«Янгибанк» икки йиллик фаолиятидан сўнг ёпилди

Молия муассасасининг 32 мингдан ортиқ омонатчиси бўлган

Ўзбекистон Марказий банки Бошқарувининг 15 январдаги қарори билан, “Yangi Bank” АЖ фаолиятини амалга ошириш ҳуқуқини берувчи лицензияси чақириб олинди.

“Мазкур қарор банк фаолиятида аниқланган камчиликларни бартараф этиш бўйича кўрилган чоралар етарли даражада самара бермагани, жумладан, устав капитали миқдорини қонунчиликда белгиланган энг кам талаблар даражасига етказилмаганлиги, шунингдек, банклар ва банк фаолияти тўғрисидаги қонунчиликда назарда тутилган айрим талаблар бажарилмаганлиги сабабли қабул қилинди”, – дейилади МБ ахборотида.

Марказий Банк қарори билан, банк фаолиятини белгиланган тартибда тугатиш белгиланди ва тугатиш комиссияси тайинланди.

Марказий банкка кўра, Yangi Bank омонатчиларининг кафолатланган омонатлари бўйича компенсация қонунчиликда белгиланган тартибда ва миқдорларда Омонатларни кафолатлаш агентлиги томонидан тўланади.
Дастлабки ҳисоб-китобларга кўра, жами мавжуд 32 526 нафар омонатчининг 32 153 тасига кафолатланган омонат суммалари тўлиқ қайтариб берилади (омонатлар тўлаб берилиши бўйича ҳисоб-китоблар Омонатларни кафолатлаш агентлиги томонидан эълон қилинади), 373 нафар фуқаро бўйича эса кафолатланган омонат маблағларидан қолган қисми тугатиш комиссиясининг қарорига кўра қонунчиликда белгиланган тартибда қайтарилади.

“Банклардаги омонатларни ҳимоя қилиш кафолатлари тўғрисида”ги қонунга мувофиқ, жисмоний ва юридик шахсларнинг банклардаги омонатлари давлат томонидан қонунчиликда белгиланган миқдорда кафолатланади. Кафолат доирасида компенсация миқдори 2025 йилда 200 млн сўмгача пасайтирилган.

Маълумот учун, «Янги банк» рақамли тижорат банки 2023 йилда очилган.

Telegram | Instagram | You Tube | Facebook | X

🔴 Ўзбекистон чегараси «Байрактар» дронлари билан қўриқланмоқда

Давлат хавфсизлик хизмати раиси Баҳодир Қурбонов Хавфсизлик Кенгашининг кенгайтирилган йиғилишида Ўзбекистон чегараларида «Байрактар» учувчисиз учиш аппаратлари билан бутланган янги махсус бўлинманинг жанговар навбатчилиги йўлга қўйилганини маълум қилди.

Кўрилган чора-тадбирлар натижасида жанговар тайёргарлик тадбирларининг интенсивлиги ва сифат кўрсаткичлари оширилгани қайд этилган.

Маълумот учун,«Байрактар» — Туркияда ишлаб чиқарилган учувчисиз дрон бўлиб, асосан разведка, кузатув ва аниқ зарба бериш вазифаларини бажаради. Узоқ масофадан парвоз қилиши, хавфли ҳудудларни хавфсиз тарзда назорат қилиш имкони ва юқори аниқликда ишлаши билан кўп давлатлар томонидан тан олинган. Қўшимча оптик камералар ва замонавий бошқарув тизими орқали у ҳарбий операцияларда муҳим устунлик беради.

Telegram | Instagram | You Tube | Facebook | X

🔴 Кремль пропагандаси ва Россиядаги ўзбекистонликларнинг мардикор бозорлари

🎥Тўлиқ видео

✔️Ўзбекистондаги Россия бюджетидан молиялаштириладиган сайтларни ёпиш вақти келмадими?

✔️Бизда Кремль пропагандасига қарши кураша оладиган эркин матбуот борми?

Саволларга “Миллий тикланиш” демократик партиясининг Марказий кенгаши раисининг мафкуравий масалалар бўйича ўринбосари Миродил Абдураҳмонов жавоб беради.

