❗️JSST dorilarga chidamli sil va gepatit C ni davolash bo‘yicha tezkor xabarni eʼlon qildi

🌏 Jahon sog‘liqni saqlash tashkiloti bir paytning o‘zida ham gepatit C, ham keng turdagi dorilarga yoki rifampitsinga chidamli tuberkulyozdan aziyat chekayotgan bemorlarni davolashga doir tezkor xabarni eʼlon qildi.

🔬Tadqiqotlar davomida tasdiqlanishicha, har ikki xastalikni birgalikda muolaja qilish bir qator afzalliklarga ega. Xususan, bunday terapiya davolash samaradorligini oshirib, kuzatuv ostidagi bemorlar soni kamayishi hamda o‘lim ko‘rsatkichlari qisqarishiga xizmat qiladi.

💊 Mazkur jarayonda qisqa yoki uzoq muddatli peroral muolaja kurslaridan foydalanish mumkin. Buning uchun dori vositalarining o‘zaro taʼsiri va bemorning xohish-istaklari inobatga olinishi kerak.

📋 JSST kelgusida ushbu yondashuv asosida sil kasalligini davolashga doir tavsiyalariga tegishli o‘zgartirishlar kiritishni rejalashtirmoqda.

📊 Eslatib o‘tamiz: tuberkulyozning oldini olish va uni to‘liq davolash mumkinligiga qaramay, bu xastalik yer yuzida har yili 1,6 million nafar odamning hayotiga zomin bo‘lmoqda. Gepatit esa yuqumli kasalliklar orasida o‘lim holatlari soni bo‘yicha dunyoda ikkinchi o‘rinda turadi va yiliga 1,3 million inson shu xastalikdan ko‘z yumadi.

Farmatsevtika mahsulotlari
xavfsizligi markazi Matbuot xizmati

Telegram | Facebook | Instagram | Youtube

Jahon matbuoti: Hindistonda xavfli virus tarqalmoqda. O‘n olti nafar bemor hayotdan ko‘z yumdi

🔬Shu kunlarda Hindistonning Gujarot shtatida epidemiologik vaziyat yomonlashgan. Jahon matbuoti xabarlariga ko‘ra, hudud bo‘ylab Chandipura deb ataluvchi xavfli virus tarqalmoqda.

📊 Shtat sog‘liqni saqlash vaziri Rashikesh Patelning qayd etishicha, hozirgacha 50 ta kasallanish holati ro‘yxatga olingan. 16 kishi infeksiya oqibatida hayotdan ko‘z yumgan.

❓Xo‘sh, bu xastalik haqida bizga nimalar maʼlum?

📍Ushbu virus ilk bor 1965 yili Hindistonning Maharashtra shtatiga qarashli Chandipura qishlog‘ida aniqlangan va keyin shu joy nomi bilan atala boshlangan.

📈 O‘shandan buyon mamlakatda vaqti-vaqti bilan epidemiya avj olishi kuzatiladi. Jumladan, 2003 yili xastalik 329 bolada qayd etilib, 183 nafarining umriga zomin bo‘lgandi.

🩺 Mazkur patologiya tibbiyotda kam o‘rganilgan, faqat chivinlar chaqishi orqali yuqishi haqida maʼlumotlar bor. U isitma, bosh og‘rig‘i, talvasa (sudorogi), shish, diareya belgilari bilan namoyon bo‘ladi. Og‘ir holatlarda behushlik, koma va o‘lim holatiga olib kelishi mumkin.

🔎 Chandipura uchun maxsus davo muolajasi va vaksinalar mavjud emas. Epidemiyaga qarshi kurashda asosan profilaktik choralar qo‘llanilyapti. Xususan, virus avj olgan hududlarda malation kukuni sepilmoqda.

‼️O‘z navbatida, yuqori tana harorati kuzatilgan bemorlar nazorat ostiga olinib, ularga intensiv muolajalar buyurilyapti.

Farmatsevtika mahsulotlari
xavfsizligi markazi Matbuot xizmati

Telegram | Facebook | Instagram | Youtube

❗️Jahon sog‘liqni saqlash tashkiloti OIV diagnostikasiga doir tavsiyalarini yangiladi

📊 Maʼlumotlarga ko‘ra, hozir dunyoda OIV infeksiyasini yuqtirgan qariyb 40 million nafar bemor bor. Ular soni yiliga 1,5 million kishiga ortyapti. Eng yomoni, kasallik har yili 600 ming kishini hayotdan olib ketmoqda.

📈 Mutaxassislar bunday o‘sish dinamikasini xastalikka erta bosqichda tashxis qo‘yilmasligi bilan izohlaydi.

🩺 Masalan, JSSTning Yevropa mintaqaviy byurosiga qarashli 53 mamlakatda (Markaziy Osiyo davlatlari ham shu ro‘yxatda) OIVga chalingan bemorlarning to‘rtdan bir qismi o‘z xastaligidan bexabar bo‘lsa, qariyb yarmi o‘z tashxisini juda kech bosqichda biladi.

