеяси таҳририяти Бош муҳарирри Хабибулла Джалилов хорижлик ҳамкасбларига Ўзбекистон Республикаси Давлат фармакопеясини ишлаб чиқиш бўйича амалга оширилаётган ишлар ҳақида қисқача маълумот берди. Жаноб Gwaza Luther ва Dr. Moore ушбу ташаббусни эътироф этиб, қилинаётган ишларни юқори баҳолади.

Шунингдек, самимий кечган мулоқот давомида Ўзбекистон Республикаси Давлат фармакопеясини ишлаб чиқиш жараёнида замонавий илмий тадқиқот ишларини жорий этиш, шу жумладан фармацевтик фаол ингридиентлар, ёрдамчи моддалар ва ёт аралашмаларнинг стандарт намуналарини белгилаш, уларни Давлат фармакопеясига киритиш ва ишлаб чиқарувчи компаниялар ва назорат таҳлил лабораторияларни фармацевтик стандарт намуналари билан таъминлаш масалалари бўйича ҳамкорлик қилиш йўналишлари муҳокама қилинди.

🕊@uzpharmcontrol

​​Ҳиндистонда “IPHEX ва Global Regulators Conclave” Глобал регуляторлар конклави ўтказилди

Ҳиндистоннинг дори воситаларни тартибга солувчи миллий органи ҳамда Ҳиндистон ҳукуматининг Савдо саноат вазирлиги томонидан ташкил этилган Ҳиндистон фармацeвтика маҳсулотлари экспортини ривожлантириш кeнгаши (Pharmexcil) томонидан жорий йилнинг 21-23 сентябр кунлари Нью-Деҳли шаҳрида “IPHEX ва Global Regulators Conclave” Глобал регуляторлар конклави ўтказилди.

“Pharmexcil” кенгашининг расмий таклифига биноан мазкур анжуманда Ўзбекистондан Фармацевтика тармоғини ривожлантириш агентлиги ҳузуридаги “Дори воситалари, тиббий буюмлар ва тиббий техника экспертизаси ва стандартлаштириш давлат маркази” Фармакопея қўмитаси раиси ўринбосари Улуғбек Яхъяев ва “Зарур амалиётлар маркази” директори Азиз Дўсматовлар ўз маърузаси билан иштирок этди.

Маълумот учун, Глобал регуляторлар конклавининг асосий йўналишлари:

🔘 ҳудудлар ичида ва ўртасида тартибга солиш стандартларини уйғунлаштириш бўйича мумкин бўлган ҳамкорлик;
🔘 тиббий маҳсулотларга қулай фойдаланиш учун ўзаро ишонч механизми;
🔘 тиббий маҳсулотлар учун таъминот занжирининг мустаҳкамлигини таъминлаш;
🔘 ҳудудлар бўйлаб ривожланаётган меъёрий ўзгаришлар ҳақида хабардорликни ошириш масалаларни ўз ичига олади.

🕊@uzpharmcontrol

Фармаконазорат: Дори воситалари томонидан болаларда овқат ҳазм қилиш аъзоларининг шикастланиши

Ёши катталарни даволашдаги каби педиатрик амалиётда даволаш вақтида қўлланилаётган дори воситаларининг бола организмига бўлган таъсирини ўрганиш жуда муҳимдир!

Шифокор ва фармацевтлар болаларга биттадан ортиқ дори воситаси буюрилганда жигар шикастланиши (гепатит, холестаз, фиброз, стеатогепатит) мумкинлигини ёдда тутишлари зарур.

Болалар учун энг хавфли бўлган дори воситаларидан бири туберкулёз, онкогематологик ва психоневрологик патологияларни даволашда қўлланиладиган воситалардир.

Қуйидаги дори гуруҳлари болаларда гепатотоксик реакцияларни келтириб чиқаради:

▪️наркозда қўлланадиган препаратлар;
▪️рифампицин;
▪️ностероид яллиғланишга қарши воситалар;
▪️сульфаниламидлар;
▪️антиретровирус воситалар;
▪️метотрексат.

Агар бола нотўғри овқатланса ёки унда сурункали протеин етишмовчилиги бўлса дори препаратларни қабул қилганда жигар шикастланишининг эҳтимоли анча юқори бўлади.

Статистик маълумотларга кўра, барча панкреатит ҳолатларининг 1,4 - 2% ни дори панкреатити ташкил этиши мумкин.

Қуйидаги дори препаратлари меъда ости безининг дори препаратларидан шикастланишини келтириб чиқаради:

▪️азатиоприн;
▪️гипотиазид;
▪️фуросемид;
▪️сульфаниламидлар;
▪️метронидазол;
▪️нитрофуранлар;
▪️тетрациклинлар ва бошқа дорилар.

