القلوب اللي نجيها ولا تلمنا والله لو تعرينا الليالي معاد نمرها .

إن جيتني بدموع جابر والكويت
أصير لك حضن فهد والمملكة .

‏والله إن صدري معافى وخفاقي نظيف
‏لو أشوف الحزن في عين حسّادي زعلت

‏أقبل بوجهٍ يشرّف ومنطوقٍ عفيف
‏ولا لقيت اللي ينقص من حضوري رحلت

‏أتعدا عن عيوب البشر كني كفيف
‏ولا تبيّن شي للعين جنبت وغفلت .

قلبي خويّي .. ما لقلبي معازيب .

‏مما بقلبي رحت اشوف المداهيل
‏و اللي جداه الشوف يا عزتي له

‏ياليتني ما جيتها في كهف ليل
‏قضت على حالي و حالي عليله

‏قعدت اهل الدمع مثل هماليل
‏ابكي على ذيك الليالي الجميله

‏من دمع عيني يشرب الرمل ويسيل
‏حتى نفود قنيفذا سال سيله .

‏صباح الخير - داوِ جرحك لا يتسع

تعبّت أرسم حروفي شمس .. والمح بالوجيه ظلال

وإذا هزمت صبري ليالٍ سود ، بكره بتنصرني عليها بيض أيامي .

" عن خاطر حشمة الليّالي "
حتى عقب طاح الغلا من شعُوفي
ماني جارحك حتى لو تجرحين .

‏ما تقلل من مقامك غيبتك وإهمالك
‏لين ينزل قدر غزه عند اهل رام الله

‏عاذرك ومقدر ظرفك وكثرت اغلاطك
‏ومرخي لك خافقٍ ما جاك منه زله

‏بس بكره لا قصر باعك وقصر ظلالك
‏اسلم وسلم على وجه الملام وقله

‏شل يا جمال حملك في ظهور جمالك
‏ما وراك الا ديارك والطريق تدله .

أودع اللي طافني بإبتسامات
وأبدل اللي عافني بالموالي

وأقول لا دارت رحاها سهالات
و أجاهد الدنيا بصدرٍ شمالي .

لاتوقفني على حفة شموخي وانكساري
‏ولاتساومني على العزه مدام ان لي معزه

‏اعتذرلي عن جروحك مره ورد اعتباري
‏لاتدنس كل لحظه لي معك وانت المنزه !

‏عودت نفسي ما أتحسف على شي
‏لأن العمر ما يحتمل للحسايف

‏بعيش لحظات الفرح دامني حي
‏وبزرع الضحكه بجرد الشفايف

‏ولا ألحق الشرهات شي ماهو لي
‏ولا عدت اجزع من فراق الولايف

‏إن غاب غالي فالحزن باخذ شوي
‏أيام .. وتروح علومه طرايف

‏موصي قلبي لا شفت الخطا عي
‏ اما تعدلها .. أو تصد عايف .

‏يكفي اني مالحقتك بنقصان
‏وحتى الخطأ منك قبلته وعذرته

‏وعلى كثر ما صابني منك خذلان
‏الا إن قلبك بالجفى ما كسرته

‏حاولت أداري خاطرك قدر الإمكان
‏ويا للأسف طيبي جحدت ونكرته

‏روح والدروب وساع و الطيب معان
‏ولا تلتفت في قلبي اللي دمرته .

من فايض الوحشة ومن عسر المرام ّ
‏يارب أنا مالي سوى وجهك ولي

‏افسح لي من الأرض وأهلها مقام
‏تسوقني رجلي على حدّ جهلي

‏في وجهك إن وقفت قِل وانعدام
‏لا تفرح أعدائي ، ولا تزعل هلي

‏علمني أثبت .. كلما عز الكلام
‏ولا أحب اللي ما هو مكتوب لي .

على نهايات الشغف .

( هان طعن السيف ولا طعن الكلام )