📋 Shularni inobatga olib, Jahon sog‘liqni saqlash tashkiloti OIV diagnostikasiga doir tavsiyalarini yangiladi.

🧪 Undan OIV/OITS hamda jinsiy yo‘l bilan yuqadigan boshqa infeksiyalar uchun ekspress-test xizmatlari ko‘lami hamda o‘z-o‘zini tekshirish imkoniyatini kengaytirishga doir ko‘rsatmalar o‘rin olgan.

🗓 Ekspertlarning xulosa qilishicha, 2030 yilgacha OIVning aholi salomatligiga tahdid sifatidagi global xavfini kamaytirishga doir ustuvor maqsadlarga erishish mumkin.

‼️ Buning uchun hukumatlar xastalikning oldini olish, unga qarshi kurashish, infeksiyani erta bosqichda aniqlash va samarali davolash uchun zarur resurslar ajratishi kerak.

Telegram | Facebook | Instagram | Youtube

Dori vositalari va tibbiy buyumlarni chakana realizatsiya qiluvchi tadbirkorlik subyektlari diqqatiga!

Joriy yilning 26-iyul kuni soat 10:00 da "Farmatsevtika mahsulotlari xavfsizligi markazi" davlat muassasasi, Soliq qo‘mitasi hamda "Asl belgisi" milliy axborot tizimi operatori "CRPT TURON" MCHJ hamkorligida dori vositalarini raqamli markirovkalash tizimini joriy etishda yuzaga kelayotgan muammolar va ularni bartaraf etishga bag‘ishlangan onlayn muloqot bo‘lib o‘tadi.

Onlayn muloqotga quyidagi havola orqali kirishingiz mumkin:
https://us02web.zoom.us/j/83715170368?pwd=iOj6aEdIWDqBzwNPWaHSRkj9afLkeR.1

Konferensiya ID: 837 1517 0368
Ishtirokchi kodi: 111414

Qo‘shimcha ma’lumot uchun:
(99) 436-56-13 Asqarov Azizxon;
Telegram:@AIAsqarov

Telegram | Facebook | Instagram | Youtube

AQSh Xalqaro taraqqiyot agentligi (USAID) “PQM+” dasturi maslahatchisi – Andjela Oliver va konsultant – Ofeliya Villyalva Roxas 2024-yil 22-30-iyul kunlari Farmatsevtika mahsulotlari xavfsizligi markazi xodimlari uchun Sifat menejmenti tizimiga oid ixtisoslashgan malaka oshirish kurslarini olib bormoqda.

Markazning Toshkent, Andijon, Samarqand, Qarshi shaharlaridagi Dori vositalar sifatini nazorat qilish va standartlashtirish laboratoriyalari xodimlariga 5 kun davomida ma’lumotlarning yaxlitligi, uzluksizlikni boshqarish, kompyuter tizimlarini tekshirish; tendensiyalarni tahlil qilish, oʻzgarishlarni nazorat qilish mavzularida ta’lim beriladi.

Bu oʻz navbatida, laboratoriya xodimlarining malakasini oshirishda hamda kelgusida Jahon sogʻliqni saqlash tashkilotining prekvalifikatsiyasi uchun ariza topshirishda samarali tayyorgarlik sifatida xizmat qiladi.

Telegram | Facebook | Instagram | Youtube

Andijon va Surxondaryo viloyatlarida dori vositalari savdosi bilan shug‘ullanib kelgan shaxslar ushlandi

Bosh prokuratura huzuridagi Departament hamda DXXning Andijon viloyati boshqarmalari tomonidan hamkorlikda o‘tkazilgan tezkor tadbirda qonunga xilof ravishda dori vositalari savdosi bilan shug‘ullanib kelgan fuqaro A.B. tegishli hujjatlari bo‘lmagan 30 quti “Elflok 100 ml” nomli dori vositasini Jalaquduq tumanidagi “Z.F.” MCHJga qarashli dorixonaga o‘tkazish uchun olib kelgan vaqtida ushlanib, uning boshqaruvidagi avtotransport vositasi va yashash xonadonidan sotish maqsadida saqlab kelingan umumiy bahosi 172,2 mln so‘mlik hujjatsiz dori vositalari ashyoviy dalil sifatida olingan.

Shu kabi, Departamentning Angor tuman bo‘limi viloyat IIB xodimlari hamkorligida o‘tkazilgan tezkor tadbirda fuqaro G.M. fuqaro M.X.ga tarkibida kuchli taʼsir qiluvchi moddalari mavjud bo‘lgan 8 quti (288 kapsula) “Reduksin layt” va 8 quti “Detox Tea” nomli dori vositalarini 4,5 mln so‘mga sotgan vaqtida ushlanib, ushbu dori vositalari ashyoviy dalil sifatida olingan.

Mazkur holatlar yuzasidan Jinoyat kodeksining tegishli moddalari bilan jinoyat ishlari qo‘zg‘atilib, tergov harakatlari o‘tkazilmoqda.

Telegram | Facebook | Instagram | Youtube