Глюкокортикостероидлар, ўз навбатида, «стероид» панкреатитга олиб келишга қодир.

Ҳурматли юртдошлар! Агарда Сиз дори воситаларни қўллаш чоғида унинг ножўя таъсир ҳолатига дуч келсангиз, белгиланган тартибда Фармацевтика тармоғини ривожлантириш агентлиги ҳузуридаги Дори воситалари, тиббий буюмлар ва тиббий техника экспертизаси ва стандартлаштириш Давлат марказига мурожаат қилинг. Бунинг учун хабарнома картаси шаклини юклаб олишингиз ва тўлдиришингиз керак бўлади.

Wорд шаклида тўлдирилган хабарнома картаси шаклларини қуйидаги электрон почтага - farmakonadzor@ssv.uz ёки 100002, Тошкент ш., Озод кўчаси, К. Умаров тор кўчаси, 16-уй манзилига жўнатишингиз керак.

Мурожаат учун: (71) 203-01-01 | 4144

🕊@uzpharmcontrol

19 турдаги 117923 ўрам фармацевтика маҳсулотларига мувофиқлик сертификати берилиши рад этилди

Фармацевтика тармоғини ривожлантириш агентлиги ҳузуридаги «Дори воситалари, тиббий буюмлар ва тиббий техника экспертизаси ва стандартлаштириш Давлат маркази»нинг Тиббий маҳсулотларни сертификатлаштириш марказий органи жорий йилнинг июль-август ойларида сертификатлаштириш жараёнида номувофиқлиги аниқланган фармацевтика маҳсулотлари тўғрисида маълумот берди.

Давлат марказининг Тиббий маҳсулотларни сертификатлаштириш марказий органига бўлган мурожаатлар асосида юртимизда ҳамда Хитой, Ҳиндистон, Словакия, Австрия ва Покистон давлатларида ишлаб чиқарилган 19 турдаги 117923 ўрам, қиймати 6,085,006,000 сўм бўлган фармацевтика маҳсулотлари (батафсил рўйхат) қўллаш учун яроқсиз деб топилиб, сертификатлаштирилиши рад этилди.

☑️ Маълумот учун, «Мувофиқлик сертификати» — сертификатланган маҳсулотнинг белгиланган талабларга мувофиқлигини тасдиқлаш учун сертификатлаштириш тизими қоидаларига биноан берилган ҳужжат ҳисобланади.

Хурматли юртдошлар! Дори воситаси, тиббий буюм ва тиббий техниканинг номи, Давлат рўйхатидан ўтган рақами, чиқарилган шакли, ишлаб чиқарган мамлакат, мувофиқлик сертификат берилган сана ва бошқа тегишли маълумотларни Дори воситалари, тиббий буюмлар ва тиббий техника экспертизаси ва стандартлаштириш Давлат маркази расмий веб сайтидан олишингиз мумкин.

Эслатиб ўтамиз, “Махсус электрон тизим орқали айрим фаолият турларини лицензиялаш тартиби тўғрисида”ги ягона низом (рўйхат рақами 80-сон 21.02.2022) га кўра, дори воситалари ва тиббий буюмларни мувофиқлик сертификатларисиз сақлаш ва (ёки) реализация қилиш, Ўзбекистон Республикасида рўйхатдан ўтказилмаган, сифатсиз, қалбакилаштирилган дори воситаларини ва тиббий буюмларни, шунингдек, Ўзбекистон Республикасида рўйхатдан ўтказилган дори воситаларининг ғайриқонуний нусхаларини сақлаш ва (ёки) реализация қилиш - фаолият учун берилган лицензиянинг амал қилиши белгиланган тартибда тўхтатилишига олиб келадиган, лицензия талаблари ва шартларини қўпол равишда бузилиши ҳисобланади!

🕊@uzpharmcontrol

"Дармон" ахборот тизими нима ва у қандай вазифаларни бажаради?

Дори воситаларини рўйхатдан ўтказиш, қайта рўйхатдан ўтказиш учун "Дармон" тизимида электрон аризалар электрон тарзда 2021 йилнинг 1 августидан бошлаб қабул қилина бошланди.

Хўш, бу тизим тадбиркорлар учун қандай қулайлик яратди ва унинг афзалликлари нималардан иборат? Батафсил мазкур репортажда яқиндан танишамиз.

🕊@uzpharmcontrol

Референт нарх шакллантириш тизими доирасида дори воситаларининг нархларини қайд этиш қандай амалга оширилади?

✅ Жавоб: Ўзбекистон Республикаси Президентининг 2019 йил 31 декабрдаги ПҚ-4554-сон қарорига мувофиқ, референт нарх шакллантириш тизими доирасида дори воситалари нархларини қайд этиш тартибини белгиловчи Низом (рўйхат рақами 3242-сон 10.06.2020) ишлаб чиқилган.