➖“Россия қамоқхоналарида ўзбекистонликлар кўп…”

➖”Россияга нафақат меҳнат мигранти, ҳатто сайёҳ сифатида боришга ҳам чўчиб қолдик.”

Telegram | Instagram | You Tube | Facebook | X

Колония тиббиёт ходими пора билан қўлга олинди

Маҳкумлар учун ихтисослашган касалхонада даволанаётган маҳкумдан 7 500 АҚШ доллари талаб қилинган.

Маълум қилинишича, маҳкум Ички ишлар вазирлиги Шахсий хавфсизлик бош бошқармасига ариза билан мурожаат қилган. Унда колония тиббиёт бўлимида шифокор лавозимида ишловчи ходим ўз хизмат мавқеидан фойдаланиб, Жиноят кодексининг 96-моддасида назарда тутилган мажбурий даволаш чорасини 95-модда асосида бекор қилиб бериш эвазига 7 500 АҚШ доллари талаб қилгани билдирилган.

Шунингдек, ушбу шифокор Тошкент вилоятидаги кўп тармоқли поликлиникада жарроҳ бўлиб ишловчи таниши орқали пулнинг 1 500 АҚШ долларини маҳкумнинг укасидан олгани, қолган маблағни эса талаб қилиб келаётгани маълум бўлган.

Мурожаат асосида ўтказилган тезкор тадбир давомида пул маблағларини олаётган вақтда Ички ишлар вазирлиги Шахсий хавфсизлик бош бошқармаси, Жазони ижро этиш департаменти ҳамда Давлат хавфсизлик хизмати ходимлари томонидан гумонланувчилар қўлга олинган.

Мазкур ҳолат юзасидан Ўзбекистон Республикаси Бош прокуратураси ҳузуридаги Иқтисодий жиноятларга қарши курашиш департаментининг Тошкент шаҳар бошқармаси томонидан жиноят иши қўзғатилиб, ҳозирда терговга қадар текширув ҳаракатлари олиб борилмоқда.

Telegram | Instagram | You Tube | Facebook | X

Андижонда криптовалюта орқали товламачилик қилган уюшган жиноий гуруҳ фош этилди

Тергов маълумотларига кўра, гуруҳ аъзолари криптоактивлар айирбошлаш билан шуғулланувчи шахсни кузатиб, ўзларини мижоз сифатида кўрсатган ҳолда Андижон шаҳрида учрашувга чақиришган.

Жабрланувчи Damas автомашинасига ўтқазилиб, гуруҳ аъзолари ўзларини ҳуқуқ-тартибот идоралари ходими сифатида таништирган. Улар криптоайланмани “ноқонуний” деб баҳолаб, жиноий жавобгарлик билан қўрқитишган.

Қурол ва ўткир тиғли жисмлар ишлатилган ҳолда жабрланувчидан 150 минг доллар талаб қилинган. Натижада 100 минг долларга тенг криптовалюта товламачилик йўли билан гуруҳга тегишли криптоҳамёнга ўтказиб олинган.

Гуруҳ етакчилари — «Ҳожи» лақабли Минҳожиддин Алимов ва «Муфтий» лақабли Абдумалик Шокиров ҳозирда қидирувда. Улар муқаддам ҳам бир қатор жиноятлар учун судланган.

Гуруҳнинг яна икки аъзоси — «Шайтон» лақабли Жавоҳир Жўрабеков ва Жавлонбек Юлдашев қўлга олинган. Шунингдек, гуруҳ аъзоларидан бири Омадбек Юсуфжонов томонидан содир этилган бошқа жиноят ҳам фош этилди: у аёл кишига куч ишлатиб, iPhone 16 Pro Max телефони ва 10 миллион сўм пулни тортиб олган.

ИИВ маълумотига кўра, ушбу гуруҳ аъзолари кўчада фуқароларга нисбатан мунтазам зўравонлик қилган, шунингдек, хорижда ҳам инсон саломатлигига қарши жиноятларга алоқадор бўлган.
Ҳозирда ҳолат юзасидан Жиноят кодексининг товламачилик, талончилик ва бошқа моддалари билан жиноят иши қўзғатилиб, тергов ҳаракатлари давом этмоқда.

Telegram | Instagram | You Tube | Facebook | X