Мазкур ҳужжатга кўра, Фармацевтика тармоғини ривожлантириш агентлиги:

➖ дори шакли,
➖ қадоқдаги сони,
➖ дозаси,
➖ концентрацияси,
➖ ҳажми ва қадоқланишини ҳисобга олган ҳолда айни бир ишлаб чиқарувчининг худди шундай фаол моддага эга дори воситаларини ишлаб чиқарувчи мамлакатда, референт мамлакатларда ва Ўзбекистон Республикасида охирги 6 ойда сотилган нархларини таҳлил қилиш натижаси асосида ҳар бир савдо номи учун чекланган нархларни қайд этади.

☑️ Референт мамлакатлар нима?

Жаҳон банкининг аҳоли жон бошига нисбатан ялпи ички маҳсулотнинг ҳисобланган даромадлар даражасидан юқори, ўртачадан юқорироқ ва ўртачадан пастроқ бўлган давлатлар гуруҳига кирувчи Ўзбекистон Республикаси билан макроиқтисодий жиҳатдан таққосланадиган мамлакатлар - референт мамлакатлар ҳисобланади.

☑️ Бизда қайси референт мамлакатлар танланган?

Ўзбекистон Республикаси Соғлиқни сақлаш вазирлигининг 2020 йил 10 июндаги “Референт нарх шакллантириш тизими доирасида дори воситалари нархларини қайд этиш тартиби тўғрисида”ги низомига (рўйхат рақами 3242-сон 10.06.2020) мувофиқ, қўйидаги мамлакатлар референт мамлакатлар сифатида танлаб олинган:

▪️Венгрия
▪️Россия Федерацияси
▪️Украина
▪️Польша Республикаси
▪️Тожикистон Республикаси
▪️Словения Республикаси
▪️Қозоғистон Республикаси
▪️Болгария Республикаси
▪️Беларусь Республикаси
▪️Қирғизистон Республикаси

☝️ Содда тилда айтганда, референт нархда импорт қилинаётган (ёки маҳаллий) дори воситасининг ишлаб чиқарувчиси ўз маҳсулотини сотаётган юқорида санаб ўтилган 10 та референт мамлакатлардаги ва ишлаб чиқариладиган мамлакатдаги нархларни тақдим этади.

Бунда дори воситасини ишлаб чиқарувчи ўз маҳсулотларининг улгуржи ва чакана бўлмаган, воситачисисиз асосий нархини тақдим этиши зарур.

☑️ Чекланган нархлар қандай тартибда ҳисобланади?

Ўзбекистонга ўз маҳсулотини олиб кираётган барча ишлаб чиқарувчилар дори нархини рўйхатдан ўтказиш учун, юқорида санаб ўтилган 10 та референт мамлакатлардаги ва ишлаб чиқариладиган давлатдаги нархларни тизимга киритадилар ва тизим уларнинг ўртача қийматини ҳисоблайди хамда охирги 6 ойда Ўзбекистонга олиб кирилган нарх билан солиштирилади.

Улар орасидан паст нарх аниқланади ва тизим ушбу нархни автоматик равишда чекланган нарх сифатида белгилайди.

📑 Якуний босқич: Фармагентликнинг ваколатли органи томонидан ушбу нархлар хаққонийлиги ўрганиб чиқилади ҳамда тўғри бўлгандагина тизимда тасдиқланади.

☑️ Ушбу якуний босқичдан кейингина, импорт маҳсулотнинг юртимизга олиб кирилишига рухсат этилади ҳамда маълумотлар Фармацевтика тармоғини ривожлантириш агентлигининг расмий сайтида юритилаётган реестрга жойланади.

ℹ️ Маълумот ўрнида, Истеъмолчилар ҳуқуқларини ҳимоя қилиш агентлиги томонидан яратилган @dorinarx_bot боти айнан мана шу маълумотлар асосида ўз базасини шакллантиради.

🕊@uzpharmcontrol

Самарқанд яна бир нуфузли тадбирга мезбонлик қилади!

Жорий йилнинг 7 октябрь санасида Кўҳна Самарқанд шаҳрида Халқ табобати бўйича "Абу Али ибн Сино ва Буюк Ипак йўли" мавзуида I Ҳалқаро илмий – амалий анжуман ўтказилади.

Мазкур анжуманда Фармацевтика тармоғини ривожлантириш агентлиги ва "Дори воситалари, тиббий буюмлар ва тиббий техника экспертизаси ва стандартлаштириш Давлат маркази" мутахасисслари ҳам иштирок этишади.

🕊@uzpharmcontrol